ʻIsikeli

47 Naʻá ne fakafoki leva au ki he hūʻanga ʻo e temipalé,+ pea naʻá ku sio ai ki he vai ʻoku tafe fakahahake mei lalo ʻi he hūʻanga ʻo e temipalé,+ he ko e konga ki muʻa ʻo e temipalé naʻe hanga ki he hahaké. Naʻe tafe ʻa e vaí mei lalo ʻi he tafaʻaki toʻomataʻu ʻo e temipalé, ʻi he tafaʻaki fakatonga ʻo e ʻōlitá.

2 Pea naʻá ne taki au ʻi he matapā tokelaú+ ʻo ʻave au ki tuʻa pea takai atu ki he matapā ʻi tuʻa ʻa ia ʻoku hanga ki he hahaké,+ pea naʻá ku sio ai ki ha vai ʻoku tafetafe mei he tafaʻaki toʻomataʻú.

3 ʻI he ʻalu atu ʻa e tangatá ki he hahaké mo ha afo fua ʻi hono nimá,+ naʻá ne fua ʻa e kiupite* ʻe 1,000 peá ne ʻai au ke u laka atu ʻi he vaí; ko e loloto ʻo e vaí naʻe aʻu ki hoku tungaʻivaʻé.

4 Naʻá ne fua leva ha toe kiupite ʻe 1,000 peá ne ʻai au ke u laka atu ʻi he vaí, pea naʻe aʻu hake ia ki hoku ongo tuí.

Naʻá ne fua ha toe kiupite ʻe 1,000 peá ne ʻai au ke u laka atu ai, pea naʻe aʻu hake ʻa e vaí ki hoku kongalotó.

5 ʻI heʻene fua ha toe kiupite ʻe 1,000, naʻe hoko ia ko ha vaitafe ʻo ʻikai malava ke u lue ʻo kolosi ai, he naʻe fuʻu loloto ʻa e vaí ʻa ia naʻe pau ai ki ha taha ke ne kakau, ko ha vai naʻe tafe mālohi ʻa ia naʻe ʻikai lava ke lue ʻo kolosi ai.

6 Naʻá ne ʻeke mai kiate au: “Foha ʻo e tangata, kuó ke sio ʻi ha meʻa peheni?”

Pea naʻá ne ʻai au ke u lue ʻo foki ki he veʻe vaitafé. 7 ʻI heʻeku fokí, naʻá ku sio ai ki ha ʻuluʻakau lahi ʻaupito ʻi he veʻe vaitafé ʻi he ongo tafaʻakí fakatouʻosi.+ 8 Naʻá ne pehē mai leva kiate au: “Ko e vaí ni ʻoku tafe ia ki he feituʻu fakahahaké pea hokohoko hifo ai ʻi he ʻAlapá*+ ʻo aʻu ki tahi. ʻI heʻene aʻu ki tahí,+ ʻe hoko ʻo moʻui ʻa e tahi ʻi aí. 9 ʻE malava ke moʻui ʻa e ngaahi potanga meʻamoʻuí ʻi ha feituʻu pē ʻoku tafe atu ki ai ʻa e vaí.* ʻE lahi fau ʻa e fanga iká, koeʻuhí ʻe tafe atu ki ai ʻa e vai ko ení. ʻE fakamoʻui ʻa e vai ʻo e tahí, pea ʻe moʻui ʻa e meʻa kotoa pē ʻi ha feituʻu pē ʻoku tafe atu ki ai ʻa e vaitafé.

10 “ʻE tuʻu ʻa e kau toutaí ʻi he veʻe vaí mei ʻEni-keti+ ʻo aʻu ki ʻEni-ʻekelaimi, ʻa ia ʻe ʻi ai ha feituʻu fakamōmoa ki he ngaahi kupenga tohó. ʻE lahi fau ai ʻa e kalasi kehekehe ʻo e iká, ʻo hangē ko e fanga ika ʻo e Tahi Lahí.*+

11 “ʻE ʻi ai ʻa e ngaahi feituʻu ano mo e ngaahi feituʻu tokaʻanga vai, ʻe ʻikai ke moʻui ʻa e ongo feituʻú ni. ʻE tuku ai pē ia ke māsima.+

12 “ʻE tupu ʻi he ongo tafaʻaki fakatouʻosi ʻo e vaitafé ʻa e ʻakau kalasi kehekehe. Ko honau laú ʻe ʻikai ke mae; pea heʻikai ke nau taʻefua. Te nau laku mai ʻa e fua foʻou ʻi he māhina taki taha, koeʻuhí ʻe tafe atu ki ai ʻa e vai mei he feituʻu toputapú.+ Ko honau fuá ʻe hoko ko e meʻakai pea ko honau laú ʻe hoko ko e faitoʻo.”+

13 Ko e folofola eni ʻa e ʻEiki Hau ko Sihová: “Ko e feituʻu eni te ke vaheʻi ko e kelekele tukufakaholo ʻo e matakali ʻe 12 ʻo ʻIsilelí, pea ʻe maʻu ʻe Siosifa ha konga ʻe ua.+ 14 Te mou maʻu tukufakaholo ia pea maʻu ha ngaahi ʻinasi tatau.* Naʻá ku fuakava te u foaki ʻa e fonuá ni ki hoʻomou fanga kuí,+ pea ko eni ʻoku vaheʻi atu* ia ko ha tofiʻa kiate kimoutolu.

15 “Ko e ngataʻanga eni ʻo e fonuá ʻi he tafaʻaki fakatokelaú: ʻOku lele ia mei he Tahi Lahí ʻi he hala ʻoku ʻalu ki Hetiloní+ ʻo hoko atu ai ki Setata,+ 16 Hēmati,+ Pelotai,+ mo Sipalemi, ʻa ia ʻoku ʻi he vahaʻa ʻo e vahefonua ʻo Tāmasikusí mo e vahefonua ʻo Hēmatí, pea hoko atu ai ki Hasa-hatikoni, ʻa ia ʻoku ʻi he ngataʻanga ʻo Haulaní.+ 17 Ko ia ʻe lele ʻa e ngataʻangá mei he tahí ki Hasa-ʻenani,+ ʻo ʻalu ai ʻi he ngataʻanga ʻo Tāmasikusí ki he tokelaú, pea mo e ngataʻanga ʻo Hēmatí.+ Ko e kauʻāfonua fakatokelaú eni.

18 “Ko e tafaʻaki fakahahaké ʻoku lele ia ʻi he vahaʻa ʻo Haulani mo Tāmasikusí pea lele ʻi Sioatani ʻi he vahaʻa ʻo Kiliati+ mo e fonua ko ʻIsilelí. Te mou fua mei he ngataʻangá ki he tahi fakahahaké.* Ko e kauʻāfonua fakahahaké eni.

19 “Ko e kauʻāfonua fakatongá* ʻe lele ia mei Tema ki he vai ko Mēlipa-ketesí,+ pea hoko atu ai ki he Teleʻá* pea ki he Tahi Lahí.+ Ko e kauʻāfonua fakatongá* eni.

20 “ʻOku ʻi he tafaʻaki fakahihifó ʻa e Tahi Lahí, mei he ngataʻangá ʻo aʻu ki ha feituʻu ʻoku fehangahangai mo Lipo-hēmati.*+ Ko e kauʻāfonua fakahihifó eni.”

21 “Te mou vahevahe ʻa e fonuá ni ʻi homou lotolotongá, ʻi he lotolotonga ʻo e matakali ʻe 12 ʻo ʻIsilelí. 22 Te mou vahe ia ko e tofiʻa ʻi homou lotolotongá pea ki he kau muli ʻoku nofo mo kimoutolu ʻa ia kuo ʻi ai ʻenau fānau lolotonga ʻenau nofo ʻi homou lotolotongá; pea te nau hangē ko e kau ʻIsileli tupuʻi fonuá kiate kimoutolu. Te nau maʻu ha tofiʻa ʻi he lotolotonga ʻo e ngaahi matakali ʻo ʻIsilelí fakataha mo kimoutolu. 23 Te mou foaki ki he mulí ha tofiʻa ʻi he vahefonua ʻo e matakali ʻa ia kuó ne nofo aí,” ko e fakahaaʻi ia ʻe he ʻEiki Hau ko Sihová.