Huhuʻí​—Meʻaʻofa Lahi Taha ʻa e ʻOtuá

1, 2. (a) Ko e hā ʻokú ne ʻai ha meʻaʻofa ke mahuʻinga kiate koé? (e) Ko e hā ʻoku hoko ai ʻa e huhuʻí ko e meʻaʻofa lahi taha ia ʻa e ʻOtuá?

KO E HĀ ʻa e meʻaʻofa lelei taha kuo faifai ange peá ke maʻú? ʻOku ʻikai fiemaʻu ke totongi mamafa ha meʻaʻofa kae toki hoko ʻo mahuʻinga kiate koe. ʻI hono ʻai koe ʻe ha meʻaʻofa ke ke fiefia pe ko ha meʻa ia ʻoku fiemaʻu moʻoni kiate koe, ʻokú ke ongoʻi houngaʻia ai.

² ʻI he ngaahi meʻaʻofa kotoa kuo foaki mai ʻe he ʻOtuá kiate kitautolú, ʻoku ʻi ai ha meʻaʻofa ʻe taha ʻoku fiemaʻu lahi ange ia kiate kitautolu ʻi ha toe meʻa kehe. Ko e meʻaʻofa lahi taha ia ʻa e ʻOtuá ki he faʻahinga ʻo e tangatá. ʻI he vahé ni, te tau ako ai naʻe fekauʻi mai ʻe Sihova ʻa hono ʻAló, ʻa Sīsū Kalaisi, koeʻuhí ke tau lava ai ʻo moʻui taʻengata. (Lau ʻa e Mātiu 20:28.) ʻI hono fekauʻi mai ʻa Sīsū ki he māmaní ko ha huhuʻí, kuo fakamoʻoniʻi ai ʻe Sihova ʻokú ne ʻofa moʻoni ʻiate kitautolu.

 3. Ko e hā ʻoku mate ai ʻa e faʻahinga ʻo e tangatá?

³ Ko e huhuʻí ko e founga ia ʻa Sihova ki hono fakatauʻatāinaʻi ʻa e faʻahinga ʻo e tangatá mei he angahalá mo e maté. (ʻEfesō 1:7) Ke mahinoʻi ʻa e ʻuhinga naʻe fiemaʻu ai ʻa e huhuʻí, kuo pau ke tau ʻiloʻi ʻa e meʻa naʻe hoko ʻi he laui afeʻi taʻu kuohilí ʻi he ngoue ʻo ʻĪtení. Ko ʻetau ʻuluaki ongo mātuʻá, ʻa ʻĀtama mo ʻIvi, naʻá na faiangahala. Koeʻuhi ko ʻena faiangahalá, naʻá na mate ai. ʻOku tau maté foki koeʻuhi kuo tau maʻu tukufakaholo ʻa e angahalá meia ʻĀtama mo ʻIvi.​—Sio ki he Fakamatala ʻi he Ngataʻangá 9.

 4. Ko hai ʻa ʻĀtama, pea ko e hā naʻá ne maʻú?

⁴ ʻI he taimi naʻe fakatupu ai ʻe Sihova ʻa e ʻuluaki tangatá, ʻa ʻĀtamá, naʻá Ne ʻoange kiate ia ha meʻa mahuʻinga ʻaupito. Naʻá ne ʻoange kia ʻĀtama ʻa e moʻui haohaoa fakaetangatá. Naʻá ne maʻu ha ʻatamai haohaoa mo ha sino haohaoa. ʻE ʻikai ʻaupito te ne puke, ʻe ʻikai ʻaupito te ne tupu ʻo motuʻa, pea ʻe ʻikai ʻaupito te ne mate. Koeʻuhi naʻe fakatupu ʻe Sihova ʻa ʻĀtama, naʻá Ne hangē ai ha tamai kiate iá. (Luke 3:38) Naʻe talanoa maʻu pē ʻa Sihova kiate ia. Naʻe fakamatalaʻi mahino ʻe he ʻOtuá kia ʻĀtama ʻa e meʻa naʻá ne ʻamanekina meiate iá pea ʻoange kiate ia ha ngāue fakafiefia ke ne fai.​—Sēnesi 1:28-30; 2:16, 17.

 5. ʻOku ʻuhinga ki he hā ʻa e pehē ʻe he Tohi Tapú naʻe ngaohi ʻa ʻĀtama “ʻi he ʻīmisi ʻo e ʻOtuá”?

⁵ Naʻe fakatupu ʻa ʻĀtama “ʻi he ʻīmisi ʻo e ʻOtuá.” (Sēnesi 1:27) Naʻe ʻoange ʻe Sihova kiate ia ʻa e ngaahi ʻulungaanga hangē ko ia naʻá Ne maʻú, ʻo kau ai ʻa e ʻofa, poto, fakamaau totonu, mo e mālohi. Naʻá ne ʻoange kia ʻĀtama ʻa e tauʻatāina ke fili. Naʻe ʻikai ko ha lōpoti ʻa ʻĀtama. Naʻe fakatupu ia ʻe he ʻOtuá koeʻuhi ke ne lava ʻo fili ke fai ʻa e meʻa ʻoku tonú pe halá. Kapau naʻe fili ʻa ʻĀtama ke ne talangofua ki he ʻOtuá, naʻe mei lava ke ne moʻui taʻengata ʻi Palataisi.

 6. ʻI he talangataʻa ʻa ʻĀtama ki he ʻOtuá, ko e hā naʻe mole meiate iá? ʻOku anga-fēfē hono uesia kitautolu ʻe he meʻá ni?

⁶ ʻI he taimi naʻá ne talangataʻa ai ki he ʻOtuá pea tautea mate aí, naʻe totongi ai ʻe ʻĀtama ha mahuʻinga māʻolunga ʻaupito. Naʻe mole meiate ia ʻene kaumeʻa makehe mo Sihová, ʻene moʻui haohaoá, mo hono ʻapi Palataisí. (Sēnesi 3:17-19) Naʻe fili ʻa ʻĀtama mo ʻIvi ke na talangataʻa ki he ʻOtuá, ko ia naʻe ʻikai ai ha ʻamanaki kiate kinaua. Koeʻuhi ko e meʻa naʻe fai ʻe ʻĀtamá, naʻe “hoko mai ʻa e angahalá ki he māmaní pea mo e maté fakafou ʻi he angahalá, pea ʻoku pehē ʻa e mafola ʻa e maté ki he kakai kotoa pē koeʻuhi kuo nau angahala kotoa pē.” (Loma 5:12) ʻI he faiangahala ʻa ʻĀtamá, naʻá ne “fakatau atu” ai ia mo kitautolu ki he pōpula ki he angahalá mo e maté. (Loma 7:14) ʻOku ʻi ai ha ʻamanaki kiate kitautolu? ʻIo, ʻoku ʻi ai.

7, 8. Ko e hā ʻa e huhuʻi?

⁷ Ko e hā ʻa e huhuʻi? Ko e foʻi fakakaukau ʻo e huhuʻí ʻoku kau tefito ki ai ʻa e meʻa ʻe ua. ʻUluakí, ko ha huhuʻi ko e mahuʻinga ia ʻoku totonu ke fakatauʻatāinaʻi ʻaki ha taha pe totongi fakafoki mai ʻaki ha meʻa. Uá, ko e huhuʻí ko e mahuʻinga ia ʻokú ne ʻufiʻufi, pe totongi, ʻa e fakamole ʻo ha meʻa.

⁸ ʻOku ʻikai ha tangata ʻe lava ke ne totongi ʻa e fuʻu maumau naʻe fai ʻe ʻĀtama ʻi heʻene faiangahala pea ʻomai ai ʻa e maté kiate kitautolú. Ka naʻe tokonaki mai ʻe Sihova ʻa e founga ke fakatauʻatāinaʻi ai kitautolu mei he angahalá mo e maté. Tau ako angé ki he anga ʻo e ngāue ʻa e huhuʻí mo e founga ʻe lava ke tau maʻu ʻaonga ai mei aí.

 9. ʻE lava fēfē ke totongi ʻa e huhuʻí?

⁹ ʻOku ʻikai ha taha ʻo kitautolu ʻe faifai ange pea lava ke ne totongi ʻa e huhuʻi ki he moʻui haohaoa naʻe fakamoleki ʻe ʻĀtamá. Ko e hā hono ʻuhingá? Koeʻuhí ko kitautolú kotoa ʻoku tau taʻehaohaoa. (Saame 49:7, 8) Ko e huhuʻi naʻe pau ke totongí ko ha toe moʻui fakaetangata haohaoa ia ʻe taha. Ko e ʻuhinga ia ʻoku ui ai “ko ha huhuʻi fehoanakimālie.” (1 Tīmote 2:6) Ko e huhuʻí naʻe pau ke mahuʻinga tatau ia mo e moʻui naʻe fakamoleki ʻe ʻĀtamá.

10. Naʻe anga-fēfē hono tokonaki mai ʻe Sihova ʻa e huhuʻí?

¹⁰ Naʻe anga-fēfē hono tokonaki mai ʻe Sihova ʻa e huhuʻí? Naʻe fekauʻi mai ʻe Sihova ʻa hono ʻAlo mahuʻinga tahá ki he māmaní. Ko e ʻAlo ko ení, ʻa Sīsū, ʻa ʻene ʻuluaki fakatupú tonu. (1 Sione 4:9, 10) Naʻe loto-lelei ʻa Sīsū ke liʻaki ʻa ʻene Tamaí mo hono ʻapi ʻi hēvaní. (Filipai 2:7) Naʻe hiki hifo ʻe Sihova ʻa Sīsū mei hēvani ki māmani, pea naʻe ʻaloʻi mai ʻa Sīsū ko ha tangata haohaoa, ʻo ʻikai haʻane angahala.​—Luke 1:35.

11. Naʻe lava fēfē ke hoko ha tangata ʻe taha ko e huhuʻi maʻá e faʻahinga kotoa ʻo e tangatá?

¹¹ Ko e ʻuluaki tangatá, ʻa ʻĀtama, naʻá ne fakamoleki ʻa e moʻui haohaoa ki he faʻahinga kotoa ʻo e tangatá ʻi heʻene talangataʻa kia Sihová. ʻE lava ke toʻo ʻe ha tangata ʻe taha ʻa e maté mei he fānau kotoa ʻa ʻĀtamá? ʻIo. (Lau ʻa e Loma 5:19.) Ko Sīsū, ʻa ia naʻe ʻikai ʻaupito ke faiangahalá, naʻá ne foaki ʻa ʻene moʻui haohaoá ko ha huhuʻi. (1 Kolinitō 15:45) Ko ʻene moʻui haohaoá naʻe lava ke ngāueʻaki ia ke ne toʻo atu ʻa e maté mei he fānau kotoa ʻa ʻĀtamá.​—1 Kolinitō 15:21, 22.

12. Ko e hā naʻe pau ai ke faingataʻaʻia lahi fau pehē ʻa Sīsuú?

¹² ʻOku fakamatalaʻi ʻe he Tohi Tapú ʻa e lahi ʻo e faingataʻaʻia ʻa Sīsū ki muʻa ke ne pekiá. Naʻe uipi anga-fakamamahi ia, tutuki ki ha ʻakau fakamamahi, pea ʻai ke ne kātekina ha pekia māmālie mo langa lahi. (Sione 19:1, 16-18, 30) Ko e hā naʻe pau ai ke faingataʻaʻia lahi fau pehē ʻa Sīsuú? Koeʻuhí naʻe taukaveʻi ʻe Sētane ʻe ʻikai ke mateaki ha tangata ki he ʻOtuá kapau ʻe ʻahiʻahiʻi kakaha. Naʻe fakamoʻoniʻi ʻe Sīsū ʻe lava ke mateaki ki he ʻOtuá ha tangata haohaoa ʻo aʻu ki heʻene faingataʻaʻia lahí. Sioloto atu ki hono laukauʻaki ʻe Sihova ʻa Sīsuú!​—Palōveepi 27:11; sio ki he Fakamatala ʻi he Ngataʻangá 15.

13. Naʻe anga-fēfē hono totongi ʻa e huhuʻí?

¹³ Naʻe anga-fēfē hono totongi ʻa e huhuʻí? Naʻe ʻoange ʻe Sīsū ki heʻene Tamaí ʻa e mahuʻinga ʻo ʻene moʻuí. ʻI he taʻu 33, ʻi Nīsani 14 ʻi he tohimāhina faka-Siú, naʻe fakaʻatā ai ʻe Sihova ʻa e ngaahi fili ʻo Sīsuú ke nau tāmateʻi ia. (Hepelū 10:10) ʻI he hili mei ai ʻa e ʻaho ʻe tolu, naʻe toe fakamoʻui ʻe Sihova ʻa Sīsū, ʻo ʻikai ko ha tangata, ka ko ha tokotaha laumālie. Ki mui ai, ʻi he toe foki ʻa Sīsū ki heʻene Tamaí ʻi hēvaní, naʻá ne foaki ai ʻa e mahuʻinga ʻo ʻene moʻui haohaoa fakaetangatá kia Sihova ko ha huhuʻi. (Hepelū 9:24) ʻI hono totongi ko eni ʻa e huhuʻí, ʻoku tau maʻu ai ʻa e faingamālie ke fakatauʻatāinaʻi mei he angahalá mo e maté.​—Lau ʻa e Loma 3:23, 24.

14, 15. Ko e hā kuo pau ke tau fai ke fakamolemoleʻi ai ʻetau ngaahi angahalá?

¹⁴ Kuo tau ʻosi maʻu ʻaonga mei he meʻaʻofa lahi taha ʻa e ʻOtuá. Tau sio angé ki he founga ʻo ʻetau maʻu ʻaonga he taimi ní mo e founga te tau maʻu ʻaonga ai ʻi he kahaʻú.

¹⁵ Fakamolemoleʻi ʻetau ngaahi angahalá. ʻOku faingataʻa ke fai ʻa e meʻa ʻoku totonú ʻi he taimi kotoa pē. ʻOku tau fai ʻa e ngaahi fehālaaki, pea ʻoku tau leaʻaki mo fai ʻi he taimi ʻe niʻihi ʻa e meʻa ʻoku hala. (Kolose 1:13, 14) ʻE lava fēfē ke fakamolemoleʻi kitautolu? ʻOku totonu ke tau fakatomala moʻoni ʻi he meʻa kuo tau faí pea kole anga-fakatōkilalo kia Sihova ke ne fakamolemoleʻi kitautolu. ʻE lava leva ai ke tau maʻu ʻa e falala pau ʻoku fakamolemoleʻi ʻetau ngaahi angahalá.​—1 Sione 1:8, 9.

16. Ko e hā kuo pau ke tau fai ke maʻu ai ha konisēnisi leleí?

¹⁶ ʻE lava ke tau maʻu ha konisēnisi lelei. Kapau ʻoku tala mai ʻe hotau konisēnisí kuo tau fai ha meʻa ʻoku hala, ʻoku tau ongoʻi halaia, naʻa mo e siva ʻa e ʻamanakí mo ongoʻi taʻeʻaonga. Ka ʻoku ʻikai fiemaʻu ia ke tau foʻi. Kapau te tau kōlenga kia Sihova ki ha fakamolemole, ʻe lava ke tau fakapapauʻi te ne fanongo mai kiate kitautolu pea fakamolemoleʻi kitautolu. (Hepelū 9:13, 14) ʻOku fiemaʻu mai ʻe Sihova ke tau talanoa ange kiate ia ʻo fekauʻaki mo haʻatau faʻahinga palopalema pē mo ha ngaahi vaivaiʻanga. (Hepelū 4:14-16) Ko hono olá, ʻe lava ke tau melino ai mo e ʻOtuá.

17. Ko e hā ʻa e ongo tāpuaki ʻoku malava koeʻuhi ko e pekia ʻa Sīsū maʻatautolú?

¹⁷ ʻOku tau maʻu ʻa e ʻamanaki ʻo e moʻui taʻengatá. “Ko e totongi ki he angahalá ko e mate, ka ko e meʻaʻofa ʻoku foaki ʻe he ʻOtuá ko e moʻui taʻengata ʻia Kalaisi Sīsū ko hotau ʻEikí.” (Loma 6:23) Koeʻuhi naʻe pekia ʻa Sīsū maʻatautolu, ʻe lava ke tau moʻui taʻengata pea fiefia ʻi he moʻui haohaoa. (Fakahā 21:3, 4) Ka ko e hā kuo pau ke tau fai ke tau maʻu ai ʻa e ongo tāpuaki ko iá?

18. ʻOku anga-fēfē ʻetau ʻiloʻi ʻoku ʻofa ʻa Sihova ʻiate kitautolu?

¹⁸ Fakakaukau atu ki he maongo ki ho lotó ʻa e taimi ʻoku ʻoatu ai ʻe ha taha kiate koe ha meʻaʻofa fakaʻofoʻofa. Ko e huhuʻí ʻa e meʻaʻofa mahuʻinga taha ʻi he meʻaʻofa kotoa, pea ʻoku totonu ke tau houngaʻia lahi ʻia Sihova ʻi he meʻa ko iá. ʻOku tala mai ʻe he Sione 3:16 “naʻe ʻofa lahi ʻaupito ʻa e ʻOtuá ki he māmaní ʻo ne foaki ai hono ʻAlo tofu-pē-taha-ne-fakatupú.” ʻIo, ʻoku ʻofa lahi ʻaupito ʻa Sihova ʻiate kitautolu ʻo ne foaki mai ʻa hono ʻAlo mahuʻingá, ʻa Sīsū. Pea ʻoku tau ʻiloʻi ʻoku ʻofa foki mo Sīsū ʻiate kitautolu, koeʻuhí naʻá ne loto-lelei ke pekia maʻatautolu. (Sione 15:13) Ko e meʻaʻofa ko e huhuʻí ʻoku totonu ke ne fakatuipauʻi kiate koe ʻoku ʻofa moʻoni ʻa Sihova mo Sīsū ʻiate koe.​—Kalētia 2:20.

19, 20. (a) ʻE lava fēfē ke ke hoko ko e kaumeʻa ʻo Sihova? (e) ʻE lava fēfē ke ke fakahāhā ʻokú ke tali ʻa e feilaulau huhuʻi ʻa Sīsuú?

¹⁹ ʻI hoʻo ako ko eni ʻo fekauʻaki mo e ʻofa lahi ʻa e ʻOtuá, ʻe lava fēfē ke ke hoko ko hono kaumeʻa? ʻOku ʻikai faingofua ke ʻofa ʻi ha taha ʻoku ʻikai te ke ʻiloʻi. ʻOku pehē ʻi he Sione 17:3 ʻe lava ke tau hoko ʻo ʻiloʻi ʻa Sihova. ʻI hoʻo fai ení, ʻe lahi ai hoʻo ʻofa kiate iá, te ke loto ke fakahōifuaʻi ia, pea te ke hoko ai ko hono kaumeʻa. Ko ia hanganaki ako fekauʻaki mo Sihova ʻaki hono ako ʻa e Tohi Tapú.​—1 Sione 5:3.

²⁰ Tali ʻa e feilaulau huhuʻi ʻa Sīsuú. ʻOku pehē ʻe he Tohi Tapú ko e “tokotaha ʻokú ne ngāueʻi ʻa e tui ki he ʻAló ʻokú ne maʻu ʻa e moʻui taʻengatá.” (Sione 3:36) ʻOku ʻuhinga ki he hā ʻa e ngāueʻi ʻa e tuí? ʻOku ʻuhinga iá ke fai ʻa e meʻa naʻe akoʻi mai ʻe Sīsū ke tau faí. (Sione 13:15) Heʻikai lava ke tau leaʻaki pē ʻoku tau tui kia Sīsū. Ke tali ʻa e huhuʻí, kuo pau ke tau ngāue ki heʻetau tuí. ʻI he Sēmisi 2:26, ʻoku tau lau ai: “[ʻOku] mate ʻa e tuí ʻi he ʻikai ha ngāué.”

21, 22. (a) Ko e hā ʻoku totonu ai ke tau maʻu ʻi he taʻu taki taha ʻa e Fakamanatu ʻo e pekia ʻa Kalaisí? (e) Ko e hā ʻe lāulea ki ai ʻi he Vahe 6 mo e 7?

²¹ Maʻu ʻa e Fakamanatu ʻo e pekia ʻa Kalaisí. ʻI he efiafi ki muʻa ke pekia ʻa Sīsuú, naʻá ne akoʻi mai ke tau fakamanatu ʻa ʻene pekiá. ʻOku tau fai eni ʻi he taʻu taki taha, pea ʻoku ui ia ko e Fakamanatu pe ko e “Kai Efiafi ʻa e ʻEikí.” (1 Kolinitō 11:20; Mātiu 26:26-28) ʻOku fiemaʻu ʻe Sīsū ke tau manatuʻi naʻá ne foaki ʻa ʻene moʻui haohaoá ko ha huhuʻi maʻatautolu. Naʻá ne pehē: “Hanganaki fai eni ko hoku fakamanatu.” (Lau ʻa e Luke 22:19.) ʻI hoʻo maʻu ʻa e Fakamanatú, ʻokú ke fakahāhā ai ʻokú ke manatuʻi ʻa e huhuʻí mo e ʻofa lahi ʻa Sihova mo Sīsū kiate kitautolú.​—Sio ki he Fakamatala ʻi he Ngataʻangá 16.

²² Ko e huhuʻí ʻa e meʻaʻofa lahi taha kuo faifai ange pea tau maʻú. (2 Kolinitō 9:14, 15) Ko e meʻaʻofa mahuʻinga ko iá ʻe aʻu ʻo maʻu ʻaonga mei ai ʻa e kakai ʻe laui miliona kuo nau ʻosi maté. ʻE lāulea ʻi he Vahe 6 mo e 7 ki he founga ʻe malava ai iá.