Fakamaau

17 Naʻe ʻi ai ha tangata ʻo e feituʻu moʻungaʻia ʻo ʻIfalemí+ ko hono hingoá ko Maika. 2 Naʻá ne pehē ki heʻene faʻeé: “Ko e konga siliva ʻe 1,100 naʻe toʻo meiate koé, ʻa ē naʻá ke fai ai ha talatuki, peá u fanongo atu ki aí—vakai, ʻoku ʻiate au ʻa e silivá. Ko au naʻá ku toʻo iá.” Naʻe pehē ange ai ʻe heʻene faʻeé: “Fakatauange ke faitāpuekina ʻe Sihova ʻa ʻeku tamá.” 3 Ko ia naʻá ne fakafoki ʻa e konga siliva ʻe 1,100 ki heʻene faʻeé, ka naʻe pehē ange ʻe heʻene faʻeé: “Te u mātuʻaki fakatapui ʻa e silivá kia Sihova mei hoku nimá maʻa ʻeku tamá ke ngāueʻaki ki hono ngaohi ha ʻīmisi kuo tongi mo ha ʻīmisi mētale.*+ Ko eni ʻoku ou fakafoki atu ia kiate koe.”

4 ʻI he hili ʻene fakafoki ʻa e silivá ki heʻene faʻeé, naʻe toʻo ʻe heʻene faʻeé ʻa e konga siliva ʻe 200 ʻo ʻoange ia ki he tufunga silivá. Naʻá ne ngaohi ha ʻīmisi kuo tongi mo ha ʻīmisi mētale;* pea naʻe tuku ia ʻi he fale ʻo Maiká. 5 Ko e tangata ko eni ko Maiká naʻe ʻi ai hano fale ki hono ngaahi ʻotuá, pea naʻá ne ngaohi ha ʻēfoti+ mo e ngaahi ʻīmisi telafimi*+ pea fakanofo ʻa e* taha ʻo hono ngaahi fohá ke hoko ko ha taulaʻeiki kiate ia.+ 6 ʻI he ngaahi ʻaho ko iá, naʻe ʻikai ha tuʻi ʻi ʻIsileli.+ Naʻe fai ʻe he tokotaha taki taha ʻa e meʻa naʻe totonu ʻi heʻene vakai pē ʻaʻaná.*+

7 Pea naʻe ʻi ai ha talavou mei Pētelihema+ ʻi Siutá ʻa ia naʻe kau ki he fāmili ʻo Siutá. Ko ha tokotaha Līvai+ ʻa ia naʻe nofo ʻi ai ʻi ha vahaʻa taimi. 8 Naʻe mavahe ʻa e tangatá mei he kolo ko Pētelihema ʻi Siutá ke kumi ha feituʻu ke nofo ai. ʻI he lolotonga ʻene fonongá, naʻá ne aʻu ki he feituʻu moʻungaʻia ʻo ʻIfalemí, ki he fale ʻo Maiká.+ 9 Pea naʻe pehē ange ʻe Maika kiate ia: “Ko hoʻo haʻú mei fē?” Naʻá ne tali ange: “Ko aú ko ha Līvai mei Pētelihema ʻi Siutá, pea ko ʻeku ʻalu ke kumi ha feituʻu ke u nofo ai.” 10 Ko ia naʻe pehē ange ʻe Maika kiate ia: “Nofo mo au pea hoko ko ha tamai* mo ha taulaʻeiki kiate au. Te u ʻoatu kiate koe ha konga siliva ʻe hongofulu ʻi he taʻu pea mo ha ngaahi kofu pea mo haʻo meʻakai.” Ko ia naʻe hū ai ki loto ʻa e tokotaha Līvaí. 11 Ko ia ai, naʻe loto ʻa e tokotaha Līvaí ke nofo mo e tangatá, pea naʻe hoko ʻa e talavoú ʻo hangē ha taha ʻo hono ngaahi fohá. 12 ʻIkai ko ia pē, naʻe hanga ʻe Maika ʻo fakanofo ʻa e* tokotaha Līvaí ke hoko ko ha taulaʻeiki kiate ia,+ pea naʻá ne nofo ʻi he fale ʻo Maiká. 13 Naʻe pehē leva ʻe Maika: “ʻOku ou ʻilo eni ʻe failelei mai ʻa Sihova kiate au, he kuo hoko ʻa e tokotaha Līvaí ko ʻeku taulaʻeiki.”