ʻOku Maluʻi Koe ʻe he Talangofuá

TE KE saiʻia kapau ʻe lava ke ke fai ha meʻa pē ʻokú ke loto ki aí? ʻOku ʻi ai ha ngaahi taimi ʻokú ke fakaʻamu ai ke ʻoua naʻa toe tala atu ʻe ha taha kia koe ʻa e meʻa ke faí? Sai, faitotonu pea tala mai kia au pe ko e hā hoʻo fakakaukaú.—

Ka ko fē ʻoku lelei ange kia koé? ʻOku fakapotopoto moʻoni ke fai ha meʻa pē ʻokú ke loto ki aí? Pe ʻoku lelei ange ʻa e ngaahi meʻá ʻi hoʻo talangofua ki hoʻo tamaí mo hoʻo faʻeé?— ʻOku pehē ʻe he ʻOtuá ʻoku totonu ke ke talangofua ki hoʻo ongo mātuʻá, ko ia kuo pau pē ʻoku ʻi ai ʻa e ʻuhinga lelei ke fai ai ia. Ta sio angé pe ʻe lava ke ta mahinoʻi ʻa hono ʻuhingá.

ʻOkú ke taʻu fiha?— ʻOkú ke ʻilo pe ʻoku taʻu fiha ʻa hoʻo tamaí?— ʻOku taʻu fiha ʻa hoʻo faʻeé pe ko hoʻo kui-fefiné pe kui-tangatá?— Kuo nau moʻui ʻo fuoloa ange ʻia koe. Pea ko e fuoloa ange ʻa e moʻui ʻa ha taha, ko e lahi ange ia ʻa e taimi ʻokú ne maʻu ke ako ai ʻa e ngaahi meʻá. ʻOkú ne fanongo ʻi he ngaahi meʻa lahi ange mo mamata ʻi he ngaahi meʻa lahi ange pea fai mo e ngaahi meʻa lahi ange ʻi he taʻu kotoa pē. Ko ia, ko e kau talavoú ʻe malava ke nau ako mei he kau taʻumotuʻa angé.

ʻOkú ke ʻilo ha taha ʻoku siʻi hifo ʻia koe?— ʻOku lahi ange ʻa hoʻo ʻiló ʻa koe ai?— Ko e hā ʻoku lahi ange ai ʻa hoʻo ʻiló?— ʻOku hoko iá koeʻuhí kuó ke moʻui koe ʻo fuoloa ange. Kuó ke maʻu ʻa e taimi lahi ange ke ako ai ʻa e ngaahi meʻá ʻi ha tokotaha kei siʻi ange.

Ko hai kuo moʻui ʻo fuoloa ange ia ʻia koe pe ko au pe ko ha toe taha kehe pē?— Ko Sihova ko e ʻOtuá. ʻOku lahi ange ʻa ʻene ʻiló ʻia koe, pea ʻoku lahi ange ʻa ʻene ʻiló ʻia au. ʻI he taimi ʻokú ne tala mai ai ke ta fai ha meʻá, ʻoku malava ke ta fakapapauʻi ko e meʻa totonu ia ke faí, neongo ʻe faingataʻa nai ke fai ia. Naʻá ke ʻilo naʻa mo e Faiako Lahí naʻe tuʻo taha ʻene ʻiloʻi ʻoku faingataʻa ke talangofua?—

ʻI he taimi ʻe taha, naʻe kole ai ʻe he ʻOtuá kia Sīsū ke ne fai ha meʻa mātuʻaki faingataʻa. Naʻe lotu ʻa Sīsū ʻo fekauʻaki mo ia, ʻo hangē ko ia ʻokú ta sio ki ai ʻi hení. Naʻá ne lotu: “Kapau ko ho finangalo, ke ke fakalaka ʻa e ipu ni meiate au.” ʻI he lotu ʻaki ʻa e meʻa ko ení, naʻe fakahaaʻi ʻe Sīsū naʻe ʻikai faingofua maʻu pē ke fai ʻa e finangalo ʻo e ʻOtuá. Ka naʻe anga-fēfē hono fakaʻosi ʻe Sīsū ʻa ʻene lotú? ʻOkú ke ʻilo?—

Naʻe fakaʻosi ia ʻe Sīsū ʻaki ʻene pehē: “Ke ʻoua naʻa fai hoku loto ka ko hoʻou pē.” (Luke 22:​41, 42) ʻIo, naʻá ne loto ke fai ʻa e finangalo ʻo e ʻOtuá, kae ʻikai ko hoʻoná. Pea naʻá ne ʻalu atu ʻo fai ʻa e meʻa naʻe fiemaʻu ʻe he ʻOtuá kae ʻikai ko e meʻa naʻá ne fakakaukau ʻe lelei tahá.

Ko e hā ʻe lava ke ta ako mei he meʻa ko ení?— ʻOkú ta ako ai ʻoku tonu maʻu pē ke fai ʻa e meʻa ʻoku leaʻaki ʻe he ʻOtuá, neongo ʻoku ʻikai faingofua nai ke fai ia. Ka ʻokú ta toe ako foki ha meʻa kehe. ʻOkú ke ʻilo pe ko e hā ia?— ʻOkú ta ako ai ko e ʻOtuá mo Sīsū ʻoku ʻikai ko ha tokotaha tatau pē ia, ʻo hangē ko ia ko e tala ʻe he kakai ʻe niʻihi. ʻOku lahi ange mo ʻilo lahi ange ʻa Sihova ko e ʻOtuá ʻi hono ʻAló, ʻa Sīsū.

ʻI heʻeta talangofua ki he ʻOtuá, ʻokú ta fakahaaʻi ai ʻokú ta ʻofa ʻiate ia. ʻOku pehē ʻe he Tohitapú: “Ko eni ia ʻa e ʻofa ki he ʻOtua, ʻa ʻetau tauhi ki heʻene ngaahi tuʻutuʻuni.” (1 Sione 5:⁠3) Ko ia, ʻokú ke sio ai ʻoku fiemaʻu ke tau talangofua kotoa ki he ʻOtuá. ʻOkú ke loto ke talangofua kiate ia, ʻikai ko ia?—

Ta toʻo hake ʻeta Tohitapú pea sio angé pe ko e hā ʻoku tala ʻe he ʻOtuá ki he fānaú ke nau faí. Te ta lau ʻa e meʻa ʻoku leaʻaki ʻe he Tohitapú ʻi he Efeso vahe 6, veesi 1, 2 mo e 3. ʻOku pehē: “ʻA e fanau, mou talangofua ʻi he ʻEiki ki hoʻomou matuʻa: he ko hono totonu ia. ‘Fakaʻapaʻapa ki hoʻo tamai mo hoʻo faʻe’, (ko e ʻuluaki fekau ia ʻoku ʻi ai hano talaʻofa,) ‘ka ke monuʻia, pea ke nofo fuoloa ʻi mamani.’”

Ko ia, ʻokú ke sio ai ko Sihova tonu ia ko e ʻOtuá ʻokú ne tala atu ke ke talangofua ki hoʻo tamaí mo hoʻo faʻeé. Ko e hā hono ʻuhinga ʻo e pehē ke “fakaʻapaʻapa” kia kinauá? ʻOku ʻuhingá, ke ke ʻapasia kia kinaua. Pea ʻoku palōmesi mai ʻa e ʻOtuá kapau te ke talangofua ki hoʻo ongo mātuʻá, te ke ‘monūʻia.’

Te u talanoa atu ha foʻi talanoa ʻo kau ki ha kakai ʻa ia naʻe fakahaofi ʻenau moʻuí koeʻuhí ko ʻenau talangofuá. Ko e kakai ko ení naʻa nau nofo fuoloa ʻaupito ki muʻa ʻi he kolo lahi ko Selusalemá. Ko e tokolahi taha ʻo e kakai ʻi he kolo ko iá naʻe ʻikai te nau fanongo ki he ʻOtuá, ko ia naʻe fakatokanga ai ʻe Sīsū kia kinautolu ʻe fakaʻauha ʻe he ʻOtuá ʻa honau koló. Naʻe toe tala foki ʻe Sīsū kia kinautolu ʻa e founga ʻe malava ke nau hao aí kapau ʻoku nau ʻofa ʻi he meʻa naʻe tonú. Naʻá ne pehē: ‘ʻO ka mou ka vakai ki he kāpui ʻo Selusalema ʻe he ngaahi matataú, te mou ʻilo ʻoku ofi ʻa hono fakaʻauhá. Ko e taimi leva ia ke hola ai mei Selusalema pea lele ki he ngaahi moʻungá.’—Luke 21:​20-22.

Sai, hangē pē ko e meʻa naʻe lea ki ai ʻa Sīsuú, naʻe omi ʻa e kau taú ke ʻohofi ʻa Selusalema. Ko e kau tau ʻa Lomá naʻa nau ʻapitanga takatakai ai. Pea ʻi ha faʻahinga ʻuhinga, naʻe mavahe ʻa e kau sōtiá ia. Naʻe fakakaukau ʻa e tokolahi taha ʻo e kakaí kuo mahili atu ʻa e fakatuʻutāmakí. Ko ia, naʻa nau nofo pē ʻi he koló. Ka ko e hā naʻe tala ʻe Sīsū ke nau faí?— Ko e hā ʻa e meʻa naʻá ke mei faí kapau naʻá ke nofo ʻi Selusalema?— Ko e faʻahinga naʻa nau tui moʻoni kia Sīsuú ne nau liʻaki honau ngaahi ʻapí pea lele ki he ngaahi moʻungá ʻo mamaʻo ʻaupito mei Selusalema.

ʻI ha taʻu kakato ʻe taha, naʻe ʻikai ha meʻa ʻe hoko ki Selusalema. ʻI he taʻu hono uá, naʻe ʻikai ha meʻa ʻe hoko. Pea ʻi he taʻu hono tolú, naʻe halaʻatā pē ke hoko ha meʻa ia. Ko e kakai ʻe niʻihi naʻa nau fakakaukau nai ne fakasesele ʻa e faʻahinga naʻa nau mavahe mei he koló. Ka ʻi he taʻu hono faá, naʻe toe foki mai ʻa e kau tau Lomá. Naʻa nau toe ʻapitanga takatakai ai pē ʻi Selusalema. Naʻe fuʻu tōmui ʻaupito he taimí ni ke fai ha hola. ʻI he taimi ko ení, naʻe fakaʻauha ai ʻe he kau taú ʻa e koló. Ko e tokolahi taha ʻo e kakai naʻe ʻi loto aí naʻa nau mate, pea ko e toengá naʻe taki pōpula.

Ka ko e hā ne hoko ki he faʻahinga naʻa nau talangofua kia Sīsuú?— Naʻa nau hao. Naʻa nau mamaʻo ʻaupito mei Selusalema. Ko ia, naʻe ʻikai ai te nau lavea. Naʻe maluʻi kinautolu ʻe he talangofuá.

Kapau ʻokú ke talangofua, ʻe toe maluʻi nai ai mo koe?— ʻE tala atu nai ʻe hoʻo ongo mātuʻá ke ʻoua ʻaupito naʻá ke vaʻinga ʻi he halá. Ko e hā ʻokú na leaʻaki ai iá?— ʻOku peheé, koeʻuhí he ʻe malava ke tuiʻi koe ʻe ha kā. Ka te ke fakakaukau nai ʻi ha ʻaho: ‘ʻOku ʻikai ke ʻi ai ha kā ia he taimí ni. Heʻikai te u lavea au. ʻOku vaʻinga pē ʻa e fānau kehé ia ʻi he halá, pea ʻoku teʻeki ke u sio au kuo nau lavea.’

Ko e anga ia ʻo e ongoʻi ʻa e kakai tokolahi taha ʻi Selusalemá. Hili ʻa e mavahe ʻa e kau tau Lomá, naʻe hā ngali malu ia. Naʻe nofo pē ʻi he koló ʻa e niʻihi kehé. Ko ia, naʻa nau nofo mo kinautolu foki. Naʻe fai ha fakatokanga kia kinautolu, ka naʻe ʻikai te nau fanongo. Ko hono ikuʻangá, naʻe mole ai ʻenau moʻuí.

Ta toe vakai angé ki ha fakatātā ʻe taha. Kuó ke vaʻinga ʻi ha taimi ʻaki ʻa e masí?— ʻE hā mālie nai ke sio ki he afí ʻi hoʻo kohiʻi ha foʻi masi. Ka ko e vaʻinga mo e masí ʻoku lava ke fakatuʻutāmaki. ʻE lava ke vela kotoa ai ʻa e falé, pea ʻe malava ke ke mate ai!

Manatuʻi, ko e talangofua pē ʻi he taimi ʻe niʻihí, ʻoku ʻikai ke feʻunga ia. Ka ʻo kapau ʻokú ke talangofua maʻu pē, ʻe maluʻi moʻoni ai koe. Pea ko hai ia ʻokú ne tala atu kia koe, “ʻA e fanau, mou talangofua . . . ki hoʻomou matuʻa”?— Ko e ʻOtuá. Pea manatuʻi, ʻokú ne leaʻaki iá koeʻuhí he ʻokú ne ʻofa ʻia koe.