Ko e Tohi Hono Ua ʻa Pita

2 Kae kehe, naʻe ʻi ai foki ʻa e kau palōfita loi ʻi he lotolotonga ʻo e kakai ʻIsilelí, hangē pē ko ia foki ʻe ʻi ai mo e kau faiako loi ʻi homou lotolotongá.+ Ko e faʻahingá ni te nau fakatupu ha ngaahi fakafaʻafaʻahi ʻaki ʻenau poupouʻi ʻa e ngaahi akonaki loi, pea ʻe aʻu ʻo nau fakafisingaʻi ʻa e tokotaha* ʻa ia naʻá ne fakatau mai kinautolú,+ ʻo nau ʻomai ai ha fakaʻauha vave kiate kinautolu tonu. 2 ʻIkai ko ia pē, ko e tokolahi te nau muimui ki heʻenau faikovi taʻemīngaó,*+ pea koeʻuhi ko kinautolu, ʻe lauʻikoviʻi ai ʻa e hala ʻo e moʻoní.+ 3 Pehē foki, ʻi he mānumanú te nau ngāueʻaki anga-kākā kimoutolu ʻo faiʻaki ʻa e ngaahi lea loi. Ka ko honau fakamāú, ʻa ia kuo fuoloa hono fakapapauʻí,+ ʻoku ʻikai ke fakatōtōʻohi mai, pea ko honau fakaʻauhá ʻoku ʻikai ke mohe.*+

4 Ko e moʻoni naʻe ʻikai ke holomui ʻa e ʻOtuá mei hono tautea ʻa e kau ʻāngelo naʻe faiangahalá,+ ka naʻá ne lī kinautolu ki Tātalusi,*+ ʻo ne haʻi sēini kinautolu* ʻi he fakapoʻuli matolu ke tuku tauhi ai ki he fakamaau.+ 5 Pea naʻe ʻikai te ne holomui mei hono tautea ha māmani motuʻa,+ ka naʻá ne fakahaofi ʻa Noa, ko ha tokotaha malangaʻi ʻo e māʻoniʻoní,+ fakataha mo ha toko fitu kehe+ ʻi he taimi naʻá ne ʻomi ai ha lōmaki ki ha māmani ʻo ha kakai anga-taʻefakaʻotua.+ 6 Pea ʻi heʻene fakaʻauha ʻa e ongo kolo ko Sōtoma mo Komolá ʻo hoko ko e efuefú, naʻá ne fakahalaiaʻi ai kinaua,+ ʻo ne fokotuʻu ai ha sīpinga ki he ngaahi meʻa ka hoko ʻi he kahaʻú ki he kakai anga-taʻefakaʻotuá.+ 7 Pea naʻá ne fakahaofi ʻa Lote māʻoniʻoni,+ ʻa ia naʻe fakalotomafasiaʻi lahi ʻe he faikovi taʻemīngao* ʻa e kakai maumau-laó— 8 he ʻi he ʻaho ki he ʻaho, ko e tangata māʻoniʻoni ko iá naʻe fakamamahiʻi ʻa ʻene moʻui māʻoniʻoní ʻe he ngaahi ngāue maumau-lao ʻa ia naʻá ne mamata mo fanongo ai lolotonga ʻene nofo ʻi honau lotolotongá. 9 Ko ia ai, ʻoku ʻiloʻi ʻe Sihova* ʻa e founga ke fakahaofi ai ʻa e kakai anga-līʻoa fakaʻotuá mei he ʻahiʻahí,+ ka ke tauhi ʻa e kakai taʻemāʻoniʻoní ke fakaʻauha* ʻi he ʻaho ʻo e fakamāú,+ 10 tautefito ki he faʻahinga ʻoku nau feinga ke ʻuliʻi ʻa e kakano ʻo e niʻihi kehé+ pea ʻoku nau taʻetokaʻi ha tuʻunga maʻu mafaí.+

ʻI heʻenau taʻeufi mo taʻefieauná, ʻoku ʻikai te nau ilifia ke laukovi ki he faʻahinga lāngilangiʻiá, 11 lolotonga ia ko e kau ʻāngeló, neongo ʻenau lahi ange ʻi he iví mo e mālohí, ʻoku ʻikai te nau tukuakiʻi ʻa e kau faiako loí ʻaki ha ngaahi laukovi, ko e meʻa ʻi heʻenau fakaʻapaʻapa kia* Sihová,*+ 12 Ka ko e kau tangatá ni, ʻi he hangē ko e fanga monumanu taʻefakakaukaú ʻa ia ʻoku nau ngāue ʻo fakatatau ki heʻenau ongo fakanatulá pea ʻoku fanauʻi mai ke pō pea fakaʻauhá, ʻoku nau laukovi ʻo fekauʻaki mo e ngaahi meʻa ʻoku nau taʻeʻilo ki ai.+ Ko e nunuʻa ʻo e ngaahi ngāue kovi ʻoku nau faí, ʻe fakaʻauha ai kinautolu, 13 ʻo nau tofanga ʻi he maumau ko ha tautea ia ki honau ʻalunga fakatupu maumaú.

ʻOku nau lau ko e meʻa fakafiefia ke nōfoʻi ki he moʻui fakahōhōʻiaʻi ʻo e kakanó,+ naʻa mo e ʻi he taimi ʻahó. Ko e ngaahi ʻila mo e ngaahi mele kinautolu ʻoku nau mātuʻaki maʻu ʻenau mālieʻiá* ʻi heʻenau ngaahi akonaki kākaá lolotonga ia ʻenau kātoanga kai fakataha mo kimoutolú.+ 14 Ko honau matá ʻoku fonu ʻi he tono+ pea ʻoku ʻikai malava ke tuku ʻenau faiangahalá, pea ʻoku nau fakataueleʻi ʻa e faʻahinga ʻoku ʻikai ke tuʻu mālohí. ʻOku nau maʻu ha loto kuo ʻosi akoʻi ʻi he mānumanú. Ko e fānau malaʻia kinautolu. 15 ʻI hono liʻaki ʻa e hala ʻoku hangatonú, kuo takiheeʻi kinautolu. Kuo nau muimui ʻi he hala ʻo Pēlami+ ko e foha ʻo Pioá, ʻa ia naʻá ne manako ʻi he totongi ʻo e faihalá,+ 16 ka naʻe valokiʻi ia ʻi heʻene maumauʻi ʻa e meʻa naʻe totonú.+ Ko ha monumanu ngāue taʻelava ʻo lea naʻe lea ʻi ha leʻo fakaetangata ʻo ne taʻofi ʻa e ʻalunga fakavalevale ʻo e palōfitá.+

17 Ko e faʻahingá ni ko ha ngaahi matavai taʻeʻiai ha vai mo ha ngaahi kakapu ʻoku ʻave takai ʻe ha fuʻu afā mālohi, pea kuo tuku tauhi kiate kinautolu ha fuʻu fakapoʻuli matolu.+ 18 ʻOku nau fai ʻa e ngaahi fakamatala lau meʻa lalahi ʻa ia ko e koto muna pē. ʻI hono ʻai ke fakamānako ki he ngaahi holi ʻo e kakanó+ pea fakataha mo e ngaahi tōʻonga ʻo e faikovi taʻemīngaó,* ʻoku nau fakataueleʻi ʻa e kakai ʻa ia ko ʻenau toki hao mai pē mei he faʻahinga ʻoku nau moʻui faihalá.+ 19 Lolotonga ʻoku nau talaʻofaʻaki kiate kinautolu ha tauʻatāiná, ko kinautolu tonu ko e kau pōpula ki he angahalá;+ he ka ʻi ai ha taha ʻoku ikunaʻi ʻe ha taha, ko e tokotaha ko iá ko ʻene pōpula.*+ 20 Ko hono moʻoní, ʻi he hili ʻa e hao mai mei he ngaahi ʻuli ʻo e māmaní+ fakafou ʻi ha ʻilo totonu ki he ʻEiki mo e Fakamoʻui ko Sīsū Kalaisí, kapau ʻoku nau toe kau pē ʻi he ngaahi meʻa tofu pē ko ení pea ikuʻi kinautolu ʻe he ngaahi meʻá ni, ko honau tuʻunga fakamuimuí kuo hoko ia ʻo kovi ange ʻi he ʻuluakí.+ 21 Naʻe mei lelei ange kiate kinautolu ke ʻoua te nau hoko ʻo ʻiloʻi totonu ʻa e hala ʻo e māʻoniʻoní, ʻi heʻenau ʻiloʻi ʻa e hala ko iá pea hili iá pea nau tafoki kinautolu mei he fekau māʻoniʻoni naʻa nau maʻú.+ 22 Ko e meʻa kuo hoko kiate kinautolú ʻoku fakamoʻoniʻi ai ʻa e palōveepi ko ʻení: “Kuo foki ʻa e kulií ki heʻene lua, pea ko e puaka ne maʻá kuo toe foki ia ʻo fakapelepela.”+