Ngāue ʻa e Kau ʻApositolo

2 Pea ʻi he lolotonga ʻa e lele ʻa e ʻaho ʻo e Kātoanga ʻo e Penitekosí,+ naʻa nau kātoa pē ʻi he feituʻu ʻe taha. 2 Fakafokifā naʻe ongo mai ha longoaʻa mei he langí, ʻo hangē ko e mumuhu mai ʻa ha fuʻu matangi mālohí, pea naʻá ne fakafonu kotoa ʻa e fale naʻa nau nofo aí.+ 3 Pea naʻe hā kiate kinautolu ʻa e ngaahi uloʻi afi naʻe hangē ha ngaahi ʻeleló pea naʻe movetevete atu, ʻo nofo taki taha ʻi he tokotaha tāutaha ʻo kinautolu, 4 pea naʻa nau hoko ʻo fonu kotoa ʻi he laumālie māʻoniʻoní+ pea kamata ke nau lea ʻi he ngaahi lea kehekehe, ʻo hangē tofu pē ko ia naʻe ʻai ʻe he laumālié ke nau leaʻakí.+

5 ʻI he taimi ko iá, ko e kau Siu mamahiʻi-lotu mei he puleʻanga kotoa pē ʻi he lalo langí naʻa nau nofo ʻi Selusalema.+ 6 Ko ia ʻi he hoko ʻa e longoaʻa ko ení, naʻe fakatahataha mai ha fuʻu kakai pea naʻa nau moʻutāfuʻua, koeʻuhi naʻe fanongo ʻa e tokotaha taki taha ki heʻenau lea mai ʻaki ʻa ʻenau taki taha lea. 7 Ko e moʻoni, naʻa nau mātuʻaki ofoofo ʻo nau pehē: “Vakai ange, ko e faʻahinga kotoa ko eni ʻoku leá ko e kau Kāleli,+ ʻikai ko ia? 8 ʻOku anga-fēfē leva ai ʻa e fanongo ʻa e tokotaha taki taha ʻo kitautolu ki heʻetau taki taha lea tuʻufonuá?* 9 Ko kitautolu kau Pātiá, kau Mītiá+ mo e kau ʻĪlamí,+ kau nofo Mesopotēmiá, Siutea mo Kapatōsia, Ponitō mo e vahefonua ʻo ʻĒsiá,+ 10 Filisia mo Pamifīlia, ʻIsipite mo e ngaahi vahefonua ʻo Līpia, ʻoku ofi ki Sailiné, ko e kau nofo hili mai mei Lomá, fakatouʻosi ʻa e kau Siu mo e kau ului Siu,+ 11 ko e kau Kēlití, mo e kau ʻAlepeá—ʻoku tau fanongo ki heʻenau lea ʻi heʻetau ngaahi leá ʻo fekauʻaki mo e ngaahi meʻa fisifisimuʻa ʻa e ʻOtuá.” 12 ʻIo, naʻa nau fakatumutumu kotoa pē mo nau fifili, ʻo nau fepehēʻaki: “Ko e hā ʻa e ʻuhinga ʻo e meʻá ni?” 13 Kae kehe, naʻe manumanukiʻi kinautolu ʻe ha niʻihi pea nau pehē: “ʻOku nau konā ʻi he uaine melié.”*

14 Ka naʻe tuʻu hake ʻa Pita mo e toko Hongofulu-mā-tahá+ ʻo ne lea leʻo-lahi kiate kinautolu: “ʻA e kau tangata ʻo Siutea mo kimoutolu kotoa ʻa e kau nofo ʻi Selusalemá, tuku ke mou ʻilo ʻa e meʻá ni pea fanongo lelei mai ki heʻeku ngaahi leá. 15 Ko e kakaí ni, ko hono moʻoní, ʻoku ʻikai te nau konā, ʻo hangē ko hoʻomou mahaló, he ko e houa hono tolu* pē eni ʻo e ʻahó. 16 ʻI hono kehé, ko e meʻa eni naʻe leaʻaki fakafou ʻi he palōfita ko Sioelí: 17 ‘“Pea ʻi he ngaahi ʻaho fakaʻosí,” ko e folofola ia ʻa e ʻOtuá, “te u huaʻi hifo ha konga hoku laumālié ki he faʻahinga kakano kotoa pē, pea ko homou ngaahi fohá mo homou ngaahi ʻofefiné te nau kikite pea ko hoʻomou kau talavoú te nau mata vīsone pea ko hoʻomou kau tangata taʻumotuʻá te nau misi ʻi ha ngaahi misi,+ 18 pea naʻa mo ʻeku kau tamaioʻeikí mo ʻeku kau kaunangá te u huaʻi hifo ki ai ha konga hoku laumālié ʻi he ngaahi ʻaho ko iá, pea te nau kikite.+ 19 Pea te u ʻai ʻa e ngaahi meʻa fakaofo ʻi he langí ʻi ʻolunga pea mo e ngaahi fakaʻilonga ʻi he māmaní ʻi lalo—ko e toto mo e afi, mo e kohutuʻu. 20 Ko e laʻaá ʻe liliu ʻo fakapoʻuli pea ko e māhiná ʻe liliu ʻo toto ki muʻa ke hoko mai ʻa e ʻaho lahi mo maeʻeeʻa ʻo Sihová.* 21 Pea ko e tokotaha kotoa pē ʻoku ui ki he huafa ʻo Sihová* ʻe fakahaofi.”’+

22 “Kau tangata ʻo ʻIsileli, fanongo mai ki he ngaahi leá ni: Ko Sīsū ko e Nāsaletí ko ha tangata ia naʻe fakaeʻa fakahāhā ʻe he ʻOtuá kiate kimoutolu fakafou ʻi he ngaahi ngāue māfimafiʻia mo e ngaahi meʻa fakaofo pea mo e ngaahi mana naʻe fakahoko ʻe he ʻOtuá fakafou ʻiate ia ʻi homou lotolotongá,+ ʻo hangē tofu pē ko ia ʻoku mou ʻilo ki aí. 23 Ko e tangatá ni ʻa ia naʻe tuku atu ʻi he finangalo ne ʻosi fakapapauʻi* pea mo e langi-mamaʻo ʻa e ʻOtuá,+ naʻa mou tutuki ia ki ha ʻakau fakafou ʻi he nima ʻo e kau tangata maumau-lao, pea naʻa mou tāmateʻi ia.+ 24 Ka naʻe fokotuʻu hake ia+ ʻe he ʻOtuá ʻaki hono tuku ange ia mei he ngaahi mamahi* ʻo e maté, koeʻuhi naʻe ʻikai malava ke pukenimā ia ʻe he maté.+ 25 He ʻoku pehē ʻe Tēvita ʻo fekauʻaki mo ia: ‘ʻOku ou ʻai ʻa Sihova* ke ʻi muʻa maʻu ai pē ʻiate au,* he ʻokú ne ʻi hoku nima toʻomataʻú ke ʻoua ʻaupito naʻá ku ngaue. 26 ʻI he meʻa ko ení naʻe hākahaka ʻa hoku lotó pea naʻá ku lea ʻi he fiefia lahi. Pea te u* nofo fakataha mo e ʻamanaki; 27 koeʻuhi heʻikai te ke tuku au ʻi he Faʻitoká,* pe te ke tuku ʻa hoʻo tokotaha mateakí ke sio ʻi he ʻauʻauhá.+ 28 Kuó ke ʻai ke u ʻilo ʻa e ngaahi ʻalunga ʻo e moʻuí; te ke fakafonu au ʻaki ʻa e fiefia lahi ʻi ho ʻaó.’*+

29 “Kau tangata, fanga tokoua, ʻoku ngofua ke u lea tauʻatāina kiate kimoutolu ʻo fekauʻaki mo e ʻuluʻi fāmili ko Tēvitá, naʻá ne mate pea naʻe tanu,+ pea ko hono fonualotó ʻoku ʻiate kitautolu ʻo aʻu mai ki he ʻahó ni. 30 Koeʻuhi ko ha palōfita ia pea naʻá ne ʻilo naʻe fai ʻe he ʻOtuá ha fakapapau kiate ia ʻi ha fuakava te ne tuku ke nofo ʻi hono taloní ha taha ʻo hono hakó,+ 31 naʻá ne tomuʻa sio mo ne lea ʻo kau ki he toetuʻu ʻa e Kalaisí, naʻe ʻikai ke liʻaki ia ʻi he Faʻitoká* pe sio ʻa hono kakanó ʻi he ʻauʻauhá.*+ 32 Naʻe fokotuʻu hake ʻe he ʻOtuá ʻa e Sīsū ko ení, pea ko e kau fakamoʻoni kotoa kimautolu ki he meʻá ni.+ 33 Ko ia ai, koeʻuhi naʻe hakeakiʻi ia ki he nima toʻomataʻu ʻo e ʻOtuá+ peá ne maʻu ʻa e laumālie māʻoniʻoni naʻe talaʻofaʻaki mei he Tamaí,+ kuó ne huaʻi hifo ai ʻa e meʻa ʻoku mou mamata mo fanongo ki aí. 34 He naʻe ʻikai ke ʻalu hake ʻa Tēvita ia ki he langí, ka ko ia tonu ʻokú ne pehē, ‘Naʻe folofola ʻa Sihova* ki hoku ʻEikí: “Nofo hifo ʻi hoku nima toʻomataʻú 35 kae ʻoua kuó u tuku ho ngaahi filí ke nau hoko ko ho tuʻunga-vaʻe.”’+ 36 Ko ia ai, tuku ke ʻilo fakapapau ʻe he fale kotoa ʻo ʻIsilelí naʻe fakatou ʻai ia ʻe he ʻOtuá ko e ʻEiki+ mo e Kalaisi, ʻa e Sīsū ko eni ʻa ia naʻa mou tautau ʻi he ʻakaú.”+

37 ʻI heʻenau fanongo leva ki he meʻá ni, naʻe mahuhuhuhu ai honau lotó, pea naʻa nau pehē kia Pita pea mo e toenga ʻo e kau ʻapositoló: “Kau tangata, fanga tokoua, ko e hā te mau faí?” 38 Naʻe pehē ange ʻe Pita kiate kinautolu: “Fakatomala,+ pea tuku ki he tokotaha taki taha ʻo kimoutolu ke papitaiso+ ʻi he huafa ʻo Sīsū Kalaisí ki he fakamolemole ʻo hoʻomou ngaahi angahalá,+ pea te mou maʻu ʻa e meʻaʻofa taʻetotongi ko e laumālie māʻoniʻoní. 39 He ko e talaʻofá+ ʻoku ʻa kimoutolu mo hoʻomou fānaú, pea mo e faʻahinga kotoa ʻoku mamaʻo atú, ʻa e faʻahinga kotoa ko ia ʻe ui mai ʻe Sihova* ko hotau ʻOtuá kiate iá.”+ 40 Pea ʻi ha toe ngaahi lea lahi naʻá ne fai ai ha fakamoʻoni fakaʻāuliliki mo hanganaki enginaki kiate kinautolu ʻo pehē: “Fakahaofi kimoutolu mei he toʻutangata pikopiko ko ení.”+ 41 Ko ia ko e faʻahinga naʻa nau tali fiefia ʻene leá naʻa nau papitaiso,+ pea ʻi he ʻaho ko iá ko e kakai ʻe toko 3,000 nai naʻe tānaki maí.+ 42 Pea naʻe hokohoko atu ʻenau līʻoa kinautolu ki he faiako ʻa e kau ʻapositoló, ki he feohi fakatahá,* ki hono maʻu ʻo e meʻatokoní,+ pea ki he lotú.+

43 Ko e moʻoni, naʻe kamata ke tō ha manavahē ki he tokotaha kotoa, pea naʻe kamata ke hoko ʻa e ngaahi meʻa fakaofo mo e ngaahi mana lahi fakafou ʻi he kau ʻapositoló.+ 44 Ko e faʻahinga kotoa naʻe hoko ʻo tuí naʻa nau fakatahataha ʻo fevahevaheʻaki ʻi he ngaahi meʻa kotoa pē, 45 pea naʻa nau fakatau atu ʻenau ngaahi koloá+ mo honau ngaahi ʻapí pea nau vahevahe atu ʻa e ngaahi meʻa naʻe maʻu aí ki he tokotaha kotoa, ʻo fakatatau ki he meʻa naʻe fiemaʻu ʻe he tokotaha taki taha.+ 46 Pea ʻi he ʻaho ki he ʻaho naʻa nau māʻunga nofo ki he temipalé mo e taumuʻa pē ʻe taha, pea naʻa nau maʻu ʻenau ngaahi houa kaí ʻi he ngaahi ʻapi kehekehe mo fevahevaheʻaki ʻenau meʻakaí ʻi he fiefia lahi pea mo e loto-maʻa, 47 ʻo fakahīkihikiʻi ʻa e ʻOtuá pea ʻofeina ʻe he kakai kotoa pē. ʻI he taimi tatau naʻe hokohoko atu hono tānaki fakaʻaho mai ʻe Sihova* kiate kinautolu ʻa e faʻahinga kuo fakahaofí.+