Poupouʻi Mateaki ʻa e Folofola Fakamānavaʻi ʻa e ʻOtuá

“ʻOku . . . mau liʻaki ʻa e fai fufū ʻo e ngaahi meʻa fakamā, ʻo ʻikai te mau laka fakaoloolo, ʻumaʻā haʻamau huʻi ʻa e folofola ʻa e ʻOtua.”​—2 KOLINITO 4:2.

 1. (a) Ko e hā kuo fiemaʻú koeʻuhí kae fakahoko ʻa e ngāue ʻoku fokotuʻu mai ʻi he Mātiu 24:14 mo e 28:​19, 20? (e) Ko e hā e lahi naʻe ala maʻu ai ʻa e Tohitapú ʻi he ngaahi lea ʻa e kakaí ʻi he taimi naʻe kamata ai ʻa e ngaahi ʻaho fakaʻosí?

ʻI HEʻENE kikite ʻiloa fekauʻaki mo ʻene ʻi ai fakatuʻí mo e fakaʻosiʻosi ʻo e ngaahi meʻa ʻo e fokotuʻutuʻu motuʻá, naʻe tomuʻa tala ai ʻe Sīsū Kalaisi: “Koe ogoogolelei ni oe buleaga e malaga aki i mamani kotoabe, ko e mea fakamooni ki he buleaga kotoabe, bea e toki hoko mai ae ikuaga.” Naʻá ne toe fakahinohino ki hono kau muimuí: “Ngaohi ʻa e ngāhi kakai kotoa pe ko ʻeku kau ako, . . . akoʻi kinautolu ke tauhi ʻa e ngāhi meʻa kotoa pe kuo u tuʻutuʻuni atu.” (Mātiu 24:​14, PM; 28:​19, 20) Ko hono fakahoko ʻo e ngaahi kikite ko iá, ʻoku kau ki ai ʻa e ngāue lahi ʻi hono liliu mo hono pulusi ʻo e Tohitapú, ʻi hono akoʻi ki he kakaí ʻa hono ʻuhingá, pea ʻi hono tokoniʻi kinautolu ke ngāueʻaki ia ʻi heʻenau moʻuí. Ko ha monū ia ke kau ʻi ha ngāue pehē! ʻI he aʻu ki he 1914 ko e Tohitapú pe ko hano konga pē ne ʻosi pulusi ia ʻi he ngaahi lea ʻe 570. Kae talu mei ai mo hono tānaki mai ʻo e toe ngaahi lea ʻe laui ngeau mo e ngaahi lea fakafeituʻu kehekehe, pea ʻi he ngaahi lea lahi ʻoku laka hake ʻi he liliu ʻe taha kuo ʻai ʻo ala maʻú.a

 2. Ko e hā ʻa e ngaahi taumuʻa kehekehe kuó ne tākiekina ʻa e ngāue ʻa e kau liliu leá mo e kau pulusi ʻo e Tohitapú?

² Ko ha pole ia ki ha tokotaha liliu lea pē ke toʻo ha fakamatala mei ha lea ʻe taha ʻo ʻai ia ke mahinongofua ki he faʻahinga ko ia ʻoku nau lau mo fanongo ʻi ha lea kehe ia. Ko e kau liliu Tohitapu ʻe niʻihi kuo nau fai ʻenau ngāué ʻaki ʻa e mātuʻaki tokanga moʻoni koeʻuhi ko e meʻa naʻa nau liliú ko e Folofola ia ʻa e ʻOtuá. Ko e niʻihi kehé ia ko e tōʻoa pē ʻi he fakamānako fakaeako ʻo e foʻi ngāué. Kuo nau vakai nai ki he kakano ʻo e Tohitapú ko ha tui tukufakaholo mahuʻinga pē. Ki he niʻihi, ko e lotú ko ʻenau pisinisí ia, pea ke maʻu ʻo pulusi ha tohi ʻoku hā ai honau hingoá ko e tokotaha liliú ia pe tokotaha pulusí, ko e konga ia ʻo ʻenau maʻuʻanga moʻuí. ʻOku hā mahino ko ʻenau ngaahi taumuʻá ʻokú ne tākiekina ʻa e founga ʻo ʻenau ngāué.

 3. Naʻe anga-fēfē ʻa e vakai ʻa e New World Bible Translation Committee ki heʻene ngāué?

³ ʻOku taau ke fakatokangaʻi ʻa e fakamatala naʻe fai ʻe he New World Bible Translation Committee: “ʻOku ʻuhinga ʻa hono liliu ʻa e Ngaahi Konga Tohitapu Māʻoniʻoní ko hono ʻoatu ki ha toe lea kehe ʻa e ngaahi fakakaukau mo e ngaahi folofola ʻa Sihova ko e ʻOtuá . . . Ko e taha ia ha fakakaukau fakamātoato moʻoni. Ko e kau liliu lea ʻo e ngāué ni, ʻa ia ʻoku nau manavahē mo ʻofa ki he Fatutohi Fakaʻotua ʻo e Ngaahi Konga Tohitapu Māʻoniʻoní, ʻoku nau ongoʻi kiate Ia ha fatongia makehe ke fakaaʻu ʻa ʻene ngaahi fakakaukaú mo ʻene ngaahi talá ʻi he tonu taha ʻe ala lavá. ʻOku nau toe ongoʻi ha fatongia fekauʻaki mo e kau lau tohi ʻoku faifekumí ʻa ē ʻoku nau fakafalala ki ha liliu ʻo e Folofola fakamānavaʻi ʻa e ʻOtua Fungani Māʻolungá ki honau fakamoʻui taʻengatá. Koeʻuhi ko ha faʻahinga ongoʻi ʻo ha fatongia molumalu pehē ne hanga ai hili ha ʻalunga ʻo ha ngaahi taʻu lahi, ʻe he kōmiti ko ʻeni ʻo e kau tangata kuo fakatapuí, ʻo tokonaki ʻa e New World Translation of the Holy Scriptures.” Ko e taumuʻa ʻa e kōmití ke maʻu ha liliu ʻo e Tohitapú ʻa ia ʻe maʻalaʻala pea mahinongofua, pea mo ia ko ē ʻe piki ofi ʻaupito ki he muʻaki tatau faka-Hepeluú mo e faka-Kalisi ko ē te ne tokonaki mai ha makatuʻunga ke tupulaki hokohoko ai ʻi he ʻilo totonú.

Ko e Hā Kuo Hoko ki he Huafa ʻo e ʻOtuá?

 4. ʻOku mahuʻinga fēfē ʻa e huafa ʻo e ʻOtuá ʻi he Tohitapú?

⁴ Ko e taha ʻo e ngaahi taumuʻa tefito ʻo e Tohitapú ko hono tokoniʻi ʻa e kakaí ke nau maʻu ʻa e ʻilo ki he ʻOtua moʻoní. (Ekisoto 20:​2-7; 34:​1-7; Aisea 52:6) Naʻe akoʻi ʻe Sīsū Kalaisi ʻa ʻene kau muimuí ke nau lotu “ke tapuhā,” ke ʻai ke toputapu, pe tauhi ke māʻoniʻoni ʻa e huafa ʻo ʻene Tamaí. (Mātiu 6:9) Naʻe ʻai ʻe he ʻOtuá ke kau hono huafa fakaeiá ʻi he Tohitapú ʻo laka hake ʻi he tuʻo 7,000. ʻOkú ne fiemaʻu ʻa e kakaí ke ʻilo ki he huafa ko iá pea mo e ngaahi ʻulungaanga ʻo e Tokotaha ʻoku ui ʻakí.​—Malakai 1:11.

 5. ʻOku anga-fēfē hono fakalea mai ʻe he kau liliu lea kehekehe ʻa e huafa fakaʻotuá?

⁵ ʻOku tokolahi ʻa e kau liliu Tohitapu kuo nau fakahāhā ʻa e ʻapasia moʻoni ki he huafa fakaʻotuá pea kuo nau ngāueʻaki tuʻumaʻu ia ʻi heʻenau ngāué. ʻOku saiʻia ʻa e kau liliu lea ia ʻe niʻihi ʻi he Yahweh. Ko e niʻihi kehé ia kuo nau fili ʻe kinautolu ha founga sipela ʻo e huafa fakaʻotuá ʻa ia ko ē kuo liliu mai ki heʻenau leá lolotonga ia ʻa hono kei fakamahinoʻi ʻaki pē ʻa e anga ʻo ʻene ʻasi ʻi he konga tohi faka-Hepeluú, mahalo pē ko ha founga sipela ia kuo ʻilo lahia ʻi he fuoloa hono ngāueʻakí. Ko e New World Translation of the Holy Scriptures ʻokú ne ngāueʻaki ʻa e Jehovah ʻo tuʻo 7,210 ʻi hono ngaahi konga tohi tefitó.

 6. (a) ʻI he ngaahi taʻu ki muí ni maí, ko e hā kuo fai ʻe he kau liliu leá ʻo fekauʻaki mo e ngaahi lave ko ia ki he huafa fakaʻotuá? (e) ʻOku mafola lahia fēfē ʻa e tōʻonga ko ʻení?

⁶ ʻI he ngaahi taʻu ki muí ni maí, neongo ʻoku kei tauhi pē ʻe he kau liliu Tohitapú ia ʻa e ngaahi hingoa ʻo e ngaahi ʻotua pangani hangē ko Pēali pea mo Moloké, ʻoku fakautuutu vave ange ʻenau toʻo ʻe kinautolu ʻa e huafa fakaeia ʻo e ʻOtua moʻoní mei he ngaahi liliu ʻo ʻene Folofola fakamānavaʻí. (Ekisoto 3:15; Selemaia 32:35) ʻI he ngaahi konga tohi hangē ko e Mātiu 6:9 pea mo e Sione 17:6, 26, ʻoku ngāueʻaki ia ʻe ha liliu faka-ʻAlipēnia kuo tufakilahia ʻa e fakalea faka-Kalisi “ko e huafa ʻoʻoú” (ʻa ia, ko e huafa ʻo e ʻOtuá) ʻo ʻai pē ko e “ʻoʻou,” ʻo hangē pē naʻe ʻikai lave ʻa e ngaahi konga tohi ia ko iá ki ha huafá. ʻI he Sāme 83:​18, ʻoku toʻo ai ʻe he The New English Bible pea mo e Today’s English Version fakatouʻosi ʻa e huafa fakaeia ʻo e ʻOtuá pea mo ha faʻahinga lave pē fekauʻaki mo e moʻoniʻi meʻa ko ia ko e ʻOtuá ʻoku ʻi ai hono huafa. Neongo ʻoku ʻasi ʻa e huafa fakaʻotuá ia ʻi he ngaahi liliu motuʻa ange ʻo e Ngaahi Konga Tohitapu Faka-Hepeluú ʻi he lahi taha ʻo e ʻū leá, ko e ngaahi liliu foʻou angé ʻoku nau faʻa toʻo ʻe kinautolu ia pe tuku pē ʻi ha kiʻi fakamatala ʻi he tafaʻaki peesí. Ko e tuʻunga ʻeni ʻoku ʻi ai ʻi he lea faka-Pilitāniá, pea pehē ki he ngaahi lea lahi ʻo ʻIulope, ʻAfilika, ʻAmelika Saute, ʻInitia, pea mo e ʻotumotu ʻo e Pasifikí.

 7. (a) ʻOku anga-fēfē ʻa e tōʻongafai ʻa e kau liliu ia ʻo e ngaahi Tohitapu faka-ʻAfilika ʻe niʻihi fekauʻaki mo e huafa fakaʻotuá? (e) ʻOku fēfē hoʻo ongoʻi fekauʻaki mo iá?

⁷ Ko e kau liliu ʻo e Tohitapú ki he ngaahi lea faka-ʻAfilika ʻe niʻihi ʻoku nau laka atu kinautolu ʻi ha toe sitepu ia ʻe taha. ʻI he ʻikai ke fetongiʻaki pē ʻa e huafa fakaʻotuá ha hingoa fakalakanga faka-Tohitapú, hangē ko e ʻOtua pe ʻEikí, ʻoku nau fakahū ʻe kinautolu ʻa e ngaahi hingoa ko e toʻo mei he ngaahi tui fakalotu ʻi honau feituʻú. ʻI he The New Testament and Psalms in Zulu (liliu ʻo e 1986), ko e hingoa fakalakanga ʻOtuá (uNkulunkulu) naʻe ngāueʻaki taufetongi ia mo e hingoa ʻo e tokotaha (uMvelinqangi) ʻa ia ʻoku mahino ki he kau Sulú ko e lave ia ki he ‘kui motuʻa ʻa ia ʻoku fai ki ai ʻa e lotu fakafou ʻi he ngaahi kui fakaetangatá.’ ʻI ha kupu ʻi he makasini The Bible Translator, ʻo ʻOkatopa 1992, naʻe līpooti ai ko hono teuteu ko ia ʻo e Tohitapu faka-Sikuā ʻa ia ʻe ui ko e Buku Loyera, naʻe ngāueʻaki ʻe he kau liliu leá ia ʻa e Chauta ko e huafa fakaeiá ia ʻo fetongiʻaki ʻa e Sihová. Ko e Chauta, ko e fakamatala ia ʻa e kupú, ko e “ʻOtua ia kuo nau ʻilo mo lotu maʻu pē ki aí.” Neongo ia, ko e tokolahi ʻo e kakaí ni ʻoku nau toe lotu kinautolu ki he meʻa ʻoku nau tui ko e ngaahi laumālie ʻo e kau maté. ʻOku moʻoni kapau ʻe fai ʻe he kakaí ha ngaahi fakatangi ki ha “Meʻamoʻui Māʻolunga,” pea ko e hā pē ha hingoa ʻoku nau ngāueʻaki ki he “Meʻamoʻui Māʻolunga” ko iá ʻoku feʻungamālie lelei ia ki he huafa fakaeia ʻo Sihová, neongo ai pē pe ko e hā ʻe kaunga nai ki ai ʻenau lotú? ʻIkai ʻaupito! (Aisea 42:8; 1 Kolinito 10:20) Ko hono fetongi ʻa e huafa fakaeia ʻo e ʻOtuá ʻaki ʻa e faʻahinga meʻa ko ia ʻokú ne ʻai ʻa e kakaí ke nau ongoʻi ko ʻenau ngaahi tui talatukufakaholó ʻoku mātuʻaki moʻoní, ʻoku ʻikai tokoniʻi ai kinautolu ia ke nau ʻunu ofi ange ai ki he ʻOtua moʻoní.

 8. Ko e hā kuo ʻikai fakasivesivaʻi ai ʻa e taumuʻa ʻa e ʻOtuá ke ʻai hono huafá ke ʻiloá?

⁸ Kuo halaʻatā ke liliu pe fakasivesivaʻi ʻe he kotoa ʻo e meʻá ni ʻa e taumuʻa ko ia ʻa Sihova ke ʻai ke ʻiloa hono huafá. ʻI he ngaahi lea ʻo ʻIulope, ʻAfilika, ko e ʻOtu ʻAmeliká, ko e Hahaké, pea mo e ngaahi motu ʻo e tahí, ʻoku kei mafola holo pē ʻa e ngaahi Tohitapu lahi ia ʻa ia ʻoku ʻi ai ʻa e huafa fakaʻotuá. ʻOku toe ʻi ai foki mo e Kau Fakamoʻoni ʻa Sihova ʻoku laka hake ʻi he 5,400,000 ʻi he ngaahi fonua mo e ngaahi feituʻu ʻe 233 ʻa ia ʻoku nau līʻoa fakakātoa ʻa e ngaahi houa laka hake he taha piliona ʻi he taʻu ʻi hono tala ki he niʻihi kehé fekauʻaki mo e huafa mo e taumuʻa ʻa e ʻOtua moʻoní. ʻOku nau pulusi mo tufaki ʻa e ngaahi Tohitapu​—ʻa ia ko ē ʻoku ngāueʻaki ʻa e huafa fakaʻotuá​—ʻi he ngaahi lea ʻoku leaʻaki ʻe he toko 3,600,000,000 ʻo e tokolahi ʻo e māmaní, kau ai ʻa e lea faka-Pilitānia, faka-Siaina, faka-Lūsia, faka-Sipeini, faka-Potukali, faka-Falanisē, mo e faka-Hōlaní. ʻOku nau toe pulusi ʻa e ngaahi tokoni ki he ako Tohitapú ʻi he ngaahi lea ʻa ia ʻoku ʻiloʻi ʻe he fuʻu tokolahi taha ʻo e kakai ʻo e māmaní. ʻOku vavé ni ke hanga ʻe he ʻOtuá tonu ʻo fai ha meʻa ʻi ha founga ʻa ia ʻe fakahoko taʻetoeveiveiua ai ʻa ʻene tala fakahāhā ko e ngaahi puleʻangá “te nau ʻilo ko Sihova [ia].”​—Isikeli 38:23.

Taimi ʻOku Tākiekina Ai ʻe he Ngaahi Tui Fakafoʻituituí ʻa e Liliu Leá

 9. ʻOku fakahaaʻi fēfē ʻe he Tohitapú ʻa e fatongia mafatukituki ʻoku hilifaki ʻi he faʻahinga ko ia ʻoku nau ngāue ki he Folofola ʻa e ʻOtuá?

⁹ Ko ha fatongia mafatukituki ia ʻoku hilifaki ʻi he faʻahinga ko ia ʻoku nau liliu ʻa e Folofola ʻa e ʻOtuá pea pehē ki he faʻahinga ʻoku nau akoʻi iá. Naʻe pehē ʻe he ʻaposetolo ko Paulá fekauʻaki mo ʻene ngāue fakafaifekaú pea mo ia ko ē ʻo hono ngaahi kaungāmeʻá: “ʻOku . . . mau liʻaki ʻa e fai fufū ʻo e ngaahi meʻa fakamā, ʻo ʻikai te mau laka fakaoloolo, ʻumaʻā haʻamou huʻi ʻa e folofola ʻa e ʻOtua: ka ko ʻemau ʻai ke eʻa ʻa e moʻoni, ko e meʻa ia ʻoku mau fakaongo ʻaki kimautolu ki he konisenisi kehekehe ʻo e kakai ʻi he ʻao ʻo e ʻOtua.” (2 Kolinito 4:2) Ke huʻí ʻoku ʻuhingá ke fakameleʻi ʻaki hono fio ʻaki ha faʻahinga meʻa ʻoku kehe pe māʻulalo. Naʻe ʻikai hangē ʻa e ʻaposetolo ko Paulá ia ko e kau tauhi-sipi taʻeangatonu ʻo ʻIsileli ʻi he ngaahi ʻaho ʻo Selemaiá ʻa ē naʻe valokiʻi ʻe Sihova koeʻuhi naʻa nau malangaʻaki ʻenau ngaahi fakakaukau pē ʻa kinautolu kae ʻikai ko e meʻa naʻe folofolaʻaki ʻe he ʻOtuá. (Selemaia 23:​16, 22) Ka ko e hā kuo hoko ia ʻi onopōní?

10. (a) Kuo anga-fēfē hono tākiekina ʻe he ngaahi fakakaukaú kae ʻikai ko e mateaki ki he ʻOtuá ʻa e kau liliu lea ʻe niʻihi ʻi onopooni? (e) Ko e hā ʻa e ngafa naʻa nau fakangalingali taʻetotonu aí?

¹⁰ Lolotonga ʻa e Tau II ʻa Māmaní, naʻe ngāue fakataha ai ha kōmiti ʻo e kau teolosiá mo e kau faifekaú, pea mo e founga-pule faka-Nasí ʻi Siamane ke tokonaki ha “Fuakava Foʻou” kuo fakafoʻou ʻa ia naʻe toʻo ai ʻa e ngaahi lave lelei kotoa pē fekauʻaki mo e kau Siú pea mo e ngaahi fakahā kotoa pē fekauʻaki mo e tupuʻanga Siu ʻo Sīsū Kalaisí. Ki muí ni mai ʻaupito, ko e kau liliu lea naʻa nau tokonaki ʻa e The New Testament and Psalms: An Inclusive Version kuo nau hehema kinautolu ki ha tafaʻaki kehe ia, ko e feinga pē ke toʻo ʻa e ngaahi fakahā kotoa pē ʻo pehē ko e kau Siú ʻoku tukuakiʻi fekauʻaki mo e pekia ʻa Kalaisí. Naʻe toe ongoʻi foki ʻe he kau liliu lea ko iá ko e kau lautohi ʻoku poupou kia fafiné te nau fiefia ange kapau ʻe leaʻaki ʻa e ʻOtuá, ʻo ʻikai ʻaki ʻa e Tamai, ka ko e Tamai-Faʻē pea kapau naʻe pehē kia Sīsū, ʻikai ko e ʻAlo ʻo e ʻOtua, ka ko ʻene Tama. (Mātiu 11:27) Lolotonga ʻenau fai peheé, naʻa nau toʻo ai ʻa e tefitoʻi moʻoni ko ia ʻo e anganofo ʻa e ngaahi uaifí ki honau ngaahi husepānití pea mo e talangofua ʻa e fānaú ki he mātuʻá. (Kolose 3:​18, 20) Ko kinautolu naʻa nau tokonaki ʻa e ngaahi liliu ko iá ʻoku hā mahino naʻe ʻikai ke nau kaungā kau ʻi he fakapapau ko ia ʻa e ʻaposetolo ko Paulá ke ʻoua ʻe ‘huʻi ʻa e folofola ʻa e ʻOtuá.’ Naʻe ngalo ʻiate kinautolu ia ʻa e ngafa ʻo e tokotaha liliu leá, ʻo ʻai ʻe kinautolu ʻa e tuʻunga ʻo e tokotaha faʻutohí, ʻo tokonaki ai ʻa e ngaahi tohi ʻoku ngāueʻaki ai ʻa e ongoongo ʻo e Tohitapú ko ha founga ia ke poupouʻiʻaki ʻenau ngaahi fakakaukaú tonu.

11. ʻOku anga-fēfē ʻa e fepaki ʻa e ngaahi akonaki ʻa e Puleʻanga-Haʻa-Kalisitiané mo e meʻa ko ē ʻoku leaʻaki ʻe he Tohitapú fekauʻaki mo e soulú pea mo e maté?

¹¹ Ko e ngaahi siasi ʻo Puleʻanga-Haʻa-Kalisitiané ʻoku nau akonaki tefitoʻaki ko e soulu fakaetangatá ko e laumālie, ʻa ia ʻoku mavahe mei he sinó ʻi he maté, pea ʻoku taʻefaʻamate. ʻI hono kehé, ko e ngaahi liliu motuʻa ange ʻo e Tohitapú ʻi he lahi taha ʻo e ngaahi leá ʻoku fakahā mahino ai ko e faʻahinga ʻo e tangatá ko e ngaahi soulu, ko e fanga manú ko e ngaahi soulu, pea ko e soulú ʻoku mate. (Senesi 12:5; 36:6; Nomipa 31:28; Semisi 5:20) Kuo fakamaaʻi ʻe he meʻa ko iá ʻa haʻa faifekau.

12. ʻI he founga fē ʻoku fakaʻuliʻulilātaiʻi ai ʻe he ngaahi liliu ki muí ni mai ʻe niʻihi ʻa e ngaahi moʻoni tefito ʻo e Tohitapú?

¹² ʻI he taimí ni ʻoku fakaʻuliʻulilātaiʻi ʻe he ngaahi liliu foʻou ange ʻe niʻihi ʻa e ngaahi moʻoni ko ení. Anga-fēfē? ʻOku nau fakaʻehiʻehi pē mei hano fai ha liliu fakahangatonu ʻo e nauna faka-Hepelū ko e neʹphesh (soulu) ʻi he ngaahi konga tohi pau. ʻI he Senesi 2:​7, ʻoku nau pehē nai ko e ʻuluaki tangatá “naʻe kamata ke moʻui” (kae ʻikai ko e “hoko ko e soulu moʻui”). Pe ʻoku nau lave nai ki he “meʻa moʻui” kae tuku ʻa e “soulu” ʻi he lau ko ia ki he moʻui ʻa e fanga manú. (Senesi 1:21) ʻI he ngaahi konga tohi hangē ko e Isikeli 18:​4, 20, ʻoku nau lave ai “ko e tokotaha” pe “ko e “tokotaha tāutaha” (kae ʻikai “ko e soulu”) ʻoku maté. Ko e ngaahi fakalea peheé, mahalo ʻoku ʻuhinga totonu pē ia ki he tokotaha liliú. Ka ʻoku lahi fēfē ʻa e tokoni ʻoku nau ʻoatu ki he tokotaha fekumi loto-totonu ʻa e moʻoni ko ē kuo ʻosi uesia ʻene fakakaukaú ʻaʻana ʻe he ngaahi akonaki taʻefakatohitapu ʻo e Puleʻanga-Haʻa-Kalisitiané?b

13. ʻAki ʻa e ngaahi founga fē kuo ʻufiʻufi ai ʻe he ngaahi liliu ʻe niʻihi ʻa e taumuʻa ko ia ʻa e ʻOtuá ʻo fekauʻaki mo e māmaní?

¹³ ʻI ha feinga ke poupouʻi ʻenau tui ko ia ko e kakai lelei kotoa pē ʻoku ʻalu ki hēvani, ko e kau liliu leá​—pe kau teolosia ko ia ʻoku nau toe sivisiviʻi ʻenau ngāué​—te nau toe feinga nai ke ʻufiʻufi ʻa e meʻa ʻoku lau ʻe he Tohitapú ʻo fekauʻaki mo e taumuʻa ʻa e ʻOtuá ki he māmaní. ʻI he Sāme 37:​11, ʻoku lau ai ʻe he ngaahi liliu ia ʻe niʻihi ko e anga-vaivaí te nau maʻu “ʻa e fonua.” Ko e “fonua” ʻe lava pē ke ngāueʻaki ki ai ʻa e foʻi lea (ʼeʹrets) naʻe ngāueʻaki ʻi he konga tohi faka-Hepeluú. Neongo ia, ko e Today’s English Version (ʻa ia kuó ne tokonaki ʻa e makatuʻunga ki he ngaahi liliu ki he ʻū lea lahi kehé) ʻoku toe mahulu atu ia. Neongo ʻoku fakalea ʻe he liliu ko ení ʻa e foʻi lea faka-Kalisi ko e ge ʻo tuʻo 17 ko e “māmani” ʻi he Kōsipeli ʻa Mātiú, ʻi he Mātiu 5:5 ʻoku fetongi ai ʻa e “māmani” ia ʻaki ʻa e kupuʻi lea “ʻa ia kuo talaʻofa ki ai ʻe he ʻOtua.” ʻOku fakaenatula pē ʻa e fakakaukau ia ʻa e kau mēmipa ʻo e siasí ki hēvaní. ʻOku ʻikai fakamatalaʻi totonu ange kiate kinautolu, ko e Malanga ko ia ʻi he Moʻungá, naʻe pehē ai ʻe Sīsū Kalaisi ko e kau anga-maluú, anga-vaivaí pe anga-fakatōkilaló te nau “maʻu ʻa e māmaní.”

14. Ko e hā ʻa e taumuʻa siokita ʻoku eʻa ʻi he ngaahi liliu ʻe niʻihi ʻo e Tohitapú?

¹⁴ Ko e ngaahi liliu lea ʻe niʻihi ʻo e ngaahi Konga Tohitapú ʻoku fakalea mahino ʻaki pē ʻa e taumuʻa ko hono tokoniʻi ʻa e kau malangá ke maʻu ha vāhenga lelei. ʻOku moʻoni ʻoku pehē ʻe he Tohitapú: “ʻIlonga ha taha ʻoku ngaue, ʻoku tāu ke ne maʻu haʻane totongi.” (1 Timote 5:18) Ka ʻi he 1 Timote 5:​17, ʻa ia ʻoku pehē ia ai ko e kau mātuʻa ʻoku pule leleí “ko honau tāu ha tokoni (“lāngilangi,” NW) lōua,” ko e lāngilangi pē ʻoku vakai atu ki ai ʻa e niʻihi ʻo kinautolu ʻoku taau ke fai ha lau ki aí, ko e meʻa fakapaʻangá. (Fakafehoanaki mo e 1 Pita 5:2.) Ko ia ʻoku pehē ʻe he The New English Bible ia ko e kau mātuʻa ko ení “ʻoku taau mo ha vāhenga lōua,” pea ʻoku pehē ʻe he Contemporary English Version ia ko kinautolú “ʻoku tuha ke totongi tuʻo ua hono lahí.”

Poupouʻi Mateaki ʻa e Folofola ʻa e ʻOtuá

15. Te tau malava fēfē ʻo fakapapauʻi ko e liliu fē ʻo e Tohitapú te tau ngāueʻakí?

¹⁵ Ko e hā ʻa e ʻuhinga kotoa ʻo e meʻá ni ki he tokotaha lautohi tāutaha ʻo e Tohitapú pea ki he faʻahinga ko ia ʻoku nau ngāueʻaki ʻa e Tohitapú ke akoʻi ʻaki ʻa e niʻihi kehé? ʻI he lahi taha ʻo e ngaahi lea ʻoku ngāueʻaki lahiá, ʻoku laka hake ʻi he liliu ʻe taha ʻo e Tohitapú ʻa ia ʻe fai mei ai ha filí. Fakahāhā ʻa e ʻiloʻiló ʻi hono fili ʻa e Tohitapu ke ke ngāueʻakí. (Palovepi 19:8) Kapau ʻoku ʻikai faitotonu ha liliu fekauʻaki mo hono fakamahinoʻi ʻa e ʻOtuá tonu​—ʻa hono toʻo hono huafá mei heʻene Folofola fakamānavaʻí ʻi ha faʻahinga ʻuhinga loi pē​—kuo toe liliuʻi nai ʻe he kau liliú ha ngaahi konga kehe ʻi he konga Tohitapú? ʻI he taimi ʻoku ʻi ai ai ha veiveiua fekauʻaki mo e totonu ʻo ha liliu, feinga ke fakahoa ia mo e ngaahi liliu ʻoku motuʻa angé. Kapau ko ha faiako koe ʻo e Folofola ʻa e ʻOtuá, manako ʻi he ngaahi liliu ko ia ʻoku piki ofi ki he meʻa ʻoku ʻi he muʻaki konga tohi faka-Hepeluú mo e faka-Kalisí.

16. Te tau malava fēfē ʻo fakahāhaaʻi tāutaha ʻa e mateakí ʻi hono ngāueʻaki ko ia ʻa e Folofola fakamānavaʻi ʻa e ʻOtuá?

¹⁶ Kātoa kitautolu ʻoku totonu ke tau mateaki tāutaha ki he Folofola ʻa e ʻOtuá. Te tau fai ʻení ʻaki hano fai ha tokanga feʻunga ki he meʻa ʻoku ʻi aí, koeʻuhí, ke tau fakamoleki, kapau ʻe malava, ha taimi ʻi he ʻaho kotoa pē ke lau ʻa e Tohitapú. (Sāme 1:​1-3) Te tau fai ia ʻaki hono ngāueʻaki kakato ʻi heʻetau moʻuí tonu ʻa e meʻa ʻokú ne leaʻakí, ʻo ako ke ngāueʻaki ʻa hono ngaahi tefitoʻi moʻoní mo hono ngaahi faʻifaʻitakiʻangá ko ha makatuʻunga ia ki hono fai ʻa e ngaahi fili ʻoku leleí. (Loma 12:2; Hepelu 5:14) ʻOku tau fakahāhā ko e kau taukapo mateaki kitautolu ʻo e Folofola ʻa e ʻOtuá ʻaki ʻetau malangaʻi faivelenga ia ki he niʻihi kehé. ʻOku tau toe fai ia ko e kau faiako ʻaki ʻetau ngāueʻaki fakalelei ʻa e Tohitapú, ʻo ʻoua ʻe mioʻi ia pe fakalahi ʻa e meʻa ʻokú ne leaʻakí ke feʻungamālie mo ʻetau ngaahi fakakaukaú. (2 Timote 2:15) Ko e meʻa kuo tomuʻa tala ʻe he ʻOtuá ʻe fakahoko taʻematukutuku ia. ʻOkú ne mateaki ʻi hono fakahoko ʻene Folofolá. ʻOfa ke tau hoko ʻo mateaki ʻi hono poupouʻi iá.

[Fakamatala ʻi lalo]

ʻOkú Ke Manatuʻi?

◻ Ko e hā ʻa e ngaahi taumuʻa kuó ne tākiekina ʻa e ngāue ʻa e kau liliu Tohitapu ʻi onopōní?

◻ Ko e hā kuo ʻikai fakasivesivaʻi ai ʻe he ngaahi ākenga liliu ʻo onopōní ʻa e taumuʻa ʻa e ʻOtuá fekauʻaki mo hono huafá tonu?

◻ ʻOku fakaʻuliʻulilātaiʻi fēfē ʻe he ngaahi liliu ʻe niʻihi ʻa e ngaahi moʻoni faka-Tohitapu fekauʻaki mo e soulú, maté, pea mo e māmaní?

◻ ʻI he ngaahi founga fē ʻe lava ai ke tau fakahāhā ʻoku tau poupouʻi mateaki ʻa e Folofola ʻa e ʻOtuá?

[Fakatātā ʻi he peesi 26]

Ko e liliu fē ʻo e Tohitapú ʻoku totonu ke ke ngāueʻakí?