Faitoʻo ʻa e Ngaahi Kafo ʻi he Taú

NAʻE kau ʻa ʻĒpalahame ʻi ha kulupu tau toitoi ʻo feʻunga mo e taʻu ʻe 20.a Ka kuo ʻikai toe kau he taú pea ʻe ʻikai ʻaupito te ne toe ʻalu he taú. Ko hono moʻoní, ko e niʻihi ʻo hono ngaahi fili ki muʻá kuo nau hoko ko hono ngaahi kaungāmeʻa ofi tahá ia he taimí ni. Ko e hā naʻá ne ʻai ia ke liliú? Naʻe ʻai ia ʻe he Tohitapú. Naʻá ne ʻoange kia ʻĒpalahame ʻa e ʻamanaki mo e vavanga, ʻo tokoniʻi ai ia ke ne vakai ki he ngaahi meʻa ʻa e tangatá ʻi he tuʻunga ʻo e vakai ki ai ʻa e ʻOtuá. Naʻe toʻo ʻe he Tohitapú ʻene holi ke faitaú, pea naʻe kamata ke faitoʻo ai ʻene faingataʻaʻiá, mamahí, tāufehiʻá, mo ʻene loto-ʻitá. Naʻá ne ʻilo ʻoku ʻi he Tohitapú ha faitoʻo ʻaonga ki he lotó.

ʻOku malava fēfē ke tokoni ʻa e Tohitapú ki ha taha ke faitoʻo ʻa ʻene ngaahi kafo fakaeongó? ʻOku ʻikai malava ke ne toe liliu ʻa e meʻa naʻe hoko kia ʻĒpalahamé. Ka, ko hono lau mo fakalaulauloto ʻa e Folofola ʻa e ʻOtuá naʻá ne ʻomai ai ʻene fakakaukaú ke fehoanaki mo e fakakaukau ʻa e Tokotaha-Fakatupú. Kuó ne maʻu he taimí ni ha ʻamanaki ki he kahaʻú, pea kuó ne maʻu ha ngaahi meʻa foʻou ke fakamuʻomuʻa. Ko e ngaahi meʻa ʻoku mahuʻinga ki he ʻOtuá kuo hoko ia ʻo mahuʻinga kiate ia. ʻI he kamata pē ke hoko ʻa e meʻá ni, naʻe kamata leva ke moʻui ʻa e kafo ʻi hono lotó. Ko e founga ia naʻe tokoniʻi ai ʻa ʻĒpalahame ke liliú.

Tūʻulu Atu ki he Tau Fakalotofonuá

Naʻe fāʻeleʻi ʻa ʻĒpalahame ʻi he 1930 tupú ʻi ʻAfilika. Hili ʻa e tau ua ʻa māmaní, naʻe puleʻi ai hono fonuá ʻe ha fonua kaungāʻapi mālohi, ka ko e tokolahi ʻo e kakai totonu he fonua ʻo ʻĒpalahamé naʻa nau fiemaʻu ha fakatauʻatāina. ʻI he 1961, naʻe kau ai ʻa ʻĒpalahame ʻi ha ngaʻunu ki he tauʻatāiná ʻa ia naʻe fakahoko ai ha tau toitoi ʻi he fakafepaki ki he fonua kaungāʻapi mālohí.

“Ko kinautolú ko homau ngaahi fili. Naʻa nau palani ke tāmateʻi kimautolu, ko ia naʻa mau fononga atu leva ke tāmateʻi kinautolu,” ko e fakamatala ia ʻa ʻĒpalahamé.

Ko e moʻui ʻa ʻĒpalahamé naʻe faʻa ʻi ha tuʻunga fakatuʻutāmaki, ko ia ʻi he 1982, hili ha feinga ikuna fakakautau ʻi he taʻu ʻe 20, naʻá ne hola ki ʻIulope. ʻI he taimi ko ʻení naʻe ʻi hono taʻu fāngofulu tupu lahí ai, pea naʻá ne maʻu ai ʻa e taimi feʻunga ke fakakaukau ai ki heʻene ʻalunga moʻuí. Ko e hā kuo hoko ki heʻene ngaahi taumuʻá? Ko e hā naʻe tuku tauhi mai ʻi he kahaʻú? Naʻe fetaulaki ʻa ʻĒpalahame mo ha niʻihi ʻo e Kau Fakamoʻoni ʻa Sihová peá ne kamata ke maʻu ʻenau ngaahi fakatahá. Naʻá ne manatuʻi ʻi ha ngaahi taʻu ki muʻa ʻi ʻAfilika, naʻá ne lau ai ha tuleki naʻe ʻoange kiate ia ʻe ha tokotaha Fakamoʻoni. Naʻe fakamatala ʻa e tulekí ki ha palataisi ʻoku tuʻunuku mai ki he foʻi māmaní pea mo ha founga-pule fakahēvani te ne puleʻi ʻa e faʻahinga ʻo e tangatá. ʻE malava ke hoko moʻoni ʻa e meʻá ni?

ʻOku pehē ʻe ʻĒpalahame: “Mei he Tohitapú, naʻá ku ako ai ko e ngaahi taʻu kotoa naʻá ku fakamoleki ʻi he taú naʻe mole noa. Ko e founga-pule pē taha te ne fakamaau totonu ʻa e tokotaha kotoa pē ko e Puleʻanga ʻo e ʻOtuá.”

Hili ha taimi nounou mei he papitaiso ʻa ʻĒpalahame ʻo hoko ko ha Fakamoʻoni ʻa Sihová, naʻe hola mai ha tangata ko Lōpeti mei ʻAfilika ki he kolo ʻIulope ʻa ē naʻe nofo ai ʻa ʻĒpalahamé. Ko Lōpeti mo ʻĒpalahamé naʻá na faitau ʻi he tau tatau pē ka naʻá na fehangahangai ʻi he ongo faʻahí. Naʻe faʻa fifili ʻa Lōpeti ki he taumuʻa moʻoni ʻo e moʻuí. Ko ha tangata lotu ia, pea ʻi hono lau ha ngaahi konga ʻo e Tohitapú, naʻá ne ʻilo ai ko e huafa ʻo e ʻOtuá ko Sihova. ʻI hono fakahaaʻi ange ʻe he ongo Fakamoʻoni mei he fakatahaʻanga ʻa ʻĒpalahamé kia Lōpeti ke na tokoniʻi ia ke ne mahinoʻi lelei ange ai ʻa e Tohitapú, naʻá ne loto-lelei ki ai.

ʻOku fakamatala ʻe Lōpeti: “Mei he ʻuluaki taimí pē, naʻe maongo kiate au ʻa e founga ʻo hono ngāueʻaki ʻe he ongo Fakamoʻoní ʻa e hingoa ʻo Sihova mo Sīsuú, ʻo fakahaaʻi ko e ongo meʻa mavahevahe kinauá. Naʻe fehoanaki ia mo e meʻa naʻá ku ʻosi ʻilo mei he Tohitapú. Naʻe teuteu lelei foki ʻa e ongo Fakamoʻoní peá na anga-ʻofa ki he niʻihi kehé, neongo ai pē pe ko e hā ʻa e fonuá. Ko e ngaahi meʻa peheé naʻe maongo loloto kiate au.”

Hoko ʻo Kaungāmeʻa ʻa e Ongo Filí

Ko Lōpeti mo ʻĒpalahamé, ʻa e ongo fili ki muʻá, kuó na kaungāmeʻa vāofi he taimí ni. ʻOkú na ngāue ko e ongo ʻevangeliō taimi kakato ʻi he fakatahaʻanga tatau pē ʻo e Kau Fakamoʻoni ʻa Sihová. “Lolotonga ʻa e taú, naʻá ku faʻa fifili pe naʻe anga-fēfē ki he kakai mei he ngaahi fonua kaungāʻapí—ko e tokolahi ʻo kinautolu naʻa nau kau ki he lotu tatau—ke nau fetāufehiʻaʻaki,” ko e fakamatala ia ʻa ʻĒpalahamé. “Ko Lōpeti mo aú naʻá ma kau ki he siasi tatau pē, ka naʻá ma fetauʻaki. ʻI he taimí ni ʻokú ma hoko fakatouʻosi ko e ongo Fakamoʻoni ʻa Sihova, pea kuo fakafāʻūtahaʻi kimaua ʻe heʻema tuí.”

“Ko hono kehé ia,” ʻoku tānaki mai ʻe Lōpeti. “ʻOkú ma kau he taimí ni ki ha tui ʻokú ne ʻai kimaua ke ma hoko ko e konga ʻo ha fetokouaʻaki moʻoni. ʻE ʻikai ʻaupito te ma toe kau ʻi he taú.” Kuo ʻi ai ha tākiekina mālohi ʻa e Tohitapú ʻi he loto ʻo e ongo fili ko eni ki muʻá. Ko e tāufehiʻá mo e loto-ʻitá kuo faifai ʻo fetongi ia ʻe he falalá mo e kaumeʻá.

ʻI he taimi tatau naʻe ʻi he taú ai ʻa ʻĒpalahame mo Lōpetí, naʻe tuʻu fehangahangai ai ha ongo tangata kehe ʻe toko ua ʻi ha toe fepaki ʻe taha ʻa ha ongo fonua kaungāʻapi. Naʻe vave ʻa e hoko ʻa e Tohitapú ʻo hangē ko ha faitoʻo mātuʻaki ʻaonga ke ne faitoʻo mo hona lotó foki. Anga-fēfē?

Tāmateʻi—Pea Toki Mate Faka-Māʻata

Ko Kāpelieli, ʻa ia naʻe ʻohake ʻi ha fāmili lotu, naʻe akoʻi ia ko hono fonua tupuʻangá naʻe fekuki mo ha tau māʻoniʻoni. Ko ia ai, ʻi hono taʻu 19, naʻá ne pole ki he ngāue fakakautaú peá ne kole ai ke ʻave ia ki he malaʻe taú. Feʻunga mo e māhina ʻe 13 naʻá ne ʻi he ngaahi tau kakaha tahá, ʻi he taimi ʻe niʻihi naʻá ne mamaʻo ʻaki ha kilomita pē ʻe taha mo e konga mei he filí. “ʻOku ou manatuʻi lelei ʻa e taimi ʻe taha,” ko ʻene leá ia. “Naʻe tala mai ʻe homau komanitaá ʻe ʻohofi kimautolu ʻe he filí ʻi he pō ko iá. Naʻa mau mātuʻaki tailiili ʻo mau fana ai ʻemau tangikē taú ʻi he poó kotoa.” Naʻá ne lau ʻa e kakai mei he fonua kaungāʻapí ko hono ngaahi fili, ʻa ia ʻoku tuha mo e maté. “Ko ʻeku fakakaukaú ke tāmateʻi ʻa e tokolahi taha ʻe ala lavá. Pea, hangē ko e tokolahi ʻo hoku ngaahi kaumeʻá, naʻá ku loto ke u mate fakamāʻata.”

Kae kehe, naʻe hoko ʻo toʻo ʻi ha taimi ʻa e fakakaukau hala ʻa Kāpelielí. Naʻá ne hola ki he moʻungá, ʻo ne moulu atu ʻo kolosi ʻi he kauʻā fonuá ki ha fonua tuʻu-ʻatā, pea fononga mei ai ki ʻIulope. Naʻá ne toutou fehuʻi ki he ʻOtuá pe ko e hā ʻoku fuʻu faingataʻa ai ʻa e moʻuí, pe ko e ngaahi palopalemá ko ha tautea ia mei he ʻOtuá. Naʻe hoko ʻo ne fetuʻutaki mo e Kau Fakamoʻoni ʻa Sihová, ʻa ia naʻa nau fakahaaʻi ange mei he Tohitapú ʻa e ʻuhinga ʻoku fonu palopalema pehē ai ʻa e moʻuí he ʻaho ní.—Mātiu 24:​3-14; 2 Timote 3:​1-5.

Ko e lahi ange ʻo e meʻa naʻe ako ʻe Kāpelieli mei he Tohitapú, ko e lahi ange ia ʻene ʻiloʻi ko e moʻoní pē iá. “Naʻá ku ako ʻoku malava ke tau moʻui taʻengata ʻi ha māmani palataisi. ʻI heʻene mātuʻaki kehé, ko e meʻa ia naʻá ku fakaʻamua ʻi heʻeku kei siʻí.” Naʻe fakafiemālieʻi ʻe he Tohitapú ʻa Kāpelieli pea fakanonga ʻa hono loto faingataʻaʻiá ʻi he taimi ko ení. Naʻe kamata ke moʻui ʻa hono ngaahi kafo fakaeongo loloto tahá. Ko ia ʻi he taimi naʻá ne fetaulaki ai mo Taniela, ko ha tokotaha fili ia ki muʻá, naʻe ʻikai toe ongoʻi tāufehiʻa ʻa Kāpelieli. Ka ko e hā naʻá ne ʻai ʻa Taniela ke haʻu ki ʻIulopé?

“Kapau ʻOkú Ke ʻI Ai Moʻoni, Kātaki ʻo Tokoni Mai Kiate Au!”

Naʻe tupu hake ʻa Taniela ko ha Katolika pea ʻi hono taʻu 18 naʻe ui ia ki he ngāue fakakautaú. Naʻe ʻave ia ke faitau ʻi he tau tatau pē ko ia naʻe kau ai ʻa Kāpelielí ka ʻi he tafaʻaki fakafepakí. ʻI he ofi ki he malaʻe taú, naʻe heka ʻa Taniela ʻi ha tangikē tau ʻi he taimi naʻe tau ai ha fana ʻi he tangikeé. Naʻe mate ʻa hono ngaahi kaumeʻá, pea naʻá ne lavea lahi ʻo ʻave pōpula. Naʻá ne tokoto falemahaki ʻi ha ngaahi māhina pea ʻi ha kemi ki muʻa ke ʻave fakapuleʻanga ia ki ha fonua tuʻu-ʻatā. ʻI he nofo tokotaha pea masiva ʻangoʻangó, naʻá ne fakakaukau taonakita. Naʻe lotu ʻa Taniela ki he ʻOtuá: “Kapau ʻokú ke ʻi ai moʻoni, kātaki ʻo tokoni mai kiate au!” ʻI he ʻaho hokó pē, naʻe ʻaʻahi atu ʻa e Kau Fakamoʻoni ʻa Sihová pea naʻe malava ʻo tali ai ʻa ʻene ngaahi fehuʻi lahi. Naʻe faifai pē, ʻo ne fononga ki ʻIulope ko ha tokotaha kumi hūfanga. Naʻe toe feohi ai ʻa Taniela mo e Kau Fakamoʻoní peá ne ako ʻa e Tohitapú. Ko e meʻa naʻá ne akó naʻá ne fakanonga ai ʻene loto-hohaʻá mo ʻene loto-ʻitá.

Ko Kāpelieli mo Tanielá ʻokú na hoko he taimí ni ʻo kaungāmeʻa lelei, ʻo fāʻūtaha ʻi ha fetokouaʻaki fakalaumālie ʻi he tuʻunga ko e ongo Fakamoʻoni ʻosi papitaiso ʻa Sihova. “Ko ʻeku ʻofa kia Sihová mo ʻeku ʻilo faka-Tohitapú kuó ne tokoniʻi au ke u vakai ki he ngaahi meʻá ʻo hangē ko ʻene vakaí. Kuo ʻikai kei hoko ʻa Taniela ko hoku fili. ʻI he ngaahi taʻu kuo maliu atú naʻá ku mei tāmateʻi loto-lelei pē ia. Kuo akoʻi au ʻe he Tohitapú ki he tafaʻaki fehangahangaí tonu—ke u loto-lelei ke mate maʻana,” ko e lea ia ʻa Kāpelielí.

“Naʻá ku mamata ki he fetāmateʻaki ʻa e kakai ʻo e ngaahi lotu mo e ngaahi fonua kehekehe,” ko e lau ia ʻa Tanielá. “Pea naʻe ʻi ai mo e kakai ʻo e lotu tatau pē ʻi he ongo tafaʻaki fehangahangai ʻo e taú naʻa nau fetāmateʻaki. ʻI heʻeku sio ki he meʻá ni, naʻá ku ongoʻi ko e ʻOtuá ke tukuakiʻí. Kuó u ʻiloʻi he taimí ni ko Sētane ia ʻoku tuʻu mei mui ʻi he ngaahi tau kotoa pē. Ko Kāpelieli mo aú ʻokú ma hoko he taimí ni ko e ongo kaungātui. ʻE ʻikai ʻaupito te ma toe kau ʻi he taú!”

“Ko e Folofola ʻa e ʻOtua, ko e Koto Moʻui mo e Koto Malohi”

Ko e hā naʻe fuʻu liliu fakaofo pehē ai ʻa ʻĒpalahame, Lōpeti, Kāpelieli mo Tanielá? Naʻe malava fēfē ke nau toʻo atu ʻa e tāufehiʻa mo e mamahi naʻe tongi loloto ʻi honau lotó?

Ko e kau tangatá ni tāutaha naʻa nau lau, fakalaulauloto, mo ako ʻa e moʻoní mei he Tohitapú, ʻa ia ko e “koto moʻui mo e koto malohi.” (Hepelu 4:12) Ko e Faʻu-Tohi ʻo e Tohitapú ʻa e Tokotaha-Fakatupu ʻo e faʻahinga ʻo e tangatá, ʻokú ne ʻafioʻi ʻa e founga ke tākiekina ai ki he leleí ʻa e loto ʻo ha taha ʻoku loto-lelei ke fanongo pea akó. “Ko e potu Folofola kotoa pe ne fakamanava mei he ʻOtua, ʻoku ʻaonga foki ki he akonaki, ki he fakaʻilo hala, ki he fakatonutonu, ki he ngaohia ke maʻoniʻoni.” ʻI hano fakaʻatā pē ʻe ha tokotaha lautohi ke tataki ia ʻe he Tohitapú, ʻokú ne maʻu leva ha faʻahinga foʻou ʻo e ngaahi meʻa ʻoku mahuʻingá mo e ngaahi tuʻungá. ʻOku kamata ke ne ako ʻa e founga ʻo e vakai ʻa Sihova ki he ngaahi meʻá. ʻOku ʻomi ʻe he foungá ni ʻa e ngaahi ʻaonga lahi, kau ai ʻa e faitoʻo ʻo e ngaahi kafo ʻi he taú.—2 Timote 3:16.

ʻOku fakamatala ʻa e Folofola ʻa e ʻOtuá ʻoku ʻikai ha kulupu fakafonua, matakali, pe fakafaʻahinga ʻoku lelei ange pe kovi ange ʻi ha taha. “ʻOku ʻikai ke filifilimanako ʻa e ʻOtua: ka neongo pe ko e feʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.” Ko e tokotaha lau tohi ʻokú ne tali ení ʻoku tokoniʻi māmālie ia ke ne ikuʻi ʻa e ongoʻi ʻo e tāufehiʻa fakamatakalí pe fakafonuá.—Ngāue 10:​34, 35.

ʻOku fakahaaʻi ʻe he ngaahi kikite faka-Tohitapú ʻe vavé ni ke fetongi ʻe he ʻOtuá ʻa e fokotuʻutuʻu ʻo e pule fakaetangata lolotongá ʻaki hono Puleʻanga Faka-Mīsaiá. Fakafou ʻi he founga-pule ko ʻení, ʻe hanga ʻe he ʻOtuá ʻo “lolololo ʻa e ngaahi tau ʻo aʻu ki he ngataʻanga ʻo mamani.” Ko e ngaahi fokotuʻutuʻu ʻokú ne pouaki ʻa e ngaahi taú pea fakaʻaiʻai ʻa e kakaí ke nau kau ʻi he tau ko iá ʻe toʻo atu ia. Ko e kau maʻukovia ʻi he taú ʻe fokotuʻu hake kinautolu pea ʻoange ʻa e faingamālie ke nau nofo ʻi ha māmani palataisi. ʻE ʻikai fiemaʻu ki ha taha ke hola ʻi he fehangahangai mo ha tokotaha fakaaoao pe tokotaha fakafeʻātungia.—Sāme 46:9; Taniela 2:44; Ngāue 24:15.

Ko e faʻahinga ʻo e tangatá ʻe moʻui ʻi he taimi ko iá, ʻoku pehē ʻe he Tohitapú: “Pea te nau langa fale, ʻo nofo ai; pea te nau to ngouevaine, pea kai hono fua. ʻE ʻikai te nau langa, kae nofo ai ha taha kehe . . . ʻE ʻikai te nau fakaongosia noa, pea ʻe ʻikai te nau fakatupu fanau ke fakapoongi.” ʻE ʻikai ha maumau pe ha lavea ʻe taʻemalava ke faitoʻo. Ko e tui ki he ʻamanaki peheé ʻokú ne toʻo māmālie atu ʻa e mamahí mo e faingataʻá mei he loto ʻo ha taha.—Aisea 65:​21-23.

Ko e Tohitapú ʻa e faitoʻo ʻaonga moʻoni ki he lotó. Ko ʻene ngaahi akonakí kuó ne ʻosi faitoʻo ʻa e ngaahi kafo ʻi he taú. Ko e ngaahi fili ki muʻá kuo fakatahaʻi kinautolu ʻi ha fetokouaʻaki fakavahaʻapuleʻanga pē taha. Ko e founga fakamoʻui ko ʻení ʻe hokohoko atu ia ʻi he fokotuʻutuʻu foʻou ʻa e ʻOtuá kae ʻoua ke ʻikai toe ʻi ai ha tāufehiʻa mo e loto-ʻita, faingataʻaʻia mo e mamahi ʻi he loto ʻo e faʻahinga ʻo e tangatá. ʻOku talaʻofa mai ʻe he Tokotaha-Fakatupú “ʻe ʻikai manatua ʻa e [ngaahi meʻa ki muʻá], pea ʻe ʻikai te nau hake ʻi he loto ʻo ha taha.”—Aisea 65:17.

[Fakamatala ʻi lalo]

[Fakamatala ʻi he peesi 4]

“Mei he Tohitapú, naʻá ku ako ai ko e ngaahi taʻu kotoa naʻá ku fakamoleki ʻi he taú naʻe mole noa”

[Maʻuʻanga Tā ʻi he peesi 4]

Kemi hūfanga: UN PHOTO 186811/J.Isaac

[Fakamatala ʻi he peesi 5]

ʻOku lava ke ʻi ai ha tākiekina mālohi ʻa e Tohitapú ʻi he loto ʻo e ngaahi fili ki muʻá

[Ongo Fakamatala ʻi he peesi 6]

Ko e tāufehiʻá mo e loto-ʻitá ʻoku faai atu ʻo fetongi ia ʻe he falalá mo e kaumeʻá

ʻI hano fakaʻatā pē ʻe ha tokotaha lautohi ke tataki ia ʻe he Tohitapú, ʻokú ne maʻu leva ha faʻahinga foʻou ʻo e ngaahi meʻa ʻoku mahuʻingá mo e ngaahi tuʻungá

[Fakatātā ʻi he peesi 7]

Ko e ngaahi fili ki muʻá kuo fakafāʻūtahaʻi kinautolu he taimí ni ʻi ha fetokouaʻaki fakavahaʻapuleʻanga