Ko e Hā ʻOku Siʻi Pehē Ai ʻa e Taimí?

KO E taimí. Te tau ʻiloʻi nai ʻoku faingataʻa ke fakaʻuhingaʻi tonu matematē ʻa e foʻi leá, ka ʻoku lava moʻoni ke tau ʻilo ʻoku ʻikai ʻaupito hā ʻoku tau maʻu ha taimi feʻunga. ʻOku tau toe ʻiloʻi ʻoku fononga vave ia. Ko hono moʻoní, ʻoku tau faʻa māpuhoi, “He vave moʻoni ko e taimí.”

Ka neongo ia, ʻoku hā mahino ko e faʻu maau Pilitānia ko Austin Dobson naʻe tonu ange ia ʻi heʻene fakamatala ʻi he 1877: “ʻOkú ke pehē koā, ʻoku ʻalu ʻa e taimí? ʻOi ʻikai! ʻOiauē, ʻoku nofo pē ʻa e Taimí, ʻoku tau ʻalu kitautolu.” Talu mei heʻene maté ʻi he 1921, kuo mole atu ʻa Dobson ʻi he meimei taʻu ʻe 80; kae hokohoko atu pē ʻa e taimí ia.

Lahi ʻa e Taimí

Fekauʻaki mo e Tokotaha-Fakatupu ʻo e faʻahinga ʻo e tangatá, ʻoku tala mai ʻe he Tohitapú kiate kitautolu: “Teʻeki fakatupu ʻa e ngaahi moʻunga, pe fanauʻi ʻa mamani mo e fonua; ʻio talu mei muʻa ʻo lauikuonga ko e ʻOtua pe ʻa e ʻAfiona.” (Sāme 90:2) Pe hangē ko hono fakalea ia ʻe he The New Jerusalem Bible, “mei ʻitāniti ki ʻitāniti ko koe pē ʻa e ʻOtuá.” Ko ia ko e taimí ʻe tolonga ia ʻo fuoloa tatau mo e tolonga ʻa e ʻOtuá tonu​—ʻo taʻengata!

ʻI he mātuʻaki faikehekehe mo e ʻOtuá, ʻa ia ʻokú ne tuku mai ha taimi taʻengatá, ʻoku tau lau ʻo kau ki he tangatá: “He kuo pale honau ngaahi ʻaho kotoa pe ʻi ho houhau: ʻoku mau fakaʻosi homau ngaahi taʻu ʻo hange ha talanoa ʻoku lau. Ko e ngaahi ʻaho ʻo homau taʻu ko e taʻu ʻe fitungofulu; pea ka lahi hoto ngu, ʻe aʻu nai ki he valungofulu: pea ko hoto vikiʻanga ko e ongosia mo e muna, he ʻoku tuʻusi vave pea tau puna.”​—Sāme 90:​9, 10.

Ko e hā ʻoku mātuʻaki nounou ai he ʻahó ni ʻa e moʻuí, koeʻuhi he ʻoku akoʻi mahino ʻe he Tohitapú ko e taumuʻa ia ʻa e ʻOtuá ki he tangatá ke moʻui taʻengata? (Senesi 1:​27, 28; Sāme 37:29) ʻI he ʻikai ha vilo taʻefakangatangata ʻo e moʻuí hangē ko ia naʻe fakataumuʻa ʻe he ʻOtuá, ko e hā ʻoku maʻu ai ʻe he tangatá ʻi hono fakaʻavalisí, ʻi he malumalu ʻo e tuʻunga lelei tahá, ʻo siʻi hifo pē ʻi he ʻaho ʻe 30,000? Ko e hā ʻoku siʻi pehē ai ʻa e taimi ʻoku maʻu ʻe he tangatá? Ko hai pea ko e hā ʻoku tupu mei ai ʻa e tuʻunga fakamamahi ko ení? ʻOku tokonaki mai ʻe he Tohitapú ʻa e ngaahi tali maʻalaʻala mo fakafiemālie.a

Faai ki he Siʻi Ange ʻa e Taimí

ʻE fakapapauʻi ʻe he kau taʻumotuʻá ko e laka ʻa e moʻuí ʻi he ngaahi hongofuluʻi taʻu ki mui ní kuo vave ʻaupito. Ko ha ʻētita faiongoongo ʻe taha, ko Dr. Sybille Fritsch, naʻá ne fakahaaʻi ʻo pehē ʻi he lolotonga ʻo e taʻu ʻe 200 kuo maliu atú, kuo tō ai ʻa e uike ngāué mei he houa ʻe 80 ki he 38, “ka kuo ʻikai fakangata ʻe he meʻá ni ʻa ʻetau lāungá.” Naʻá ne fakamahinoʻi: “ʻOku ʻikai ha taimi; ʻoku mahuʻinga e taimí; ko e feifeinga vale ki he taimí ʻoku hangē ia ko e feifeinga vale ke mānavá; ko ha moʻui puputuʻu.”

Kuo fakaava ʻe he ngaahi ʻilo foʻoú ʻa e ngaahi faingamālie mo e ngaahi lavameʻa ne ʻikai ʻaupito fakakaukau mai ki ai ʻa e ngaahi toʻutangata ki muʻa angé. Ka ko e lahi ange ʻa e malava ke kau ʻi ha ngaahi ngāue lahí, ko e lahi ange ia ʻa e ongoʻi feifeitamaki ʻi hono maʻu ʻa e taimi siʻi ʻaupito ke fai ai iá. ʻI he ngaahi ʻahó ni, ʻi he ngaahi konga lahi ʻo e māmaní, ʻoku moʻui ʻa e kakaí ʻo fakatatau ki he taimi-tēpilé, ʻo fakavave mei he meʻa kuo pau ke fai ki he meʻa hono hokó. Kuo pau ke mavahe ʻa tangataʻeikí ki he ngāué ʻi he 7:00 pongipongi, kuo pau ke ʻave ʻe he fineʻeikí ʻa e fānaú ki he akó ʻi he 8:​30 pongipongi, ʻoku ʻi ai ha ʻapoinimeni fakatoketā ʻa e kui-tangatá ʻi he 9:40 pongipongi, pea ko kitautolu kotoa kuo pau ke tau maau ki ha fakataha mahuʻinga ʻi he 7:30 efiafi. ʻI he fakavave ʻi he tuli mei he ngāue kuo pau ke fai ki he toe meʻa ʻe taha, ʻoku meimei ʻikai ha taimi ia ʻe toe ki ha mālōlō. Pea ʻoku tau lāunga fekauʻaki mo e founga-tuʻumaʻu fakaʻahó, ʻo fekauʻaki mo e fetulituliʻí.

ʻOku ʻIkai ko Kitautolu Pē ʻOku Siʻi Hotau Taimí

Ko e Fili ʻo e ʻOtuá, ʻa Sētane ko e Tēvoló, ʻa e tokotaha ʻa ia ko ʻene faʻufaʻú naʻe taki atu ki he fuonounou ʻa e vilo ʻo e moʻui ʻa e faʻahinga ʻo e tangatá, kuó ne hoko he taimí ni ko ha tokotaha maʻukovia ʻi heʻene fulikivanu pē ʻaʻaná. (Fakafehoanaki mo Kaletia 6:​7, 8.) ʻI he lau ʻo fekauʻaki mo hono fanauʻi ʻo e Puleʻanga faka-Mīsaiá ʻi hēvaní, ʻoku ʻomai kiate kitautolu ʻe he Fakahā 12:12 ʻa e ʻuhinga ki he ʻamanakí ʻi heʻene pehē: “Ko ia mou fiefia ʻa e ngaahi langi, mo kimoutolu ʻoku nofo tapanekale ʻi ai. Ka ʻoiaue ʻa e fonua mo e tahi! He kuo hoko hifo ʻa e Tevolo kiate kimoua, ʻoku ne ʻita lahi, ko ʻene ʻilo, ʻoku toesiʻi pe hono taimi.”​—Fakaʻītali ʻamautolu.

Fakatatau ki ha fakahokohoko Tohitapu alafalalaʻanga pea mo e fakahoko ʻo e kikite ʻa e Tohitapú, ʻoku tau moʻui he taimí ni he ngataʻanga ʻo e ‘toe siʻi pe ʻa e taimí.’ He fiefia ē ke ʻilo ko e taimi ʻo Sētané ʻi hono lahí ʻoku vavé ni ʻosi fakakātoa ia! ʻI hono toʻo atu pē iá, ʻe toe fakafoki ʻa e faʻahinga talangofua ʻo e tangatá ki he haohaoá, pea ʻe lava ke nau maʻu ʻa e moʻui taʻengata ko ia naʻe fakataumuʻa ʻe Sihova kiate kinautolu ʻi he kamataʻangá. (Fakahā 21:​1-4) ʻE ʻikai leva ke hoko ʻa e ʻikai ha taimí ko ha palopalema.

ʻE lava ke ke fakaʻuta atu ki he ʻuhinga ʻo e maʻu ʻo e moʻui tuputupuʻá​—ke moʻui taʻengata? ʻE ʻikai ʻaupito ke toe fakaʻitaʻi koe ʻe he ngaahi meʻa ʻa ia kuo pau ke ke tuku ʻo ʻikai ke faí. Kapau ʻokú ke fiemaʻu ha taimi lahi ange, ʻoku ʻi ai ʻa e ʻapongipongí, pe ko e uike hoko maí, pe taʻu hoko maí​—ko hono moʻoní, ko ha fuʻu ʻitāniti ʻoku mafola mai ʻi muʻa ʻiate koe!

Ko Hono Ngāue Fakapotopotoʻaki ʻa e Taimi ʻOku Tau Maʻu he Taimi Ní

ʻI hono ʻiloʻi ko hono taimi ke tākiekina ʻa e tangatá ʻoku fakangatangatá, ʻoku feinga ʻa Sētane ke tauhi ke mātuʻaki femoʻuekina ʻa e kakaí ke ʻikai te nau maʻu ha taimi ke fanongo ai ki he ongoongo lelei ʻo e Puleʻanga ʻo e ʻOtuá kuo fokotuʻú. Ko ia ai, ʻoku lelei ke tau tokanga ki he akonaki fakaʻotuá: “Mou tokanga ki hoʻomou laka fakatuʻutuʻuni, pe ʻoku fefe hono anga, ʻo ʻoua te mou ngali taʻepoto ai, kae ngali poto: mo mou lamalama ke ngaueʻaki ʻa e faingamalie, koeʻuhi ʻoku kovi ʻa e ngaahi ʻaho. Ko ia ʻoua te mou hoko ko e kau taʻeloto, ka ko e kakai ʻoku mahino ki ai ʻa e finangalo ʻo e ʻEiki.”​—Efeso 5:​15-​17.

He mātuʻaki mahuʻinga ē ke tau ngāue fakapotopotoʻaki hotau taimí ki he ngaahi meʻa ʻoku mahuʻinga lahi tahá ʻo ʻikai fakamoleki noaʻia ia ʻi he ngaahi ngāue taʻeʻaonga ʻoku ʻikai te ne ʻomai ha ʻaonga tuʻuloa! ʻOku totonu ke tau fakatupulekina ʻa e fakakaukau tatau ko ia naʻe maʻu ʻe Mōsesé ʻi heʻene kole kia Sihova ʻi he ngaahi lea fakamātoato ko ení: “Ako mai ke mau fakafuofua pehe homau ngaahi ʻaho, ka mau utu mai ha loto poto.”​—Sāme 90:12.

Ko e moʻoni, ʻi he māmani he ʻaho ní ʻoku femoʻuekina ʻa e tokotaha kotoa. Ka neongo ia, ʻoku fakaʻaiʻai mālohi koe ʻe he Kau Fakamoʻoni ʻa Sihová ke fakamoleki ha niʻihi ʻo ho taimi mahuʻingá ke ako ai ʻo fekauʻaki mo e ngaahi fiemaʻu ʻa e ʻOtuá ki hono maʻu ʻa e moʻui taʻengatá ʻi he malumalu ʻo e pule ʻa hono Puleʻangá. Ko ha houa ʻe taha ʻoku fakamoleki ʻi he uiké ʻi hono ako hokohoko ʻa e Tohitapú, ‘ʻo mahino ʻa e finangalo ʻo Sihová,’ te ne ʻai nai koe ke ke lava ʻo hokosia fakafoʻituitui ʻa hono fakahoko ʻo e ngaahi leá ni: “Hiki mei he kovi ʻo fai lelei; pea ʻe taʻengata hoʻo nofo ai. Ko haʻa fai totonu te nau maʻu ʻa e fonua, pea te nau nofo ai ʻo tuputupuʻa.”​—Sāme 37:​27, 29.

[Fakamatala ʻi lalo]