ʻE Ikuʻi ʻa e “Fili Fakamui”!

ʻI HOʻO kei siʻí, naʻá ke ilifia nai ʻi he fakapoʻulí. Naʻá ke loto-hohaʻa nai ʻi he ngaahi talanoa fakalilifu pea aʻu pē ki he ngaahi fanangá. Ko ha fakafiemālie lahi ē ka ko hano tuku ʻe hoʻo faʻeé pe ko hoʻo tamaí ha maama ke ulo ʻi hoʻo feinga ke ke mohé!

ʻOku pehē pē mo e maté, ʻoku fakatupu ilifia ia ki he tokolahi. Ka, ʻoku ʻikai totonu ke pehē. Ko e hā ʻa hono ʻuhingá? Koeʻuhi ko e ʻuhinga moʻoni ʻo e meʻa ko e maté.

ʻIlo Ho Filí

Naʻe fakahā ʻe he Tuʻi poto ko Solomone ʻo ʻIsileli ʻo e kuonga muʻá: “He ko e kau moʻui ʻoku nau ʻilo ai pe te nau pekia: ka ko e kau pekia ʻoku ʻikai te nau ʻilo ha momoʻi meʻa.” (Koheleti 9:5) Fakatatau ki he fakakaukau fakamānavaʻi fakaʻotua ko ʻeni ʻoku hā tonu pē ʻi hoʻo Tohi Tapú, ko e maté ko e fehangahangai pē ia ʻo e moʻuí. Ko e kau maté ʻoku ʻikai te nau moʻui atu ai pē.

ʻI he lave ki he tuʻunga ko e maté ʻi ha founga ko ha fakatātā, naʻe tohi ai ʻe he ʻaposetolo Kalisitiane ko Paulá: “ʻE Mate, kofaʻā hoʻo ikuna na? ʻE Mate, kofaʻā hoʻo huhu na?” Ko e hā ʻa e huhu ʻoku tupu mei ai ʻa e maté? ʻOku pehē ʻe Paula: “Ko e huhu ʻa e mate ko e angahala.” (1 Kolinitō 15:​55, 56; Hōsea 13:14) Ko ia ai, ko e hā ʻa e tupuʻanga ʻo e huhu fakatupu mate ko ʻení? ʻI ha tohi ʻe taha ʻi he Tohi Tapú, ʻoku pehē ai ʻe Paula: “Naʻe tatau mo e hoko ʻa e angahala ki mamani, ʻi he tangata pe taha; mo e hoko ʻa e mate ʻi he angahala; mo ʻene aʻusia pehe ʻa e kakai kotoa pe ʻe he mate, koeʻuhi ne angahala kotoa pe.” (Loma 5:12) ʻOku ʻikai ke tuku mai ʻe he ʻaposetolo ko Paulá ha veiveiua pe ko hai ʻa e “tangata pe taha” ko iá ʻi heʻene pehē: “ʻOku mate kotoa pe ʻia Atama.” (1 Kolinitō 15:22) ʻIo, fakafou mai ʻi he talangataʻa ʻa ʻetau ʻuluaki kui ko ʻĀtamá, ko e kotoa ʻo kitautolú ʻoku tau moʻuangofua ki he huhu ʻa e maté.​—Sēnesi 3:​1-19.

ʻI he maʻu ʻa e moʻui lelei fakasino mo e fāmili anga-ʻofa ʻi ha ʻātakai fakafiefia, ʻe ʻikai ke ʻi ai ha toko taha ia ʻiate kitautolu ʻe fili ke ne mate. Kae kehe, ʻoku hangē pē ko ia ʻoku fakahā ʻi he Tohi Tapú, ʻe toʻo atu nai ʻe he meʻa “ʻoku hokonoa” ʻa ʻetau moʻuí. (Koheleti 9:11) Ko hono moʻoní, ʻoku ʻikai te tau ʻilo pē ko e hā ʻa e meʻa ʻe hoko ki heʻetau moʻuí ʻi he ʻapongipongí. (Sēmisi 4:14) Ko e meʻa pē ʻe taha ʻoku pau​—ko e kotoa ʻo kitautolu kuo tau maʻu tukufakaholo mai ʻa e angahala mo e mate. Ko ia ai, ʻoku tuli mai kitautolu ʻe he mate mo ʻohofi mai ʻo hangē ha fili.

Ko e Lava ke Fekuki mo e Mate ʻa ha Taha ʻOkú Te ʻOfa Ai

ʻOku tautautefito ʻa e hoko ʻa e maté ko e filí ʻi he mate ʻa ha taha ʻokú te ʻofa ai. ʻI he tatali ki he maté, naʻe pehē ʻe ha uaifi naʻe puke ki hono husepānití: “ʻE kovi ange ia kiate koe.” Ko e hā naʻá ne lea pehē aí? Koeʻuhi he ʻoku pehē ʻi he Tohi Tapú: “Ko ia kotoa ʻoku ʻilo ʻe ho nima te ne mafai, fai ʻaki ho ivi; he ʻoku ʻikai ha ngaue, pe ha fakakaukau, pe ha ʻilo, pe ha poto ʻi Lolofonua [ko e faʻitoka ʻo e faʻahinga ʻo e tangatá], ʻa e feituʻu ʻoku ke fononga ki ai.” (Koheleti 9:10) ʻOku ʻikai ke toe faingataʻaʻia ʻa e kau maté ia. Ka ko e mamahí ʻoku hoko ia ki he ngaahi kāinga mo e ngaahi kaumeʻa ʻoku kei moʻuí. ʻOku malava ke fai ha meʻa ʻo fekauʻaki mo e faingataʻaʻia peheé?

ʻOku ʻi he ngaahi peesi ʻo e Folofola ʻa e ʻOtuá, ko e Tohi Tapú, ʻa e ngaahi lea lahi ʻo e fakafiemālie. Ko e fakatātā, ko e lau mo fakalaulauloto ʻi he ngaahi sāmé ko e maʻuʻanga ia ʻe taha ʻo e fakafiemālie moʻoní. Ko e fakafiemālie moʻoní, ha ngaahi lea ʻo hangē ko ʻení: “Malo mo Atonai muʻa ʻoku ne fua kavenga maʻatautolu he ʻaho kotoa; ʻIo, ʻa Ela ko hotau fakamoʻuiʻanga.”​—Sāme 68:19.

Ko e toe maʻuʻanga ʻe taha ʻo e fakafiemālié ko e fakatahaʻanga Kalisitiané. ʻI he ʻuluaki senituli T.S., naʻe tohi ʻe he ʻaposetolo ko Paulá: “Tokangaʻi ʻa e kau fefine uitou ʻoku paea moʻoni. Ka ʻo kapau ʻoku maʻu fanau pe makapuna ʻe siʻi uitou [ʻa ia ʻe lava ke nau tauhi fakamatelie kiate ia], ʻoua muʻa ke akoʻi kinautolu ke nau fai ʻa e toʻonga totonu ki hoto famili, pea ke fai ʻa e totongi ki heʻenau matuʻa: he ko e meʻa ia ʻe hangai fofonga ki ai ʻa e ʻOtua. Ke ʻoua naʻa tuʻu ha taha ʻi he tohi ʻo e Kau Uitou, ʻoku siʻi hono taʻu ʻi he onongofulu, ko e uaifi ʻo e tangata pe taha; ko e toko taha kuo fakaongolelei heʻene ngaahi ngaue ʻaonga, haʻane tauhi ha fanau, haʻane fakaafe ha ʻāunofo, haʻane fufulu ʻa e vaʻe ʻo e kau lotu, haʻane tokoniʻi ha kakai kuo moʻua ha mamahi, kapau naʻe ʻilonga pe ha ngaue lelei pea ne feinga ki ai.” (1 Tīmote 5:​3, 4, 9, 10) ʻOku pehē pē ʻa hono tokoniʻi mo fakafiemālieʻi ʻe he Kau Fakamoʻoni ʻa Sihová ʻa e kaungātui pehē ʻi he ʻaho ní.

ʻOku faʻa hoko ko e liliu lahi taha pē ke fai ʻe he toko taha ʻoku mamahí ko e ongoʻi ʻo hono lotó. “Naʻá ku ʻofeina ʻaupito ʻa hoku uaifí,” ko e tohi ia ʻa ha tangata naʻe ʻosi mate ʻa hono hoa malí ʻi he taʻu ʻe ua ki muʻá. “Ko e meʻa fakamamahi taha ʻeni ʻi heʻeku moʻuí, pea ʻoku faingataʻa kiate au ke kātekina.” Ko ha toko taha naʻe nofo mali ʻi ha ngaahi taʻu kuo kaungākau ʻene moʻuí ʻi he vā fekoekoeʻi taha ʻi he faʻahinga ʻo e tangatá. ʻI he mate ha hoa mali, ʻoku ongoʻi ʻe he hoa mali ʻoku kei moʻuí ko ha mole lahi ia kiate ia. Ko hai ʻe hanga ki ai ʻa e toko taha peheé ke maʻu ha tokoni?

ʻI he ngaahi tuʻunga peheé, ʻe lava ke fai ʻa e fakatupu langa hake ʻe he ngaahi kaungāmeʻa lelei ko e kau Kalisitiané. ʻOku fakapotopoto ʻa e pehē ʻi he palōvepí: “Ko e kaumeʻa ʻoku ne ʻofa ʻi he taimi kotoa pe; pea ko hoto moʻoni naʻe fanauʻi maʻa ha faingataʻa.” (Palōvepi 17:17) ʻOku fie maʻu ki ha fefine pe tangata uitoú ha tokoni​—ko e ngaahi kaungāmeʻa ʻa ia ʻoku nau fai ha poupou moʻoni. Ko e ngaahi kaumeʻa fakapotopotó te nau fakalototoʻaʻi ʻa e toko taha ʻoku mamahí ke talanoa, neongo ʻe hoko ai ha tangi. ʻE lava ke fai ha tokoni anga-ʻofa ʻe ha Kalisitiane naʻá ne ʻosi hokosia ʻa e ongoʻi faingataʻa mo e loto-mamahi ʻi he mole ʻo ha hoa mali. “Lōtaki ʻa e lotosiʻi,” ko e ekinaki ia ʻa e Tohi Tapú. (1 Tesalonaika 5:14) Kae manatuʻi ʻoku ʻunaloto ʻa e kau fefine pe kau tangata uitoú ia ki honau ngaahi hoa malí. Ko ia ai, ʻoku totonu ke tala ʻe he toko tahá ʻene mamahí ki he niʻihi kehé ʻi ha ngaahi tuʻunga pē ʻoku malava ai ki he toko taha kotoa ke tauhi maʻu ʻa e ʻulungāanga maʻá.​—1 Pita 2:12.

Ko e meʻa lelei taha ke tokoni ki he mamahi ʻoku fakatupu ʻe he maté ko e femoʻuekina ʻi he tokoni ki he niʻihi kehé​—ʻoku ʻikai ke faingofua ia kiate kinautolu ʻoku nau tui ko kinautolu ʻoku fie maʻu ke fai ki ai ʻa e tokoní! Ko e taimi ʻeni ʻoku ngāueʻaki ai ʻa e taʻe siokitá. Ko hono fai ʻa e ngaahi meʻa maʻá e niʻihi kehé ko e tokoni ia ke toʻo atu ʻa e loto-mamahí, he naʻe pehē ʻe Sīsū: “ʻOku te monuʻia lahi ʻi he fai ha foaki atu, ʻi heʻete maʻu ha foaki mai.”​—Ngāue 20:35.

Ikuʻi ʻo e Maté

Ko ha huhu ʻa ha hone ʻe lava ke mātuʻaki mamahi, pea aʻu ʻo fakatupu mate. Ka, ʻoku faʻa hoko ʻa hono toʻo atu ʻa e meʻa huhu ʻo e ʻinisēkité ʻoku tuʻu ʻi ho kilí ʻo tokoni ia ke maʻu ai ha fiemālie. Ka ko e hā ʻa e ʻamanaki ʻoku maʻu ki hono maʻu ʻa e fiemālie mei he huhu ʻoku fakatupu maté?

ʻI he hili hono fakamatalaʻi ʻo pehē ko e angahalá ko e huhu ia ʻoku fakatupu maté, naʻe kalanga ʻa Paula: “Kae fakafetaʻi ki he ʻOtua, heʻene tuku mai ke tau ikuna ʻi hotau ʻEiki ko Sisu Kalaisi!” (1 Kolinitō 15:57) Ko e hā ʻa e kaunga ʻo Kalaisi ki he ikuʻi ʻo e maté? Naʻe fakahā ʻe Sīsū ko e meʻá eni ʻi heʻene lave ʻo fekauʻaki pē mo ia tonu: “Io, o hage koe Foha oe tagata, nae ikai haʻu ia ke tauhia ia, ka ke tauhi, bea ke foaki ene moui koe huhui oe toko lahi.” (Mātiu 20:​28, PM) ʻIo, ko kinautolu ʻoku nau tui ki he ʻAlo ʻo e ʻOtuá, ko Sīsū Kalaisí, mo e feilaulau huhuʻi naʻe tokonaki ʻe Sihova ʻo fakafou mai ʻiate iá, ʻe ʻikai ke iku ʻa e mate kuo tukufakaholo meia ʻĀtamá ki he tuʻunga ko e mole atu ʻo taʻe ngata.​—Sione 3:16.

Ko e meʻa fakafiefia moʻoni ʻa e ngaahi lea ʻa Sīsū: “He ʻoku ʻunu mai ha taimi, ʻa ia ʻe fanongo ai ki hono leʻo ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai; ko kinautolu naʻe ngaue lelei, ki he toetuʻu ke moʻui, ko kinautolu naʻe fai kovi, ki he toetuʻu ke fakamāu.”​—Sione 5:​28, 29.

ʻI ha ngaahi senituli lahi ki muʻa atu, naʻe kikiteʻi ai ʻe he palōfita ʻa e ʻOtuá ko ʻAisea: “Te ne [Sihova ko e ʻOtuá] folofua ʻa mate ʻo taʻengata; pea ko Atonai Sihova te ne holoholo ʻa e loʻimata mei he mata fuape.” (ʻAisea 25:8) ʻI he Fakahā 21:​4, ʻoku toe fakahā ai ʻi he Tohi Tapú ʻa e ʻamanaki fakaofo ko ʻení: “Pea te ne [ko e ʻOtuá] holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.” ʻI he fakalotolahi ʻa e ʻamanaki faka-Tohitapu ko ʻeni ʻo fekauʻaki mo kinautolu ʻoku nau mohe ʻi he maté, ko ia ko e faʻahinga ʻoku loto mamahí ʻoku ʻikai totonu ke nau mamahi “ʻo hange ko e kakai kehe, ʻa ia ʻoku ʻikai haʻanau ʻamanaki.”​—1 Tesalonaika 4:13.

Feinga ke ke sio loto atu ki he meʻa ʻoku tuku tauhi ʻe he ʻOtuá maʻá e kakaí, ʻo hangē ko ia ʻoku fakahā ʻi he Tohi Tapú. Ko e “mamahi lahi” ʻoku tuʻutuʻunuku maí ʻoku ʻuhinga ia ko e fakaʻauha ʻo e ngaahi meʻa ʻo e fokotuʻutuʻu fulikivanu ko ʻení. (Fakahā 7:14) ʻE fakaʻauha ʻa kinautolu ʻoku nau fai ʻa e lotu loí. ʻE ʻosi atu mo e kau taki ki he ngaahi meʻa fakapolitikalé mo e kau pisinisi mānumanu ʻoku nau fakatupu ʻa e honge mo e tau. ʻE hoko atu ʻa Sīsū Kalaisi ki hono tuku ki he luo taʻe  hano takelé ʻa Sētane ko e Tēvoló, ʻa ia ʻokú ne fakatupunga ʻa e maté ki he kakai tokolahi. Pea toki kamata ʻe Kalaisi ʻa ʻene Pule Taʻu Taha Afé, ʻa ia te ne ngāueʻaki ai ʻi he lolotonga ʻo e taimi ko iá ʻa e mahuʻinga ʻo ʻene feilaulau huhuʻí ki he kakaí. ʻE toe fokotuʻu mai ʻa e maté ʻi he toe tuʻu kuo ʻamanaki ki aí, pea ko e maama mei he Folofola ʻa e ʻOtuá ʻe fuʻu ngingila ʻene uló ʻa ia ʻe ʻikai ke kei ʻi ai ha ngaahi fakakaukau fakamahalo ʻo fekauʻaki mo e maté, ko e fili ʻo e kakaí. Pea ko e kotoa ʻo e faʻahinga ʻe moʻui ʻi he taimi ko iá te nau maʻu ʻa e faingamālie ke ako ki he ngaahi founga ʻa e ʻOtuá pea muimui ki heʻene ngaahi tuʻunga māʻoniʻoní.​—Palōvepi 4:18; Ngāue 24:15; Hepelū 2:​14, 15; Fakahā 18:​4-8; 19:​19-21; 20:​1-3.

ʻOku pehē ʻe Paula: ‘Toki hoko ʻa e ngataʻangá, ʻi he ʻoatu ʻe Kalaisi Sīsū ʻa e puleʻangá ki hono ʻOtuá ko ʻene Tamaí. He te ne hau ko e tuʻi kae ʻoua ke tuku ʻe he ʻOtuá ʻa e ngaahi fili hono kotoa pē ki hono lalo vaʻé. Ta kuo fakakaʻanga mo e fili fakamui, ko e maté.’ (1 Kolinitō 15:​24-26) ʻE ʻikai ke toe ʻi ai ʻa e ngaahi faingataʻaʻia hono kotoa pē ko e tupu mei he angahala ʻa ʻĀtamá. ʻE fai ʻa e ʻahiʻahi fakaʻosí, pea ko e kau ʻofa ki he ʻOtuá te nau hao moʻui atu ai ʻi he anga-tonu. (Fakahā 20:​4-10) ʻI hono toe fakafoki mai ʻa e faʻahingá ni ki he tuʻunga haohaoá, ko e kakai talangofua ko ʻení te nau moʻui, ʻo ʻikai ko e taʻu pē ʻe 70 pe naʻa mo e taʻu 110, ka te nau moʻui ʻo taʻe ngata. Ko ha toki meʻaʻofa lahi ē mei he ʻOtuá ʻo fakafou mai ʻi hono ʻAlo ʻofeiná!​—Loma 6:23.

Ko ia ai, ko e hā hono fuoloa te ke lava ke moʻui ai? Ko e vahaʻa taimi ʻo hoʻo moʻuí ʻe lava ke fakalahi atu ia ki he taʻe ngata. Koeʻuhi ʻokú ke moʻui ʻi he “taimi fakamui” ko ʻeni ʻo e māmaní, ʻe ʻikai ʻaupito nai te ke mate. (Tāniela 12:4; Sione 11:​25, 26; 17:3) Kapau te ke fai ʻa e finangalo ʻo e ʻOtuá, te ke moʻui atu ai pē nai ki he māmani foʻou ʻa e ʻOtuá naʻe talaʻofa maí.​—2 Pita 3:13.

Kae kehe, kapau kuó ke taʻumotuʻa, ʻoku fie maʻu kiate koe ke ke fakakaukau ki he malava ke ke mate. Ko e moʻoni, ko e ʻamanaki ʻo e toe tuʻu mei he maté ʻoku fakahoko mai ai ʻa e fiefia. Ka te ke fifili nai pē ʻe anga-fēfē ʻa hono fokotuʻutuʻu ʻe Sihova ʻa e moʻui fakafāmili ʻi he fokotuʻutuʻu foʻou ko iá. ʻOua te ke tuku ʻa e ngaahi meʻa peheé ke fakatupu loto-hohaʻa ʻiate koe, he ko Sihova te ne fai ʻa e meʻa te ne fakahoko mai ʻa e fiefia taʻe ngata kiate kinautolu te nau anga-tonu taʻe ngata kiate iá.

ʻI he fakaʻau atu ki he ngataʻanga ʻo e taimi faingataʻa ko eni ʻo e “kuonga fakamui” ʻo e fokotuʻutuʻu anga-fulikivanu ʻa Sētané, ʻoua naʻá ke tuku ʻa e manavahē ki he maté ke ne toʻo meiate koe ʻa e monū ko e tauhi kia Sihova ʻi he taimí ni. (2 Tīmote 3:1) Kapau ʻe mole atu ʻi he maté ha taha ʻokú ke ʻofa ai, fakafiemālieʻi koe ʻaki ʻa e ʻilo ko e mafai ʻo e maté ʻoku fakataimi pē. (Fakahā 20:​13, 14) Falala ki he ʻamanaki ʻo e toe tuʻu mei he maté. Pea tatau ai pē pe te ke hū atu ki he māmani foʻoú ʻo fou ʻi he hao moʻui atu ʻi he mamahi lahí pe fakafou ʻi he toe tuʻu mei he maté, ʻai ke tui pau ki he fakapapauʻi fakamānavaʻi ʻo pehē ko e maté, ʻa ia ko e fili fakamuí, ʻe fakaʻauha ia.​—Fakahā 7:​9, 14.

[Fakatātā ʻi he peesi 5]

ʻE lava ke langa hake fakalaumālie ʻe he ngaahi kaungāmeʻa lelei ko e kau Kalisitiané ʻa e toko taha ʻoku mamahí

[Fakatātā ʻi he peesi 6]

Ko e femoʻuekina ʻi he tokoni ki he niʻihi kehé ʻokú ne fakasiʻisiʻi ange ʻa e mamahi tupu mei he mate ʻa ha toko taha ʻokú te ʻofa ai