“Ko e Kotoa ʻo e Tangata Ia”

“Ke ke ʻapasia kia Elohimi, ʻo tauhi ʻene ngahi fekau; he ko e kotoa ʻo e tangata ia.”​—KOHELETI 12:13.

 1, 2. Ko e hā ʻoku feʻungamālie ai ke fakakaukau ki hotau fatongia ki he ʻOtuá?

“KO E HA ʻa e meʻa ʻoku ʻeke ʻe Sihova kiate koe?” Ko ha fehuʻi ia naʻe ʻeke ʻe ha palōfita ʻi he kuonga muʻá. Naʻá ne toki fakahā leva ʻa e fiemaʻu ʻa Sihová​—ko e fai fakalaó, manako ki he meesí, pea taka anga-vaivai ʻi he feangai mo e ʻOtuá.​—Maika 6:8.

² ʻI he ʻaho ko ʻeni ʻo e sio fakaekita peé mo e faʻifaʻitelihá, ʻoku taʻefiemālie ai ʻa e tokolahi ki he fakakaukau ko ia ko e ʻOtuá ʻokú ne fiemaʻu ha meʻa meiate kinautolu. ʻOku ʻikai te nau saiʻia ke fakamoʻuaʻi kinautolu. Kae fēfē leva ʻa e fakamulituku ia naʻe aʻu ki ai ʻa Solomone ʻi he Koheletí? “Ko e ngataʻanga ʻeni ʻo e meʻa: kuo aʻau hono kotoa. Ke ke ʻapasia kia Elohimi, ʻo tauhi ʻene ngahi fekau; he ko e kotoa ʻo e tangata ia.”​—Koheleti 12:13.

 3. Ko e hā ʻoku totonu ai ke tau fakakaukau fakamātoato ki he tohi ko ia ʻa Koheletí?

³ Pe ko e hā pē hotau ngaahi tuʻungá mo e anga ʻo e vakai ki he moʻuí, te tau maʻu ha ʻaonga lahi kapau te tau fakakaukau ki he tupuʻanga ʻo e fakamulituku ko iá. Ko Tuʻi Solomone, ʻa e tokotaha-tohi ʻo e tohi fakamānavaʻi ko ʻení, naʻá ne vakaiʻi fakalelei ʻa e niʻihi ʻo e ngaahi meʻa pē ko ia ʻoku hoko ko e konga ʻo ʻetau moʻuí ʻi he ʻaho ki he ʻaho. ʻE fakaʻosi vave nai ʻe ha niʻihi ia ʻo pehē, ko ʻene fakatotoló ʻaʻana ʻoku hanga tefito pē ia ki he tafaʻaki koví. Neongo ia naʻe fakamānavaʻi fakaʻotua ia pea ʻe lava ʻo tokoni ia kiate kitautolu ke fakamahuʻingaʻi ʻa ʻetau ngaahi ngāué mo e ngaahi meʻa ʻoku tau fakamuʻomuʻá, fakataha mo e ola ko e tupulaki ʻo e fiefiá.

Aʻusia ʻa e Ngaahi Hohaʻatuʻu Tefito ʻo e Moʻuí

 4. Ko e hā ʻa e meʻa naʻe sivisiviʻi mo lāulea ki ai ʻa Solomone ʻi he Koheletí?

⁴ Naʻe sivisiviʻi fakaʻaufuli ʻe Solomone ʻa e ‘fakaongosia ʻoku fai ʻe he hako ʻo e tangatá.’ “Naʻa ku tuku hoku loto ke ʻeke mo haʻao ʻaki ʻa e poto ki he meʻa kotoa ʻoku fai ʻi he lalo langi.” Ko e “fakaongosia,” naʻe ʻikai pehē ai ia naʻe ʻuhinga ʻa Solomone ki ha ngāue, pe ko ha ngāue totongi, ka ki he tafaʻaki kotoa ʻo e meʻa ʻoku moʻua ki ai ʻa tangata mo fafine ʻi he kotoa ʻo ʻenau moʻuí. (Koheleti 1:13) Tau fakakaukau angé ki ha ngaahi hohaʻatuʻu tefito ʻe niʻihi, pe ngaahi fakaongosia, pea toki fakahoa leva ʻetau ngaahi ngāué mo e ngaahi meʻa ʻoku tau fakamuʻomuʻá.

 5. Ko e hā ʻa e taha ʻo e ngaahi fakaongosia tefito ʻa e faʻahinga ʻo e tangatá?

⁵ ʻOku moʻoni ko e paʻangá ʻoku ʻi he ʻelito ia ʻo e ngaahi hohaʻatuʻu mo e ngaahi ngāue ʻa e tangatá. He ʻikai lava ha taha ke ne pehē moʻoni mai naʻe maʻu ʻe Solomone ha fakakaukau taʻemahuʻingaʻia ʻi he paʻangá ʻo hangē ko ia ko e kakai tuʻumālie ʻe niʻihi. Naʻá ne ʻiloʻi lelei ʻa e fiemaʻu ko ia ki ha paʻangá; ko hono maʻu ko ia ha paʻanga feʻungá ʻoku sai ange ia ʻi he nofo loto-hohaʻá pe masivá. (Koheleti 7:​11, 12) Ka ʻoku pau pē mahalo kuó ke ʻosi fakatokangaʻi ko e paʻanga ko iá, mo e koloa ko ia ʻoku fakatauʻakí, ʻe lava ʻo hoko ia ko e taumuʻa tefito ia ʻi he moʻuí​—ʻo tatau pē ki he masivá mo e koloaʻiá.

 6. Ko e hā ʻoku lava ke tau ako fekauʻaki mo e paʻangá mei he taha ʻo e ngaahi talanoa fakaefakatātā ʻa Sīsuú pea mei he meʻa naʻe hokosia tonu ʻe Solomoné?

⁶ Manatu ki he talanoa fakatātā ʻa Sīsū ki he tangata koloaʻia ko ia, naʻe ʻikai pē fiemālie ia, naʻe ngāue pē ke maʻu ʻo hulu ange. Naʻe fakamāuʻi ia ʻe he ʻOtuá ko e vale. Ko e hā hono ʻuhingá? Koeʻuhí ko ʻetau ‘moʻuí ʻoku ʻikai tautau ia ʻi he ngaʻotoʻota ʻoku tau maʻú.’ (Luke 12:​15-21) Ko e taukei ʻa Solomoné​—mahalo ʻoku laka ange ia ʻia kitautolu​—ʻokú ne fakapapauʻi ʻa e ngaahi lea ʻa Sīsuú. Lau ʻa e fakamatala ʻi he Koheleti 2:​4-9. Naʻe nōfoʻi ʻa Solomone ʻi ha vahaʻa taimi ʻi he fekumi ki he tuʻumālié. Naʻá ne langa ʻa e ngaahi ʻapi mo e ngaahi ngoue fakaʻofoʻofa. Naʻá ne malava ʻo totongi mo maʻu mai ʻa e kau fefine fakafeʻao hoihoifua. Naʻe malava nai ʻe he koloá mo e meʻa naʻá ne malava ʻo faiʻakí, ʻo ʻomi ʻa e fakafiemālie moʻoní, mo ha ongoʻi ʻo e lavameʻa moʻoní, mo e taumuʻa ki heʻene moʻuí? Naʻá ne tali hangatonu: “Pea u toki hanga ki he meʻa kehekehe kuo fai ʻe hoku nima, mo e ngaue kuo u fakafitefitaʻa ke fai, pea ta ko e muna pe hono kotoa mo e kai matangai, pea ʻikai hano fua ʻi he lalo laʻa.”​—Koheleti 2:11; 4:8.

 7. (a) ʻOku fakamoʻoniʻi ʻe he meʻa kuo hokosiá ʻa e hā fekauʻaki mo e mahuʻinga ʻo e paʻangá? (e) Ko e hā kuó ke sio tonu ai ʻoku fakamoʻoniʻi ai ʻa e fakamulituku ʻa Solomoné?

⁷ ʻOku ʻuhinga lelei ia, ko ha moʻoni ia kuo ʻosi fakamoʻoniʻi ʻi he ngaahi moʻui lahi. Kuo pau ke tau fakamoʻoniʻi ai ko hono maʻu ko ia ʻo e paʻanga lahi angé ʻoku ʻikai pē ke ne fakaleleiʻi ai ʻe ia ʻa e kotoa ʻo e ngaahi palopalemá. ʻE lava pē ʻo fakaleleiʻi ai ha niʻihi, hangē ko hono ʻai ke faingofua ange hono maʻu mai ʻo e meʻakaí mo e valá. Ka ko e teunga pē ʻe taha ʻe lava ʻe ha taha ʻo tui ʻi ha taimi pea saiʻia pē ʻi ha meʻakai mo ha inu lahi feʻunga. Pea kuó ke ʻosi lau ʻo fekauʻaki mo e kakai tuʻumālie ko ia kuo fakamamahiʻiʻaki ʻenau moʻuí ʻa e vete malí, ngāue koviʻaki ʻo e ʻolokaholó pe faitoʻo kona tapú, mo e kē ko ia mo e ngaahi kaingá. Naʻe pehē ʻe he fuʻu milionea ko J. P. Getty: “Ko e paʻangá ʻoku ʻikai haʻane fekauʻaki tonu ʻaʻana mo e fiefiá. Mahalo ko e lotomamahí pē.” Ki ha ʻuhinga lelei pē, naʻe fakakalasi tatau ai ʻe Solomone ʻa e ʻofa ki he silivá mo e muná. Fakahoa angé ʻa e moʻoni ko iá mo ia naʻe ʻiloʻi ʻe Solomoné: “ʻOku melie ʻa e mohe ʻa e tangata ngaue, pe ʻoku siʻi ʻene kai pe ʻoku lahi: ka ko e topono fau ʻa e koloaʻia ʻa ia ʻoku ʻikai te ne mamohe ai.”​—Koheleti 5:​10-12.

 8. Ko e hā ʻa e ʻuhinga ke ʻoua ʻe fuʻu fakamahuʻingaʻi ai ʻa e mahuʻinga ʻo e paʻangá?

⁸ Ko e paʻangá mo e koloá foki ʻoku ʻikai te na ʻomi ʻe kinaua ha ongoʻi fiemālie fekauʻaki mo e kahaʻú. Kapau naʻá ke maʻu ha paʻanga mo ha koloa lahi ange, mahalo naʻe mei tānaki mai ʻa e loto-hohaʻá pe ʻe anga-fēfē hano maluʻi ia, pea te ke kei taʻeʻilo ai pē pe ko e hā ʻe hoko mai ʻapongipongí. ʻE malava nai ke mole kotoa ia meiate koe, fakataha mo hoʻo moʻuí? (Koheleti 5:​13-17; 9:​11, 12) ʻI heʻene peheé, ʻoku ʻikai totonu ke faingataʻa ai ke sio ki he ʻuhinga ʻoku totonu ai ke maʻu ʻe heʻetau moʻuí pe ngāué ha ʻuhinga māʻolunga mo tuʻuloa ange ia ʻi he paʻangá mo e koloá.

Fāmilí, Ongoongoá, mo e Mafaí

 9. Ko e hā naʻe ʻalu tonu hake ai ʻa e moʻui fakafāmilí ʻi he sivi ʻa Solomoné?

⁹ Ko e ʻanalaiso ko ia ʻe Solomone ʻa e moʻuí, naʻe kau ai ʻa e tuʻunga ko e femoʻuekina ʻi he fāmilí. ʻOku fakamamafaʻi ʻe he Tohitapú ʻa e moʻui fakafāmilí, ʻo kau ai ʻa e fiefia ʻi hono maʻu mo tauhi ko ia ʻo e fānaú. (Senesi 2:​22-24; Sāme 127:​3-5; Palovepi 5:​15, 18-20; 6:20; Maake 10:​6-9; Efeso 5:​22-33) ʻOku hoko ai ia ko e meʻa tefito ʻo e moʻuí? ʻOku ngalingali ko e tokolahi ʻoku nau fakakaukau pehē, ʻi he fakamamafa ko ia kuo fai ʻe he ngaahi anga-fakafonua ʻe niʻihi ki he malí, fānaú, mo e ngaahi haʻi ko ia ʻo e fāmilí. Ka neongo ia ʻoku fakahā ʻe he Koheleti 6:3 naʻa mo hano maʻu ha fānau ʻe toko teau ʻoku ʻikai pē ko e kī ia ki ha moʻui ʻoku fakafiemālié. Fakakaukau atu pe ko e ngaahi mātuʻa ʻeni ʻe fiha kuo nau fai ʻa e ngaahi feilaulau koeʻuhí pē ko e fānaú ke nau maʻu ha kamataʻanga lelei pea mo ʻai ke faingofua ange ʻenau moʻuí. Neongo ʻoku mātuʻaki lelei ia, ʻoku pau pē naʻe ʻikai ko e ʻuhinga ia ʻa hotau Tokotaha-Fakatupú ko e taumuʻa tefito ʻo ʻetau ʻi ai ní ko e fakahoko atu pē ʻo e moʻuí ki he toʻutangata hono hokó, ʻo hangē ko ia ʻoku fai fakaenatula ʻe he fanga manú ke hokohoko atu ai honau faʻahingá.

10. Ko e hā ʻe hoko nai ai ʻa e tokanga tōtuʻa ki he fāmilí ko e muna pē?

¹⁰ Naʻe ʻohake mahino lelei ʻe Solomone ʻa e niʻihi ʻo e ngaahi moʻoniʻi meʻa ʻi he moʻui fakafāmilí. Ko e fakatātaá, ʻe tokangataha nai ha tangata ia ki hono fai ʻo e tokonaki ko ia maʻa ʻene fānaú mo hono fanga makapuná. Ka te nau fakamoʻoniʻi ai ʻoku nau fakapotopoto? Pe te nau hoko ai ko e vale ʻi he meʻa ko ia ʻokú ne feinga ke tātānaki maʻa kinautolú? Kapau ko e meʻa ki muí ʻoku hokó, he toki “muna . . . mo e kovi lahi” ē ʻe hokó!​—Koheleti 2:​18-21; 1 Tuʻi 12:8; 2 Kalonikali 12:​1-4, 9.

11, 12. (a) Ko e hā ʻa e ngaahi tulimui ʻi he moʻuí kuo tokangataha ki ai ʻa e niʻihi? (e) Ko e hā ʻe lava ai ke pehē ko e kumi ki he tuʻu-ki-muʻá ko e “kai matangi”?

¹¹ ʻI he fuʻu tō ki he tafaʻaki ʻe tahá, kuo ʻai ʻe he tokolahi ia ʻo fika ua ʻa e moʻui angamaheni fakafāmilí ki heʻenau fakapapau ko ia ke hoko ʻo ongoongoa pe pule ki he niʻihi kehé. Ko e fehālaaki nai ʻeni ʻoku hoko lahi ange ʻi he kakai tangatá. Kuó ke sio he meá ni ʻi ho kaungāakó, kaungāngāué, pe kaungāʻapí? ʻOku feinga mālohi ha tokolahi ke fakatokangaʻi, pe hoko ʻo ʻiloa, pe ke maʻu ha mafai ki he niʻihi kehé. Ka ʻoku mohu ʻuhinga moʻoni fēfē ʻa e meʻá ni?

¹² Fakakaukau atu ki he anga ʻo e feinga ʻa e niʻihi ke hoko ʻo ongoongoá, tatau ai pē pe ko e meʻa siʻi pe meʻa lahi. ʻOku tau sio ai ʻi he ʻapiakó, ʻi hotau kaungāʻapí, pea ʻi he ngaahi kulupu fakasōsiale kehekehe. ʻOku toe hoko ia ko ha ivi fakamālohituʻu ʻi he faʻahinga ko ia ʻoku nau fiemaʻu ke hoko ʻo ʻiloa ʻi he tā valivalí, fakafiefiá, mo e politikí. ʻIkai nai ko ha feinga mātuʻaki kulanoa ʻeni? Naʻe ui totonu ia ʻe Solomone ko e “kai matangi.” (Koheleti 4:4) Neongo kapau ʻe hoko ha talavou ʻo tuʻu-ki-muʻa ʻi ha kalapu, ʻi ha timi sipoti, pe ʻi ha kulupu hiva​—pe maʻu ʻe ha tangata pe fefine hano ongoongo lelei ʻi ha kautaha pe ʻi ha kolo​—ko e toko fiha ʻoku ʻilo moʻoni ki aí? ʻOku ʻilo nai ʻe he tokolahi taha ʻo e kakai ʻi he tafaʻaki kolope ʻe tahá (pe naʻa mo e fonua tatau pē ko iá) ʻoku ʻi ai ha tokotaha pehē? Pe ʻoku nau hokohoko atu pē ʻi he moʻuí ʻo ʻikai ha teitei ʻilo ʻe taha pe ko e hā ha kiʻi ongoongoa ʻoku maʻu ʻe ha tangata pe fefine? Pea ʻoku pehē pē ha faʻahinga mālohi pe mafai ʻoku maʻu ʻe ha taha ʻi he ngāué, ʻi he koló, pe ʻi ha haʻohaʻonga ʻo ha kulupu.

13. (a) ʻOku anga-fēfē hono tokoniʻi kitautolu ʻe he Koheleti 9:​4, 5 ke maʻu ha vakai totonu ki he feinga ko ia ki he tuʻu-ki-muʻá pe mafaí? (e) Ko e hā ʻa e ngaahi moʻoniʻi meʻa ʻoku totonu ke tau sio ki ai kapau ko e moʻuí pē ʻeni? (Sio ki he fakamatala ʻi laló.)

¹³ ʻE iku atu ki he hā ʻa e tuʻu-ki-muʻa pe mafai peheé? Hangē pē ko e ʻalu atu mo e haʻu ha toʻutangata, ʻa e puli atu mo e ngalo hifo ʻa e kakai tuʻu-ki-muʻá pe maʻu mafaí. ʻOku moʻoni ʻeni fekauʻaki mo e kau langá, kau mūsiká mo e kau pōtoʻi ngāue kehé, kau fakalelei fakasōsialé, pea mo hai fua, ʻo hangē tofu pē ko ia ko ʻene moʻoni ʻo fekauʻaki mo e tokolahi taha ʻo e kau politikalé mo e kau taki fakakautaú. ʻI he ngaahi ngāue ko iá, ko e tokotaha tāutaha mahino nai ʻe fiha ʻokú ke ʻilo naʻe moʻui ʻi he vahaʻa ʻo e 1700 mo e 1800? Naʻe fakafuofua tonu ʻe Solomone ʻa e ngaahi meʻá, ʻo ne pehē: “ʻOku lelei hake ha kuli moʻui ʻi ha laione mate​—he ko e kau moʻui ʻoku nau ʻilo ai pe te nau pekia: ka ko e kau pekia ʻoku ʻikai te nau ʻilo ha momoʻi meʻa, . . . he kuo mole ʻa e manatu kiate kinautolu.” (Koheleti 9:​4, 5) Pea kapau ko e moʻuí pē ʻeni, pea tā ko e feinga ki he tuʻu-ki-muʻá mo e mafaí ko e muna pē.a

Ko ʻEtau Tokanga Tefitó mo e Fatongiá

14. Ko e hā ʻoku totonu ai ke tokoniʻi fakafoʻituitui kitautolu ʻe he tohi ʻa Koheletí?

¹⁴ Naʻe ʻikai ke fakamatala ʻa Solomone ia ki ha ngaahi ngāue lahi, ngaahi taumuʻa, mo e ngaahi fiefia ko ia ʻoku fakahanga ki ai ʻe he faʻahinga ʻo e tangatá ʻenau moʻuí. Neongo ia, ʻoku feʻunga pē ʻa e meʻa naʻá ne tohí. Ko ʻetau vakaiʻi fakalelei ʻa e tohí ʻoku ʻikai fiemaʻu ia ke ngali fakamamahi pe kovi, he kuo tau ʻosi sivisiviʻi moʻoni ha tohi ʻi he Tohitapú ʻa ia naʻe fakamānavaʻi ʻo fakataumuʻa ʻe he ʻOtua ko Sihová ke ʻaonga kiate kitautolu. ʻE lava ʻo tokoni ia kiate kitautolu tāutaha ke fakatonutonu ʻetau vakai ko ia ki he moʻuí mo e meʻa ʻoku fakahanga ʻetau tokangá ki aí. (Koheleti 7:2; 2 Timote 3:​16, 17) ʻOku mātuʻaki pehē ia ʻi he vakai ko ia ki he ngaahi fakamulituku naʻe tokoniʻi ʻe Sihova ʻa Solomone ke ne aʻu ki aí.

15, 16. (a) Ko e hā ʻa e vakai ʻa Solomone ki he fiefia ʻi he moʻuí? (e) Ko e hā ʻa e fakangatangata taau naʻe fokotuʻu atu ʻe Solomone ki he fiefia ʻi he moʻuí?

¹⁵ Ko e poini ʻe taha naʻe faʻa toutou langaʻi ʻe Solomoné, ko e kau sevāniti ko ia ʻa e ʻOtua moʻoní ʻoku totonu ke nau maʻu ʻa e fiefia ʻi heʻenau ngāue ko ia ʻi Hono ʻaó. “Kuo u ʻilo ʻoku ʻikai ha lelei ʻi he nofo, ka ke te fiefia mo fai lelei lolotonga ʻete moʻui. Ka ko eni foki, ko e kai mo inu ʻa e tangata kotoa pe, mo ʻene ʻilo lelei ʻi heʻene ngaahi ngaue kehekehe, ko e meʻa foaki ia ʻa e ʻOtua.” (Koheleti 2:24; 3:​12, 13; 5:18; 8:15) Fakatokangaʻi naʻe ʻikai ke fakaʻaiʻai ʻe Solomone ia ʻa e konā longoaʻá; pea ʻikai ko haʻane poupouʻi ʻe ia ʻa e faʻahinga fakakaukau ko ia ke ‘Tau kai, inu, pea mo fiefia he ko ʻapongipongí te tau mate.’ (1 Kolinito 15:​14, 32-34) Naʻá ne ʻuhingá ʻoku totonu ke tau maʻu pē ʻa e fiefiá ʻi he ngaahi fiefiaʻanga angamahení, hangē ko e kaí mo e inú, ʻi heʻetau ‘fai lelei ko ia lolotonga ʻetau moʻuí.’ ʻOku fakahanga taʻetoefehuʻia ai ʻetau moʻuí ki he finangalo ko ia ʻo e Tokotaha-Fakatupú, ʻa ia ʻokú ne fakapapauʻi ʻa e meʻa ʻoku lelei moʻoní.​—Sāme 25:8; Koheleti 9:1; Maake 10: 17, 18; Loma 12:2.

¹⁶ Naʻe tohi ʻe Solomone: “ʻAlu ā; kai hoʻo meʻakai mo e fiefia, pea inu hoʻo uaine mo e loto fiemalie; he kuo loa ʻa e fiemalie ʻa Elohimi ki hoʻo ngaahi ngaue na.” (Koheleti 9:​7-9) ʻIo, ko e tangata pe ko e fefine ko ia ʻokú ne maʻu moʻoni ha moʻui mohu ʻuhinga mo fakafiemālié ʻoku longomoʻui ʻi he ngaahi ngāue ʻoku hōifua ai ʻa Sihová. ʻOku fiemaʻu ai heni kitautolu ke tau fakakaukau fakalelei maʻu pē kiate ia. He toki faikehekehe ē ko e taumuʻá ni mei he taumuʻa ko ia ʻa e tokolahi taha ʻo e kakaí, ʻa ia ʻoku nau laka atu ʻi he moʻuí ʻo makatuʻunga ʻi he ngaahi fakaʻuhinga fakaetangatá!

17, 18. (a) ʻOku anga-fēfē ʻa e tali ʻa e kakai tokolahi ki he ngaahi meʻa ʻoku hoko totonu ʻi he moʻuí? (e) Ko e hā ʻa e ola ʻoku totonu ke tau manatuʻi maʻu pē?

¹⁷ Neongo ʻoku akoʻi ʻe he ngaahi lotu ʻe niʻihi ʻo fekauʻaki mo ha moʻui ʻi he kahaʻú, ʻoku tui ʻa e kakai tokolahi ia ko e moʻui ia ko ʻení ko ia kotoa pē ia ʻoku lava ke nau fakapapauʻí. Kuó ke ʻosi sio nai ki heʻenau talí ʻo hangē ko ia ko hono fakamatalaʻi ʻe Solomoné: “Ko e meʻa ʻi he ʻikai fakaai vave ʻa e tautea ʻo e ngaue kovi naʻe tala, ko ia ko hono ō ia ʻoku malohi ai ʻa e loto ʻo e hakoʻi tangata ke faikovi.” (Koheleti 8:11) Naʻa mo e faʻahinga ʻoku ʻikai te nau fuʻu kau fēfē atu ʻi he ngaahi tōʻonga fakalieliá, ʻoku hā ʻoku nau tokanga tefito pē ki he lolotongá ni. Ko e ʻuhinga ia ʻe taha ʻoku hoko ai ʻa e paʻangá, koloá, ongoongoá, pule ki he niʻihi kehé, fāmilí, pe ko e ngaahi meʻa fakatupu tokanga peheé ʻo fuʻu mahuʻinga makehe ia kiate kinautolú. Kae kehe, naʻe ʻikai fakangata pē ai ʻe Solomone ʻa e fakakaukaú. Naʻá ne tānaki atu: “Neongo e tuʻo teau ʻa e faikovi ʻa e angahala, pea ʻoku ne tolonga fuoloa ai; ka ʻoku ʻilo foki ʻe au kuo pau ke lelei ha taha ʻoku ʻapasia kia Elohimi, ʻa kinautolu ʻoku tupu ʻenau ʻapasia ko ʻenau ongoʻi ʻa ʻene ʻAfio.” (Koheleti 8:​12, 13) ʻOku hā mahino naʻe tui pau ʻa Solomone ʻe hoko ʻo iku lelei kiate kitautolu kapau te tau ‘ʻapasia kia Elohimi.’ ʻO lelei fēfē? Te tau lava ʻo maʻu ʻa e talí mei he fakahoa naʻá ne faí. ʻE lava ʻe Sihova ʻo ʻai ke ‘tolonga fuoloa ʻetau moʻuí.’

¹⁸ ʻOku totonu tautefito ki he faʻahinga ko ia ʻoku nau kei siʻi peé ke fakakaukau ki he moʻoni mātuʻaki falalaʻanga ko ia, ʻe hoko ʻo iku lelei kiate kinautolu kapau te nau manavahē ki he ʻOtuá. ʻO hangē pē kuó ke ʻosi sio tonu nai aí, ko e tokotaha veʻe vave tahá ʻe tūkia nai pea ʻikai te ne maʻu ʻa e lová. Ko ha kongakau mālohi nai ʻe foʻi ʻi hano ikunaʻi. Ko ha tangata pisinisi fakapotopoto te ne hoko nai ʻo tuʻutāmaki. Pea mo e ngaahi meʻa taʻepau kehe ʻokú ne ʻai ʻa e moʻuí ke mātuʻaki taʻealafakapapauʻí. Ka ʻe malava ke ke mātuʻaki fakapapauʻi ʻa e meʻá ni: Ko e ʻalunga fakapotopoto mo pau tahá ko e fiefia ʻi he moʻuí lolotonga hoʻo fai lelei ʻo fakatatau ki he ngaahi lao fakaeʻulungaanga ʻa e ʻOtuá pea fakatatau ki hono finangaló. (Koheleti 9:11) ʻOku kau heni ʻa e ako mei he Tohitapú pe ko e hā ʻa e finangalo ʻo e ʻOtuá, fakatapui ʻa ʻete moʻuí kiate ia, pea hoko ko ha Kalisitiane ʻosi papitaiso.​—Mātiu 28:​19, 20.

19. ʻE lava ke ngāueʻaki fēfē ʻe he kau talavoú ʻenau moʻuí, ka ko e hā ʻa e ʻalunga ia ʻoku fakapotopotó?

¹⁹ ʻE ʻikai ke fakamālohiʻi ʻe he Tokotaha-Fakatupú ia ʻa e toʻutupú pe ko e niʻihi kehé ke muimui ki heʻene tatakí. Te nau lava ʻo luva atu kinautolu ki he akó, ʻo hoko nai ai ko e kau ako kuo līʻoa ki he ngaahi tohi ako taʻefaʻalaua fakaetangatá. ʻE faai atu pē ʻo fakamoʻoniʻi ʻoku fakahela ia ki he sinó. Pe ko ʻenau lava ʻo ʻaʻeva ʻi he ngaahi founga ʻo honau loto fakaetangata taʻehaohaoá pe muimui ki he ngaahi meʻa ʻoku fakamānako ki he matá. ʻE iku pau moʻoni ia ki he loto-mamahi, pea ko ha moʻui kuo fakamoleki peheʻi ʻe iku atu ʻo fakamoʻoniʻi ko e muna pē. (Koheleti 11:​9–12:12; 1 Sione 2:​15-17) Ko ia ai ʻoku fai ʻe Solomone ha fakatangi ki he kau talavoú​—ko ha fakatangi ʻoku totonu ke tau fakakaukau fakamātoato ki ai, tatau ai pē pe ko e hā hotau taʻumotuʻá: “Manatu ki he ʻAfifio naʻe ngaohi koe lolotonga hoʻo talavou: Teʻeki hoko ʻa e ngaahi ʻaho kovi, teʻeki aʻu mai ʻa e ngaahi taʻu, ʻa ia te ke pehe ai, ʻOku ʻikai vovo ha meʻa kiate au.”​—Koheleti 12:2 (Tagata Malaga 12:​1, PM).

20. Ko e hā ʻa e vakai mafamafatatau ʻo e pōpoaki ko ia ʻoku ʻi he Koheletí?

²⁰ Ko e hā leva te tau fakaʻosiʻakí? Sai, fēfē ʻa e fakamulituku naʻe aʻu ki ai ʻa Solomoné? Naʻá ne mamata, pe sivisiviʻi, ʻa e “ngaue kehekehe ʻoku fai ʻi he lalo laʻa; pea ta ko e koto muna ia, mo e kai matangi.” (Koheleti 1:14) ʻOku ʻikai te tau maʻu ʻi he tohi ʻa Koheletí ʻa e ngaahi lea ʻa ha taha fakaanga pe tangata loto-ʻiteʻita. Ko e konga ia ʻo e Folofola fakamānavaʻi ʻa e ʻOtuá pea ʻoku taau ke tau fakakaukau fakalelei ki ai.

21, 22. (a) Ko e hā ʻa e ngaahi tafaʻaki ʻo e moʻuí naʻe fakakaukauʻi ʻe Solomoné? (e) Ko e hā ʻa e fakamulituku fakapotopoto naʻá ne aʻu ki aí? (f) Kuo anga-fēfē hono ueʻi koe ʻi hono sivisiviʻi ko ia ʻo e ngaahi meʻa ʻoku ʻi he Koheletí?

²¹ Naʻe saveaʻi ʻe Solomone ʻa e fakaongosia, ngaahi fāinga, mo e ngaahi hoholi mālohi fakaetangatá. Naʻá ne fakakaukau ki he ola ʻo e ngaahi meʻa ʻoku hokó ʻi he ʻalunga angamaheni pē, ʻa e ikuʻanga feifeitamaki mo ngeʻesi kuo aʻusia ʻe he tokolahi fau ʻo e faʻahinga ʻo e tangatá. Naʻá ne fakakaukauʻi fakalelei ʻa e tuʻunga moʻoni ko ia ʻo e taʻehaohaoa mo e iku pē ki he maté ʻa e faʻahinga ʻo e tangatá. Pea naʻá ne fakakau ai ʻa e ʻilo kuo foaki mei he ʻOtuá ʻo kau ki he maté mo ha ʻamanaki pē ki ha moʻui ʻi he kahaʻú. Naʻe fakafuofuaʻi kotoa ʻa e meʻá ni ʻe ha tangata naʻe fakalahi fakaeʻotua hono potó, ʻio, ko e taha ia ʻo e kau poto taha ʻi he faʻahinga ʻo e tangatá kuo moʻui mai. Pea ko e fakamulituku naʻá ne aʻusiá naʻe fakakau ia ʻi he Tohitapu Māʻoniʻoní ke ʻaonga kiate kinautolu kotoa pē ʻoku nau fiemaʻu ha moʻui mohu ʻuhinga moʻoní. ʻIkai ʻoku totonu ke tau loto-tatau mo ia?

²² “Ko e ngataʻanga ʻeni ʻo e meʻa; kuo aʻau hono kotoa. Ke ke ʻapasia kia Elohimi, ʻo tauhi ʻene ngahi fekau; he ko e kotoa ʻo e tangata ia. He ʻomi ʻe Elohimi ʻa e ngaue kotoa ki he fakamaau, kaeʻumaʻa ʻa e meʻa kotoa ʻoku fufū, pe ʻoku lelei ia pe kovi.”​—Koheleti 12:​13, 14.

[Fakamatala ʻi lalo]

ʻOkú ke Manatuʻi?

◻ Ko e hā ʻa e fakafuofua fakapotopoto ki he tuʻunga ʻo e koloá ʻi hoʻo moʻuí?

◻ Ko e hā ʻoku totonu ai ke ʻoua te tau fai ha fakamamafa fuʻu tōtuʻa ki he fāmilí, ki he ongoongoá, pe ki he pule ki he niʻihi kehé?

◻ Ko e hā ʻa e fakakaukau fakaeʻotua ki he fiefiá naʻe fakaʻaiʻai mai ʻe Solomoné?

◻ Kuo anga-fēfē hoʻo maʻu ʻa e ʻaonga mei hono vakaiʻi fakalelei ʻo e tohi ʻa Koheletí?

[Fakatātā ʻi he peesi 15]

Ko e paʻangá mo e koloá ʻoku ʻikai ke na fakapapauʻi ʻa e fiemālié

[Fakatātā ʻi he peesi 17]

Ko e kakai kei siʻí ʻe lava ʻo fakapapauʻi ʻe iku lelei kiate kinautolu kapau te nau manavahē ki he ʻOtuá