Ngaahi Mātuʻa—Maluʻi Hoʻomou Fānaú!

ʻI HA kolisi ʻi Naisīlia, ko ha taʻahine ai ʻa ia naʻe ʻilolahia ʻi he ʻulungaanga taʻetaau fakaefehokotaki fakasinó naʻá ne manako ʻi hono fakahinohinoʻi ʻa e kaungā-ako fefiné ʻi he ngaahi meʻa fekauʻaki mo e fehokotaki fakasinó. Ko e taha ʻi heʻene ngaahi meʻa naʻá ne ngāueʻaki ki he fakatōtamá ko e pia mālohi kuo fakakonahi lahi ʻaki ha kemikale tapaka. Ko ʻene ngaahi talanoá, ʻa ia kuó ne filifili mei he tohi fakalielia, kuó ne fakakāveaʻi ʻa e loto ʻo e tokolahi ʻo hono kaungā-akó. Naʻe kamata ʻa e niʻihi ke ngāueʻaki ʻa e fehokotaki fakasinó, pea naʻe hoko ʻo feitama ai ha taha ʻo kinautolu. Ke fakahoko ha fakatōtama, naʻá ne inu ʻa e huʻi pia/tapaká. ʻI ha ngaahi houa siʻi pē, naʻe kamata leva ke ne lua toto. ʻI ha ngaahi ʻaho siʻi pē ki mui ai, naʻá ne mate ʻi he falemahakí.

ʻI he māmani ʻo e ʻaho ní, ʻoku talanoa taʻetuku ai ʻa e toʻutupu tokolahi ʻo fekauʻaki mo e fehokotaki fakasinó, ʻo ʻomai ai ʻa e maumau ki he kau fanongo tuingofuá. Ko hai ʻoku totonu ke hanga ki ai ʻa e fānaú ke maʻu ʻa e ʻilo totonu ʻa ia te ne maluʻi kinautolú? He meʻa lelei ē ko e lava ke nau hanga ki heʻenau ngaahi mātuʻa anga-fakaʻotuá, ʻa ē ʻoku nau maʻu ʻa e fatongia ke ʻohake kinautolu ʻi he “akonaki mo e fakatonutonu fakaʻatamai ʻa Sihová.”​—Efeso 6:4, NW.

Ngaahi Fakakaukau Faka-ʻAfilika ki he Ako ki he Fehokotaki Fakasinó

ʻI he māmaní kotoa, ʻoku ʻilo ʻe he ngaahi mātuʻa tokolahi ʻoku faingataʻa ke fetalanoaʻaki mo ʻenau fānaú ʻi he ngaahi meʻa fekauʻaki mo e fehokotaki fakasinó. ʻOku moʻoni ʻeni tautefito ʻi ʻAfilika. Naʻe fakamatala ʻa Donald, ko ha tamai ʻi Siela Leone: “ʻOku ʻikai ʻaupito ke teitei fai ia. ʻOku ʻikai ko ha konga ia ʻo e anga-fakafonua ʻa ʻAfiliká ke fai pehē.” ʻOku loto-tatau mo ia ha fefine Naisīlia ko Confident: “ʻOku vakai ʻa ʻeku ongo mātuʻá ki he fehokotaki fakasinó ko ha meʻa ia ke ʻoua ʻaupito ʻe fai ha lave fakahangatonu ki ai; ʻoku tapu fakaeʻulungaanga fakafonua ia.”

ʻI he ngaahi anga-fakafonua faka-ʻAfilika ʻe niʻihi, ʻoku fai ki ai ʻa e vakai ia ʻoku fakalielia ke lave ki he ngaahi lea felāveʻi mo e fakafehokotaki fakasinó hangē ko e fakatangatá, huhuʻa fakafanaú, pe puke fakamāhiná. Naʻe aʻu ʻo tapui ʻe ha faʻē Kalisitiane ʻe taha ʻa ʻene taʻahiné mei hono ngāueʻaki ʻa e foʻi lea ko e “fehokotaki fakasinó,” neongo ia naʻá ne pehē ʻe lava pē ke ngāueʻaki ʻe heʻene taʻahiné ʻa e foʻi lea ko e “feʻauakí.” ʻI heʻene mātuʻaki faikehekehé, ko e Folofola ʻa e ʻOtuá ʻa e Tohitapú ʻoku lea hangatonu ia fekauʻaki mo e fehokotaki fakasinó pea mo e ngaahi ʻōkani fakaefehokotaki fakasinó. (Senesi 17:11; 18:11; 30:​16, 17; Livitiko 15:2) Ko e taumuʻa ʻo e meʻá ni ko e ʻikai ke fakaʻohovaleʻi pe fakatoʻoaloto ka ke maluʻi mo fakahinohinoʻi ʻa e kakai ʻa e ʻOtuá.​—2 Timote 3:16.

Tuku kehe ʻa e ngaahi tapu mei he anga-fakafonuá, ko e toe ʻuhinga ʻe taha ʻo e taʻotaʻofi ʻa e ngaahi mātuʻa ʻe niʻihi naʻe fakamatalaʻi ia ʻe ha tamai Naisīlia: “Kapau ʻoku ou fetalanoaʻaki mo ʻeku fānaú ki he fehokotaki fakasinó, ʻe lava ke ne ueʻi ai kinautolu ke nau fai ha fehokotaki fakasino taʻetaau.” Ka ʻoku hanga ʻe he fakahinohino molumalu fekauʻaki mo e fehokotaki fakasino ʻoku makatuʻunga ʻi he Tohitapú, ʻo fakaʻaiʻai ʻa e fānaú ke nau fakavave atu ʻo ʻahiʻahiʻi ia? ʻIkai, ʻoku ʻikai ke pehē ia. Ko hono moʻoní, ʻe hoko nai ko e siʻi ange ʻa e ʻilo ʻoku maʻu ʻe he fānau tupú, ko e lahi ange ia ʻa e hā ngali te nau tō ki he faingataʻá. “Ko e poto [makatuʻunga ʻi he ʻilo totonú] ko e maluʻanga,” ko e lau ia ʻa e Tohitapú.​—Koheleti 7:12.

ʻI he talanoa fakatātā ʻa Sīsuú, ko ha tangata poto, ʻi heʻene tomuʻa sio ki he malava ko ia ke tō mai ha afā ʻi he kahaʻú, naʻá ne langa hono falé ʻi ha makatuʻunga maka kae langa ʻe ha tangata vale ia ʻi he ʻoneʻoné pea faingataʻaʻia ʻi he fakatamakí. (Mātiu 7:​24-27) ʻI he tuʻunga meimei tatau, ko e ngaahi mātuʻa Kalisitiane fakapotopotó, ʻi heʻenau ʻilo ʻe fehangahangai ʻenau fānaú mo e ngaahi tenge hangē ha afaá ke nau fakatatau ki he ngaahi tuʻunga fehokotaki fakasino tākatuʻu ʻa e māmaní, ʻoku nau fakaivimālohiʻi ʻenau fānaú ʻaki ʻa e ʻilo totonu mo e mahino ʻa ia te ne tokoniʻi kinautolu ke nau tuʻumaʻú.

Ko ha toe ʻuhinga ʻoku ʻikai ke fetalanoaʻaki ai ʻa e ngaahi mātuʻa tokolahi fekauʻaki mo e fehokotaki fakasinó mo ʻenau fānaú naʻe fakamatalaʻi ia ʻe ha fefine ʻAfilika: “ʻI he taimi naʻá ku kei siʻi aí, naʻe ʻikai ke talanoa ʻa ʻeku ongo mātuʻa Fakamoʻoní mo au ki he ngaahi meʻa fekauʻaki mo e fehokotaki fakasinó, ko ia ʻoku teʻeki ai ke ʻalu hake ia ʻi heʻeku fakakaukaú ke fetalanoaʻaki ʻi he ngaahi meʻá ni mo ʻeku fānaú.” Kae kehe, ʻoku lahi ange ʻa e ngaahi tenge ia ki he fānau ʻi he ʻaho ní ʻi heʻene hoko ki he fānau ʻi he taʻu ʻe 10 pe 20 kuohilí. ʻOku ʻikai ko ha meʻa fakaʻohovale ʻeni. Naʻe tomuʻa tala ʻe he Folofola ʻa e ʻOtuá ko e “kuonga fakamui, . . . ko e kakai kovi mo fakahekeheke te nau fakaaʻau atu mei he kovi ki he kovi, heʻenau kākāʻi ʻa e kakai kehe, pea kākāʻi mo kinautolu.”​—2 Timote 3:​1, 13.

ʻOku tānaki atu ki he palopalemá ʻa e moʻoniʻi meʻa ko ia ko e fānau tokolahi ʻoku nau taʻeloto pe taʻemalava ke falala ki heʻenau ngaahi mātuʻá. ʻOku ʻikai faʻa lelei ʻa e fetuʻutaki tafaʻaki-uá naʻa mo e ʻi he fanga kiʻi meʻa īkí. Naʻe tangilāulau ha toʻutupu taʻu 19: “ʻOku ʻikai te u fetalanoaʻaki ki he ngaahi meʻá mo ʻeku ongo mātuʻá. ʻOku ʻikai ha fetuʻutaki lelei ʻi he vahaʻa ʻoʻoku mo ʻeku tamaí. ʻOku ʻikai te ne tokanga mai.”

ʻOku manavahē foki ʻa e fānau tupú telia naʻa ʻomai ha ngaahi nunuʻa kovi ʻi he ngaahi fakaʻekeʻeke fekauʻaki mo e ngaahi meʻa fakaefehokotaki fakasinó. Naʻe pehē ʻe ha taʻahine taʻu 16: “ʻOku ʻikai te u fetalanoaʻaki mo ʻeku ongo mātuʻá fekauʻaki mo e ngaahi palopalema fakaefehokotaki fakasinó koeʻuhi ko e founga ʻo ʻena tali ki he ngaahi meʻa peheé. ʻI ha taimi ʻi he kuohilí, naʻe ʻeke ʻe hoku taʻoketé ki he fineʻeikí ha ngaahi fehuʻi felāveʻi mo e fehokotaki fakasinó. ʻI he ʻikai tokoniʻi ia ʻe he fineʻeikí ʻi heʻene palopalemá, naʻá ne hoko ʻo huʻuhuʻu ki heʻene ngaahi meʻa naʻe faí. Naʻe faʻa ui au ʻe he fineʻeikí ʻo fakaʻekeʻeke fekauʻaki mo hoku tokouá, ʻo fai ʻi he taimi ʻe niʻihi ha ngaahi fakahuʻuhuʻu fekauʻaki mo ʻene ʻulungaanga tāú. ʻOku ʻikai te u loto ke tō ki he mole meiate au ʻa e ʻofa ʻa e fineʻeikí, ko ia ai, ʻoku ou tauhi mavahe ʻa ʻeku palopalemá meiate ia.”

Ko e Hā ke Fakahinohino Aí?

Ko hono fakahinohinoʻi ʻa ʻetau fānaú ki ha tuʻunga lahi feʻunga ʻi he ngaahi meʻa fakaefehokotaki fakasinó ʻoku ʻikai ko e meʻa totonu pē ia ke faí, ka ko e meʻa anga-ʻofa ia ke fai. Kapau ʻoku ʻikai akoʻi ʻe he ngaahi mātuʻá ʻenau fānaú fekauʻaki mo e fehokotaki fakasinó, ʻe fai ia ʻe he niʻihi kehé​—ʻo faʻa vave ange ia ʻi he meʻa ʻoku ʻamanaki ki ai ʻa e ngaahi mātuʻá pea meimei ʻikai ʻaupito ʻi he fekauʻaki mo e ngaahi tefitoʻi moʻoni fakaʻotuá. Naʻe fai ʻe ha kiʻi taʻahine taʻu 13 ha feʻauaki koeʻuhi he naʻe tala ange ʻe he kaungā-akó kapau ʻe ʻikai mole hono tuʻunga tāupoʻoú, ʻe faingataʻaʻia ʻi he mamahi fakaʻulia ʻi he kahaʻú. “Te nau kosi ho fakafefiné ʻaki ʻa e ngaahi helekosi,” ko e tala ange ia ki aí. ʻI hono ʻeke ange ki mui ai pe ko e hā naʻe ʻikai ke ne tala ai ki heʻene faʻē Kalisitiané ʻa e meʻa naʻá ne fanongo ki aí, naʻe tali ange ʻe he taʻahiné naʻe ʻikai ʻaupito fai ha fetalanoaʻaki ia ki he ngaahi meʻa peheé mo e kakai lalahí.

Naʻe pehē ʻe ha taʻahine Naisīlia: “Naʻe feinga ʻa hoku ngaahi kaungāmeʻa ʻi he akó ke fakapapauʻi mai kiate au ko e fehokotaki fakasinó ko e meʻa ia kuo pau ke kau ki ai ʻa e faʻahinga kotoa ʻo e tangatá ʻoku nōmoló. Naʻa nau tala mai kiate au kapau heʻikai ke u kau ʻi he fehokotaki fakasinó ʻi he taimi ko iá, ʻi he taimi te u aʻu ai ki he taʻu 21, ʻe kamata leva ke hoko ha mahaki kiate au ʻa ia ʻe kaunga kovi ki hoku tuʻunga ko e fefiné. ʻI hení, koeʻuhi ke tekeʻi ʻa e fakatuʻutāmaki fakalilifu peheé, naʻa nau pehē, naʻe lelei ke aʻusia ʻa e fehokotaki fakasinó ki muʻa ke nofo mali.”

ʻI he ʻi ai ha fetuʻutaki lelei mo ʻene ongo mātuʻá, naʻá ne fakatokangaʻi leva ʻoku fepaki ia mo e meʻa kuó ne ako ʻi ʻapí. “ʻI he anga-mahení, naʻá ku foki ki ʻapi ʻo tala ki heʻeku faʻeé ʻa e meʻa kuo nau tala mai kiate au ʻi he akó.” Naʻe malava ʻa ʻene faʻeé ke fakafepakiʻi ʻa e fakahinohino halá.​—Fakafehoanaki mo Palovepi 14:15.

ʻI hono tuku atu ʻa e ʻilo naʻe fiemaʻu ke tokoniʻiʻaki ʻa e fānaú ke maʻu ʻa e poto fakaʻotua ʻi he ngaahi meʻa fekauʻaki mo e fehokotaki fakasinó, ʻoku teuʻi ai kinautolu ʻe he ngaahi mātuʻá ke ʻiloʻilo ki he ngaahi tuʻunga faingataʻá pe ke ʻiloʻi ʻa e kakai ʻoku nau fakaʻamu ke ngaohikoviʻi kinautolú. ʻOku tokoni ia ke maluʻi kinautolu mei he loto-mamahi ʻi he ngaahi mahaki fetuku ʻe he fehokotaki fakasinó mo e feitama ʻikai ke fiemaʻú. ʻOku tānaki ia ki heʻenau tokaʻi kinautolú pea mo e fakaʻapaʻapa ʻoku nau maʻu mei he niʻihi kehé. ʻOkú ne fakaʻatā kinautolu mei he ngaahi maʻuhalá mo e loto-moʻuá. ʻOkú ne ohi ha fakakaukau moʻui lelei mo papau, ki he fehokotaki fakasino totonú, ʻo tānaki atu ki he fiefia kapau te nau mali ʻamui. ʻE lava ke ne tokoniʻi kinautolu ke tauhi maʻu ha tuʻu fakahōifua ki he ʻOtuá. Pea ʻi he sio ʻa e fānaú ki he tokanga anga-ʻofa ʻoku fakahāhā kiate kinautolú, ʻe lava ke ne ueʻi kinautolu ke fakaʻapaʻapaʻi mo ʻofaʻi lahi ange ai ʻenau ngaahi mātuʻá.

Fetuʻutaki Lelei

Kuo pau ke tafaʻaki-ua ʻa e fetuʻutakí, koeʻuhi ke fakahū ʻe he ngaahi mātuʻá ʻa e faleʻi ki he ngaahi fiemaʻu ʻa ʻenau fānaú. Naʻa mo e faleʻi leleí mahalo pē ʻe siʻi ʻa hono ʻaongá kaeʻoua kuo ʻiloʻi ʻe he ngaahi mātuʻá ʻa e meʻa ʻoku ʻi he loto mo e ʻatamai ʻo ʻenau fānaú, ʻo hangē pē ia ko e feinga ʻa ha toketā ke tala ʻa e faitoʻó taʻeʻilo ki he natula ʻo e puke ʻa e mahakí. Ke hoko ko e kau faleʻi ola lelei, kuo pau ke ʻiloʻi ʻe he ngaahi mātuʻá ʻa e meʻa moʻoni ʻoku fakakaukauʻi mo ongoʻi ʻe heʻenau fānaú. ʻOku fiemaʻu ke nau mahinoʻi ʻa e ngaahi tenge mo e ngaahi palopalema ʻoku fehangahangai mo ʻenau fānaú pea mo e ngaahi fehuʻi ʻokú ne uesia kinautolú. ʻOku mahuʻinga ke fanongo lelei ki he fānaú, ke “vave . . . he fanongo, kae fakatotoka ki he lea.”​—Semisi 1:19; Palovepi 12:18; Koheleti 7:8.

ʻOku fiemaʻu ʻa e taimi, kātaki, mo e feinga ki he ngaahi mātuʻá ke fakatupu mo tauhi maʻu ha vahaʻangatae vāofi mo ʻenau fānaú, ha vahaʻangatae ʻa ia ʻe ongoʻi tauʻatāina ai ʻa e fānaú ke fakahā ʻenau ngaahi ongoʻi ʻi lotó. Ka he toki meʻa fakaʻofoʻofa ē ko e taimi ʻoku maʻu ai ʻení! Ko e lea ʻeni ʻa ha tamai ʻAfilika Hihifo ʻa ha toko nima: “Ko ha tamai au fakatouʻosi mo e tokotaha falalaʻanga. ʻOku fetalanoaʻaki tauʻatāina ʻa e fānaú mo au, ʻi he ngaahi kaveinga kotoa pē, ʻo kau ai ʻa e fehokotaki fakasinó. Naʻa mo e tamaiki fefiné ʻoku nau falala mai kiate au. ʻOku mau vaheʻi ʻa e taimi ke fetalanoaʻaki ai ki heʻenau palopalemá. ʻOku nau toe kaungā-ʻinasi foki mo au ʻi heʻenau fiefiá.”

ʻOku pehē ʻe Bola, ko e taha ʻo hono ngaahi ʻofefiné: “ʻOku ʻikai te u fufū ha meʻa mei heʻeku tamaí. ʻOku fakaʻatuʻi ʻeku tamaí mo kaungā-ongoʻi. ʻOku ʻikai te ne fakaaoao kiate kimautolu pe ngaohikoviʻi kimautolu, naʻa mo e ʻi he taimi kuo mau faihala aí. ʻI he ʻikai ke ʻitá, te ne ʻanalaiso ʻa e meʻá pea fakahā mai kiate kimautolu ʻa e meʻa ʻoku totonu ke mau faí pe ko e meʻa naʻe ʻikai totonu ke mau faí. ʻOkú ne faʻa lave ki he tohi Youth mo e tohi Fāmili Fiefia.”a

ʻI he taimi ʻoku ala lava aí, ʻoku lelei ki he ngaahi mātuʻá ke kamata talanoa ki heʻenau fānaú ʻo fekauʻaki mo e fehokotaki fakasinó ʻi he taimi ʻoku kei iiki ʻaupito ai ʻa e fānaú. ʻOku fakatoka ʻi he meʻá ni ʻa e makatuʻunga ki ha hokohoko atu ʻa e fetuʻutakí ʻi he ngaahi taʻu hongofulu tupú, ʻa ē ʻoku faʻa faingataʻá. ʻI he taimi ʻoku ʻikai kamata tō muʻa ai ʻa e fetalanoaʻakí, ʻoku faingataʻa ʻi he taimi ʻe niʻihi ke kamata ha talanoa kiate kinautolu ki mui ange, ka ʻe lava pē ke fai. Ko e lea ʻeni ʻa e faʻē ʻe taha ʻa ha toko nima: “Naʻá ku fakamālohiʻi au ke u talanoa fekauʻaki mo ia, ʻo faifai atu pē kuo ʻikai te u toe mā, pehē pē mo e tamá.” Koeʻuhi ko e lelei lahi ʻe lava ke molé, ko e ngaahi feinga peheé ʻoku taau moʻoni.

Maluʻi pea Fiefia

ʻOku houngaʻia ʻa e fānaú ʻi he ngaahi mātuʻa ʻa ē ʻoku nau teuʻi anga-ʻofa kinautolu ʻaki ʻa e ʻilo te ne maluʻi kinautolú. Fakakaukau angé ki he ngaahi fakamatala ʻa ha Kau Fakamoʻoni ʻa Sihova ʻAfilika:

Naʻe pehē ʻe Mojisola ʻi hono taʻu 24: “Te u houngaʻia maʻu pē ki heʻeku faʻeé. Naʻá ne ʻomai kiate au ʻa e ako naʻe fiemaʻú ʻo fekauʻaki mo e fehokotaki fakasinó ʻi he taimi totonu. Neongo naʻá ku ongoʻi mā ʻi he taimi naʻá ne lāulea ai ki he ngaahi meʻa ko iá ʻi he kuohilí, ʻoku ou sio ʻi he taimí ni ki he ngaahi meʻa lelei naʻe fai kiate au ʻe heʻeku faʻeé.”

Naʻe tānaki mai ʻe Iniobong: “ʻOku ou fiefia maʻu pē ʻi heʻeku sio atu ʻo fakakaukau ki he meʻa kuo fai ʻe he fineʻeikí maʻaku ʻaki hono ʻomai kiate au ʻa e ako feʻunga fekauʻaki mo e fehokotaki fakasinó. Kuo hoko ia ko ha tokoni mātuʻaki mahuʻinga ʻi hono tataki atu au ki he tuʻunga fefine lahí. ʻOku ou fakapapau ke fai ʻa e meʻa tatau ki haʻaku fānau ʻi he kahaʻú.”

Naʻe pehē ʻe Kunle taʻu 19: “Kuo tokoniʻi au ʻe heʻeku ongo mātuʻá ke matuʻuaki ʻa e ngaahi tenge mei he kakai fefine fakamāmaní, ki he fehokotaki fakasino tavalé. Kapau naʻe ʻikai ʻa e akoʻi naʻá na fai kiate aú, ne u mei tō ki he angahalá. Te u houngaʻia maʻu pē ʻi he meʻa naʻá na faí.”

Naʻe pehē ʻe Christiana: “ʻOku ou maʻu ʻa e ʻaonga lahi mei he fai ʻo e fetalanoaʻaki mo ʻeku faʻeé fekauʻaki mo e fehokotaki fakasinó. Kuo maluʻi au mei he ngaahi mahaki fakatupu maté pea mo e feitama ʻikai fiemaʻú, pea kuó u lava ke fokotuʻu ha faʻifaʻitakiʻanga lelei ki hoku fanga kiʻi tuongaʻane mo e fanga kiʻi tokoua iiki angé ke muimui ki ai. Kuó u toe maʻu foki ʻa e fakaʻapaʻapa mei he kakaí, pea ʻe tokaʻi foki au ʻe haku husepāniti ʻi he kahaʻú. Kae mahuʻinga angé, ko ʻeku maʻu ha vahaʻangatae lelei mo Sihova ko e ʻOtuá ki hono tauhi ʻo ʻene fekaú.”

Ko Bola, naʻe lave ki ai ki muʻá, naʻá ne pehē: “Naʻe ʻi ai ʻa hoku kaungā-ako ʻa ia naʻá ne pehē ko e fehokotaki fakasinó ʻe hoko pē ʻo fiefia ai ʻo ʻikai ha fuakava ki ha mali. Kiate ia, naʻe hoko ia ko ha vaʻinga. Kae kehe, naʻá ne ʻilo ʻoku ʻikai ko ha vaʻinga ia ʻi heʻene feitama pea ʻikai lava ʻo tohi ʻi he sivi tohi fakamoʻoni ako ʻa e akoʻangá fakataha mo kimautolu. Kapau naʻe ʻikai haʻaku tamai lelei ke tataki au, mahalo naʻe mei lava pē ke u hangē ko iá, ʻo ako ʻi he founga faingataʻá.”

He toki tāpuaki ē ʻi he taimi ʻoku tokoniʻi ai ʻe he ngaahi mātuʻa Kalisitiané ʻa ʻenau fānaú ke hoko ʻo “fakapoto . . . ke maʻu ʻa e fakamoʻui” ʻi he māmani fehokotaki fakasino fakavalevale ko ʻení! (2 Timote 3:15) Ko ʻenau fakahinohino makatuʻunga ʻi he Tohitapú ʻoku hangē ia ha kahoa mahuʻinga ʻa ia ʻokú ne teuʻi mo ʻai ke fakaʻofoʻofa ʻa e fānaú ʻi he vakai mai ʻa e ʻOtuá. (Palovepi 1:​8, 9) ʻOku ongoʻi malu ʻa e fānaú, pea ʻoku fiefia ʻa e ngaahi mātuʻá ʻi he fiemālie lahi. Naʻe pehē ʻe he tamai ʻAfilika ʻa ia ʻokú ne feinga maʻu pē ke tauhi ke ʻatā ʻa e laine ʻo e fetuʻutakí mo ʻene fānau īkí: “ʻOkú ma nonga. ʻOkú ma tuipau ʻoku ʻiloʻi ʻe heʻema fānaú ʻa e meʻa ʻoku fakahōifua kia Sihová; ʻoku ʻikai lava ke takihalaʻi kinautolu ʻe he kakai ʻi tuʻá. ʻOkú ma tuipau ʻe ʻikai te nau fai ʻa e ngaahi meʻa te ne ʻomai ʻa e mamahi ki he fāmilí. ʻOku ou fakamālō kia Sihova kuo nau fakamoʻoniʻi ʻa ʻenau taau ke fai ki ai ʻema falalá.”

[Fakamatala ʻi lalo]

[Fakatātā ʻi he peesi 10]

Ko e toʻutupu Kalisitiane ʻa ia ʻoku nau maʻu ʻa e fakahinohino makatuʻunga ʻi he Tohitapú mei he ngaahi mātuʻá ʻe lava ke nau talitekeʻi ʻa e ngaahi fakamatala hala ʻoku talanoaʻi ʻe he toʻutupu kehé