Ko e Fonua Fua Lahi ʻo e Kau Venitaá

ʻI HE taʻu ʻe hongofulu kuohilí, ko hoku uaifí mo au naʻá ma ngāue ai ko e ongo ʻevangeliō taimi-kakato ʻi he lotolotonga ʻo e kau Venitaá. ʻOku nofo ʻa e kau Venitaá ʻi he fakatonga ʻo e Vaitafe Limpopo ʻi he tokelau ʻo ʻAfilika Tongá, pea ko honau kakaí ʻoku faʻuʻaki ia ʻa e ngaahi matakali ko ia naʻa nau kolosi ʻi he Limpopo lolotonga ʻa e ngaahi senituli kuohilí. ʻOku taukaveʻi ʻe he kau Venitā ʻe niʻihi naʻe nofo heni ʻenau fanga kuí ʻo laka hake he taʻu ʻe 1,000 kuo maliu atú.

Ko e moʻoni, ko e feituʻú ni ʻi ha taimi ko ha konga ia ʻo ha sivilaise motuʻa naʻe ui ko e Puleʻanga Mapungubwe. Ko e ʻuluaki nofoʻanga fakakolo lahi ia ʻo ʻAfilika Tongá, pea ʻokú ne puleʻi ʻa e fuʻu teleʻa Vaitafe Limpopo, mei Potisuana ʻi he hihifó ki Mosemipīki ʻi he hahaké. Mei he 900 T.S. nai ki he 1100 T.S., naʻe tokonaki ai ʻe Mapungubwe ki he kau mēsianiti ʻAlepeá ʻa e nifoʻi ʻelefānite, meʻatui lainosōlosi, ngaahi kiliʻimanu, kopa, ʻo aʻu ki he koula. Ne keli hake ha ngaahi meʻa kuo tātongitongi pōtoʻi naʻe vali koula ʻi ha moʻunga telioʻanga fakatuʻi naʻe ui ko Mapungubwe. ʻOku kau ʻa e ngaahi meʻá ni ʻi he “muʻaki tuʻuʻanga ʻo e keliʻanga koulá ʻi he fakatonga ʻo ʻAfiliká,” ko e lau ia ʻa e ʻenisaikolopētia ʻe taha.

ʻOku ʻikai ke kei keli ai ʻa e koulá. ʻI he ʻahó ni, ko e fonua ʻo e kau Venitaá ʻoku ʻiloa ia ʻi heʻene fua lahí. ʻI he fakatonga ʻo e ʻOtu Moʻunga Soutpansberg ʻoku tokoto ai ha teleʻa kelekele lelei, ʻa ia ʻoku tupu lahi ai ʻa e ngaahi fuaʻiʻakau hangē ko e ʻāvoka, siaine, mango, mo e kuava. Tuku kehe ʻa e nati hangē ko e pīkeni mo e mekitēmiá, ʻoku toe ʻi ai foki mo e vesitapolo lahi. ʻOku kau ʻi he ngaahi meʻá ni ʻa e muroho ʻoku tupu noaʻiá, ʻa ia ʻoku ifo hangē ko e silivapītí pea ʻoku ifoʻia lahi ai ʻa e kakai ʻo e feituʻú.

Ko e kau Venitaá ko ha kakai fakamelino mo anga talitali-kakai. ʻOku ʻikai ko ha meʻa foʻou ki he ʻulu ʻo e fāmilí ke ne kounaʻi ke ngaohi ha moa maʻa ha tokotaha ʻaʻahi taʻeʻamanekina. ʻOku kai eni fakataha mo e vhuswa, ko e meʻakai tuʻumaʻu, ʻoku ngaohi mei he koané. Hili e ʻaʻahí, ko e ʻulu ʻo e fāmilí te ne fakafeʻao ʻa ʻene tokotaha ʻaʻahí ʻi ha kiʻi vāʻihala. Ko e founga tukufakaholo ia ʻo hono fakahāhā ʻa e fakaʻapaʻapa ki ha tokotaha ʻaʻahi. ʻOku akoʻi ʻa e fānaú ke nau fakafeʻiloaki ki he kau ʻaʻahí ʻi ha founga fakaʻofoʻofa ʻaki ʻa e punou mo puke fakafehauaki ʻa e ongo nimá. ʻI he peesi ko ení ʻokú ke sio ai ki ha ongo fefine Venitā ʻokú na feʻiloaki ʻi he anga-fakafonua ko ení.

Ko ha Lea Faingataʻa

Ko e lea faka-Venitaá ʻoku ʻikai ke potongofua ai ʻa e kakai tupuʻi ʻIulopé. Ko e faingataʻa ʻe taha koeʻuhi he ʻoku lahi ʻa e ngaahi foʻi lea ʻoku nau sipela tatau ka ʻoku puʻaki kehekeheʻi. Lolotonga ʻa e fai ʻo ha malanga faka-Tohitapu ki ha fakatahaʻanga Venitā ʻa e Kau Fakamoʻoni ʻa Sihová ʻi he ʻaho ʻe taha, naʻá ku feinga ai ke fakalototoʻaʻi ʻa e kau fanongó ke lea ki he tokotaha kotoa pē. Naʻe ʻikai lava ʻa e tokotaha ʻi he kau fanongó ʻo mataʻofi ʻene katá koeʻuhi he naʻá ku pehē “foʻi tuhu ki he foʻi tuhu” kae ʻikai ko e “tokotaha ki he tokotaha.”

ʻI heʻeku ʻuluaki feinga ke lea faka-Venitā ʻi he ngāue fakamoʻoni ki he kakaí, naʻe tali mai ʻe ha fefine Venitā: “ʻOku ʻikai te u lea faka-Pilitānia.” Naʻá ku fakakaukau au naʻe toki ʻosi ʻa ʻeku lea lelei faka-Venitā, ka naʻá ne pehē ʻe ia ko ha lea faka-Pilitānia! ʻI heʻeku fakaofiofi atu ʻi he taimi ʻe taha ki ha fale, naʻá ku kole ange ai ki ha kiʻi leka ke ne ui mai ʻa e ʻulu ʻo e fāmilí. Ko e foʻi lea Venitā ki he ʻulu ʻo e fāmilí ko e thoʹho. ʻI ha fehālaaki, naʻá ku pehē ange ʻe au thohoʹ, ʻa ia naʻá ku kole ange ai ʻe au ke lea ki he ngeli ʻo e falé! Ko e ngaahi fehālaaki hangē ko ení naʻá ne fakalotosiʻiʻi au, ka ʻi he kītakí ko hoku uaifí fakatouʻosi mo au ʻokú ma malava ai he taimí ni ke fetalanoaʻaki lelei pē ʻi he lea faka-Venitaá.

Fua Fakalaumālie

Ko e fonua ʻo e kau Venitaá ʻoku fakamoʻoniʻi ʻa ʻene fua lahí ʻi ha founga fakalaumālie. ʻI he 1950 tupú, naʻe fokotuʻu ai ha fakatahaʻanga ʻa e Kau Fakamoʻoni ʻa Sihová ʻi he lotolotonga ʻo e kau folau hiki mai mei he ngaahi fonua kaungāʻapí ke ngāue ʻi ha keliʻanga kopa ʻi he kolo ko Messina. Ko ʻenau ngāue faivelengá naʻá ne fakafeʻiloaki ai ʻa e kau Venitā tokolahi ki he ngaahi moʻoni ʻo e Tohitapú. ʻI ha hongofuluʻi taʻu ki mui ai, naʻe fai ai ʻa e ngaahi fakataha ʻa ha kulupu ʻo e Kau Fakamoʻoni Venitaá ʻi ha ʻapi nofoʻanga ʻi he kolo ko Sibasa.

Ke fakavaveʻi ʻa e tupú, naʻe fekau atu ai ʻe he vaʻa ʻo e Sōsaieti Taua Leʻo ʻi ʻAfilika Tongá ha kau ʻevangeliō taimi-kakato ki he malaʻe fua lahi ko ení. Naʻe vave ʻa e tupu ʻa e kulupu Sibasa ki ha fuʻu fakatahaʻanga lahi. Naʻe fai ʻi he taimi ko iá ʻa e ngaahi fakataha faka-Kalisitiané ʻi ha loki ako. Kae kehe, ʻi he tokoni ʻa e Kau Fakamoʻoni ʻa Sihová ʻi he feituʻu Pietersburg ko e kilomita nai ʻe 160 ki he fakatongá, naʻe langa ai ha Fale Fakatahaʻanga ʻi Thohoyandou, ko ha kolo kaungāʻapi.

Ko e kakai lea faka-Venitā ʻi he tokelau ʻo ʻAfilika Tongá ʻoku laka hake honau tokolahí ʻi he toko 500,000. Naʻe ʻikai ha Kau Fakamoʻoni Venitā ʻi he taimi naʻe kamata ai heni ʻa e ngāue malangaʻi ʻo e Puleʻangá ʻi he 1950 tupú. ʻI he taimí ni ʻoku nau laka hake he toko 150. Ka ʻoku kei ʻi ai pē ʻa e ngaahi feituʻu lahi ʻoku teʻeki ke ngāueʻi mo e ngāue lahi ke fai. ʻI he 1989 naʻá ma kamata ai ke ʻaʻahi ki ha kolo Venitā naʻe ui ko Hamutsha. Ko e Fakamoʻoni pē ʻe toko taha naʻe nofo ai ʻi he taimi ko iá. ʻI he taimí ni ʻoku nofo ʻi he kolo ko iá ʻa e kau fanongonongo ʻo e Puleʻangá laka hake he toko 40. ʻOku mau femoʻuekina ai he fakaʻosi homau Fale Fakatahaʻanga, ʻoku toe ʻoatu heni ʻa e fakamālō ki he tokoni ʻa e Kau Fakamoʻoni mei he ngaahi fakatahaʻanga Pietersburg pea mo e ngaahi tokoni fakapaʻanga ʻa e fanga tokoua ʻi he ngaahi fonua moʻumoʻua angé.

ʻOkú ma nofo ʻi ha kalavana (kiʻi taulani siʻisiʻi) ʻi ha faama. ʻI he tauhi ke faingofua ʻema moʻuí, ʻokú ma maʻu ai ʻa e taimi lahi ange ke aʻu ki he kakai ʻo e feituʻú mo e ongoongo leleí. (Maake 13:10) Ko hono olá, kuo tāpuakiʻi lahi ʻaki kimaua ʻa e monū ko hono tokoniʻi ʻa e tokolahi ke fakatapui ʻenau moʻuí kia Sihova ko e ʻOtuá. Ko e fakatātā ʻe taha ko ha tangata ko Michael, ʻa ia naʻá ne sio ʻi he tohi Te Ke Malava ʻo Moʻui Taʻengata he Palataisi ʻi he Māmaní ʻi ha fale ʻo hano kaumeʻa.a Naʻá ne kamata lau ia pea vave ʻa ʻene fakatokangaʻi ʻa e moʻoní. Ko ia, naʻá ne tohi ki he Sōsaieti Taua Leʻó ki ha ngaahi tohi faka-Tohitapu lahi ange. ʻI heʻene tohí naʻe fakamatala ai ʻa Michael naʻá ne toki papitaiso ko ha mēmipa ʻo ha siasi faka-ʻApositolo ʻi he feituʻú. “Kuó u ʻiloʻi,” ko ʻene hokó atu ia, “ʻoku ou ʻi he hala taʻetotonu ki he Puleʻanga ʻo e ʻOtuá. Kuó u fakapapau ke hoko ko e taha ʻo ho kau mēmipá, ka ʻoku ʻikai te u ʻilo pe ʻe fēfē haʻaku fai ia.” Naʻá ne ʻoange leva ʻa hono tuʻasilá pea kole ke fekau ange ha taha ʻo e Kau Fakamoʻoni ʻa Sihová ke tokoniʻi ia. Naʻá ku feinga ke fetuʻutaki kia Michael pea kamata ha ako Tohitapu ʻi ʻapi mo ia. ʻI he ʻahó ni, ko ha Fakamoʻoni ʻosi papitaiso ia pea ʻokú ne tauhi mateaki kia Sihova.

ʻI Tīsema 1997, naʻá ma kau ai ʻi he Fakataha-Lahi Fakavahe ʻa e Kau Fakamoʻoni ʻa Sihová ko e “Tui ki he Folofola ʻa e ʻOtuá” ʻa ia naʻe fai ʻi ha sitētiume faiʻanga sipoti ʻi Thohoyandou. Naʻe kau ki ai ʻa e toko 634, pea naʻe papitaiso ai ʻa e faʻahinga foʻou ʻe toko 12. Naʻá ku maʻu ai ʻa e monū ko hono fai ʻo ha ongo malanga ʻe ua faka-Venitā. Ko ha makamaile moʻoni ia ʻi homa hongofuluʻi taʻu fiefia naʻe ngāueʻi ʻi he fonua fua lahi ko ení!​—Fakamatala ʻOmai.

[Fakamatala ʻi lalo]