ʻIsikeli

48 “Ko e hingoa eni ʻo e ngaahi matakalí, ʻo kamata mei he ngataʻanga fakatokelaú: Ko e ʻinasi ʻo Taní+ ʻoku lele ia ʻi he hala ʻo Hetiloní ki Lipo-hēmati*+ ʻo ʻalu ai ki Hasa-ʻenani, ʻi he ngataʻanga fakatokelau ʻo Tāmasikusí, ʻi he tafaʻaki ʻo Hēmatí;+ pea ʻoku lele mei he hahaké ki he kauʻāfonua fakahihifó. 2 Ko e ʻinasi ʻo ʻĀselí+ ʻoku ʻi he ngataʻanga ia ʻo Taní, mei he kauʻāfonua fakahahaké ki he kauʻāfonua fakahihifó. 3 Ko e ʻinasi ʻo Nafitalaí+ ʻoku ʻi he ngataʻanga ia ʻo ʻĀselí, mei he kauʻāfonua fakahahaké ki he kauʻāfonua fakahihifó. 4 Ko e ʻinasi ʻo Manasé+ ʻoku ʻi he ngataʻanga ia ʻo Nafitalaí, mei he kauʻāfonua fakahahaké ki he kauʻāfonua fakahihifó. 5 Ko e ʻinasi ʻo ʻIfalemí ʻoku ʻi he ngataʻanga ia ʻo Manasé,+ mei he kauʻāfonua fakahahaké ki he kauʻāfonua fakahihifó. 6 Ko e ʻinasi ʻo Lūpení ʻoku ʻi he ngataʻanga ia ʻo ʻIfalemí,+ mei he kauʻāfonua fakahahaké ki he kauʻāfonua fakahihifó. 7 Ko e ʻinasi ʻo Siutá ʻoku ʻi he ngataʻanga ia ʻo Lūpení,+ mei he kauʻāfonua fakahahaké ki he kauʻāfonua fakahihifó. 8 ʻI he ngataʻanga ʻo Siutá, mei he kauʻāfonua fakahahaké ki he kauʻāfonua fakahihifó, ko e meʻaʻofa ʻa ia te mou tuku mavahé ʻoku totonu ke kiupite* ʻe 25,000 ʻa hono fālahí+ pea fehoanakimālie mo e lōloa ʻo e ngaahi ʻinasi fakamatakali kehé mei he kauʻāfonua fakahahaké ki he kauʻāfonua fakahihifó. Ko e feituʻu toputapú ʻe ʻi loto-mālie ai.

9 “Ko e meʻaʻofa te mou tuku mavahe kia Sihová ʻe kiupite ʻe 25,000 ʻa hono lōloá pea 10,000 ʻa hono fālahí. 10 Ko e meʻaʻofa toputapu eni maʻá e kau taulaʻeikí.+ ʻE kiupite ʻe 25,000 ʻi he tafaʻaki fakatokelaú, 10,000 ʻi he hihifó, 10,000 ʻi he hahaké, pea 25,000 ʻi he tongá. Ko e feituʻu toputapu ʻo Sihová ʻe ʻi loto-mālie ai. 11 ʻE foaki ia maʻá e kau taulaʻeiki kuo fakamāʻoniʻoniʻi mei he ngaahi foha ʻo Sātokí,+ ʻa e faʻahinga naʻa nau tokangaʻi ʻa honau ngaahi fatongia kiate aú pea naʻe ʻikai te nau ʻalu hē ʻi he taimi naʻe ʻalu hē ai ʻa e kau ʻIsilelí pea mo e kau Līvaí.+ 12 Te nau maʻu ha ʻinasi ʻi he meʻaʻofa ʻo e kelekele kuo tuku mavahe ko e meʻa ʻoku mātuʻaki toputapú, ʻe hoko atu ia ki he konga kelekele ʻo e kau Līvaí.

13 “ʻE maʻu ʻe he kau Līvaí ʻo hoko atu pē ki he vahefonua ʻo e kau taulaʻeikí ha ʻinasi ʻoku kiupite ʻe 25,000 ʻa hono lōloá pea 10,000 ʻa hono fālahí. (Ko e lōloa fakakātoá ʻe 25,000 ʻa hono lōloá pea 10,000 ʻa hono fālahí.) 14 ʻE ʻikai te nau fakatau atu, fakafetongi, pe foaki ha taha ʻo e ʻinasi lelei taha ʻo e fonuá, he ko ha meʻa toputapu ia kia Sihova.

15 “Ko e toenga ʻēliá ʻa ia ʻoku kiupite ʻe 5,000 ʻa hono fālahí ʻo lele ʻi he kauʻāfonua ʻoku kiupite ʻe 25,000 ʻa hono lōloá ʻe tuku ia ke ngāueʻaki anga-maheni ʻe he koló,+ ki he nofoʻanga pea mo e kaikaiʻanga. Ko e koló ʻe ʻi loto-mālie ai.+ 16 Ko e ngaahi fua eni ʻo e koló: Ko e kauʻāfonua fakatokelaú ʻoku kiupite ʻe 4,500, ko e kauʻāfonua fakatongá ʻoku 4,500, ko e kauʻāfonua fakahahaké ʻoku 4,500, pea ko e kauʻāfonua fakahihifó ʻoku 4,500. 17 Ko e kaikaiʻanga ʻo e koló ʻe kiupite ʻe 250 ki he tokelaú, 250 ki he tongá, 250 ki he hahaké, pea 250 ki he hihifó.

18 “Ko e lōloa ʻo e ʻinasi ʻoku toé ʻe fehoanakimālie ia mo e meʻaʻofa toputapú,+ ko e kiupite ʻe 10,000 ki he hahaké, pea 10,000 ki he hihifó. ʻE fehoanakimālie ia mo e meʻaʻofa toputapú, pea ko e fua ʻe maʻu mei aí ʻe tokonaki mai ai ha meʻakai ki he faʻahinga ʻoku nau ngāue ʻi he koló. 19 Ko e faʻahinga ʻoku nau ngāue ʻi he koló mei he ngaahi matakali kotoa ʻo ʻIsilelí te nau ngoueʻi ia.+

20 “Ko e meʻaʻofá fakakātoa ʻoku kiupite ʻe 25,000 tapafā tatau. Te mou tuku mavahe ia ko e meʻaʻofa toputapu fakataha mo e kelekele ʻo e koló.

21 “Ko e meʻa ʻe toe ʻi he ongo tafaʻaki fakatouʻosi ʻo e meʻaʻofa toputapú pea mo e kelekele ʻo e koló ʻe maʻu ia ʻe he ʻeikí.+ ʻE lele ia ʻi he kauʻāfonua kiupite ʻe 25,000 ʻa ia ʻoku ʻi he tafaʻaki fakahahake mo fakahihifo ʻo e meʻaʻofá. ʻE fehoanakimālie ia mo e ngaahi ʻinasi ʻoku hoko mai aí, pea ʻe maʻu ia ʻe he ʻeikí. Ko e meʻaʻofa toputapú mo e feituʻu toputapu ʻo e temipalé ʻe ʻi loto-mālie ai.

22 “Ko e kelekele ʻo e kau Līvaí mo e kelekele ʻo e koló ʻe ʻi he vahaʻa ia ʻo e kelekele ʻo e ʻeikí. Ko e vahefonua ʻo e ʻeikí ʻe ʻi he vahaʻa ia ʻo e ngataʻanga ʻo Siutá+ pea mo e ngataʻanga ʻo Penisimaní.

23 “Ko e meʻa ki he toenga ʻo e ngaahi matakalí, ko e ʻinasi ʻo Penisimaní ʻoku mei he kauʻāfonua fakahahaké ki he kauʻāfonua fakahihifó.+ 24 Ko e ʻinasi ʻo Simioné ʻoku ʻi he ngataʻanga ia ʻo Penisimaní,+ mei he kauʻāfonua fakahahaké ki he kauʻāfonua fakahihifó. 25 Ko e ʻinasi ʻo ʻĪsaká+ ʻoku ʻi he ngataʻanga ia ʻo Simioné, mei he kauʻāfonua fakahahaké ki he kauʻāfonua fakahihifó. 26 Ko e ʻinasi ʻo Sepuloní ʻoku ʻi he ngataʻanga ia ʻo ʻĪsaká,+ mei he kauʻāfonua fakahahaké ki he kauʻāfonua fakahihifó.+ 27 Ko e ʻinasi ʻo Katá ʻoku ʻi he ngataʻanga ia ʻo Sepuloní,+ mei he kauʻāfonua fakahahaké ki he kauʻāfonua fakahihifó. 28 Ko e kauʻāfonua fakatongá ʻi he ngataʻanga ʻo Katá ʻe lele ia mei Tema+ ki he vai ʻo Mēlipa-ketesí,+ pea ki he Teleʻá*+ pea lele ai ki he Tahi Lahí.*

29 “Ko e fonua eni te mou vahe ko ha tofiʻa ki he ngaahi matakali ʻo ʻIsilelí,+ pea ʻe hoko eni ko honau ʻinasi,”+ ko e fakahaaʻi ia ʻe he ʻEiki Hau ko Sihová.

30 “Ko e hūʻanga eni ki tuʻa ʻo e koló: Ko e fua ʻo e tafaʻaki fakatokelaú ko e kiupite ʻe 4,500.+

31 “Ko e ngaahi matapā ʻo e koló ʻe fakahingoa ia ʻo fakatatau ki he ngaahi matakali ʻo ʻIsilelí. ʻI he matapā ʻe tolu ki he tokelaú, ʻoku ʻi ai ha matapā ʻe taha kia Lūpeni, matapā ʻe taha kia Siuta, pea ko e matapā ʻe taha kia Līvai.

32 “Ko e tafaʻaki fakahahaké ʻe kiupite ʻe 4,500 ʻa hono lōloá, pea ʻoku ʻi ai ʻa e matapā ʻe tolu: Ko e matapā ʻe taha kia Siosifa, matapā ʻe taha kia Penisimani, pea ko e matapā ʻe taha kia Tani.

33 “Ko e tafaʻaki fakatongá ko hono fuá ko e kiupite ʻe 4,500, ʻo ʻi ai ʻa e matapā ʻe tolu: Ko e matapā ʻe taha kia Simione, matapā ʻe taha kia ʻĪsaka, pea ko e matapā ʻe taha kia Sepuloni.

34 “Ko e tafaʻaki fakahihifó ʻe kiupite ʻe 4,500 ʻa hono lōloá, ʻo ʻi ai ʻa e matapā ʻe tolu: Ko e matapā ʻe taha kia Kata, matapā ʻe taha kia ʻĀseli, pea ko e matapā ʻe taha kia Nafitalai.

35 “Ko honau fua takaí ʻe kiupite ʻe 18,000. Pea ko e hingoa ʻo e koló mei he ʻaho ko iá ʻo faai mai ʻe ui ʻo pehē, ʻOku ʻi Ai ʻa Sihova.”+