Ko e Ngaahi Mala ʻe 10

SIO ANGE ki he ngaahi fakatātaá. Ko e fakatātā taki taha ʻoku hā ai ʻa e mala naʻe ʻomai ʻe Sihova ki ʻIsipité. ʻI he ʻuluaki fakatātaá ʻokú ke sio ai ki hono taaʻi ʻaki ʻe ʻĒlone hono tokotokó ʻa e Vaitafe Nailá. ʻI heʻene fai iá, naʻe liliu ʻa e vaí ko e toto. Naʻe mate ʻa e fanga iká, pea naʻe kamata ke namu haʻahaʻa ʻa e vaí.

Ko hono hokó, naʻe ʻai ʻe Sihova ke ʻalu hake ha fanga poto mei he Vaitafe Nailá. Naʻa nau ʻi he feituʻu kotoa​—⁠ʻi he ngaahi loto ʻōvani, ʻi he ngaahi kapa taʻo meʻa, ʻi he ngaahi mohenga ʻo e kakaí​—⁠ʻi he feituʻu kotoa pē. ʻI he mate ʻa e fanga potó naʻe tānaki fakataha ia ʻe he kau ʻIsipité ʻo hoko ko ha fuʻu fokotuʻunga lahi, pea naʻe namu haʻahaʻa ʻa e fonuá ʻi he fanga potó.

Hili iá naʻe taaʻi ʻe ʻĒlone hono tokotokó ʻi he kelekelé, pea naʻe hoko ʻa e efú ko e fanga namu. Ko e fanga kiʻi manu eni ʻoku nau uʻu. Ko e fanga namu ko ʻení ko e mala ia hono tolu naʻe tō ki he fonua ko ʻIsipité.

Ko e toenga ʻo e ngaahi malá naʻe faka-mamahi ki he kau ʻIsipité pē, ʻikai ko e kau ʻIsilelí. Ko hono fā ʻo e malá ko e fanga lango lalahi naʻa nau fakapupunga holo he ngaahi fale ʻo e kakai kotoa ʻo ʻIsipité. Ko e mala hono nimá naʻe hoko ki he fanga manú. Naʻe mate ʻa e tokolahi ʻo e fanga pulu mo e fanga sipi mo e fanga kosi ʻa e kau ʻIsipite.

Ko hono hokó, naʻe toʻo ʻe Mōsese mo ʻĒlone ha efuefu ʻo lī ki he ʻataá. Pea naʻe hoko ai ʻa e hangatāmaki ki he kakai mo e fanga manu. Ko e mala ia hono onó.

Naʻe ʻosi ia pea hiki ʻe Mōsese hono nimá ki he langí, pea naʻe ʻomi ʻe Sihova ha mana mo ha ʻuha maka. Ko e ʻuha maka kovi taha ʻeni naʻe aʻusia ʻe he kau ʻIsipité.

Ko hono valu ʻo e malá ko ha fanga heʻe. Naʻe teʻeki ai ha taimi ʻe tokolahi pehē ai ʻa e fanga heʻé. Naʻa nau kai ʻa e meʻa kotoa pē naʻe toe mei he fakaʻauha ʻa e ʻuha maká.

Ko e mala hono hivá ko e fakapoʻuli. ʻI he ʻaho ʻe tolu naʻe ʻufiʻufi ʻe he fakapoʻuli ʻa e fonuá, ka naʻe maama pē ʻa e feituʻu ia naʻe nofo ai ʻa e kau ʻIsilelí.

Fakaʻosí naʻe pehē ʻe he ʻOtuá ki heʻene kakaí ke afuhiʻaki ʻa e toto ʻo ha kiʻi kosi pe kiʻi sipi ʻa honau ngaahi kau matapaá. Pea naʻe fakalaka leva ai ʻa e ʻāngelo ʻa e ʻOtuá ʻi ʻIsipite. ʻI he sio pē ʻa e ʻāngeló ki he totó, naʻe ʻikai te ne tāmateʻi ha taha ʻi he fale ko iá. Ka ʻi he ngaahi fale kotoa naʻe ʻikai ke ʻi ai ha toto ʻi he ngaahi kau matapaá, naʻe hanga ʻe he ʻāngelo ʻa e ʻOtuá ʻo tāmateʻi ʻa e ʻuluaki naʻe fanauʻí, fakatouʻosi ʻa e tangata mo e fanga manu. Ko e mala ia hono 10.

ʻI he ʻosi ʻa e mala fakaʻosi ko ʻení, naʻe tala leva ʻe Felo ki he kau ʻIsilelí ke nau ʻalu. Naʻe ʻosi mateuteu pē ʻa e kakai ʻa e ʻOtuá ia ke nau mavahe, pea ʻi he pō pē ko iá naʻe kamata leva ʻenau fononga mei ʻIsipité.