Vahe 17

“Mou Fai Homou Langahake ʻi he Meʻa Toputapu Kuo Mou Tui ki Ai”

“Mou fai homou langahake ʻi he meʻa toputapu kuo mou tui ki ai, . . . tauhi ai kimoutolu ʻi he ʻofa ʻa e ʻOtua.”—SIUTASI 20, 21.

1, 2. Ko e hā ʻa e ngāue langa ʻokú ke kau ki aí, pea ko e hā ʻoku mātuʻaki mahuʻinga ai ʻa e tuʻunga ʻo hoʻo ngāué?

ʻOKÚ KE tōtōivi ʻi ha ngāue langa. Kuo lele ʻi ha taimi ʻa e langá pea ʻe hokohoko atu ia ʻi he kahaʻú. ʻI he aʻu mai ki he taimi ko ení, kuo faingataʻa ʻa e ngāué ka neongo ia ʻoku fakafiemālie. Tatau ai pē pe ko e hā, ʻokú ke fakapapauʻi heʻikai ʻaupito te ke foʻi pe fakapikopiko, he ko e tuʻunga lelei pe kovi ʻa hoʻo ngāué ʻe ʻi ai ʻene kaunga ki hoʻo moʻuí, naʻa mo ho kahaʻú. Ko e hā hono ʻuhingá? He ko e langa ʻoku faí ko koe ia!

² Naʻe fakamamafaʻi ʻe he ākonga ko Siutasí ʻa e ngāue langa ʻoku tau fai kiate kitautolú. ʻI heʻene ekinaki ki he kau Kalisitiané ke “tauhi ai kimoutolu ʻi he ʻofa ʻa e ʻOtua,” naʻá ne toe fakahaaʻi ʻi he kupu tatau ʻa e kī ki hono fai iá: “Mou fai homou langahake ʻi he meʻa toputapu kuo mou tui ki ai.” (Siutasi 20, 21) Ko e hā ʻa e ngaahi founga ʻe niʻihi ʻe lava ke ke langa hake ai koe tonu, ʻo ʻai hoʻo tuí ke toe mālohi ange koeʻuhi ke ke nofo maʻu ai ʻi he ʻofa ʻa e ʻOtuá? Tau fakakaukau angé ki he tafaʻaki ʻe tolu ʻo e ngāue langa fakalaumālie ʻoku fai kiate koé.

HANGANAKI LANGA ʻA E TUI KI HE NGAAHI FIEMAʻU MĀʻONIʻONI ʻA SIHOVÁ

3-5. (a) ʻE saiʻia ʻa Sētane ke takihalaʻi koe ke ke maʻu ʻa e vakai fēfē ki he ngaahi fiemaʻu ʻa Sihová? (e) ʻOku totonu ke fēfē ʻetau vakai ki he ngaahi fiemaʻu ʻa e ʻOtuá, pea ʻoku totonu ke fēfē ʻene kaunga ki he anga ʻo ʻetau ongoʻí? Fakatātaaʻi.

³ ʻUluakí, ʻoku fiemaʻu ke tau fakaivimālohiʻi ʻetau tui ki he lao fakaʻotuá. Lolotonga hoʻo ako ʻa e tohí ni, kuó ke vakai ai ki ha ngaahi fiemaʻu māʻoniʻoni ʻa Sihova ʻo fekauʻaki mo e ʻulungāangá. Ko e hā hoʻo vakai ki aí? ʻE saiʻia ʻa Sētane ke ne takihalaʻi koe ke ke vakai ki he ngaahi lao, ngaahi tefitoʻi moʻoni mo e ngaahi tuʻunga ʻa Sihová ʻoku fakataputapui pea aʻu ʻo fakafeʻātungia. Kuó ne ngāueʻaki ʻa e founga ko ení talu pē mei heʻene ola lelei ʻaupito ʻi ʻĪtení. (Senesi 3:1-6) ʻE takihalaʻi koe ʻe heʻene foungá? ʻE fakatuʻunga ʻa e meʻa lahi ʻi he anga hoʻo vakaí.

⁴ Ke fakatātaaʻi: ʻI hoʻo luelue atu ʻi ha paʻake fakaʻofoʻofa, ʻokú ke fakatokangaʻi atu ai ha ʻā fefeka māʻolunga ʻokú ne taʻofi ʻa e hū ki he konga kehe ʻo e paʻaké. Ko e konga kelekele ʻi he tafaʻaki ʻe taha ʻo e ʻaá ʻoku hā fakaʻofoʻofa moʻoni. Te ke ʻuluaki vakai nai ki he ʻaá ko ha taʻofiʻanga noaʻia ia ʻo hoʻo tauʻatāiná. Neongo ia, ʻi hoʻo fakasio atu ʻi he ʻaá ki he tafaʻaki ʻe tahá, ʻokú ke fakatokangaʻi atu ha fuʻu laione fekai ʻokú ne tolotolo holo ke pō ha manu! ʻOkú ke sio leva he taimí ni ki he ʻuhinga ʻo e ʻaá—ko ha maluʻi. ʻOku ʻi ai ha manu fekai fakatuʻutāmaki ʻoku tolotolo atu kiate koe he taimí ni? ʻOku fakatokanga mai ʻa e Folofola ʻa e ʻOtuá: “Mou laka fakaʻehiʻehi, mou ʻā: ko homou fili ko e Tevolo ʻoku ne ʻalu fano ʻo hange ko ha laione ngungulu, heʻene kumi ha taha ke ne matuʻaki folo.”—1 Pita 5:8.

⁵ Ko Sētané ko ha manu fekai fakailifia ia. Koeʻuhi ʻoku ʻikai finangalo ʻa Sihova ke pō kitautolu ʻe Sētane, kuó Ne fokotuʻu ʻa e ngaahi lao ke maluʻiʻaki kitautolu mei he “ngaahi [ngāue] kākā” lahi fau ʻa e tokotaha fulikivanu ko iá. (Efeso 6:11) Ko ia ʻi he taimi kotoa pē ʻoku tau fakalaulauloto ai ki he ngaahi lao ʻa e ʻOtuá, ʻoku totonu ke tau sio ai ki he ʻofa ʻa ʻetau Tamai fakahēvaní. ʻI heʻetau sio ki ai ʻi he tuʻunga ko iá, ko e ngaahi lao ʻa e ʻOtuá ko ha matavai ia ʻo e maluʻanga mo e fiefia. Naʻe tohi ʻe he ākonga ko Sēmisí: “Ko ia ʻoku ne fakasio hifo ki he lao haohaoa, ʻa e lao tauʻataina, ʻo ne taʻutu ai, . . . ʻe monuʻia ʻa e toko taha ko ia ʻi heʻene fai.”—Semisi 1:25.

 6. Ko e hā ʻa e founga lelei taha ke langa hake ai ʻa e tui ki he ngaahi lao mo e ngaahi tefitoʻi moʻoni māʻoniʻoni ʻa e ʻOtuá? ʻOmai ha fakatātā.

⁶ Ko e moʻui ʻo fai ki he ngaahi fekau ʻa e ʻOtuá ʻa e founga lelei taha ke langa hake ai ʻetau tui ki he Tokotaha Foaki-Laó pea ʻi he fakapotopoto ʻo ʻene ngaahi laó. Ko e fakatātaá, ko e “lao ʻa Kalaisi” ʻoku kau ai ʻa e fekau ʻa Sīsū ke akoʻi ki he niʻihi kehé “ʻa e ngāhi meʻa kotoa pe [kuó ne] tuʻutuʻuni” maí. (Kaletia 6:2; Mātiu 28:19, 20) ʻOku toe tokanga fakamātoato ʻa e kau Kalisitiané ki he fakahinohino ke hanganaki fakatahataha fakataha ki he lotú mo e feohi fakatupu langa haké. (Hepelu 10:24, 25) Ko e ngaahi fekau ʻa e ʻOtuá ʻoku kau foki ai ʻa e ekinaki ke lotu maʻu pē kia Sihova pea faʻa fai mei he lotó. (Mātiu 6:5-8; 1 Tesalonaika 5:17) ʻI heʻetau moʻui ʻaki ʻa e ngaahi fekau ko iá, ʻoku toe māʻalaʻala ange ai pē ʻetau sio ki he ngaahi tataki ʻofa ʻoku ʻomai aí. Ko e talangofua ki aí ʻoku ʻomai ai kiate kitautolu ʻa e faʻahinga fiefia mo e fiemālie ʻa ia heʻikai ʻaupito lava ke maʻu ia ʻi ha toe feituʻu ʻi he māmani faingataʻa ko ení. ʻI hoʻo fakalaulauloto ki he founga ʻokú ke maʻu ʻaonga fakafoʻituitui ai ʻi he moʻui ʻo fakatatau ki he ngaahi lao ʻa e ʻOtuá, ʻikai ʻoku mālohi ange ai hoʻo tui ki aí?

7, 8. ʻOku anga-fēfē ʻa e fakafiemālieʻi ʻe he Folofola ʻa e ʻOtuá ʻa e faʻahinga ʻoku loto-moʻua naʻa ʻikai nai te nau lava ke tauhi maʻu ha ʻalunga māʻoniʻoni ʻi he faai mai ʻa e ngaahi taʻú?

⁷ ʻOku hohaʻa ʻa e niʻihi ʻi ha ngaahi taimi ʻo pehē ʻe fuʻu faingataʻa ke pipiki ki he ngaahi lao ʻa Sihová ʻi he faai mai ʻa e ngaahi taʻú. ʻOku nau manavahē ʻi haʻanau taʻemalava ke fai ki ai. Kapau ʻoku faifai ange peá ke ongoʻi pehē, manatuʻi ʻa e ngaahi leá ni: “Ko au Sihova ko ho ʻOtua, ʻoku ou ako koe ke fai meʻa ʻaonga, ʻoku ou tataki koe ʻi he hala ʻoku totonu ke ke fou ai. Taumaiā naʻa ke tokanga ki heʻeku ngaahi tuʻutuʻuni! pehe kuo hange ha vaitafe hoʻo fiemalie, pea ko hoʻo maʻoniʻoni hange ko e ngaahi peau ʻo e tahi.” (Aisea 48:17, 18) Kuó ke kiʻi tuʻu ʻo fakakaukau fekauʻaki mo e fakafiemālie ʻa e ngaahi lea ko iá?

⁸ ʻOku fakamanatu mai heni ʻe Sihova ʻe ʻaonga kiate kitautolu ʻa e talangofua kiate iá. ʻOkú ne talaʻofa mai ʻa e tāpuaki ʻe ua ʻo kapau te tau fai pehē. ʻUluakí, ko ʻetau fiemālié ʻe hangē ha vaitafé—ʻo nonga, lahi, pea ʻikai toe tuʻu. Uá, ko ʻetau māʻoniʻoní ʻe hangē ko e peau ʻo e tahí. Kapau ʻokú ke tuʻu ʻi ha matātahi ʻo siofi ʻa e vilo hokohoko ʻa e ngaahi peaú, ʻoku ʻikai ha veiveiua te ke maʻu ʻa e ongoʻi ʻo e tuʻuloa. ʻOkú ke ʻiloʻi ʻe hokohoko pē ʻa e haʻu ʻa e ngaahi foʻi peaú, ʻo fasi ʻi he matātahi ko iá ʻo laulauikuonga. ʻOku folofola mai ʻa Sihova ʻo pehē ko hoʻo māʻoniʻoní—ʻa ho ʻalunga ʻo hono fai ʻo e meʻa ʻoku totonú—ʻe lava ke hangē ko iá. ʻO ka ke ka kei feinga ai pē ke faitōnunga kiate ia, heʻikai ʻaupito te ne liʻaki koe! (Sāme 55:22) ʻIkai ʻoku langa hake ʻe he ngaahi talaʻofa fakalotomāfana ko iá ʻa hoʻo tui kia Sihova pea ki heʻene ngaahi fiemaʻu māʻoniʻoní?

“TUTUI ATU KI HE MATUʻOTUʻÁ”

9, 10. (a) Ko e hā ko ha taumuʻa fisifisimuʻa ai ki he kau Kalisitiané ʻa e hoko ʻo matuʻotuʻá? (e) ʻOku anga-fēfē ʻa e tokoni ʻa ha fakakaukau fakalaumālie ke maʻu ai ʻa e fiefiá?

⁹ Ko ha tafaʻaki hono ua ʻo hoʻo ngāue langá ʻoku fakahaaʻi ia ʻi he ngaahi lea fakamānavaʻi ko ení: “Ke tau tutui atu ki he matuʻotuʻá.” (Hepelu 6:1, NW) Ko e hoko ʻo matuʻotuʻá ko ha taumuʻa fisifisimuʻa ia ki ha Kalisitiane. ʻI he ʻikai hangē ko e haohaoá, ʻa ia ʻi he taimi ní ʻoku ʻikai lava ke aʻusia ʻe he faʻahinga ʻo e tangatá, ko e matuʻotuʻá ko ha taumuʻa ia ʻoku ala aʻusia. ʻIkai ko ia pē, ʻoku maʻu ʻe he kau Kalisitiané ʻa e fiefia lahi ange ʻi he tauhi kia Sihová ʻi heʻenau matuʻotuʻá. Ko e hā ʻoku pehē aí?

¹⁰ Ko ha Kalisitiane matuʻotuʻa ko ha tokotaha fakalaumālie ia. ʻOkú ne vakai ki he ngaahi meʻá mei he anga ʻo e vakai ki ai ʻa Sihová. (Sione 4:23) Naʻe tohi ʻe Paula: “Ko kinautolu ʻoku nau angafakakakano ʻoku nau toka ki he ngaahi meʻa ʻa e kakano; ka ko kinautolu ʻoku angafakalaumalie ʻoku nau toka he ngaahi meʻa ʻa e laumalie.” (Loma 8:5) Ko e fakakaukau fakakakanó ʻokú ne ʻomai ʻa e fiefia siʻisiʻi, he ʻoku hehema ia ke siokita, sio nounou, pea fakahangataha ki he ngaahi meʻa fakamatelié. Ko e fakakaukau fakalaumālié ʻoku fakafiefia ia, he ʻoku fakahangataha ia kia Sihova, ko e “ʻOtua fiefiá.” (1 Timote 1:11, NW) Ko e tokotaha fakalaumālié ʻokú ne vēkeveke ke fakahōifuaʻi ʻa Sihova pea fiefia ʻo aʻu ki he taimi ʻokú ne ʻi he malumalu ai ʻo e ʻahiʻahí. Ko e hā hono ʻuhingá? ʻOku ʻomai ʻi he ngaahi ʻahiʻahí ʻa e ngaahi faingamālie ke fakamoʻoniʻi ai ko Sētané ko ha tokotaha loi pea fakatupulekina ai ʻa e anga-tonu, ʻo fakafiefiaʻi ai ʻa ʻetau Tamai fakahēvaní.—Palovepi 27:11; Semisi 1:2, 3.

11, 12. (a) Ko e hā naʻe leaʻaki ʻe Paula fekauʻaki mo e “ngaahi mafai fakaefakakaukau” ʻo ha Kalisitiane, pea ko e hā ʻa e ʻuhinga ʻo e foʻi lea ko e “akoʻi”? (e) Ko e hā ʻa e ako kuo pau ke fou ai ʻa e sinó koeʻuhi ke matuʻotuʻa pea hoko ai ʻo pōtoʻi?

¹¹ Ko e tuʻunga fakalaumālié mo e matuʻotuʻá ʻoku tupu ia fakafou ʻi he akó. Fakakaukau angé ki he veesi ko ení: “Ko e meʻakai fefeká ʻoku maʻá e kakai matuʻotuʻá, ʻa kinautolu ʻa ia fakafou ʻi hono ngāueʻakí ko ʻenau ngaahi mafai fakaefakakaukaú kuo akoʻi ai ke nau fakafaikehekeheʻi fakatouʻosi ʻa e tonú mo e halá.” (Hepelu 5:14, NW) ʻI he taimi naʻe lea ai ʻa Paula fekauʻaki mo hono “akoʻi” ʻa ʻetau ngaahi mafai fakaefakakaukaú, naʻá ne ngāueʻaki ha foʻi lea faka-Kalisi ʻa ia ʻoku ngalingali naʻe ngāueʻaki lahi ʻi he ngaahi fale sipoti ʻo Kalisi ʻi he ʻuluaki senitulí, he naʻe lava ke fakalea ia ʻo pehē ko e ‘ako ʻo hangē ha tokotaha sākisí.’ Fakakaukau atu angé ki he meʻa ʻoku kau ki he ako ko iá.

¹² ʻI hono fanauʻi kitautolú, naʻe ʻikai ke akoʻi hotau sinó. Ko e fakatātaá, ʻoku ʻikai meimei lava ke mahinoʻi ʻe ha kiʻi pēpē ʻa e huʻunga ʻa hono ongo kiʻi nimá mo e vaʻé. Ko ia ai, ʻoku tupeʻi noaʻia ʻe ha pēpē ʻa hono nimá, ʻo aʻu ʻo tau ʻi hono matá, ʻa ia ʻokú ne mamahiʻia mo ʻohovale ai. Ka ʻoku māmālie, fakafou ʻi hono ngāueʻakí, ʻa hono akoʻi ʻo e sinó. ʻOku totolo ʻa e pēpeé, ʻoku haʻele ʻa e leká, ʻoku lele ʻa e kiʻi tamá.a ʻOi, ka ʻoku fēfē ha tokotaha sākisi ia? ʻI hoʻo sio ki ha tokotaha sākisi pōtoʻi ʻokú ne mahiki ʻo vilo ʻi he ʻataá ʻo mātuʻaki fakaʻofoʻofa mo tonu, ʻoku ʻikai haʻo toe fehuʻia kuo ʻosi fakamālohisinoʻi lelei ʻa hono ngaahi uouá he taimi lahi ki he meʻá ni. Ko e pōtoʻi ʻa e tokotaha sākisí naʻe ʻikai ke hokonoa pē—naʻe fiemaʻu ki ai ʻa e ngaahi houa lahi ʻaupito ʻo e ako. Ko hono akoʻi pehē ʻo e sinó, ʻoku fakahaaʻi ʻe he Tohi Tapú, ʻoku “ʻaonga ki ha meʻa siʻi pe.” He mahuʻinga ange ē ko hono akoʻi ʻa ʻetau ngaahi mafai fakaefakakaukau fakalaumālié!—1 Timote 4:8.

13. ʻE lava fēfē ke tau akoʻi ʻa ʻetau ngaahi mafai fakaefakakaukaú?

¹³ ʻI he tohí ni, kuo tau lāulea ai ki he meʻa lahi ʻa ia ʻe tokoniʻi ai koe ke ke akoʻi hoʻo ngaahi mafai fakaefakakaukaú koeʻuhi ke malava ʻo ke faitōnunga ai pē kia Sihova ʻi he tuʻunga ko ha tokotaha fakalaumālie. Fakakaukau ʻi he lotu ki he ngaahi tefitoʻi moʻoni mo e lao fakaʻotuá ʻi hoʻo fai ʻa e ngaahi fili ʻi hoʻo moʻui fakaʻahó. ʻI he fili kotoa pē ʻokú ke teu ke fai, ʻeke hifo kiate koe: ‘Ko e hā ʻa e ngaahi lao pe tefitoʻi moʻoni Fakatohitapu ʻoku kaunga ki he meʻá ni? ʻE lava fēfē ke u ngāueʻaki ia? Ko e hā ʻa e ʻalunga ʻe fakahōifuaʻi ai ʻa ʻeku Tamai fakahēvaní?’ (Palovepi 3:5, 6; Semisi 1:5) Ko e fili taki taha ʻokú ke fai ʻi he founga ko iá ʻe akoʻi lahi ange ai hoʻo mafai fakaefakakaukaú. ʻE tokoniʻi koe ʻe he ako peheé ke ke hoko ai pea nofo maʻu ʻi he tuʻunga ko ha tokotaha fakalaumālie moʻoni.

14. ʻOku fiemaʻu ke tau maʻu ʻa e uʻa fie kai ki he hā ka tau tupu fakalaumālie ai, ka ko e hā ʻa e fakatokanga ʻoku fiemaʻu ke tau manatuʻí?

¹⁴ Lolotonga ʻoku ala aʻusia ʻa e tuʻunga matuʻotuʻá, ʻoku ʻi ai maʻu pē ʻa e faingamālie ke tupu fakalaumālie. ʻOku fakatuʻunga ʻa e tupú ʻi he meʻakaí. Ko ia naʻe fakahaaʻi ai ʻe Paula: “Ko e meʻakai fefeká ʻoku maʻá e kakai matuʻotuʻá.” Ko ha kī ki hono langa hake hoʻo tuí ko e hanganaki kai ʻa e meʻakai fakalaumālie mālohí. ʻI hoʻo ngāueʻaki totonu ʻa e meʻa ʻokú ke akó, ʻa ia ko e potó ia, pea ʻoku pehē ai ʻe he Tohi Tapú: “Koe boto koe mea oku fugani hake.” Ko ia ai, ʻoku fiemaʻu ke tau fakatupulekina ha fiekaia moʻoni ki he ngaahi moʻoni mātuʻaki mahuʻinga ʻoku ʻomai ʻe heʻetau Tamaí. (Palovepi 4:5-7, PM; 1 Pita 2:2) Ko e moʻoni, ko hono maʻu ʻa e ʻiló mo e poto fakaʻotuá ʻoku ʻikai ko ha ʻuhinga ia ke hoko ai ʻo ʻafungi pe hīkisia. ʻOku fiemaʻu ke tau sivisiviʻi maʻu pē kitautolu telia naʻa faiaka ʻa e pōlepolé pe ko ha vaivaiʻanga kehe ʻo tupu ʻi hotau lotó. Naʻe tohi ʻe Paula: “ʻE, mou sivi muʻa kimoutolu, pe ʻoku mou lotu moʻoni; ʻeke fakamoʻoni meiate kimoutolu.”—2 Kolinito 13:5.

15. Ko e hā ʻoku fiemaʻu ai ʻa e ʻofá ki he tupu fakalaumālié?

¹⁵ ʻOku ʻosi nai hono langa ʻo ha fale, ka ʻoku hokohoko atu pē ʻa e ngāué. ʻOku fiemaʻu ke tauhi ia mo monomono, pea ʻe fiemaʻu nai ke fakalahi ia ʻi he liliu ʻa e ngaahi tuʻungá. Ko e hā ʻoku fiemaʻú koeʻuhi ke matuʻotuʻa ai pea ke tauhi maʻu hotau tuʻunga fakalaumālié? Hiliō he meʻa kotoa, ko e ʻofá. ʻOku fiemaʻu ke tau hanganaki tupulekina ʻi he ʻofa kia Sihova pea ki hotau kaungātuí. Kapau ʻoku ʻikai ke tau maʻu ʻa e ʻofá, ko ʻetau ʻiló mo e ngaahi ngāué kotoa ʻe iku taʻeʻaonga—ʻo hangē ha fuʻu longoaʻa noaʻiá. (1 Kolinito 13:1-3) ʻI he ʻofá, ʻoku lava ke tau aʻusia ai ʻa e matuʻotuʻa faka-Kalisitiané pea hokohoko atu ai ʻa e tupu fakalaumālié.

HANGANAKI TOKANGATAHA KI HE ʻAMANAKI ʻOKU ʻOMAI ʻE SIHOVÁ

16. Ko e hā ʻa e faʻahinga fakakaukau ʻoku pouaki ʻe Sētané, pea ko e hā ʻa e maluʻi kuo tokonaki mai ʻe Sihová?

¹⁶ Tau lāulea ki he toe tafaʻaki ʻe taha ʻo hoʻo ngāue langá. Ke langa hake koe ke hoko ko ha tokotaha muimui moʻoni ʻo Kalaisí, ʻoku fiemaʻu ke ke maluʻi ʻa e anga hoʻo fakakaukaú. Ko Sētane, ʻa e pule ʻo e māmani ko ení, ko ha mataotao ia ʻi hono ʻai ʻa e kakaí ke nau tō ki he fakakaukau taʻepaú, fakatuʻatamaki, taʻefalala mo e siva ʻa e ʻamanakí. (Efeso 2:2) Ko e fakakaukau peheé ʻoku fakatuʻutāmaki ia ki ha Kalisitiane ʻo hangē pē ko e popo-mōmoá ki ha fale papa. Ko e meʻa fakafiefiá, ʻoku tokonaki mai ʻe Sihova ha meʻangāue fakaemaluʻi mahuʻinga—ko e ʻamanakí.

17. ʻOku anga-fēfē hono fakatātaaʻi ʻi he Folofola ʻa e ʻOtuá ʻa e mahuʻinga ʻo e ʻamanakí?

¹⁷ ʻOku fakahokohoko ʻe he Tohi Tapú ʻa e ngaahi konga kehekehe ʻo e teunga tau fakalaumālie ʻoku tau fiemaʻu ʻi heʻetau faitau mo Sētane pea mo e māmani ko ení. Ko ha konga mahuʻinga ʻo e teunga taú ʻa e tataá, ko e “amanaki lelei ki he fakamoui.” (1 Tesalonaika 5:8, PM) Ko ha sōtia ʻi he taimi ʻo e Tohi Tapú naʻá ne ʻiloʻi heʻikai te ne hao fuoloa ʻi he taú kapau ʻoku ʻikai hano tatā. ʻI hono faʻa ngaohiʻaki ʻa e mētale pea ʻaofi ʻaki ha tupenu fulufuluʻi manu pe letá, naʻe fakapapauʻi ʻi hono tui ʻa e tataá ko e lahi taha ʻo e ngaahi tā naʻe fai ki he ʻulú ʻe tekena ia ʻo ʻikai loko hoko ai ha maumau. Hangē ko hono maluʻi ʻe he tataá ʻa e ʻulú, ʻoku lava ke maluʻi ʻe he ʻamanakí ʻa ho ʻatamaí, ʻa hoʻo fakakaukaú.

18, 19. Ko e hā ʻa e faʻifaʻitakiʻanga naʻe fokotuʻu ʻe Sīsū ʻi hono tauhi maʻu ʻa e ʻamanakí, pea ʻe lava fēfē ke tau faʻifaʻitaki kiate ia?

¹⁸ Naʻe fokotuʻu ʻe Sīsū ʻa e faʻifaʻitakiʻanga tefito ki hono tauhi maʻu ʻa e ʻamanakí. Manatuʻi ʻa e meʻa naʻá ne kātekina ʻi he pō fakaʻosi ʻo ʻene moʻui ʻi he māmaní. Naʻe lavakiʻi ia ʻe hano kaumeʻa ofi ki ha paʻanga. Naʻe fakafisingaʻi ʻe ha tokotaha ʻe taha ʻokú ne ʻiloʻi ia. Naʻe liʻaki ia ʻe he niʻihi ʻo nau hola. Ko hono kaungā tangataʻifonuá naʻa nau talitekeʻi ia, ʻo nau kalanga ke tāmateʻi ia ʻaki hono fakamamahiʻi ʻe he kau sōtia Lomá. ʻOku ʻikai ha veiveiua naʻe fehangahangai ʻa Sīsū mo e ngaahi ʻahiʻahi mamafa ange ʻe faifai ange pea tau fehangahangai mo ia. Ko e hā naʻá ne tokoniʻi iá? ʻOku tali ʻe he Hepelu 12:2 (PM): “Ne ne kataki ae bekia i he akau, mo ne taetokaga ki he fakama, koe mea i he fiefia nae tuku i hono ao, bea kuo nofo eni i he nima toomatau oe afioaga oe Otua.” Naʻe ʻikai ʻaupito mole mei he vakai ʻa Sīsuú ʻa e “fiefia nae tuku i hono ao.”

¹⁹ Ko e hā ʻa e fiefia naʻe tuku ʻi he ʻao ʻo Sīsuú? Sai, naʻá ne ʻiloʻi ʻi heʻene kātakí, te ne tokoni ai ki hono fakamāʻoniʻoniʻi ʻa e huafa toputapu ʻo Sihová. Te ne ʻomai ai ʻa e fakamoʻoni lahi taha ʻoku ala maʻu ko Sētané ko ha tokotaha loi ia. ʻOku ʻikai ha toe ʻamanaki naʻe lava ke ne ʻoange kia Sīsū ʻa e fiefia lahi ange! Naʻá ne ʻiloʻi foki ʻe fakapaleʻi lahi ʻe Sihova ʻa hono ʻalunga faitōnungá—he ʻi muʻa tonu ʻiate ia naʻe toka ai ha taimi fakaofo ʻa ia te ne toe fakataha ai mo ʻene Tamaí. Naʻe tauhi maʻu ʻe Sīsū ha ʻamanaki fakafiefia pehē ʻi heʻene fakakaukaú ʻi he kotoa ʻo e ngaahi taimi kovi tahá. ʻOku fiemaʻu ke tau fai ʻa e meʻa tatau. Ko kitautolu foki ʻoku ʻi ai ʻa e fiefia ʻoku tuku ʻi hotau ʻaó. ʻOku fakangeingeiaʻi ʻe Sihova kitautolu taki taha ʻaki ʻa e monū ko e tokoni ki hono fakamāʻoniʻoniʻi ʻa hono huafa lahí. ʻE lava ke tau fakamoʻoniʻi ko e tokotaha loi ʻa Sētane ʻaki hono fili ʻa Sihova ko hotau Hau pea tauhi kitautolu ke tau malu ʻi he ʻofa ʻa ʻetau Tamaí ʻo tatau ai pē pe ko e hā ʻa e ngaahi ʻahiʻahi mo e fakatauele te tau fetaulaki nai mo iá.

20. Ko e hā ʻe lava ke ne tokoniʻi koe ke tauhi maʻu ke pau mo mohu ʻamanaki ʻa hoʻo fakakaukaú?

²⁰ ʻOku ʻikai ke finangalo ʻataʻatā pē ʻa Sihova ke fakapaleʻi ʻa ʻene kau sevāniti faitōnungá—ʻokú ne vēkeveke ke fai pehē. (Aisea 30:18; Malakai 3:10) ʻOkú ne fiefia ʻi hono foaki ki heʻene kau sevānití ʻa e ngaahi holi totonu ʻa honau lotó. (Sāme 37:4) Ko ia tauhi maʻu ke hangataha hoʻo fakakaukaú ki he ʻamanaki ʻoku toka mei muʻa ʻi ho ʻaó. ʻOua ʻaupito ʻe ʻunua ki he fakakaukau taʻepau, ololalo mo mioʻi ʻa e māmani motuʻa ʻo Sētané. Kapau ʻokú ke ongoʻi ko e laumālie ʻo e māmani ko ení ʻoku halalotoʻapi ʻi ho ʻatamaí pe ʻi ho lotó, lotu tōtōivi kia Sihova ki he “nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe.” Ko e nonga ko ia ʻoku ʻomai ʻe he ʻOtuá te ne maluʻi ho lotó mo hoʻo mafai fakaefakakaukaú.—Filipai 4:6, 7.

21, 22. (a) Ko e hā ʻa e ʻamanaki lāngilangiʻia ʻoku tukulotoa ʻe he faʻahinga ko ia ʻi he “fuʻu kakai lahi”? (e) Ko e hā ʻa e konga ʻo e ʻamanaki faka-Kalisitiané ʻoku mahuʻinga lahi taha kiate koé, pea ko e hā hoʻo fakapapaú?

²¹ Ko ha ʻamanaki fakafiefia ē ʻokú ke maʻu ke fakalaulauloto ki aí! Kapau ko ha konga koe ʻo e “fuʻu kakai lahi,” ʻa ia te nau “haʻu mei he mamahi lahi,” fakakaukau atu ki he moʻui ʻa ia kuo vavé ni ke ke maʻú. (Fakahā 7:9, 14) ʻI he ʻikai toe ʻi ai ʻa Sētane mo ʻene kau tēmenioó, te ke ongoʻi ai ʻa e fiemālie ʻoku faingataʻa nai ke mahinoʻi he taimí ni. He ko hai ia ʻiate kitautolu kuo faifai ange peá ne hokosia ha moʻui ʻoku ʻikai ke ʻi ai ʻa e tenge ʻo e tākiekina fakatupu maumau ʻa Sētané? ʻI he puli ʻa e tenge ko iá, ko ha fiefia lahi ē ke ngāue ki hono liliu ʻa e foʻi māmaní ke hoko ko ha palataisi ʻi he malumalu ʻo e tataki ʻa Sīsū mo hono kaungāpule fakahēvani ʻe toko 144,000! He fiefia ē ko kitautolu ʻi he ʻamanaki atu ke sio ki he mole atu ʻa e puke mo e mahaki kotoa pē, ki hono talitali lelei ʻo hotau ngaahi ʻofaʻangá mei he faʻitoká, ki he moʻui ʻi he founga naʻe taumuʻa ʻa e ʻOtuá ke tau moʻui aí! ʻI heʻetau tupu ʻo aʻu ki he haohaoá, ʻe hoko mai ai ha toe pale lahi ange, ko e talaʻofa ʻoku fakahaaʻi ʻi he Loma 8:21—ko e “tauʻataina fakalangi ʻa e fanau ʻa e ʻOtua.”

²² ʻOku fiemaʻu ʻe Sihova ke ke aʻusia ha tauʻatāina lahi ange ʻi he meʻa ʻoku lava ke ke fakaʻuta atu ki aí. Ko e hala ki he tauʻatāina ko iá ʻoku fakatuʻunga ia ʻi he talangofuá. ʻIkai ʻoku tuha mo e feinga kotoa pē ʻoku lava ke ke fai he taimi ní ke talangofua kia Sihova ʻi he ʻaho ki he ʻaho? Peʻi ʻofa mai ā ʻo hanganaki fai ho langa hake ʻi he meʻa toputapu kuó ke tui ki aí, koeʻuhi ke lava ai ʻo ke nofo maʻu ʻi he ʻofa ʻa e ʻOtuá ʻi he kotoa ʻo ʻitānití!

[Fakamatala ʻi lalo]

[Fakatātā ʻi he peesi 201]

Ko e sino ʻo ha tokotaha sākisi ʻoku akoʻi ia ʻi hono ngāueʻakí