“Monuʻiaā ka ko e Tangata Kuo Ne ʻIlo ʻa Poto”

KO HA faʻu-maau ia, ko ha tokotaha tā mape, ko ha tuʻi. ʻI haʻane paʻanga hū mai fakataʻu laka hake ʻi he tola ʻe 200 milioná, naʻá ne koloaʻia ange ʻi ha toe tuʻi pē ʻi he māmaní. Naʻe toe ʻiloa ʻa e tangatá ʻi heʻene potó. Naʻe mātuʻaki maongo ia ki ha kuini naʻá ne ʻaʻahi ki ai ʻo ne kalanga: “Ta ko e vaeua naʻe ʻikai tala mai: ʻoku hulu atu hoʻo poto mo ho monuʻia ʻi he ongoongo naʻa ku maʻu.” (1 Tuʻi 10:​4-9) Ko e tuʻunga pehē naʻe ʻi ai ʻa Tuʻi Solomone ʻo ʻIsileli ʻi he kuonga muʻá.

Naʻe maʻu ʻe Solomone fakatouʻosi ʻa e koloa mo e poto. Pea naʻe ʻai ʻe he meʻa ko iá ke ne taau tautefito ange ai ke fakapapauʻi pe ko fē ʻi he meʻa ko iá ʻe ua naʻe mahuʻinga ʻaupitó. Naʻá ne tohi: “Monuʻiaā ka ko e tangata kuo ne ʻilo ʻa poto, mo e tangata kuo ne maʻu mai ʻa e mafai-ke-ʻilo; he ʻoku leleiange ʻa e ʻalu holo hono fakatau ʻi he siliva, pea ko e fua ʻoku te maʻu ai, ʻi he koula moʻonia. ʻOku ne mahuʻinga ange ʻi he makakula koloa; pea neongo pe ko e ha ho manako ʻe ʻikai ala fakatatau ki ai.”—Palovepi 3:​13-15.

Ko ia ai, ʻe lava ke maʻu mei fē ʻa e potó? Ko e hā ʻoku mahuʻinga ange ai ia ʻi he koloá? Ko e hā ʻa hono ngaahi tafaʻaki manakoá? Ko e Palovepi vahe hono 8 ʻo e tohi faka-Tohitapu ʻa Palovepí, ʻa ia naʻe hiki ʻe Solomoné, ʻokú ne tali ʻa e ngaahi fehuʻi ko ení ʻi ha founga fakatoʻoaloto. ʻOku fakasino mai ai ʻa e potó, ʻo hangē ia ʻoku malava ke lea pe ngāué. Pea ʻoku fakaeʻa fakafoʻituitui ai ʻe he potó ʻa ʻene fakamānakó pea pehē ki hono mahuʻingá.

“Oku Ne Kalaga Leʻo-Lahi”

Ko e Palovepi vahe 8 ʻo e Palovepí ʻoku kamataʻaki ia ha foʻi fehuʻi tali loto: “Ikai oku kalaga ae boto? bea ai mai e he [“ʻiloʻilo,” NW] hono leʻo?”a ʻIo, ʻoku hanganaki kalanga ʻa poto mo ʻiloʻilo, ka ʻoku mātuʻaki ʻikai ke tatau ia mo e fefine ʻulungaanga taʻetaau ʻa ia ʻoku toitoi ʻi he ngaahi feituʻu fakapoʻulí pea fanafana ʻaki ʻa e ngaahi lea fakatauele ki he telinga ʻo ha kiʻi talavou naʻe tokotaha mo taʻetaukeí. (Palovepi 7:​12) “I he tumutumu oe gaahi botu maoluga, moe gaahi botu i he gaahi vee hala. Oku ne kalaga [“leʻo-lahi,” NW] i he gaahi mataba, moe gaahi matanikolo, i he ava oe gaahi mataba.” (Palovepi 8:​1-3, PM) Ko e leʻo mālohi mo fefeka ʻo potó ʻoku fanongoa leʻo-lahi mo mahino ia ʻi he ngaahi feituʻu kakaí—ʻi he ngaahi matapaá, ʻi he ngaahi veʻehalá, pea ʻi he ava ʻo e ngaahi matapā ʻo e koló. ʻOku malava ke fanongongofua ʻa e kakaí ki he leʻo ko iá pea nau tali.

Ko hai ia ʻe lava ke ne fakaʻikaiʻi ko e poto fakaʻotua ʻoku lēkooti ʻi he Folofola fakamānavaʻi ʻa e ʻOtuá, ʻa e Tohitapú, ʻoku ala maʻu ia ʻe he meimei tokotaha kotoa pē ʻi he māmaní ʻa ia ʻoku holi ke ne maʻu iá? “Ko e Tohitapú ʻa e tohi mafolalahia taha ʻa hono laú ʻi he hisitōliá,” ko e lau ia ʻa e The World Book Encyclopedia. ʻOku toe tānaki mai ki ai: “Kuo tufaki ʻa e ngaahi tatau lahi ange ʻo e Tohitapú ʻi ha toe tohi kehe. Kuo toe liliu ʻa e Tohitapú ʻo tuʻo lahi ange, pea ki he ngaahi lea lahi ange, ʻi ha toe tohi kehe.” ʻI hono ala maʻu ʻa e Tohitapú kakato pe ko hono ngaahi konga ʻi he lea mo e ngaahi lea fakafeituʻu lahi ange ʻi he 2,100, ko e peseti ʻe 90 tupu ʻo e fāmili ʻo e tangatá kuo nau aʻu ki ha kiʻi konga ʻo e Folofola ʻa e ʻOtuá ʻi he lea ʻanautolú.

ʻOku talaki fakahāhā ʻe he Kau Fakamoʻoni ʻa Sihová ʻa e pōpoaki ʻo e Tohitapú ʻi he feituʻu kotoa pē. ʻI he ngaahi fonua ʻe 235, ʻoku nau malangaʻi longomoʻui ai ʻa e ongoongo lelei ʻo e Puleʻanga ʻo e ʻOtuá mo akoʻi ki he kakaí ʻa e ngaahi moʻoni ʻoku maʻu ʻi he Folofola ʻa e ʻOtuá. Ko ʻenau ongo tohi makatuʻunga ʻi he Tohitapú ʻa e Taua Leʻo, ʻoku pulusi ia ʻi he ngaahi lea ʻe 140, pea ko e ʻĀ Hake!, ʻoku pulusi ia ʻi he ngaahi lea ʻe 83, kuo tufaki taki taha kinaua ʻo laka hake ʻi he 20 milioná. Ko e moʻoni ʻoku hanganaki kalanga leʻo-lahi ʻa poto ʻi he ngaahi feituʻu kakaí!

“ʻOku Hiki Hake Hoku Leʻo ki he Fānau ae Tagata”

Ko e fakasino ʻo potó ʻoku kamata ke ne lea, ʻo pehē: “Ae kau tagata, oku ou ui kiate kimoutolu; bea oku hiki hake hoku leʻo ki he fānau ae tagata. Ae kau sesele, mou ilo ae boto [“fakapotopoto,” NW]: bea ke maʻu ekimoutolu, koe kau vale, ae loto faa ilo.”—Palovepi 8:​4, 5, PM.

Ko e ui ʻa potó ʻoku fakalūkufua. ʻOkú ne fakalahi atu ʻa ʻene fakaafé ki he faʻahinga kotoa ʻo e tangatá. Naʻa mo e kau seselé ʻoku fakaafeʻi ke nau maʻu ʻa e fakapotopotó, pe pōtoʻí, pea ko e kau valé, ke nau maʻu ʻa e faʻa ʻiló. Ko e moʻoni, ʻoku tui ʻa e Kau Fakamoʻoni ʻa Sihová ko e Tohitapú ko ha tohi ia maʻá e kakai kotoa pē pea ʻoku nau feinga taʻefilifilimānako ke fakalototoʻaʻi ʻa e tokotaha kotoa pē ʻoku nau fetaulaki mo iá ke nau kumi ki ai ke maʻu ʻa e ngaahi foʻi lea ʻo e potó ʻoku ʻi aí.

‘Oku Lea Aki ae Mooní e Hoku Gutú’

ʻI hono fakalahi atu ʻa ʻene kolé, ʻoku hoko atu ʻa poto: “Fanogo; he teu lea ki he gaahi mea oku lelei; bea e mafaa hoku lougutu i he gaahi mea totonu. Bea e lea aki ae mooni e hoku gutu; bea koe mea fakalielia ki hoku lougutu ae kovi. Oku i he maonioni ae gaahi lea kotoabe a hoku gutu; oku ikai ha bikobiko be ha kākā i ai.” ʻIo, ko e ngaahi akonaki ʻa potó ʻoku lelei ʻaupito mo totonu, moʻoni mo māʻoniʻoni. ʻOku ʻikai ha meʻa ʻe pikopiko pe kākā ʻi ai. “Oku ilogofua kotoabe kiate ia oku [“ʻiloʻiló,” NW], bea totonu kiate kinautolu oku maʻu ae ilo.”—Palovepi 8:​6-9, PM.

ʻOku feʻungamālie ʻa e naʻinaʻi mai ʻa potó: “Maʻu a eku akonaki, kae jiaki ae siliva; bea ke lelei hake ae maʻu oe ilo i he koula lelei.” ʻOku fakapotopoto ʻa e kōlenga ko ení, “he oku lelei hake ae boto i he gaahi maka koloa; bea oku ikai faa tatau mo ia ae gaahi mea kotoabe oku ke faa holi ki ai.” (Palovepi 8:​10, 11, PM) Ka ko e hā hono ʻuhingá? Ko e hā ʻokú ne ʻai ʻa e potó ke mahuʻinga ange ʻi he koloá?

“Oku Lelei Hake i he Koula a Hoku Fua”

Ko e ngaahi meʻaʻofa ʻoku tuku mai ʻe he potó ki heʻene kau fanongó ʻoku mahuʻinga ange ia ʻi he koula, siliva, pe ngaahi maka koloa. ʻI hono fakamatalaʻi ʻa e ngaahi meʻaʻofa ko ení, ʻoku pehē ʻe poto: “Ko au boto oku ma nonofo mo [“fakapotopoto,” NW], beau maʻu ae ilo i he [“ngaahi malava fakaefakakaukau,” NW]. Koe manavahe kia Jihova, koe fehia ia ki he kovi: koe fielahi, moe fakabuhobuha, moe agakovi moe gutu kovi, oku ou fehia ki ai.”—Palovepi 8:​12, 13, PM.

ʻOku foaki ʻe poto ʻa e fakapotopotó mo e ngaahi malava fakaefakakaukaú ki he tokotaha ʻokú ne maʻu iá. Ko e tangata ʻokú ne maʻu ʻa e poto fakaʻotuá ʻokú ne toe maʻu ʻa e manavahē mo e ʻapasia ki he ʻOtuá, koeʻuhi “koe manavahe kia Jihova koe kamataaga ia oe boto.” (Palovepi 9:​10, PM) Ko ia ai, ʻoku fehiʻa ia ki he meʻa ʻoku fehiʻa ai ʻa Sihová. Ko e fielahí, fakapuhopuhaʻá, tōʻonga taʻetāú, mo e ngutu mioʻí ʻoku ʻikai ke ʻiate ia. Ko ʻene fehiʻa ki he meʻa ʻoku koví ʻoku maluʻi ai ia mei he ngāue siokita ʻaki ʻa e mafaí. He mahuʻinga ē ko ia ki he faʻahinga ʻi he ngaahi tuʻunga fua fatongia ʻi he fakatahaʻanga Kalisitiané, pea pehē ki he ngaahi ʻuluʻi fāmilí, ke nau kumi ki he potó!

“Oku aaku ae akonaki, moe boto mooni,” ko e hoko atu ia ʻa potó. “Ko au koe faa ilo [“mahino,” NW]: oku iate au ae malohi. Koe mea iate au oku bule ai ae gaahi tuʻi, bea fai fakamāu e he houeiki. Oku bule ae houeiki iate au, moe kakai eiki, moe kau fakamāu kotoabe.” (Palovepi 8:​14-16, PM) Ko e fua ʻo e potó ʻoku kau ai ʻa e vavanga, mahino, mo e mālohi—ko e ngaahi moʻoniʻi meʻa ʻoku mātuʻaki fiemaʻu lahi ʻe he kau pulé, kau houʻeikí, mo e kakai ʻeikí. ʻOku mahuʻinga ʻaupito ʻa poto ki he faʻahinga ko ia ʻoku nau ʻi ha tuʻunga ʻo e mafaí pea mo e faʻahinga ʻoku nau faleʻi ʻa e niʻihi kehé.

ʻOku ʻosi ala maʻu ʻa e poto moʻoní ʻe he faʻahinga kotoa pē, ka ʻoku ʻikai ke ʻilo ia ʻe he tokotaha kotoa pē. ʻOku talitekeʻi, pe fakaʻehiʻehi mei ai ʻa e niʻihi, naʻa mo e taimi ʻoku ofi ai kiate kinautolú. “Oku ou ofa kiate kinautolu oku ofa kiate au,” ko e lea ia ʻa potó, “bea e maʻu au ekinautolu oku kumi tōtōaki kiate au.” (Palovepi 8:​17, PM) ʻOku ala maʻu pē ʻa poto ʻe he faʻahinga ʻoku nau kumi fakamātoato ki aí.

Ko e ngaahi hala ʻo potó ʻoku totonu mo māʻoniʻoni. ʻOkú ne fakapaleʻi ʻa hono kau kumi kiate iá. ʻOku pehē ʻe poto: “Oku iate au ae koloa moe ogoogolelei; io, ae koloa tae bobo moe maonioni. Oku lelei hake i he koula a hoku fua, io, i he koula lelei; mo eku koloa i he siliva lelei. Oku ou takimua i he hala oe maonioni, i he loto hala oe fakamāu: Koeuhi keu bule ke maʻu ae koloa mooni ekinautolu oku ofa kiate au; bea teu fakafonu ho nau tukuga koloa.”—Palovepi 8:​18-21, PM.

Fakataha mo e ngaahi anga mo e fasi-ʻa-anga lelei ʻaupito pehē hangē ko e pōtoʻi, malava fakaefakakaukau, anga-fakatōkilalo, vavanga, poto moʻoni, mo e mahinó, ko e ngaahi meʻaʻofa ʻa potó ʻoku kau ai ʻa e koloa mo e lāngilangi. Ko ha tokotaha poto te ne maʻu lelei nai ʻa e koloá ʻi ha ngaahi founga māʻoniʻoni, pea te ne lakalakaimonū fakalaumālie. (3 Sione 2) ʻOku toe ʻomai ʻe he potó ki he tokotahá ha lāngilangi. ʻIkai ngata aí, ʻokú ne maʻu ʻa e fiemālie mei he meʻa ʻokú ne maʻú, pea ʻokú ne maʻu ha ʻatamai nonga mo ha konisēnisi maʻa ki he ʻOtuá. ʻIo, fiefiaā ka ko e tangata kuó ne maʻu ʻa potó. Ko e fua ʻo potó ʻoku lelei moʻoni ange ia ʻi he koula kuo siví mo e siliva kuo filifili leleí.

He taimi tonu ē ko e faleʻi ko ení kiate kitautolu koeʻuhi ʻoku tau nofo ʻi ha māmani tuli ki he meʻa fakamatelié ʻa ia ko e fakamamafá ʻoku ʻi hono maʻu ʻa e koloá ʻi ha ngaahi founga pē pea ʻi ha totongi pē! ʻOfa ke ʻoua ʻaupito naʻa mole meiate kitautolu ʻetau sio atu ki he mahuʻinga ʻa potó pe hanga ki ha ngaahi founga taʻemāʻoniʻoni ke maʻu ai ʻa e koloá. ʻOua ʻaupito naʻa tau liʻaki ʻa e ngaahi tokonaki tofu pē ko ia ʻoku ʻomai ai ʻa e potó—ʻa ʻetau ngaahi fakataha faka-Kalisitiané pea mo ʻetau ako fakafoʻituitui ʻa e Tohitapú pea mo e ngaahi tohi ʻoku tokonaki mai ʻe he “tamaioeiki agatonu mo boto”​—koeʻuhi pē ke maʻu ai ʻa e koloá.—Mātiu 24:​45-47, PM.

“Nae Fokotuu Au Talu mei Muʻa”

Ko e fakasino ʻo potó ʻoku maʻu ʻi he Palovepi vahe hono 8 ʻo e Palovepí ʻoku ʻikai ko ha founga pē ia ke fakamatalaʻi ai ʻa e ngaahi tōʻonga ʻo ha ʻulungaanga fakamahalo. ʻOku toe lave fakaefakatātā ia ki he fakatupu mahuʻinga taha ʻa Sihová. ʻOku hoko atu ʻa poto ʻo pehē: “Nae maʻu au e Jihova i he kamataaga o hono hala, i muaage i he ene gaahi gaue i mua. Nae fokotuu au talu mei mua, mei he kamataaga i he heeki ai a mamani. Nae fanauʻi au i he teeki ke ai ha loloto; i he heeki ai ha matavai oku fonu i he vai. I he teeki ke tuu mau ae gaahi mouga; nae fanauʻi au i he heeki ai ae gaahi botu maoluga: I he teeki ai te ne gaohi a mamani, be koe botu maalaala, be koe botu lahi oe efu o mamani.”—Palovepi 8:​22-26, PM.

He fehoanaki lelei ē ko e fakamatalaʻi tōmuʻa ʻo e fakasino ʻo potó mo e meʻa ʻoku fakahaaʻi fekauʻaki mo “Folofola” ʻi he ngaahi Konga Tohitapú! “ʻI he kamataʻanga kuo ʻi ai ʻa Folofola,” ko e tohi ia ʻa e ʻapositolo ko Sioné, “pea naʻe feangai mo e ʻOtua ʻa Folofola, pea naʻe ʻOtua ʻa Folofola.” (Sione 1:1) Ko e fakasino ʻo potó ʻokú ne fakafofongaʻi fakaefakatātā ʻa e ʻAlo ʻo e ʻOtuá, ʻa Sīsū Kalaisi, ʻi heʻene ʻi ai ki muʻa ke hoko ko ha tangatá.b

Ko Sīsū Kalaisí “ko e ʻUluaki ia naʻe fakatupu, ko e Kimuʻa ʻi he meʻa kotoa pe kuo ngaohi: koeʻuhi naʻe tefito kiate ia ʻa e ngaohi ʻo e meʻa kotoa pe, ʻa e meʻa ʻi he langi mo e meʻa ʻi mamani, ʻa e meʻa hamai mo e meʻa taʻehamai.” (Kolose 1:​15, 16) “ʻI heʻene [ Sihova] teu ʻa e ngaahi langi naʻa ku ʻi ai,” ko e hoko atu ia ʻa e fakasino ʻo potó, “ʻi heʻene ʻai ha aku ki he funga ʻo e loloto; ʻi heʻene ʻai ke maʻu ʻa e ʻatanoa mei ʻolunga; he taimi naʻe fai malohi ai ʻa e ngaahi fauniteni ʻo e loloto: ʻi heʻene ʻai ki he oseni ʻene tuʻutuʻuni, pea ki he tahi, ke ʻoua te nau laka ʻi he meʻa kuo ne fekau. ʻI heʻene ʻange ʻa e ngaahi tuʻunga ʻo mamani, ko e taimi ko ia naʻa ku ʻi hono tafaʻaki, ko e tufunga lahi, ʻo u hakailangitau he ʻaho kotoa pe; ʻo u fiefia ʻi hono ʻao he taimi kotoa pe; ʻo u lata ki he ngaahi potu ʻo hono mamani naʻe nofoʻanga kakai; ʻio, ko ʻeku neka naʻe ʻi he hako ʻo Atama.” (Palovepi 8:​27-31) Ko e ʻAlo ʻuluaki fakatupu ʻo Sihová naʻá ne ʻi he tafaʻaki ʻo ʻene Tamaí, ʻo ngāue longomoʻui fakataha mo ia—ʻa e Tokotaha-Fakatupu taʻehanotatau ʻo e langí pea mo e māmaní. ʻI he taimi naʻe fakatupu ai ʻe Sihova ko e ʻOtuá ʻa e ʻuluaki tangatá, naʻe feohi mo ia ʻa hono ʻAló ʻi he ngāue he tuʻunga ko e Tufunga Lahi. (Senesi 1:​26) ʻOku ʻikai ha ofo ʻi he mahuʻingaʻia lahi ʻa e ʻAlo ʻo e ʻOtuá, naʻa mo ʻene nēkeneka, ʻi he faʻahinga ʻo e tangatá!

“Oku Monuia ae Tagata Oku Fanogo Kiate Au”

ʻI he fakasino ʻa potó, ʻoku pehē ʻe he ʻAlo ʻo e ʻOtuá: “Koia, E fānau, mou fanogo mai kiate au: he oku monuia ia oku tokaga ki hoku gaahi hala. Mou fanogo ki he akonaki, bea mou boto, bea oua naa mou tae tokaga ki ai. Oku monuia ae tagata oku fanogo kiate au, o ne tatali i he aho kotoabe i hoku gaahi mataba, o ne nofo i hoku vee mataba. He koia oku ne maʻu au oku ne maʻu ae moui, bea e iate ia ae ogoogolelei mei a Jihova. Ka koia oku fai agahala kiate au, oku ne fai kovi ki hono laumalie [“soulu,” NW] oona: oku ofa ki he mate akinautolu kotoabe oku fehia kiate au.”—Palovepi 8:​32-36, PM.

Ko Sīsū Kalaisi ʻa e fakasino ʻo e poto ʻo e ʻOtuá. “ʻOku faʻoaki ai hono katokātoa ʻo e koloa poto mo e koloa ʻilo, ʻo fufū pe.” (Kolose 2:3) Tau fanongo leva kiate ia, ʻo mātuʻaki tokanga pea muimui ofi ki hono topuvaʻé. (1 Pita 2:​21) Ke talitekeʻi ia ko e faikovi ia ki hotau soulú tonu pea ko e ʻofa ia ki he maté, he “ʻoku ʻikai ke tuʻu ʻi ha taha kehe ʻa e fakamoʻui.” (Ngāue 4:12) Ko e moʻoni, tau tali ʻa Sīsū ko e tokotaha ia ʻa ia kuo tokonaki mai ʻe he ʻOtuá ki hotau fakamoʻuí. (Mātiu 20:28; Sione 3:​16) Ko ia ai, te tau hokosia ʻa e fiefia ʻa ia ʻoku hoko mai mei he ‘maʻu ae mouí, bea iate ia ae ogoogolelei mei a Jihová.’

[Fakamatala ʻi lalo]

[Fakatātā ʻi he peesi 26]

ʻOku mahuʻinga ʻaupito ʻa e potó ki he faʻahinga ʻoku ʻi he ngaahi tuʻunga fua fatongiá

[Fakatātā ʻi he peesi 27]

ʻOua ʻe liʻaki ʻa e ngaahi tokonaki ʻoku ʻomai ai ʻa e potó