Vahe 8

ʻOku ʻOfa ʻa e ʻOtuá ʻi he Kakai Maʻá

“ʻI he feangai mo e taha ʻoku maʻá te ke fakahaaʻi koe ʻokú ke maʻa.”—SĀME 18:26, NW.

1-3. (a) Ko e hā ʻoku fakapapauʻi ai ʻe ha faʻē ʻoku maau mo maʻa ʻene kiʻi tamasiʻí? (e) Ko e hā ʻoku fiemaʻu ai ʻe Sihova ʻene kau lotú ke nau maʻá, pea ko e hā ʻokú ne ueʻi kitautolu ke tau tauhi kitautolu ke maʻá?

ʻOKU teuteuʻi ʻe ha faʻē ʻene kiʻi tamasiʻí ke ʻalu ki ha feituʻu. ʻOkú ne fakapapauʻi ʻoku kaukau ʻa e kiʻi tamasiʻí pea ʻoku maau mo maʻa hono valá. ʻOku lāuʻilo ʻa e faʻeé ʻoku mātuʻaki mahuʻinga ʻa e maʻá ki he moʻuilelei ʻa e kiʻi tamasiʻí. ʻOkú ne toe lāuʻilo ʻoku tapua atu ʻe he fōtunga hā mai ʻo ʻene kiʻi tamasiʻí ʻa ʻene ongo mātuʻá.

² ʻOku fiemaʻu mai ʻe Sihova, ko ʻetau Tamai fakahēvaní, ʻa ʻene kau sevānití ke nau maʻa. ʻOku pehē ʻe heʻene Folofolá: “ʻI he feangai mo e taha ʻoku maʻá te ke fakahaaʻi koe ʻokú ke maʻa.”a (Sāme 18:26, NW) ʻOku ʻofa ʻa Sihova ʻiate kitautolu; ʻokú ne ʻafioʻi ko e maʻá ko e meʻa lelei taha ia kiate kitautolú. ʻOkú ne toe ʻamanekina meiate kitautolu ko ʻene Kau Fakamoʻoní ke tau tapua lelei atu ia. Ko e moʻoni, ko ʻetau hā maʻá mo e ʻulungāanga leleí ʻe ʻoatu ai ʻa e lāngilangi, ʻikai ko e luma kia Sihova mo hono huafa māʻoniʻoní.—Isikeli 36:22; 1 Pita 2:12.

³ Ko hono ʻiloʻi ʻoku ʻofa ʻa e ʻOtuá ʻi he kakai maʻá ʻoku ueʻi ai kitautolu ke tau tauhi maʻu pē ke tau maʻa. ʻOku tau fiemaʻu ʻetau founga moʻuí ke ʻoatu ai ʻa e lāngilangi kiate ia koeʻuhi ʻoku tau ʻofa ʻiate ia. ʻOku tau toe fiemaʻu ke tau nofo maʻu ʻi heʻene ʻofá. Ko ia ai, tau sivisiviʻi angé ʻa e ʻuhinga ʻoku fiemaʻu ai ke tau tauhi kitautolu ke tau maʻá, ko e hā ʻoku kau ki he hoko ʻo maʻá, pea mo e founga ʻe lava ke tau tauhi ai kitautolu ke tau maʻá. ʻE lava ʻe he sivisiviʻi peheé ʻo tokoniʻi kitautolu ke tau sio pe ʻoku ʻi ai ha ngaahi tafaʻaki ʻoku fiemaʻu ke tau fai ai ha fakalelei.

KO E HĀ ʻOKU FIEMAʻU AI KE TAU MAʻÁ?

4, 5. (a) Ko e hā ʻa e ʻuhinga tefito ʻoku fiemaʻu ai ke tau tauhi kitautolu ke tau maʻá? (e) ʻOku anga-fēfē ʻa e hā mahino ʻa e maʻa ʻa Sihová ʻi heʻene ngaahi fakatupu hā maí?

⁴ Ko e founga ʻe taha ʻoku tataki ai kitautolu ʻe Sihová ʻoku fakafou ʻi he faʻifaʻitakiʻanga. ʻOku enginaki mai ʻene Folofolá kiate kitautolu ke tau “hoko muʻa ko e kau faʻifaʻitaki ki he ʻOtua.” (Efeso 4:32 [Ef 5:1, PM]) Ko e ʻuhinga tefito ʻeni ʻoku fiemaʻu ai ke tau tauhi kitautolu ke tau maʻá: Ko Sihova, ʻa e ʻOtua ʻoku tau lotu ki aí, ʻoku maʻa, haohaoa mo māʻoniʻoni ʻi he tafaʻaki kotoa pē.—Livitiko 11:44, 45.

⁵ Ko e maʻa ʻa Sihová, hangē ko e konga lahi fau ʻo hono ngaahi ʻulungāangá mo ʻene ngaahi foungá, ʻoku hā mahino ia ʻi heʻene ngaahi fakatupu hā maí. (Loma 1:20) Naʻe faʻu ʻa e foʻi māmaní ke hoko ko ha ʻapi maʻa maʻá e faʻahinga ʻo e tangatá. Kuo fokotuʻu ki ai ʻe Sihova ʻa e ngaahi feviloʻaki fakaeʻātakai ʻa ia ʻoku fakamaʻa ai ʻa e ʻeá mo e vaí. ʻOku ʻi ai ha faʻahinga siemu ʻoku nau ngāue ʻo hangē ha potungāue fakamaʻá, ʻo nau liliu ʻa e kinohaʻá ʻo hoko ko e ngaahi meʻa ʻoku ʻikai fakatuʻutāmaki. Kuo ngāueʻaki ʻe he kau saienisí ʻa e niʻihi ʻo e fanga kiʻi meʻamoʻui valevale hālofiá ni ke nau fakamaʻa ʻa e lolo ʻoku mahua holó mo e ngaahi fakaʻuliʻi kehe kuo fakatupunga ʻe he siokita mo e mānumanu ʻa e tangatá. ʻOku hā mahino ai, ko e maʻá ʻoku mahuʻinga ia ki heʻene “ʻAfio naʻa ne ngaohi ʻa e fonua.” (Selemaia 10:12) ʻOku totonu ke toe mahuʻinga ia kiate kitautolu.

6, 7. Naʻe anga-fēfē hono fakamamafaʻi ʻe he Lao ʻa Mōsesé ʻa hono fiemaʻu ʻa e maʻá mei he faʻahinga ko ia naʻe lotu kia Sihová?

⁶ Ko e toe ʻuhinga ʻe taha ʻoku fiemaʻu ai ke tau tauhi kitautolu ke tau maʻá ko hono fiemaʻu mai ʻe Sihova, ko hotau Pule Fakalevelevá, ke maʻa ʻa ʻene kau lotú. ʻI he malumalu ʻo e Lao naʻe ʻoange ʻe Sihova ki ʻIsilelí, naʻe ʻikai ala fakamavaheʻi ʻa e maʻá mo e lotú. Naʻe fakapapauʻi ʻe he Laó ko e ʻAho ʻo e Fakaleleí, naʻe pau ke kaukau ai ʻa e taulaʻeiki lahí ʻo ʻikai tuʻo taha pē kae tuʻo ua. (Livitiko 16:4, 23, 24) Naʻe fiemaʻu ki he kau taulaʻeiki ʻoku fai fatongiá ke nau fanofano honau nimá mo fufulu honau vaʻé ki muʻa ke nau ʻohake ʻa e ngaahi feilaulau kia Sihová. (Ekisoto 30:17-21; 2 Kalonikali 4:6) Naʻe fakahaaʻi ʻi he Laó ʻa e ngaahi tupuʻanga ʻe 70 nai ʻo e taʻemaʻa fakasinó mo e ʻuli fakaeouaú. ʻI he lolotonga ʻo e ʻi ha tuʻunga taʻemaʻa, naʻe ʻikai malava ai ʻe ha ʻIsileli ke kau ʻi he lotú—pea ʻi ha tuʻunga ʻe niʻihi, naʻe lava ke tautea mate ai ia. (Livitiko 15:31) Ka fakafisi ha taha ke fou ʻi he founga fakamaʻa naʻe fiemaʻú, ʻo kau ai hono kaukauʻi hono sinó mo fō hono valá, naʻe pau ke ‘tuʻusi ia mei he lotolotonga ʻo e fakatahá.’—Nomipa 19:17-20.

⁷ Neongo ʻoku ʻikai ke tau ʻi he malumalu ʻo e Lao ʻa Mōsesé, ʻoku ʻomai ai kiate kitautolu ha fakamaama ki he fakakaukau ʻa e ʻOtuá ʻi he meʻá ni. ʻOku hā mahino, naʻe fakamamafaʻi ʻe he Laó ʻa hono fiemaʻu ʻa e maʻá mei he faʻahinga ko ia naʻa nau lotu ki he ʻOtuá. Kuo ʻikai ke liliu ʻa Sihova. (Malakai 3:6) Heʻikai lava ke ne tali ʻetau lotu ʻoku faí kae ʻoua kuo “maʻa mo taʻe hano ʻuli.” (Semisi 1:27) ʻOku fiemaʻu ai ke tau ʻiloʻi ʻa e meʻa ʻokú ne ʻamanekina meiate kitautolu ʻi he meʻá ni.

MEʻA ʻOKU KAU KI HE HOKO ʻO MAʻA ʻI HE ʻAFIO MAI ʻA E ʻOTUÁ

 8. ʻI he ngaahi tafaʻaki fē ʻoku ʻamanekina mai ʻe Sihova ke tau tauhi ai kitautolu ke tau maʻá?

⁸ ʻI he Tohi Tapú, ko e foʻi fakakaukau ki he hoko ʻo maʻá ʻoku ʻuhinga ia ki he meʻa lahi ange ʻo ʻikai ko e maʻa fakasinó pē. Ko e hoko ʻo maʻa ʻi he ʻafio mai ʻa e ʻOtuá ʻoku kaunga ia ki he ngaahi tafaʻaki kotoa pē ʻo ʻetau moʻuí. ʻOku ʻamanekina mai ʻe Sihova ke tau tauhi kitautolu ke tau maʻa ʻi he ngaahi tafaʻaki tefito ʻe fā—fakalaumālie, fakaeʻulungāanga, fakaefakakaukau mo e fakasino. Tau lāulea angé ki he meʻa ʻoku kau ki he tafaʻaki taki taha.

9, 10. Ko e hā ʻoku ʻuhinga ki ai ʻa hono tauhi kitautolu ke tau maʻa fakalaumālié, pea ko e hā ʻoku fakaʻehiʻehi mei ai ʻa e kau Kalisitiane moʻoní?

⁹ Maʻa fakalaumālie. ʻI hono fakamatalaʻi mahinó, ko e tauhi ke maʻa fakalaumālié ʻoku ʻuhinga iá ke ʻoua ʻe fio ʻa e lotu moʻoní mo e lotu loí. ʻI he taimi naʻe mavahe ai ʻa e kau ʻIsilelí mei Pāpilone ke nau foki ki Selusalemá, naʻe fiemaʻu ke nau talangofua ki he enginaki fakamānavaʻí ni: “Hu atu mei hena, ʻoua ʻe ala ki he meʻa taʻemaʻa; . . . ʻai ke mou maʻa.” (Aisea 52:11) Ko e ʻuhinga tefito ʻo e toe foki ʻa e kau ʻIsilelí ke toe fakafoki mai ʻa e lotu kia Sihová. Ko e lotu ko iá naʻe pau ke maʻa—ʻo ʻikai ʻuliʻi ʻe ha ngaahi akonaki taʻefakalāngilangiʻi ʻOtua, ngaahi tōʻonga mo e ngaahi anga ʻo e lotu faka-Pāpiloné.

¹⁰ ʻI he ʻahó ni, ko kitautolu ʻi he tuʻunga ko e kau Kalisitiane moʻoní kuo pau ke tau tokanga ke ʻoua naʻa hoko ʻo ʻuliʻi kitautolu ʻe he lotu loí. (1 Kolinito 10:21) ʻOku fiemaʻu ʻa e tokangá ʻi he meʻá ni, he ʻoku takatakai kiate kitautolu ʻa e tākiekina ʻa e lotu loí. ʻI he ngaahi fonua lahi, ʻoku ʻi ai ʻa e ngaahi talatukufakaholo kehekehe, ngaahi meʻa ʻoku fai mo e ngaahi ouau ʻoku fekauʻaki mo e ngaahi akonaki fakalotu loi, hangē ko e foʻi fakakaukau ko ia ʻoku ʻi ai ha meʻa ʻi loto ʻiate kitautolu ʻoku moʻui atu ia ʻi he maté. (Koheleti 9:5, 6, 10) ʻOku fakaʻehiʻehi ʻa e kau Kalisitiane moʻoní mei he ngaahi tōʻonga ʻoku fekauʻaki mo e ngaahi tui fakalotu loí.b Heʻikai te tau fakaʻatā ha tenge mei he niʻihi kehé ke ne fakatupunga kitautolu ke tau fakangaloku ʻa e ngaahi tuʻunga ʻa e Tohi Tapú ki he lotu maʻá.—Ngāue 5:29.

11. Ko e hā ʻoku kau ki he maʻa fakaeʻulungāangá, pea ko e hā ʻoku mahuʻinga ai ke tau tauhi kitautolu ke tau maʻa ʻi he tafaʻaki ko ʻení?

¹¹ Maʻa fakaeʻulungāanga. Ke tauhi ke maʻa fakaeʻulungāangá ʻoku kau ki ai ʻa e fakaʻehiʻehi mei ha faʻahinga fehokotaki fakasino taʻetaau pē. (Efeso 5:4 [Ef 5:5, PM]) ʻOku mahuʻinga ke tau nofo maʻa fakaeʻulungāanga. Hangē ko ia te tau sio ki ai ʻi he vahe hoko mai ʻo e tohí ni, ke nofo maʻu ʻi he ʻofa ʻa e ʻOtuá, kuo pau ke tau ‘hola mei he fai feʻauakí.’ Ko e kau feʻauaki taʻefakatomalá “ʻe ʻikai hanau tofiʻa ʻi he Puleʻanga ʻo e ʻOtua.” (1 Kolinito 6:9, 10, 18) ʻI he ʻafio mai ʻa e ʻOtuá, ko e faʻahinga peheé ʻoku nau ʻi he haʻohaʻonga ʻo e faʻahinga ko ia ʻoku “fakalieliaʻia.” Kapau ʻoku ʻikai te nau tauhi ʻa e maʻa fakaeʻulungāangá, “te nau ʻinasi ʻi he . . . mate ʻangaua.”—Fakahā 21:8.

12, 13. Ko e hā ʻa e fekauʻaki ʻa e ngaahi fakakaukaú mo e ngaahi ngāué, pea ʻe lava fēfē ke tau tauhi kitautolu ke tau maʻa fakaefakakaukau?

¹² Maʻa fakaefakakaukau. ʻOku taki atu ʻa e ngaahi fakakaukaú ki he ngaahi ngāue. Kapau ʻoku tau fakaʻatā ʻa e ngaahi fakakaukau halá ke nofo ʻi hotau ʻatamaí mo hotau lotó, ʻoku mātuʻaki ngalingali te tau fai leva ha ngaahi ngāue taʻemaʻa. (Mātiu 5:28; 15:18-20) Ka ʻo kapau ʻoku tau fakafonu hotau ʻatamaí ʻaki ha ngaahi fakakaukau maʻa, ʻe lava ke ueʻi ai kitautolu ke tauhi maʻu ha ʻulungāanga ʻoku maʻá. (Filipai 4:8) ʻE lava fēfē ke tau tauhi kitautolu ke tau maʻa fakaefakakaukau? Ko e meʻa ʻe taha, ʻoku fiemaʻu ke tau fakaʻehiʻehi mei ha faʻahinga fakafiefia pē ʻe lava ke ne fakaʻuliki ʻetau fakakaukaú.c ʻIkai ko ia pē, ʻe lava ke tau fakafonu hotau ʻatamaí ʻaki ha ngaahi fakakaukau maʻa ʻaki hono ako maʻu pē ʻa e Folofola ʻa e ʻOtuá.—Sāme 19:8, 9.

¹³ Ke nofo maʻu ʻi he ʻofa ʻa e ʻOtuá, ʻoku mātuʻaki fiemaʻu ke tau tauhi kitautolu ke tau maʻa fakalaumālie, fakaeʻulungāanga mo fakaefakakaukau. Ko e ngaahi tafaʻaki ko ʻeni ʻo e maʻá ʻoku lāulea kakato ange ki ai ʻi he ngaahi vahe kehe ʻo e tohí ni. Tau sivisiviʻi heni ʻa e tafaʻaki hono faá—ʻa e maʻa fakasinó.

ʻE LAVA FĒFĒ KE TAU MAʻA FAKASINO?

14. Ko e hā ʻoku ʻikai ko ha meʻa fakafoʻituitui ai pē ʻa e maʻa fakasinó?

¹⁴ ʻOku kau ki he maʻa fakasinó ʻa hono tauhi hotau sinó mo e ngaahi ʻātakaí ke maʻa. Ko ha meʻa fakafoʻituitui pē ʻa e maʻa ia ko iá ʻo ʻikai totonu ke kau mai ai ha taha kehe? Heʻikai pehē ia ʻi he fekauʻaki mo e kau lotu ʻa Sihová. Hangē ko ia kuo tau ʻosi lāuʻilo ki aí, ʻoku mahuʻinga kia Sihova ʻa e maʻa fakasinó ʻo ʻikai koeʻuhí pē ko e meʻa lelei ʻaupito ia kiate kitautolu ka koeʻuhi foki ʻoku tau tapua atu Ia. Fakakaukau atu ki he fakatātā naʻe ngāueʻaki ʻi he kamatá. Ko e sio ki ha kiʻi tama ʻoku ʻuli maʻu pē pe taʻemāú ʻokú ne ʻai koe ke ke fifili fekauʻaki mo ʻene ongo mātuʻá, ʻikai ko ia? Heʻikai ke tau loto ke ʻi ai ha faʻahinga meʻa fekauʻaki mo hotau fōtungá pe ko ʻetau founga moʻuí ke tupu ai ha luma ki heʻetau Tamai fakahēvaní pe ke fakamāʻulaloʻi ai ʻa e pōpoaki ʻoku tau malangaʻí. ʻOku pehē ʻe he Folofola ʻa e ʻOtuá: “Ke oua naa ai ha tūkiaaga i ha mea e taha, koeuhi ke oua naa fakaogokovi ae gaue: Ka mau fakaogolelei atu akimautolu i he gaahi mea kotoabe, o tāu moe kau faifekau ae Otua.” (2 Kolinito 6:3, 4, PM) ʻE lava fēfē leva ke tau tauhi ke tau maʻa fakasino?

15, 16. Ko e hā ʻoku kau ʻi he tōʻongaleleiʻaki ʻa e fakamaʻá, pea ko e hā ʻa e tuʻunga ʻoku totonu ke ʻi ai hotau valá?

¹⁵ Ko ʻetau maʻa fakafoʻituituí mo e fōtunga hā maí. Neongo ko e ngaahi tōʻonga mo e ngaahi tuʻunga ʻo e moʻuí ʻoku kehekehe mei he fonua ki he fonua, ʻoku tau malava ʻi he tuʻunga fakalūkufuá ke maʻu ʻa e koa mo e vai feʻunga ke kaukau maʻu pē mo fakapapauʻi ʻoku tau maʻa mo ʻetau fānaú. Ko e tōʻongaleleiʻaki ʻa e fakamaʻá ʻoku kau ki ai ʻa e fanofano hotau nimá ʻaki ʻa e koa mo e vai ki muʻa ʻi he kaí pe ʻi he ngāue ki he meʻakaí, hili hono ngāueʻaki ʻa e falemālōloó, pea mo e hili hono kaukauʻi pe fetongi ʻo ha pēpē. Ko hono fanofano ʻo e nimá ʻaki ʻa e koá mo e vaí ʻoku lava ke taʻofi ai ʻa e puké pea fakahaofi moʻoni ai ʻa e moʻuí. ʻOku lava ke taʻofi ai ʻa e mafola ʻa ha ngaahi vailasi mo e siemu fakatupu maumaú, ʻo tokoniʻi ai ʻa e kakaí ke nau hao mei he mahaki fakalelé. ʻI he ngaahi fonua ʻa ia ʻoku ʻikai ke ngāueʻaki lahi ai ʻa e falemālōlō pālangí, ʻoku lava nai ke fakaʻauha ʻa e kinohaʻá ʻaki hono tanu, hangē ko ia naʻe fai ʻi ʻIsileli ʻo e kuonga muʻá.—Teutalonome 23:12, 13.

¹⁶ ʻOku toe fiemaʻu foki ke fō maʻu pē hotau valá ke maʻa mo matamatalelei. ʻOku ʻikai fiemaʻu ki he Kalisitiané ia ke ne ʻai ha vala totongi mamafa pe ko e ākenga fakamuimui tahá, ka ʻoku totonu ke maau, maʻa mo fakanānā. (1 Timote 2:9, 10) Tatau ai pē pe ko fē ʻoku tau ʻi aí, ʻoku tau fiemaʻu hotau fōtunga hā maí ke “fakaogolelei [ai] ae akonaki oe Otua.”—Taitusi 2:10, PM.

17. Ko e hā ʻoku totonu ai ke maʻa mo matamatalelei hotau ʻapí mo e ngaahi meʻa takatakai aí?

¹⁷ Ko hotau ʻapí mo e ngaahi meʻa takatakai aí. ʻOku ʻikai nai ke hā masani pe nāunauʻia hotau ʻapí, ka ʻoku totonu ke maʻa mo matamatalelei ʻo fakatatau ki he ngaahi tuʻunga ʻoku tau ʻi aí. Pehē foki, kapau ʻoku tau ngāueʻaki ha meʻalele ke fononga ai ki he ngaahi fakataha ʻi he ngāue fakamalangá, ʻe lava ke tau fai ʻetau lelei tahá ke tauhi ia ke maʻa feʻunga, ʻi loto mo tuʻa. ʻAi ke ʻoua naʻa ngalo ko e maʻa ʻa e ʻapí mo e ngaahi meʻa takatakai aí ko ha fakamoʻoni lelei ia. He ko ē, ʻoku tau akoʻi ki he kakaí ko Sihová ko ha ʻOtua maʻa, ʻa ia te ne “fakaʻauha ʻakinautolu ʻoku fakaʻauha ʻa e fonua,” pea ko hono Puleʻangá ʻe vavé ni ke ne liliu hotau ʻapi fakaemāmaní ko ha palataisi. (Fakahā 11:18; Luke 23:43) Ko hono moʻoní ʻoku tau fiemaʻu ʻa e fōtunga hotau ʻapí mo e ngaahi meʻa ʻoku tau maʻú ke nau fakahaaʻi atu ki he niʻihi kehé naʻa mo e taimí ni ʻoku tau fakatupulekina ʻa e ngaahi tōʻonga maʻa ko ia ʻe tali ʻi he māmani foʻou ʻoku teu hoko maí.

18. ʻE lava fēfē ke tau fakahāhā ʻa e fakaʻapaʻapa ki hotau Fale Fakatahaʻangá?

¹⁸ Ko hotau feituʻu faiʻanga lotú. ʻOku ueʻi kitautolu ʻe heʻetau ʻofa kia Sihová ke tau fakahāhā ʻa e fakaʻapaʻapa ki hotau Fale Fakatahaʻangá, ko ha senitā ʻo e lotu moʻoní ʻi he feituʻú. ʻI he taimi ʻoku haʻu ai ʻa e faʻahinga foʻoú ki he fale fakatahaʻangá, ʻoku tau fiemaʻu ke nau ongoʻi lelei fekauʻaki mo ʻetau faiʻanga fakatahá. ʻOku fiemaʻu ʻa hono fakamaʻa mo monomono tuʻu maʻu koeʻuhi ke fakapapauʻi ʻoku kei hā lelei ai pē mo fakaʻofoʻofa ʻa e fale fakatahaʻangá. ʻOku tau fakahāhā ʻa e fakaʻapaʻapa ki hotau Fale Fakatahaʻangá ʻaki hono fai ʻa e meʻa te tau malavá ke tauhi ia ʻi he tuʻunga lelei. Ko ha monū ia ke foaki atu hotau taimí ke tokoni ʻi hono fakamaʻa mo hono ‘monomono mo ngaohi’ hotau feituʻu faiʻanga lotú. (2 Kalonikali 34:10) ʻOku ngāueʻaki ʻa e tefitoʻi moʻoni tatau ʻi he taimi ʻoku tau fakataha ai ʻi ha Holo ʻAsemipilī pe ko ha toe fale kehe ki he ngaahi ʻasemipilií pe ngaahi fakataha-lahí.

FAKAMAʻA KITAUTOLU MEI HE NGAAHI TŌʻONGA MO E NGAAHI NGĀUE ʻULÍ

19. Ke tauhi kitautolu ke tau maʻa fakasino, ko e hā ʻoku fiemaʻu ke tau fakaʻehiʻehi mei aí, pea ʻoku anga-fēfē hono tokoniʻi kitautolu ʻe he Tohi Tapú ʻi he meʻá ni?

¹⁹ Ke tauhi kitautolu ke tau maʻa fakasino, ʻoku fiemaʻu ke tau fakaʻehiʻehi mei he ngaahi tōʻonga mo e ngaahi ngāue ʻulí, hangē ko e ifi tapaká, ngāuekoviʻaki ʻo e ʻolokaholó, ngāue taʻetotonuʻaki ʻo e ngaahi meʻa ʻokú ne maʻunimā kita pe fakakehe-ʻatamai. ʻOku ʻikai ke tuhuʻi pau mai ʻe he Tohi Tapú ia ʻa e kotoa ʻo e ngaahi tōʻonga mo e ngaahi ngāue taʻemaʻa mo fakalielia ʻa ē ʻoku failahia ʻi he ʻaho ní, ka ʻoku ʻi ai ʻa e ngaahi tefitoʻi moʻoni ʻoku nau fakamafeia kitautolu ke tau mahinoʻi ʻa e anga ʻo e ongoʻi kuo pau ʻoku maʻu ʻe Sihova fekauʻaki mo e ngaahi meʻa peheé. Koeʻuhi ko ʻetau ʻiloʻi ʻa e anga ʻo e vakai ʻa Sihova ʻi ha ngaahi meʻa, ʻoku ueʻi ai kitautolu ʻe heʻetau ʻofa kiate iá ke tau laka ʻi he ʻalunga ʻoku fakahōifua kiate iá. Tau lāulea angé ki ha ngaahi tefitoʻi moʻoni Fakatohitapu ʻe nima.

20, 21. Ko e hā ʻa e faʻahinga tōʻonga ʻoku fiemaʻu mai ʻe Sihova ke tau ʻatā mei aí, pea ko e hā ʻa e ʻuhinga mālohi ʻoku tau maʻu ke tau talangofua aí?

²⁰ “Siʻoku ʻofaʻanga, heʻetau maʻu ha ngaahi palomesi pehe fau, tau fakamaʻa kitautolu mei he ʻuli kotoa pe ʻo e kakano mo e loto, ʻo tau fakakakato ʻetau maʻoniʻoni ʻi he ʻapasia ki he ʻOtua.” (2 Kolinito 6:19 [2Ko 7:1, PM]) ʻOku fiemaʻu mai ʻe Sihova ke tau ʻatā mei he ngaahi tōʻonga ʻoku ʻuliʻi ai hotau sino fakakakanó pea maumau ai hotau laumālié, pe hehema fakaefakakaukau tefitó. Ko ia ai, kuo pau ke tau fakaʻehiʻehi mei he ngaahi tōʻonga fakatupu maʻunimā ʻoku ʻiloa ʻene fakatupu maumau ki he moʻuilelei fakasinó mo fakaeʻatamaí.

²¹ ʻOku ʻomai ʻe he Tohi Tapú ha ʻuhinga mālohi ke tau “fakamaʻa kitautolu mei he ʻuli kotoa pe.” Fakatokangaʻi ʻoku kamataʻaki ʻe he 2 Kolinito 6:19 ʻene pehē: “Heʻetau maʻu ha ngaahi palomesi pehe fau.” Ngaahi palōmesi fē? Hangē ko ia ʻoku lave ki ai ʻi he ongo veesi ki muʻa aí, ʻoku palōmesi mai ʻa Sihova: “Te u maʻu kimoutolu ʻe au, pea te u nofo atu maʻamou tamai.” (2 Kolinito 6:17, 18) Sioloto atu ā: ʻOku palōmesi mai ʻa Sihova te ne maluʻi koe pea mo ʻofaʻi koe ʻo hangē ko ia ʻoku fai ʻe ha tamai ki hano foha pe ʻofefine. Ka ʻe toki fakahoko pē ʻe Sihova ʻa e ngaahi palōmesi ko ʻení kapau te ke fakaʻehiʻehi mei he ngaahi ʻuli ʻo e “kakano mo e loto.” Ko ia, he fakavalevale ē ke fakaʻatā ha faʻahinga anga pe tōʻonga fakalielia ke ne toʻo atu meiate koe ha vahaʻangatae mahuʻinga mo vāofi pehē mo Sihova!

22-25. Ko e hā ʻa e ngaahi tefitoʻi moʻoni Fakatohitapu ʻe lava ke tokoni kiate kitautolu ke tau fakaʻehiʻehi ai mei he ngaahi anga mo e tōʻonga taʻemaʻá?

²² “Te ke ʻofa ki he ʻEiki ko ho ʻOtua, ʻo fai ʻaki ʻa e kotoa ʻo ho loto, mo e kotoa ʻo ho laumalie, mo e kotoa ʻo ho ʻatamai.” (Mātiu 22:37) Naʻe filiʻi ʻe Sīsū ʻa e tuʻutuʻuni ko ʻení ko e tuʻutuʻuni lahi tahá ia. (Mātiu 22:38) ʻOku tuha moʻoni ʻa Sihova mo e ʻofa pehē meiate kitautolu. Ke ʻofa kiate ia ʻaki ʻa e kotoa ʻo hotau lotó, laumālié mo e ʻatamaí, kuo pau ke tau fakaʻehiʻehi mei he ngaahi tōʻonga ʻoku malava ke ne fakanounou ʻetau moʻuí pe fakatuaiʻi ʻetau ngaahi malava fakaefakakaukau kuo foaki mai ʻe he ʻOtuá.

²³ “[Ko Sihova ʻokú ne] foaki mai kiate kitautolu fulipe ʻa e moʻui, mo e manava, mo e meʻa kotoa pe!” (Ngāue 17:24, 25) Ko e moʻuí ko ha meʻaʻofa mei he ʻOtuá. ʻOku tau ʻofa ʻi he Tokotaha-Foakí, ko ia ʻoku tau loto ai ke tau fakahāhā ʻa e fakaʻapaʻapa ki he meʻaʻofá. ʻOku tau fakaʻehiʻehi mei ha faʻahinga anga pe tōʻonga ʻoku fakatupu maumau ki heʻetau moʻuileleí, he ʻoku tau ʻilo ko e ngaahi tōʻonga peheé ʻoku hā mei ai ha taʻefakaʻapaʻapa lahi ki he meʻaʻofa ko e moʻuí.—Sāme 36:9.

²⁴ “Te ke ʻofa ki ho kaungaʻapi ʻo hange ko hoʻo ʻofa kiate koe.” (Mātiu 22:39) Ko e ngaahi anga pe tōʻonga taʻemaʻá ʻoku nau faʻa uesia ʻo ʻikai ngata pē ʻi he tokotaha ʻokú ne fai iá kae toe pehē foki ki he faʻahinga takatakai ʻiate iá. Ko e fakatātaá, ko e ʻahuʻi-tapaka mei he tokotaha ifi tapaká ʻoku lava ke ne toe uesia mo e faʻahinga ʻikai ifi tapaka ʻoku ofi atu aí. Ko ha taha ʻokú ne uesia ʻa e faʻahinga takatakai ʻiate iá ʻokú ne maumauʻi ʻa e fiemaʻu fakaʻotua ke tau ʻofa ki hotau kaungāʻapí. ʻOkú ne toe fakaʻikaiʻi ai haʻane taukaveʻi pē ʻokú ne ʻofa ʻi he ʻOtuá.—1 Sione 4:20, 21.

²⁵ “Ke nau anganofo ki he ngaahi pule maʻolunga, mo e ngaahi tuʻunga; ke nofo talangofua pe.” (Taitusi 3:1) ʻI he ngaahi fonua lahi, ko hono maʻu pe ngāueʻaki ʻo ha faʻahinga faitoʻo kona tapu ko ha maumauʻi ia ʻo e laó. ʻI he tuʻunga ko e kau Kalisitiane moʻoní, ʻoku ʻikai te tau maʻu pe ngāueʻaki ha ngaahi faitoʻo kona tapu taʻefakalao.—Loma 13:1.

26. (a) Ke nofo maʻu ʻi he ʻofa ʻa e ʻOtuá, ko e hā ʻoku fiemaʻu ke tau faí? (e) Ko e hā ko e founga moʻui lelei tahá ai ʻa e tauhi ke tau maʻa ʻi he ʻafio mai ʻa e ʻOtuá?

²⁶ Ke nofo maʻu ʻi he ʻofa ʻa e ʻOtuá, ʻoku fiemaʻu ke tau tauhi kitautolu ke tau maʻa, ʻo ʻikai ʻi he tafaʻaki pē ʻe taha pe ua ka ʻi he ngaahi tafaʻakí kotoa. Ko hono siʻaki mo tauhi ke ʻatā mei he ngaahi anga mo e tōʻonga ʻoku ʻulí ʻoku ʻikai nai ke faingofua, ka ʻoku malava.d Ko hono moʻoní, ko e founga lelei taha pē ʻeni ʻo e moʻuí, he ʻoku akoʻi maʻu pē ʻe Sihova kitautolu ki ha lelei pē maʻatautolu. (Aisea 48:17) Ko e meʻa mahuʻinga tahá, ʻi hono tauhi ke tau maʻá ʻoku lava ai ke tau maʻu ʻa e fiemālie ʻi hono ʻiloʻi ʻoku tau tapua lelei atu ai ʻa e ʻOtua ʻoku tau ʻofa aí, ʻo tau nofo maʻu ai ʻi heʻene ʻofá.

[Fakamatala ʻi lalo]

[Fehuʻi ki he Ako]

[Puha/Fakatātā ʻi he peesi 94]

ʻOKU OU FAITAU KE FAI ʻA E MEʻA ʻOKU TONÚ?

Tefitoʻi moʻoni: “Oku ou tautea hoku jino, o fakamoulaloaʻi ia: telia naa ai ha mea, oka hili eku malaga ki he kakai, teu hoko ai au koe liaki.”—1 Kolinito 9:27, PM.

Ngaahi fehuʻi ke ʻeke hifo kiate koe

▪ ʻI heʻeku ongoʻi pē ha holi mālohi ke kau ʻi ha tōʻonga ʻuli, ʻoku ou lotu ʻo kole ʻa e laumālie ʻo e ʻOtuá ke tokoniʻi au ke u talitekeʻi ʻa e foʻi ongo ko iá?—Mātiu 6:13.

▪ ʻOku anga-fēfē hono hanga ʻe he kakai ʻoku ou feohi mo iá, ngaahi faiva ʻoku ou mamata aí, mo e fasi ʻoku ou fanongo aí ʻo uesia ʻeku fakapapau ke hanganaki ʻataʻatā mei he ngaahi tōʻonga koví?—1 Pita 4:3, 4.

▪ Ko e hā ʻoku ʻikai fakatonuhiaʻi ai ha tōʻonga faihala ʻi hono fai ha ngaahi ngāue leleí?—Mātiu 23:25-28.

▪ Ko e hā ʻoku ou loto-lelei ai ke faingataʻaʻia ʻi he founga tatau naʻe faingataʻaʻia ai ʻa Sīsū koeʻuhi ko hono fai ʻa e finangalo ʻo e ʻOtuá?—1 Pita 2:21; 4:1.

▪ ʻE anga-fēfē ʻeku fakamatalaʻi ki ha taha ʻa e ʻuhinga ʻoku ou fili ai ke ʻoua te u ifi tapaká?—Loma 12:1, 2.

▪ ʻOku ou lāuʻilo ko ha toe kiʻi tō ʻo fai ha tōʻonga taʻemaʻa ʻoku ʻikai ʻuhinga ia kuó u tō fakaʻaufuli?—Loma 7:21-25.

[Puha ʻi he peesi 96]

“KI HE ʻOTUA ʻOKU MALAVA ʻA E MEʻA KOTOA PE”

“ʻI hoku taʻu 15,” ʻoku pehē ʻe Hēleni,e “naʻá ku ifi sikaleti ai ʻi he ʻaho kotoa mo inu ʻolokaholo mo hoku ngaahi kaumeʻá ʻi he ngaahi fakaʻosinga ʻo e uiké. Ki mui ai, neongo ne ʻosi ʻi ai ʻeku kiʻi fānau tuʻutāmaki ʻe toko tolu, ne hoko ʻo maʻunimā au ʻe he ifi kōkeiní. Naʻe fonu palopalema ʻeku moʻuí. Kae kehe, naʻá ku kamata ako ʻa e Tohi Tapú, pea ʻi he tokoni ʻa Sihová, naʻá ku fakamaʻa ʻeku moʻuí mo fakaʻataʻatā fakaʻaufuli mei he ngaahi meʻa ne maʻunimā ai aú. Ko ha fāinga lahi moʻoni, tautefito ki hono tukuange atu hono ngāueʻaki ʻo e kōkeiní. Ko ʻeku fakakaukaú heʻikai malava ke u fai ʻe au ʻa e ngaahi liliu ko ʻení ʻiate au pē. Ka ʻi he taimi ní ʻoku lava moʻoni ke u leaʻaki, ʻi heʻeku moʻuí kuó u fakamoʻoniʻi tonu ai ʻa e ngaahi lea ʻa Sīsuú: ‘Ki he ʻOtua ʻoku malava ʻa e meʻa kotoa pe.’”—Mātiu 19:26.

[Fakamatala ʻi lalo]

[Fakatātā ʻi he peesi 91]

ʻOku kau ʻi he maʻa fakasinó ʻa e tauhi ke maʻa hotau sinó mo hotau ʻātakaí