ʻUluaki Tuʻi

8 ʻI he taimi ko iá naʻe fakatahatahaʻi+ ʻe Solomone ʻa e kau mātuʻa ʻo ʻIsilelí, ʻa e ngaahi ʻulumotuʻa kotoa ʻo e ngaahi matakalí, mo e ngaahi ʻeiki ʻo e ngaahi fale ʻo e ngaahi tamai ʻo ʻIsilelí.+ Naʻa nau haʻu kia Tuʻi Solomone ki Selusalema ke ʻohake ʻa e ʻaʻake ʻo e fuakava ʻa Sihová mei he Kolo-ʻo-Tēvitá,+ ʻa ia ko Saione.+ 2 Naʻe fakatahataha ʻa e kau tangata kotoa ʻo ʻIsilelí ʻi he ʻao ʻo Tuʻi Solomoné ki he kātoanga* ʻi he māhina ko ʻEtanimí,* ʻa ia ko e māhina ia hono fitú.+ 3 Ko ia naʻe haʻu ʻa e kau mātuʻa kotoa ʻo ʻIsilelí, pea naʻe hiki hake ʻe he kau taulaʻeikí ʻa e ʻAʻaké.+ 4 Naʻa nau ʻohake ʻa e ʻAʻake ʻa Sihová, mo e tēniti feʻiloakiʻangá,+ mo e ngaahi naunau toputapu kotoa naʻe ʻi he tēnití. Naʻe ʻohake ia ʻe he kau taulaʻeikí mo e kau Līvaí. 5 Ko Tuʻi Solomone mo e fuʻu fakataha fakakātoa ʻo ʻIsilelí, ʻa ia naʻe fekau atu ke nau fakataha mai kiate iá, naʻa nau ʻi he ʻao ʻo e ʻAʻaké. Naʻe lahi ʻaupito ʻa e fanga sipi mo e fanga pulu naʻe feilaulauʻí+ pea naʻe ʻikai ke lava ʻo lau pe ʻilo honau tokolahí.

6 Naʻe fakahū leva ʻe he kau taulaʻeikí ʻa e ʻaʻake ʻo e fuakava ʻa Sihová ki hono feituʻú,+ ki he loki taupotu taha ki loto ʻo e falé, ʻa e Potu Fungani Toputapú, ki he lalo kapakau ʻo e ongo selupimí.+

7 Ko ia naʻe mafola atu ʻa e kapakau ʻo e ongo selupimí ʻi ʻolunga ʻi he feituʻu naʻe ʻi ai ʻa e ʻAʻaké, ʻo fakamalumalu ai ʻe he ongo selupimí ʻa e ʻAʻaké mo hono ongo vaʻakau haʻamó.+ 8 Ko e ongo vaʻakau haʻamó+ naʻe lōloa ʻaupito ia ʻo malava ai ke fai ha sio ki he ongo muiʻi vaʻakaú mei he Potu Toputapú ʻa ia ʻoku ʻi muʻa ʻi he loki taupotu taha ki lotó, ka naʻe ʻikai lava ke fai ha sio ki ai mei tuʻa. Pea ʻoku ʻi ai ia ʻo aʻu mai ki he ʻahó ni. 9 Naʻe ʻikai ha toe meʻa kehe ʻi he ʻAʻaké ka ko e ongo lauʻimaka+ pē naʻe tuku ai+ ʻe Mōsese ʻi Hōlepí, ʻi he taimi naʻe fai ai ʻe Sihova ha fuakava+ mo e kakai ʻo ʻIsilelí ʻi heʻenau omi mei he fonua ko ʻIsipité.+

10 ʻI he hū mai ʻa e kau taulaʻeikí ki tuʻa mei he feituʻu toputapú, naʻe fakafonu ʻa e fale ʻo Sihová+ ʻe he ʻaó.+ 11 Naʻe ʻikai lava ke tuʻu ʻa e kau taulaʻeikí ʻo fakahoko honau fatongiá koeʻuhí ko e ʻaó, he naʻe fakafonu ʻe he lāngilangi ʻo Sihová ʻa e fale ʻo Sihová.+ 12 ʻI he taimi ko iá naʻe pehē ʻe Solomone: “Naʻe folofola ʻa Sihova te ne nofo ʻi he poʻuli matolu.+ 13 Kuó u lavaʻi ʻa hono langa ha fale fisifisimuʻa moʻou, ko ha feituʻu tuʻumaʻu moʻou ke ke ʻafio ai ʻo taʻengata.”+

14 Naʻe tafoki hake leva ʻa e tuʻí ʻo ne kamata faitāpuekina ʻa e kotoa ʻo e fakatahaʻanga ʻo ʻIsilelí lolotonga ia naʻe tuʻu pē ʻa e kotoa ʻo e fakatahaʻanga ʻo ʻIsilelí.+ 15 Naʻá ne pehē: “ʻOfa ke fakahīkihikiʻi ʻa Sihova ko e ʻOtua ʻo ʻIsilelí, ʻa e tokotaha naʻe mei hono fofongá tonu ʻa ʻene talaʻofa ki heʻeku tamai ko Tēvitá, pea ʻaki ʻa hono nimá tonu kuó ne fakahoko ia, ʻi heʻene pehē, 16 ‘Mei he ʻaho naʻá ku ʻomi ai ʻa hoku kakai ko ʻIsilelí mei ʻIsipité, kuo ʻikai te u fili ha kolo mei he ngaahi matakali kotoa ʻo ʻIsilelí ke langa ai ha fale ke ʻi ai maʻu pē+ ʻa hoku hingoá, ka kuó u fili ʻa Tēvita ke pule ki hoku kakai ko ʻIsilelí.’ 17 Pea ko e holi ia ʻa e loto ʻo ʻeku tamai ko Tēvitá ke langa ha fale maʻá e huafa ʻo Sihova ko e ʻOtua ʻo ʻIsilelí.+ 18 Ka naʻe folofola ʻa Sihova ki heʻeku tamai ko Tēvitá, ‘Ko e holi ia ʻo ho lotó ke langa ha fale maʻa hoku hingoá, pea ko ha holi lelei eni naʻe ʻi ho lotó. 19 Kae kehe, ʻe ʻikai te ke langa ʻa e falé, ka ko ho foha tonu ʻa ia ʻe fanauʻi kiate koé ʻa e tokotaha te ne langa ʻa e fale maʻa hoku hingoá.’+ 20 Kuo fakahoko ʻe Sihova ʻa e talaʻofa naʻá ne faí, he kuó u fetongi ʻa ʻeku tamai ko Tēvitá pea ʻoku ou nofo ʻi he taloni ʻo ʻIsilelí, ʻo hangē tofu pē ko e talaʻofa ʻa Sihová. Kuó u langa foki ʻa e fale maʻá e huafa ʻo Sihova ko e ʻOtua ʻo ʻIsilelí+ 21 pea kuó u fokotuʻu ai ha feituʻu ki he ʻAʻake ʻoku ʻi ai ʻa e fuakava+ naʻe fai ʻe Sihova mo ʻetau fanga kuí ʻi he taimi naʻá ne ʻomi ai kinautolu mei he fonua ko ʻIsipité.”

22 Pea naʻe tuʻu ʻa Solomone ʻi he ʻao ʻo e ʻōlita ʻo Sihová ʻi muʻa ʻi he kotoa ʻo e fakatahaʻanga ʻo ʻIsilelí, peá ne fola nima hake ki he langí,+ 23 peá ne pehē: “ʻE Sihova ko e ʻOtua ʻo ʻIsilelí, ʻoku ʻikai ha ʻOtua ʻe hangē ko koé+ ʻi he langí ʻi ʻolungá na pe ʻi he māmaní ʻi laló ni, ʻi hoʻo fai ki hoʻo fuakavá pea fakahaaʻi ʻa e ʻofa mateaki+ ki hoʻo kau sevānití ʻa ia ʻoku nau ʻaʻeva ʻi ho ʻaó ʻaki ʻa e kotoa ʻo honau lotó.+ 24 Kuó ke fakahoko ʻa e talaʻofa naʻá ke fai ki hoʻo sevāniti ko Tēvita ko ʻeku tamaí. Naʻe haʻu tonu mei ho fofongá ʻa hoʻo talaʻofá, pea kuó ke fakahoko ia he ʻahó ni ʻaki ho nimá tonu.+ 25 Pea ko eni, ʻe Sihova ko e ʻOtua ʻo ʻIsilelí, ke ke fakahoko ʻa e talaʻofa naʻá ke fai ki hoʻo sevāniti ko Tēvita ko ʻeku tamaí ʻi hoʻo pehē: ‘ʻI hoku ʻaó, ʻe ʻikai ʻaupito ke taʻehoko hake ha tangata ʻi ho hakó ki he taloni ʻo ʻIsilelí, ʻo kapau pē ʻe tokanga ʻa ho ngaahi fohá ki honau ʻalungá ʻi heʻenau ʻaʻeva ʻi hoku ʻaó, ʻo hangē pē ko hoʻo ʻaʻeva ʻi hoku ʻaó.’+ 26 Pea ko eni, ʻe ʻOtua ʻo ʻIsileli, tuku muʻa ke hoko moʻoni ʻa e talaʻofa naʻá ke fai ki hoʻo sevāniti ko Tēvita ko ʻeku tamaí.

27 “Ka ʻe ʻafio moʻoni koā ʻa e ʻOtuá ʻi he māmaní?+ Vakai! Ko e ngaahi langí, ʻio, ʻa e langi ʻo e ngaahi langí, ʻe ʻikai lava ke ke hao ai;+ huanoa hake ai ʻa e kiʻi falé ni kuó u langá!+ 28 Pea tokanga muʻa ki he lotu ʻa hoʻo sevānití pea ki heʻene kole ki ha hōifuá, ʻe Sihova ko hoku ʻOtua, peá ke fanongo muʻa ki he kole tokoni pea ki he lotu ʻoku fai ʻe hoʻo sevānití ʻi ho ʻaó he ʻaho ní. 29 ʻOfa ke ke hāngaifofonga mai ki he falé ni ʻi he pō mo e ʻaho, ki he feituʻu ʻa ia naʻá ke pehē, ‘ʻE ʻi ai ʻa hoku hingoá,’+ ke fanongo ki he lotu ʻoku fai ʻe hoʻo sevānití mo hanga ki he feituʻú ni.+ 30 Peá ke fanongo ki he kole ʻa hoʻo sevānití ki ha hōifuá pea ki he kole ʻa ho kakai ko ʻIsilelí ʻa ia ʻoku nau lotu mo hanga ki he feituʻú ni, pea ʻofa ke ke fanongo mei ho ʻafioʻangá ʻi he langí;+ ʻio, ʻofa ke ke fanongo mai ʻo fakamolemoleʻi.+

31 “ʻI he faiangahala ha tangata ki ha taha kehe pea ʻai ai ia ke ne fai ha fuakava* pea pau ai ke ne ʻi he malumalu ʻo e tautea ʻo e fuakavá,* pea lolotonga ʻene ʻi he malumalu ʻo e fuakavá* ʻokú ne haʻu ki he ʻao ʻo ho ʻōlitá ʻi he falé ni,+ 32 ʻofa ke ke fanongo leva mei he langí peá ke fai mai ha meʻa ʻo ke fakamāuʻi hoʻo kau sevānití ʻaki hono fakahaaʻi ʻoku halaia* ʻa e tokotaha fulikivanú pea fakafoki ʻa e meʻa naʻá ne faí ki hono tumuʻaki ʻoʻoná, pea ʻaki hono fakahaaʻi ʻoku tonuhia* ʻa e tokotaha māʻoniʻoní pea totongi kiate ia ʻo fakatatau ki heʻene māʻoniʻoni ʻaʻaná.+

33 “ʻI hano ikunaʻi ʻa ho kakai ko ʻIsilelí ʻe ha fili koeʻuhí ko ʻenau hanganaki faiangahala kiate koé,+ pea nau foki kiate koe ʻo fakahīkihikiʻi ho huafá+ mo lotu ʻo kōlenga ki hoʻo hōifuá ʻi he falé ni,+ 34 pea ʻofa ke ke fanongo mei he langí pea fakamolemoleʻi ʻa e angahala ʻa ho kakai ko ʻIsilelí pea fakafoki kinautolu ki he fonua naʻá ke foaki ki heʻenau fanga kuí.+

35 “ʻI ha tāpuni ʻa e langí pea ʻikai ha ʻuha+ koeʻuhí ko ʻenau hanganaki faiangahala kiate koé,+ pea nau lotu mo hanga ki he feituʻú ni ʻo nau fakahīkihikiʻi ho huafá pea nau tafoki mei heʻenau angahalá koeʻuhí ko hoʻo fakatōkilaloʻi* kinautolú,+ 36 ʻofa ke ke fanongo leva mei he langí pea fakamolemoleʻi ʻa e angahala ʻa hoʻo kau sevānití, ʻa ho kakai ko ʻIsilelí, he te ke akoʻi kiate kinautolu+ ʻa e hala lelei ʻa ia ʻoku totonu ke nau ʻaʻeva aí; peá ke ʻomi ha ʻuha ki ho fonua+ ʻa ia naʻá ke foaki ko ha tofiʻa ʻo ho kakaí.

37 “Kapau ʻe hoko ha honge ʻi he fonuá,+ pe ko ha mahaki fakaʻauha, ko ha mahunu, mahakiʻia ʻa e ʻakaú,+ ko ha pupunga heʻe, pe ko ha fanga heʻe maumau; pe kapau ʻe ʻākoloʻi kinautolu ʻe honau filí ʻi ha taha ʻo e ngaahi kolo ʻi he fonuá* pe kapau ʻe hoko ha faʻahinga mala pe mahaki kehe,+ 38 ʻilonga ha lotu, pea ʻilonga ha kole ki ha hōifua+ ʻe fai nai ʻe ha tangata pe ko e kotoa ʻo ho kakai ko ʻIsilelí (he ʻoku ʻiloʻi ʻe he tokotaha taki taha ʻa e mamahi ʻoku ʻi hono lotó)+ ʻi heʻenau fola nima atu mo hanga ki he falé ni, 39 pea ʻofa ke ke fanongo mai mei he langí, ko ho ʻafioʻangá,+ pea ʻofa ke ke fakamolemoleʻi+ peá ke fai mai ha meʻa; peá ke totongi ki he tokotaha taki taha ʻo fakatatau ki heʻene ngaahi foungá kotoa,+ he ʻokú ke ʻafioʻi ʻa hono lotó (ko koe toko taha pē ʻokú ke ʻafioʻi moʻoni ʻa e loto ʻo e tangata kotoa pē),+ 40 koeʻuhí ke nau manavahē kiate koe ʻi he ngaahi ʻaho kotoa ʻo ʻenau moʻui ʻi he fonua naʻá ke foaki ki heʻemau fanga kuí.

41 “Pehē foki ki he muli ʻa ia ʻoku ʻikai kau ki ho kakai ko ʻIsilelí pea ʻokú ne haʻu mei ha fonua mamaʻo koeʻuhí ko ho huafá*+ 42 (he te nau fanongo ʻo fekauʻaki mo ho huafa lahí+ pea mo ho nima mālohí pea mo ho nima kuo mafao atú), pea ʻokú ne haʻu ʻo lotu atu mo hanga ki he falé ni, 43 pea ʻofa ke ke fanongo mai mei he langí, ko ho ʻafioʻangá,+ peá ke fai ʻa e meʻa kotoa ʻoku kole atu ʻe he mulí, koeʻuhí ke ʻilo ʻe he ngaahi kakai kotoa ʻo e māmaní ho huafá pea nau manavahē kiate koe,+ ʻo hangē ko ho kakai ko ʻIsilelí, pea nau ʻilo ko ho huafá ʻoku ʻi he fale ko eni kuó u langá.

44 “Kapau ʻe ʻalu atu ho kakaí ke faitau mo honau filí ʻi he hala te ke fekau atu ai kinautolú,+ pea nau lotu+ kia Sihova ʻo nau hanga ki he kolo kuó ke filí+ pea ki he fale kuó u langa maʻa ho huafá,+ 45 peá ke fanongo mei he langí ki heʻenau lotu mo ʻenau kole ki ha hōifuá ʻo ke faifakamaau maʻanautolu.

46 “Kapau te nau faiangahala kiate koe (he ʻoku ʻikai ha tangata ʻe taʻeʻiai haʻane angahala),+ pea hoko mai ʻa hoʻo houhau kakahá kiate kinautolu ʻo ke liʻaki atu kinautolu ki ha fili, pea taki pōpula kinautolu ʻe honau kau fakapōpulá ki he fonua ʻo e filí, ʻo mamaʻo pe ofi;+ 47 pea foki mai ʻenau fakakaukau leleí ʻi he fonua naʻe taki pōpula+ kinautolu ki aí, pea nau foki kiate koe+ ʻo nau kōlenga kiate koe ki ha hōifua ʻi he fonua ʻo honau kau fakapōpulá,+ ʻo pehē, ‘Kuo mau faiangahala mo faikovi; kuo mau fai ha tōʻonga fulikivanu,’+ 48 pea nau foki kiate koe ʻaki ʻa e kotoa ʻo honau lotó+ mo e kotoa ʻo ʻenau moʻuí ʻi he fonua ʻo honau ngaahi filí ʻa ia naʻa nau taki pōpula kinautolú, pea nau lotu kiate koe ʻo nau hanga ki honau fonua naʻá ke foaki ki heʻenau fanga kuí pea ki he kolo naʻá ke filí pea ki he fale kuó u langa maʻa ho huafá,+ 49 pea ke ke fanongo mai mei he langí, ko ho ʻafioʻangá,+ ki heʻenau lotu mo ʻenau kole ki ha hōifuá, ʻo ke faifakamaau maʻanautolu 50 peá ke fakamolemoleʻi ho kakai kuo nau faiangahala kiate koé, ʻo ke fakamolemoleʻi ʻa ʻenau ngaahi laka hala kotoa kuo nau fai kiate koé. Te ke ʻai kinautolu ke fakaʻofaʻia ai ʻa honau kau fakapōpulá, pea te nau ʻofaʻi kinautolu+ 51 (he ko ho kakai kinautolu mo ho tofiʻa,+ ʻa ia naʻá ke ʻomi mei ʻIsipite,+ mei he loto fōnise hakaʻanga ukameá).+ 52 ʻOfa ke ke hāngaifofonga mai ki he kole ʻa hoʻo sevānití ki ha hōifuá+ pea ki he kole ʻa ho kakai ko ʻIsilelí ki ha hōifuá ʻaki hoʻo fanongo mai ʻi ha taimi pē te nau ui atu ai kiate koe.*+ 53 He kuó ke fakamavaheʻi kinautolu ko ho tofiʻa mei he ngaahi kakai kotoa pē ʻo e māmaní,+ ʻo hangē tofu pē ko e meʻa naʻá ke fakahā fakafou ʻia Mōsese ko hoʻo sevānití ʻi hoʻo ʻomi ʻemau fanga kuí mei ʻIsipité, ʻe ʻEiki Hau Sihova.”

54 Pea ʻi he ʻosi pē hono fai hake ʻe Solomone kia Sihova ʻa e lotu kotoa ko ení mo ha kole ki ha hōifuá, naʻá ne mālanga hake mei he ʻao ʻo e ʻōlita ʻo Sihová, ʻa ia naʻá ne tūʻulutui ai ʻo fola nima hake ki he langí.+ 55 Naʻá ne tuʻu hake leva ʻo ne tāpuakiʻi leʻo-lahi ʻa e kotoa ʻo e fakatahaʻanga ʻo ʻIsilelí, ʻo ne pehē: 56 “Ke fakahīkihikiʻi ʻa Sihova, ʻa ia kuó ne foaki ha mālōlōʻanga ki hono kakai ko ʻIsilelí, ʻo hangē tofu pē ko ʻene talaʻofá.+ Kuo ʻikai haʻane foʻi folofola ʻe taha ʻi he kotoa ʻo ʻene ngaahi talaʻofa lelei kuó ne fai fakafou ʻia Mōsese ko ʻene sevānití ʻe taʻefakahoko.+ 57 ʻOfa ke ʻiate kitautolu ʻa Sihova ko hotau ʻOtuá ʻo hangē tofu pē ko ʻene ʻi heʻetau fanga kuí.+ ʻOfa ke ʻoua naʻá ne liʻaki pe siʻaki kitautolu.+ 58 ʻOfa ke ne tohoakiʻi hotau lotó kiate ia,+ ke ʻaʻeva ʻi he kotoa ʻo ʻene ngaahi foungá pea ke tauhi ʻa ʻene ngaahi fekaú, mo ʻene ngaahi tuʻutuʻuní, mo ʻene ngaahi fakamāú, ʻa ia naʻá ne fekau ki heʻetau fanga kuí ke nau tauhí. 59 Pea ʻofa ke hoko ʻa ʻeku ngaahi leá ni ʻa ia kuó u kōlenga ʻaki kia Sihova ki ha hōifuá ʻo taka ofi kia Sihova ko hotau ʻOtuá ʻi he ʻaho mo e pō, koeʻuhí ke ne faifakamaau ai maʻa ʻene sevānití pea maʻa hono kakai ko ʻIsilelí ʻo fakatatau ki he fiemaʻu ʻo e ʻaho taki taha, 60 koeʻuhí ke ʻilo ai ʻe he ngaahi kakai kotoa pē ʻo e māmaní ko Sihova ʻa e ʻOtua moʻoní.+ ʻOku ʻikai ha toe taha kehe!+ 61 Ko ia tuku ke hoko ʻo kakato*+ homou lotó kia Sihova ko hotau ʻOtuá ʻaki ʻa e ʻaʻeva ʻi heʻene ngaahi tuʻutuʻuní pea ʻi hono tauhi ʻa ʻene ngaahi fekaú ʻo hangē ko ia ʻi he ʻaho ní.”

62 Ko ia naʻe ʻoatu ʻe he tuʻí mo e kotoa ʻo ʻIsileli naʻe ʻiate iá ha ngaahi feilaulau lahi ʻi he ʻao ʻo Sihová.+ 63 Naʻe ʻoatu ʻe Solomone ʻa e ngaahi feilaulau feʻinasiʻaki+ kia Sihova: Naʻá ne feilaulauʻaki ʻa e fanga pulu ʻe 22,000 mo e fanga sipi ʻe 120,000. Ko ia naʻe huufi ai ʻe he tuʻí mo e kotoa ʻo e kau ʻIsilelí ʻa e fale ʻo Sihová.+ 64 ʻI he ʻaho ko iá naʻe pau ai ki he tuʻí ke ne fakatoputapuʻi ʻa e lotoʻā ʻa ia ʻoku ʻi muʻa ʻi he fale ʻo Sihová, he naʻe pau ke ne ʻohake ai ʻa e ngaahi feilaulau tutú, mo e ngaahi feilaulau meʻakaí,* pea mo e ngaahi kongokonga ngako ʻo e ngaahi feilaulau feʻinasiʻakí, koeʻuhí ko e ʻōlita kopa+ ʻa ia ʻoku ʻi he ʻao ʻo Sihová naʻe fuʻu siʻisiʻi ia ke hao ʻa e ngaahi feilaulau tutú, mo e ngaahi feilaulau meʻakaí, pea mo e ngaahi kongokonga ngako+ ʻo e ngaahi feilaulau feʻinasiʻakí. 65 ʻI he taimi ko iá naʻe fai ai ʻe Solomone ʻa e kātoangá+ fakataha mo e kotoa ʻo ʻIsilelí, ko ha fuʻu fakatahaʻanga kakai tokolahi mei Lipo-hēmati* ʻo aʻu hifo ki he Teleʻa* ʻo ʻIsipité,+ ʻi he ʻao ʻo Sihova ko hotau ʻOtuá ʻi he ʻaho ʻe fitu pea ʻi ha toe ʻaho kehe ʻe fitu, ko e ʻaho fakakātoa ʻe 14. 66 ʻI he ʻaho hono hokó,* naʻá ne tuku ange atu ʻa e kakaí, pea naʻa nau talamonū ke tāpuakiʻi ʻe he ʻOtuá ʻa e tuʻí pea nau ʻalu atu ki honau ngaahi ʻapí ʻi he fiefia mo ha ongoʻi nēkeneka ʻo e lotó ʻi he ngaahi lelei+ kotoa pē kuo fakahaaʻi ʻe Sihova kia Tēvita ko ʻene sevānití pea mo ʻIsileli ko hono kakaí.