Lautohi mo Hoʻo Fānaú

Fakatatau ki he makasini Pelēsila ko e Veja, ko e fānau ʻa e kau lautohi tōtōiví ʻe hangehangē te nau fakatupulekina ange ha manako ki he ngaahi tohí ʻi he fānau ko ē ʻoku ʻikai ha faʻifaʻitakiʻanga pehē ʻo e lautohí ʻi ʻapí. “Ko e kaungā lautohí ʻoku fakaivimālohiʻi ai ʻa e fekoekoeʻi ʻi he vahaʻa ʻo e ngaahi mātuʻá mo e fānaú pea fakaʻatā ai ʻa e kiʻi tamá ke ne mahinoʻi lelei ange ai ʻa e ngaahi meʻa ʻi loto ʻi he tohí,” ko e lau ia ʻa Martha Hoppe, ko ha mataotao ʻi he tupu fakalakalaka ʻa e fānaú.

Ko e lautohi leʻo-lahi ki hoʻo fānaú ʻoku toe ʻomai ai kiate koe ʻa e faingamālie ke tali ha ngaahi fehuʻi. ʻE lava ke ke fetalanoaʻaki ki ha ngaahi fakatātā pē ʻoku ʻomai fakataha mo e konga tohí. “Ko e lahi ange ʻo hono mahinoʻi ʻe ha kiʻi tama ʻa e ngaahi meʻa ʻi loto ʻi he tohí,” ko e fakahā ia ʻa Hoppe, “ko e lahi ange ia ʻo hono fakaʻaiʻai ia ke sio kiate kinautolu ʻi he taimi te ne loto ai ke fakafiemālieʻi ʻene fieʻiló.”

ʻOku tokolahi ʻa e ngaahi mātuʻa ʻi he lotolotonga ʻo e Kau Fakamoʻoni ʻa Sihová ʻoku nau fiefia ʻi he lautohi fakataha mo ʻenau fānaú. Te nau lau nai ʻa e ngaahi tohi hangē ko e Ko ʻEku Tohi ʻo e Ngaahi Talanoa Faka-Tohitapú, Listening to the Great Teacher, mo e Ko e Moʻungaʻi Tangata Lahi Taha Kuo Moʻui Maí.a Ko e ngaahi tohi hangē ko ʻení ʻoku ʻikai ke ngata pē ʻi heʻenau tokoniʻi ʻa e fānaú ke hoko ko e kau lautohi leleí ka ʻoku nau toe fakafālahiʻi ange ai ʻenau mahuʻingaʻia ʻi he tohi fakataua lahi taha ʻi he māmaní​—ko e Tohitapu Māʻoniʻoní. Ko ia ai, kapau ko ha mātuʻa tauhi fānau koe, fokotuʻu ha faʻifaʻitakiʻanga ki hoʻo fānaú ʻaki hoʻo hoko ko ha tokotaha lautohi vēkeveke ʻo e Folofola ʻa e ʻOtuá. (Siosiua 1:​7, 8) Pea ko hono moʻoní, ʻai ha taimi ke lautohi ai kiate kinautolu!

[Fakamatala ʻi lalo]