Tokangaʻi ʻa e Laumālié pea Moʻui!

“Ko hono tokangaʻi ʻo e laumālié ʻoku ʻuhinga iá ko e moʻui.”—LOMA 8:​6, NW.

 1, 2. Ko e hā ʻa e faikehekehe ʻoku ʻai ʻe he Tohitapú ʻi he vahaʻa ʻo e “kakanó” mo e “laumālié”?

ʻOKU ʻikai ko ha kiʻi pole siʻisiʻi ke tauhi maʻu ha tuʻunga maʻa fakaeʻulungaanga ʻi he ʻao ʻo e ʻOtuá ʻi he lotolotonga ʻo ha sōsaieti fulikivanu ʻa ia ʻokú ne fakalāngilangiʻi ʻa e fakatōliʻa ʻo e ngaahi holi fakaekakanó. Kae kehe, ʻoku fakafaikehekeheʻi ʻe he ngaahi Konga Tohitapú ʻa e “kakano” mo e “laumālie,” ʻo ne fakamavaheʻi mataʻāʻā ʻa e vahaʻa ʻo e ngaahi nunuʻa fakamanavahē ʻo hono fakaʻatā kita ke puleʻi ʻe he kakano angahalaʻiá pea mo e ngaahi ola faitāpuekina ʻo e ʻulutukua ki he tākiekina ʻa e laumālie māʻoniʻoni ʻo e ʻOtuá.

² Ko e fakatātaá, naʻe pehē ʻe Sīsū Kalaisi: “Ko e laumālie pe ʻoku ne ngaohi ke moʻui; ko e meʻa ki he kakano ʻoku ʻikai momoʻi ʻaonga ia: ko e ngaahi lea kuo u fai ʻe au kiate kimoutolu, ko e koto laumālie ia, pea ko e koto moʻui.” (Sione 6:63) Ki he kau Kalisitiane ʻi Kalētiá, naʻe tohi ki ai ʻa e ʻapositolo ko Paulá: “ʻOku holituʻu ʻa Kakano ʻo fakafepaki ki he Laumalie; pea pehe mo e Laumalie kia Kakano: he ʻoku na fetaʻofiʻaki ʻa e ongo mea ko ia.” (Kaletia 5:17) Naʻe toe pehē ʻe Paula: “Ko ia ʻoku ne to ʻi hono kakano, te ne utu mei he kakano ʻa e ʻauha: ka ko ia ʻoku ne to ʻi he laumalie, te ne utu mei he laumalie ʻa e moʻui taʻengata.”—Kaletia 6:8.

 3. Ko e hā ʻoku fiemaʻú kae ʻataʻatā mei he ngaahi holi mo e ngaahi hehema fehālaakí?

³ Ko e laumālie māʻoniʻoni ʻo Sihová—ʻa hono ivi ngāué—ʻoku malava lelei ke ne taʻaki fuʻu atu ʻa e “ngaahi holi fakakakano” taʻemaʻá pea mo e pule fakatupu ʻauha ʻoku fai ʻe hotau kakano angahalaʻiá. (1 Pita 2:11) Ke ʻataʻatā mei he pōpula ki he ngaahi hehema fehālaakí, ʻoku mātuʻaki mahuʻinga ke tau maʻu ʻa e tokoni ʻa e laumālie ʻo e ʻOtuá, he naʻe tohi ʻe Paula: “Ko hono tokangaʻi ʻo e kakanó ʻoku ʻuhinga iá ko e mate, ka ko hono tokangaʻi ʻo e laumālié ʻoku ʻuhinga iá ko e moʻui pea mo e melino.” (Loma 8:​6, NW) ʻOku ʻuhinga ki he hā ʻa e pehē ke tokangaʻi ʻa e laumālié?

“Ko Hono Tokangaʻi ʻa e Laumālié”

 4. Ko e hā ʻoku ʻuhinga ki ai ʻa hono “tokangaʻi ʻo e laumālié”?

⁴ ʻI he taimi naʻe tohi ai ʻa Paula ʻo fekauʻaki mo hono “tokangaʻi ʻo e laumālié,” naʻá ne ngāueʻaki ha foʻi lea faka-Kalisi ʻoku ʻuhinga ki he “anga ʻo e fakakaukau, ʻatamai(-maʻu), . . . taumuʻa, holi, feinga.” Ko ha foʻi veape felāveʻi mo ia ʻoku ʻuhinga iá “ke fakakaukau, ke tokangaʻi ʻi ha founga pau.” Ko ia, ko hono tokangaʻi ʻo e laumālié ʻoku ʻuhingá ko e hoko ʻo tataki, puleʻi, mo ueʻi ʻe he ivi ngāue ʻo Sihová. ʻOkú ne fakahaaʻi ʻoku tau fakaʻatā loto-lelei ʻetau fakakaukaú, ngaahi hehemá, mo e ngaahi holí ke hoko ʻo ʻi he malumalu ʻo e tākiekina kakato ʻa e laumālie māʻoniʻoni ʻo e ʻOtuá.

 5. ʻOku totonu ke tau anganofo ki he tākiekina ʻa e laumālie māʻoniʻoní ʻo aʻu ki he tuʻunga fē?

⁵ Ko e tuʻunga ko ia ʻoku totonu ke tau anganofo ai ki he tākiekina ʻa e laumālie māʻoniʻoní naʻe fakamamafaʻi ʻe Paula ʻi he taimi naʻá ne lea ai ʻo fekauʻaki mo e hoko ‘ko e kau pōpula ki he laumalié.’ (Loma 7:6, NW) Fakatuʻunga ʻi heʻenau tui ki he feilaulau huhuʻi ʻa Sīsuú, kuo fakatauʻatāinaʻi ai ʻa e kau Kalisitiané mei he puleʻi ʻe he angahalá pea kuo nau “mate” ai ki honau tuʻunga ki muʻá ʻi he tuʻunga ko e kau pōpula ʻa e angahalá. (Loma 6:​2, 11) Ko e faʻahinga ko ia naʻa nau mate fakaefakatātā ʻi ha founga peheé ʻoku nau kei moʻui fakaesino pea ʻoku nau tauʻatāina he taimí ni ke muimui ʻia Kalaisi ʻi he tuʻunga ko e “kau pōpula ki he māʻoniʻoní.”—Loma 6:​18-20, NW.

Ko ha Liliu Fakaofo

 6. Ko e hā ʻa e liliu ʻoku hokosia ʻe he faʻahinga ʻoku hoko ko e “kau pōpula ki he māʻoniʻoní”?

⁶ Ko e liliu mei he hoko ko e “kau pōpula ʻa angahalá” ke tauhi ʻa e ʻOtuá ʻi he tuʻunga ko e “kau pōpula ki he Māʻoniʻoní” ʻoku fakaofo moʻoni ia. ʻI he fekauʻaki mo e niʻihi kuo nau hokosia ha liliu peheé, naʻe tohi ʻe Paula: ‘Kuo fufulu akimoutolu, kuo fakatabuʻi akimoutolu, kuo fakatonuhia akimoutolu, i he huafa oe Eiki ko Jisuú, bea i he Laumalie o ho tau Otuá.’—Loma 6:​17, 18, NW; 1 Kolinito 6:​11, PM.

 7. Ko e hā ʻoku mahuʻinga ai ke maʻu ʻa e anga ʻo e vakai ʻa Sihova ki he ngaahi meʻá?

⁷ Ke tau hokosia ha liliu fakaofo pehē, ʻoku ʻuluaki fiemaʻu ke tau ako ʻo fekauʻaki mo e anga ʻo e vakai ʻa Sihova ki he ngaahi meʻá. ʻI he laui senituli kuo maliu atú, naʻe kole faivelenga ai ʻa e tokotaha-tohi-sāme ko Tēvitá ki he ʻOtuá: “Fakaha kiate au, E Jihova, ho gaahi hala; . . . Tataki au i hoo mooni, mo akonakiʻi au.” (Sāme 25:​4, 5, PM) Naʻe fanongo ʻa Sihova kia Tēvita, pea ʻokú Ne malava ke tali ha lotu pehē maʻa ʻene kau sevāniti ʻi onopōní foki. Koeʻuhi ko e ngaahi founga ʻa e ʻOtuá mo ʻene moʻoní ʻoku maʻa mo toputapu, ko e fakalaulauloto ki aí ʻe ʻaonga lahi ia kapau ʻoku fakataueleʻi kitautolu ke fakafiemālieʻi ʻa e ngaahi holi fakaekakano taʻemaʻá.

Ko e Ngafa Mātuʻaki Mahuʻinga ʻo e Folofola ʻa e ʻOtuá

 8. Ko e hā ʻoku mātuʻaki fiemaʻu ai ke tau ako ʻa e Tohitapú?

⁸ Ko e Folofola ʻa e ʻOtuá, ʻa e Tohitapú, ko ha fua ia ʻo hono laumālié. Ko ia, ko e founga mātuʻaki mahuʻinga ʻe taha ke fakaʻatā ai ʻa e laumālie ko iá ke ngāue ʻiate kitautolú ko hono lau mo ako ʻa e Tohitapú—fakaʻaho ʻo ka malava. (1 Kolinito 2:​10, 11; Efeso 5:18) Ko hono fakafonu hotau ʻatamaí mo e lotó ʻaki ʻa e ngaahi moʻoni mo e ngaahi tefitoʻi moʻoni ʻa e Tohitapú ʻe tokoni ia kiate kitautolu ke tau matuʻuaki ʻa e ngaahi fakamanamana ki hotau tuʻunga fakalaumālié. ʻIo, ʻi he taimi ʻoku malanga hake ai ha ngaahi fakatauele fakaeʻulungaanga taʻetaau, ʻoku malava ʻe he laumālie ʻo e ʻOtuá ke ne fakamanatu mai ki hotau ʻatamaí ʻa e ngaahi fakamanatu Fakatohitapu mo e ngaahi tefitoʻi moʻoni tataki ʻoku malava ke nau fakamālohiʻi ʻetau fakapapau ke ngāue ʻo fehoanaki mo e finangalo ʻo e ʻOtuá. (Sāme 119:​1, 2, 99; Sione 14:26) Ko ia ai, heʻikai ke kākaaʻi ai kitautolu ke tau muimui ʻi ha ʻalunga ʻoku hala.—2 Kolinito 11:3.

 9. ʻOku anga-fēfē hono fakaivimālohiʻi ʻe he ako Tohitapú ʻetau fakapapau ke tauhi maʻu hotau vahaʻangatae mo Sihová?

⁹ ʻI heʻetau hokohoko atu ʻetau ako loto-moʻoni mo tōtōivi ʻa e ngaahi Konga Tohitapú fakataha mo e tokoni ʻa e ngaahi tohi makatuʻunga ʻi he Tohitapú, ʻoku tākiekina ai ʻe he laumālie ʻo e ʻOtuá hotau ʻatamaí mo e lotó, ʻo ʻai ai ke loloto ʻetau fakaʻapaʻapa ki he ngaahi tuʻunga ʻa Sihová. ʻOku hoko leva hotau vahaʻangatae mo e ʻOtuá ko e meʻa mahuʻinga lahi taha ia ʻi heʻetau moʻuí. ʻI he taimi ʻoku tau fehangahangai ai mo e fakatauelé, heʻikai te tau tauhi ʻa e ngaahi fakakaukau fekauʻaki mo e fiefia ʻe hoko nai ʻi he kau ʻi ha faihalá. ʻI hono kehé, ko ʻetau tokanga tefitó ke tauhi maʻu ʻetau anga-tonu kia Sihová. ʻOku ueʻi kitautolu ʻe ha houngaʻia mālohi ki hotau vahaʻangatae mo iá ke faitau ai mo ha faʻahinga hehema pē te ne maumauʻi pe fakaʻauha nai iá.

“ʻOi ʻEku ʻOfa ki Hoʻo Lao Na!”

10. Ko e hā ʻoku fiemaʻu ai ʻa e talangofua ki he lao ʻa Sihová koeʻuhi kae tokangaʻi ʻa e laumālié?

¹⁰ Kapau ʻoku fiemaʻu ke tau tokangaʻi ʻa e laumālié, ʻoku ʻikai feʻunga pē ʻa e ʻilo ʻo fekauʻaki mo e Folofola ʻa e ʻOtuá. Naʻe maʻu ʻe Tuʻi Solomone ha mahino lelei ʻaupito ki he ngaahi tuʻunga ʻa Sihová, ka naʻe ʻikai malava ke ne moʻui ʻaki kinautolu he lolotonga ʻa e konga ki mui ʻo ʻene moʻuí. (1 Tuʻi 4:​29, 30; 11:​1-6) Kapau ʻoku tau tokanga fakalaumālie, te tau sio ai ki he fiemaʻu ke ʻoua ʻe ngata pē ʻi hono ʻiloʻi ʻa e meʻa ʻoku leaʻaki ʻe he Tohitapú kae toe pehē foki ki he talangofua loto-ʻaufuatō ki he lao ʻa e ʻOtuá. ʻOku ʻuhinga iá ko hono fai ha sivisiviʻi fakakonisēnisi ʻo e ngaahi tuʻunga ʻa Sihová pea feinga tōtōivi ke muimui ʻiate kinautolu. Naʻe maʻu ʻe he tokotaha-tohi-sāmé ʻa e faʻahinga fakakaukau ko ʻení. Naʻá ne hiva: “ʻOi ʻeku ʻofa ki hoʻo lao na! ʻOku ou fakalaulauloto ki ai he ʻaho kotoa.” (Sāme 119:97) ʻI heʻetau tokanga moʻoni ʻo kau ki he muimui ʻi he lao ʻa e ʻOtuá, ʻoku ueʻi ai kitautolu ke tau fakahāhā ʻa e ngaahi ʻulungaanga fakaʻotuá. (Efeso 5:​1, 2) ʻI he ʻikai ke hoko ʻo tohoaki atu taʻeʻiai ha maluʻi ki he faihalá, ʻoku tau fakahāhaaʻi ai ʻa e fua ʻo e laumālié, pea ko ha holi ke fakahōifuaʻi ʻa Sihová ʻokú ne fakatafokiʻi kitautolu mei he “ngaahi ngaue [fakalielia] ʻa Kakano.”—Kaletia 5:​16, 19-23; Sāme 15:​1, 2.

11. ʻE anga-fēfē haʻo fakamatalaʻi ko e lao ʻa Sihova ʻo tapui ai ʻa e feʻauakí ko ha maluʻi ia kiate kitautolú?

¹¹ ʻE malava fēfē ke tau fakatupulekina ʻa e fakaʻapaʻapa mo e ʻofa loloto ki he lao ʻa Sihová? Ko e founga ʻe taha ko hono sivisiviʻi fakalelei ʻa hono mahuʻingá. Fakakaukau atu ki he lao ʻa e ʻOtuá ʻa ia ʻokú ne fakangatangata pē ʻa e fehokotaki fakasinó ki he nofo malí pea tapui ʻa e feʻauakí mo e tonó. (Hepelu 13:4) ʻOku hanga ʻe he talangofua ki he lao ko ʻení ʻo fakahongeʻi kitautolu mei ha meʻa lelei? ʻE hanga ʻe ha Tamai fakahēvani ʻofa ʻo faʻu ha lao ke ne taʻofi meiate kitautolu ha meʻa ʻoku ʻaonga? Ko hono moʻoní, ʻoku ʻikai! Vakai atu ki he meʻa ʻoku hoko ʻi he ngaahi moʻui ʻa e tokolahi ko ia ʻoku ʻikai te nau moʻui ʻo fehoanaki mo e ngaahi tuʻunga fakaeʻulungaanga ʻa Sihová. ʻOku faʻa taki atu ai ʻa e ngaahi feitama ʻikai fiemaʻú ki he ngaahi fakatōtama pe fāʻele taʻehoko nai pea mo e ngaahi nofo mali loto-mamahi. Ko e tokolahi kuo pau ke nau tauhi hake ai ha tama ʻo ʻikai ha husepāniti pe ko ha uaifi. ʻIkai ngata aí, ko e faʻahinga ʻoku nau tōʻongaʻaki ʻa e feʻauakí ʻoku nau fakaeʻa atu ai kinautolu ki he ngaahi mahaki fakapipihi holo ʻe he fehokotaki fakasinó. (1 Kolinito 6:18) Pea kapau ʻoku fakahoko ʻe ha sevāniti ʻa Sihova ha feʻauaki, ʻoku malava ke fakatupu maumau ʻa e ngaahi nunuʻa fakaeongó. Ko e feinga ke lōmia ʻa e ngaahi hohaʻa ʻa ha konisēnisi halaiá ʻoku malava ke ne fakatupunga ʻa e ngaahi pō taʻemamohe mo e mamahi fakaefakakaukau. (Sāme 32:​3, 4; 51:3) Ko ia ai, ʻikai ʻoku hā mahino leva ai, ko e lao ʻa Sihova ʻoku tapui ai ʻa e feʻauakí ʻoku faʻufaʻu iá ke maluʻi kitautolu? ʻIo, ʻoku ʻi ai ha ʻaonga lahi moʻoni ʻi hono tauhi maʻu ʻa e maʻa fakaeʻulungāngá!

Lotu ʻo Kole ʻa e Tokoni ʻa Sihová

12, 13. Ko e hā ʻoku feʻungamālie ai ke lotu ʻi he taimi ʻoku fakahohaʻasi ai ʻe he ngaahi holi angahalaʻiá?

¹² Ko hono tokangaʻi ʻo e laumālié ʻoku fiemaʻu moʻoni ki ai ʻa e lotu fakamātoato. ʻOku feʻungamālie ke kole ki he tokoni ʻa e laumālie ʻo e ʻOtuá, he naʻe pehē ʻe Sīsū: “Kapau ʻoku mou ʻilo ke foaki meʻaʻofa lelei ki hoʻomou fanau . . . huanoa ʻa e Tamai ʻi he langi ʻene foaki ʻa e Laumālie Māʻoniʻoni kiate kinautolu ʻoku kole kiate ia.” (Luke 11:13) ʻI he lotú, ʻoku malava ke tau fakahaaʻi ai ʻetau fakafalala ki he laumālié ke tokoni ʻi he fekauʻaki mo hotau ngaahi vaivaiʻangá. (Loma 8:​26, 27) Kapau ʻoku tau fakatokangaʻi ʻoku uesia kitautolu ʻe he ngaahi holi pe ngaahi fakakaukau angahalaʻiá, pe kapau ʻoku hanga ʻe ha kaungātui ʻofa ʻo fakahanga ʻetau tokangá ki he meʻá ni, ʻe fakapotopoto ke tau lea hangatonu fekauʻaki mo e palopalemá ʻi heʻetau ngaahi lotú pea kole ʻa e tokoni ʻa e ʻOtuá ke ikunaʻi ʻaki ʻa e ngaahi hehemá ni.

¹³ ʻOku malava ʻe Sihova ke ne tokoniʻi kitautolu ke tau tokangataha ki he ngaahi meʻa ʻoku māʻoniʻoní, maʻá, leleí, mo taau ke fakamālōʻiá. Pea ko e meʻa feʻungamālie moʻoni ē ke hū tōtōivi kiate ia koeʻuhi ke hanga ʻe he “nonga ʻa e ʻOtua” ʻo maluʻi hotau lotó mo ʻetau ngaahi mafai fakaefakakaukaú! (Filipai 4:​6-8) Ko ia ai, tau lotu ʻo kole ʻa e tokoni ʻa Sihová ke tau “tuli ki he maonioni, moe aga faka-Otua, moe tui, moe ofa, moe faa kataki, moe agavaivai.” (1 Timote 6:​11-14, PM) ʻAki ʻa e tokoni ʻa ʻetau Tamai fakahēvaní, ʻe ʻikai ke tupulaki ai ʻa e ngaahi loto-moʻuá mo e ngaahi fakatauelé ia ʻo aʻu ki he tuʻunga ʻoku ʻikai malava ke toe mapuleʻi. Ka, ʻe fakaʻilongaʻi ʻetau moʻuí ʻaki ʻa e nonga ʻoku foaki mai ʻe he ʻOtuá.

ʻOua ʻe Fakalotomamahiʻi ʻa e Laumālié

14. Ko e hā ko ha mālohi ai ki he tuʻunga maʻá ʻa e laumālie ʻo e ʻOtuá?

¹⁴ Ko e kau sevāniti matuʻotuʻa ʻa Sihová ʻoku nau ngāueʻaki fakafoʻituitui ʻa e akonaki ʻa Paulá: “ʻOua ʻe fuʻifuʻi ʻa e Laumalie.” (1 Tesalonaika 5:19) Koeʻuhi ko e laumālie ʻo e ʻOtuá ko e “laumalie oe maonioni,” ʻoku maʻa, haohaoa, mo toputapu ia. (Loma 1:​4, PM) ʻI he taimi ʻoku ngāue ai ʻiate kitautolú, ko e laumālie ko iá ko ha mālohi ia ki he māʻoniʻoní, pe tuʻunga maʻá. ʻOku tokoni ia ki hono tauhi kitautolu ʻi ha founga maʻa ʻo e moʻuí ʻa ia ʻoku fakaʻilongaʻi ʻaki ʻa e talangofua ki he ʻOtuá. (1 Pita 1:2) Ko ha faʻahinga tōʻonga taʻemaʻa pē, ʻoku fakahoko ai ʻa hono taʻetokangaʻi ʻo e laumālie ko iá, pea ʻe malava ke maʻu ai ha ngaahi nunuʻa fakatupu ʻauha. Anga-fēfē?

15, 16. (a) ʻE anga-fēfē nai haʻatau fakalotomamahiʻi ʻa e laumālie ʻo e ʻOtuá? (e) ʻE malava fēfē ke tau fakaʻehiʻehi mei hono fakalotomamahiʻi ʻa e laumālie ʻo Sihová?

¹⁵ Sai, naʻe tohi ʻe Paula: “ʻOua ʻe ʻai ke mamahi ʻa e Laumalie Maʻoniʻoni ko ia ʻo e ʻOtua, ʻa ia naʻe sila ʻaki kimoutolu ki he ʻaho huhuʻi.” (Efeso 4:30) ʻOku fakahaaʻi mai ʻe he ngaahi Konga Tohitapú ko e laumālie ʻo Sihová ko ha sila, pe ko ha ‘fakaʻilonga ʻo e meʻa ʻe hoko mai,’ ki he kau Kalisitiane pani anga-tonú. Pea ko e moʻui fakahēvani taʻefaʻamaté ia. (2 Kolinito 1:​22, NW; 1 Kolinito 15:​50-57; Fakahā 2:10) ʻOku malava ʻe he laumālie ʻo e ʻOtuá ke ne tataki ʻa e kau paní pea mo honau ngaahi takanga ʻoku nau maʻu ha ʻamanaki fakaemāmaní ʻi ha moʻui ʻo e faitōnunga pea ʻoku malava ke ne tokoniʻi kinautolu ke nau fakaʻehiʻehi mei he ngaahi ngāue angahalaʻiá.

¹⁶ Naʻe fakatokanga ʻa e ʻapositoló ʻo fekauʻaki mo e ngaahi hehema ki he loí, kaihaʻá, ʻulungaanga fakamaá, mo e alā meʻa pehē. Kapau ʻoku tau fakaʻatā ʻa kitautolu tonu ke tau ʻauhia atu ki he ngaahi meʻa peheé, te tau fakafepaki ai ki he akonaki fakamānavaʻi ʻe he laumālié ʻi he Folofola ʻa e ʻOtuá. (Efeso 4:​17-29; 5:​1-5) ʻE aʻu ki ha faʻahinga tuʻunga, ʻe lava ke tau fakalotomamahiʻi ai ʻa e laumālie ʻo e ʻOtuá, pea ko hono moʻoní, ko e meʻa ia ʻoku tau loto ke fakaʻehiʻehi mei aí. ʻI he meʻa ko iá, kapau kuo kamata ʻe ha taha ʻo kitautolu ke ne tukunoaʻi ʻa e akonaki ʻa e Folofola ʻa Sihová, ʻoku tau kamata nai ai ke fakatupu ʻa e ngaahi fakakaukau pe ngaahi anga ʻa ia ʻe malava ke iku ai ki he angahala fieangahala pea mole fakaʻaufuli atu ai ʻa e hōifua fakaʻotuá. (Hepelu 6:​4-6) Neongo ʻoku ʻikai nai te tau fai ha angahala he taimí ni, ʻoku malava ke tau huʻu atu ki he ʻalunga ko iá. ʻI he hokohoko fakafepaki ki he tataki ʻa e laumālié, te tau fakalotomamahiʻi ai ia. Te tau toe talitekeʻi mo fakalotomamahiʻi ai ʻa Sihova, ko e matavai ʻo e laumālie māʻoniʻoní. ʻI he tuʻunga ko e faʻahinga ʻoku ʻofa ki he ʻOtuá, ʻoku ʻikai ʻaupito te tau loto ke fai ʻa e meʻa ko iá. ʻI hono kehé, ʻofa ke tau lotu ʻo kole ʻa e tokoni ʻa Sihová koeʻuhi ke ʻoua naʻa tau fakalotomamahiʻi hono laumālié kae malava ke tau ʻoatu ʻa e lāngilangí ki hono huafa māʻoniʻoní ʻaki hono hokohoko atu hono tokangaʻi ʻo e laumālié.

Hanganaki Tokangaʻi ʻa e Laumālié

17. Ko e hā nai ha ngaahi taumuʻa fakalaumālie ʻe niʻihi te tau fokotuʻu, pea ko e hā ʻoku fakapotopoto ai ʻa e ngāue ke aʻusia kinautolú?

¹⁷ Ko ha founga ʻoku taau ke tau fakatokangaʻi ki hono hanganaki tokangaʻi ʻa e laumālié ko hono fokotuʻu ha ngaahi taumuʻa fakalaumālie pea ngāue ke lavaʻi kinautolu. Makatuʻunga ʻi heʻetau ngaahi fiemaʻú mo e ngaahi tuʻungá, ʻe fakakau nai ʻi heʻetau ngaahi taumuʻá ʻa hono fakaleleiʻi ʻetau ngaahi tōʻonga akó, ʻo fakatupulekina ʻetau kau ʻi he ngāue fakamalangá, pe kakapa atu ki ha monū makehe ʻo e ngāué, ʻo hangē ko e ngāue fakafaifekau tāimuʻa taimi-kakató, ngāue Pētelí, pe ngāue fakamisinalé. ʻE tauhi maʻu ʻe he meʻá ni hotau ʻatamaí ke moʻumoʻua ʻi he ngaahi meʻa fakalaumālié pea te ne tokoniʻi kitautolu ke tau talitekeʻi ʻa e tō ki hotau ngaahi vaivaiʻanga fakaetangatá pe hoko ʻo tataki ʻe he ngaahi taumuʻa fakamatelié mo e ngaahi holi taʻefakatohitapu ʻoku anga-maheni ki ai ʻa e fokotuʻutuʻu ʻo e ngaahi meʻa ko ʻení. Ko hono moʻoní, ko e ʻalunga fakapotopoto ʻeni, he naʻe naʻinaʻi mai ʻa Sīsū: “ʻOua naʻa faʻoaki koloa maʻamoutolu ʻi mamani; he ko e potu ia ʻoku keina ai ʻe he ane mo e ʻumeʻumea, pea haea ʻe he kau kaihaʻa ʻo nau kaihaʻasi: kae faʻoaki koloa maʻamoutolu ʻi langi, he ko e potu ia ʻoku ʻikai keina ai ʻe he ane mo e ʻumeʻumea, pea ʻoku ʻikai haea ʻe he kau kaihaʻa ʻo kaihaʻasi: he ko e potu ʻoku ʻi ai hoʻo koloa, ʻe ʻi ai foki mo ho loto.”—Mātiu 6:​19-21.

18. Ko e hā ʻoku mātuʻaki mahuʻinga ai ke hanganaki tokangaʻi ʻa e laumālié ʻi he kuonga fakamuí ni?

¹⁸ Ko hono tokangaʻi ʻo e laumālié pea mo hono lōmekina ʻa e ngaahi holi fakamāmaní ko hono moʻoní, ko e ʻalunga ia ʻo e potó ʻi he “kuonga fakamui” ko ʻení. (2 Timote 3:​1-5) He ko ē, “ʻoku fakaʻaʻau ke mole ʻa mamani mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.” (1 Sione 2:​15-17) Ko e fakatātaá, kapau ʻoku tuli ha talavou Kalisitiane ki he taumuʻa ko e ngāue taimi-kakató, ʻe hoko nai ʻeni ko ha tataki he lolotonga ʻa e ngaahi taʻu faingataʻa ʻo e talavoú pe tupu haké. ʻI hono tenge ke fakangalokú, ʻe maʻu ʻe ha tokotaha pehē ha fakaʻutoʻuta lelei ki he meʻa ʻokú ne fiemaʻu ke fakahoko ʻi he ngāue ʻa Sihová. Ko ha tokotaha fakalaumālie pehē te ne lau ko e meʻa taʻefakapotopoto, naʻa mo fakasesele, ke tukuange ʻa hono lavaʻi ʻo e ngaahi taumuʻa fakalaumālié koeʻuhi ko e ngaahi tuli ki he meʻa fakamatelié pe ko ha fakafiefia pē ʻoku talaʻofa mai ʻe he angahalá te ne ʻomai. Manatuʻi ko Mōsesé naʻe hehema fakalaumālie ʻo ne ‘fili ke kaungā-ngaohikovia ia mo e kakai ʻa e ʻOtuá, ʻi haʻane maʻu fakataimi pe ha malie tuʻu he angahalá.’ (Hepelu 11:​24, 25) Tatau ai pē pe ʻoku tau kei siʻi pe taʻumotuʻa, ʻoku tau fai ha fili meimei tatau ʻi heʻetau hanganaki tokangaʻi ʻo e laumālié kae ʻikai ko e kakano kuo hingá.

19. Ko e hā ʻa e ngaahi ʻaonga te tau fiefia ai kapau te tau hanganaki tokangaʻi ʻa e laumālié?

¹⁹ “Ko hono tokangaʻi ʻo e kakanó ʻoku ʻuhinga iá ko e fakafili ki he ʻOtuá,” lolotonga iá “ko hono tokangaʻi ʻo e laumālié ʻoku ʻuhinga iá ko e moʻui pea mo e melino.” (Loma 8:​6, 7, NW) Kapau ʻoku tau hanganaki tokangaʻi ʻa e laumālié, te tau hokosia ai ha melino mātuʻaki mahuʻinga. ʻE hoko ʻo maluʻi kakato ange ai hotau lotó mo ʻetau ngaahi mafai fakaefakakaukaú mei he tākiekina ʻa hotau tuʻunga angahalaʻiá. Te tau malava lelei ange ai ke talitekeʻi ʻa e ngaahi fakatauele ke kau ʻi he faihalá. Pea te tau maʻu ʻa e tokoni fakaʻotuá ke fekuki ai mo e fāinga hokohoko ʻi he vahaʻa ʻo e kakanó mo e laumālié.

20. Ko e hā ʻoku malava ai ke tau fakapapauʻi ʻe malava ke tau hoko ʻo ikuna ʻi he faitau he vahaʻa ʻo e kakanó mo e laumālié?

²⁰ ʻI he hokohoko atu ʻa hono tokangaʻi ʻo e laumālié, ʻoku tau tauhi maʻu ai ha fepikitaki mātuʻaki mahuʻinga mo Sihova, ko e matavai fakatouʻosi ʻo e moʻuí pea mo e laumālie māʻoniʻoní. (Sāme 36:9; 51:11) ʻOku fai ʻe Sētane ko e Tēvoló mo ʻene kau fakafofongá ʻa e meʻa kotoa pē te nau malavá ke fakaʻauha hotau vahaʻangatae mo Sihova ko e ʻOtuá. ʻOku nau feinga ke nau puleʻi ʻetau ngaahi fakakaukaú, ʻi he ʻiloʻi kapau te tau foʻi, ʻe fai atu pē ʻo iku ʻa e meʻá ni ki he fili mo e ʻOtuá pea aʻu ai ki he maté. Ka ʻoku malava ke tau hoko ʻo ikuna ʻi he faitau ko ʻeni ʻi he vahaʻa ʻo e kakanó mo e laumālié. Ko e meʻa ia naʻe hokosia ʻe Paulá, he ʻi he tohi ʻo fekauʻaki mo ʻene faitau ʻaʻaná, naʻá ne ʻuluaki ʻeke: “Ko hai tū te ne hamusi au mei he sino ʻoku mei ai ʻa e mate ni?” Ko ia, ʻi hono fakahaaʻi naʻe malava ʻa e fakahaofí, naʻá ne kalanga: “Fakafetaʻi ki he ʻOtua, ʻa ia kuo ne fai ʻia Sisu Kalaisi ko hotau ʻEiki!” (Loma 7:​21-25) Ko kitautolu foki ʻoku malava ke tau fakamālō ki he ʻOtuá fakafou ʻia Kalaisi ki hono tokonaki mai ʻa e ngaahi founga ke fekuki ai mo e ngaahi vaivai fakaetangatá pea hanganaki tokangaʻi ai ʻa e laumālié fakataha mo e ʻamanaki fakaofo ko e moʻui taʻengatá.—Loma 6:23.

ʻOkú Ke Manatuʻi?

• ʻOku ʻuhinga ki he hā ʻa e pehē ke tokangaʻi ʻa e laumālié?

• ʻE malava fēfē ke tau fakaʻatā ʻa e laumālie ʻo Sihová ke ngāue ʻiate kitautolu?

• ʻI heʻetau faitau mo e angahalá, fakamatalaʻi ʻa e ʻuhinga ʻoku mātuʻaki mahuʻinga ai ke ako ʻa e Tohitapú, ke talangofua ki he lao ʻa Sihová, pea ke lotu kiate ia.

• ʻOku anga-fēfē ʻa e malava ʻe he fokotuʻu ʻo e ngaahi taumuʻa fakalaumālié ʻo hanganaki tauhi kitautolu ʻi he ʻalunga ʻo e moʻuí?

[Fakatātā ʻi he peesi 16]

ʻOku tokoniʻi kitautolu ʻe he ako Tohitapú ke tau matuʻuaki ʻa e ngaahi fakamanamana ki hotau tuʻunga fakalaumālié

[Fakatātā ʻi he peesi 17]

ʻOku totonu ke lotu ʻo kole ʻa e tokoni ʻa Sihová ke ikunaʻi ʻa e ngaahi holi angahalaʻiá

[Fakatātā ʻi he peesi 18]

ʻOku malava ʻe he ngaahi taumuʻa fakalaumālié ke ne tokoniʻi kitautolu ke tau hanganaki tokangaʻi ʻa e laumālié