Kai Efiafi Fakaʻosi ʻa Sīsuú

Naʻe kātoangaʻi ʻe he kau Siú ʻa e Pāsová ʻi he taʻu kotoa pē ʻi he ʻaho hono 14 ʻo e māhina ko Nīsaní. Naʻe fai ení ke fakamanatu ai kiate kinautolu ʻa hono fakatauʻatāinaʻi kinautolu ʻe Sihova mei he nofo pōpula ʻi ʻIsipité pea ʻomai kinautolu ki he Fonua ʻo e Talaʻofá. ʻI he taʻu 33 T.S., naʻe kātoangaʻi ai ʻe Sīsū mo ʻene kau ʻapositoló ʻa e Pāsová ʻi ha loki ʻi ʻolunga ʻi Selusalema. ʻI he ʻosi ʻa e kaí, naʻe pehē ʻe Sīsū: ‘ʻE lavakiʻi au ʻe ha taha ʻo kimoutolu.’ Naʻe ʻohovale ʻa e kau ʻapositoló, pea nau ʻeke kia Sīsū: ‘Ko hai ia?’ Naʻe pehē ʻe Sīsū: ‘Ko e tangata ko ē ʻoku ou ʻoange ki ai ʻa e mā ko ení.’ Naʻá ne ʻoange leva ha meʻi mā kia Siutasi ʻIsikaliote. ʻI he taimi pē ko iá, naʻe tuʻu hake ʻa Siutasi ʻo ne mavahe mei he lokí.

Naʻe fai leva ʻe Sīsū ha lotu, peá ne pakipaki ha mā, ʻo ne ʻoange ki he toenga ʻo e kau ʻapositoló. Naʻá ne pehē: ‘Kai ʻa e mā ko ení. ʻOkú ne fakafofongaʻi ʻa hoku sinó, ʻa ia te u foaki maʻamoutolu.’ Naʻá ne lotuʻi leva ha uaine peá ne ʻoange ki heʻene kau ʻapositoló. Naʻá ne pehē: ‘Inu ʻa e uaine ko ení. ʻOkú ne fakafofongaʻi ʻa hoku totó, ʻa ia te u foaki koeʻuhi ke lava ʻo fakamolemoleʻi ai ʻa e angahalá. ʻOku ou palōmesi atu te mou hoko ko e ngaahi tuʻi fakataha mo au ʻi hēvani. Fai eni ʻi he taʻu kotoa pē ke fakamanatu ʻaki au.’ ʻOku kei fakatahataha pē ʻa e kau muimui ʻo Sīsuú ʻi he efiafi ko iá ʻi he taʻu kotoa pē. Ko e fakataha ko iá ʻoku ui ia he taimí ni ko e Kai Efiafi ʻa e ʻEikí.

Hili ʻa e kaí, naʻe fakafekiki ʻa e kau ʻapositoló pe ko hai ʻiate kinautolu naʻe mahuʻinga tahá. Ka naʻe tala ange ʻe Sīsū: ‘Ko e toko taha ʻoku lahi taha ʻi homou lotolotongá ʻa e toko taha ʻokú ne vakai kiate ia ʻokú ne siʻisiʻi tahá, ʻo siʻi hono mahuʻingá.

‘Ko hoku ngaahi kaumeʻa kimoutolu. ʻOku ou tala atu ʻa e meʻa kotoa pē ʻoku loto ʻeku Tamaí ke tala atu kiate kimoutolú. Kuo vavé ni ke u ʻalu ki heʻeku Tamai ʻi hēvaní. Te mou nofo pē heni, pea ʻe ʻiloʻi ʻe he kakaí ko kimoutolú ko ʻeku kau ākonga ʻi hoʻomou feʻofaʻakí. Kuo pau ke mou feʻofaʻaki ʻo hangē ko ʻeku ʻofa ʻiate kimoutolú.’

Fakaʻosí, naʻe lotu ʻa Sīsū ʻo ne kole kia Sihova ke ne maluʻi ʻa e kau ākongá kotoa. Naʻá ne kole kia Sihova ke ne tokoniʻi kinautolu ke nau ngāue fakataha ʻi he melino. Naʻá ne lotu ke fakamāʻoniʻoniʻi ʻa e huafa ʻo Sihová. Naʻe fai leva ʻe Sīsū mo ʻene kau ʻapositoló ha hiva fakahīkihiki kia Sihova pea nau hū ki tuʻa. Naʻe ofi ʻa e taimi ke puke ai ʻa Sīsuú.