ʻIsikeli

41 Pea naʻá ne ʻomi au ki he loki taupotu ki tuʻa ʻo e feituʻu toputapú,* pea naʻá ne fua ʻa e ongo pou ʻi he hūʻangá ʻi he tafaʻakí; naʻe kiupite* ʻe ono ʻa e fālahi ʻo e tafaʻaki ʻe taha pea kiupite ʻe ono ʻa e fālahi ʻo e tafaʻaki ʻe tahá. 2 Naʻe kiupite ʻe hongofulu ʻa e fālahi ʻo e hūʻangá, pea ko e ongo holisi ʻi he kaumatapā* ʻo e hūʻangá naʻe taki kiupite ʻe nima ʻa e tafaʻaki taki taha. Naʻá ne fua ʻa e lōloa ʻo e loki taupotu ki tuʻá ko e kiupite ʻe 40, pea kiupite ʻe 20 ʻa hono fālahí.

3 Pea naʻá ne hū ki loto* ʻo ne fua ʻa e fuʻu pou ʻi he tafaʻaki ʻo e hūʻangá, pea naʻe kiupite ʻe ua ʻa hono matolú, pea kiupite ʻe ono ʻa e fālahi ʻo e hūʻangá. Ko e ongo holisi ʻi he kaumatapā ʻo e hūʻangá* naʻe kiupite ia ʻe fitu. 4 Pea naʻá ne fua ʻa e loki ʻoku hanga mai ki he loki taupotu ki tuʻa ʻo e feituʻu toputapú, pea naʻe kiupite ʻe 20 ʻa hono lōloá pea kiupite ʻe 20 ʻa hono fālahí.+ Pea naʻá ne pehē mai kiate au: “Ko e Potu Fungani Toputapú+ eni.”

5 Naʻá ne fua leva ʻa e holisi ʻo e temipalé, pea naʻe kiupite ʻe ono ʻa hono matolú. Ko e ngaahi loki ʻi he tafaʻakí ʻa ia naʻe tuʻu takatakai ʻi he temipalé naʻe kiupite ʻe fā ʻa honau fālahí.+ 6 Ko e ngaahi loki ʻi he tafaʻakí naʻe fungavaka ua ia, ʻo ʻi ʻolunga ʻa e taha ʻi he taha, pea naʻe loki ʻe 30 ʻi he fungavaka taki taha. Naʻe ʻi ai ʻa e ngaahi fakahope takatakai ʻi he holisi ʻo e temipalé ke hoko ko e ngaahi meʻa ke ne pukepuke ʻa e ngaahi loki he tafaʻakí, koeʻuhi ke ʻoua ʻe fakapipiki ia ki he holisi ʻo e temipalé.+ 7 ʻI he ongo tafaʻaki fakatouʻosi ʻo e temipalé naʻe ʻi ai ha kakaʻanga ʻoku ʻalu takatakai* ʻa ia naʻe fālahi ange ʻi heʻene ʻalu hake ki he ngaahi loki ʻi ʻolungá.+ Naʻe fakaʻau ke toe fālahi ange mei he fungavaka ki he fungavaka ʻi he ʻalu hake ha taha mei lalo ki he fungavaka taupotu taha ki ʻolungá ʻi heʻene fou hake ʻi he fungavaka ʻuluakí.

8 Naʻá ku sio ki ha faliki māʻolunga takatakai ʻi he temipalé, pea ko e fakavaʻe ʻo e ngaahi loki ʻi he tafaʻakí naʻe feʻunga hono fuá mo e kaho kakato ʻe taha ʻa ia ko e kiupite ʻe ono mei he kelekelé ki he tuliki ʻi ʻolungá. 9 Ko e fālahi ʻo e holisi ki tuʻa ʻo e ngaahi loki ʻi he tafaʻakí naʻe kiupite ʻe nima. Naʻe ʻi ai ha kiʻi foʻi ʻatā takatakai* ʻi he tafaʻaki ʻo e ngaahi lokí ʻa ia ko ha konga pē ia ʻo e temipalé.

10 ʻI he vahaʻa ʻo e temipalé mo e ngaahi loki kaí*+ naʻe ʻi ai ha foʻi ʻēlia ʻa ia naʻe kiupite ʻe 20 ʻa hono fālahí ʻi he tafaʻaki taki taha. 11 Naʻe ʻi ai ha hūʻanga ʻi he vahaʻa ʻo e ngaahi loki ʻi he tafaʻakí pea mo e foʻi ʻatā ʻi he tafaʻaki fakatokelaú pea mo ha hūʻanga ʻe taha ʻi he tafaʻaki fakatongá. Ko e fālahi ʻo e foʻi ʻatā naʻe ʻalu takatakaí naʻe kiupite ʻe nima.

12 Ko e fale ʻa ia naʻe ʻi he hihifó ʻo hanga mai ki he foʻi ʻēlia ʻataʻataá naʻe kiupite ʻe 70 ʻa hono fālahí pea kiupite ʻe 90 ʻa hono lōloá; ko e holisi ʻo e falé takatakai naʻe kiupite ʻe nima ʻa hono matolú.

13 Naʻá ne fua ʻa e temipalé, pea naʻe kiupite ʻe 100 ʻa hono lōloá. Ko e foʻi ʻēlia ʻataʻataá, mo e falé,* mo hono ngaahi holisí naʻe toe kiupite foki ʻe 100 ʻa hono lōloá. 14 Ko e fālahi ʻo e konga ki muʻa ʻo e temipalé ʻoku hanga ki he hahaké pea mo e foʻi ʻēlia ʻataʻataá naʻe kiupite ʻe 100.

15 Naʻá ne fua ʻa e lōloa ʻo e fale naʻe hanga mai ki he foʻi ʻēlia ʻataʻatā ʻi he konga ki muí, fakataha mo hono fakafaletolo ʻi he ongo tafaʻakí fakatouʻosi, pea naʻe feʻunga mo e kiupite ʻe 100.

Naʻá ne fua foki mo e loki taupotu ki tuʻa ʻo e feituʻu toputapú, mo e loki taupotu ki loto ʻo e feituʻu toputapú,+ pea mo e ngaahi fale-hūʻanga ʻo e lotoʻaá, 16 pea pehē ki he ngaahi tuʻuʻanga matapaá, mo e ngaahi matapā teuteu fāsiʻí,+ mo e ngaahi fakafaletolo naʻe ʻi he ngaahi feituʻu ʻe tolu ko iá. ʻI he veʻe tuʻuʻanga matapaá naʻe ʻaofi papa+ mei he falikí ʻo aʻu hake ki he fanga kiʻi matapā teuteú; pea naʻe ʻaofi mo e fanga kiʻi matapā teuteú. 17 Naʻe fua mo e konga ki ʻolunga ʻo e hūʻangá pea mo e loto temipalé pea mo tuʻa pea mo e holisí takatakai. 18 Naʻe tongi ai ha ngaahi selupimi+ mo e ngaahi fakatātā ʻo e fuʻu paame,+ ʻo tuʻu ʻa e fuʻu paame taki taha ʻi he hili ʻa e selupimi ʻe ua, pea naʻe maʻu ʻe he selupimi taki taha ha mata ʻe ua. 19 Ko e mata fakaetangatá naʻe hanga ia ki he fuʻu paame ʻi he tafaʻaki ʻe tahá, pea ko e mata ʻo e laioné naʻe hanga ia ki he fuʻu paame ʻi he tafaʻaki ʻe tahá.+ Naʻe peheni ʻa hono tongí ʻi he temipalé fakakātoa. 20 Mei he falikí ki he ʻēlia ʻi ʻolunga ʻi he hūʻangá naʻe tongi ai ʻa e ngaahi selupimi mo e ngaahi fakatātā ʻo e fuʻu paame ʻi he holisi ʻo e feituʻu toputapú.

21 Ko e ongo kaumatapā* ʻo e feituʻu toputapú naʻe tapafā tatau.+ ʻI muʻa ʻi he potu toputapú* naʻe ʻi ai ha meʻa naʻe hangē mai 22 ha ʻōlita papa+ ʻa ia naʻe kiupite ʻe tolu ʻa hono māʻolungá pea kiupite ʻe ua ʻa hono lōloá. Naʻe ʻi ai hono ngaahi pou tuliki, pea ko hono tuʻuʻangá* mo hono ngaahi tafaʻakí naʻe ngaohi mei he papa. Naʻá ne pehē mai leva kiate au: “Ko e tēpile eni ʻa ia ʻoku ʻi he ʻao ʻo Sihová.”+

23 Ko e loki taupotu ki tuʻa mo e loki taupotu ki loto ʻo e feituʻu toputapú naʻá na taki ua ʻa e matapā.+ 24 Ko e ongo matapaá naʻá na taki ua ʻa e laumatapā naʻe leʻei holo, ko e laumatapā ʻe ua ki he matapā taki taha. 25 Naʻe tongi ʻa e ngaahi selupimi mo e ngaahi fakatātā ʻo e fuʻu paame ʻi he ongo matapā ʻo e feituʻu toputapú, hangē ko ia naʻe ʻi he ngaahi holisí.+ Naʻe ʻi ai foki mo ha fakafalefale* papa ʻi he mata fale ki tuʻa ʻo e fale-hūʻangá. 26 Naʻe ʻi ai foki mo e ngaahi matapā teuteu fāsiʻi+ mo e ngaahi fakatātā ʻo e fuʻu paame ʻi he ongo tafaʻaki fakatouʻosi ʻo e fale-hūʻangá, pea pehē foki ʻi he ngaahi loki ʻi he tafaʻaki ʻo e temipalé pea mo e ngaahi fakafalefalé.