Ko Hono Puke ʻo Sīsuú

Naʻe lue ʻa Sīsū mo ʻene kau ʻapositoló ʻo fou atu ʻi he Teleʻa Kitiloné ki he Moʻunga ʻŌlivé. Ko e mahili atu ia ʻa e tuʻapoó, pea naʻe kātoa ʻa e māhiná. ʻI heʻenau aʻu ki he ngoue ko Ketisemaní, naʻe pehē ange ʻe Sīsū: “Mou nofo heni ʻo hanganaki leʻo.” Naʻe toe kiʻi mavahe atu leva ʻa Sīsū ki he ngoué peá ne tūʻulutui. ʻI heʻene loto-mamahi lahí, naʻá ne lotu kia Sihova: “Tuku ke fai hoʻoú finangalo.” Naʻe fekauʻi mai leva ʻe Sihova ha ʻāngelo ke ne fakalototoʻaʻi ʻa Sīsū. ʻI he foki ʻa Sīsū ki heʻene kau ʻapositoló, naʻá ne ʻilo ʻoku mohe ʻa e toko tolú. Naʻá ne pehē ange, ‘Mou ʻā hake! ʻOku ʻikai ko ha taimi eni ke mohe ai! Kuo hoko mai ʻa e houa ke tuku ai au ki he nima ʻo hoku ngaahi filí.’

ʻIkai fuoloa kuo aʻu mai ʻa Siutasi, ʻo ne taki mai ha fuʻu kakai ʻoku nau toʻo heletā mo e pōvai. Naʻá ne ʻiloʻi ʻa e feituʻu ʻe maʻu ai ʻa Sīsuú he naʻa nau faʻa haʻu ki he ngoue ko ení. Naʻe tala ʻe Siutasi ki he kau sōtiá te ne ʻai ke nau ʻiloʻi ʻa Sīsū. Naʻá ne lue hangatonu kia Sīsū ʻo ne pehē: ‘Mālō e lelei, Faiako,’ peá ne ʻuma leva kiate ia. Naʻe pehē ange ʻe Sīsū: ‘Siutasi, ʻokú ke lavakiʻi koā au ʻaki ha ʻuma?’

Naʻe manga atu ki muʻa ʻa Sīsū ʻo ne ʻeke ki he fuʻu kakaí: “Ko hai ʻoku mou kumi ki aí?” Naʻa nau pehē ange: “Ko Sīsū ko e Nāsaletí.” Naʻá ne tali ange leva: “Ko au ia,” pea naʻe holomui ʻa e kau tangatá ʻo nau tō ki lalo. Naʻe toe ʻeke ʻe Sīsū ki he fuʻu kakaí: “Ko hai ʻoku mou kumi ki aí?” Naʻa nau toe pehē ange: “Ko Sīsū ko e Nāsaletí.” Naʻe tali ange ʻe Sīsū: ‘Naʻá ku ʻosi tala atu ko au ia. Tuku ange ʻa e kau tangatá ni ke nau ō.’

ʻI hono ʻiloʻi ʻe Pita ʻa e meʻa naʻe hokó, naʻá ne toʻo hake ʻene heletaá ʻo tuʻusi ʻa e telinga ʻo Malekusí, ko ha sevāniti ʻa e taulaʻeiki lahí. Ka naʻe ala ʻa Sīsū ki he telinga ʻo e tangatá ʻo ne fakamoʻui. Peá ne pehē leva kia Pita: ‘Fakafoki hoʻo heletaá. Kapau te ke tau ʻaki ha heletā, te ke mate ʻi ha heletā.’ Naʻe puke ʻe he kau sōtiá ʻa Sīsū ʻo haʻi hono ongo nimá, pea naʻe hola ʻa e kau ʻapositoló. Naʻe ʻave leva ia ʻe he fuʻu kakaí kia ʻĀnasi, ko e ʻeiki taulaʻeikí. Naʻe fakaʻekeʻeke ʻe ʻĀnasi ʻa Sīsū pea ʻave ia ki he fale ʻo Kaiafasi ko e Taulaʻeiki Lahí. Ka ko e hā ʻa e meʻa naʻe hoko ki he kau ʻapositoló?