Ko Hai ʻa Sihova?

NAʻE tala ʻe Sihova ki he taha ʻo ʻene kau lotu anga-tonú: “ʻOku ʻikai ha tangata te ne sio ki hoku mata, pea moʻui.” (Ekisoto 33:20) “Ko e ʻOtua ko e laumālie,” pea ʻoku ʻikai lava ʻa e tangatá ke sio kiate ia ʻaki honau mata fakamatelié. (Sione 4:24) Hangē pē ko e hoko ʻo fakatuʻutāmaki ki hotau matá ke sio fakahangatonu ki he laʻaá ʻi he hoʻatāmālié, ʻoku pehē pē haʻane fakatupu ʻauha kiate kitautolu ke sio ki he Matavai lahi fakaʻulia ʻo e ivi ʻa ia naʻá ne fakatupu ʻo ʻikai ngata pē ʻi heʻetau laʻā ngingilá kae pehē foki ki he ngaahi laʻā kehe taʻefaʻalaua ʻi he ʻunivēsí.

ʻOku fakafiefiá, he ʻoku ʻikai fiemaʻu ke tau toki sio ki he ʻOtuá ke ʻilo ai ʻo fekauʻaki mo ia. ʻOku fakatou fakaʻilo mai ʻe he Tohitapú ʻa e Tokotaha ʻa ē naʻá ne teuteuʻi ʻa e kofukofu fakaofó, ʻa e māmaní, maʻatautolu pea mo fakahaaʻi ʻa hono ʻulungāngá. Ko ia, ʻoku taau ke sio ki he Tohitapú ke ʻilo ai fekauʻaki mo e Tamai ʻa ia naʻá ne ʻomai kiate kitautolu ʻa e moʻuí pea tokonaki mai ha ʻapi fakamānako ke fiefia ai ʻi he moʻui ko iá.

ʻUhinga ʻo Hono Huafá

Ko e hingoa kotoa pē ʻoku ʻi ai honau ʻuhinga, neongo ʻoku ʻikai nai ke ʻiloʻi ʻe he tokolahi kinautolu ʻi he ʻahó ni. Ko e fakatātaá, ko e hingoa maheni faka-Tonga ko e Tēvitá ʻoku haʻu ia mei he foʻi lea faka-Hepelū ʻa ia ʻoku ʻuhingá ko e “ʻOfaʻanga.” Ko e huafa ʻo e Tokotaha-Fakatupú, ʻa e Sihová, ʻoku ʻi ai foki hono ʻuhinga. Ko e hā ia? ʻI he muʻaki lea faka-Hepelū ʻi he Tohitapú, ʻoku tohi ai ʻa e huafa fakaʻotuá ʻi he mataʻitohi ʻe fā, ko e YHWH, pea ʻasi meimei tuʻo 7,000 ʻi he konga faka-Hepelū ʻo e Tohitapú. ʻOku mahino ko e huafa fakaʻotuá ʻoku ʻuhinga iá “ʻOkú Ne ʻAi ke Hoko.” ʻOku fakahuʻunga ia ko Sihová ʻokú ne ʻai ia tonu ʻi he fakapotopoto ke hoko ha meʻa pē ʻokú ne fiemaʻu ke hoko, koeʻuhi ke lavaʻi ʻa ʻene ngaahi taumuʻá. Ko ia ʻa e Tokotaha-Fakatupú, Fakamāú, Fakamoʻuí, Tokotaha-Fakatolonga ʻo e Moʻuí, pea ko ia ʻoku lava ai ke ne fakahoko ʻa ʻene ngaahi talaʻofá. Ko e toe mahulu angé, ʻi he lea faka-Hepeluú ko e hingoa Sihová ʻoku ʻi ha tafaʻaki ia ʻa ia ʻoku ʻuhingá ko ha ngāue ʻoku hokohoko atu ke lava. ʻIo, ʻoku kei ʻai pē ʻe Sihova ia tonu ke hoko ko e tokotaha fakahoko ʻo ʻene ngaahi taumuʻá. Ko iá ko ha ʻOtua moʻui!

Ngaahi ʻUlungaanga Tuʻu-ki-Muʻa ʻo Sihová

ʻOku fakamatalaʻi ʻe he Tohitapú ʻa e Tokotaha-Fakatupú ko e “ʻOtua, ʻAloʻofa mo Anga lelei, Tuai ki he Houhau, pea Fonu ʻi he Kelesi mo e Moʻoni; ʻoku taʻofi mesi [“ʻaloʻofa, NW] maʻa e ngaahi toko afe, ʻoku ne fakamolemole ʻa e kovi mo e talangataʻa mo e angahala.” (Ekisoto 34:​6, 7) Ko e foʻi lea “ʻaloʻofa” ʻokú ne liliuʻi ha foʻi lea faka-Hepelū mātuʻaki mohu ʻuhinga. ʻOku ʻuhingá ko ha anga-ʻofa ʻoku pipiki ʻiate ia pē ʻi he ʻofa ki ha meʻa kaeʻoua ke fakahoko ʻa ʻene taumuʻa ki he meʻa ko iá. ʻE lava pē ke toe liliu ia ko e “ʻofa mateaki.” Ko e anga-ʻofa ʻa Sihová ʻoku pipiki ia ʻiate pē ʻi he ʻofa ki heʻene ngaahi meʻamoʻuí pea fakahoko ʻene taumuʻa fakaofó. ʻIkai te ke koloaʻaki ha ʻofa pehē mei ha Tokotaha kuó ne foaki atu kiate koe ʻa e moʻuí?

ʻOku tuai ʻa Sihova ki he houhaú pea vave ki hono fakamolemoleʻi ʻetau ngaahi fehālaakí. ʻOku fakalotomāfana ke ofi ki ha tokotaha pehē. Ka, ʻoku ʻikai ʻuhinga iá ʻokú ne fakamolemoleʻi ʻa e faihalá. ʻOkú ne fakahā: “Ko au Sihova ʻoku ou ʻofa ki he fakalao, ʻoku ou fehiʻa ki he faʻao kovi ha meʻa.” (Aisea 61:8) ʻI heʻene hoko ko e ʻOtua ʻo e fakamaau totonú, ʻe ʻikai te ne kātakiʻi ai pē ʻo taʻengata ʻa e kau angahala loto-fefeka ʻa ia ʻoku nau kīvoi ʻi heʻenau fulikivanú. Ko ia, ʻoku lava ke tau fakapapauʻi ʻi heʻene taimi kotofá, ʻe fakatonutonu ʻe Sihova ʻa e ngaahi fakamaau taʻetotonu ʻi he māmaní. Heʻikai te ne tukunoaʻi ʻa e faingataʻaʻiá.

ʻOku ʻikai faingofua ke tauhi maʻu ha palanisi haohaoa ʻi he ʻofá mo e fakamaau totonú. Kapau ko ha mātuʻa koe, ʻikai ʻokú ke ʻilo ʻoku faingataʻa ke fakapapauʻi ʻa e taimi, founga, pea mo hono lahi ke fakatonutonuʻaki hoʻo fānaú ʻi he taimi ʻoku nau anga-kovi aí? Ke palanisi ʻa e fakamaau totonú mo e manavaʻofá ʻoku fiemaʻu ha poto lahi. ʻOku fakahāhā ʻe Sihova ʻa e ʻulungaanga ko iá ʻo hulu ʻi heʻene feangainga mo e tangatá. (Loma 11:​33-​36) Ko e moʻoni, ʻoku lava ke sio ʻi he feituʻu kotoa pē ki he poto ʻo e Tokotaha-Fakatupú, ko e fakatātaá ʻi he fakaofo ʻo e ngaahi meʻa fakatupu ʻoku nau takatakaiʻi kitautolú.​—Sāme 104:24; Palovepi 3:​19.

Kae kehe, ʻoku ʻikai feʻunga pē ʻa hono maʻu ʻo e potó. Ke lavaʻi ʻa hono finangaló, kuo pau ke toe maʻu ʻe he Tokotaha-Fakatupú ʻa e mālohi, pea ʻoku fakahā ʻe he Tohitapú ʻokú ne mālohi ʻaupito: “Tangaki ki ʻolunga homou mata, ʻo vakai. Ko hai kuo ne fakatupu ʻa e ngaahi meʻa ko é? Ko ia ʻoku taki mai mo lau honau kongakau: ʻoku ne ui honau hingoa tāutaha; ko e meʻa ʻi he lahi hono ngaahi ivi, mo e tuʻu kaukaua hono ngu, ʻoku ʻikai ha taha ʻe to.” (Aisea 40:26) ʻOku faiʻaki ʻe Sihova ʻa e “hulu ʻo e fuʻu ivi mālohi lahí,” ʻa e ngaahi meʻá. ʻIkai ʻe tohoakiʻi koe ʻe ha ʻulungaanga pehē kiate ia?

ʻOtua ʻo e Puleʻanga Kotoa Pē

‘Ka ʻoku ʻikai ko Sihova ʻa e ʻOtua ʻo e “Fuakava Motuʻá,” ko e ʻOtua ia ʻo ʻIsileli he kuonga muʻá?’ te ke fifili nai. Ko e moʻoni naʻe fakahaaʻi ia tonu ʻe Sihova ki he kau ʻIsilelí. Ka ʻi he tuʻunga ko ia ʻo ʻene fakatupu ʻa e ʻuluaki ongo meʻa ʻi he faʻahinga ʻo e tangatá, ko Sihova ʻa e ʻOtua “ʻa ia ʻoku tauhingoa ki ai ʻa e ngaahi famili kotoa pe ʻi . . . mamani.” (Efeso 3:​15) Kapau ʻokú ke tui ʻoku totonu ke fakaʻapaʻapaʻi ʻa hoʻo fanga kuí, ʻikai ʻoku feʻungamālie ke fai ha fakaʻapaʻapa ki he Tokotaha ʻa ia naʻá ne ʻoange ʻa e moʻui ki he ʻuluaki tangatá, ko ʻetau kui fakakātoa, ʻa ia ʻoku ʻi he tefito ʻo e laine hohoko fakafāmili kotoa pē ʻoku ʻi he māmaní he ʻaho ní?

Ko e Tokotaha-Fakatupu ʻo e faʻahinga ʻo e tangatá ʻoku ʻikai ke sio nounou. Ko e moʻoni, naʻe ʻi ai hono vahaʻangatae makehe ʻi he taimi ʻe taha mo e puleʻanga ʻo ʻIsilelí. Ka naʻa mo e ʻi he taimi ko iá, naʻá ne fola nima ki he tokotaha kotoa pē naʻe ui ki hono huafá. Naʻe pehē ʻe ha tuʻi poto ʻo ʻIsileli ʻi heʻene lotu kia Sihová: “Ko e muli foki, ʻa ia ʻoku ʻikai ke kau ki ho kakai Isileli, ka haʻu ia mei ha fonua mamaʻo koeʻuhi ko ho huafa; . . . ke fanongo ʻa e ʻAfiona mei langi . . . pea ke fakaai ʻa e ngaahi meʻa ʻoku tautapa ai kiate koe ʻe siʻi muli: koeʻuhiā ke ʻilo ho huafa ʻe he ngaahi kakai ʻo mamani.” (1 Tuʻi 8:​41-​43) Aʻu mai ki he ʻahó ni, ʻoku lava ke haʻu ʻa e kakai ʻo e puleʻanga kotoa pē ʻo ʻiloʻi ʻa Sihova pea maʻu ha vahaʻangatae mohu ʻuhinga mo ia. Ka ʻoku anga-fēfē hono laveʻi koe ʻe he meʻa ko iá?

Ngaahi ʻAonga ʻo Hono ʻIloʻi ʻo Sihová

Ke foki ki he talanoa fakatātā ʻi he kupu ki muʻá, kapau naʻá ke maʻu ha kofukofu kuo kofuʻi lelei, ʻe fakanatula pē ʻa hoʻo loto ke ʻilo pe ko e meʻaʻofá ki he hā. ʻOku totonu ke anga-fēfē hono ngāueʻakí mo tokangaʻí? ʻI he tuʻunga meimei tatau, ʻoku tau loto ke ʻilo pe ko e hā naʻe ʻi he fakakaukau ʻa e ʻOtuá ʻi he taimi naʻá ne teuteu ai ʻa e māmaní maʻatautolú. ʻOku pehē ʻe he Tohitapú “naʻe ʻikai te ne fakatupu ia ke maomaonganoa,” ka naʻá ne “faʻu ia ke nofoʻanga,” ai ʻa e faʻahinga ʻo e tangatá.​—Aisea 45:18.

Neongo ia, ko e tokolahi taha ʻo e faʻahinga ʻo e tangatá, kuo ʻikai te nau tokangaʻi ʻa e meʻaʻofa ʻa e Tokotaha-Fakatupú. ʻOku nau ʻi he founga ko hono maumauʻi ʻo e māmaní, ʻo iku ki he loto-mamahi ʻa Sihova. Kae fakatatau ki he ʻuhinga ʻo hono huafá, ʻoku fakapapauʻi ʻe Sihova ke fakahoko ʻa ʻene muʻaki taumuʻá ki he tangatá pea ki he māmaní. (Sāme 115:16; Fakahā 11:18) Te ne fakaleleiʻi ʻa e māmaní pea ʻoange ia ko ha tofiʻa maʻá e faʻahinga ko ia ʻoku nau loto-lelei ke moʻui ko ʻene fānau talangofuá.​—Mātiu 5:5.

Ko e tohi fakaʻosi ʻi he Tohitapú ʻokú ne fakamatalaʻi ʻa e meʻa ʻe hoko ki he ngaahi meʻá ʻi he taimi ʻe hoko ai iá: “Ko eni, ko e tapanekale ʻo e ʻOtua, ʻoku tuʻu mo e kakai. Pea ʻe nofo hono Sikaina mo kinautolu, pea te nau nofo ko hono kakai, . . . Pea te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.” (Fakahā 21:​3, 4) ʻE ʻikai ha taha he taimi ko iá ʻe tō hono loʻimatá ʻi he mamahi pe tengihia koeʻuhi ko ha mole atu ʻa ha ʻofaʻanga. ʻE ʻikai ha taha ʻe toe tautapa ki ha tokoni ʻi he mātuʻaki faingatāmakí pe faingataʻaʻia ʻi he langa ʻo e ngaahi mahaki tāmaté. ʻE aʻu ʻo “fakakaʻanga . . . ʻa Mate.” (1 Kolinito 15:26; Aisea 25:8; 33:24) ʻOku fakamatalaʻi ʻe he meʻá ni ʻa e faʻahinga moʻui naʻe muʻaki fiemaʻu ʻe Sihova ke tau fiefia ai ʻi he taimi naʻá ne fakatupu ai ʻa ʻetau ʻuluaki ongo kuí.

Ko e moʻoni, ʻoku lava ke ke tomuʻa sio ki he ngaahi tuʻunga fakapalataisi pehē he taimí ni ʻi he lotolotonga ʻo e kau lotu ʻa Sihová. ʻOkú ne pehē kiate kinautolu: “Ko au Sihova ko ho ʻOtua, ʻoku ou ako koe ke fai meʻa ʻaonga, ʻoku ou tataki koe ʻi he hala ʻoku totonu ke ke fou ai.” (Aisea 48:17) Ko Sihová ko ha tamai anga-ʻofa ʻokú ne akoʻi kiate kitautolu, ko ʻene fānaú, ʻa e founga lelei taha ke moʻuiʻakí. ʻOku ʻikai ʻomai ʻi heʻene ngaahi tākiekina maʻá e tangatá, ha fakangatangata taʻefeʻunga, ka ko e maluʻi anga-ʻofa. Ko e muimui ʻiate kinautolú ʻe iku ia ki he tauʻatāina mo e fiefia moʻoni, hangē pē ko ia kuo tohí: “Ko e ʻEiki [“Sihova,” NW] ko eni ko e Laumalie: pea ʻilonga ha potu ʻoku ʻi ai ʻa e Laumalie ʻo e ʻEiki ʻoku ʻi ai ʻa e tauʻataina.” (2 Kolinito 3:​17) ʻI he muimui he ngaahi tataki ʻoku fokotuʻutuʻu ʻi he Tohitapú, ko e faʻahinga ko ia ʻoku nau tali ʻa ʻene tuʻunga-pulé ʻoku nau lolotonga aʻusia ha nonga ʻa ia ʻe ʻi ai ʻa e ʻaho ʻe hūhū ai ʻi he māmani kotoa ʻo e faʻahinga ʻo e tangatá.​—Filipai 4:7.

He Tamai anga-lelei ē ko Sihova! ʻOkú ke loto-lelei ke ako lahi ange fekauʻaki mo e Tokotaha ʻokú ne fakatupunga ʻa e ngaahi meʻa fakaofo kotoa ʻo e fakatupú? Ki he faʻahinga ʻoku peheé, ʻoku taʻehanotatau ʻa e ngaahi ʻaongá naʻa mo e ʻi he taimí ni. Pea ʻi he kahaʻú, ʻe taʻengata ʻa e ngaahi tāpuakí.

[Fakatātā ʻi he peesi 5]

Ko e huafa fakaʻotua naʻe hiki ʻi he ngaahi mataʻitohi faka-Hepelū ʻe faá ʻoku lava ke sio ki ai ʻi he ngaahi holisi ʻo e ngaahi falelotu motuʻa lahi