Vahe 1

“Ko Eni Ia ʻa e ʻOfa ki he ʻOtua”

“Ko eni ia ʻa e ʻofa ki he ʻOtua, ʻa ʻetau tauhi ki heʻene ngaahi tuʻutuʻuni. Pea ʻoku ʻikai ke fakamafasia ʻene ngaahi tuʻutuʻuni.”—1 SIONE 5:3, 4.

1, 2. Ko e hā ʻokú ne ueʻi koe ke ke ʻofa kia Sihova ko e ʻOtuá?

ʻOKÚ KE ʻofa ki he ʻOtuá? Kapau kuó ke maʻu ha vahaʻangatae fakaefakatapui mo Sihova ko e ʻOtuá, ʻokú ke fakapapauʻi moʻoni pē hoʻo tali ʻio ki aí—pea ʻoku totonu ia! ʻOku fakanatula pē kiate kitautolu ke tau ʻofa kia Sihova. Ko hono moʻoní ko ʻetau ʻofa ki he ʻOtuá ko ʻetau tali ia ki heʻene ʻofa mai kiate kitautolú. ʻOku peheni hono fakalea ʻe he Tohi Tapú: “ʻOku tau ʻofa ʻe kitautolu, koeʻuhi naʻe tomuʻa ʻofa ʻe he ʻEne ʻAfio [Sihova] kiate kitautolu.”—1 Sione 4:19.

² Kuo tomuʻa fakahaaʻi mai ʻe Sihova ia ʻene ʻofá kiate kitautolu. ʻOkú ne tokonaki mai maʻatautolu ha ʻapi fakaemāmani fakaʻofoʻofa. ʻOkú ne tokangaʻi mai ʻetau ngaahi fiemaʻu fakasinó mo fakamatelié. (Mātiu 5:43-48) Ko e meʻa ʻoku mahuʻinga angé, ʻokú ne tokangaʻi mai ʻetau ngaahi fiemaʻu fakalaumālié. ʻOkú ne foaki mai ʻene Folofolá, ʻa e Tohi Tapú. ʻIkai ko ia pē, ʻokú ne fakaafeʻi mai ke tau lotu ange kiate ia mo ne fakapapauʻi te ne fanongo mai kiate kitautolu pea te ne ʻomai hono laumālie māʻoniʻoní ke tokoniʻi kitautolu. (Sāme 65:2; Luke 11:13) Hiliō he meʻa kotoa, naʻá ne fekauʻi mai hono ʻAlo mahuʻinga lahi tahá ke hoko ko hotau Tokotaha-Huhuʻi koeʻuhi ke malava ai ʻo fakahaofi kitautolu mei he angahalá mo e maté. He ʻofa lahi ē kuo fakahaaʻi mai ʻe Sihova kiate kitautolú!—Sione 3:16; Loma 5:8.

 3. (a) Ke kei nofo ʻi he ʻofa ʻa e ʻOtuá, ko e hā ʻoku fiemaʻu mei heʻetau tafaʻakí? (e) Ko e hā ʻa e fehuʻi mahuʻinga ʻoku fiemaʻu ke tau fakakaukau ki ai, pea ʻoku maʻu ʻa e talí ʻi fē?

³ ʻOku fiemaʻu mai ʻe Sihova ke tau maʻu ʻaonga mei heʻene ʻofá ʻo taʻengata. Kae kehe, ko hono moʻoní ʻoku fakatuʻunga pē ia ʻiate kitautolu pe ʻe pehē pe ʻikai. ʻOku enginaki mai ʻa e Folofola ʻa e ʻOtuá: “Tauhi ai kimoutolu ʻi he ʻofa ʻa e ʻOtua . . . ʻo aʻu ki he moʻui taʻengata.” (Siutasi 21) Ko e kupuʻi lea ‘tauhi kimoutolu’ ʻokú ne fakahaaʻi mai, ke tau kei nofo ʻi he ʻofa ʻa e ʻOtuá, ʻoku fiemaʻu ʻa e ngāue ia mei heʻetau tafaʻakí. ʻOku fiemaʻu ke tau fai ha tali ki heʻene ʻofá ʻi ha ngaahi founga hā mahino. Ko ha fehuʻi mahuʻinga leva ʻeni ke tau fakakaukau ki ai, ‘ʻE lava fēfē ke u fakahāhaaʻi ʻeku ʻofa ki he ʻOtuá?’ ʻOku maʻu ʻa e talí ʻi he ngaahi lea fakamānavaʻi ʻa e ʻapositolo ko Sioné: “Ko eni ia ʻa e ʻofa ki he ʻOtua, ʻa ʻetau tauhi ki heʻene ngaahi tuʻutuʻuni. Pea ʻoku ʻikai ke fakamafasia ʻene ngaahi tuʻutuʻuni.” (1 Sione 5:3, 4) ʻOku lelei ke tau sivisiviʻi fakalelei ʻa e ʻuhinga ʻo e ngaahi leá ni, he ʻoku tau loto ke fakahāhā ki hotau ʻOtuá ʻa hono lahi ʻo ʻetau ʻofa kiate iá.

“KO ENI IA ʻA E ʻOFA KI HE ʻOTUA”

4, 5. (a) Ko e hā ʻoku ʻuhinga ki ai ʻa e kupuʻi lea “ʻofa ki he ʻOtua”? (e) Fakamatalaʻi ʻa e anga ʻo e kamata ke tupu ʻi ho lotó ʻa e ʻofa kia Sihová.

⁴ “ʻOfa ki he ʻOtua”—ko e hā naʻe ʻi he fakakaukau ʻa e ʻapositolo ko Sioné ʻi heʻene hiki ʻa e ngaahi lea ko iá? ʻOku ʻuhinga ʻa e kupuʻi leá ni, ʻo ʻikai ki he ʻofa ʻa e ʻOtuá kiate kitautolú, ka ki heʻetau ʻofa kiate iá. ʻE lava ke ke manatu ki he taimi naʻe kamata ai ke tupu ʻi ho lotó ʻa e ʻofa kia Sihová?

⁵ Kiʻi fakakaukau ange ʻi ha mōmeniti ki he taimi naʻá ke fuofua ako ai ʻa e moʻoni fekauʻaki mo Sihova pea mo ʻene ngaahi taumuʻá peá ke kamata ngāueʻi ai hoʻo tuí. Naʻá ke mahinoʻi ai neongo naʻe fanauʻi mai koe ko e tokotaha angahala ʻo mavahe mei he ʻOtuá, naʻe fakaava atu ʻe Sihova fakafou ʻia Kalaisi ʻa e matapā ke ke maʻu ʻa e tuʻunga haohaoa ko ia naʻe fakamoleki ʻe ʻĀtamá pea maʻu mo e moʻui taʻengatá. (Mātiu 20:28; Loma 5:12, 18) Naʻe kamata ke ke mahinoʻi ʻa e feilaulau lahi naʻe fai ʻe Sihova ʻi hono fekauʻi hifo hono ʻAlo mahuʻinga lahi tahá ke pekia maʻaú. Naʻe ueʻi ai ho lotó, pea kamata ke ke ongoʻi ha ʻofa ki he ʻOtua ʻa ia kuó ne fakahāhā ha ʻofa lahi pehē kiate koe.—1 Sione 4:9, 10.

 6. ʻOku fakahaaʻi fēfē ʻa e ʻofa moʻoní, pea ko e hā naʻe ueʻi koe ʻe he ʻofa ki he ʻOtuá ke ke faí?

⁶ Kae kehe, ko e foʻi ongo ko iá ko e kamataʻanga pē ia ʻo e ʻofa moʻoni kia Sihová. ʻOku ʻikai ko ha foʻi ongo pē ʻa e ʻofá; pea ʻoku ʻikai ko ha meʻa pē ia ʻoku leaʻaki. Ko e ʻofa moʻoni ki he ʻOtuá ʻoku kau ki ai ha meʻa lahi ange ʻo ʻikai ko e pehē pē, “ʻOku ou ʻofa kia Sihova.” ʻI he hangē ko e tuí, ko e ʻofa moʻoní ʻoku fakamatalaʻi pea fakasino mai ia ʻi he ngaahi ngāue ʻokú ne ueʻi ke faí. (Semisi 2:26) Ko hono ʻai mahinó, ʻoku fakahaaʻi tonu ʻa e ʻofá ʻi he ngaahi ngāue ʻoku fakahōhōʻiaʻi ai ʻa e tokotaha ʻoku fai ki ai ʻa e ʻofá. Ko ia ʻi he taimi naʻe faiaka ai ʻa e ʻofa kia Sihová ʻi ho lotó, naʻe ueʻi ai koe ke ke loto ke moʻui ʻi ha founga ʻoku fakahōifuaʻi ai hoʻo Tamai fakahēvaní. Ko ha Fakamoʻoni ʻosi papitaiso koe? Kapau ko ia, naʻe hanga ʻe he ʻofa loloto mo e anga-līʻoa ko ʻení ʻo ʻai koe ke ke fai ʻa e fili mahuʻinga taha ʻi hoʻo moʻuí. Naʻá ke fakatapui koe kia Sihova ke fai hono finangaló, pea naʻá ke fakaʻilongaʻi hoʻo fakatapuí ʻaki hoʻo papitaiso. (Loma 14:7, 8) Ko hono fakahoko ʻo e palōmesi fakamātoato ko ʻeni kia Sihová ʻoku kau ki ai ʻa e meʻa hono hoko ʻoku lave ki ai ʻa e ʻapositolo ko Sioné.

“TAUHI KI HEʻENE NGAAHI TUʻUTUʻUNI”

 7. Ko e hā ʻa e niʻihi ʻo e ngaahi tuʻutuʻuni ʻa e ʻOtuá, pea ko e hā ʻoku kau ki hono tauhi iá?

⁷ ʻOku fakamatalaʻi mai ʻe Sione ʻa e ʻuhinga ʻo e ʻofa ki he ʻOtuá: “[Ko] ʻetau tauhi ki heʻene ngaahi tuʻutuʻuni.” Ko e hā ʻa e ngaahi tuʻutuʻuni ʻa e ʻOtuá? ʻOku ʻomai ʻe Sihova ha ngaahi tuʻutuʻuni pau fakafou mai ʻi heʻene Folofolá, ʻa e Tohi Tapú. Ko e fakatātaá, ʻokú ne tapui ʻa e ngaahi tōʻonga hangē ko e konaá, feʻauakí, tauhi-ʻaitolí, kaihaʻá mo e loí. (1 Kolinito 5:11; 6:18; 10:14; Efeso 4:28; Kolose 3:9) Ko hono tauhi ʻa e ngaahi tuʻutuʻuni ʻa e ʻOtuá ʻoku kau ki ai ʻa e moʻui ʻo fehoanaki mo e ngaahi tuʻunga fakaeʻulungāanga mahino ʻa e Tohi Tapú.

8, 9. ʻE lava fēfē ke tau ʻiloʻi ʻa e meʻa ʻoku fakahōifua kia Sihová naʻa mo e ʻi he ngaahi tuʻunga ko ia ʻoku ʻikai ha lao Fakatohitapu fakahangatonu ki aí? ʻOmai ha fakatātā.

⁸ Kae kehe, ke fakahōifuaʻi ʻa Sihová, ʻoku fiemaʻu ke tau fai ʻa e meʻa lahi ange ia ʻo ʻikai ko e talangofua pē ki heʻene ngaahi tuʻutuʻuni fakahangatonú. ʻOku ʻikai ke taʻotaʻofi kitautolu ʻe Sihova ʻaki ha ngaahi lao ʻokú ne puleʻi ʻa e tafaʻaki kotoa pē ʻo ʻetau moʻui fakaʻahó. Ko ia ai, ʻi he ʻaho taki taha, te tau fetaulaki nai mo ha ngaahi tuʻunga lahi ʻa ia ʻoku ʻikai ha ngaahi tuʻutuʻuni Fakatohitapu pau ia ki ai. ʻI he ngaahi tuʻunga peheé, te tau ʻilo fēfē ʻa e meʻa ʻe fakahōifua kia Sihová? ʻOku ʻi he Tohi Tapú ha ngaahi fakamatala mahino fekauʻaki mo e anga ʻo e fakakaukau ʻa e ʻOtuá. ʻI heʻetau ako ʻa e Tohi Tapú, ʻoku tau ʻilo ai ʻa e meʻa ʻoku saiʻia ai ʻa Sihová pea mo e meʻa ʻokú ne fehiʻa aí. (Sāme 97:10; Palovepi 6:16-19) ʻOku tau hoko ai ʻo ʻiloʻi ʻa e ngaahi fakakaukau mo e ngaahi ngāue ʻokú ne mahuʻingaʻia aí. Ko e lahi ange ʻetau ako fekauʻaki mo e ʻulungāanga mo e ngaahi founga ʻa Sihová, ko e lahi ange ia ʻetau malava ke fakaʻatā ʻene fakakaukaú ke ne tataki ʻa e ngaahi fili ʻoku tau faí mo tākiekina ʻetau ngaahi ngāué. Ko ia ai, naʻa mo e ngaahi tuʻunga ʻoku ʻikai ke ʻi ai ha lao Fakatohitapu pau aí, te tau faʻa malava pē ke ʻiloʻi ʻa e “finangalo ʻo e ʻOtuá.”—Efeso 5:17, Ko e Taulua.

⁹ Ko e fakatātaá, ʻoku ʻikai ke ʻi he Tohi Tapú ha tuʻutuʻuni fakahangatonu ʻoku tala mai ai ke ʻoua te tau mamata ʻi ha ngaahi faiva pe ko ha ngaahi polokalama TV ʻoku ʻasi mai ai ha fakamālohi fakalilifu pe fehokotaki fakasino taʻetaau. Ka ʻoku fiemaʻu moʻoni ha lao pau ke taʻofi ʻaki ʻa e mamata ʻi he ngaahi meʻa peheé? ʻOku tau ʻilo ʻa e anga ʻo e vakai ʻa Sihova ki he ngaahi meʻá ni. ʻOku tala mahino mai ʻe heʻene Folofolá kiate kitautolu: “Ko e . . . ʻofa ki he fakamalohi, ʻoku fehiʻa ki ai ʻene [Sihova] moʻui.” (Sāme 11:5) ʻOkú ne toe pehē mai: “Ko e kau feʻauaki, mo e tonoʻunoho ʻe fakamāu kinautolu ʻe he ʻOtua.” (Hepelu 13:4) ʻI he fakakaukau atu ki he ngaahi lea fakamānavaʻi ko iá, ʻe lava ke tau ʻiloʻi lelei ai ʻa e finangalo ʻo Sihová. Te tau fili ai ke ʻoua te tau fakafiefiaʻi kitautolu ʻaki ʻa e mamata ʻi he ngaahi fakatātā maeʻeeʻa ko ia ʻo e faʻahinga tōʻonga ʻoku fehiʻa ai ʻa hotau ʻOtuá. ʻOku tau ʻilo ʻoku fakahōifua kia Sihova ʻa ʻetau fakaʻehiʻehi mei he ʻuli fakaeʻulungāanga ko ia ʻoku feinga ʻa e māmani ko ʻení ke ʻai ke hā ko e fakafiefia taʻeʻiai hano maumau.a

10, 11. Ko e hā ʻoku tau fili ai ha ʻalunga ʻo e talangofua kia Sihová, pea ko e hā ʻa e faʻahinga talangofua ʻoku tau fai kiate iá?

¹⁰ Ko e hā ʻa e ʻuhinga tefito ʻoku tau tauhi ai ʻa e ngaahi tuʻutuʻuni ʻa e ʻOtuá? Ko e hā ʻoku fiemaʻu ai ke tau moʻui ʻi he ʻaho taki taha ʻo fehoanaki mo e meʻa ʻoku tau ʻilo ko e anga ia ʻo e fakakaukau ʻa e ʻOtuá? ʻOku ʻikai ke tau fili ha ʻalunga peheé koeʻuhi pē ke hao ai mei ha tautea pe ke hao ai mei he ngaahi nunuʻa fakatupu maumau ʻoku hoko ki he faʻahinga ko ia ʻoku nau tukunoaʻi ʻa e finangalo ʻo e ʻOtuá. (Kaletia 6:7) ʻI hono kehé, ʻoku tau vakai ki he talangofua kia Sihová ko ha faingamālie mahuʻinga ia ke fakahāhā ai ʻetau ʻofa kiate iá. Hangē pē ko e vēkeveke ʻa ha kiʻi tama ke malimali loto-lelei ange ʻa ʻene tamaí, ʻoku pehē pē ʻetau loto ke hōifua mai ʻa Sihová. (Sāme 5:12) Ko ʻetau Tamai ia, pea ʻoku tau ʻofa ʻiate ia. ʻOku ʻikai ha toe meʻa te ne ʻomai kiate kitautolu ha fiefia lahi ange pe fiemālie lahi ange ka ko hono ʻiloʻi ʻoku tau moʻui ʻi ha founga ʻoku tau maʻu ai ʻa e “hōifua ʻa Sihová.”—Palovepi 12:2, NW.

¹¹ Ko ia, ko ʻetau talangofuá, ʻoku ʻikai ke fai fakapāpākū; pea ʻoku ʻikai ke filifili pe fai fakatuʻunga.b ʻOku ʻikai ke tau fai ia ʻi haʻatau fili, ʻo talangofua pē ʻi he taimi ʻoku faingamālié pe ʻi he taimi ʻoku siʻi pe ʻikai ai hano faingataʻá. ʻI hono kehé, ʻoku tau “talagofua mei he loto.” (Loma 6:17, PM) ʻOku tau ongoʻi ʻo hangē ko ia ko e tokotaha-tohi-saame ʻo e Tohi Tapú ʻa ia naʻá ne tohi: “Te u fakafiefia ʻi hoʻo ngaahi tuʻutuʻuni, he ʻoku ou ʻofa ai.” (Sāme 119:47) ʻIo, ʻoku tau lotoʻaki ke tau talangofua kia Sihova. ʻOku tau ʻiloʻi ʻokú ne tuha pea mo fiemaʻu mai ʻetau talangofua kakato mo ʻikai fai fakatuʻungá. (Teutalonome 12:32) ʻOku tau loto ke folofola ʻaki ʻe Sihova ʻo kau kiate kitautolu ʻa e meʻa ʻoku leaʻaki ʻe heʻene Folofolá kia Noá. ʻI he fekauʻaki mo e pēteliake faitōnunga ko iá, ʻa ia naʻá ne fakahaaʻi ʻa e ʻofa ki he ʻOtuá ʻaki ʻa e talangofua ʻi he ngaahi hongofuluʻi taʻu lahi, ʻoku pehē ʻe he Tohi Tapú: “Pea fai ʻe Noa; ʻilonga ha meʻa naʻe tuʻutuʻuni kiate ia ʻe he ʻOtua, naʻa ne fai ia.”—Senesi 6:22.

12. Ko fē ʻa e taimi ʻoku ʻoatu ai ʻe heʻetau talangofuá ʻa e fiefia ki he loto ʻo Sihová?

¹² ʻOku anga-fēfē ʻa e ongoʻi ʻa Sihova fekauʻaki mo ʻetau talangofua loto-leleí? ʻOku pehē ʻe heʻene Folofolá ʻoku tau ʻai ai hono ‘lotó ke fiefia.’ (Palovepi 27:11) ʻOku fakafiefiaʻi moʻoni ʻe heʻetau talangofuá ʻa e loto ʻo e ʻEiki Hau ʻo e ʻunivēsí? Ko e moʻoni ʻoku pehē, pea ʻi ha ʻuhinga lelei! Naʻe fakatupu kitautolu ʻe Sihova ʻi he tuʻunga ke tau fai ʻa e fili tauʻatāina. ʻOku lava ai ke tau fili ke talangofua ki he ʻOtuá, pe ko ʻetau fili ke talangataʻa kiate ia. (Teutalonome 30:15, 16, 19, 20) ʻI he taimi ʻoku tau fili loto-lelei ai ke talangofua kia Sihova pea ko e mālohi fakaueʻiloto ki he fili ko iá ko ha loto ʻoku fonu ʻi he ʻofa ki he ʻOtuá, ʻoku tau ʻoatu ai ʻa e fiemālie mo e fiefia lahi ki heʻetau Tamai fakahēvaní. (Palovepi 11:20) ʻOku tau toe fili ai ʻa e founga lelei taha ʻo e moʻuí.

“ʻOKU ʻIKAI KE FAKAMAFASIA ʻENE NGAAHI TUʻUTUʻUNI”

13, 14. Ko e hā ʻoku lava ai ke pehē ‘ʻoku ʻikai ke fakamafasia ʻa e ngaahi tuʻutuʻuni’ ʻa e ʻOtuá, pea ʻe anga-fēfē nai hano fakatātaaʻi ʻeni?

¹³ ʻOku tala mai kiate kitautolu ʻe he ʻapositolo ko Sioné ha meʻa mātuʻaki fakafiemālie fekauʻaki mo e ngaahi fiemaʻu ʻa Sihová: “ʻOku ʻikai ke fakamafasia ʻene ngaahi tuʻutuʻuni.” Ko e foʻi lea faka-Kalisi naʻe liliu ko e “fakamafasia” ʻi he 1 Sione 5:4 ʻoku ʻuhinga fakafoʻilea ko e “mamafa.”c ʻOku peheni hono fakalea ia ʻe ha liliu Tohi Tapu ʻe taha: “Oku ikai fakamamahi a ene gaahi fekau.” (1 Sione 5:3, PM) ʻOku ʻikai ke taʻefakapotopoto pe fakafeʻātungia ʻa e ngaahi fiemaʻu ʻa Sihová. ʻOku ʻikai ke fakalaka atu ʻene ngaahi laó mei he malava ʻa e faʻahinga taʻehaohaoa ʻo e tangatá ke talangofua ki aí.

¹⁴ ʻE lava ke tau fakatātaaʻi ia ʻi he foungá ni. ʻOku kole atu hao kaumeʻa ofi ke ke tokoni ange kiate ia ʻi heʻene fetukutuku ki ha ʻapi nofoʻanga ʻe taha. ʻOku lahi ʻa e ʻū puha ke ʻavé. ʻOku maʻamaʻa feʻunga pē ʻa e niʻihi ke toʻo fiemālie ʻe ha toko taha pē, ka ʻoku mamafa ʻa e niʻihi pea ʻoku fiemaʻu ia ke fua ʻe ha toko ua. ʻOku fili ʻe ho kaumeʻá ʻa e ngaahi puha ʻokú ne loto ke ke ʻavé. Te ne kole atu ke ke fua ʻa e ʻū puha ʻokú ne ʻiloʻi ʻoku fuʻu mamafa kiate koé? ʻIkai. Heʻikai te ne loto ke ke faingatāmaki ʻi he feinga ke fua toko taha iá. ʻI he tuʻunga meimei tatau, ʻoku ʻikai ke kole mai ʻe hotau ʻOtua ʻofa mo anga-leleí ke tau tauhi ha ngaahi tuʻutuʻuni ʻoku fuʻu faingataʻa ʻaupito ke fakahoko. (Teutalonome 30:11-14) Heʻikai ʻaupito te ne kole mai ke tau fua ha kavenga mamafa pehē. ʻOku mahinoʻi ʻe Sihova hotau ngaahi ngataʻangá, he “ʻoku ne ʻilo ʻe ia hota anga; ʻoku ne manatu ai pe ko e efu pe kitaua.”—Sāme 103:14.

15. Ko e hā ʻoku malava ai ke tau loto-pau ko e ngaahi tuʻutuʻuni ʻa Sihová ko ha lelei taha pē ia maʻatautolu?

¹⁵ ʻOku ʻikai ʻaupito fakamafasia ʻa e ngaahi tuʻutuʻuni ʻa Sihová; ʻoku hoko ia ko e lelei taha pē maʻatautolu. (Aisea 48:17) Ko ia naʻe malava ai ʻe Mōsese ke ne tala ki ʻIsileli ʻo e kuonga muʻá: “Naʻe fekau mai ʻe Sihova ke fai ʻa e ngaahi fekau ni kotoa, ke ʻapasia kia Sihova ko hotau ʻOtua, maʻa ʻetau lelei aipe, koeʻuhi ke ne fakahaofi moʻui kitautolu, ʻo hange ko ia he ʻaho ni.” (Teutalonome 6:24) ʻOku malava mo kitautolu ke tau loto-pau ko hono ʻomai ko ia ʻene ngaahi laó kiate kitautolú, ʻoku tokanga mai ʻa Sihova ki he meʻa ʻoku lelei taha kiate kitautolú—ko ha lelei fuoloa mo tuʻuloa. He ko e hā ka ne ʻomai ai ha meʻa ke tau tuʻutāmaki ai? Ko Sihová ko ha ʻOtua ʻo e poto taʻefakangatangata. (Loma 11:33) Ko ia ai, ʻokú ne ʻafioʻi ʻa e meʻa ʻoku lelei taha kiate kitautolú. Ko Sihová ko e toe fakasino mai ia ʻo e ʻofá. (1 Sione 4:8) Ko e ʻofá, ʻa hono natula tefitó, ʻokú ne tākiekina ʻa e meʻa kotoa pē ʻokú ne folofolaʻaki mo faí. Ko e makatuʻunga ia ki he ngaahi tuʻutuʻuni kotoa ʻokú ne tuku mai ki heʻene kau sevānití.

16. Neongo ʻa e ngaahi tākiekina ʻa e māmani ololalo ko ʻení pea mo e ngaahi hehema ʻa e kakano taʻehaohaoá, ko e hā ʻoku malava ai ke tau tuli ki ha ʻalunga talangofuá?

¹⁶ ʻOku ʻikai ke pehē ia heni ko e talangofua ki he ʻOtuá ko ha ʻalunga faingofua ke muimui ki ai. Kuo pau ke tau faitau mo e ngaahi tākiekina ʻa e māmani ololalo ko ʻení, ʻa ia “ʻoku ʻi he nima ʻo e Fili.” (1 Sione 5:19) Kuo pau ke tau toe fāinga mo e kakano taʻehaohaoá, ʻa ia ʻokú ne ʻai kitautolu ke tau hehema ke maumauʻi ʻa e ngaahi lao ʻa e ʻOtuá. (Loma 7:21-25) Ka ʻe malava ʻe heʻetau ʻofa ki he ʻOtuá ke ikuna. ʻOku faitāpuekina ʻe Sihova ʻa e faʻahinga ʻoku nau loto ke fakamoʻoniʻi ʻenau ʻofa kiate iá ʻaki ʻenau talangofuá. ʻOkú ne foaki hono laumālie māʻoniʻoní “kiate kinautolu ʻoku talangofua kiate ia.” (Ngāue 5:32) ʻOku fakatupu ʻe he laumālie ko iá ʻa e fua fakaʻofoʻofa ʻiate kitautolu—ʻa e ngaahi ʻulungāanga fisifisimuʻa ʻoku malava ke tokoni kiate kitautolu ʻi he tuli ki ha ʻalunga talangofuá.—Kaletia 5:22, 23.

17, 18. (a) Ko e hā te tau sivisiviʻi ʻi he tohí ni, pea ʻi heʻetau fai iá, ko e hā ʻoku totonu ke tau manatuʻí? (e) Ko e hā ʻe lāulea ki ai ʻi he vahe hoko maí?

¹⁷ ʻI he tohí ni, te tau sivisiviʻi ai ʻa e ngaahi tefitoʻi moʻoni mo e ngaahi tuʻunga ʻa Sihova ki he ʻulungāangá pea mo e ngaahi fakamatala kehe fekauʻaki mo hono finangaló. ʻI heʻetau fai iá, ʻoku ʻi ai ha ngaahi meʻa mahuʻinga ʻoku fiemaʻu ke tau manatuʻi. ʻAi ke tau manatuʻi ʻoku ʻikai ke fakamālohiʻi kitautolu ʻe Sihova ke tau talangofua ki heʻene ngaahi laó mo ʻene ngaahi tefitoʻi moʻoní; ʻokú ne fiemaʻu mai ʻa e talangofua loto-lelei ʻoku tupu mei hotau lotó. ʻOua naʻa ngalo ʻiate kitautolu ʻoku kole mai ʻe Sihova ke tau moʻui ʻi ha founga te tau maʻu ai ʻa e ngaahi tāpuaki lahi he taimí ni pea taki atu ki he moʻui taʻengata ʻi he kahaʻú. Pea ʻai ke tau vakai ki heʻetau talangofua loto-ʻaufuatoó—ko ha faingamālie mahuʻinga ia ke fakahāhā ai kia Sihova ʻa e lahi ʻo ʻetau ʻofa kiate iá.

¹⁸ Ke tokoni kiate kitautolu ke tau ʻilo ʻa e tonú mo e halá, kuo foaki anga-ʻofa mai ʻe Sihova kiate kitautolu ʻa e tufakanga ko e konisēnisí. Neongo ia, ke hoko hotau konisēnisí ko ha tataki alafalalaʻangá, ʻoku fiemaʻu ia ke akoʻi hangē ko ia ʻe lāulea ki ai ʻi he vahe hoko maí.

[Fakamatala ʻi lalo]

ʻE FĒFĒ HAʻO TALI?

▪ Ko e hā ʻa e faʻahinga talangofua ʻoku ʻamanekina ʻe Sihova mei heʻene kau lotú, pea ko e hā ko ha lelei taha ai pē eni maʻatautolú?—Teutalonome 5:28-33.

▪ ʻOku mafatukituki fēfē ʻa e vakai ʻa Sihova ki heʻetau talangofuá?—1 Samiuela 15:22, 23.

▪ Ko e hā ʻa e lēsoni ʻoku malava ke tau ako mei he anga ʻo e fakakaukau ʻa Sīsū ki he talangofua ki he ʻOtuá?—Sione 8:29.

▪ Ko e hā ko ha meʻa totonu ai pē ia ke tau talangofua kia Sihová?—Fakahā 4:11.

[Fakatātā peesi-kakato ʻi he peesi 4]

[Fakatātā ʻi he peesi 6]

ʻOku fakaʻilongaʻi ʻe he fakatapuí mo e papitaisó ʻa e kamataʻanga ʻo ha moʻui ʻo e talangofua ʻi he ʻofa kia Sihova