ʻOku Fakamatala ʻe he Kau Fanongonongo ʻo e Puleʻangá

Naʻa Nau Liliu ʻEnau Founga Moʻuí

ʻOKU ʻIKAI ha veiveiua kuó ke sio ki he faʻahinga ʻoku nau talanoa mo e niʻihi ʻi he kauhala, ʻoku nau ʻaʻahi fale-ki-he-fale, pe ʻalu ange ki he ngaahi fakataha Kalisitiane ʻi honau ngaahi Kingdom Hall. ʻOku tau lave ki he kau talavou teuteu maau ʻa e Kau Fakamoʻoni ʻa Sihová. Te ke fakaʻosiʻaki nai ko e Kau Fakamoʻoni kinautolu koeʻuhi kuo akoʻi kinautolu ʻe heʻenau ngaahi mātuʻá ke nau hoko ko e Kau Fakamoʻoni, pea ko e meʻa ʻeni kuo hoko ki he tokolahi ʻo kinautolu. ʻI he tafaʻaki ʻe tahá, ko e niʻihi ʻo e toʻutupu ko ʻení naʻa nau tupu hake ʻi ha ʻātakai mātuʻaki kehe ʻaupito pea ko ʻenau founga moʻui ki muʻá naʻe mātuʻaki kehe mei he founga moʻui ʻoku nau lolotonga muimui ki aí. Ko hono moʻoní, ko kinautolu ʻoku hā ʻi he peesi hono hokó naʻa nau feohi mo e ngaahi kulupu ʻa ia ko e faihiá mo e ngāuehalaʻaki ʻa e faitoʻo kona tapú ko e meʻa naʻe hoko fakaʻaho ai. Ko e hā naʻá ne ʻai kinautolu ke liliu ʻo fuʻu lahi fau ʻenau moʻuí? Te tau lave ki ha kolo ʻi Noaue pea te tau vakai ki he fakamatala ʻo kau ki he ngaahi liliu pehē naʻe fai ʻe he toʻutupu ʻe niʻihi.

Ko e ʻUhinga ki he Liliú

Naʻe taʻu 19 ʻa Annette ʻi he fetaulaki mo ia ʻa e ongo Fakamoʻoni ʻi he ngāue fale-ki-he-falé. ʻOkú ne manatuʻi: “Naʻe faʻa tala mai ke ʻoua ʻaupito te u talanoa mo e Kau Fakamoʻoni ʻa Sihová, ka naʻá ku fie ʻilo pea u fakaafeʻi kinaua ke na hū mai.” Naʻá ne ngāueʻaki ʻa e faitoʻo kona tapú talu mei hono taʻu 11 pea naʻe kau ia ʻi he taimi ʻe niʻihi ki he hae fale mo e kaihaʻa meʻalele.

Naʻe fakamānako kiate ia ʻa e ongoongo lelei ʻo e Puleʻangá. Naʻe mātuʻaki fakalototoʻaʻi ia ʻe he ʻamanaki ki he toetuʻú, koeʻuhi he ʻi hono taʻu nimá naʻe mate ai ʻa ʻene faʻeé. Ko ia naʻá ne tali lelei ha ako Tohitapu taʻetotongi peá ne kamata ke maʻu ʻa e ngaahi fakataha ʻi he Kingdom Hall. Naʻá ne tala ange ki he tamasiʻi ko hono kaumeʻa mo e niʻihi kehe ʻa e ngaahi meʻa naʻá ne ako ki aí. Ko e hā ʻa e anga ʻo ʻenau tali ki aí? Naʻe ʻikai pē te nau fie fanongo ki ai pea naʻa nau pehē kuo fakalotoʻi fakamālohi ia ke ne tui ki ai. Ka neongo ia, naʻe kamata ki mui ke ako ʻa e Tohitapú ʻe he niʻihi ʻo kinautolu naʻa nau fakafepaki lahi taha kiate iá.

Hangē ko ení, ko Espen, ko ha talavou taʻu 20. Naʻá ne fanongo ki he ongoongo lelei ʻo e Puleʻangá mei he tamasiʻi ko e kaumeʻa ʻo Annette peá ne loto leva ke ako ʻa e Tohitapú. Ka, naʻá ne tatali ke fakahoko kiate ia ʻa e tautea ko e nofo pilīsone ʻi he māhina ʻe fā, koeʻuhi naʻá ne kau ki hono fakahū taʻefakalao mai ʻa e faitoʻo kona tapú pea hangē pē ko Annette, naʻá ne kau ki he hae fale ʻi he taimi ʻe niʻihi. Naʻe toe ngāueʻaki foki ʻe Espen ʻa e tapaká, malisuana, mo e ngaahi faitoʻo kona tapu kehe. Ka, ko e hā naʻá ne hanga ʻo ʻai ha tokotaha ʻa ia naʻe kau ki he ngaahi meʻa pehē ke ne loto ke ako ʻa e Tohitapú? Naʻe kamata ke fakatokangaʻi ʻe Espen ʻa e koto ngeʻesi ʻene founga moʻuí mo taʻe ʻi ai ha taumuʻa ki ai. ʻOkú ne fakamatala mai: “Naʻe fakamānako kiate au ʻa e ngaahi talaʻofa ʻa e Tohitapú ʻo fekauʻaki mo e kahaʻú pea nau hanga ʻo ʻai ki heʻeku moʻuí ha taumuʻa. Ko ia naʻá ku kamata ke ako ke u ʻilo pe naʻe moʻoni ʻa e meʻa naʻe tala maí.”

ʻOku Loto ʻa e Niʻihi Kehe ke Ako ʻa e Tohitapú

ʻI he taimi tatau nai, naʻe fanongo ʻe ha talavou mei he takanga tatau pē ko ʻení ki he ongoongo leleí, pea naʻá ne kamata foki ke ako mo maʻu ʻa e ngaahi fakatahá. Naʻe toe kamata foki mo ha talavou ʻe taha ʻo e kau talavou ko iá ke ne ako mo maʻu ʻa e ngaahi fakatahá. Pea hili ia ʻo taimi siʻi pea naʻe kau ha toe talavou ʻe taha ki he ako Tohitapú pea fakalakalaka fakalaumālie fakataha mo hono ngaahi kaungāmeʻá. Naʻe maongo ki ha toe talavou ʻe taha ʻa e ngaahi liliu pau kuo fai ʻe hono ngaahi kaungāmeʻá pea ʻi he taimi nounou pē naʻá ne loto ke ako ʻa e Tohitapú.

Naʻe kamata ke ako ʻa e Tohitapú ʻe Gilbert ko e talavou tāmeʻa mei he takanga tatau pē. Naʻe mate ʻa ʻene ongo mātuʻá he kanisā, ko ia naʻe hanga ʻe he ʻamanaki ʻa e Tohitapú ki he toetuʻú ʻo fakafiemālieʻi ia. (Sione 5:28, 29) Naʻe toe kau mo e tamasiʻi ko ʻení ʻi hono ngāueʻaki ʻa e malisuaná pea naʻe fakaololalo ʻa ʻene founga moʻuí, pea ko ʻene fakaʻamú ke hoko ia ko ha sitā mūsika. Kaekehe, naʻe faifai atu pē ʻo sai ʻaupito ʻene fakalakalaka fakalaumālié peá ne fili leva ke hoko ia ko ha Fakamoʻoni kia Sihova. ʻIkai ke ngata ai, naʻe kamata ʻa e tokoua siʻi ange ʻo Espen ke ako ʻa e Tohitapú pea mo feohi mo e Kau Fakamoʻoní.

ʻOku Liliu ʻe he Moʻoni Faka-Tohitapú ʻa e Ngaahi Moʻui

Naʻe hoko ha fuʻu liliu lahi ʻi he kau talavou mo e finemui ko ʻeni ʻa ia ko honau valá mo honau ʻulú naʻe mafuefue, naʻa nau kau ki hono ngāueʻaki ʻa e faitoʻo kona tapú, kaihaʻa mo e ngaahi hia kehe. Ko Annette ko ha tokotaha malanga lelei ʻaupito ia fekauʻaki mo e Puleʻangá peá ne kau ki he ngāue taaimuʻá ʻi he taʻu ʻe taha nai. Naʻe kau ʻa Espen mo Gilbert ki he ngāue taaimuʻa fakataimí, pea kuó na hoko foki ko e ongo sevāniti. Naʻá na fakatou mali ʻi loto ʻi he fakatahaʻanga Kalisitiané. Ko e toe toko fā mei he takanga ko ia ki muʻa ko ení ko e kau fanongonongo faivelenga kinautolu fekauʻaki mo e Puleʻangá!

Kae fēfē ʻa e tautea nofo pilīsone māhina ʻe fā ʻa Espen? Koeʻuhi ko e ngaahi liliu naʻá ne fai ki heʻene moʻuí, naʻe liliu ai ʻa e tauteá ki he ngaahi houa ʻe 80 ke ne ngāue ai ke fai tokoni ʻi he feituʻu fakalotofonuá. ʻI he loto-taha ʻa e kau polisí mo e niʻihi kehe, naʻá ne ngāueʻaki ʻa e ngaahi houa ko ʻení ke ngāue ki he Kingdom Hall fakalotofonua ʻa e Kau Fakamoʻoni ʻa Sihová. Naʻe fiefia ʻaupito ʻa e kau polisí ʻi he fokotuʻutuʻu ko ʻení.

ʻIo, ko e toʻutupu tokolahi ʻi māmani lahi naʻa nau tupu hake ʻi ha ʻātakai faihia. Ka kuo ʻomi kiate kinautolu ʻe he moʻoni ʻo e Folofola ʻa e ʻOtuá ʻa e ngaahi tali ki he ngaahi fehuʻi mātuʻaki mahuʻinga pea mo ha ʻamanaki papau ʻo kau ki he kahaʻú. Ko ia ai, ʻi he taimí ni ʻoku ʻikai te nau kei hoko ko e kau faihia pe ko e faʻahinga ʻoku nau ngāueʻaki ʻa e faitoʻo kona tapú, pea ʻoku ʻikai te nau toe ʻalu holo ʻaki ʻa e vala ʻoku mafuefue. ʻI heʻenau liliu ʻenau founga moʻuí, ko e faʻahinga tatau tofu pē kinautolu mo e kakai ʻoku lave ki ai ʻi ʻolungá, ko e toʻutupu teuteu maau ko e Kau Fakamoʻoni longomoʻui ʻa Sihova. ʻOku nau loto ke ʻai ke ʻilo ʻe he niʻihi kehé ʻa e ngaahi fakaleleiʻanga tuʻuloa ʻa e Tohitapú ki he ngaahi faingataʻa ʻoku maʻu ʻe he toʻutupu tokolahi he ʻaho ní.​—Sio ki he 1 Kolinitō 6:​9-11.

[Fakatātā ʻi he peesi 8]

ʻOku tali ʻe he kau talavou Noaue ʻa e moʻoní