Ko ha Vakai Fakaʻotua ki he Moʻuí

 1. Ko hai naʻá ne fakatupu ʻa e meʻamoʻui kotoa pē?

“KO Sihova ko e ʻOtua moʻoni,” ko e lea ia ʻa e palōfita ko Selemaiá. “Koia ia ʻa e ʻOtua Moʻui.” (Selemaia 10:10) ʻIkai ko ia pē, ko Sihova ko e ʻOtuá ʻa e Tokotaha-Fakatupu ʻo e meʻamoʻui kotoa pē. Naʻe pehē ʻe he ngaahi meʻa fakatupu fakahēvaní fekauʻaki mo ia: “Naʻa ke ngaohi ʻa e meʻa kotoa pē, pea naʻa nau ʻi ai, pea naʻe ngaohi kinautolu, koeʻuhi pē ko ho finangalo ia.” (Fakahā 4:11) ʻI ha hiva ʻo e fakahīkihiki ki he ʻOtuá, naʻe pehē ai ʻe Tuʻi Tēvita: “Ko e matavai ʻo e moʻui ʻoku ʻi he ʻAfiona.” (Sāme 36:9) Ko e moʻuí leva ko ha meʻaʻofa mei he ʻOtuá.

 2. Ko e hā ʻoku fai ʻe he ʻOtuá ke fakatolongaʻaki ʻetau moʻuí?

² ʻOku toe fakatolonga ʻe Sihova ʻetau moʻuí. (Ngāue 17:28) ʻOkú ne tokonaki mai ʻa e meʻakai ʻoku tau kaí, ko e vai ʻoku tau inú, ko e ʻea ʻoku tau mānavaʻakí pea mo e fonua ʻoku tau nofo aí. (Ngāue 14:​15-17) Kuo fai eni ʻe Sihova ʻi ha founga ʻokú ne ʻai ai ʻa e moʻuí ke fakafiefia. Ka ke fiefia kakato ʻi he moʻuí, ʻoku fiemaʻu ke tau ako ʻa e ngaahi lao ʻa e ʻOtuá pea talangofua ki ai.—Aisea 48:​17, 18.

 3. Naʻe anga-fēfē ʻa e vakai ʻa e ʻOtuá ki hono fakapoongi ʻo ʻĒpelí?

³ ʻOku fiemaʻu ʻe he ʻOtuá ke tau ʻapasia ki he moʻuí—fakatouʻosi ʻa e moʻui ʻa kitautolú pea mo e moʻui ʻa e niʻihi kehé. Ko e fakatātaá, ʻi he ngaahi ʻaho ʻo ʻĀtama mo ʻIví, naʻe hoko ai ʻa hona foha ko Keiní ʻo ʻita lahi ki hono tehina ko ʻĒpelí. Naʻe fakatokanga ʻa Sihova kia Keini ʻo pehē ko ʻene ʻitá ʻe lava ke taki atu ai ia ki he angahala mamafa. Naʻe taʻetokanga ʻa Keini ki he fakatokanga ko iá. Naʻá ne ‘tuʻu kia Epeli ko hono tehiná, ʻo ne tamateʻi ia.’ (Senesi 4:​3-8) Naʻe tauteaʻi ʻe Sihova ʻa Keini ʻi heʻene fakapoongi ʻa hono tehiná.—Senesi 4:​9-11.

 4. ʻI he Lao ʻa Mōsesé, naʻe anga-fēfē hono fakamamafaʻi ai ʻe he ʻOtuá ʻa e vakai totonu ki he moʻuí?

⁴ ʻI he laui afeʻi taʻu ki mui ai, naʻe ʻoange ai ʻe Sihova ki he kakai ʻIsilelí ʻa e ngaahi lao ke tokoniʻi ai kinautolu ke nau tauhi ʻi he tuʻunga fakahōifua kiate ia. Koeʻuhi ko e ngaahi laó ni naʻe ʻoange ia fakafou ʻi he palōfita ko Mōsesé, ʻoku ui kinautolu ʻi he taimi ʻe niʻihi ko e Lao ʻa Mōsese. Ko e konga ʻo e Lao ʻa Mōsesé naʻe pehē ai: “ʻOua naʻa ke fakapo.” (Teutalonome 5:17) Naʻe fakahaaʻi heni ki he kau ʻIsilelí ʻoku fakamahuʻingaʻi ʻe he ʻOtuá ʻa e moʻui fakaetangatá pea kuo pau ke fakamahuʻingaʻi ʻe he kakaí ʻa e moʻui ʻa e niʻihi kehé.

 5. ʻOku totonu ke fēfē ʻetau vakai ki he fakatōtamá?

⁵ Fēfē ʻa e moʻui ʻa ha kiʻi tama teʻeki fanauʻi? Sai, fakatatau ki he Lao ʻa Mōsesé, naʻe hala ʻa hono fakatupunga ʻa e mate ʻa ha kiʻi pēpē ʻi he manava ʻo ʻene faʻeé. ʻIo, naʻa mo ha moʻui pehē ʻoku mahuʻinga ia kia Sihova. (Ekisoto 21:​22, 23; Sāme 127:3) ʻOku ʻuhinga ení ko e fakatōtamá ʻoku hala.

 6. Ko e hā ʻoku ʻikai totonu ai ke tau fehiʻa ʻi hotau kaungā faʻahinga ʻo e tangatá?

⁶ Ko e ʻapasia ki he moʻuí ʻoku kau ki ai ʻa hono maʻu ʻa e vakai totonu ki he kaungā faʻahinga ʻo e tangatá. ʻOku pehē ʻe he Tohi Tapú: “Ko ia ʻoku ne fehiʻa ki hono tokoua ko e tamate-tangata ia: pea ʻoku mou ʻilo, ʻilonga ha tamate-tangata, ʻoku ʻikai te ne maʻu ʻa e nofoʻi ia ʻe he moʻui taʻengata.” (1 Sione 3:15) Kapau ʻoku tau fiemaʻu ʻa e moʻui taʻengatá, ʻoku fiemaʻu ke tau taʻaki fuʻu mei hotau lotó ha tāufehiʻa pē ki hotau kaungā faʻahinga ʻo e tangatá, koeʻuhi ko e tāufehiʻá ʻa e tupuʻanga tefito ʻo e lahi taha ʻo e fakamālohí. (1 Sione 3:​11, 12) ʻOku mātuʻaki mahuʻinga ke tau ako ke feʻofaʻaki.

 7. Ko e hā ʻa e ngaahi tōʻonga ʻe niʻihi ʻoku fakahaaʻi ai ha taʻeʻapasia ki he moʻuí?

⁷ Fēfē ʻa e fakahaaʻi ʻo e ʻapasia ki heʻetau moʻuí tonu? Ko e kakaí ʻi he tuʻunga anga-mahení ʻoku ʻikai te nau loto ke nau mate, ka ʻoku tuku ʻe he niʻihi ke nau mate nai koeʻuhi ko e ngaahi mālié. Ko e fakatātaá, ʻoku ngāueʻaki ʻe he tokolahi ʻa e tapaká, fakateka ʻa e betel nut, pe ngāueʻaki ʻa e ngaahi faitoʻo kona tapú ki he ngaahi taumuʻa fakafiefiá. Ko e ngaahi meʻa peheé ʻokú ne fakatupu ʻa e maumau ki he sinó mo faʻa tāmateʻi ʻa e faʻahinga ʻoku nau ngāueʻaki iá. Ko ha tokotaha ʻokú ne ʻai ko ha tōʻonga ʻa hono ngāueʻaki ʻa e ngaahi meʻá ni ʻoku ʻikai te ne vakai ki he moʻuí ʻoku toputapu. Ko e ngaahi tōʻongá ni ʻoku taʻemaʻa ʻi he vakai mai ʻa e ʻOtuá. (Loma 6:19; 12:​1; 2 Kolinito 6:19 [7:​1, PM]) Ke tauhi fakahōifua ki he ʻOtuá, kuo pau ke tau liʻaki ʻa e ngaahi tōʻonga peheé. Neongo ko e fai peheé ʻe mātuʻaki faingataʻa nai, ʻe lava ke ʻomai ʻe Sihova kiate kitautolu ʻa e tokoni ʻoku fiemaʻú. Pea ʻokú ne fakamahuʻingaʻi ʻa e feinga ʻoku tau fai ke ʻai ʻetau moʻuí ʻi he tuʻunga ko ha meʻaʻofa mahuʻinga meiate iá.

 8. Ko e hā ʻoku totonu ai ke tau manatuʻi ʻa e fiemaʻu ke tokanga ki he tuʻunga malú?

⁸ Kapau ʻoku tau maʻu ʻa e ʻapasia ki he moʻuí, te tau manatuʻi ʻa e fiemaʻu ke tokanga ki he tuʻunga malú. ʻE ʻikai ke tau taʻetokanga pea ʻe ʻikai ke tau fai ha ngaahi meʻa fakatuʻutāmaki ki he fiefiá pē pe ko e mālieʻiá. Te tau fakaʻehiʻehi mei he fakaʻuli taʻetokangá mo e ngaahi sipoti fakamālohí pe fakatuʻutāmakí. (Sāme 11:5) Ko e lao ʻa e ʻOtuá ki ʻIsileli ʻo e kuonga muʻá naʻe fakahaaʻi ai: “Ka ke ka langa ha fale foʻou [mo hano ʻato lafalafa], pea te ke ngaohi ha ʻa [pe holisi māʻulalo] ki ho tuʻa fale, ke ʻoua naʻa ke fakapiki ha toto ki ho fale ʻi he to ha tangata mei ai.” (Teutalonome 22:8) ʻI he fehoanaki mo e tefitoʻi moʻoni naʻe fokotuʻu ʻi he lao ko iá, tauhi ʻa e ngaahi meʻa hangē ko e ngaahi sitepú ʻi ha tuʻunga lelei ʻi ho ʻapí koeʻuhí ke ʻoua ʻe humu, tō pea hoko ʻo lavea lahi ai ha taha. Kapau ʻokú ke maʻu ha kā, fakapapauʻi ʻoku malu ke lele holo ai. ʻOua ʻe fakaʻatā ʻa ho ʻapí pe ko hoʻo kaá ke hoko ko ha fakatuʻutāmaki kiate koe pe ki he niʻihi kehé.

 9. Kapau ʻoku tau maʻu ʻa e ʻapasia ki he moʻuí, ʻe anga-fēfē ʻetau tōʻongafai ki he fanga monumanú?

⁹ Fēfē ʻa e moʻui ʻa ha monumanu? ʻOku toputapu mo ia foki ki he Tokotaha-Fakatupú. ʻOku fakaʻatā ʻe he ʻOtuá ʻa hono tāmateʻi ʻo e fanga monumanú ke maʻu ai ha meʻakai mo ha vala pe ke maluʻi ai ʻa e kakaí mei he fakatuʻutāmakí. (Senesi 3:21; 9:3; Ekisoto 21:28) Kae kehe, ko e anga-fakamamahi ki he fanga monumanú pe tāmateʻi kinautolu ki he fiefiá pē, ʻoku hala ia pea ʻoku fakahaaʻi ai ʻa e taʻetokanga fakaʻaufuli ki he tuʻunga toputapu ʻo e moʻuí.—Palovepi 12:10.

10. Kuo anga-fēfē hono fakahaaʻi ʻe he ʻOtuá ʻoku ʻi ai ha fehokotaki ʻi he vahaʻa ʻo e moʻuí mo e totó?

¹⁰ Hili hono tāmateʻi ʻe Keini ʻa hono tehina ko ʻĒpelí, naʻe folofola ʻa Sihova kia Keini: “Ko e ngaahi tuluta toto ʻo ho tehina ʻoku tangi mai kiate au mei he kelekele.” (Senesi 4:10) ʻI he taimi naʻe lea ai ʻa e ʻOtuá fekauʻaki mo e toto ʻo ʻĒpelí, naʻá ne leá ʻo fekauʻaki mo e moʻui ʻa ʻĒpelí. Naʻe toʻo ʻe Keini ʻa e moʻui ʻa ʻĒpelí, pea ʻi he taimi ko ení ʻe pau ke tautea ʻa Keini. Naʻe hangē ia ko e toto pe ko e moʻui ʻa ʻĒpelí naʻe tangi kia Sihova ki ha fakamaau totonú. Ko e fehokotaki ʻi he vahaʻa ʻo e moʻuí mo e totó naʻe toe fakahaaʻi ia ʻi he hili ʻa e Lōmaki ʻo e ʻaho ʻo Noá. Ki muʻa ʻi he Lōmakí, naʻe kai fuaʻiʻakau, vesitapolo, uite mo e nati pē ʻa e tangatá. Hili ʻa e Lōmakí, naʻe folofola ai ʻa Sihova kia Noa mo hono ngaahi fohá: “Ko e meʻa kotoa pe ʻoku ngaūe, ʻa ia ko e pehe ʻoku moʻui, ko hoʻomou meʻakai ia; hange ko e mohuku kuo u ʻatu kotoa pe ia kiate kimoutolu.” Kae kehe, naʻe fokotuʻu ʻe he ʻOtuá ʻa e fakangatangata ko ení: “Ko e kakano ʻa ia ʻoku kei ʻi ai ʻene moʻui, ʻa ia ko hono toto, ʻe, ʻikai te mou kai ia.” (Senesi 1:29; 9:​3, 4) ʻOku hā mahino, ʻoku fakafehokotaki ofi ʻaupito ʻe Sihova ʻa e moʻuí pea mo e toto ʻo ha meʻamoʻui.

11. Ko e hā ʻa e ngāueʻaki ʻo e totó kuo tapui ʻe he ʻOtuá talu mei he ngaahi ʻaho ʻo Noá?

¹¹ ʻOku tau fakahāhā ʻa e ʻapasia ki he totó ʻi he ʻikai ke kai iá. ʻI he Lao naʻe ʻoange ʻe Sihova ki he kau ʻIsilelí, naʻá ne fekau ai: “Pea ʻilonga ha taha . . . ʻa ia te ne tulimanu, ʻo maʻu ha manu pe manupuna ʻoku kai, te ne lilingi ʻa e toto, ʻo uʻufiʻaki ʻa e efu. . . . naʻa ku pehe ai ki haʻa Isileli, Ko e toto ʻo e sino kehekehe ʻoku tapu ke mou kai.” (Livitiko 17:​13, 14) Ko e fekau ʻa e ʻOtuá ke ʻoua ʻe kai ʻa e toto ʻo e fanga monumanú, ʻa ē naʻe ʻuluaki ʻoange kia Noa ʻi he taʻu nai ʻe 800 ki muʻá, naʻe kei ngāueʻaki pē. Ko e vakai ʻa Sihová naʻe māʻalaʻala: Naʻe lava ke kai ʻe heʻene kau sevānití ʻa e kakanoʻi manú kae ʻikai ko e totó. Naʻe pau ke nau lilingi ʻa e totó ki he kelekelé—ko hono moʻoní, ʻo fakafoki ʻa e moʻui ʻa e meʻamoʻuí ki he ʻOtuá.

12. Ko e hā ʻa e fekau fekauʻaki mo e totó naʻe ʻomai ʻe he laumālie māʻoniʻoní ʻi he ʻuluaki senitulí pea ʻoku kei ngāueʻaki he ʻaho ní?

¹² ʻOku hilifaki ha fekau meimei tatau ki he kau Kalisitiané. Ko e kau ʻapositoló mo e kau tangata kehe naʻe takimuʻa ʻi he lotolotonga ʻo e kau muimui ʻo Sīsū ʻi he ʻuluaki senitulí naʻa nau fakatahataha fakataha ke fakapapauʻi ʻa e ngaahi fekau naʻe pau ke talangofua ki ai ʻa e tokotaha kotoa ʻi he fakatahaʻanga Kalisitiané. Naʻa nau aʻu ai ki he fakamulituku ko ení: “Kuo ha lelei ki he Laumálie Maʻoniʻoni mo kimautolu, ke ʻoua naʻa toe ʻai mo ha kavenga kiate kimoutolu, ngata pe i he ngaahi meʻa ko eni, ʻa ia kuo pau; ke mou fakaʻehiʻehi mei he ngaahi meʻa kuo ʻoatu ki he aitoli, pea mo e toto, mo e manu kuo sisina [ʻo nofo ai ʻa e totó ʻi he kanomaté], pea mo e feʻauaki.” (Ngāue 15:​28, 29; 21:25) Ko ia, kuo pau ke tau ‘fakaʻehiʻehi mei he totó.’ ʻI he vakai mai ʻa e ʻOtuá, ko ʻetau fai iá ʻoku mahuʻinga tatau pē ia mo ʻetau fakaʻehiʻehi mei he tauhi ʻaitolí pea mo e ʻulungāanga taʻetaau fakaefehokotaki fakasinó.

13. Fakatātaaʻi ʻa e ʻuhinga ʻoku kau ai ʻa e huhu totó ʻi he fekau ke fakaʻehiʻehi mei he totó.

¹³ Ko e fekau ke fakaʻehiʻehi mei he totó ʻoku kau ai ʻa e huhu totó? ʻIo. Ke fakatātaaʻi: Tau pehē naʻe tala atu ʻe ha toketā kiate koe ke ke fakaʻehiʻehi mei he ngaahi inu ʻolokaholó. ʻE ʻuhinga nai pē iá ʻoku ʻikai totonu ke ke inu ʻolokaholo ka ʻe lava pē ke ke huhu ia ki ho ngaahi kālavá? Ko e moʻoni ʻe ʻikai! ʻI he founga meimei tatau, ko e fakaʻehiʻehi mei he totó ʻoku ʻuhinga iá ko e ʻikai ke ʻai ia ki hotau sinó ʻi ha faʻahinga founga pē. Ko ia, ko e fekau ke fakaʻehiʻehi mei he totó ʻoku ʻuhinga iá ʻe ʻikai ke tau fakaʻatā ha taha pē ke ne huhu ha toto ki hotau ngaahi kālavá.

14, 15. Kapau ʻoku pehē ʻe he kau toketaá kuo pau ke fai ha huhu toto ki ha Kalisitiane, ʻe anga-fēfē ʻene tali ki aí, pea ko e hā hono ʻuhingá?

¹⁴ Fēfē kapau ʻoku lavea lahi ha Kalisitiane pe ʻoku fiemaʻu kiate ia ha tafa lahi? Tau pehē pē ʻoku pehē ʻe he kau toketaá kuo pau ke ne huhu toto he ka ʻikai te ne mate. Ko e moʻoni, ko e Kalisitiané ʻoku ʻikai te ne loto ke mate. ʻI ha feinga ke fakatolonga ʻa e meʻaʻofa mahuʻinga ʻa e ʻOtuá ko e moʻuí, te ne tali ʻa e ngaahi faitoʻo kehe ʻoku ʻikai ke kau ki ai ʻa hono ngāuehalaʻaki ʻa e totó. Ko ia ai, te ne kumi ʻa e tokangaʻi fakafaitoʻo peheé ʻo kapau ʻoku ala maʻu, pea te ne tali ʻa e ngaahi faitoʻo fetongi kehekehe ki he totó.

¹⁵ ʻE maumauʻi ʻe ha Kalisitiane ʻa e lao ʻa e ʻOtuá koeʻuhí pē ke moʻui ai pē ʻo kiʻi lōloa ange ʻi he fokotuʻutuʻu ko eni ʻo e ngaahi meʻá? Naʻe pehē ʻe Sīsū: “Ko ia te ne fai ke fakahaofi ʻene moʻui, ko ʻene tuku ia ke mole; pea ko ia te ne tuku ʻene moʻui ke mole koeʻuhi ko au, koʻene kalofaki ia.” (Mātiu 16:25) ʻOku ʻikai ke tau fie mate. Ka ʻo kapau naʻa tau feinga ke fakahaofi ʻetau moʻui lolotongá ʻaki hono maumauʻi ʻa e lao ʻa e ʻOtuá, te tau ʻi he tuʻunga fakatuʻutāmaki ai ʻo hono fakamoleki ʻa e moʻui taʻengatá. ʻOku fakapotopoto leva ke tau tuku ʻetau falalá ʻi he tuʻunga totonu ʻo e lao ʻa e ʻOtuá, fakataha mo e falala kakato ʻo kapau te tau mate ʻi ha faʻahinga tupuʻanga pē, ʻe manatuʻi kitautolu ʻe hotau Tokotaha Foaki-Moʻuí ʻi he toetuʻú pea toe fakafoki mai kiate kitautolu ʻa e meʻaʻofa mahuʻinga ko e moʻuí.—Sione 5:​28, 29; Hepelu 11:6.

16. Ko e hā ʻoku fakapapauʻi mālohi ʻe he kau sevāniti ʻa e ʻOtuá fekauʻaki mo e totó?

¹⁶ ʻI he ʻahó ni, ʻoku fakapapauʻi mālohi ai ʻe he kau sevāniti faitōnunga ʻa e ʻOtuá ke muimui ʻi heʻene tataki fekauʻaki mo e totó. ʻE ʻikai te nau kai ia ʻi ha faʻahinga tuʻunga pē. Pea ʻe ʻikai te nau tali ʻa e totó ki he ngaahi ʻuhinga fakafaitoʻó.a ʻOku nau fakapapauʻi ko e Tokotaha-Fakatupu ʻo e totó ʻokú ne ʻafioʻi ʻa e meʻa ʻoku lelei taha kiate kinautolú. ʻOkú ke tui ʻokú ne pehē?

17. ʻI ʻIsileli ʻo e kuonga muʻá, ko e hā ʻa e ngāueʻaki pē taha ʻo e totó naʻe fakahōifua kia Sihova ko e ʻOtuá?

¹⁷ Ko e Lao ʻa Mōsesé naʻe fakamamafaʻi ai ʻa e ngāueʻaki totonu pē taha ʻo e totó. ʻI he fekauʻaki mo e lotu naʻe fiemaʻu mei he kau ʻIsileli ʻo e kuonga muʻá, naʻe fekau ai ʻe Sihova: “Ko e moʻui ʻa e kakano ʻoku ʻi he toto: pea kuo u tuku ia maʻamoutolu ki he olita, ke faiʻaki ʻa e fakalelei maʻa hoʻomou moʻui: he ko e toto ia ʻoku ne fakalelei.” (Livitiko 17:11) ʻI he taimi naʻe faiangahala ai ʻa e kau ʻIsilelí, naʻe lava ke nau maʻu ʻa e fakamolemolé ʻaki hono feilaulauʻaki ha monumanu pea tuku ʻa e konga ʻo hono totó ki he ʻōlita ʻi he tāpanekalé pe ki mui ai ʻi he temipale ʻo e ʻOtuá. Ko e ngāueʻaki totonu pē taha ʻo e totó naʻe ʻi he ngaahi feilaulau peheé.

18. Ko e hā ʻa e ngaahi ʻaonga mo e ngaahi tāpuaki ʻe lava ke tau maʻu mei hono lilingi ʻo e taʻataʻa ʻo Sīsuú?

¹⁸ Ko e kau Kalisitiane moʻoní ʻoku ʻikai te nau ʻi he malumalu ʻo e Lao ʻa Mōsesé pea ko ia ai ʻoku ʻikai te nau foaki ha ngaahi feilaulau monumanu pea tuku ʻa e toto ʻo e fanga monumanú ki ha ʻōlita. (Hepelu 10:1) Kae kehe, ko e ngāueʻaki ʻo e totó ʻi he ʻōlitá ʻi he ngaahi ʻaho ʻo ʻIsileli ʻo e kuonga muʻá naʻe tomuʻa fakatātaaʻi ai ʻa e feilaulau mahuʻinga ʻa e ʻAlo ʻo e ʻOtuá, ʻa Sīsū Kalaisi. Hangē ko ia kuo tau ako ki ai ʻi he Vahe 5 ʻo e tohí ni, naʻe foaki ʻe Sīsū ʻa ʻene moʻui fakaetangatá maʻatautolu ʻaki hono tuku ke lilingi ʻa hono taʻataʻá ko ha feilaulau. Naʻá ne ʻalu hake leva ki hēvani ʻo ʻoatu tā tuʻo taha ai ʻa e mahuʻinga ʻo hono taʻataʻa naʻe lilingí ki he ʻOtuá. (Hepelu 9:​11, 12) Naʻe fakatoka ʻi he meʻa ko iá ʻa e makatuʻunga ki hono fakamolemoleʻi ʻo ʻetau ngaahi angahalá pea fakaʻatā ai ʻa e hala kiate kitautolu ke maʻu ʻa e moʻui taʻengatá. (Mātiu 20:28; Sione 3:16) He mahuʻinga lahi ē ko e ngāueʻaki tefito ko ia ʻo e taʻataʻá! (1 Pita 1:​18, 19) ʻE lava ke tau maʻu ʻa e fakamoʻuí fakafou pē ʻi he tui ki he ʻaonga ʻo e taʻataʻa ʻo Sīsū naʻe lilingí.

19. Ko e hā kuo pau ke tau fai koeʻuhi ke hoko ai ʻo ‘maa mei he toto oe kakai kotoabe’?

¹⁹ ʻE lava ke tau hoko ʻo houngaʻia lahi kia Sihova ko e ʻOtuá ʻi he tokonaki ʻofa ʻo e moʻuí! Pea ʻikai ʻoku totonu ke ueʻi kitautolu ʻe he meʻa ko iá ke talanoa ki he niʻihi kehé fekauʻaki mo e faingamālie ke maʻu ʻa e moʻui taʻengatá ʻo makatuʻunga ʻi he tui ki he feilaulau ʻa Sīsuú? Ko e tokanga fakaʻotua ki he moʻui ʻa e kaungā faʻahinga ʻo e tangatá ʻe ueʻi ai kitautolu ke fai eni fakataha mo e vēkeveke pea mo e faivelenga. (Isikeli 3:​17-21) Kapau ʻoku tau fakahoko tōtōivi ʻa e fatongiá ni, te tau malava ai ke lea, ʻo hangē ko ia naʻe fai ʻe he ʻapositolo ko Paulá: “Oku ou maa au mei he toto oe kakai kotoabe. He nae ikai teu taofi ae fakaha kiate kimoutolu ae finagalo kotoabe oe Otua.” (Ngāue 20:​26, 27, PM) Ko e talanoa ki he kakaí fekauʻaki mo e ʻOtuá mo ʻene ngaahi taumuʻá ko ha founga lelei ia ke fakahaaʻi ai ʻoku tau maʻu ʻa e tokanga māʻolunga taha ki he moʻuí pea mo e totó.