ʻIkai Tuēnoa ʻi he Taimi Naʻe ʻAhiʻahiʻi Ai ʻEma Tuí

Ko Vicky ko ha kiʻi pēpē fefine fakaʻofoʻofa ia​—naʻe moʻuilelei, talavou, mo longomoʻui. ʻIo, ʻi he taimi naʻe fāʻeleʻi ai ia ʻi he faʻahitaʻu failau ʻo e 1993, naʻá ma fiefia lahi ʻaupito. Naʻa mau nofo ʻi ha kiʻi kolo ʻi he fakatonga ʻo Suētení, pea naʻe fakalata ʻa e moʻuí.

KAE KEHE, ʻi he taimi naʻe taʻu taha mo e konga ai ʻa Vicky, naʻe hā ngali movete ai ʻa e tuʻunga ʻo ʻema moʻuí. Naʻe ʻikai te ne moʻuilelei ʻi ha taimi, ko ia naʻá ma ʻave ai ia ki ha falemahaki. ʻE ʻikai ʻaupito ngalo ʻiate kimaua ʻa e mōmeniti naʻe tala mai ai ʻe he toketaá kiate kimaua ʻoku fuesia ʻe homa ʻofefiné ha kanisā toto lahi ʻi he lamá, ko ha faʻahinga kanisā ʻi he fānaú ʻa ia ʻokú ne uesia ʻa e fanga kiʻi sela toto hinehiná.

Naʻe faingataʻa ke ma tali naʻe kafo ʻa ʻema kiʻi taʻahiné ʻi he mahaki fakalilifu ko ení. Ko e toki kamata mai pē ia ke ne hoko ʻo lāuʻilo ki he māmani takatakai ʻiate iá, pea ʻi he taimi ko ení ʻe lava ke ne mate. ʻI heʻene feinga ke fakafiemālieʻi kimauá, naʻe tala mai ai ʻe he toketaá ʻe lava ke fakahoko ha faitoʻo lavameʻa lelei, ʻo kau ai ha faitoʻo fakakemikale fakataha mo ha ngaahi huhu toto. Ko e meʻa eni naʻe toe hoko atu ki ai ʻa ʻema loto-hohaʻá.

ʻAhiʻahiʻi ʻa ʻEma Tuí

Naʻá ma ʻofa moʻoni ʻi homa ʻofefiné pea naʻá ma fiemaʻu ʻa e tokangaʻi fakafaitoʻo lelei taha kiate iá. Neongo ia, naʻe ʻikai ʻaupito te ma tali ʻa e ngaahi huhu totó. Naʻá ma tui mālohi ki he Folofola ʻa e ʻOtuá, ko e Tohitapú, ʻa ia ʻoku fakamatalaʻi mahino ai ko e kau Kalisitiané kuo pau ke nau ‘fakaʻehiʻehi mei he totó.’ (Ngāue 15:​28, 29) Naʻá ma toe ʻiloʻi ko e ngaahi huhu totó ʻiate kinautolu pē ʻoku fakatuʻutāmaki. Kuo maʻu ʻe he laui afe ʻa e ngaahi mahaki mei he huhu totó, pea kuo nau mate ai. Ko e meʻa pē taha ke ne fetongí ko ha faitoʻo tuʻunga māʻolunga ʻaupito ʻa ia naʻe ʻikai ke kau ai ʻa e huhu totó. ʻI he tafaʻaki ko ení, naʻe kamata ai ʻema faitau koeʻuhi ko e tuí.

Ko e hā ʻe lava ke ma faí? Naʻá ma fetuʻutaki ki he Ngaahi Potungāue Fakahinohino Fakafalemahaki ʻi he ʻōfisi vaʻa ʻo e Kau Fakamoʻoni ʻa Sihova ʻi Suētení ke kole ki ha tokoni.a Naʻe ʻave leva ha ngaahi fēkisi ki ha ngaahi falemahaki kehekehe takatakai ʻi ʻIulope ʻi heʻema kumi ki ha falemahaki pea mo ha toketā ʻe loto-lelei ke ne fakahoko ʻa e faitoʻo fakakemikalé ʻo taʻekau ai hono ngāueʻaki ʻa e huhu totó. Ko e faivelenga pea mo e ʻofa naʻe fakahaaʻi ʻe homa fanga tokoua Kalisitiané ʻi heʻenau ngaahi feinga ke tokoniʻi kimauá naʻe mātuʻaki fakaivimālohi. Naʻe ʻikai te ma tuēnoa ʻi heʻema faitau koeʻuhi ko e tuí.

Hili ha ngaahi houa, naʻe maʻu ai ha falemahaki pea mo ha toketā ʻi Homburg/Saar, Siamane. Naʻe fai ʻa e ngaahi fokotuʻutuʻu ke mau puna ki ai ʻi he ʻaho hono hokó ke sivi ʻa Vicky. ʻI heʻemau tūʻuta atú, naʻe ʻi ai homau fanga tokoua Kalisitiane mei he fakatahaʻanga fakalotofonua ʻo e Kau Fakamoʻoni ʻa Sihova ʻi Homburg, pea pehē ki he niʻihi ʻo homa ngaahi kāingá, ke talitali kimautolu. Pea naʻe talitali loto-māfana ai kimautolu ʻe ha fakafofonga ʻo e Kōmiti Fetuʻutaki Fakafalemahaki fakalotofonuá. Naʻá ne ʻalu fakataha mo kimautolu ki he falemahakí peá ne ʻomai kiate kimautolu ʻa e poupou kotoa naʻe ala lavá. Naʻá ma ongoʻi fiemālie ke sio naʻa mo e ʻi ha fonua mulí, naʻe ʻi ai homa fanga tokoua fakalaumālie naʻa nau tuʻu ke poupouʻi kimaua.

ʻI heʻema feʻiloaki mo Dr. Graf ʻi he falemahakí, naʻe toe fakafiemālieʻi ai kimaua. Naʻá ne mahinoʻi lelei ʻaupito ʻa e tuʻungá peá ne fakapapauʻi mai kiate kimaua te ne fai ʻa e meʻa kotoa pē ʻe malavá ke faitoʻo ʻa Vicky ʻo taʻekau ai ʻa e huhu totó. Neongo kapau ʻe tō hifo ʻa e tuʻunga ʻo hono hemokolopiní ki he 5 g/dl, te ne loto-lelei pē ke hokohoko atu ʻa e faitoʻó ʻo taʻekau ai ha huhu toto. Naʻá ne toe pehē ko hono tomuʻa ʻiloʻi ʻo e mahakí pea mo e ngāue fakavave naʻe fai ke ʻoange ki ai ʻa Vicky naʻe ʻoange ai kiate ia ha faingamālie lelei ki ha faitoʻo lavameʻa. Naʻá ne fakahaaʻi ai ko e fuofua taimi ia te ne fakahoko ai ha faitoʻo fakakemikale ʻo taʻekau ai ʻa hono ngāueʻaki ʻo e huhu totó ʻi ha tuʻunga ʻo hangē ko ia ʻoku ʻi ai ʻa Vicky. Naʻá ma fakamālō mo ofo lahi ʻi he loto-toʻa mo e fakapapau ʻa Dr. Graf ke ne tokoní.

Ngaahi Palopalema Fakaʻekonōmika

Sai ko e fehuʻí leva, Naʻe malava fēfē ke ma totongi ʻa e ngaahi faitoʻo ʻo Vicky? Naʻá ma ʻohovale ʻi hono fakahā mai ko e faitoʻo he taʻu ʻe uá ʻe feʻunga nai mo e paʻanga Siamane ʻe 150,000. Naʻe ʻikai te ma maʻu naʻa mo ha kiʻi falakiseni pē ʻo e lahi ʻo e paʻanga ko iá, neongo ia naʻe fiemaʻu ke fai leva ʻa e ngaahi faitoʻo ʻo Vicky. ʻI heʻema mavahe mai mei Suēteni ki ha ngaahi faitoʻo ʻi Siamané, naʻe ʻikai ke ʻomai ai kiate kimaua ia ha totongi maluʻi moʻui fakapuleʻanga. Ko ia ai, ko kimaua ē mo ʻema kiʻi taʻahine puke lahí pea mo e mataotao fakafaitoʻó kuo ʻosi mateuteu ke tokoni, ka naʻe ʻikai te ma maʻu ha paʻanga feʻunga.

Naʻe tokoni mai ʻa e falemahakí kiate kimaua pea tala mai ʻe fai leva ʻa e ngaahi faitoʻó kapau te ma fai ha totongi māʻulalo ange ko e paʻanga ʻe 20,000 peá ma fakamoʻoni ʻi ha aleapau ki he toengá. Naʻe ʻi ai haʻama paʻanga naʻe fakahū, pea fakataha mo e tokoni anga-ʻofa ʻa e ngaahi kaumeʻá pea mo e ngaahi kāingá, naʻe malava ai ke ma totongi ʻa e paʻanga ʻe 20,000​—kae fēfē nai ʻa e toengá?

Naʻe toe fakamanatu mai ai kiate kimaua naʻe ʻikai te ma tuēnoa ʻi heʻema faitau koeʻuhi ko e tuí. Ko ha tokoua fakalaumālie, naʻe ʻikai te ma ʻiloʻi he taimi ko iá, naʻá ne loto-lelei ke ne fua ʻa e toengá. Kae kehe, naʻe ʻikai te ma fiemaʻu ke ngāueʻaki ʻa ʻene meʻaʻofa loto-fiefoakí, he naʻe malava ke ma fai ha ngaahi fokotuʻutuʻu kehe.

Ngāue ʻa e Mataotao Fakafaitoʻó

Naʻe kamata ʻa e faitoʻo fakakemikalé. Naʻe ʻosi mei ai ʻa e ngaahi ʻaho mo e ngaahi uike. ʻI he taimi ʻe niʻihi, naʻe faingataʻa ʻaupito mo fiemaʻu lahi ha fakaivimālohi fakatouʻosi kiate kimaua pea ki homa ʻofefiné. ʻI he tafaʻaki ʻe tahá, naʻá ma fuʻu fiefia lahi mo fakamālōʻia ʻa e taimi kotoa naʻe hā mai ai mei ai ha ngaahi fakaʻilonga ʻo e fakalakalaká. Naʻe feʻunga ʻa e faitoʻo fakakemikalé mo e māhina ʻe valu. Ko e tuʻunga māʻulalo taha naʻe aʻu ki ai ʻa e hemokolopini ʻo Vicky ko e 6 g/dl, pea naʻe tauhi pē ʻe Dr. Graf ʻa ʻene palōmesí.

Kuo mahili eni mei ai ʻa e taʻu ʻe ono, pea ʻi ha sivi fakaʻosi ʻa e huhuʻa ʻi hono huituʻá naʻe ʻikai toe hā mei ai ha fakaʻilonga ʻo e kanisā totó. Ko ha kiʻi taʻahine fiefia ia he taimí ni ʻo ʻikai hā ai ha ngaahi fakaʻilonga ʻo e mahakí. ʻIo, ʻoku hā ngali hangē ha maná ʻa e toe ake fakaʻaufuli ʻa Vicky. ʻOkú ma lāuʻilo kuo mate ʻa e fānau tokolahi ʻi he mahaki tatau ko ení neongo ʻa hono maʻu ʻa e faitoʻo fakakemikalé pea mo e ngaahi huhu totó.

Ko ʻema faitau koeʻuhi ko e tuí kuo ikuna, ka naʻe ʻikai taʻekau ai ʻa e tokoni mei homa ngaahi kāingá, fanga tokoua mo e fanga tuofāfine Kalisitiané, pea mo e kau mataotao fakafaitoʻó. Naʻe poupouʻi kakato kimaua ʻe he Ngaahi Potungāue Fakahinohino Fakafalemahakí houa ʻe 24 ʻi he ʻaho. Naʻe ngāueʻaki ʻe Dr. Graf mo hono kaungāngāué ʻenau ngaahi pōtoʻí ke tokoniʻiʻaki ʻa Vicky ke toe sai. ʻOkú ma fakahaaʻi ʻa e fakamālō moʻoni ki he meʻá ni hono kotoa.

Kuo Fakaivimālohiʻi ʻEma Tuí

Kae kehe, hiliō he meʻa kotoa, ʻokú ma fakamālō ki hotau ʻOtuá, ʻa Sihova, ki heʻene tokanga anga-ʻofá pea mo e mālohi naʻá ma maʻu fakafou ʻi heʻene Folofolá, ʻa e Tohitapú. ʻI heʻema sio ki muí, ʻokú ma ʻilo ai ʻa e lahi ʻo e meʻa kuó ma akó pea ko e fakaivimālohi ē ki heʻema tuí ʻa e meʻa fakamamahi ko eni kuó ma hokosia ʻi he moʻuí.

ʻI he taimi ní ko ʻema holi loto-moʻoní ia ke tauhi maʻu ʻa homa vahaʻangatae vāofi mo Sihova ko e ʻOtuá pea ke akoʻi ki homa ʻofefiné ʻa e mahuʻinga ʻo e moʻuiʻaki ha moʻui ʻoku fehoanaki mo ʻene ngaahi fiemaʻú. ʻIo, ʻokú ma loto ke ʻoange kiate ia ha tofiʻa fakalaumālie lelei ko e moʻui taʻengatá ʻi he Palataisi ka hoko mai ki heni ʻi he foʻi māmaní.​—Fakamatala ʻOmai.

[Fakamatala ʻi lalo]