Nōmipa

10 Naʻe folofola leva ʻa Sihova kia Mōsese: 2 “Ngaohi maʻau ha talupite ʻe ua;+ ngaohi kinaua mei he siliva kuo tuki, pea ngāueʻaki ia ke uiʻaki ʻa e fuʻu fakatahá pea ki hono veteki ʻa e ngaahi ʻapitangá. 3 ʻI he taimi ʻe ifiʻi fakatouʻosi ai kinauá, kuo pau ke ui mai ʻa e fuʻu fakatahá kotoa kiate koe ki he hūʻanga ʻo e tēniti feʻiloakiʻangá.+ 4 Kapau ko e talupite pē ʻe taha ʻoku ifiʻí, ko e ngaahi ʻeikí pē, ʻa e ngaahi ʻulu ʻo e laui afe ʻo ʻIsilelí, ʻe ui mai kiate koé.+

5 “ʻI he taimi te mou ifi fetōʻaki ai ʻa e talupité, ko e ngaahi ʻapitanga ʻo kinautolu ʻi he hahaké+ ʻoku totonu ke nau mavahe. 6 ʻI he taimi te mou ifi fetōʻaki ai ʻa e talupité ʻi hono tuʻo uá, ko e ngaahi ʻapitanga ʻo kinautolu ʻi he tongá+ ʻoku totonu ke nau mavahe. ʻOku totonu ke peheni ʻenau ifi ʻa e talupité ʻi he taimi taki taha ʻe mavahe ai ha taha ʻo e ngaahi vāhengá.

7 “ʻI hono ui fakataha mai leva ʻa e fakatahaʻangá, ʻoku totonu ke mou ifi ʻa e ongo talupité,+ ka ʻe ʻikai te mou ifi fetōʻaki. 8 Ko e ngaahi foha ʻo ʻĒloné, ʻa e kau taulaʻeikí, ʻoku totonu ke nau ifi ʻa e ongo talupité,+ pea ko hono ngāueʻaki kinauá ʻe hoko ia ko ha tuʻutuʻuni taʻengata kiate kimoutolu ʻi he kotoa homou ngaahi toʻutangatá.

9 “Kapau te mou faitau ʻi homou fonuá mo ha tokotaha fakaaoao ʻa ia ʻokú ne fakamamahiʻi kimoutolu, ʻoku totonu ke mou fakaongo atu ʻaki ʻa e ongo talupité+ ha uiaki tau, pea ʻe manatua kimoutolu ʻe Sihova ko homou ʻOtuá ʻo ne fakahaofi kimoutolu mei homou ngaahi filí.

10 “Pehē foki, ʻi homou ngaahi taimi fakafiefiá+—ʻa hoʻomou ngaahi kātoangá+ pea ʻi he kamataʻanga ʻo homou ngaahi māhiná—te mou fakaongo atu ʻaki ʻa e ongo talupité ʻa hoʻomou ngaahi feilaulau tutú+ mo hoʻomou ngaahi feilaulau feʻinasiʻakí;+ ʻe hoko ia ko ha fakamanatu maʻamoutolu ʻi he ʻao ʻo homou ʻOtuá. Ko au Sihova ko homou ʻOtuá.”+

11 ʻI he taʻu leva hono uá, ʻi he māhina hono uá, ʻi he ʻaho hono 20 ʻo e māhiná,+ naʻe mahiki hake ai ʻa e ʻaó mei he funga tāpanekale+ ʻo e Fakamoʻoní. 12 Ko ia naʻe kamata ke mavahe ʻa e kau ʻIsilelí mei he toafa Sainaí ʻi he hokohoko naʻe fokotuʻutuʻu ki heʻenau mavahé,+ pea naʻe nofo ʻa e ʻaó ʻi he toafa Pēlaná.+ 13 Ko e ʻuluaki taimi eni naʻa nau mavahe ai ʻo muimui ʻi he tuʻutuʻuni ʻa Sihova fakafou ʻia Mōsesé.+

14 Ko ia naʻe ʻuluaki mavahe ʻa e vāhenga matakali ʻe tolu ʻo e ʻapitanga ʻo e ngaahi foha ʻo Siutá ʻo fakatatau ki heʻenau ngaahi kulupú,* pea ko Naʻasoni+ ko e foha ʻo ʻAminatapé naʻá ne pule ki he kulupu ko iá. 15 Naʻe pule ki he kulupu ʻo e matakali ʻo e ngaahi foha ʻo ʻĪsaká ʻa Netanili+ ko e foha ʻo Suʻá. 16 Naʻe pule ki he kulupu ʻo e matakali ʻo e ngaahi foha ʻo Sepuloní ʻa ʻEliapi+ ko e foha ʻo Hēloní.

17 ʻI he taimi naʻe tuku hifo ai ʻa e tāpanekalé,+ naʻe mavahe ʻa e ngaahi foha ʻo Kēsoní+ pea mo e ngaahi foha ʻo Mēlalí,+ ʻa ē naʻa nau fua ʻa e tāpanekalé.

18 Naʻe mavahe leva ʻa e vāhenga matakali ʻe tolu ʻo e ʻapitanga ʻo Lūpení ʻo fakatatau ki heʻenau ngaahi kulupú,* pea ko ʻIlisua+ ko e foha ʻo Seteuló naʻá ne pule ki he kulupu ko iá. 19 Naʻe pule ki he kulupu ʻo e matakali ʻo e ngaahi foha ʻo Simioné ʻa Selumiela+ ko e foha ʻo Siulisataí. 20 Naʻe pule ki he kulupu ʻo e matakali ʻo e ngaahi foha ʻo Katá ʻa ʻEliesafe+ ko e foha ʻo Teuelá.

21 Ko e haʻa Kōhaté leva, ʻa ia naʻa nau fua ʻa e ngaahi meʻa ʻo e feituʻu toputapú,+ naʻa nau mavahe. Naʻe pau ke fokotuʻu ʻa e tāpanekalé ʻi he taimi ʻe aʻu atu ai ʻa e faʻahinga ko eé.

22 Naʻe mavahe leva ʻa e vāhenga matakali ʻe tolu ʻo e ʻapitanga ʻo e ngaahi foha ʻo ʻIfalemí ʻo fakatatau ki heʻenau ngaahi kulupú,* pea ko ʻElisama+ ko e foha ʻo ʻAmihutí naʻe pule ki he kulupu ko iá. 23 Naʻe pule ki he kulupu ʻo e matakali ʻo e ngaahi foha ʻo Manasé ʻa Kāmelieli+ ko e foha ʻo Petasulí. 24 Naʻe pule ki he kulupu ʻo e matakali ʻo e ngaahi foha ʻo Penisimaní ʻa ʻApitani+ ko e foha ʻo Kiteoní.

25 Naʻe mavahe leva ʻa e vāhenga matakali ʻe tolu ʻo e ʻapitanga ʻo e ngaahi foha ʻo Taní ʻo fakatatau ki heʻenau ngaahi kulupú,* ʻo faʻuʻaki kinautolu ʻa e kau tau maluʻi mei mui ki he kotoa ʻo e ngaahi ʻapitangá, pea ko ʻAhiesa+ ko e foha ʻo ʻAmisataí naʻá ne pule ki he kulupu ko iá. 26 Naʻe pule ki he kulupu ʻo e matakali ʻo e ngaahi foha ʻo ʻĀselí ʻa Pakiela+ ko e foha ʻo ʻOkelaní. 27 Naʻe pule ki he kulupu ʻo e matakali ʻo e ngaahi foha ʻo Nafitalaí ʻa ʻAhila+ ko e foha ʻo ʻEinaní. 28 Ko e hokohoko eni ʻo e mavahe ʻa e kau ʻIsilelí mo ʻenau ngaahi kulupú* ʻa ia naʻa nau muimui ki ai ʻi heʻenau mavahé.+

29 Naʻe lea leva ʻa Mōsese kia Hōpapi ko e foha ʻo Liueli*+ ko e Mitianí, ʻa e tamai ʻa e mali ʻo Mōsesé: “ʻOku tau ʻalu atu eni ki he feituʻu ʻa ia kuo folofola ʻa Sihova fekauʻaki mo ia, ‘Te u foaki ia kiate kimoutolu.’+ Ke ke haʻu mo kimautolu,+ pea te mau failelei kiate koe, koeʻuhí kuo talaʻofaʻaki ʻe Sihova ha ngaahi meʻa lelei ki ʻIsileli.”+ 30 Ka naʻá ne pehē kiate ia: “ʻE ʻikai te u ʻalu. Te u foki au ki hoku fonuá tonu pea ki hoku ngaahi kāingá.” 31 ʻI he meʻá ni naʻá ne pehē: “ʻOua muʻa te ke liʻaki kimautolú, he ʻokú ke ʻilo ʻa e feituʻu ʻoku totonu ke mau ʻapitanga ai ʻi he toafá, pea ʻe lava ke ke hoko ko e tataki* kiate kimautolu. 32 Pea kapau te ke haʻu mo kimautolu,+ ʻilonga ha lelei ʻe fai mai ʻe Sihova kiate kimautolu, ko e moʻoni te mau fai atu ia kiate koe.”

33 Ko ia naʻa nau kamata laka atu mei he moʻunga ʻo Sihová+ ʻi ha fononga ʻaho ʻe tolu, pea ko e ʻaʻake+ ʻo e fuakava ʻa Sihová naʻe fononga ia ʻi muʻa ʻiate kinautolu ʻi he fononga ʻaho ʻe tolú ke kumi ha mālōlōʻanga kiate kinautolu.+ 34 Pea ko e ʻao ʻa Sihová+ naʻe ʻi ʻolunga ia ʻiate kinautolu ʻi he ʻahó ʻi heʻenau ʻalu atu mei he ʻapitangá.

35 ʻI ha taimi pē naʻe hiki ai ʻa e ʻAʻaké, naʻe pehē ʻe Mōsese: “Ke ke tuʻu hake, ʻe Sihova+ ʻo fakamovetevete ho ngaahi filí, pea ʻai ʻa e faʻahinga ʻoku fehiʻa ʻiate koé ke nau hola mei ho ʻaó.” 36 Pea ʻi he taimi naʻe tuku hifo ai iá, naʻá ne pehē: “Ke ke foki mai, ʻe Sihova, ki he laui afe taʻefaʻalaua* ʻo ʻIsilelí.”+