ʻOku Manatuʻi ʻe he ʻOtuá ʻa Hono ʻAló

NAʻE tangi ʻa Sīsū ʻi he taimi naʻe mate ai ʻa hono kaumeʻa ko Lāsalosí. ʻOkú ke fakakaukau naʻe ongoʻi kovi ʻa Sihova ʻi he taimi naʻe faingataʻaʻia ai pea mate ʻa Sīsuú?— ʻOku pehē ʻe he Tohitapú ʻoku malava ke “ongoʻi mamahi” ʻa e ʻOtuá pea aʻu ʻo “fakamamahiʻi” ʻe he ngaahi meʻa ʻoku hokó.—Sāme 78:​40, 41, NW; Sione 11:⁠35.

ʻE lava ke ke fakakaukau atu ki he mamahi naʻe ongoʻi ʻe Sihova ʻi heʻene vakai ki he pekia ʻa hono ʻAlo ʻofaʻangá?— Naʻe fakapapauʻi ʻe Sīsū ʻe ʻikai ke ngalo ia ʻi he ʻOtuá. Ko e ʻuhinga ia naʻe peheni ai ʻa ʻene lea fakaʻosi ki muʻa peá ne pekiá: “ʻE Tamai, ʻoku ou tuku [ʻeku moʻuí] ki ho nima.”—Luke 23:⁠46.

Naʻe fakapapauʻi ʻe Sīsū ʻe fokotuʻu hake ia, ʻe ʻikai ke tuku ia “ʻi Hētesi,” pe ko e faʻitoká. ʻI he hili hono fokotuʻu hake ʻo Sīsuú, naʻe leaʻaki ʻe he ʻapositolo ko Pitá ʻa e meʻa naʻe hiki ʻi he Tohitapú ʻo fekauʻaki mo Sīsuú, ʻo ne pehē: “Naʻe ʻikai liʻaki ia ʻi Hētesi, pe ʻilo ʻe hono kakano ʻa e ʻauʻauha.” (Ngāue 2:31; Sāme 16:10) ʻIkai, ko e sino ʻo Sīsuú naʻe ʻikai ʻaupito ke ʻi ai ha taimi ke hoko ai ʻo ʻauha ʻi he faʻitoká, ʻa ia, ke movete mo nanamu.

ʻI he taimi naʻe ʻi māmani ai ʻa Sīsuú, naʻe aʻu ʻo ne tala ki heʻene kau ākongá ko ʻene pekiá ʻe ʻikai ke fuʻu fuoloa. Naʻá ne fakamatala kia kinautolu ʻe ‘tamateʻi; pea ʻi hono ʻaho tolú te ne toetuʻu.’ (Luke 9:22) Ko ia, ko hono moʻoní naʻe ʻikai totonu ke ʻohovale ʻa e kau ākongá ʻi he toetuʻu ʻa Sīsuú. Ka naʻa nau ʻohovale?— Ta sio angé.

Ko e tolú nai ia ʻo e efiafi Falaité ʻoku pekia ai ʻa e Faiako Lahí ʻi he ʻakau fakamamahí. Ko Siosefa, ko ha mēmipa koloaʻia ia ʻo e Sanetalimí, ko ha toe tokotaha tui fakapulipuli foki ia kia Sīsū. ʻI heʻene ʻiloʻi kuo pekia ʻa Sīsuú, ʻokú ne ʻalu kia Pailato, ko e kōvana Lomá. ʻOkú ne kole pe ʻe lava ke ne ʻohifo ʻa e sino ʻo Sīsuú mei he ʻakaú ke tanu ia. Hili iá, ʻoku fua ʻe Siosefa ʻa e sino ʻo Sīsuú ki ha ngoue ʻa ia ʻoku ʻi ai ha fonualoto, ko ha potu ʻoku tuku ai ʻa e sino ʻo e kau maté.

ʻI he hili hono tuku ʻa e sinó ki he fonualotó, ʻoku tekaʻi atu ha fuʻu maka lahi ʻi muʻa ai. Ko ia, ʻoku mapuni ʻa e fonualotó. Ko e ʻaho hono tolú eni, ʻa ia ko e Sāpate. Ko e ki muʻa ia ke hopo ʻa e laʻaá, ko ia ʻoku kei poʻuli. ʻOku ʻi ai ha kau tangata ʻoku nau leʻohi ʻa e fonualotó. Naʻe fekau atu kinautolu ʻe he kau taulaʻeiki lahí ke nau fai ʻa e ngāué ni. ʻOkú ke ʻilo ʻa hono ʻuhingá?—

Naʻe fanongo foki ʻa e kau taulaʻeikí naʻe pehē ʻe Sīsū ʻe toe fokotuʻu hake ia. Ko ia, ke taʻofi ʻa ʻene kau ākongá mei hono kaihaʻasi ʻa e sinó pea toki pehē naʻe toetuʻu ʻa Sīsuú, ʻoku fokotuʻu ai ʻe he kau taulaʻeikí ha kau leʻo. Fakafokifā, ʻoku kamata ke ngalulu ʻa e kelekelé. ʻI he fakapoʻulí, ʻoku tapa ha maama. Ko ha ʻāngelo ʻa Sihova! ʻOku manavahē ʻaupito ʻa e kau sōtiá ʻo ʻikai lava ke nau ngaue. ʻOku laka atu ʻa e ʻāngeló ki he fonualotó ʻo ne tekaʻi ʻa e maká. ʻOku ʻikai ha taha ʻi he fonualotó!

ʻIo, ʻoku hangē ia ko e meʻa naʻe leaʻaki ki mui ʻe he ʻapositolo ko Pitá: “Ko e Sīsū ko eni naʻe toe fokotuʻu ia ʻe he ʻOtua.” (Ngāue 2:32) Naʻe ʻai ʻe he ʻOtuá ke moʻui ʻa Sīsū fakataha mo ha sino ʻo hangē ko e sino naʻe ʻuluaki maʻu ʻe Sīsū ki muʻa peá ne haʻu ki he māmaní. Naʻe fokotuʻu hake ia ʻi ha sino laumālie ʻo hangē ko ia ʻoku maʻu ʻe he kau ʻāngeló. (1 Pita 3:18) Ko ia, ke sio ʻa e kakaí kia Sīsū, kuo pau ke ne ʻai ha sino fakakakano. Ko e meʻa ia ʻokú ne faí?— Ta sio angé.

ʻOku ʻalu hake ʻa e laʻaá he taimí ni. Kuo ʻalu ʻa e kau sōtiá ia. ʻOku haʻu ʻa Mele Makitaline pea mo ha kau ākonga fefine kehe ʻa Sīsū ki he fonualotó. ʻOku nau fetalanoaʻaki: ‘Ko hai te ne fai maʻatautolu hono tekaʻi ʻa e fuʻu maká?’ (Maake 16:⁠3) Ka ʻi heʻenau aʻu atu ki he fonualotó, kuo ʻosi tekaʻi ʻa e maká ia. Pea ʻoku ʻikai ha taha ʻi he fonualotó! Ko e sino kakano ʻo Sīsū kuo maté ʻoku pulia! ʻI he taimi pē ko iá, ʻoku lele ʻa Mele Makitaline ke kumi ʻa e niʻihi ʻo e kau ʻapositolo ʻa Sīsuú.

ʻOku nofo pē ʻa e kau fefine kehé ʻi he fonualotó. ʻOku nau fieʻilo: ‘ʻOku ʻi fē nai ʻa e sino ʻo Sīsuú?’ Fakafokifā pē, ʻoku ʻasi mai ha ongo tangata ʻoku ngingila hona kofú. Ko e ongo ʻāngelo! ʻOkú na pehē ki he kau fefiné: ‘Ko e hā ʻoku mou kumi ai ʻa Sīsū ki hení? Kuo fokotuʻu ia. Mou ō ke vave ʻo tala ki heʻene kau ākongá.’ Sai, ʻoku lava ke ke fakakaukau atu ki he vave ʻa e lele ʻa e kau fefiné! ʻI he halá, ʻoku nau fetaulaki ai mo ha tangata. ʻOkú ke ʻilo ko hai ia?—

Ko Sīsū, ʻa ia kuó ne ʻai ha sino kakano! ʻOkú ne toe pehē foki ki he kau fefiné: ‘Mou ō ʻo tala ki heʻeku kau ākongá.’ ʻOku fiefia ʻa e kau fefiné. ʻOku nau ʻilo ʻa e kau ākongá ʻo tala kia kinautolu: ‘Kuo moʻui ʻa Sīsū! Naʻa mau mamata kiate ia!’ Naʻe ʻosi tala ange ʻe Mele kia Pita mo Sione ʻa e ʻikai ke ʻi ai ha taha ʻi he fonualotó. Ko eni ʻokú na ʻaʻahi ki ai, ʻo hangē ko ia ʻokú ke sio ki ai ʻi hení. ʻOkú na vakai ki he ngaahi tupenu līneni naʻe takai ʻaki ʻa Sīsuú, ka ʻoku veiveiua ʻa ʻena fakakaukaú. ʻOkú na fiemaʻu ke na tui kuo toe moʻui ʻa Sīsū, ka ʻoku hā ngali fuʻu taʻemalava ia ke moʻoni.

Ki mui ʻi he Sāpate ko iá, ʻoku hā ʻa Sīsū ki ha toko ua ʻo ʻene kau ākongá ʻa ia ʻokú na luelue ʻi he hala ki he kiʻi kolo ko ʻEmeasí. ʻOku lue fakataha atu ʻa Sīsū mo talanoa mo kinaua, ka ʻoku ʻikai te na ʻiloʻi ia koeʻuhí he ʻoku ʻikai te ne maʻu ʻa e sino kakano ko ia naʻá ne ʻuluaki maʻú. ʻOkú na toki ʻiloʻi ia ʻi heʻena kai fakataha mo Sīsū peá ne fai ha lotú. ʻOku fuʻu fiefia ʻaupito ʻa e ongo ākongá ʻo na toe foki fakavave ʻaki ha ngaahi kilomita lahi ki Selusalema! Mahalo ko e taimi nounou mei heni ʻoku hā ai ʻa Sīsū kia Pita ke fakahā kiate ia kuó Ne moʻui.

Ki mui leva ʻi he efiafi Sāpate ko iá, ʻoku fakatahataha ha kau ākonga tokolahi ʻi ha loki. ʻOku loka ʻa e ngaahi matapaá. Fakafokifā pē, ʻoku ʻi ai tonu ʻa Sīsū ʻi he lokí fakataha mo kinautolu! ʻOku nau ʻiloʻi leva he taimí ni ko e moʻoni kuo toe moʻui ʻa e Faiako Lahí. Fakakaukau atu ki heʻenau fiefiá!—Mātiu 28:​1-15; Luke 24:​1-49; Sione 19:38–​20:⁠21.

ʻI he ʻaho ʻe 40, ʻoku hā ai ʻa Sīsū ʻi he ngaahi sino fakakakano kehekehe ke fakahā ki heʻene kau ākongá kuó ne moʻui. Hili iá, ʻokú ne mavahe mei māmani pea foki ki heʻene Tamaí ki hēvani. (Ngāue 1:​9-11) ʻOku kamata leva ke tala ʻe he kau ākongá ki he tokotaha kotoa naʻe fokotuʻu ʻe he ʻOtuá ʻa Sīsū mei he maté. Naʻa mo hono haha kinautolu ʻe he kau taulaʻeikí mo tāmateʻi ha niʻihi ʻo kinautolú, ʻoku hokohoko atu pē ʻenau malangá. ʻOku nau ʻilo kapau te nau mate, ʻe manatuʻi kinautolu ʻe he ʻOtuá ʻo hangē ko ʻene manatuʻi ʻa hono ʻAló.

He kehe moʻoni ko e kau muimui ki muʻa ʻo Sīsuú mei he kakai tokolahi he ʻahó ni! Ko e kakaí ni ʻoku nau fakakaukau pē ʻo fekauʻaki mo e fanga kiʻi lāpisi pea mo e ngaahi foʻi moa lanu kehekehe ʻo e Toetuʻú ʻi he taimi ʻo e taʻú naʻe toetuʻu ai ʻa Sīsuú. Ka ʻoku ʻikai ke leaʻaki ʻe he Tohitapú ia ha meʻa ʻo fekauʻaki mo ha lāpisi pea mo ha ngaahi foʻi moa Toetuʻu. ʻOku fakamatala ia ʻo fekauʻaki mo hono tauhi ʻo e ʻOtuá.

ʻE lava ke ta hangē ko e kau ākonga ʻa Sīsuú ʻaki ʻeta tala ki he kakaí, naʻe fai ʻe he ʻOtuá ha meʻa fakaofo ʻi heʻene fokotuʻu hake ʻa hono ʻAló. ʻOku ʻikai ʻaupito fiemaʻu ke ta ilifia, neongo kapau ʻe pehē ʻe he kakaí te nau tāmateʻi kitaua. Kapau te ta mate, ʻe manatuʻi kitaua ʻe Sihova ʻo ne fokotuʻu hake kitaua, ʻo hangē pē ko ʻene fai kia Sīsuú.

ʻIkai ʻokú ta fiefia ke ʻiloʻi ʻoku manatuʻi ʻe he ʻOtuá ʻa e faʻahinga ʻoku tauhi kiate iá pea ʻe aʻu ʻo ne fokotuʻu kinautolu mei he maté?— Ko hono ʻiloʻi ʻa e ngaahi meʻa ko ení ʻoku totonu ke ne ʻai kitaua ke ta loto ke ʻiloʻi ʻa e founga ʻe lava ai ke ta ʻai ke fiefia ʻa e ʻOtuá. Naʻá ke ʻilo ʻoku malava moʻoni ke ta ʻai ke fiefia ʻa e ʻOtuá?— Ta talanoa leva ki he meʻá ni ʻi he vahe hoko maí.