Kau Talavou​—Akoʻi Homou Ngaahi Mafai Fakaefakakaukaú!

“Ko e meʻakai mālohí ʻoku maʻá e kakai ʻoku matuʻotuʻá, ʻa e faʻahinga ʻa ia fakafou ʻi hono ngāueʻakí kuo akoʻi ai honau ngaahi mafai fakaefakakaukaú ke fakafaikehekeheʻi fakatouʻosi ʻa e tonú mo e halá.”​—HEPELU 5:14, NW.

1, 2. (a) ʻOku anga-fēfē hono fakahoa atu ʻa hotau tuʻunga ʻi he ʻaho ní ki he tuʻunga ʻo e kau Kalisitiane ʻi ʻEfesō he kuonga muʻá? (e) Ko e hā ʻa e ngaahi pōtoʻi ʻe lava ke ne maluʻi koe mei he fakatuʻutāmakí, pea ʻe lava fēfē ke ke fakatupulekina kinautolú?

“MOU tokanga ki hoʻomou laka fakatuʻutuʻuni, pe ʻoku fefe hono anga, ʻo ʻoua te mou ngali taʻepoto ai, kae ngali poto: mo mou lamalama ke ngaueʻaki ʻa e faingamalie, koeʻuhi ʻoku kovi ʻa e ngaahi ʻaho.” (Efeso 5:​15, 16) Talu mei hono tohi ʻe he ʻapositolo ko Paulá ʻa e ngaahi lea ko iá ʻi he taʻu ʻe ua afe kuo hilí, ‘ko e kakai kovi mo fakahekeheké kuo nau fakaaʻau atu mei he kovi ki he kovi.’ ʻOku tau moʻui ʻi he “ngaahi taimi faingataʻa,” pe hangē ko hono fakalea ʻe he liliu ʻe taha, ko e ngaahi taimi ʻoku “fonu ʻi he fakatuʻutāmaki.”​—2 Timote 3:​1-5, 13; Phillips.

² Kae kehe, ʻe lava ke ke fakaʻehiʻehi mei he hoko ʻo fakameleʻi ʻe he ngaahi fakatuʻutāmaki ko ia ʻoku tukutoi mai nai ʻi ho halá, ʻaki hono fakatupulekina ʻa e “fakapotopoto . . . ʻiloʻilo mo e [pōtoʻi] fakakaukau.” (Palovepi 1:4) ʻOku pehē ʻe he Palovepi 2:​10-12: “He hu ʻa e poto ki ho loto, pea felatani ʻa e ʻilo mo ho laumalie; ʻe fai ho fakalekesi ʻe [pōtoʻi] Fakakaukau, ʻe leʻohi koe ʻe Fakahinohino: Kae fakahaofi koe mei he hala kovi mei he kakai ʻoku mioʻi lau.” Ka ʻe lava fēfē ke ke fakatupulekina ʻa e ngaahi pōtoʻi ko iá? ʻOku pehē ʻe he Hepelu 5:​14 (NW): “Ko e meʻakai mālohí ʻoku maʻá e kakai ʻoku matuʻotuʻá, ʻa e faʻahinga ʻa ia fakafou ʻi hono ngāueʻakí kuo akoʻi ai honau ngaahi mafai fakaefakakaukaú ke fakafaikehekeheʻi fakatouʻosi ʻa e tonú mo e halá.” Hangē pē ko ia ʻoku fai ki ha faʻahinga pōtoʻi pē, ko hono puleʻi ʻa hono ngāueʻaki ʻa ʻete ngaahi mafai fakaefakakaukaú ʻoku fiemaʻu ki ai ʻa e akoʻi. Ko e foʻi lea faka-Kalisi naʻe ngāueʻaki ʻe Paulá ʻoku ʻuhinga fakafoʻilea ‘ko hono ʻosi akoʻi hangē ha tokotaha fakamālohi-sinó.’ ʻE anga-fēfē ke ke kamata ha akoʻi pehē?

Ko Hono Akoʻi Hoʻo Ngaahi Mafai Fakaefakakaukaú

 3. ʻE lava fēfē ke ke ngāueʻaki hoʻo ngaahi mafai fakaefakakaukaú ʻi he taimi ʻoku fiemaʻu ai ke fai ha filí?

³ Fakatokangaʻi ko hoʻo ngaahi mafai fakaefakakaukaú​—hoʻo malava ke ʻiloʻi ʻa e tonú mei he halá​—ʻoku akoʻi ia “fakafou ʻi hono ngāueʻakí.” ʻI he taimi kuo pau ke ke fai ai ha fili, ko hono mateʻi peé, ngāue ki he ongoʻí, pe ko e muimui pē ʻi he tokolahí ʻe tātātaha haʻane iku ki ha fili fakapotopoto. Ke fai ʻa e ngaahi fili ʻoku fakapotopotó, kuo pau ke ke ngāueʻaki hoʻo ngaahi mafai fakaefakakaukaú. Anga-fēfē? ʻUluakí, ʻaki hono fakatotoloʻi fakaʻāuliliki ʻa e tuʻunga ʻo e meʻa ko iá pea maʻu ʻa e ngaahi moʻoniʻi meʻa kotoa. ʻEke ha ngaahi fehuʻi kapau ʻoku fiemaʻu. Fakapapauʻi pe ko e hā hoʻo ngaahi meʻa ke fili mei aí. ʻOku pehē ʻe he Palovepi 13:16: “ʻIlonga ha fakapoto ʻoku ne ngaue atu, ko e poto ai pe.” Ko hono hokó, feinga ke fakapapauʻi pe ko e fē ʻa e ngaahi lao pe ngaahi tefitoʻi moʻoni ʻi he Tohitapú ʻoku kaunga ki he tuʻunga-leá. (Palovepi 3:5) Ko hono moʻoní, ke fai ʻa e meʻá ni, kuo pau ke ke maʻu ha ʻilo ʻo e Tohitapú. Ko e ʻuhinga ia ʻoku fakalototoʻaʻi mai ai kitautolu ʻe Paula ke tau maʻu ʻa e “meʻakai mālohí”​—ke ako ki he “māukupu, mo hono loloa, mo hono maʻolunga, mo hono loloto” ʻo e moʻoní.​—Efeso 3:18.

 4. Ko e hā ʻoku mātuʻaki fiemaʻu ai ha ʻiloʻi ʻo e ngaahi tefitoʻi moʻoni ʻa e ʻOtuá?

⁴ ʻOku mātuʻaki fiemaʻu ke fai ia, koeʻuhi ʻoku tau taʻehaohaoa, ʻo hehema ki he angahalá. (Senesi 8:21; Loma 5:12) “Ko e fungani ʻi he meʻa kākā ka ko e loto, pea ʻoku hilio hono kovi,” ko e lau ia ʻa e Selemaia 17:9. Ka ʻikai ha ngaahi tefitoʻi moʻoni fakaʻotua ke ne tataki kitautolu, ʻe lava ke tau kākaaʻi pē kitautolu ʻo fakakaukau ʻoku lelei pē ha meʻa ia ʻoku kovi​—koeʻuhi pē ʻoku mātuʻaki holi ki ai hotau kakanó. (Fakafehoanaki mo Aisea 5:20.) Naʻe tohi ʻe he tokotaha-tohi-sāmé: “ʻE fakamaʻa ʻe ha talavou hono hala ʻi he ha? Heʻene tauhi ia ke hoa mo hoʻo folofola. Ko e meʻa ʻi hoʻo ʻu enginaki ʻoku ou lava ke vavanga, ko ia ʻoku ou fehiʻa ki he hala kākā kotoa.”​—Sāme 119:​9, 104.

 5. (a) Ko e hā ʻoku muimui ai ʻa e kau talavou ʻe niʻihi ʻi he ngaahi hala ʻoku loí? (e) Naʻe anga-fēfē hono ʻai ʻe ha finemui ʻe taha ʻa e moʻoní ko ʻene meʻa tonu?

⁵ Ko e hā kuo hoko ai ʻa e kau talavou ʻe niʻihi ʻa ia naʻe ʻohake ʻi he ngaahi fāmili Kalisitiané ʻo muimui ʻi he ngaahi hala ʻoku loí? Naʻe hoko iá koeʻuhi ko e faʻahinga peheé naʻe ʻikai ʻaupito pē ke nau ‘sivi ʻo ʻilo pe ko e ha ʻa e finangalo ʻo e ʻOtuá, ʻa e meʻa ʻoku leleí, ʻa e meʻa te ne hōifua aí, ʻa e meʻa ʻoku haohaoá’? (Loma 12:2, fakaʻītali ʻamautolu.) Ko e niʻihi ʻoku nau maʻu nai ʻa e ngaahi fakatahá fakataha mo ʻenau ngaahi mātuʻá pea ʻoku malava ke nau lau maʻuloto ha niʻihi ʻo e ngaahi akonaki tefito ʻa e Tohitapú. Ka ʻi he taimi ʻoku kole atu ai ke ʻomai ha fakamoʻoni ʻo ʻenau tuí pe ke fakamatalaʻi ha niʻihi ʻo e ngaahi meʻa loloto ange ʻo e Folofola ʻa e ʻOtuá, ʻoku fakamoʻoniʻi ai ko ʻenau ʻiló ʻoku fakamamahi ʻa ʻene mamahá. ʻOku faingofua ke takihalaʻi ʻa e kau talavou peheé. (Efeso 4:14) Kapau ʻoku hoko ʻeni kiate koe, fēfē ke fakapapauʻi ke fai ha ngaahi liliu? ʻOku fakamanatu mai ʻe ha kiʻi tuofefine: “Naʻá ku fai ʻa e fekumi. Naʻá ku ʻeke hifo kiate au, ‘ʻOku ou ʻilo fēfē ko e lotu ʻeni ʻoku tonú? ʻOku ou ʻilo fēfē ʻoku ʻi ai ha ʻOtua ko hono huafá ko Sihova?’”a ʻI hono sivisiviʻi lelei ʻa e ngaahi Konga Tohitapú naʻá ne tuipau ai ko e ngaahi meʻa naʻá ne ako mei heʻene ongo mātuʻá naʻe moʻoni ia!​—Fakafehoanaki mo Ngāue 17:11.

 6. ʻE lava fēfē ke ke “ʻilo, pe ko e ha ʻa e meʻa ʻe hōifua ai ʻa e ʻEiki,” ko Sihová?

⁶ ʻI hono teuʻi ʻaki ha ʻilo fekauʻaki mo e ngaahi tefitoʻi moʻoni ʻa Sihová, ʻe faingofua ange ai hoʻo “ʻilo, pe ko e ha ʻa e meʻa ʻe hōifua ai ʻa e ʻEiki.” (Efeso 5:10) Kae fēfē kapau ʻoku ʻikai te ke fakapapauʻi ʻa e ʻalunga fakapotopoto ke ke fou ai ʻi ha tuʻunga pau? Lotu kia Sihova ʻo kole ha tataki. (Sāme 119:144) Feinga ke talanoa ki he ngaahi meʻá mo hoʻo ongo mātuʻá pe ko ha tokotaha Kalisitiane matuʻotuʻa. (Palovepi 15:22; 27:17) ʻOku toe malava ke maʻu ha tataki ʻaonga ʻi hono fai ha fekumi ʻi he Tohitapú pea ʻi he ngaahi tohi ʻa e Taua Leʻó. (Palovepi 2:​3-5) Ko e lahi ange ʻo hoʻo ngāueʻaki ʻa hoʻo ngaahi mafai fakaefakakaukaú, ko ʻenau hoko ia ʻo toe māsila angé.

Fakahāhā ʻa e ʻIloʻilo ʻi he Fakafiefiá

 7, 8. (a) ʻE lava fēfē ke ke ngāueʻaki hoʻo ngaahi mafai fakaefakakaukaú ʻi hono fakapapauʻi pe te ke ʻalu ki ha fakatahataha pe ʻikai? (e) Ko e hā ʻa e anga ʻo e vakai ʻa e Tohitapú ki he fakafiefiá?

⁷ Tau vakai he taimí ni ki he founga te ke ngāueʻaki nai ai hoʻo ngaahi mafai fakaefakakaukaú ʻi ha ngaahi tuʻunga pau. Ko e fakatātaá, fakakaukauloto atu, kuo fakaafeʻi koe ki ha fakatahataha. Kuó ke toe maʻu nai ha lauʻitohi tuʻuaki ʻosi pulusi ʻo e fakatahatahá. ʻOku tala atu kiate koe ʻe tokolahi ai ʻa e kau talavou Fakamoʻoní. Ka ʻe ʻi ai ha totongi ke feau ʻaki ʻa e ngaahi fakamolé. Te ke ʻalu ki ai?

⁸ Sai, ngāueʻaki hoʻo ngaahi mafai fakaefakakaukaú. ʻUluakí, maʻu ʻa e ngaahi moʻoniʻi meʻá. ʻE lahi fēfē ʻa e fakatahataha ko ʻení? Ko hai ʻe ʻi aí? Ko fē ʻa e taimi ʻe kamata aí? Ko fē ʻa e taimi ʻe ngata aí? Ko e hā ʻa e ngaahi meʻa ʻoku palani ki aí? ʻE anga-fēfē hono tokangaʻí? Ko hono hokó, fai ha fekumi, sio ki he “Ngaahi Fakatahataha Fakasōsialé,” mo e “Fakafiefiá” ʻi he Watch Tower Publications Index.b Ko e hā nai ʻe fakahaaʻi mai ʻe hoʻo fekumí? Ko e meʻa ʻe taha, ʻoku ʻikai ke fakahalaʻi ʻe Sihova ʻa e fakatahataha ke maʻu ha taimi fiefiá. Ko hono moʻoní, ʻoku pehē ʻe he Koheleti 8:15 ʻi he ʻalu fakataha mo e ngāue mālohí, “ʻoku ʻikai ha lelei ki he tangata ʻi he lalo laʻa ka ke te kai mo inu mo fakafiefia.” Ko ē, ko Sīsū Kalaisi tonu ē naʻá ne ʻalu ki ha ngaahi houa kai makehe pea pehē ki ha kātoanga mali ʻe taha. (Luke 5:​27-29; Sione 2:​1-10) ʻI hono tauhi ke mafamafatataú, ʻoku lava ke ʻaonga ai ʻa e feohi fakasōsialé.

9, 10. (a) Ko e hā nai ʻa e ngaahi fakatuʻutāmaki ʻe fakahoko mai ʻe ha ngaahi fakatahataha ʻe niʻihi? (e) Ko e hā ʻa e ngaahi fehuʻi te ke ʻeke nai kiate koe ki muʻa ke ke fili pe te ke ʻalu ki ha fakatahataha pe ʻikai?

⁹ Ka neongo ia, ko e ngaahi fakatahataha ʻoku kovi hono fokotuʻutuʻú ʻoku iku atu pē nai ki he kovi. ʻI he 1 Kolinito 10:​8, ʻoku tau lau ai ʻo fekauʻaki mo e ngaahi feohi taʻefakapotopoto naʻe taki atu ai ki he feʻauaki pea fakaʻauha ai ʻa e “toko ua mano ma tolu afe [ʻo e kau ʻIsileli taʻeangatonú] ʻi he ʻaho pe ʻe taha.” Ko e toe fakatokanga fakatupu fakakaukau fakamātoato ʻe taha ʻoku maʻu ia ʻi he Loma 13:13: “Tau fai ʻa e laka ʻo e ʻaho, ʻo anga māopo: ʻo ʻoua ʻe fai ʻaki ʻa e faʻa katoanga kai mo e faʻa konā, pe ko e fai feʻauaki mo e pauʻu fakalielia, pe ko e fetuʻusi mo e meheka.” (Fakafehoanaki mo 1 Pita 4:3.) Ko e moʻoni, ʻoku ʻikai lava ke fokotuʻu ha fika pau ia ki he tokolahi ʻe lava ke nau maʻu ha fakatahataha. Ka ʻoku fakahaaʻi ʻe he meʻa ʻoku hokosiá ko e tokolahi ange ʻa e fakatahatahá, ko e faingataʻa ange ia ke tokangaʻí. Ko e ngaahi fakatahataha ʻoku siʻisiʻi ange mo puleʻi-leleí ʻoku siʻisiʻi ke iku ia ki ha “ngaahi paati taʻemapuleʻi.”​—Kaletia 5:​21, Byington.

¹⁰ ʻE ʻikai ha veiveiua ʻe langaʻi ʻe hoʻo fekumí ha toe ngaahi fehuʻi, hangē ko e: ʻE ʻi ai ha kau Kalisitiane lalahi matuʻotuʻa ʻi he fakatahatahá? Ko hono moʻoní, ko hai ʻokú ne fakapaʻanga iá? Ko e taumuʻa ʻo e fakatahatahá ke pouaki ʻa e feohi leleí pe ko e ʻai ke maʻu ai ha tupu ʻa ha taha? ʻOku ʻi ai ha ngaahi fakangatangata ai fekauʻaki mo e tokotaha ʻe lava ke ne ʻi aí? Kapau ko e fakatahatahá ʻi he lolotonga ʻo e fakaʻosinga ʻo e uiké, ʻe ngata ia ʻi ha taimi lelei koeʻuhi kae lava ʻa e faʻahinga ʻe ʻi aí ʻo kau ʻi he ngāue fakafaifekau faka-Kalisitiané ʻi he ʻaho hono hokó? Kapau ʻe ʻi ai ha ngaahi fasi mo ha tauʻolunga, ʻe huʻufataha ia mo e ngaahi tuʻunga faka-Kalisitiané? (2 Kolinito 6:3) Ko hono ʻeke ʻa e ngaahi fehuʻi peheé ʻoku ʻikai nai ke faingofua. Ka ʻoku fakatokanga mai ʻa e Palovepi 22:3: “Ko e fakapotopoto ʻoku ne sio ki he kovi, ʻo ne toi: ka ko e hehemangofua ʻoku nau laka atu pe, ʻo moʻua ai.” ʻIo, ʻe lava ke ke fakaʻehiʻehi mei he ngaahi tuʻunga fakatuʻutāmakí ʻaki hono ngāueʻaki ʻa hoʻo ngaahi mafai fakaefakakaukaú.

ʻIloʻilo ʻi Hono Palani Hoʻo Akó

11. ʻE anga-fēfē hono ngāueʻaki ʻe he kau talavoú ʻenau ngaahi mafai fakaefakakaukaú ʻi he palani ki honau kahaʻú?

¹¹ ʻOku tala mai ʻe he Tohitapú ʻoku fakapotopoto ke palani ki he kahaʻú. (Palovepi 21:5) Kuó ke talanoa mo hoʻo ongo mātuʻá ki ho kahaʻú? Mahalo ʻokú ke palani ke ke hū ki he ngāue fakafaifekau taimi-kakató ʻi he tuʻunga ko ha tāimuʻa. Ko e moʻoni, ʻoku ʻikai toe ʻi ai ha fili ia ki ha ngāue tuʻumaʻu te ne lava ke ʻomai ha fiemālie lahi ange heni. Kapau ʻokú ke fakatupu ha ngaahi tōʻonga ako lelei pea fakatupulekina ha ngaahi pōtoʻi ʻi he ngāue fakafaifekaú, ʻokú ke teuteu ai ki he ngāue tuʻumaʻu fakafiefiá ni. Kuó ke fakakaukau ki he founga ke ke tokoniʻi ai koe tonu ʻi he ngāue fakafaifekaú? Kapau te ke fili ʻi he kahaʻú, ke ke tauhi hake ha fāmili, te ke malava ke tokanga ki he fatongia ʻoku tānaki mai ko iá? Ko hono fai ha ngaahi fili mafamafatatau mo pau fekauʻaki mo e ngaahi meʻa peheé ʻoku fiemaʻu ki ai ʻa hono ngāueʻaki ʻa e ngaahi mafai fakaefakakaukaú.

12. (a) Kuo anga-fēfē ʻa e fili ʻa e ngaahi fāmili ʻe niʻihi ke fengaʻunuʻaki ki he tuʻunga feliliuaki fakaʻikonōmiká? (e) ʻOku tuʻu fehangahangai ʻa hono maʻu ha ako fakalahí mo hono ʻai ʻa e tāimuʻá ko ha taumuʻá? Fakamatalaʻi.

¹² ʻI he ngaahi feituʻu ʻe niʻihi ʻoku kei malava pē ai ke te ako ʻi he ngāueʻangá ki ha faʻahinga pōtoʻi pe ngāue ʻaonga. ʻOku ʻi ai ha kau talavou ʻoku nau ako ki he pisinisi fakafāmilí pe maʻu ha akoʻi mei he ngaahi kaumeʻa lalahi ʻa ia ʻoku ʻi ai ʻenau ngaahi pisinisí. ʻOku fai ʻe he niʻihi ʻa e ngaahi koosi ʻi he ʻapiakó ʻa ia ʻe ʻaonga ki hono tauhi ʻaki ha moʻui ʻamui. Kapau ʻoku ʻikai ala maʻu ha ngaahi faingamālie pehē, ʻi he hili ha fakakaukau fakalelei, ʻe fokotuʻutuʻu nai ʻe he ongo mātuʻá ki heʻena fānaú ke maʻu ha ako fakalahi ʻi he hili ʻa e akoʻanga māʻolungá. Ko e palani ki muʻa ʻi he founga ko ʻení ke tokanga ki he ngaahi fatongia fakaekakai lalahí pea tautefito koeʻuhi ke malava ke kau ʻi he ngāue tāimuʻá ʻi ha vahaʻa taimi lōloá ʻoku ʻikai ke taʻefehoanaki ia mo hono fakamuʻomuʻa ʻo e Puleʻanga ʻo e ʻOtuá. (Mātiu 6:33) Pea ʻoku ʻikai ke taʻofi ʻe he ako fakalahí ia ʻa e tāimuʻá. Ko e fakatātaá, naʻe fiemaʻu ʻe ha kiʻi tokotaha Fakamoʻoni ke ne tāimuʻa ʻi ha taimi lōloa. ʻI he hili ʻene ʻosi mei he akoʻanga māʻolungá, naʻe hanga ʻe heʻene ongo mātuʻá​—ko ha ongo tāimuʻa tuʻumaʻu kinaua​—ʻo fokotuʻutuʻu ke ne fai ha ako fakalahi. Naʻá ne malava ke ne tāimuʻa lolotonga ʻene akó, pea ʻi he taimi ní kuó ne maʻu ha pōtoʻi ʻa ia ʻoku malava ai ke ne tokoniʻi ia tonu ʻi heʻene hokohoko atu ʻa e tāimuʻá.

13. ʻOku totonu ke fēfē hono hanga ʻe he ngaahi fāmilí ʻo fatu ʻa e fakamole ʻo e ako fakalahí?

¹³ ʻI he meʻa fekauʻaki mo e ako fakalahí, ʻoku maʻu ʻe he fāmili taki taha ʻa e totonu mo e fatongia ke ne fai pē ʻene fili ʻaʻana. ʻI he taimi ʻoku fili lelei ai ʻa e faʻahinga ako ko ʻení, ʻoku malava ke tokoni ia. Neongo, ʻoku lava ke hoko ia ko ha tauhele. Kapau ʻokú ke fakakaukau ki ha ako pehē, ko e hā hoʻo taumuʻá? ʻOku ʻuhingá ke teuteuʻi ai koe ke ke fua ʻa e ngaahi fatongia fakaekakai lalahí ʻi ha founga taau? Pe ko hoʻo “kumi koā maʻau ha ngaahi meʻa lalahi”? (Selemaia 45:5; 2 Tesalonaika 3:​10; 1 Timote 5:8; 6:9) Fēfē kapau ko e tuli ki ha ako fakalahi ʻoku mamaʻo ai mei ʻapi, mahalo pe ko e nofo ʻi ha ʻapiako? ʻE fakapotopoto ia ʻi he vakai atu ki he fakatokanga ʻa Paula ʻo pehē “ʻoku maumauʻi ʻa e ngaahi ʻulungaanga lelei ʻe he faʻa talanoa kovi”? (1 Kolinito 15:33; 2 Timote 2:22) Manatuʻi foki, “kuo fakanounou ʻa e kuonga.” (1 Kolinito 7:29) Ko e hā hono lahi ʻo e taimi te ke vaheʻi ki he ako peheé? Te ne keina ʻe ia ʻa e konga lahi ʻo ho ngaahi taʻu fakatalavoú? Kapau ʻoku pehē, ʻe fēfē hoʻo ngāueʻaki ʻa e fakalototoʻa ʻa e Tohitapú ke “manatu ki he ʻAfifio naʻe ngaohi koe lolotonga hoʻo talavou”? (Koheleti 12:2) ʻIkai ngata aí, ʻe hanga ʻe he ngaahi koosi te ke faí ʻo fakaʻatā atu ha taimi ki he ngaahi ngāue faka-Kalisitiane mātuʻaki mahuʻinga hangē ko e maʻu ʻo e fakatahá, ngāue fakamalangá, mo e ako fakafoʻituituí? (Mātiu 24:14; Hepelu 10:​24, 25) Kapau ʻoku māsila hoʻo ngaahi mafai fakaefakakaukaú, ʻe ʻikai ʻaupito mole meiate koe hoʻo ngaahi taumuʻa fakalaumālié ʻi hoʻo palani mo hoʻo ongo mātuʻá ki ho kahaʻú.

Tauhi ʻa e Faisoó ke Taau

14. (a) Ko e hā ʻa e ngaahi tefitoʻi moʻoni ʻoku totonu ke ne tataki ʻa e ngaahi hoa faisoó ʻi heʻenau fefakahāhāʻaki ʻa e ʻofa manakó? (e) Kuo anga-fēfē hono fakahāhā ʻe ha ngaahi hoa faisō ʻe niʻihi ha fakafuofua kovi ʻi he meʻá ni?

¹⁴ Ko e toe tafaʻaki ʻe taha ʻoku fiemaʻu ki ai hoʻo ngaahi mafai fakaefakakaukaú ko e faisoó. ʻOku fakaenatula pē ke loto ke fakahāhā ha ʻofa manako ki ha taha ʻokú ke tokanga ki ai. Ko e ongo meʻa anga-maʻa ʻi he Hiva ʻo e Hivá ʻoku hā mahino naʻá na fefakafetongiʻaki ha ngaahi fakahāhā ʻe niʻihi ʻo e ʻofa manakó ki muʻa peá na malí. (Hiva o e Hiva 1:2; 2:6; 8:5) ʻI he ʻahó ni, ʻoku ongoʻi meimei tatau nai ʻa e ngaahi hoa faisoó ko e fetakinimá, ʻumá, mo e fāʻofuá ʻoku totonu pē ia, tautefito ʻi he taimi ʻoku hā ngali ofi ai ke fai ʻa e malí. Kae manatuʻi: “Ko ia ʻoku falala ki hono ʻatamai oʻona ko ia ʻa e vale.” (Palovepi 28:26) Ko hono pangó, ʻoku ʻi ai ha ngaahi hoa kuo nau fakahāhā ha fakafuofua kovi ʻaki hono ʻai kinautolu ki he ngaahi tuʻunga fakangaloku. Kuo hoko ʻa hono fakahāhā ia ʻo e ʻofa manakó ʻo fuʻu lahi mo taʻemapuleʻi; kuo iku ai ki he ngaahi tōʻonga taʻemaʻa pea aʻu ʻo tupulaki ai ki he fehokotaki fakasino taʻetaau.

15, 16. Ko e hā ʻa e ngaahi tokateu ʻuhinga lelei ʻe lava ke fai ʻe he ngaahi hoá ke fakapapauʻi ko ʻenau faisoó ʻe kei taau ai pē?

¹⁵ Kapau ʻokú ke faialea, ʻoku fakapotopoto ke ke fakaʻehiʻehi mei haʻo tokotaha pē mo ho hoa ʻoku ʻamanekiná ʻi ha ngaahi tuʻunga taʻefeʻunga. Ko ia, ʻoku lelei taha nai ke fiefia ʻi hoʻomo feohí ʻi ha haʻohaʻonga ʻo ha niʻihi kehe pe ʻi ha ngaahi feituʻu kakai. ʻOku fokotuʻutuʻu ʻe he ngaahi hoa ʻe niʻihi ke ʻi ai ha fakafeʻao. Pehē foki, fakakaukau ange ki he ngaahi lea ʻo e Hosea 4:11: “Ko e . . . inu uaine, kaeʻumaʻa ʻa e uaine foʻou, ʻoku mole ai ʻa e loto.” ʻOku malava ʻe he ʻolokaholó ke ne maumauʻi ʻa e fakafuofua leleí pea taki atu ai ha ongo meʻa ke na fai ha meʻa ʻi ha founga te na toki fakaʻiseʻisa ai ʻamui.

¹⁶ ʻOku pehē ʻe he Palovepi 13:10: “Ko e fielahi ko hono fua ko e kē pe: ka ko e fua ʻoku maʻu ʻe he kau tali faleʻi ko e poto.” ʻIo, “tali faleʻi” mo fetalanoaʻaki ki he anga hoʻomo angafaí. Fokotuʻu ha ngaahi fakangatangata ki hono fakahāhā ʻo e ʻofa manakó, tauʻaki fetokaʻiʻaki ʻi he ngaahi ongoʻí mo e konisēnisí. (1 Kolinito 13:5; 1 Tesalonaika 4:​3-7; 1 Pita 3:​16) ʻE faingataʻa nai ʻi he kamatá ke talanoa fekauʻaki mo e tuʻunga-lea fakalotomāfana ko ʻení, ka te ne lava ke taʻofi ha ngaahi palopalema mamafa mei haʻane tupulekina ʻamui.

Akoʻi ‘mei he Kei Siʻí’

17. Naʻe anga-fēfē hono ʻai ʻe Tēvita ʻa Sihova ‘ko hono falalaʻanga talu mei heʻene kei siʻí,’ pea ko e hā ʻa e lēsoni ʻoku ʻi he meʻá ni maʻá e kau talavou ʻi he ʻaho ní?

¹⁷ ʻE fiemaʻu ki he fakaʻehiʻehi mei he ngaahi tauhele ʻa Sētané ʻa e tokanga maʻu pē ʻi hoʻo tafaʻakí​—pea ʻi he taimi ʻe niʻihi, ko e loto-toʻa lahi. He ʻi he taimi ʻe niʻihi, te ke ʻilo nai ai ʻoku ʻikai te ke loto-tatau, ʻo ʻikai mo ho toʻumeʻá pē, ka mo e māmaní fakalūkufua. Naʻe lotu ʻa e tokotaha-tohi-sāme ko Tēvitá: “Ko koe, Atonai Sihova, ʻoku tuʻu ai ʻeku ʻamanaki: ko hoku falalaʻanga talu ʻeku kei siʻi. ʻE ʻOtua, kuo ke akoʻi au talu ʻeku siʻi; pea kuo u fakaha hoʻo ngaahi ngaue fakaofo ʻo aʻu ki he taimi ni.” (Sāme 71:​5, 17)c ʻOku ʻiloa ʻa Tēvita ʻi heʻene loto-toʻá. Ka naʻá ne fakatupulekina ia ʻanefē? ʻI he hoko ko ha talavoú! Naʻa mo e ki muʻa ʻi heʻene fetaulaki ʻiloa mo Kōlaiaté, naʻe ʻosi fakahāhā ʻe Tēvita ia ha loto-toʻa anga-kehe ʻi hono maluʻi ʻa e ngaahi tākanga ʻa ʻene tamaí​—ʻi hono tāmateʻi fakatouʻosi ha laione mo ha pea. (1 Samiuela 17:​34-37) Kae kehe, naʻe tuku ʻe Tēvita ʻa e lāngilangí kakato kia Sihova ki ha loto-toʻa pē naʻá ne fakahāhaaʻi, ʻo ui ia “ko hoku falalaʻanga talu ʻeku kei siʻi.” Ko e malava ʻa Tēvita ke falala kia Sihová naʻá ne ʻai ai ia ke ne fehangahangai mo ha faʻahinga ʻahiʻahi pē naʻá ne fetaulaki mo ia. Te ke kau mo koe foki ʻi hono ʻiloʻi kapau te ke falala kia Sihova, te ne ʻoatu kiate koe ʻa e loto-toʻa mo e mālohi ke ke ‘ikuna ʻa mamani.’​—1 Sione 5:4.

18. Ko e hā ʻa e enginaki ʻoku ʻomai ki he kau talavou anga-fakaʻotua ʻi he ʻaho ní?

¹⁸ ʻOku laui afe ʻa e kau talavou hangē ko koé kuo nau fai ha tuʻu loto-toʻa pea ʻi he taimí ni ʻoku nau ngāue ko e kau malanga ʻosi papitaiso ʻo e ongoongo leleí. ʻOku mau fakamālō ki he ʻOtuá ki he tui mo e loto-toʻa ʻa kimoutolu kau talavoú! Hanganaki fakapapauʻi ke hao mei he fakameleʻi ʻa e māmaní. (2 Pita 1:4) Hanganaki ngāueʻaki hoʻomou ngaahi mafai fakaefakakaukau kuo akoʻi mei he Tohitapú. Ko hono fai iá ʻe maluʻi ai kimoutolu mei he tuʻutāmakí he taimí ni pea faai atu pē ʻo fakapapauʻi ai hoʻomou fakamoʻuí. Ko e moʻoni, hangē ko ia ʻe fakahaaʻi ʻe heʻetau kupu fakaʻosí, te mou ʻai ai hoʻomou moʻuí ke lavameʻa.

[Fakamatala ʻi lalo]

Ngaahi Fehuʻi Fakamanatu

◻ ʻOku anga-fēfē ʻa hono akoʻi ʻe ha talavou ʻa ʻene ngaahi mafai fakaefakakaukaú?

◻ ʻE lava fēfē ʻe ha talavou ke ne ngāueʻaki ʻene ngaahi mafai fakaefakakaukaú ʻi he taimi ke maʻu ai ha ngaahi fakatahataha faka-Kalisitiane?

◻ Ko e hā ʻa e ngaahi moʻoniʻi meʻa ke fakakaukau nai ki ai ʻi heʻete palani ki ha akó?

◻ ʻE lava fēfē ha ongo meʻa ʻokú na faisō ke na fakaʻehiʻehi mei he tauhele ʻo e fehokotaki fakasino taʻetāú?

[Fakatātā ʻi he peesi 15]

Ko e ako ke fai ha fekumí ʻe tokoni ia kiate koe ke akoʻi ai hoʻo ngaahi mafai fakaefakakaukaú

[Fakatātā ʻi he peesi 16]

ʻOku faingofua ange ke tokangaʻi ʻa e ngaahi fakatahataha iiki angé pea ʻoku siʻisiʻi ʻene iku ki he ngaahi paati taʻemapuleʻí

[Fakatātā ʻi he peesi 16]

ʻOku totonu ke tokoniʻi ʻe he ngaahi mātuʻá ʻenau fānaú ʻi he palani ki heʻenau akó

[Fakatātā ʻi he peesi 17]

Ko e faialea ʻi ha kulupú ko ha maluʻanga