ʻEveʻeva ʻAki ʻa e Loto Kuo Ngaohi ke Taha

“E Jihova, ako kiate au . . . Gaohi ke taha be hoku loto ke manavahe ki ho huafa.”​—SĀME 86:11, PM.

 1. ʻI he founga fē ʻoku fakapaleʻi ai ʻe Sihova ʻa e faʻahinga ʻoku ʻofa-mateaki kiate iá?

‘ʻE SIHOVA, ko koe pē ko e ʻOtua.’ (Sāme 86:​8, 10) Naʻe fakalāngilangiʻi ʻe Tēvita ʻa e ʻOtuá tupu mei he loto naʻe fonu ʻi he houngaʻia. Naʻa mo e ki muʻa pea hoko ʻa Tēvita ko e tuʻi ki ʻIsileli fakakātoa, naʻe fakahaofi ia ʻe Sihova meia Saula pea mo e kau Filisitia. Ko ia ai, naʻe malava ke ne hiva ʻo pehē: “Ko hoku moʻunga ʻa Sihova, mo e kolo kiate au; ko hoku haoʻanga foki. ʻI he fai mo e kakai lelei [“ʻofa-mateaki,” NW] te ke takataka fai lelei [“ʻofa-mateaki,” NW].” (2 Sāmiuela 22:​2, 26) Naʻe tauhi ʻe Sihova ʻa ʻene sevāniti mateakí ʻi he lolotonga ʻo e ngaahi ʻahiʻahi lahi. Naʻe malava ke tuku ʻe Tēvita ʻene falalá mo e tui paú ʻi hono ʻOtua ʻofa-mateakí, ka naʻe fiemaʻu kiate ia ʻa e tataki hokohoko. Naʻe kole leva ʻa Tēvita ki he ʻOtuá: “E Jihova, ako kiate au ho hala.”​—Sāme 86:11, “PM.”

 2. Ko e hā ʻa e ngaahi tokonaki kuo fai ʻe Sihova ke ne akoʻi ai kitautolu?

² Naʻe loto ʻa Tēvita ke fakaʻehiʻehi fakaʻāufuli mei he ngaahi fakakaukau pe fakafilōsefa fakaemāmaní. Naʻá ne loto ke ‘akoʻi ia ʻe Sihova,’ ʻo fakatatau ki he lea ʻa ha palōfita ki mui mai ʻa e ʻOtuá. (ʻAisea 54:13) ʻOku hā ngalingali naʻe malava ke fakalaulauloto pē ʻa Tēvita ki he ngaahi tohi pē ʻe hiva mei he Tohitapu naʻe ala maʻu he taimi ko iá. Ka, naʻe mahuʻinga ʻaupito kiate ia ʻa e fakahinohino ko eni meia Sihová! ʻI hono akoʻi kitautolu he ʻaho ní, ʻoku tau maʻu ʻa e ngaahi tohi kotoa ʻe 66 ʻi he Tohitapú, pea pehē foki ki he mahutafea ʻi he ngaahi tohi fekauʻaki mo e Puleʻangá ʻoku tokonaki mai ʻe he “tamaioeiki agatonu mo boto.” (Mātiu 24:​45, PM) Ke tau hangē ko Tēvitá, ʻo tautapa kia Sihova ke tokoniʻi kitautolu ʻe hono laumālié ke tau hakule ki he “ngaahi fuʻu meʻa kuo teuteu ʻe he ʻOtua maʻa e kakai ʻoku ʻofa kiate ia, . . . ʻio, ʻa e ngaahi loloto ʻo e ʻOtua.”​—1 Kolinitō 2:​9, 10.

 3. Ko e hā ʻa e ngaahi founga ʻoku malava ke ʻaonga ai kiate kitautolu ʻa e fakahinohino faka-Tohitapú?

³ ʻOku ʻi he Tohitapú ʻa e tali ki he fehuʻi mo e palopalema kotoa pē ʻe malanga hake nai ʻi heʻetau moʻuí. “He ʻilonga ha meʻa naʻe tohi muʻa naʻe tohi moʻotau akonekina; koeʻuhi ko e meʻa ʻi he fakakataki mo e poupou ʻoku fai ʻe he folofola ke tau maʻu ai ʻa e ʻamanaki lelei.” (Loma 15:4) Ko hono tuku lotoʻi ʻa e fakahinohino meia Sihová ʻe fakaiviʻi ai kitautolu ke tau kātakiʻi ʻa e ngaahi faingataʻá, pea fakafiemālieʻi kitautolu ʻi he taimi ʻoku tau loto-mafasia aí, mo ʻai ʻa e ʻamanaki ki he Puleʻangá ke mālohi maʻu pē ʻi hotau lotó. ʻOfa ke tau maʻu ʻa e fiefia ʻi hono lau ʻa e Folofola ʻa e ʻOtuá pea ʻi he fakalaulauloto ki ai ʻi he “ʻaho mo e po,” he ko e poto ʻoku makatuʻunga ʻi he Tohitapú ʻokú ne hoko “ko e ʻakau-ʻo e-moʻui ia kiate kinautolu ʻoku puke ia; pea ʻoku monuʻia ʻa kinautolu ʻoku kuku ki ai.”​—Sāme 1:​1-3; Palōvepi 3:​13-18; toe sio foki ki he Sione 17:3.

 4. Ko e hā ʻa e faʻifaʻitakiʻanga naʻe fokotuʻu ʻe Sīsū maʻatautolu ʻi he fekauʻaki mo e ngaahi meʻa ke tau faí?

⁴ Ko e ʻAlo ʻo e ʻOtuá, ko Sīsū, ʻa ia ʻoku toe ui ko e “Alo o Tevita,” naʻá ne hanga maʻu pē kia Sihova ki he fakahinohino. (Mātiu 9:​27, PM)a Naʻá ne pehē: “ʻOku ʻikai lava ʻe he ʻAlo ke fai ʻiate ia ha momoʻi meʻa, ngata pe ʻi he meʻa ʻoku ne vakai ʻoku fai ʻe he Tamai: he ʻilonga ha meʻa ʻoku fai ʻe he ʻEne ʻAfio, ʻoku pehē pe mo e fai ʻe he ʻAlo ʻa e ngaahi meʻa ko ia.” “ʻIkai te u momoʻi fai ha meʻa ʻiate au; kae hange tofu pē hoku ako ʻe he Tamai, ʻoku pehē ʻeku tala ʻa e ngaahi meʻa ko eni.” (Sione 5:19; 8:28) Naʻe fokotuʻu ʻe Sīsū ha sīpinga ke tau “muimui ofi, ʻo topuvaʻe taha mo ia.” (1 Pita 2:21) Kiʻi fakakaukau ange! Kapau te tau ako ʻo hangē tofu pē ʻoku pau naʻe fai ia ʻe Sīsuú, ʻi ha faʻahinga tuʻunga pē te tau ʻi aí ʻe malava ke tau fai ʻa e meʻa pē ʻoku finangalo ʻa Sihova ke tau faí. Ko e founga ʻa Sihová ko e founga totonu maʻu ai pē ia.

 5. Ko e hā ʻa e “moʻoni”?

⁵ Naʻe hoko atu ʻa Tēvita ʻo ne pehē: “Teu eveeva i hoo mooni.” (Sāme 86:​11, PM) ʻI he taʻu ʻe taha afe hili ʻa e meʻá ni, naʻe ʻeke ʻe Pailato ki he ʻAlo ʻo Tēvita, ko Sīsū: “Ko e ha tū ʻa e moʻoni?” Ka naʻe toki tali ʻe Sīsū ʻa e fehuʻi ko iá, ʻo ne tala kia Pailato: “Ko hoku puleʻanga ʻoku ʻikai ʻo e maama ko eni,” ʻo ne hoko atu ʻo pehē: “Ko ia pe ʻoku ke meʻā: ko e tuʻi au. Ko e meʻa ko ia naʻe fanauʻi ai au, pea ko e meʻa ko ia kuo u haʻu ai ki māmani, koeʻuhi ke u fakahāʻi ʻa e moʻoni.” (Sione 18:​33-38) Ko ia ai, naʻe ʻai ʻe Sīsū ke mahino ʻoku fakatefito ʻa e moʻoní ʻi he Puleʻanga Faka-Mīsaiá. Ko hono moʻoní, ko e kaveinga fakakātoa ʻo e Tohitapú ko hono fakamāʻoniʻoniʻi ʻa e huafa ʻo Sihová ʻo fakafou ʻi he Puleʻanga ko iá.​—ʻIsikeli 38:23; Mātiu 6:​9, 10; Fakahā 11:15.

 6. Kuo pau ke tau tokanga ki he hā ʻi heʻetau ʻeveʻeva ʻi he moʻoní?

⁶ Ko e hā hono ʻuhinga ʻo e pehē ke ʻeveʻeva ʻi he moʻoní? Ko hono ʻuhingá ke ʻai ʻa e ʻamanaki ki he Puleʻangá ko e meʻa tefito ia ʻi heʻetau moʻuí. Kuo pau ke tau moʻuiʻaki ʻa e moʻoni ʻo kau ki he Puleʻangá. Kuo pau ke tāfatafa ʻetau fakamuʻomuʻa ʻa e ngaahi meʻa ʻo e Puleʻanga ʻo e ʻOtuá, ʻo faivelenga ʻo fehoanaki mo e ngaahi faingamālie ʻoku tau maʻu ke fai fakamoʻoni ai ʻo kau ki he moʻoni ʻo fekauʻaki mo e Puleʻangá, ʻi heʻetau faʻifaʻitaki kia Sīsū. (Mātiu 6:33; Sione 18:37) Heʻikai totonu ke tau ʻeveʻeva konga taimi pē ʻi he moʻoní, ʻo fai ʻa e meʻa siʻisiʻi tahá kae toki fakafiemālieʻi kita ʻi he kau ʻo fuʻu hulu ki he fakafiefiá pe kamata ʻi ha ngāue tuʻumaʻu fakaemāmani ʻoku fakamoleki taimi lahí pe “ʻeikiʻaki ʻa e . . . Koloa.” (Mātiu 6:24) Te tau hē nai ʻi he taha ʻo e ngaahi ʻalunga ko iá pea ʻikai ʻaupito malava ke toe ʻilo ‘ʻa e hala fāsiʻi ʻoku fakatau ki he moʻuí.’ ʻAi ke ʻoua te tau hē mei he hala fāsiʻi ko iá! (Mātiu 7:​13, 14) ʻOku fakamaama mai ʻa e halá ʻe hotau Tokotaha-Fakahinohino Maʻongoʻongá, ko Sihova, ʻo fakafou mai ʻi heʻene Folofolá mo e kautahá, ʻo ne pehē: “Ko eni ʻa e hala, fou ai; ka ai haʻo afe ki toʻomataʻu, pe ka ai haʻo afe ki toʻohema.”​—ʻAisea 30:21.

Ko e Manavahē Totonu

 7. ʻE malava fēfē ke tau “gaohi ke taha” hotau ngaahi lotó?

⁷ ʻOku hoko atu ʻa e lotu ʻa Tēvitá ʻi he veesi 11: “Gaohi ke taha be hoku loto ke manavahe ki ho huafa.” Hangē ko Tēvitá, ʻoku totonu ke tau loto ke tāfataha, mo kakato ʻa hotau ngaahi lotó ʻi hono fai ʻa e finangalo ʻo e ʻOtuá. ʻOku fehoanaki eni mo e akonaki ʻa Mōsese: “Pea ko e ni, ʻe Isileli, ko e ha fua ʻa e meʻa ʻoku tangi ki ai ʻe Sihova ko ho ʻOtua meiate koe? ʻaʻeni pe, ke ʻapasia ki he ʻEiki ko ho ʻOtua, ke fou ʻi hono ngaahi hala, pea ke ʻofa kiate ia, pea ke tauhi kia Sihova ko ho ʻOtua ʻaki ʻa e kotoa ʻo ho loto mo e kotoa ʻo ho laumalie, ke tauhi ʻene ngaahi tuʻutuʻuni mo ʻene ngaahi fekau, ʻa ia ʻoku ou fokotuʻu atu he ʻaho ni maʻao lelei.” (Teutalōnome 10:​12, 13) Ko e moʻoni, ko e lelei maʻatautolu ke tau tauhi ʻa Sihova ʻaki ʻa e kotoa ʻo hotau lotó mo ʻetau soulú. ʻI he founga peheé ʻoku tau fakahā ai ʻa e manavahē totonu ki hono huafa ongoongoá. Ko e ʻuhinga fakatufungalea ʻo e huafa ko Sihová ko e “ʻOkú Ne ʻAi ke Fakahoko,” tautefito ʻi he fekauʻaki mo ʻene fakahoko ke ʻosi ʻa ʻene ngaahi taumuʻa maʻongoʻongá. ʻOku toe fakahā ʻe hono huafá ʻa hono mafai fakaleveleva ki he ʻuniveesí fakakātoa. ʻI heʻetau fai tauhi ʻi he fakaofoofo ʻi he ngeia ʻo e ʻOtuá, heʻikai ke afeʻi ai kitautolu ʻe he manavahē ki he tangata matengofuá. Heʻikai ke taʻetāfataha ai hotau ngaahi lotó. Ka, te tau manavahē naʻa tau fai ha faʻahinga meʻa pē ʻe taʻehōifua ai kia Sihova, ko e Fakamaau Aoniu mo e ʻEiki Hau Fakaleveleva, ʻa e tokotaha ʻoku ʻi hono nimá ʻa ʻetau moʻuí.​—ʻAisea 12:2; 33:22.

 8, 9. (a) Ko e hā ʻa e ʻuhinga ʻo e “ʻikai . . . ʻo māmāni”? (e) Ko e hā ʻa e ngaahi meʻa ʻoku totonu ke tau fai tupu mei heʻetau hoko “ko e meʻa ke mātāʻi”?

⁸ Naʻa mo e taimi ʻoku tau fehangahangai ai mo e manuki mo e fakatangá, te tau muimui ai ki he faʻifaʻitakiʻanga taʻemanavahē ʻa Sīsuú ʻo ʻoua ʻe hoko ko e konga ʻo e māmani fulikivanu ʻoku takatakai kiate kitautolú. (Sione 15:​17-21) ʻOku ʻikai ke ʻuhinga ení ʻoku totonu ki he kau ākonga ʻa Sīsuú ke nau nofo tokotaha ʻo mamaʻo mei he kakai kehe ʻi ha monasiteliō. Naʻe pehē ʻe Sīsū ʻi he lotu ki heʻene Tamaí: “ʻOku ʻikai te u pehē, ke ke toʻo kinautolu mei māmani, ka ke ke taʻofi kinautolu mei he Fili. ʻOku ʻikai te nau ʻo māmāni, hange ko au, ʻoku ʻikai te u ʻo māmani. Fakatapuʻi kinautolu ʻi he moʻoni: ko e folofola aʻau ko e moʻoni ia. Hange naʻa ke fekau au ki māmani, ko au foki naʻa ku fekau kinautolu ki māmāni.” (Sione 17:​15-18) Hangē ko Sīsū, kuo fekauʻi kitautolu ke fanongonongo ʻa e moʻoni ʻo kau ki he Puleʻangá. Naʻe anga-faingofua ʻa Sīsū. Naʻe ongoʻi fakafoʻou ʻa e kakaí ʻi heʻene founga faiakó. (Fehoanaki mo Mātiu 7:​28, 29; 11:​28, 29; Sione 7:46.) ʻOku totonu foki kiate kitautolu ke tau anga pehē.

⁹ Ko ʻetau anga-fakakaumeʻá, ko hotau valá mo e teuteu leleí, mo ʻetau fetalanoaʻaki anga-ʻofa mo maʻá, te nau ʻai kitautolu mo ʻetau pōpoakí ke ala tali lelei ʻe he kakai loto-totonú. Kuo pau ke tau fakaʻehiʻehi mei he faʻahinga vala taʻemaau mo ʻikai ke fakanānā, ko e feohi ʻoku malava ke iku atu ki he kau ki he māmaní, pea mo e founga moʻui anga-tākatuʻu mo taʻemapuleʻi fakaeʻulungaangá ʻa ia ʻoku tau sio ai ʻi he māmani ʻoku takatakai kiate kitautolú. ʻI heʻetau hoko “ko e meʻa ke mātāʻi ʻe he univesi, ʻe he kau angelo mo e kakai,” kuo pau ke tau ngāue he houa ʻe 24 ʻi he ʻaho taki taha ke ngāue pea moʻui ko e kau Kalisitiane alafaʻifaʻitakiʻanga. (1 Kolinitō 4:9; ʻEfesō 4:​32–5:3 [5:​1-4, PM]; Filipai 4:​8, 9; Kolose 4:​5, 6) Kuo pau ke taha hotau ngaahi lotó kae malava ke fai eni.

10. ʻI he founga fē ʻoku manatuʻi ai ʻe Sihova ʻa e faʻahinga ʻoku nau ngaohi ke taha pē honau ngaahi lotó ʻi he ngāue toputapu?

¹⁰ ʻE manatuʻi ʻe Sihova ʻa kitautolu ʻoku tau ngaohi ke taha pē hotau ngaahi lotó ʻi he manavahē ki he huafa ʻo Sihová, ʻo fakalaulauloto ki heʻene ngaahi taumuʻa maʻongoʻongá pea femoʻuekina ʻetau moʻuí ʻi he ngāue toputapu. “He ko e ongo foʻi fofonga ʻo e ʻEiki ʻoku feleleaki ʻi mamani katoa, ke taukapoʻi ʻa e kakai ʻoku haohaoa loto kiate ia.” (2 Kalonikali 16:9) ʻI he lave ʻa e kikite ʻia Malakai 3:16 ki hotau kuongá ʻokú ne pehē: “Toki fealeleaʻaki ʻa kinautolu naʻe ʻapasia kia Sihova: pea naʻe tokanga ki ai ʻa Sihova, ʻo ne fakafanongo, pea naʻe fai ʻa e tohi fakamanatu ke feʻao mo ia, koeʻuhi ko e kakai ʻoku ʻapasia kia Sihova, mo tokaʻi hono huafa.” ʻOfa ke ngaohi ke taha pē hotau ngaahi lotó ʻi he manavahē lelei ko iá kia Sihova!

Ko e ʻAloʻofa ʻa Sihová

11. ʻI he founga fē ʻe fakahāhā ai ʻa e aloʻofa ʻa Sihova ki he faʻahinga mateakí?

¹¹ Ko e toki lotu fakalotomāfana ē ka ko e lotu ʻa Tēvitá! ʻOkú ne hoko atu: “E Eiki ko hoku Otua, teu fakafetai kiate koe aki hoku loto kotoa: bea teu fakaogoogolelei ho huafa o taegata. He oku lahi hoo aloofa kiate au: bea kuo ke fakamoui hoku laumalie mei he loto heli [“Seoli,” NW].” (Sāme 86:​12, 13, “PM”) Ko hono tuʻo ua eni ʻi he sāmé ni ʻa hono fakahīkihikiʻi ʻe Tēvita ʻa Sihova koeʻuhi ko ʻEne ʻaloʻofá​—ko ʻEne ʻofa mateakí. ʻOku fuʻu lahi fau ʻa e ʻofa ko ʻení he ʻoku malava ke ne fai fakahaofi ʻo aʻu ki he ngaahi tuʻunga ʻoku hā ngali ʻikai ʻaupito malava ke fai ha meʻa. ʻI he taimi naʻe tuli ai ʻe Saula ʻa Tēvita ʻi he toafá, naʻe fakakaukau nai ʻa Tēvita te ne mate ai. Naʻe hangē ko haʻane fehangahangai mo Seoli māʻulalo taha​—ko e takele ʻo faʻitoka. Ka naʻe fakahaofi ia ʻe Sihova! ʻI he founga meimei tatau, kuo faʻa fakahaofi ʻe Sihova ʻa ʻene kau sevāniti ʻi onopooní ʻi he ngaahi founga fakaofo, pea kuó ne toe poupouʻi ʻa e kau tauhi angatonu kuo kātaki ʻi he angatonu ʻo aʻu ki he maté. ʻE fakapaleʻi ʻa e kau mateaki kotoa pē, pea aʻu ki hono fokotuʻu hake kinautolu mei he maté ʻo ka fiemaʻu.​—Fehoanaki mo Siope 1:​6-12; 2:​1-6, 9, 10; 27:5; 42:10; Palōvepi 27:11; Mātiu 24:​9, 13; Fakahā 2:10.b

12. ʻI he founga fē kuo hoko ʻo fielahi mo fakamālohi ai ʻa e haʻa faifekaú, pea ko e hā honau tauteá?

¹² ʻI he fekauʻaki mo e kau fakatangá, ʻoku kalanga ʻa Tēvita: “E Otua, kuo tuu hake kiate au ae kau fielahi, bea nae kumi hoku laumalie e he gaahi fakataha oe kau fakamalohi: bea oku ikai te nau fokotuu a hoo afio i ho nau ao.” (Sāme 86:​14, “PM”) ʻI he ʻahó ni, kuo kau ʻa haʻa faifekau ʻo Puleʻanga-Haʻa-Kalisitiané ʻi he lotolotonga ʻo e kau fakatangá. ʻOku pehē ʻe he faʻahingá ni ʻoku nau lotu ki he ʻOtuá ka ʻoku nau fetongi hono huafa toputapú ʻaki ʻa e hingoa fakalakanga ko e “ʻEiki,” pea ʻoku nau akoʻi ko e Tolu-tahaʻi-ʻotua fakamisiteli ia, ka ko hono moʻoní ʻoku ʻikai ha lave ʻe taha ʻi he Tohitapú ki he meʻá ni. Ko ha toki meʻa fielahi ē! ʻIkai ngata ai, ʻoku nau feinga ke fakalotoʻi ʻa e kau mafai fakapolitikalé ke tapui mo tuku pilīsoneʻi ʻa e Kau Fakamoʻoni ʻa Sihová, ʻa ia ko e meʻa ʻoku kei lolotonga fai ʻi ha ngaahi fonua lahi ʻi māmani lahi. Ko e haʻa faifekau ko eni ʻoku nau paetakuʻi ʻa e huafa ʻo e ʻOtuá ʻe tauteaʻi fakataha mo e ngaahi konga kotoa hangē ha fefine feʻauaki ʻo Pāpilone ko e Lahí.​—Fakahā 17:​1, 2, 15-18; 19:​1-3.

13. Ko e hā ʻa e ngaahi ʻulungaanga ʻoku fakahā ʻe Sihova ʻi hono fakahāhā ʻene anga-leleí?

¹³ Ko e meʻa fakafiefia mo mātuʻaki fehangahangai mo e meʻá ni, ʻoku hoko atu ʻa e lotu ʻa Tēvitá ʻo pehē: “Ka ko koe, E Eiki, koe Otua oku fonu i he manavaʻofa, moe agalelei, oku ke kataki fuoloa, bea mohu aloofa moe mooni.” (Sāme 86:​15, “PM”) Ko e moʻoni, ʻoku hiliō ʻa e ngaahi ʻulungaanga pehē ʻo hotau ʻOtuá. ʻOku fakamanatu mai ʻe he ngaahi leá ni ʻa e meʻa ʻi he taimi naʻe kole ai ʻa Mōsese ʻi Moʻunga Sainai ke ne sio ki he lāngilangi ʻo Sihová. Naʻe tali ange ʻe Sihova: “Teu fai ke ha atu eku agalelei kotoabe i ho ao, bea teu fakaha ae huafa o Jihova i ho ao.” Ka naʻá ne fai fakatokanga kia Mōsese: “Oku ikai te ke mafai ke mamata ki hoku fofoga: he oku ikai ha tagata te ne mamata kiate au, bea moui.” ʻI he hili ʻa e meʻá ni, naʻe hāʻele hifo ʻa Sihova ʻi he konga ʻao, ʻo ne folofola: “Ko Jihova, Ko Jihova koe Otua, oku aloofa, mo ofa mataatā, oku kataki fuoloa, bea mohu i he agalelei moe mooni.” (ʻEkisoto 33:​18-20, PM; 34:​5, 6, PM) Naʻe lave ʻa Tēvita ki he ngaahi leá ni ʻi heʻene lotú. ʻOku mahuʻinga lahi ange kiate kitautolu ʻa e ngaahi ʻulungaanga pehē ʻo Sihová ʻi ha fōtunga hā mai! ʻI he meʻa kuo tau hokosia ʻe kitautolu tonu, ʻikai ʻoku tau houngaʻia ʻi he anga-lelei ʻa Sihova ʻa ia ʻoku fakahāhā ʻi he ngaahi ʻulungaanga lelei ko ení?

Ko e “Fakailoga oe Lelei”

14, 15. ʻI he founga fē ʻoku fakahā ai ʻe Sihova ki heʻene kau sevānití “ae fakailoga oe lelei”?

¹⁴ ʻOku toe kōlenga ʻa Tēvita ke maʻu ʻa e tāpuaki ʻa Sihová, ʻo ne pehē: “Ke ke tafoki mai kiate au, bea aloofa kiate au; foaki ho malohi ki hoo tamaioeiki, bea fakamoui ae tama a hoo kaunaga. Fakaha kiate au ae fakailoga oe lelei; koeuhi ke mamata ki ai akinautolu oku fehia kiate au, bea ma ai: koeuhi kuo ke tokoniʻi au, E Jihova, o fakafiemalieʻi au.” (Sāme 86:​16, 17, “PM”) ʻOku ʻiloʻi ʻe Tevita ʻi heʻene hoko ko e ‘tama ʻa e kaunanga ʻa Sihová,’ ʻoku pau ʻoku kau ia kia Sihova. ʻOku pehē pē mo kitautolu kotoa foki ʻi he ʻahó ni ʻa ia kuo tau fakatapui ʻetau moʻuí kia Sihova pea ʻoku tau ngāue mālohi ʻi heʻene ngāué. ʻOku fiemaʻu kiate kitautolu ʻa e mālohi faifakahaofi ʻo Sihová fakafou mai ʻi hono laumālie māʻoniʻoní. Ko ia ai, ʻoku tau kole ki hotau ʻOtuá ke fakahā kiate kitautolu “ae fakailoga oe lelei.” ʻOku makupusi ʻe he anga-lelei ʻa Sihová ʻa e ngaahi ʻulungaanga lelei kotoa pē kuo tau toki lave ki aí. Ko ia, makatuʻunga ʻi he meʻá ni, ko e hā ʻa e fakaʻilonga ʻoku malava ke tau ʻamanekina ʻe fakahā mai ʻe Sihova kiate kitautolú?

¹⁵ Ko Sihova ko e Tokotaha-Foaki ʻo e “foaki lelei kotoabe moe foaki haohaoa kotoabe” pea hangē ko ia ʻoku fakapapauʻi mai kiate kitautolu ʻe Sīsuú, ʻoku nima-homo ia, ʻo ne foaki “ʻa e Laumālie Māʻoniʻoni kiate kinautolu ʻoku kole kiate ia.” (Sēmisi 1:​17, PM; Luke 11:13) Ko e laumālie māʻoniʻoní​—ko ha meʻaʻofa mahuʻinga taʻefakatataua ia meia Sihova! ʻOku fakafou mai ʻi he laumālie māʻoniʻoní ʻa hono tokonaki mai ʻe Sihova ʻa e fiefia ʻo e lotó, pea naʻa mo e taimi ʻoku hoko ai ha fakatanga. ʻI heʻene peheé, naʻe malava ai ki he kau ʻapositolo ʻa Sīsuú ke nau fakahā fiefia ʻi hono fakamaauʻi kinautolu ki he moʻui pe maté, ʻoku foaki ʻe he ʻOtua ʻa e laumālie māʻoniʻoní ki he faʻahinga ʻoku nau talangofua ange kiate ia ko honau pulé. (Ngāue 5:​27-32) Ko e fiefia ʻo e laumālie māʻoniʻoní naʻá ne toutou fakahoko kiate kinautolu ha “fakailoga oe lelei.”​—Loma 14:​17, 18.

16, 17. (a) Ko e hā ʻa e fakaʻilonga ʻo ʻene lelei naʻe fakahā ʻe Sihova kia Paula mo Panepasa? (e) Ko e hā ʻa e fakaʻilonga naʻe fakahā ki he kau Tesalonaika naʻe fakatangaʻí?

¹⁶ Lolotonga ʻa e fononga fakamisinale ʻa Paula mo Panepasa ʻi ʻĒsia Minú, naʻá na fehangahangai mo e ngaahi faingataʻaʻia, ʻo aʻu ki he fakatanga kakaha. ʻI heʻena malanga ʻi ʻAniteoke ʻi Pisitiá, naʻe fakataleʻi ʻe he kau Siú ʻa ʻena pōpoakí. Ko ia ai, naʻá na ō ki he kakai ʻo e ngaahi puleʻangá. Ko e hā ʻa e meʻa naʻe iku mei he meʻá ni? “Pea ʻi he fanongo ki ai ʻa e Senitaile naʻa nau fiefia, mo nau fakahikihiki ʻa e folofola ʻa e ʻEiki: pea ʻilonga ʻa kinautolu naʻe tuʻutuʻuni ki he moʻui taʻengata naʻa nau tui.” Ka naʻe fakatupunga ʻe he kau Siú ha fakafepaki, pea naʻe kapusi ʻa e ongo misinale ko iá mei he fonuá. Naʻe loto-pepeu ʻa kinaua pea mo e kau tui foʻoú ʻi he meʻá ni? ʻIkai ʻaupito! Ko hono kehe ʻaupitó, “ko e meʻa ki he kau ako, naʻe fakafonu kinautolu ʻaki ʻa e fiefia mo e Laumālie Māʻoniʻoni.” (Ngāue 13:​48, 52) Naʻe fakahā ʻe Sihova kiate kinautolu ʻa e fakaʻilonga ko ia ʻo ʻene leleí.

¹⁷ Ki mui mai, naʻe hoko ha fakatanga ki he fakatahaʻanga foʻou ʻi Tesalonaiká. Naʻe ʻai ʻe he meʻá ni ʻa e ʻapositolo ko Paulá ke ne fai ha tohi fakafiemālie, ʻo fakaongoongoleleiʻi ʻenau kātaki ʻi he hoko ʻa e fakatangá. Naʻa nau “maʻu ae folofola i he mamahi lahi, moe fiefia i he Laumalie Maonioni.” (1 Tesalonaika 1:6, PM) Ko e “fiefia i he Laumalie Maonioni” naʻe hokohoko atu ʻa ʻene fakaivimālohi kinautolu ko e fakaʻilonga hā mahino ia mei he ʻOtuá ʻa ia ʻoku fonu i he manavaʻofa, mo e anga-lelei, mo e kātaki fuoloa, pea mohu ʻaloʻofa mo e moʻoni.

18. ʻI he founga fē kuo fakahā ai ʻe hotau ngaahi tokoua ʻi ʻIulope Hahaké ʻa ʻenau houngaʻia ʻi he lelei ʻa Sihová?

¹⁸ ʻI he kuonga ki muí ni maí, kuo fakahā ʻe Sihova ʻa ʻene leleí ki hotau ngaahi tokoua angatonu ʻi ʻIulope Hahake, ʻo fakamaaʻi ʻa e faʻahinga naʻe fehiʻa kiate kinautolú​—ko e kau fakatangaʻi ʻo kinautolu ki muʻá. Neongo kuo fakatauʻatāinaʻi ki muí ni mai ʻa e siʻi ngaahi tokoua ko ení mei he laui hongofuluʻi taʻu ʻo hono fakafeʻātungiaʻi, ʻoku kei fiemaʻu kiate kinautolu ke nau kātaki, he ʻoku fehangahangai ʻa e tokolahi ʻo kinautolu mo e ngaahi faingataʻaʻia fakaʻikonōmika lahi ʻaupito. Kaekehe, ʻoku fakafiemālieʻi ʻa kinautolu ʻe heʻenau “fiefia i he Laumalie Maonioni.” Ko e hā mo ha toe fiefia lahi ange ʻoku malava ke nau maʻu ka ko hono ngāueʻaki ʻenau tauʻatāina kuo toki maʻú ʻi hono fakalahi ʻa e fakamoʻoní? ʻOku tokolahi ʻa e kakai ʻoku nau fanongo kiate kinautolu, ʻo hangē ko ia ʻoku hā ia mei he ngaahi fakamatala ʻo kau ki he ngaahi fakataha lalahí mo e papitaiso ʻoku faí.​—Fehoanaki mo Ngāue 9:31.

19. ʻOku malava fēfē ke tau ʻai ʻa e ngaahi lea ʻa e Sāme 86:11 ko ʻetau lea?

¹⁹ Ko e meʻa kotoa kuo lave ki ai ʻi he kupu ko ení pea mo e kupu ki muʻá ʻoku toe fakaongo mai ai ʻa e lotu loto-māfana ʻa Tēvita kia Sihova: “E Jihova, ako kiate au . . . Gaohi ke taha be hoku loto ke manavahe ki ho huafa.” (Sāme 86:​11, PM) Ke tau ʻai ʻa e ngaahi lea ko eni ʻo ʻetau potutohi fakataʻu ki he 1993 ko ʻetau ngaahi leá ia ʻi heʻetau ngāue ʻaufuatō ke poupouʻi ʻa e ngaahi meʻa ʻo e Puleʻangá pea ʻi heʻetau houngaʻia ʻi he lelei taʻefakangatangata ʻa hotau ʻOtua toko taha pē, ko e ʻEiki Hau Fakaleveleva ko Sihová.

[Fakamatala ʻi lalo]

Ko e Hā Haʻo Tali?

◻ Ko e hā ʻa e meʻa ʻoku tau fakahā ʻi heʻetau lotu ʻo kole, “E Jihova, ako kiate au”?

◻ Ko e hā ʻa e ʻuhinga ke ngaohi ke taha hotau lotó ke manavahē ki he huafa ʻo Sihová?

◻ ʻI he founga fē ʻe fakahāhā ai ʻe Sihova ʻa ʻene ʻaloʻofá ki he faʻahinga mateaki kotoa pē?

◻ ʻI he founga fē ʻoku fakahā ai ʻe Sihova kiate kitautolu “ae fakailoga oe lelei?”

[Puha ʻi he peesi 29]

Ko e potutohi fakataʻu ki he 1993: “E Jihova, ako kiate au . . . Gaohi ke taha be hoku loto ke manavahe ki ho huafa.”​—Sāme 86:11, PM.

[Fakatātā ʻi he peesi 28]

Ko Sihová ko e moʻunga mo e kolo mālohi ki he faʻahinga ʻoku ʻeveʻeva hangatonu ʻi he moʻoni

[Fakatātā ʻi he peesi 30]

Naʻe maʻu fakataha ʻa e toko 46,214 pea naʻe papitaiso ʻa e toko 3,256 ʻi he Fakataha Fakavahaʻapuleʻanga ko e “Kau Tapua Atu ʻo e Maama” naʻe fai ʻi St. Petersburg, Lūsia, ʻi Sune, 1992. Ko e meʻa fakaofo lahi ē ʻa hono maʻu ʻe he faʻahingá ni ʻa e lelei ʻa Sihová, ʻi he “fiefia i he Laumalie Maonioni”!