Nehemaia

8 Naʻe fakatahataha loto-taha leva ʻa e kakaí kotoa ʻi he malaʻe fakakoló* ʻi muʻa ʻi he Matapā Vaí,+ pea naʻa nau tala kia ʻĒsela+ ko e tokotaha hiki-tataú* ke ʻomi ʻa e tohi ʻo e Lao ʻa Mōsesé,+ ʻa ia naʻe tuʻutuʻuni ʻe Sihova ke muimui ki ai ʻa ʻIsilelí.+ 2 Ko ia naʻe ʻomi ai ʻe ʻĒsela ko e taulaʻeikí ʻa e Laó ki he ʻao ʻo e fakatahaʻanga+ ʻo e kau tangatá, kau fefiné, mo e faʻahinga kotoa naʻe lava ke nau fanongo pea mahino kiate kinautolú, ʻi he ʻuluaki ʻaho ʻo e māhina hono fitú.+ 3 Pea naʻá ne lau leʻo-lahi ia+ mei muʻa ʻi he malaʻe fakakoló ʻa ia naʻe ʻi muʻa ʻi he Matapā Vaí, mei he maʻa ʻa e ʻahó ʻo aʻu ki he hoʻatā mālié, ki he kau tangatá, ko e kau fefiné, pea mo kinautolu kotoa naʻe lava ke mahino kiate kinautolú; pea naʻe fanongo tokanga+ ʻa e kakaí ki he tohi ʻo e Laó. 4 Pea ko ʻĒsela ko e tokotaha hiki-tataú* naʻá ne tuʻu ʻi ha tuʻuʻanga papa naʻe ngaohi ki he meʻa naʻe faí; pea naʻe tuʻu ʻi hono tafaʻakí ʻi he toʻomataʻú ʻa Matitaia, Semā, ʻAnaia, ʻŪlaia, Hilikaia, mo Māseia; pea naʻe ʻi hono toʻohemá ʻa Petaia, Misaeli, Malakaia,+ Hasumi, Hasa-patana, Sākalaia, mo Mēsuilame.

5 Naʻe fakaava ʻe ʻĒsela ʻa e tohí ʻo sio ki ai ʻa e kakaí kotoa, he naʻá ne tuʻu ʻo māʻolunga ʻi he kakaí kotoa. ʻI heʻene fakaava iá, naʻe tuʻu hake ʻa e kakaí kotoa. 6 Pea naʻe fakahīkihikiʻi ʻe ʻĒsela ʻa Sihova ko e ʻOtua moʻoní, ʻa e Tokotaha lahí, ʻa ia naʻe tali ki ai ʻa e kakaí kotoa, “ʻĒmeni!* ʻĒmeni!”+ pea nau hiki hake honau nimá. Pea naʻa nau punou mo fakatōmapeʻe kia Sihova mo hanga ki he kelekelé. 7 Pea ko Sīsua, Pani, Selepaia,+ Siamini, ʻĀkupi, Sapetai, Hotaia, Māseia, Kelita, ʻAsalaia, Siosapati,+ Hānani, mo Pēlaia, ʻa ia ko e kau Līvaí, naʻa nau fakamatalaʻi ʻa e Laó ki he kakaí,+ lolotonga ia naʻe tuʻu ai pē ʻa e kakaí. 8 Pea naʻe hokohoko atu ʻenau lau leʻo-lahi ʻa e tohí, ʻa e Lao ʻa e ʻOtua moʻoní, ʻo fakamatalaʻi māʻalaʻala ia mo fakahaaʻi ʻa hono ʻuhingá; ko ia naʻa nau tokoniʻi ai ʻa e kakaí ke mahino kiate kinautolu ʻa e meʻa naʻe laú.*+

9 Pea ko Nehemaia, ʻa ia naʻe kōvana* ʻi he taimi ko iá, pea mo ʻĒsela+ ko e taulaʻeiki mo e tokotaha hiki-tataú,* pea mo e kau Līvai naʻa nau fakahinohinoʻi ʻa e kakaí naʻa nau pehē ki he kakaí kotoa: “Ko e ʻaho māʻoniʻoni eni kia Sihova ko homou ʻOtuá.+ ʻOua te mou mamahi pe tangi.” He ko e kakaí kotoa naʻa nau tangi ʻi heʻenau fanongo ki he ngaahi lea ʻo e Laó. 10 Naʻá ne pehē kiate kinautolu: “Mou ō ʻo kai ʻa e ngaahi meʻa lelei tahá* pea inu ʻa e meʻa melié, pea ʻoatu ha ʻinasi meʻakai+ ki he faʻahinga naʻe ʻikai ke teuteu haʻanau meʻá; he ko e ʻaho māʻoniʻoni eni ki hotau ʻEikí, pea ʻoua ʻe ongoʻi mamahi, he ko e fiefia meia Sihová ʻa homou maluʻangá.”* 11 Pea naʻe fakanonga ʻe he kau Līvaí ʻa e kakaí kotoa, ʻi he pehē: “Mou fakalongolongo hifo, he ko e ʻaho māʻoniʻoni eni, pea ʻoua ʻe ongoʻi mamahi.” 12 Ko ia naʻe ō ʻa e kakaí kotoa ke kai mo inu pea ke ʻoatu ha ngaahi ʻinasi meʻakai pea ke fai ha fuʻu fakafiefia,+ he naʻe mahino kiate kinautolu ʻa e ngaahi lea ʻa ia naʻe fakahaaʻi kiate kinautolú.+

13 Pea ʻi he ʻaho hono uá, naʻe fakatahataha takatakai mai ai ʻa e ngaahi ʻulumotuʻa ʻo e ngaahi fale ʻo e ngaahi tamai ʻa e kakaí kotoa, mo e kau taulaʻeikí, pea mo e kau Līvaí kia ʻĒsela ko e tokotaha hiki-tataú* ke maʻu ha fakamaama lahi ange ki he ngaahi lea ʻo e Laó. 14 Pea naʻa nau ʻilo ai naʻe hiki ʻi he Laó ʻo pehē naʻe tuʻutuʻuni ʻe Sihova fakafou ʻia Mōsese ko e kau ʻIsilelí te nau nofo ʻi he ngaahi fale louʻakau* lolotonga ʻa e kātoanga ʻi he māhina hono fitú,+ 15 pea ke nau fai ha fanongonongo+ pea talaki ʻi he kotoa ʻo honau ngaahi koló pea ʻi Selusalema kotoa, ʻo pehē: “Mou ʻalu atu ki he feituʻu moʻungaʻiá pea ʻomi ha ngaahi vaʻa failau mei he ʻulu ʻōlivé, ʻulu painí, mailé mo e ʻulu pāmé, pea mo e ngaahi vaʻa failau ʻo e ʻuluʻakau kehé ke ngaohiʻaki ʻa e ngaahi fale louʻakaú, ʻo fakatatau ki he meʻa kuo tohí.”

16 Ko ia naʻe ʻalu atu ai ʻa e kakaí ʻo ʻomi ia ke ngaohiʻaki maʻanautolu ha ngaahi fale louʻakau, ʻo taki taha fokotuʻu ia ʻi hono funga fale, pea ʻi honau ngaahi lotoʻaá foki, ʻi he ongo lotoʻā ʻo e fale ʻo e ʻOtua moʻoní,+ ʻi he malaʻe fakakolo ʻo e Matapā Vaí,+ pea ʻi he malaʻe fakakolo ʻo e Matapā ʻo ʻIfalemí.+ 17 Ko ia ko kinautolu kotoa ʻi he fakatahaʻangá ʻa ia naʻe foki mai mei he nofo pōpulá naʻa nau ngaohi ʻa e ngaahi fale louʻakau pea nau nofo ʻi he ngaahi fale louʻakaú, he naʻe ʻikai ke fai peheni ʻa e kau ʻIsilelí talu mei he ngaahi ʻaho ʻo Siosiua+ ko e foha ʻo Nuní ʻo aʻu mai ki he ʻaho ko iá, ko ia naʻe ʻi ai ʻa e fuʻu fiefia lahi.+ 18 Pea ʻi he ʻaho ki he ʻaho naʻe lau ʻa e tohi ʻo e Lao ʻa e ʻOtua moʻoní,+ mei he ʻuluaki ʻahó ʻo aʻu ki he ʻaho fakaʻosí. Pea naʻa nau fai ʻa e kātoangá ʻi he ʻaho ʻe fitu, pea naʻe ʻi ai ha fuʻu fakataha makehe ʻi he ʻaho hono valú, ʻo hangē ko ia naʻe fiemaʻú.+