Ko e ʻAho Fakaʻosi ʻo e Moʻui Fakaetangata ʻa Sīsuú

Ko e hoʻatā efiafi Falaite ia, Nīsani 14, 33 T.S. ʻOku teu ke tanu ʻe ha kulupu ʻo e kau tangata mo e kau fefine ha kaumeʻa ʻofeina. Ko e taha ʻi he kau tangatá, ko Nikotīmasi, kuó ne ʻomai ʻa e ngaahi sipaisi ke teuteu ʻaki ʻa e sinó ki hono tanú. Kuo ʻomai ʻe he tangata naʻe ui ko Siosifá ʻa e līneni maʻa ke takatakaiʻaki ʻa e ʻangaʻanga kuo volu mo havehavé.

KO HAI ʻa e kakai ko ʻení? Pea ko hai ʻoku nau tanú? ʻOku kaunga kotoa ʻeni kiate koe? Ke tali ʻa e ngaahi fehuʻi ko ʻení, tau toe foki angé ki he kamata ʻo e ʻaho mahuʻinga ko iá.

Efiafi Tuʻapulelulú, Nīsani 14

Ko ha māhina kātoa mo ʻahoʻaho ʻoku ʻalu fakalaka hake ʻi Selusalema. ʻOku toki mālōlō hifo ʻa e koló hili ha ʻaho femoʻuekina. Ko e efiafi ko ʻení ko e ʻeá ʻoku fonu ʻi he nanamu ʻo e lami tunu. ʻIo, ko e laui afe ʻo e kakaí ʻoku nau teuteu ki ha meʻa makehe​—ko hono kātoangaʻi fakataʻu ʻo e Pāsová.

ʻI ha loki tali-fononga lahi, ʻoku tau ʻilo ai ʻa Sīsū Kalaisi pea mo ʻene kau ʻapositolo ʻe toko 12 ʻi ha tēpile kuo ʻosi teuteuʻi. Fanongo! ʻOku lea ʻa Sīsū. “Kuo u matuʻaki holi ke kai ʻa e pāsova ko eni fakataha mo kimoutolu, ʻi he teʻeki ke hoko ʻeku mamahi,” ko ʻene leá ia. (Luke 22:15) ʻOku ʻilo ʻe Sīsū ʻoku fakakaukau ʻa hono ngaahi fili fakalotú ke tāmateʻi ia. Ka ki muʻa ke hoko ʻa e meʻa ko iá, ʻe hoko ha meʻa mahuʻinga ʻaupito ʻi he efiafi ko ʻení.

ʻI he hili hono kātoangaʻi ʻa e Pāsová, ʻoku talaki ʻe Sīsū: “Ko e toko taha ʻiate kimoutolu te ne lavakiʻi au.” (Mātiu 26:21) ʻOku mamahi lahi heni ʻa e kau ʻapositoló. Ko hai ʻoku ngalingali te ne fai iá? ʻI he hili nai ha fetalanoaʻaki, ʻoku tala ange ʻe Sīsū kia Siutasi ʻIsikaliote: “Fai vave ange ʻa e meʻa ʻoku ke fai.” (Sione 13:27) Neongo ʻoku ʻikai ke ʻilo ki ai ʻa e niʻihi kehé, ko Siutasí ko ha tokotaha-lavaki. ʻOkú ne mavahe ke fakahoko hono ngafa kākaá ʻi he faʻufaʻufono ʻo fekauʻaki mo Sīsuú.

Ko ha Kātoanga Makehe

ʻOku fokotuʻu leva ʻe Sīsū ha kātoanga mātuʻaki foʻou​—ʻa ia ko ia te ne fakamanatu ʻene pekiá. ʻI hono toʻo ha foʻi maá, ʻoku fai ʻe Sīsū ha lotu fakafetaʻi ʻo e maá pea tufotufa atu. “Toʻo ʻo kai,” ko ʻene leá ia. “Ko hoku sino ʻeni, ʻa ia ʻoku foaki koeʻuhi ko kimoutolu.” ʻI hono kai ʻe kinautolu taki taha ha niʻihi ʻo e maá, ʻokú ne toʻo ha ipu uaine kulokula peá ne tāpuakiʻi ia. “Mou inu kotoa pe mei ai,” ko e tala ange ia ʻe Sīsū kiate kinautolú, ʻo fakamatalaʻi ange: “Ko e ipu ni ko e fuakava foʻou ia ʻoku faiʻaki hoku toto, ʻa ia ʻoku lilingi koeʻuhi ko kimoutolu.” ʻOkú ne fakahinohino ki he toenga ʻo e kau ʻapositolo anga-tonu ʻe toko 11: “Mou fai ʻeni mōku fakamanatu.”​—Mātiu 26:​26-28; Luke 22:​19, 20; 1 Kolinito 11:​24, 25.

ʻI he efiafi ko iá, ʻoku teuteuʻi anga-ʻofa ai ʻe Sīsū ʻene kau ʻapositolo mateakí ki he meʻa ʻoku hanga mai mei muʻá peá ne fakapapauʻi ange ʻene ʻofa loloto kiate kinautolú. “Talaʻehai ʻoku ai ha ʻofa ʻa ha taha ʻe lahi ʻi he ʻofa ko é,” ko ʻene fakamatalá ange ia, “ke ne liʻaki ʻene moʻui koeʻuhi ko hono ngaahi kaumeʻa. Ko hoku ngaahi kaumeʻa ʻakimoutolu ʻo kapau ʻoku mou fai ʻa e ngaahi meʻa ʻoku ou tuʻutuʻuni atu.” (Sione 15:​13-15) ʻIo, ko e kau ākonga ʻe toko 11 kuo nau fakamoʻoniʻi ko kinautolu ʻa e ngaahi kaumeʻa moʻoní ʻaki ʻenau kau fakataha mo Sīsū he lolotonga hono ngaahi ʻahiʻahí.

ʻI he fuoloa e poʻulí​—mahalo kuo tuʻuapō—ʻoku fai ʻe Sīsū ha lotu taau ke manatuʻi, ʻi he hili iá ʻoku nau hiva ʻi he ngaahi hiva fakahīkihiki kia Sihova. Pea ʻi he maama ʻo ha māhina kātoa, ʻoku nau hū atu ki tuʻa mei he koló pea kolosi atu ki he Teleʻa Kitiloné.​—Sione 17:1–18:1.

ʻI he Ngoue ʻo Ketisemaní

ʻI ha taimi siʻi mei ai, ʻoku aʻu atu ʻa Sīsū pea mo e kau ʻapositoló ki he ngoue ʻo Ketisemaní. ʻI hono tuku ha toko valu ʻo e kau ʻapositoló ʻi he hūʻanga ki he ngoué, ʻoku ʻave ʻe Sīsū ʻa Pita, Sēmisi, mo Sione ʻo mamaʻo atu ʻi he lotolotonga ʻo e ʻulu ʻōlivé. “ʻOku mamahi fuʻu hoku laumālie, ʻo hangē ka mate,” ko ʻene tala ange ia ki he toko tolú. “Mou tatali ʻi heni ʻo fakafeʻao.”​—Maake 14:​33, 34.

ʻOku tatali ʻa e kau ʻapositolo ʻe toko tolú lolotonga iá ʻoku lue mamaʻo atu ʻa Sīsū ʻi he ngoué ke lotu. ʻI he kalanga leʻo-lahi mo e loʻimataʻia, ʻokú ne kole: “ʻE Tamai, kapau ko ho finangalo, ke ke fakalaka ʻa e ipu ni meiate au.” ʻOku ʻi he uma ʻo Sīsuú ʻa e fatongia lahi fakaʻulia. He faingataʻaʻia lahi ē ka ko ia ke fakakaukau atu ki he meʻa ʻe leaʻaki ʻe he ngaahi fili ʻo Sihová ʻi he taimi ʻe tutuki ai Hono ʻAlo tofu-pē-taha-ne-fakatupú ʻo hangē ko ha tokotaha faihia iá! ʻOku toe fakamamahi lahi ange kia Sīsū ʻa e fakakaukau atu ki he manuki lahi ʻaupito ʻe fai ki heʻene Tamai fakahēvani ʻofeiná kapau naʻá ne tō ʻi he ʻahiʻahi mamahi fakaʻuliá ni. ʻOku lotu fakamātoato ʻa Sīsū pea aʻu ki he langa lahi ʻo hoko ai hono pupuhá ko ha tulutā toto ʻoku tafe hifo ki he kelekelé.​—Luke 22:​42, 44.

Kuo toki ʻosi atu pē ʻa e lotu ʻa Sīsū ko hono tuʻo tolú. ʻOku fakaofi mai he taimi ko ʻení ha kau tangata toʻo tūhulu mo e ngaahi maama. Ko e tokotaha ʻoku luelue muʻomuʻá ʻoku ʻikai ko ha toe taha ka ko Siutasi ʻIsikaliote, ʻa ia ʻokú ne ʻalu atu hangatonu kia Sīsū. “Lapai, siʻotoʻofa!” ko ʻene leá ia, peá ne ʻuma lolomi kia Sīsū. “ʻE Siutasi,” ko e tali ia ʻa Sīsuú, “ko e ʻuma koā ʻoku ke lavakiʻiʻaki ʻa e Fanautama ʻa Tangata?”​—Mātiu 26:49; Luke 22:​47, 48; Sione 18:3.

Fakafokifā pē, ʻoku fakatokangaʻi ʻe he kau ʻapositoló ʻa e meʻa ʻoku hokó. Ko honau ʻEikí mo e kaumeʻa ʻofeiná ʻoku ʻamanaki ke puke! Ko ia, ʻoku toʻo hake ʻe Pita ha heletā peá ne tuʻusiʻaki ʻa e telinga ʻo e tamaioʻeiki ʻa e taulaʻeiki lahí. “Tuku siʻi ange kaeʻoua ke lava ʻeni,” ko e ui fakavavevave atu ia ʻa Sīsuú. ʻOkú ne ala atu leva, ʻo fakamoʻui ʻa e tamaioʻeikí pea fekau kia Pita: “Fakafoki hoʻo heletā ki hono tuʻunga: he ʻilonga kinautolu ʻoku ala ki he heletā te nau mate heletā.” (Luke 22:​50, 51; Mātiu 26:52) ʻOku puke leva ʻe he kau ʻōfisá mo e kau sōtiá ʻa Sīsū pea haʻi ia. ʻI he manavahē mo e puputuʻú, ʻoku liʻaki ʻe he kau ʻapositoló ʻa Sīsū pea hola ʻi he poʻulí.​—Mātiu 26:56; Sione 18:12.

Pongipongi Falaite, Nīsani 14

Kuo tuʻuapō ʻaupito ʻi he houa hengihengi ʻo e Falaité. ʻOku ʻuluaki taki atu ʻa Sīsū ki he ʻapi ʻo e Taulaʻeiki Lahi ki muʻa ko ʻĀnasí, ʻa ia ʻokú ne kei ngāueʻaki ʻa e tākiekina mo e mālohi lahi. ʻOku fakafehuʻi ia ʻe ʻĀnasi pea toki ʻave leva ia ki he ʻapi ʻo e Taulaʻeiki Lahi ko Kaiafasí ʻa ia kuo fakatahataha ki ai ʻa e Sanetalimí.

ʻOku feinga leva ʻa e kau taki lotú ke maʻu ha ngaahi fakamoʻoni ke faʻuʻaki ha fakamatala ke fakafepakiʻiʻaki ʻa Sīsū. Kae kehe, naʻa mo e kau fakamoʻoni loí ʻoku ʻikai te nau loto-tatau ʻi heʻenau fakamoʻoní. Neongo kotoa iá, ʻoku nofo fakalongo pē ʻa Sīsū ia. ʻI hono liliu ʻa e ngaahi foungá, ʻoku fekau atu ʻe Kaiafasi: “ʻOku ou hu atu ʻi he ʻOtua ʻoku ʻafio ni, ke ke tala mai pe ko e Misaia koe, ko e ʻAlo ʻo e ʻOtua”! Ko e moʻoniʻi meʻa ko ʻení ʻoku ʻikai lava ia ke taʻefakamoʻoniʻi, ko ia, ʻoku tali loto-toʻa atu ʻa Sīsū: “Ko au: pea te mou mamata ki he Fanautama ʻa Tangata ʻoku ne nofo ki he nima toʻomataʻu ʻo Mālohi, pea ʻoku ne hoko mai mo e ngaahi ʻao ʻo e langi.”​—Mātiu 26:63; Maake 14:​60-62.

“Kuo ne lea fieʻotua”! ko e kalanga ia ʻa Kaiafasí. “Koeʻumaʻā ʻetau toe kumi fakamoʻoni?” ʻOku paaʻi leva ʻe he niʻihi ʻa e mata ʻo Sīsuú pea ʻaʻanu kiate ia. ʻOku tukiʻi ia ʻe he niʻihi mo leakovi lahi ʻaupito kiate ia. (Mātiu 26:​65-68; Maake 14:​63-65) Ko ia, hili ʻa e ʻaho hake he Falaité, ʻoku toe fakataha ʻa e Sanetalimí, mahalo pē ke ʻai ke ngali fakalao ʻa e hopo taʻefakalao he pō ko iá. ʻOku toe fakahaaʻi loto-toʻa ʻe Sīsū ko ia ko e Kalaisí, ko e ʻAlo ʻo e ʻOtuá.​—Luke 22:​66-71.

Ko hono hokó, ʻoku fusi atu ʻa Sīsū ʻe he houʻeiki taulaʻeikí mo e kau tangata taʻumotuʻá ke toe hopoʻi ʻe Ponitō Pailato, ko e kōvana Loma ʻo Siuteá. ʻOku nau tukuakiʻi ʻa Sīsū ki hono fakamoveuveuʻi ʻa e fonuá, taʻofi ʻa e totongi ʻo e ngaahi tukuhau kia Sisá, mo ʻene “pehe ko Kingi Kalaisi ia.” (Luke 23:2; fakafehoanaki mo Maake 12:17.) ʻI he hili hono fakafehuʻi ʻo Sīsuú, ʻoku fanongonongo ʻe Pailato: “ʻOku ʻikai te u ʻilo ha hala ʻi he tangata ni.” (Luke 23:4) ʻI he fanongo ʻa Pailato ko Sīsuú ko ha Kālelí, ʻokú ne ʻoatu ia kia Hēlota ʻAnitipasa, ko e pule ʻo e kau Kālelí, ʻa ia ʻokú ne ʻi Selusalema ki he Pāsová. ʻOku ʻikai ke tokanga ʻa Hēlota ke sio ʻoku fai ha fakamaau totonu. ʻOkú ne fiemaʻu pē ke sio ʻoku fakahoko ʻe Sīsū ha mana. Koeʻuhi ʻoku ʻikai fakafiemālieʻi ʻe Sīsū ʻene fieʻiló mo nofo fakalongolongó, ʻoku fakakataʻaki ia ʻe Hēlota pea mo ʻene kau sōtiá pea toe ʻoatu ia kia Pailato.

“Ko e ha ha kovi kuo fai ʻe he tangata ni?” ko e toe ʻeke ange ia ʻe Pailató. “Kuo ʻikai te u momoʻi ʻilo haʻane hiamatea: ko ia te u ʻai hano kini, pea vete ange.” (Luke 23:22) Ko ia, naʻá ne uipiʻi ʻa Sīsū ʻaki ha uipi lōlahi ʻa ia naʻe mafohi mamahi ai ʻa e tuʻa ʻo Sīsuú. ʻOku lolomi hifo leva ʻe he kau sōtiá ha kalauni talatala ʻi hono ʻulú. ʻOku nau manuki kiate ia pea taaʻi ia ʻaki ha vaʻa kaho fefeka, ʻo lolomi mālohi hifo ai ʻa e kalauni talatalá ʻi hono tumuʻaki ʻulú. ʻI he kotoa ʻo e ngaahi mamahi mo e manuki taʻealafakamatalaʻí, ʻoku tauhi maʻu ʻe Sīsū ʻa e ngeia mo e mālohi tuʻu-ki-muʻa.

Ko Pailato​—mahalo pē ʻi he ʻamanaki ko e tuʻunga ko ia ʻoku fekuki mo Sīsuú ʻe maʻu nai ai ha kaungāmamahi​—naʻá ne toe ʻoatu ia ki he fuʻu kakaí. “Vakai” ko e kalanga ia ʻa Pailató, “oku ou omi ia kiate kimoutolu, koeuhi ke mou ilo oku ikai teu ilo haane kovi.” Ka ʻoku kaila atu ʻa e houʻeiki taulaʻeikí: “Tutuki ki he akau, tutuki ki he akau.” (Sione 19:​4-6, PM) ʻI he toe lahi ange ʻa e vilitaki ʻa e fuʻu kakaí, ʻoku tukulolo ai ʻa Pailato ʻo ne tuku atu ʻa Sīsū ke tutuki.

Ko ha Pekia Langa Lahi

He taimi ní ko e hoʻatā pongipongí ia, mahalo ko e ofi ki he hoʻatā-mālié. ʻOku ʻoatu leva ʻa Sīsū ki tuʻa Selusalema ki ha feituʻu naʻe ui ko Kolokota. ʻOku tutukiʻaki leva ʻa e ngaahi faʻo lalahi ʻa e ongo nima mo e ongo vaʻe ʻo Sīsuú ki ha ʻakau fakamamahi. ʻOku ʻikai ala fakamatalaʻi ʻaki ha ngaahi lea ʻa e langa lahi ʻi he hanga ʻe he mamafa ʻo hono sinó ʻo hae hifo ʻa e lavea ʻi he faʻó ʻi hono hiki hake ʻa e ʻakau fakamamahí. ʻOku fakatahataha mai ha fuʻu kakai ʻo sio kia Sīsū pea mo e ongo faihia ʻe toko ua kuo tutuki fakatahá. ʻOku manuki atu ʻa e tokolahi kia Sīsū. “Naʻa ne fakahaofi ʻa e kakai kehe,” ko e manuki ia ʻa e houʻeiki taulaʻeikí mo e niʻihi kehé, “ka ʻoku ʻikai te ne lava ke fakahaofi ia.” Naʻa mo e kau sōtiá pea mo e toko ua faihia naʻe tutukí ʻoku nau manuki kia Sīsū.​—Mātiu 27:​41-44.

Fakafokifā pē ʻi he hoʻatā-mālié, hili ʻa e ʻi he ʻakaú ʻa Sīsuú ʻo fuoloa siʻi, ʻoku nofo ha fakapoʻuli fakamanavahē ko e tupu mei he ʻOtuá ʻi he fonuá ʻi ha houa ʻe tolu.a Mahalo pē ʻi he meʻa ko ʻení ʻoku ueʻi ai ʻa e tokotaha faikoví ke ne valokiʻi ʻa e tokotaha kehé. Peá ne hanga atu kia Sīsū, ʻo ne kole ange: “Manatuʻi au ʻi hoʻo hoko ki ho puleʻangá.” He tui fakaofo lahi ē ʻi he funga ʻo e mate ʻoku tuʻunuku maí! “Ko au ē, ʻoku ou tala atu he ʻahó ni,” ko e tali ia ʻa Sīsuú, “Te ke ʻi Palataisi mo au.”​—Luke 23:​39-43, NW.

ʻI he tolu hoʻataá nai, ʻoku ongoʻi ʻe Sīsū ko hono ngataʻangá ʻoku ofi. “ʻOku ou fieinua,” ko ʻene leá ia. Pea ʻi ha leʻo-lahi, ʻoku ne kalanga: “E Hoku ʻOtua, ʻe hoku ʻOtua, ko e ha kuo ke liʻaki ai au?” ʻOku ongoʻi ʻe Sīsū, hangē pē ko ia ki muʻá, kuo toʻo ʻe heʻene Tamaí ʻene maluʻí meiate ia ka ne fakaʻatā ʻene mateaki-angatonú ke ʻahiʻahiʻi ki hono ngataʻangá, pea ʻokú ne fakalau ai ʻa e ngaahi lea ʻa Tēvitá. ʻOku toʻo ʻe ha tokotaha ha konga sipanisī kuo fonu ʻi ha uaine mahi ʻo ne ʻai ki he loungutu ʻo Sīsuú. ʻI he maʻu leva ʻa e uainé, ʻoku tauʻaki ʻa Sīsū: “Kuo ʻosi.” Peá ne kalanga leʻo-lahi, “ʻE Tamai, ʻoku ou tuku hoku laumalie ki ho nima,” peá ne punou hono ʻulú, ʻo ne pekia.​—Sione 19:​28-30; Mātiu 27:46; Luke 23:46; Sāme 22:1.

Koeʻuhí ko e hoʻatā efiafi, ʻoku fai leva ha ngaahi fokotuʻutuʻu fakavavevave ke tanu ʻa Sīsū ki muʻa ke kamata ʻa e Sāpaté (Nīsani 15) ʻa ia ʻoku kamata ʻi he tō ʻa e laʻaá. Ko Siosefa ʻo ʻAlemateá, ko ha mēmipa ʻiloa ʻi he Sanetalimí ʻa ia ko ha ākonga fakapulipuli ʻa Sīsū, ʻokú ne maʻu ʻa e ngofua ke ne tanu ia. Ko Nikotīmasi, ko ha toe mēmipa ʻo e Sanetalimí ʻa ia kuó ne fakahaaʻi fakapulipuli ʻene tui kia Sīsuú, ʻokú ne tokoni ʻaki ha mula mo e ʻaloe kilokalami ʻe 33. ʻOku nau tuku lelei ʻa e sino ʻo Sīsuú ʻi ha fonualoto fakamanatu foʻou ofi mai pē.

Toe Moʻui!

ʻOku kei fakapoʻuli he pongipongi Sāpaté he fakaofi atu ʻa Mele Makitaline pea mo ha kau fāfine kehe ki he faʻitoka ʻo Sīsuú. Kae vakai atu! Ko e fuʻu maka ʻi muʻa ʻi he faʻitoká kuo tekaʻi ia. Ko ē, kuo halaʻatā ʻa e fonualotó! ʻOku lele fakavave ʻa Mele Makitaline ke tala kia Pita mo Sione. (Sione 20:​1, 2) ʻOku ʻikai ke fuʻu fuoloa mei heʻene mavahé kuo hā ha ʻāngelo ki he kau fāfine kehé. ʻOkú ne pehē: “ʻOua naʻa manavahe.” ʻOkú ne toe enginaki: “Mo ō vave ʻo tala ki heʻene kau ako, ʻo pehe, kuo ne toetuʻu mei he pekia.”​—Mātiu 28:​2-7.

ʻI heʻenau fakavave atú, ko ia ʻoku nau fetaulaki mo iá ko Sīsū tonu! “Mole pe ʻo fakaha ki siʻoku ngāhi tokoua,” ko ʻene tala ange ia kiate kinautolú. (Mātiu 28:​8-10) Ki mui, ʻoku ʻi he faʻitoká ʻa Mele Makitaline ʻo ne tangi he taimi ʻoku hā mai ai ʻa Sīsū kiate iá. ʻOku malava ke ne fakamaʻumaʻu ʻene fiefiá peá ne lele ʻo tala ki he kau ākonga kehé ʻa e ongoongo fakaofó. (Sione 20:​11-18) Ko hono moʻoní, ko e tuʻo nima ʻi he Sāpate mangalongataʻa ko iá, ʻa e hā ʻa Sīsū kuo toetuʻú ki he kau ākonga kehekehe, ʻo ʻikai ha toe veiveiua ko iá, ko e moʻoni, kuó ne toe moʻui!

Founga ʻEne Kaunga Kiate Koé

ʻOku lava fēfē ke kaunga kiate koe ʻa e ngaahi meʻa naʻe hoko ʻi he taʻu ʻe 1,966 kuohilí ka ʻokú ke fangafanga hū koe he taimí ni ki he senituli hono 21? ʻOku fakamatalaʻi ʻe ha fakamoʻoni sio tonu ʻo e ngaahi meʻa ko iá: “Ko eni ia ʻa e meʻa kuo fakaha ai ʻa e ʻofa ʻa e ʻOtua ʻiate kitautolu, ʻa e fekau atu ki mamani ʻe he ʻOtua hono ʻAlo tofu-pe-taha-ne-fakatupu, koeʻuhi ke tau moʻui ʻiate ia. Ko eni ia ʻa e meʻa ʻoku ʻi ai ʻa ʻOfa, ʻo ʻikai ko e pehe naʻa tau feia ha ʻofa ki he ʻOtua ʻe kitautolu, ka ko ʻene ʻofaʻi kitautolu ʻe he ʻEne ʻAfio, mo ne fekau atu hono ʻAlo moʻo fakatupuhōifuaʻanga koeʻuhi ko ʻetau ngaahi hia.”​—1 Sione 4:​9, 10.

ʻI he founga fē ʻoku “fakatupuhōifuaʻanga” ai ʻa e pekia ʻa Kalaisí? ʻOku fakatupuhōifuaʻangá koeʻuhi ʻokú ne malava ai ke ʻai ha vahaʻangatae fakafiemālie mo e ʻOtuá. Ko e ʻuluaki tangatá, ʻa ʻĀtama, naʻe angatuʻu fakafepaki ki he ʻOtuá pea naʻe tukufakaholo mai ai ki hono hakó ha lao ʻo e angahalá mo e maté. ʻI he tafaʻaki ʻe tahá, ko Sīsuú, naʻá ne foaki ʻene moʻuí ko ha huhuʻi ke totongi ʻa e mahuʻinga ʻo e angahala mo e mate ʻa e faʻahinga ʻo e tangatá, ʻo tokonaki ai ha makatuʻunga ki he ʻOtuá ke fakalahi atu ʻene mēsí mo e hōifuá. (1 Timote 2:​5, 6) ʻI he tui pīkitai ki he feilaulau fakamolemole-angahala ʻa Sīsuú, ʻe lava ai ke fakatauʻatāinaʻi koe mei he fakahalaia kuó ke maʻu tukufakaholo mai mei he tokotaha angahala ko ʻĀtamá. (Loma 5:12; 6:23) ʻI heʻene peheé, ʻoku fakaava ai ʻe he meʻá ni ʻa e faingamālie fakaofo ki hono maʻu ha vahaʻangatae fakafoʻituitui mo hoʻo Tamai fakahēvani anga-ʻofa, ko Sihova ko e ʻOtuá. ʻI ha taimi nounou, ko e feilaulau māʻolunga taha ʻa Sīsuú ʻe lava ke ʻuhinga ia ko ha moʻui taʻengata kiate koe.​—Sione 3:16; 17:3.

Ko e ngaahi meʻá ni pea mo e ngaahi meʻa kehe felāveʻi mo iá ʻe fakamatala ki ai ʻi he efiafi Tuʻapulelulu, ʻEpeleli 1, ʻi he ngaahi feituʻu ʻe laui mano takatakai ʻi he māmaní ʻi he taimi ʻe fakatahataha ai ʻa e laui miliona ʻo e kakaí ke fakamanatu ʻa e pekia ʻa Sīsū Kalaisí. ʻOku fakaafeʻi atu koe ke ke kau ki ai. Ko e Kau Fakamoʻoni ʻa Sihova ʻi ho feituʻú te nau fiefia ke tala atu kiate koe ʻa e feituʻu mo e taimi te ke lava ai ke kau ki aí. Ko e hoko ʻo ʻi aí ʻe ʻikai ha veiveiua ʻe loloto ange ai hoʻo houngaʻia ki he meʻa naʻe fai ʻe hotau ʻOtua ʻofá pea mo hono ʻAlo ʻofaʻangá ʻi he ʻaho fakaʻosi ʻo e moʻui fakaetangata ʻa Sīsuú.

[Fakamatala ʻi lalo]

[Saati/Fakatātā ʻi he peesi 7]

PEKIA MO E TOETUʻU ʻA SĪSUÚ

NĪSANI 33 T.S. NGAAHI MEʻA NAʻE HOKÓ MOʻUNGAʻI TANGATA LAHI TAHÁb

15 Efiafi Falaité Kamata ʻa e Sāpaté

[Fakamatala ʻi lalo]