Tukuange ʻo e Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní ʻi he Lea Faka-Tongá

ʻI HE ʻaho 14 ʻo Sanuali 2017, naʻe aʻusia ai ha maka-maile fakalaumālie: Ko e Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní naʻe tukuange mai ia ʻi he lea faka-Tongá.

Ko e Liliu Tohi Tapu Māmani Foʻoú ʻoku tānaki mai ia he taimí ni ki he ngaahi Tohi Tapu kuo fuoloa hono ngāueʻaki ʻe he kakai manavahē-ʻOtua ʻi Tongá. Kae kehe, ko e hā naʻe fiemaʻu ai ke toe ʻi ai ha liliu ʻe taha ʻo e Tohi Tapú? Ko hai ʻoku poupou ki aí? Pea ʻe lava fēfē ke ke fakapapauʻi ʻoku alafalalaʻanga ʻa e Liliu Tohi Tapu Māmani Foʻoú?

Kuo pulusi ha ngaahi liliu foʻou lahi ʻaupito ʻo e Tohi Tapú ʻi he ngaahi taʻu ki mui ní. Ko e ngaahi liliu foʻou ʻe niʻihi kuo ʻai ai ke ala maʻu ʻa e Folofola ʻa e ʻOtuá ʻi he ʻuluaki taimí ʻi he ngaahi lea ʻe niʻihi. Kae kehe, ʻoku toe haʻu ʻa e ngaahi Tohi Tapu foʻou ʻi he ngaahi lea kuo ʻosi ʻi ai ʻa e ngaahi liliu kuo tali fakaʻofisiale. Ko e hā hono ʻuhingá? Ko e tohi ko e So Many Versions?, ʻa Sakae Kubo mo Walter Specht, ʻoku fakamatala ai: “ʻOku ʻikai ha liliu ʻo e Tohi Tapú ʻe lava ke faifai ange pea vakai ki ai ko e aofangatukú ia. Ko e ngaahi liliú kuo pau ke ʻalu fakataha ia mo e tupulaki ʻi he ʻilo fakatohitapú pea mo e ngaahi liliu ʻi he leá.”

ʻI he ngaahi taʻu ki mui ní, kuo tupu fakautuutu ʻa hono mahinoʻi ʻo e lea faka-Hepeluú, faka-Alameá, mo e faka-Kalisí—ʻa e ngaahi lea naʻe muʻaki hiki ai ʻa e Tohi Tapú. Pehē foki, kuo ʻiloʻi ʻa e ngaahi muʻaki tatau tohinima ʻo e Tohi Tapú ʻoku motuʻa ange mo tonu ange ʻi he ngaahi muʻaki tatau naʻe ngāueʻaki ʻe he kau liliu Tohi Tapu ʻi he ngaahi toʻutangata ki muʻá. Ko ia ʻoku lava ai ke liliu ʻa e Folofola ʻa e ʻOtuá ʻo tonu matematē ange ʻi he ʻahó ni ʻi ha toe taimi ki muʻa!

“Ko e Tohi Tapú ʻa e tohi fakataua lahi taha ʻo e taʻú ʻi he taʻu kotoa pē,” ko e tohi ia ʻa Declan Hayes, ko e Palōfesa ʻo e Pisinisi Fakavahaʻapuleʻangá. Pea ʻi he taimi ʻe niʻihi ko e holi ke faʻu ʻa e tohi fakataua lahi tahá ʻoku hā ngali ʻokú ne taʻofi ʻa e tokanga ki he tonu matemateé. ʻOku toʻo noaʻia ʻi he Tohi Tapu ʻe taha ʻa e ngaahi kupu ʻa ia ʻoku tui ʻa e kau faipulusí ʻoku “fakapipiko.” ʻOku fetongi ʻe ha Tohi Tapu ʻe taha ʻa e ngaahi foʻi lea pe kupuʻi lea ʻe fakaʻitaʻi nai ai ha kau lautohi ʻi onopooni. Hangē ko ení, ʻoku feinga ia ke ʻai ke hā fakamānako ki he kakai pau ʻaki hono ui ʻa e ʻOtuá ko e “Tamai-Faʻē.”

Mahalo ko e meʻa fakatupu hohaʻa taha ʻoku hokó ʻoku kau ki ai ʻa e huafa fakafoʻituitui ʻo e ʻOtuá, ʻa e Sihová. (ʻOku liliu ʻe he kau mataotao ʻe niʻihi ʻa e huafa ʻo e ʻOtuá ko e “Yahweh.”) ʻI he ngaahi tatau motuʻa ʻo e Tohi Tapú, ʻoku fakafofongaʻi ai ʻa e huafa fakaʻotuá ʻaki ʻa e konisinānite faka-Hepelū ʻe fā ʻa ia ʻoku sipela nai ko e YHWH pe JHVH. Ko e huafa makehe ko ení ʻoku hā meimei tuʻo 7,000 ia ʻi he tohi ʻoku ui ko e Fuakava Motuʻá. (ʻEkisoto 3:15; Saame 83:18) ʻOku hā mahino leva, naʻe fakataumuʻa ʻa hotau Tokotaha-Fakatupú ke ʻiloʻi mo ngāueʻaki ʻe heʻene kau lotú ʻa e huafa ko iá!

Kae kehe, ʻi he ngaahi senituli kuo maliu atú, naʻe fakatupunga ʻi he manavahē taʻeʻuhingá ke tuku hono puʻaki ʻe he kau Siú ʻa e huafa fakaʻotuá. Ki mui ai, naʻe toe uesia ʻa e lotu faka-Kalisitiané ʻe he ngaahi fakakaukau taʻeʻuhinga peheé. (Ngāue 20:29, 30; 1 Tīmote 4:1) Naʻe hoko ko ha tōʻonga anga-maheni ia ʻa hono fetongi ʻe he kau liliu Tohi Tapú ʻa e huafa fakaʻotuá ʻaki ʻa e hingoa fakalakanga ko e “ʻEiki.” ʻI he ʻahó ni, ko e lahi taha ʻo e ngaahi Tohi Tapú ʻoku toʻo kotoa mei ai ʻa e huafa ʻo e ʻOtuá. Ko e ngaahi Tohi Tapu faka-Pilitānia ʻe niʻihi ʻi onopooni, ʻoku aʻu ʻo nau toʻo ʻa e foʻi lea ko e “huafá” ʻi he Sione 17:6 ʻa ia naʻe pehē ai ʻe Sīsū: “Kuó u fakaeʻa ho huafá.” Ko e Good News Translation ʻoku liliu ai ʻa e foʻi veesi ko ení: “Kuó u ʻai ke ʻiloʻi koe.”

Ko e hā ʻa e ʻuhinga ʻo e fehiʻa ko eni ʻi he huafa ʻo e ʻOtuá? Fakakaukau angé ki he fakamatala naʻe fai ʻi he pepa ko e Practical Papers for the Bible Translator. ʻOku pulusi ia ʻe he Ngaahi Sōsaieti Tohi Tapu Fakatahatahá (UBS), ʻa ia ʻoku fakatahatahaʻi ai ʻa e lahi ʻo e ngāue liliu ʻo e Tohi Tapú ʻi māmani lahí. Naʻe fakahaaʻi ʻi he kupu ʻe taha: “Koeʻuhi ko e YHWH ʻoku ʻikai ha veiveiua ko ha hingoa totonu, ko e sipela ko iá, ʻoku totonu ke hoko ko ha tefitoʻi moʻoni ia ki he founga totonu taha ke fai ai ʻa e liliú.” Ka naʻe fakatokanga mai ʻi he kupú: “Kae kehe, ʻoku ʻi ai ʻa e ngaahi moʻoniʻi meʻa ke fakakaukau ki ai.”

ʻOku tonu fēfē ʻa e “ngaahi moʻoniʻi meʻa” ko iá? Fakatatau ki he lau ʻa e pepa ko ení, ʻoku fakaʻuhinga ʻa e kau mataotao ʻe niʻihi: “Kapau te mau ngāueʻaki ha hingoa hangē ko e Yahweh te ne ʻoatu nai ʻa e fakahuʻunga hala . . . , ʻi he pehē ko e ‘Yahweh’ ko ha ʻOtua muli, pe ko ha ʻOtua foʻou mo taʻeʻiloa, ʻo kehe mei he ʻOtua ʻoku nau ʻosi ʻiloʻí.” Kae kehe, ʻoku akoʻi mālohi ʻe he Tohi Tapú ko Sihova ko e ʻOtuá ʻoku kehe ia mei he ngaahi ʻotua naʻe lotu ki ai ʻa e faʻahinga ʻoku ʻikai ko e kau Kalisitiané!​—ʻAisea 43:10-12; 44:8, 9.

ʻOku taukaveʻi ʻe he kau mataotao ʻe niʻihi ko ʻenau muimui pē ki he talatukufakaholó ʻi heʻenau fetongi ʻa e huafa ʻo e ʻOtuá ʻaki ʻa e hingoa fakalakanga ko e “ʻEikí.” Ka naʻe fakahalaiaʻi ʻe Sīsū ʻa e muimui ʻi he ngaahi talatukufakaholo naʻe taʻefakaʻapaʻapaʻi ai ʻa e ʻOtuá. (Mātiu 15:6) Tuku kehe ia, ko e foʻi fakakaukau fakakātoa ʻo hono fetongi ʻo ha hingoa ʻaki ha hingoa fakalakangá ʻoku ʻikai hano makatuʻunga ʻi he Folofolá. Ko Sīsū Kalaisí ʻoku lahi hono ngaahi hingoa fakalakangá, hangē ko e “Folofola ʻa e ʻOtuá” mo e “Tuʻi ʻo e ngaahi tuʻi.” (Fakahā 19:11-16) Ko ia ai, ʻoku totonu ke fetongi ʻa e hingoa Sīsuú ʻaki ha taha ʻo e ngaahi hingoa fakalakanga ko ení?

Ko ha toe kupu ʻe taha ʻi he pepa naʻe lave ki ai ki muʻá ʻoku fakamatematē mai ai: “Ko e faʻunga ʻo e foʻi lea ‘Sihová’ ʻoku totonu pē ke fakaʻehiʻehi mei ai.” Ko e hā hono ʻuhingá? “ʻOku tui lahi ʻa e kau mataotaó ko e muʻaki puʻakí ʻoku fakafofongaʻi lelei ia ʻe he ‘Yahweh.’” Neongo ia, ko e ngaahi hingoa anga-maheni ko ia hangē ko e ʻAisea, Selemaia, mo e Sīsuú ʻoku toe liliu ia ʻi he ngaahi founga ʻoku ʻikai loko tatau mo hono muʻaki puʻaki faka-Hepeluú (Yeshaʽ·yaʹhu, Yir·meyahʹ, mo e Yehoh·shuʹaʽ). Koeʻuhi ko e faʻunga ʻo e foʻi lea “Sihová” ko ha founga totonu ia ʻo hono liliu ʻo e huafa fakaʻotuá​—ʻa e foʻi lea kuo ngāueʻaki ʻi he lea faka-Tongá mo e ngaahi lea kehé ʻi he laui senituli—​ko e fakafepaki ki hono ngāueʻaki iá ʻoku hā ngali taʻetotonu. Ko e moʻoni, ko e toumoua ke ngāueʻaki ʻa e huafa fakaʻotuá ʻoku hā ngali makatuʻunga ia ʻi he ongoʻí mo e tomuʻa fehiʻá, ʻo ʻikai ʻi he ʻiló.

Kae kehe, ko e ʻīsiu hení ʻoku ʻikai ʻi ha tuʻunga fakaeako pē. Hangē ko ení, ko ha faifaleʻi UBS ʻi ʻInitia naʻá ne tohi fekauʻaki mo e ngaahi nunuʻa ʻo hono toʻo ʻa e huafa fakaʻotuá mei he ngaahi pulusinga ʻa ia naʻe ʻasi ai ki muʻá. ʻOkú ne fakamatala: “Ko e kau Hinituú ʻoku ʻikai te nau mahuʻingaʻia ʻi he hingoa fakalakanga ʻo e ʻOtuá; ʻoku nau loto ke ʻiloʻi ʻa e hingoa fakafoʻituitui ʻo e ʻOtuá, pea ka ʻikai te nau ʻiloʻi ʻa e huafá heʻikai lava ke nau fakafelāveʻi kinautolu ki he tokotaha ʻoku ʻoʻona iá.” Ko e moʻoni, ʻoku lava ke leaʻaki eni fekauʻaki mo e tokotaha kotoa ʻoku kumi ki he ʻOtuá. Ko hono ʻiloʻi ʻa e huafa ʻo e ʻOtuá ʻoku mahuʻinga ki hono mahinoʻi iá, ʻoku ʻikai ko ha ivi pē ʻoku ʻikai kau ki ha taha, ka ko ha Tokotaha​—ko ha taha ʻoku lava ke tau ʻiloʻi. (ʻEkisoto 34:6, 7) Ko ia ʻoku fakahaaʻi ai ʻe he Tohi Tapú: “Ko e tokotaha kotoa pē ʻoku ui ki he huafa ʻo Sihová ʻe fakahaofi.” (Loma 10:13) Ko e kau lotu ki he ʻOtuá ʻoku nau moʻuaʻaki ke ngāueʻaki ʻa hono huafá!

Ko ia ai, ko ha maka-maile ʻa e meʻa naʻe hoko ʻi he 1950 ʻi hono fuofua pulusi ʻa e liliu faka-Pilitānia ʻo e New World Translation of the Christian Greek Scriptures. Lolotonga ʻa e taʻu ʻe hongofulu hoko atu aí, naʻe pulusi fakakongokonga ai ʻa e Ngaahi Konga Tohi Tapu Faka-Hepeluú, pe ko ia ʻoku anga-maheniʻaki hono ui ko e Fuakava Motuʻá. ʻI he 1961 naʻe tukuange mai ai ʻa e Tohi Tapú kakato ʻi he lea faka-Pilitāniá ʻi ha tohi ʻe taha. Ko e meʻa ʻoku mahuʻingá, ko hono liliu ʻe he Liliu Tohi Tapu Māmani Foʻoú ʻa e huafa fakaʻotua ko e “Sihová” ʻi he kotoa ʻo ʻene hā meimei tuʻo 7,000 ʻi he Fuakava Motuʻá. Ko e meʻa ʻoku tautefito ʻene tuʻu-ki-muʻá ko hono toe fakafoki ʻo e huafa fakaʻotuá ki heʻene ʻasi tuʻo 237 ʻi he Ngaahi Konga Tohi Tapu Faka-Kalisi Kalisitiané, pe “Fuakava Foʻoú.”

Ko hono toe fakafoki ʻo e huafa ko iá ʻoku ʻikai ngata pē ʻi heʻene fakalāngilangiʻi ʻa e ʻOtuá ka ʻoku toe fakaleleiʻi ai ʻetau mahinó. Ke fakatātaaʻi, ko e ngaahi liliu lahi ʻoku peheni ʻenau liliu ʻa e Mātiu 22:44: “Naʻe Folofola ʻa e ʻEikí ki hoku ʻEikí.” Ka ko e lea ko iá ʻa hai pea kia hai? ʻOku liliu ʻe he Liliu Tohi Tapu Māmani Foʻoú ʻa e Mātiu 22:44 ʻo peheni: “Naʻe folofola ʻa Sihova ki hoku ʻEikí,” ʻo toʻo lea totonu mei he Saame 110:1. ʻOku lava ai ʻi ha tuʻunga mahuʻinga ke fakafaikehekeheʻi ʻe he kau lautohí ʻa Sihova ko e ʻOtuá mei hono ʻAló.

Ko e Liliu Tohi Tapu Māmani Foʻoú ʻoku pulusi ia ʻe he Watch Tower Bible and Tract Society, ko e kautaha fakalao ʻokú ne fakafofongaʻi ʻa e Kau Fakamoʻoni ʻa Sihová. Kuo pulusi mo tufaki ʻa e Tohi Tapú ʻi he māmaní kotoa ʻe he Kau Fakamoʻoni ʻa Sihová ʻo laka hake ʻi he taʻu ʻe teau. Naʻe tuku atu ʻa e Liliu Tohi Tapu Māmani Foʻoú ki he Kau Fakamoʻoni ʻa Sihová ʻe ha kulupu ʻo e kau Kalisitiane ʻoku ʻiloa ko e Kōmiti Liliu Tohi Tapu Māmani Foʻou. ʻI he ʻikai ʻaupito feinga ke tuʻu-ki-muʻa fakafoʻituituí, naʻe kole ʻa e kau mēmipa ʻo e kōmití ke ʻoua ʻe tala honau hingoá naʻa mo e ʻi he hili ʻenau maté.​—1 Kolinitō 10:31.

Ko e hā ʻoku fakakaveinga ai ʻa e tohí ni ko e Liliu Tohi Tapu Māmani Foʻoú? Ko e talateu ki he pulusinga ʻi he 1950 naʻe fakamatalaʻi ai ʻoku tapua atu ʻi he kaveinga ko ení ʻa e tuipau mālohi ko e faʻahinga ʻo e tangatá ʻoku nau ‘ʻi he hūʻanga ʻo e māmani foʻou” naʻe talaʻofa ʻi he 2 Pita 3:13. Hangē ko e tohi naʻe fai ʻe he kōmití, lolotonga ʻa e “taimi [ko eni] ʻo e hiki mei he māmani motuʻá ki he māmani foʻou māʻoniʻoní,” ʻoku mahuʻinga ke fakaʻatā ʻi he ngaahi liliu Tohi Tapú “ʻa e moʻoni ʻāsinisini ʻo e Folofola ʻa e ʻOtuá” ke ulo atu.

Naʻe fai ʻa e tokanga ke muʻomuʻa ʻa e tonu māteé. Ko e kau liliu ʻo e pulusinga faka-Pilitāniá naʻa nau ngāue hangatonu mei he muʻaki lea faka-Hepeluú, faka-Alameá, mo e faka-Kalisí, ʻo ngāueʻaki ʻa e ngaahi konga tohi lelei taha naʻe ala maʻú.a Naʻe fai ʻa e tokanga makehe ke liliu ʻa e konga tohi ʻi he kuonga muʻá ʻo fai pau ki ai ʻo ka ala lava​—ka ʻi he lea ʻe mahinongofua ki he kau lautohi ʻi onopōní.

ʻOku ʻikai ha ofo ʻi hono fakahīkihikiʻi ʻe he kau mataotao ʻe niʻihi ʻa e Liliu Tohi Tapu Māmani Foʻoú ʻi heʻene kakato mo tonu matemateé. Ko Palōfesa Benjamin Kedar, ko ha mataotao ʻi he lea faka-Hepeluú ʻi ʻIsileli, naʻá ne pehē ʻi he 1989: “ʻI heʻeku fakatotolo ki he leá ʻi heʻene fekauʻaki mo e Tohi Tapu faka-Hepeluú mo e ngaahi liliú, ʻoku ou faʻa lave ki he pulusinga faka-Pilitānia ʻo e liliu ʻoku ʻiloa ko e New World Translation. ʻI he fai peheé, ʻoku ou ʻilo ʻoku toutou fakapapauʻi ʻe heʻeku ongoʻí ko e ngāué ni ʻoku tapua atu ai ha feinga faitotonu ke maʻu ha mahino fekauʻaki mo e konga tohí ʻa ia ʻoku lava ke pehē ʻoku tonu mātē.”

ʻOku feʻungamālie leva hono ʻai ʻe he Kau Fakamoʻoni ʻa Sihová ʻa e Liliu Tohi Tapu Māmani Foʻoú ke ala maʻu ʻi ha lea kehe mei he māmani lea faka-Pilitāniá. ʻOku lolotonga pulusi kakato ia pe ko hano konga ʻi he lea ʻe 150. Ke ʻai ke faingofua ʻa e ngāué ni, naʻe faʻu ha founga ʻo e liliu Tohi Tapú ʻa ia ʻoku fakatahaʻi ai ʻa e ako ki he lea Fakatohitapú mo e tekinolosia fakakomipiutá. Naʻe fokotuʻu ha potungāue ʻoku ui ko e Potungāue Liliu-Lea ke tokoni ki he kau liliú. Ko e Kulupu Pule ʻa e Kau Fakamoʻoni ʻa Sihová ʻoku hokohoko atu ʻenau tokangaʻi lelei ʻa e ngāue liliu Tohi Tapú fakafou ʻi heʻene Kōmiti Hiki-Tohí. Ka ʻoku anga-fēfē hono fai ʻa e ngāué ni?

ʻUluakí, ʻoku fakanofo ha kulupu ʻo e kau Kalisitiane ʻosi fakatapui ke nau ngāue ko ha timi liliu lea. Kuo hā mei he meʻa ʻoku hokosiá ʻi he taimi ʻoku ngāue fakataha ai ha kau liliu lea ko ha timi kae ʻikai ngāue tāutahá, ʻoku nau ʻomai ai ha liliu lelei ange, mo mafamafatatau ange. (Palōveepi 11:14) ʻI he tuʻunga lahi, ko e mēmipa taki taha ʻo e timí ʻokú ne maʻu ʻa e taukei ʻi he hoko ko ha tokotaha liliu ʻo e ʻū tohi ʻa e Kau Fakamoʻoni ʻa Sihová. ʻOku akoʻi fakaʻāuliliki leva ʻa e timí ki he ngaahi tefitoʻi moʻoni tefito ʻo e liliu Tohi Tapú pea ʻi hono ngāueʻaki ʻa e ngaahi polokalama fakakomipiuta kuo ʻosi faʻu makehe.

ʻOku fakahinohinoʻi leva ʻa e timi liliú ke nau liliu ha Tohi Tapu ʻa ia ʻoku tonu mātē kae mahinongofua ki he kakai lāuvalé. ʻOku totonu ke hangatonu ʻo ka malava, ka ʻi he taimi tatau, ke ʻoua ʻaupito naʻa mioʻi ʻa e ʻuhinga ʻo e muʻaki konga tohí. ʻOku anga-fēfē hono fai ení? Vakai angé ki he Tohi Tapu foʻou naʻe toki tukuangé. Naʻe kamata ʻa e timi liliú ʻaki ʻenau fili ʻa e ngaahi foʻi lea faka-Tonga ʻoku tatau mo e ngaahi kupuʻi lea Fakatohitapu mahuʻinga kotoa ʻoku ngāueʻaki ʻi he Liliu Tohi Tapu Māmani Foʻou faka-Pilitāniá. Ko e Sisitemi Liliu Taua Leʻo fakakomipiutá ʻoku fakahaaʻi ai ʻa e ngaahi foʻi lea ʻoku kāinga mo ʻuhinga tataú. ʻOku toe fakahaaʻi ai ʻa e muʻaki ngaahi foʻi lea faka-Kalisi pe faka-Hepelū ʻa ia naʻe toʻo mei ai ʻa e ngaahi foʻi lea faka-Pilitāniá koeʻuhi ke lava ʻa e tokotaha liliú ʻo ako ʻa e founga naʻe liliu ai ʻa e ngaahi foʻi lea faka-Kalisí pe faka-Hepeluú ʻi heʻene ngaahi ʻasi kehé. Ko e meʻá ni kotoa naʻe tokoni lahi ia ki hono fili ʻa e ngaahi kupuʻi lea tatau ʻi he lea faka-Tongá. ʻI he felotoi pē ʻa e timí ki he ngaahi foʻi lea ko iá, naʻa nau kamata leva ke liliu ʻa e Tohi Tapú, ʻo ngāueʻaki ʻa e komipiutá ke fakahaaʻi ʻa e lea faka-Tonga ʻoku tataú ʻi heʻenau ngāue ki he veesi taki taha.

Kae kehe, ko e liliú ʻoku ʻuhinga ia ki he meʻa lahi ange ʻi hono fetongi pē ha ngaahi foʻi lea ʻaki ha ngaahi foʻi lea. Kuo pau ke fai ʻa e ngāue lahi ke fakapapauʻi ko e ngaahi kupuʻi lea faka-Tonga kuo filí ʻokú ne fakahaaʻi ʻa e foʻi fakakaukau totonu Fakatohitapú ʻi he potutohi taki taha. Naʻe pau ke fai ʻa e tokanga ke fakapapauʻi ko e kalamá mo e faʻunga sētesí naʻe lelei mo fakanatula. Ko e ngāue mālohi naʻe fai ʻi he ngāué ni ʻoku tala pē ia ai. Ko e pulusinga faka-Tonga ʻo e Liliu Tohi Tapu Māmani Foʻoú ʻoku liliu ai ʻa e Folofola ʻa e ʻOtuá ʻi he founga ʻa ia ʻoku faingofua ke lau, māʻalaʻala mo mahinongofua, pea fai pau ki he konga tohi ʻi he kuonga muʻá.b

ʻOku mau fakaʻaiʻai koe ke ke sivisiviʻi ʻiate koe tonu ʻa e Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní. ʻE lava ke ke maʻu ia mei he kau faipulusi ʻo e makasini ko ení pe mei he fakatahaʻanga fakalotofonua ʻa e Kau Fakamoʻoni ʻa Sihová. ʻE lava ke ke lau ia fakataha mo e tuipau ʻokú ne liliu ʻo fai pau ki he ngaahi lea tonu ʻa e ʻOtuá ʻi hoʻo leá tonu. ʻOku ʻikai ha veiveiua, ʻe vavé ni haʻo loto-tatau ko e tukuange fakamuimui ʻo e Tohi Tapu ko ení ko ha maka-maile fakalaumālie moʻoni ia!