Fakamaau

6 Ka naʻe toe fai ʻe he kau ʻIsilelí ʻa e meʻa naʻe kovi ʻi he vakai ʻa Sihová,+ ko ia naʻe tuku atu ʻe Sihova kinautolu ki he nima ʻo Mitianí ʻi he taʻu ʻe fitu.+ 2 Pea naʻe puleʻi ʻe he nima ʻo Mitianí ʻa ʻIsileli.+ Koeʻuhi ko Mitiani, naʻe ngaohi ai ʻe he kau ʻIsilelí maʻanautolu ha ngaahi feituʻu toitoiʻanga* ʻi he ngaahi moʻungá, ʻi he ngaahi ʻaná, pea ʻi he ngaahi feituʻu naʻe faingataʻa ke aʻu ki aí.+ 3 Ka fai ʻe ʻIsileli ʻenau tūtūʻí, naʻe ʻohofi kinautolu ʻe Mitiani mo ʻAmaleki+ pea mo e kau Hahaké.+ 4 Naʻa nau ʻapitanga ʻo fakafetau atu kiate kinautolu mo maumauʻi ʻa e fua ʻo e fonuá ʻo aʻu ki Kesa, pea naʻe ʻikai te nau fakatoe ha meʻa maʻa ʻIsileli ke nau kai pea ʻikai ha sipi, pe ha pulu, pe ha ʻasi.+ 5 He naʻa nau haʻu mo ʻenau fanga manu mo e ngaahi tēniti naʻe hangē hono lahí ko e fanga heʻé,+ pea ko kinautolu mo ʻenau fanga kāmelí naʻe ʻikai malava ke lau,+ pea naʻa nau haʻu ki he fonuá ke fakaʻauha ia. 6 Ko ia naʻe hoko ʻa ʻIsileli ʻo mātuʻaki masiva koeʻuhi ko Mitiani; pea naʻe ui ʻa e kau ʻIsilelí kia Sihova ki ha tokoni.+

7 ʻI he taimi naʻe ui ai ʻa e kau ʻIsilelí kia Sihova ki ha tokoni koeʻuhi ko Mitianí,+ 8 naʻe fekauʻi atu ʻe Sihova ki he kau ʻIsilelí ha palōfita ʻa ia naʻá ne pehē kiate kinautolu: “Ko e folofola eni ʻa Sihova ko e ʻOtua ʻo ʻIsilelí, ‘Naʻá ku ʻohake kimoutolu mei ʻIsipite pea ʻomai ai kimoutolu mei he fale fakapōpulá.+ 9 Ko ia naʻá ku fakahaofi kimoutolu mei he nima ʻo ʻIsipité pea mei he kotoa ʻo homou kau fakaaoaó pea kapusi kinautolu mei homou ʻaó pea foaki kiate kimoutolu honau fonuá.+ 10 Pea naʻá ku pehē kiate kimoutolu: “Ko au Sihova ko homou ʻOtuá.+ Kuo pau ke ʻoua naʻa mou manavahē ki he ngaahi ʻotua ʻo e kau ʻĀmolí ʻa ē ko honau fonuá ena ʻoku mou nofo aí.”+ Ka naʻe ʻikai te mou talangofua kiate au.’”*+

11 Ki mui ai, naʻe haʻu ʻa e ʻāngelo+ ʻa Sihová ʻo tangutu ʻi he fuʻu lalo ʻakau ʻi ʻŌfilá, ʻa ia naʻe maʻu ʻe Sōasi ko e hako ʻo ʻApiesá.+ Naʻe haha uite ʻa hono foha ko Kitioné+ ʻi he tataʻoʻanga uainé koeʻuhí ke fakapuliki ia mei Mitiani. 12 Naʻe hā ʻa e ʻāngelo ʻa Sihová kiate ia ʻo ne pehē: “ʻOku kau ʻa Sihova mo koe,+ ʻa koe ko e tangata toʻa ʻi he taú.” 13 Naʻe pehē ange ai ʻe Kitione kiate ia: “Fakamolemoleʻi ange au, ʻe hoku ʻeiki, ka ʻo kapau ʻoku kau ʻa Sihova mo kimautolu, ko e hā kuo hoko kotoa mai ai ʻa e meʻá ni kiate kimautolú?+ Ko fē ʻa ʻene ngaahi ngāue fakaofo kotoa naʻe talanoa mai ʻe heʻemau ngaahi tamaí kiate kimautolu,+ ʻo pehē, ‘ʻIkai naʻe ʻohake kimautolu ʻe Sihova mei ʻIsipite?’+ Ko eni kuo liʻaki kimautolu+ ʻe Sihova pea tuku atu kimautolu ki he nima ʻo Mitianí.” 14 Naʻe tafoki hake ʻa Sihova kiate ia ʻo ne pehē: “ʻAlu mo e mālohi ʻokú ke maʻú, pea te ke fakahaofi ʻa ʻIsileli mei he nima ʻo Mitianí.+ ʻIkai ko au ʻoku ou fekauʻi koé?” 15 Naʻe tali ange ʻe Kitione kiate ia: “Fakamolemoleʻi muʻa au, ʻe Sihova. ʻE lava fēfē ke u fakahaofi ʻa ʻIsileli? Vakai! Ko e haʻa* ʻoku ou ʻi aí ko e siʻi taha ia ʻia Manasé, pea ko e tokotaha taʻeʻiloa taha au ʻi he fale ʻo ʻeku tamaí.” 16 Ka naʻe folofola ange ʻa Sihova kiate ia: “Koeʻuhi te u kau mo koe,+ te ke taaʻi ai ʻa Mitiani ʻo hangē ha tangata pē ʻe toko tahá.”

17 Naʻá ne pehē ange leva kiate ia: “Pea kapau kuó u maʻu ʻa hoʻo hōifuá, fakahaaʻi mai kiate au ha fakaʻilonga ko koe ia ʻa e tokotaha ʻoku folofola mai kiate aú. 18 Fakamolemole ʻoua naʻá ke mavahe mei heni kae ʻoua ke u foki mai mo haʻaku meʻaʻofa ʻo tuku atu ʻi ho ʻaó.”+ Ko ia naʻá ne folofola ange: “Te u nofo heni kae ʻoua kuó ke foki mai.” 19 Pea naʻe hū ʻa Kitione ki loto ʻo teuteu mai ha kiʻi kosi mui mo ngaohi ha mā taʻelēvani mei ha mahoaʻa+ efa* ʻe taha. Naʻá ne faʻo ʻa e kakanoʻi-manú ʻi he kató pea ʻai ʻa e huhuʻá ʻi he kuló; naʻá ne ʻomai leva ia ki tuʻa ʻo ne tuku atu kiate ia ʻi he fuʻu lalo ʻakaú.

20 Naʻe pehē ange leva ʻe he ʻāngelo ʻa e ʻOtua moʻoní kiate ia: “Toʻo ʻa e kakanoʻi-manú mo e mā taʻelēvaní ʻo tuku ʻi he fuʻu funga maka ko eé, pea huaʻi atu ʻa e huhuʻá.” Pea naʻá ne fai leva ia. 21 Naʻe mafao atu leva ʻe he ʻāngelo ʻa Sihová ʻa e muiʻi tokotoko naʻe ʻi hono nimá ʻo lave ki he kakanoʻi-manú mo e mā taʻelēvaní, pea naʻe puho hake ha afi mei he maká ʻo ne keina ʻa e kakanoʻi-manú mo e mā taʻelēvaní.+ Pea naʻe puli leva ʻa e ʻāngelo ʻa Sihová ʻo ʻikai te ne toe sio ki ai. 22 Naʻe ʻiloʻi ai ʻe Kitione tā ko e ʻāngelo ia ʻa Sihova.+

Naʻe pehē atu leva ʻe Kitione: “ʻOiauē, ʻEiki Hau Sihova, he kuó u mamata ki he ʻāngelo ʻa Sihová mata ki he mata!”+ 23 Ka naʻe folofola ange ʻa Sihova kiate ia: “Ke ʻiate koe ʻa e melinó. ʻOua ʻe manavahē;+ ʻe ʻikai te ke mate.” 24 Ko ia naʻe fokotuʻu ʻe Kitione ha ʻōlita ʻi ai kia Sihova, pea ʻoku ui ia ko Sihova-salome*+ ʻo aʻu mai ki he ʻahó ni. ʻOku kei tuʻu ia ʻi ʻŌfila ʻo e haʻa ʻApiesá.

25 ʻI he pō ko iá naʻe folofola ʻa Sihova kiate ia: “Toʻo ʻa e kiʻi pulu tangata ʻa hoʻo tamaí, ʻa e kiʻi pulu tangata hono ua ko ia ʻoku taʻu fitú, pea holoki ʻa e ʻōlita ʻo Pēali ʻoku ʻa hoʻo tamaí, pea tā hifo ʻa e pou ʻakau toputapu* ʻi hono tafaʻakí.+ 26 ʻI he hili hoʻo langa ha ʻōlita kia Sihova ko ho ʻOtuá ʻi ʻolunga ʻi he feituʻu malú ni ʻaki ʻa e ngaahi ʻotu maká, toʻo ʻa e kiʻi pulu tangata hono uá ʻo ʻohake ia ko ha feilaulau tutu ʻi ʻolunga ʻi he ngaahi konga ʻakau mei he pou ʻakau toputapu* ko ia naʻá ke tā hifó.” 27 Ko ia naʻe ʻave ʻe Kitione ha kau tangata ʻe toko hongofulu ʻo ʻene kau sevānití pea nau fai ʻa e meʻa tofu pē ko ia naʻe tala ange ʻe Sihova kiate iá. Ka naʻá ne fuʻu manavahē ki he fale ʻo ʻene tamaí pea mo e kau tangata ʻo e koló ke ne fai ia ʻi he ʻahó, ko ia naʻá ne fai ai ia ʻi he poʻulí.

28 ʻI he tuʻu hengihengi hake ʻa e kau tangata ʻo e koló ʻi he pongipongi hono hokó, naʻa nau sio atu kuo holoki ʻa e ʻōlita ʻo Pēalí pea kuo tā hifo ʻa e pou ʻakau toputapu* ʻi hono tafaʻakí pea ko e kiʻi pulu tangata hono uá kuo feilaulauʻi ia ʻi he ʻōlita naʻe langá. 29 Naʻa nau feʻekenaki: “Ko hai naʻá ne fai ení?” ʻI he hili haʻanau fakatotolo ki ai, naʻa nau pehē: “Ko Kitione ko e foha ʻo Sōasí naʻá ne fai ení.” 30 Ko ia naʻe pehē ʻe he kau tangata ʻo e koló kia Sōasi: “ʻOmi ki tuʻa ho fohá ke tāmateʻi, koeʻuhi naʻá ne holoki ʻa e ʻōlita ʻo Pēalí pea tā hifo ʻa e pou ʻakau toputapu* ʻi hono tafaʻakí.” 31 Naʻe pehē ange leva ʻe Sōasi+ ki he faʻahinga kotoa naʻa nau haʻu ʻo fehangahangai mo iá: “Kuo pau koā ke mou taukapoʻi ʻa Pēali? Kuo pau koā ke mou fakahaofi ia? ʻIlonga ha taha ʻokú ne taukapoʻi ia ʻoku totonu ke tāmateʻi ia he pongipongí ni.+ Kapau ko ha ʻotua ia, tuku ke ne taukapoʻi ʻa ia tonu,+ koeʻuhi he naʻe holoki ʻe ha taha ʻa hono ʻōlitá.” 32 Pea naʻá ne ui ʻa Kitione ko Selupēali* ʻi he ʻaho ko iá, ʻi heʻene pehē: “Tuku kia Pēali ke ne taukapoʻi ʻa ia tonu, he naʻe holoki ʻe ha taha ʻa hono ʻōlitá.”

33 Naʻe kau fakataha+ kotoa ʻa Mitiani+ mo ʻAmaleki+ pea mo e kau Hahaké; pea naʻa nau kolosi* ki he Teleʻa* ʻo Sisililí ʻo ʻapitanga ai. 34 Naʻe hoko mai leva kia* Kitione+ ʻa e laumālie ʻo Sihová pea naʻá ne fakaongo atu ʻa e meʻaifí,+ pea naʻe fakatahataha mai ʻa e haʻa ʻApiesá+ ʻo muimui ʻiate ia. 35 Naʻá ne fekauʻi atu ha kau talafekau ki he kotoa ʻo Manasé, pea naʻa nau fakatahataha mai foki mo kinautolu ʻo muimui ʻiate ia. Naʻá ne toe fekauʻi atu ha kau talafekau kia ʻĀseli, mo Sepuloni, pea mo Nafitalai, pea naʻa nau ʻalu hake ke fakafetaulaki kiate ia.

36 Naʻe pehē leva ʻe Kitione ki he ʻOtua moʻoní: “Kapau te ke fakahaofi ʻa ʻIsileli fakafou ʻiate au, ʻo hangē tofu pē ko ia kuó ke talaʻofaʻakí,+ 37 ko eni ʻoku ou folahi ha fulufuluʻisipi ʻi he ʻauʻauʻanga uité. Kapau ʻe hahau ʻa e fulufuluʻisipí pē, kae mōmoa kotoa ʻa e kelekele takatakai ʻi aí, te u ʻilo leva ai te ke fakahaofi ʻa ʻIsileli fakafou ʻiate au, ʻo hangē tofu pē ko ia kuó ke talaʻofaʻakí.” 38 Pea ko e meʻa ia naʻe hokó. ʻI heʻene tuʻu hengihengi hake ʻi he ʻaho hono hokó ʻo ne tatau ʻa e fulufuluʻisipí, naʻá ne tatau mei he fulufuluʻisipí ha hahau ʻa ia naʻe fonu ai ha poulu lahi ʻi he vaí. 39 Kae kehe, naʻe pehē ʻe Kitione ki he ʻOtua moʻoní: “ʻOua naʻa tuku hoʻo houhaú ke kakaha mai kiate au, kae tuku ke u toe fai atu ʻa e kole ʻe taha ko ení. Fakamolemole ʻo tuku mai ke u toe fai hano sivi tā-tuʻo-taha ʻaki ʻa e fulufuluʻisipí. Fakamolemole muʻa ʻo ʻai ke mōmoa ʻa e fulufuluʻisipí pē kae hahau kotoa ʻa e kelekelé.” 40 Ko ia, ko e meʻa ia naʻe fai ʻe he ʻOtuá ʻi he pō ko iá; ko e fulufuluʻisipí pē naʻe mōmoá, pea hahau kotoa ʻa e kelekelé.