Nofo Moʻui Lelei ʻi he Tui!

Ngaahi Meʻa Mahuʻinga Meia Taitusi

KO E ngaahi fakatahaʻanga Kalisitiane ʻi he motu he Meteleniane ko Keliti naʻe fiemaʻu ke fai ha tokanga fakalaumālie ki ai. Ko hai ʻe lava ʻo tokoni kiate kinautolú? Ko e kaungāngāue ʻa e ʻapositoló ko Paulá, ko Taitusi! Naʻá ne lototoʻa, poto ke fai akonaki, faivelenga ki he ngaahi ngāue leleí, pea moʻui lelei ʻi he tui.

Naʻe ʻaʻahi ʻa Paula ki Keliti ʻi he vahaʻa ʻo ʻene nofo pōpula ʻuluaki mo hono ua ʻi Lomá. Naʻá ne tuku ʻa Taitusi ʻi he motú ke ne fakatonutonu ʻa e ngaahi meʻa pea ke fakanofo ha kau mātuʻa ʻi he fakatahaʻangá. Naʻe toe pau ke fai ʻe Taitusi ha valoki ki he kau faiako loí pea ke ne fokotuʻu ha faʻifaʻitakiʻanga lelei. Ko e ngaahi meʻá ni kotoa pē ʻoku hā ia ʻi he tohi ʻa Paula kia Taitusí, ʻa ia naʻe lī mei Masitōnia ʻi he vahaʻa ʻo e taʻu 61 mo e 64 T.S. ʻI he ngāueʻaki ʻa e akonaki ʻa e ʻapositoló ʻe tokoni ia ki he kau ʻovasia mo e kaungā-tui ʻi hotau ʻaho ní ke nau lototoʻa, faivelenga, pea moʻui lelei fakalaumālie.

Ko e Hā ʻOku Fiemaʻu mei he Kau ʻOvasiá?

Naʻe fiemaʻu ke fili ha kau ʻovasia pea ke fakaleleiʻi ha ngaahi palopalema mamafa. (1:​1-16) Ke fakanofo ha taha ke ne hoko ko ha ʻovasia, ko e tangata ko iá naʻe pau ke ne ʻataʻatā mei hano lauʻi, ko e tokotaha ʻoku faʻifaʻitakiʻanga lelei ʻi heʻene moʻui fakafoʻituituí mo e moʻui fakafāmilí, ʻoku anga talitali kakai, mo fakakaukau mafamafatatau, mo mapuleʻi kita. Naʻe pau ke ne akoʻi ʻa e meʻa ʻoku moʻoní pea ke enginaki mo valokiʻi ʻa kinautolu ʻoku fakahā ʻenau fakakaukau fakafepakí. Naʻe fiemaʻu ke ʻi ai ha lototoʻa koeʻuhi naʻe ʻi ai ʻa e kau tangata naʻe ʻikai malava mapuleʻi ʻi he fakatahaʻangá naʻe pau ke ʻai ke nau fakalongolongo. Naʻe tautefito ʻa e meʻá ni kiate kinautolu naʻa nau toe piki ki he kamú, he naʻa nau veuveuki ʻa e ngaahi fāmilí hono kotoa. Naʻe pau ke fai ha valoki mamafa koeʻuhi ke tauhi ʻa e fakatahaʻangá ke moʻui lelei fakalaumālie. ʻI he ʻahó ni ʻoku toe fiemaʻu foki ki he kau ʻovasia Kalisitiané ke nau lototoʻa ke nau fai ha valoki mo ha enginaki, ko ʻenau taumuʻá ke langa hake ʻa e fakatahaʻangá.

Ngāueʻaki ʻa e Akonaki Fakatupu Moʻui Lelei

Naʻe pau ke fai ʻe Taitusi ʻa e akonaki fakatupu moʻui lelei fakalaumālié. (2:​1-15) Ko e kau tangata taʻu motuʻá ke nau hoko ko e kau faʻifaʻitakiʻanga ʻi he tōʻonga mafamafatatau, loto-fakamātoato, ʻatamai lelei, tui, ʻofa, mo e faʻa kātaki. Ko e kau fefine taʻu motuʻá ke “ngali maʻoniʻoni ʻenau anga.” ʻI heʻenau hoko ko e kau “akoʻanga meʻa lelei,” te nau tokoni ai ki he kau fefine taʻu siʻi angé ke totonu ʻenau fakakaukau ki honau ngaahi fatongia ko e ngaahi uaifi mo e ngaahi faʻē. Ko e kau tangata kei talavou angé ke nau angafakamaʻumaʻu, pea ko e kau pōpulá ke nau anganofo ki honau ngaahi ʻeikí ʻi he founga ke teungaʻia ai ʻa e akonaki ʻa e ʻOtuá. Ko e Kalisitiane kotoa pē ke nau fakafisi mei he angataʻefakaʻotuá peá ne moʻui angafakamaʻumaʻu ʻi he ngaahi meʻa ko ia ʻoku tuʻu ní he lolotonga ʻa e tatali ki he fakahā lāngilangi mai ʻo e ʻOtuá mo Sīsū Kalaisi, “ʻa ia naʻa ne foaki ia ʻe ia koeʻuhi ko kitautolu; koeʻuhi ke ne huhuʻi kitautolu mei he maumau lao kotoa; pea fakamaʻa maʻana hano kakai tonu oʻona, ha kakai ʻoku mamahiʻi ʻa e ngaahi ngaue lelei.” ʻI hono ngāueʻaki ʻa e akonaki fakatupu moʻui lelei pehe ní, ʻofa ke tau toe hoko ʻo ‘teungaʻia ʻa e akonaki ʻa e ʻOtua.’

Ko e akonaki fakaʻosi ʻa Paulá ʻokú ne pouaki ʻa e moʻui lelei fakalaumālié. (3:​1-15) ʻOku pau ke fakahāhā ʻa e anganofo totonu ki he kau pulé pea ke fakatupu ʻa e fakakaukau lelei. ʻOku maʻu ʻe he kau Kalisitiané ʻa e ʻamanaki ko e moʻui taʻengata, pea ko e ngaahi lea ko ia ʻa Paulá naʻá ne hanga ʻo fakamamafaʻi ke fakalototoʻaʻi kinautolu ke nau tauhimaʻu ʻi heʻenau fakakaukaú ʻa e ngaahi ngāue leleí. Naʻe pau ke fakaʻehiʻehi mei he ngaahi fehuʻi hā ngali vale mo e ngaahi fetauʻaki ʻi he Laó, mo ha taha te ne toe fokotuʻu ha siasi mavahevahe ke liʻekina ia ʻi he hili hano valokiʻi ia ʻo tuʻo ua. ʻI he ngāueʻaki ʻe he kau mātuʻá ʻa e ngaahi akonaki pehē ʻi he ʻaho ní, ko kinautolu mo honau kaungā-tuí te nau nofo moʻui lelei ʻi he tui.

[Puha/Fakatātā ʻi he peesi 21]

ʻOua ʻe Pōpula ki he Uaine: Neongo heʻikai ke fai akonaki ʻa e kau fefiné ki he kau tangatá ʻi he fakatahaʻangá, ko e fanga tuofāfine ko ia ʻoku motuʻa angé te nau lava ʻo fakahinohinoʻi fakaekinautolu ʻa e kau fefine ʻoku kei iiki angé. Ka ke ola lelei ʻi he meʻá ni, kuo pau ke ngāueʻaki ʻe he kau fefine taʻu motuʻá ʻa e ngaahi lea ʻa Paulá: “Ke pehe foki mo e kau finemātutuʻa; ke ngali maʻoniʻoni ʻenau anga, ʻo ʻoua ko e kau fakakovi, ʻumaʻā ko ha niʻihi ʻoku popula ki he inu kava lahi; ka ko e akoʻanga meʻa lelei.” (Taitusi 2:​1-5; 1 Tīmote 2:​11-14) Koeʻuhi ko e tokanga mo ʻiloʻilo ʻo kau ki he nunuʻa ʻo e inú, kuo pau ke anga mafamafatatau ʻa e kau ʻovasiá, kau sevānití, mo e kau fefine kuo taʻu motuʻá, ʻo ʻoua te nau nofo ki he fuʻu inu uaine lahi. (1 Tīmote 3:​2, 3, 8, 11) Kuo pau ke fakaʻehiʻehi ʻa e kau Kalisitiane kotoa pē mei he konaá pea ʻoku fiemaʻu ke taʻofi mei he inu ʻo e ngaahi inu ʻolokaholó he lolotonga ʻenau fai “ʻa e ngaue toputapu” ko e malangaʻi ʻo e ongoongo leleí.​—Loma 15:16; Palōvepi 23:​20, 21.