Naʻe Ngāue ʻa e Faiako Lahí Maʻá e Kakai Kehé

ʻOKÚ KE saiʻia ʻi hono fai ʻe ha taha ha meʻa lelei maʻau?— Sai, ʻoku saiʻia foki mo e kakai kehé ʻi hono fai ʻe ha taha ha meʻa lelei maʻanautolu. ʻOku tau pehē kotoa. Naʻe ʻiloʻi ia ʻe he Faiako Lahí, pea naʻá ne fai maʻu pē ʻa e ngaahi meʻá maʻá e kakaí. Naʻá ne pehē: ‘Naʻe ʻikai te u haʻú ke tauhia, ka ke tauhi.’—Mātiu 20:​28, PM.

Ko ia, kapau ʻokú ta loto ke hangē ko e Faiako Lahí, ko e hā kuo pau ke ta faí?— Kuo pau ke ta ngāue maʻá e niʻihi kehé. Kuo pau ke ta fai ʻa e ngaahi meʻa lelei maʻa kinautolu. Ko e moʻoni, ʻoku ʻikai ke fai eni ʻe he kakai tokolahi. Ko hono moʻoní, ko e tokolahi taha ʻo e kakaí ʻoku nau fiemaʻu maʻu pē ke ngāue ange ʻa e niʻihi kehé kia kinautolu. ʻI he taimi ʻe taha, naʻa mo e kau muimui ʻo Sīsuú naʻa nau ongoʻi pehē. Ko e tokotaha taki taha naʻá ne fiemaʻu ke hoko ko e lahi tahá pe ko e tokotaha mahuʻinga tahá.

ʻI he ʻaho ʻe taha, naʻe fononga fakataha ai ʻa Sīsū mo ʻene kau ākongá, ʻa ia ko hono kau muimuí. Hili ʻenau hū ki he kolo ko Kāpaneumé, ofi ki he Tahi Kālelí, naʻa nau hū kotoa ki ha fale. Naʻe fehuʻi ai ʻe Sīsū kia kinautolu: “Ko e ha ʻa e meʻa naʻa mou fakakikihi ki ai ʻi he hala?” Naʻa nau hanganaki longo pē he ʻi he halá naʻa nau fakakikihi ai ʻia kinautolu pe ko hai ʻoku lahí.—Maake 9:​33, 34.

Naʻe ʻiloʻi ʻe Sīsū naʻe ʻikai totonu ki ha taha pē ʻo ʻene kau ākongá ke fakakaukau ko e lahi tahá ia. Hangē ko ia naʻá ta ako ʻi he ʻuluaki vahe ʻo e tohi ko ení, naʻá ne fokotuʻu ha kiʻi tama ʻi honau lotolotongá pea fakahā kia kinautolu ʻoku totonu ke nau anga-fakatōkilalo ʻo hangē ko e kiʻi tama ko iá. Ka neongo ia, naʻe teʻeki ai pē ke nau ako. Ko ia, ʻi he taimi nounou ki muʻa pea pekiá, naʻe akoʻi ʻe Sīsū kia kinautolu ha lēsoni ʻe ʻikai ʻaupito ngalo ʻia kinautolu. Ko e hā naʻá ne faí?—

Sai, lolotonga ʻenau kai fakatahá kotoa, naʻe mālanga hake ʻa Sīsū mei he tēpilé ʻo ne vete ʻa hono ngaahi kofu tuʻá. ʻI hono toʻo hake ha tauveli, naʻá ne nonoʻo ia ki hono kongalotó. Naʻá ne toʻo leva ha pēsoni fanofano pea ʻai ki ai ha vai. Kuo pau pē naʻe fifili ʻa hono kau muimuí pe ko e hā te ne faí. ʻI heʻenau mamatá, naʻe takai atu ʻa Sīsū kia kinautolu kotoa, tulolo hifo, pea fufulu honau vaʻé. Naʻá ne holo leva honau vaʻé ʻaki ʻa e tauvelí. Fakakaukau atu ki ai! Fēfē kapau naʻá ke ʻi ai? Naʻe mei fēfē ʻa hoʻo ongoʻí?—

Naʻe ongoʻi ʻe hono kau muimuí naʻe ʻikai totonu ki he Faiako Lahí ke ne ngāue maʻa kinautolu ʻi he foungá ni. Naʻa nau ongoʻi mā. Ko hono moʻoní, ko Pita naʻe ʻai ke ʻoua te ne fakaʻatā ʻa Sīsū ke ne fai ʻa e ngāue māʻulaló ni kiate ia. Ka naʻe pehē ʻe Sīsū ʻoku mahuʻinga kiate ia ke fakahoko ia.

ʻOku ʻikai ke tau angaʻaki ʻa e fefufuluʻaki hotau vaʻé ʻi he ʻahó ni. Ka naʻe fai ʻa e meʻá ni ʻi he taimi naʻe ʻi māmani ai ʻa Sīsuú. ʻOkú ke ʻilo ʻa hono ʻuhingá?— Sai, ʻi he fonua naʻe nofo ai ʻa Sīsū mo hono kau muimuí, naʻe tui ʻe he kakaí ʻi honau vaʻé ʻa e senitolo naʻe ʻikai mapuni. Ko ia, ʻi heʻenau lue ʻi he ngaahi hala kelekelé, naʻe efua honau vaʻé. Ko ha anga-ʻofa ia ke fufulu ʻa e efú mei he vaʻe ʻo ha taha ʻa ia naʻe ʻaʻahi mai ki he ʻapí.

Ka ʻi he taimi ko ení, naʻe ʻikai ha taha ʻo e kau ākonga ʻa Sīsuú naʻá ne fakahaaʻi te ne fufulu ʻa e vaʻe ʻo e niʻihi kehé. Ko ia, naʻe fai tonu ia ʻe Sīsū. ʻI hono fai ení, naʻe akoʻi ai ʻe Sīsū ki hono kau muimuí ha lēsoni mahuʻinga. Naʻe fiemaʻu ke nau ako ʻa e lēsoni ko ení. Pea ko ha lēsoni ia ʻoku fiemaʻu ke ta ako he ʻahó ni.

ʻOkú ke ʻilo pe ko e hā ʻa e lēsoni ko iá?— Hili hono tui ʻe Sīsū hono ngaahi kofu tuʻá pea foki ki hono nofoʻanga ʻi he tēpilé, naʻá ne pehē: ‘ʻOku mahino kiate kimoutolu ʻa e meʻa kuó u fai kiate kimoutolú? ʻOku mou ui au ko e Faiako mo e ʻEiki: pea ʻoku totonu hoʻomou lea peheé; he ko au ia. Pea kapau ā kuó u fufulu homou vaʻé, ʻa au ko e ʻEiki mo e Faiakó; pea ʻoku totonu ke fai ʻe kimoutolu foki, ʻo fefufuluʻaki homou vaʻe ʻomoutolú.’—Sione 13:​2-14.

Naʻe fakahaaʻi heni ʻe he Faiako Lahí naʻá ne fiemaʻu ʻa hono kau muimuí ke nau fengāueʻaki. Naʻe ʻikai te ne fiemaʻu ke nau fakakaukau pē kia kinautolu. Naʻe ʻikai te ne loto ke nau fakakaukau ʻoku nau fuʻu mahuʻinga ʻo totonu maʻu pē ai ke ngāue ange ʻa e niʻihi kehé kia kinautolu. Naʻá ne fiemaʻu ke nau loto-lelei ke ngāue maʻá e niʻihi kehé.

ʻIkai ko ha lēsoni lelei ia?— Te ke hangē ko e Faiako Lahí ʻo ngāue maʻá e kakai kehé?— ʻOku tau malava kotoa ke fai ha meʻa maʻá e niʻihi kehé. ʻE ʻai ai kinautolu ʻe he meʻá ni ke nau fiefia. Kae hiliō he meʻa kotoa, ʻe ʻai ai ʻa Sīsū mo ʻene Tamaí ke na fiefia.

ʻOku ʻikai faingataʻa ke ngāue maʻá e kakai kehé. Kapau te ke vakai holo, te ke sio ai ʻi he ngaahi meʻa lahi ʻe lava ke ke fai maʻá e niʻihi kehé. Fakakaukau angé he taimi ní: ʻOku ʻi ai ha meʻa ʻe lava ke ke fai ke tokoni ai ki hoʻo faʻeé? ʻOkú ke ʻiloʻi ʻoku lahi ʻa e ngaahi meʻa ʻokú ne fai maʻau mo e toenga ʻo e fāmilí. ʻE lava ke ke tokoni kiate ia?— Fēfē ke ke ʻeke ange ki ai?

Mahalo ʻe lava ke ke seti ʻa e tēpilé ki muʻa ke kai ʻa e fāmilí. Pe mahalo ʻe lava ke ke fakamaau ʻa e ʻū ipu ʻulí mei he tēpilé ʻi he ʻosi ʻa e kai ʻa e fāmilí. Ko e fānau ʻe niʻihi ʻoku nau ʻave ʻa e vevé ki tuʻa ʻi he ʻaho kotoa pē. Pe ko e hā pē ʻe lava ke ke faí, te ke ngāue ai maʻá e niʻihi kehé, ʻo hangē ko ia naʻe fai ʻe Sīsuú.

ʻOku ʻi ai hao fanga tokoua, tuofāfine pe fanga tuongaʻane iiki hifo ʻe lava ke ke ngāue maʻa kinautolu? Manatuʻi, ko Sīsū, ʻa e Faiako Lahí, naʻe aʻu ʻo ne ngāue maʻa hono kau muimuí. ʻI hoʻo ngāue maʻa hoʻo fanga tokoua, tuofāfine pe fanga tuongaʻane iiki hifó, te ke faʻifaʻitaki ai kia Sīsū. Ko e hā ʻe lava ke ke fai maʻanautolú?— Mahalo ʻe lava ke ke tokoni kia kinautolu ke nau ako ke tuku ʻenau meʻa-vaʻingá ki hono tukuʻangá ʻi he ʻosi ʻenau vaʻingá. Pe mahalo pē ʻe lava ke ke tokoni ki hono fakatui honau valá. Pe mahalo ʻe lava ke ke tokoni kia kinautolu ʻi hono ngaahi honau mohengá. Te ke lava ʻo fakakaukau ki ha toe meʻa kehe ʻe lava ke ke fai maʻa kinautolu?— ʻI hoʻo fai ʻa e ngaahi meʻa ko ení te nau ʻofa ai ʻia koe, ʻo hangē pē ko e ʻofa ʻa e kau muimui ʻo Sīsuú ʻiate iá.

ʻI he ʻapiakó foki ʻe lava ke ke ngāue ai maʻá e niʻihi kehé. Ko ho ngaahi kaungāakó nai pe ko hoʻo faiakó. Kapau ʻoku tō ha ʻū tohi ʻa ha taha, ko hoʻo anga-ʻofa ia kapau te ke tokoni ki ai ʻi hono toʻo hake ia ki ʻolungá. Te ke fokotuʻu atu nai ke tāmateʻi ʻa e palakipoé, pe ke fai ha meʻa kehe maʻa hoʻo faiakó. Naʻa mo hono pukepuke ʻa e matapaá kae hū ha tahá ko ha ngāue anga-ʻofa ia.

ʻI he taimi ʻe niʻihi, te ta ʻilo ai ʻe ʻikai ke fakamālō mai ʻa e kakaí ia ʻi heʻeta ngāue ange maʻa kinautolú. ʻOkú ke fakakaukau ʻoku totonu ke taʻofi kitaua ʻe he meʻá ni mei he faileleí?— ʻIkai! Ko e kakai tokolahi naʻe ʻikai te nau fakamālō kia Sīsū ʻi heʻene ngaahi ngāue leleí. Ka naʻe ʻikai ke taʻofi ia ʻe he meʻa ko iá mei he faileleí.

Ko ia, ʻoua ʻaupito naʻa tuku ʻeta ngāue maʻá e kakai kehé. Ta manatuʻi ʻa e Faiako Lahí, ʻa Sīsū, pea feinga maʻu pē ke muimui ʻi heʻene faʻifaʻitakiʻangá.