Ua Kolinitō

3 ʻOku kamata koā ke mau toe fakaongoongoleleiʻi atu kimautolu? Pe ʻoku mau hangē ko e kau tangata ʻe niʻihi, ʻo fiemaʻu ha ngaahi tohi fakaongoongolelei kiate kimoutolu pe meiate kimoutolu? 2 Ko kimoutolu tonu ʻa ʻemau tohi fakaongoongoleleí,+ kuo tongi ʻi homau lotó pea kuo ʻiloʻi mo lau ia ʻe he faʻahinga kotoa pē ʻo e tangatá. 3 He ʻoku fakahāhaaʻi kimoutolu ko ha tohi ʻa Kalaisi ʻa ia kuo hiki ʻe kimautolu ʻi he tuʻunga ko ha kau faifekau,*+ ʻa ia kuo tohi ʻo ʻikai ʻaki ha vaitohi kae ʻaki ʻa e laumālie ʻo ha ʻOtua moʻui, ʻo ʻikai ʻi ha ngaahi lauʻimaka+ ka ʻi ha ngaahi lauʻimaka fakaekakano, ʻi he ngaahi lotó.+

4 ʻOku lava ke mau leaʻaki eni ʻi he falala pau ʻi he ʻao ʻo e ʻOtuá fakafou ʻi he Kalaisí. 5 ʻOku ʻikai ke pehē ia ko ʻemau taau feʻungá ko e tupu ia meiate kimautolu, ka ko ʻemau taau feʻungá ko e tupu ia mei he ʻOtuá,+ 6 ʻa ia kuó ne ʻai moʻoni kimautolu ke mau taau feʻunga ke hoko ko e kau faifekau* ʻo ha fuakava foʻou,+ ʻo ʻikai ʻo ha lao kuo tohi,+ ka ʻo e laumālié; he ko e lao kuo tohí ʻoku faifakahalaia ia ki he mate,+ ka ko e laumālié ʻoku foaki moʻui ia.+

7 Pea kapau ko e lao ko ia ʻokú ne ʻomai ʻa e maté pea naʻe tongi fakamataʻitohi ʻi he ongo maká+ naʻe hoko mai ia mo ha lāngilangi pehē fau ʻo ʻikai lava ai ʻa e kau ʻIsilelí ke sio fakamamaʻu ki he mata ʻo Mōsesé koeʻuhi ko e lāngilangi ʻo hono matá,+ ko ha lāngilangi naʻe pau ke mole atú, 8 ko e hā ka ʻikai maʻu ai ʻi hono ʻomai ʻo e laumālié+ ha lāngilangi ʻoku toe lahi angé?+ 9 He kapau naʻe lāngilangiʻia+ ʻa e lao ʻokú ne ʻomai ʻa e fakahalaiá,+ huanoa ai ʻa e lāngilangiʻia lahi ange ʻa hono ʻomai ʻo e māʻoniʻoní!+ 10 Ko hono moʻoní, naʻa mo e meʻa ko ia naʻe ʻai ke lāngilangiʻia ki muʻá kuo toʻo mei ai ʻa e lāngilangí koeʻuhi ko e lāngilangi ko ia ʻoku mahulu hake aí.+ 11 He kapau ko e meʻa ko ia naʻe pau ke mole atú naʻe ʻomi ia mo e lāngilangi,+ huanoa ai ʻa e lahi ange ʻa e lāngilangi ʻo e fuakava foʻoú!+

12 Koeʻuhi ko ʻetau maʻu ha ʻamanaki peheé,+ ʻoku tau ngāueʻaki ai ʻa e tauʻatāina lahi ʻo e leá, 13 ʻo ʻikai ko hono fai ʻa e meʻa naʻe fai ʻe Mōsesé ʻi heʻene ʻai ha pūlou ki hono matá,+ koeʻuhi ke ʻoua naʻa sio fakamamaʻu ʻa e kau ʻIsilelí ki he ikuʻanga ʻo e meʻa naʻe pau ke mole atú. 14 Ka ko honau ʻatamaí naʻe mūnoa.+ He ʻoku aʻu mai ki he taimí ni, ʻoku kei hokohoko atu pē hono fakapūlouʻi honau ʻatamaí ʻo hangē ʻoku fai ʻaki ha pūloú pea ʻoku ʻikai lava ai ke nau mahinoʻi ʻa e fuakava motuʻá,+ koeʻuhí he ʻoku toki toʻo pē ʻa e pūloú ni fakafou ʻia Kalaisi.+ 15 Pehē foki, ʻoku hokohoko atu pē hono fakapūlouʻi honau lotó+ ʻo aʻu mai ki he taimí ni, koeʻuhí ke ʻoua te nau malava ʻo mahinoʻi ʻa e ngaahi tohi ʻa Mōsesé.+ 16 Ka ʻi he taimi ʻoku tafoki ai ha taha kia Sihová,* ʻoku toʻo atu leva ʻa e pūloú.+ 17 Ko ia ko Sihová* ko e Laumālie,+ pea ko e feituʻu pē ʻoku ʻi ai ʻa e laumālie ʻo Sihová,* ʻoku ʻi ai ʻa e tauʻatāina.+ 18 Pea ko kitautolu kotoa, ʻa ia kuo toʻo atu ʻa e pūloú mei hotau matá, ʻoku tau hangē ha ngaahi sioʻata ʻoku nau tapua atu ʻa e lāngilangi ʻo Sihová.* ʻOku liliu ai kitautolu ke tau hoko ʻo hangē ko e ʻOtuá pea ke tau tapua atu ke toe lahi ange ʻa e lāngilangi ʻo e ʻOtuá, ʻo hangē tofu pē ko ia ʻoku finangalo ki ai ʻa Sihova* ko e Laumālié.*+