Ko e Fakamaau Fakaʻosí

“ʻI HOʻO maté ʻe fakamamahiʻi ho laumālié ʻataʻatā pē; ko ha heli ia ki ai: ka ʻi he ʻaho ʻo e fakamaaú ko ho sinó ʻe fakatahaʻi ia mo ho laumālié, pea ko e toki heli lōua ia, ʻe pupuha ho laumālié ko e ngaahi tulutā toto, pea ko ho sinó ʻe fonu ia ʻi he mamahi lahi.”

KO E anga ʻeni ʻo e fakamatala ʻe ha tangata malanga ʻo e senituli hono 19 ko C. H. Spurgeon ʻo kau ki he anga ʻo e vakai ʻa e haʻa-faifekaú ki he ʻaho fakamaaú pea mo e fakamamahiʻi ʻo e kau malaʻiá. Ko e tangata tā fakatātā ʻĪtali ko Michelangelo naʻá ne maʻu ha tui fakatupu-manavahē meimei tatau, ʻo hangē ko ia ʻoku hā ʻi heʻene tā valivali “Ko e Fakamaau Fakaʻosí” (ko ha konga ʻo ia ʻoku hā ʻi ʻolungá), ʻi he holisi ʻo e fale lotu ko Sistine ʻi Loma. ʻOku pehē ʻe he The New Encyclopædia Britannica ʻo kau ki he tā valivali ko ʻení: “Ko Kalaisi ʻi he fai Fakamaaú ko ha ʻotua ia ʻoku faifakamanaʻi kae ʻikai ko ha tokotaha fai fakamoʻui Kalisitiane, ʻo ne tokanga lahi ange ia ki he fakamalaʻiaʻi ʻa e faʻahinga ʻo e tangatá ʻi hono talitali lelei ʻa e kau monūʻiá ki hēvaní.”

Tokāteline ʻa e Puleʻanga-Haʻa-Kalisitiané

ʻI he ngaahi senituli kuo maliu atú, ko e ʻaho fakamaaú mo e afi ʻo helí ko e ongo kaveinga manakoa ia ki he ngaahi malangá. Ko e kau malanga ʻo hangē ko C. H. Spurgeon naʻa nau kaikaila ʻaki mei honau tuʻunga-malangá ʻa e ngaahi fakamatala maeʻeeʻa lelei ʻo kau ki he ngaahi fakamamahi fakalilifu ʻoku talitali mai ki he kau angahalá. ʻI he ngaahi ʻahó ni, ko e faʻahinga malanga peheé ʻoku tātātaha pē ha fanongo ki ai. Ka ʻoku kei hoko pē ʻa e afi ʻo helí mo e fakamaau fakaʻosí ko e ngaahi akonaki ʻa e meimei ngaahi siasi kotoa pē.

Ko e ngaahi lotu lahi taha ʻi he Puleʻanga-Haʻa-Kalisitiané ʻoku nau loto-tatau mo e akonaki ʻa e Katolika Lomá ʻo pehē ko e ngaahi fakamaau ʻa e ʻOtuá ʻoku fai ia ʻi he konga ʻe ua. ʻUluaki, ʻoku ʻi ai ʻa e “fakamaau makehe.” ʻI he mate ʻa ha tokotaha, ʻoku lau ko hono laumālie taʻefaʻamaté ʻoku fakamaauʻi pea tuku ke ʻave leva ia ʻo taʻengata ki heli pe ko hēvani.a Pea toki hoko ai ʻa e fakamaau fakaʻosí pe fakalūkufuá, ʻi he ngataʻanga ʻo e taimí ʻa ia ʻe toe fokotuʻu hake ai ʻa e ngaahi sino ʻo e kau maté pea toe fakatahaʻi ai mo honau ngaahi laumālie taʻefaʻamaté.

ʻI he ʻaho fakamaau ko ʻení, ko e ngaahi laumālie ʻi hēvaní te nau nofo pē ai pea ʻe fakatahaʻi ai mo honau ngaahi sino kuo ʻosi ʻai ke taʻefaʻaʻauha. Ko kinautolu ʻoku faingataʻaʻia ʻi helí te nau nofo pē ai, pea ko honau ngaahi laumālié ʻe toe fakatahaʻi ai mo honau ngaahi sino taʻefaʻaʻauha kuo fokotuʻu hake mei he maté. Fakatatau ki he niʻihi, ʻoku fakatupunga ʻe he meʻá ni ke toe mātuʻaki mamahi ange ʻa honau fakamamahiʻí. Ko kinautolu ʻoku nau kei moʻui ʻi he tuʻunga ko e faʻahinga ʻo e tangatá ʻoku ʻikai te nau mate. ʻOku fakamaauʻi pē kinautolu lolotonga ʻenau kei moʻuí pea nau ʻalu fakahangatonu ki hēvani pe ko heli ʻo hangē pē ko ia ʻoku lau ki he “sino mo e laumālie.”

Ko e tuʻunga ʻo pehē ko e fiemaʻu nai ke kātekina ʻa e ngaahi mamahi taʻealaleaʻaki ʻi he afi ʻo helí ʻokú ne ʻai ʻa e kaveinga ʻo kau ki he fakamaau fakaʻosi ʻi he toʻukupu ʻo Sīsū Kalaisí ko ha meʻa fakamanavahē ke fai ha fakakaukau ki ai. Koeʻuhi ko e meʻa ko ʻení, te ke ʻohovale ʻi he ʻilo, ko e moʻoni, ko e ngaahi fakamaau ʻa e ʻOtuá ʻoku faʻa hoko ia ko e meʻa fakatupu fiefia pea ko e ʻAho Fakamaau ko iá ko e taimi fakafiefia lahi taha ia ʻi he kotoa ʻo e hisitōlia ʻo e faʻahinga ʻo e tangatá? ʻOku hoko fēfē ʻa e meʻa ko ʻení?

[Fakamatala ʻi lalo]

[Maʻuʻanga ʻo e Tā ʻi he peesi 3]

Random/Sipa Icono