ʻE Malava Fēfē Ke Ke Tauhi ha Vakai Mafamafatatau ki he Paʻangá?

Ko e ʻofa ki he paʻangá pea mo ha holi ki he koloá ʻoku ʻikai ko ha meʻa foʻou; ʻoku ʻikai foki sīlongo ʻa e Tohitapú fekauʻaki mo e ongo meʻa ko iá, ʻo hangē naʻá na toki ʻasi hake ki mui ní. ʻOkú na fuʻu motuʻa ʻaupito. ʻI he Laó, naʻe fakahinohinoʻi ai ʻe he ʻOtuá ʻa e kau ʻIsilelí: “ʻOua te ke manumanu ki he fale ʻo ho kaungaʻapi . . . pe ki ha meʻa ʻe taha ʻoku ʻa ho kaungaʻapi.” —Ekisoto 20:17.

KO E ʻofa ki he paʻangá mo e koloá naʻe hoko lahi ia ʻi he ʻaho ʻo Sīsuú. Fakakaukau angé ki he fakamatala ko eni ʻo kau ki ha fetalanoaʻaki ʻi he vahaʻa ʻo Sīsū mo ha talavou “koloaʻia ʻaupito.” “[Naʻe pehē ʻe Sīsū] kiate ia, ʻOku kei toe ha meʻa ʻe taha ke ke fai: fakatau atu ʻa e meʻa kotoa pe ʻoku ke maʻu, pea tufa hono paʻanga ki he masiva, pea ʻe ai ha fuʻu koloa ʻe faʻoaki maʻau ʻi Hevani: pea ke haʻu, ʻo kau ʻi hoku lahi. Pea ʻi heʻene fanongo ki he lea ko ia, naʻa ne mamahi lahi: he ko e toko taha ia naʻa ne koloaʻia ʻaupito.”—Luke 18:​18-23.

Ko ha Vakai Totonu ki he Paʻangá

Kae kehe, ʻe hala ke fakaʻosiʻaki ʻo pehē ʻoku fakahalaʻi ʻe he Tohitapú ʻa e paʻangá tonu pe ko ha taha pē ʻi he ngaahi meʻa ʻoku ngāueʻaki tefito ki aí. ʻOku fakahaaʻi ʻe he Tohitapú ʻoku tokonaki mai ʻe he paʻangá ha maluʻi lelei mei he masivá mo hono ngaahi haʻahaʻá, ʻo ʻai ke malava ʻe he kakaí ʻo fakatau mai ʻenau ngaahi fiemaʻú. Naʻe tohi ʻe Tuʻi Solomone: “Ko e poto ko e maluʻanga, ko e paʻanga ko e maluʻanga.” Pea: “Oku gaohi ae katoaga ke tubu ai ae kata, bea oku fakafiefia e he uaine; ka oku aoga ae baaga ki he mea kotoabe.”—Koheleti 7:12; 10:​19, PM.

Ko e ngāuetotonuʻaki ʻa e paʻangá ʻoku fakahōifua ia ki he ʻOtuá. Ko e fakatātaá, naʻe pehē ʻe Sīsū: “Mou ngāue ʻaki ʻa e koloa kākā ke tupu ai ha kakai ʻe ʻofa mai.” (Luke 16:9) ʻOku kau heni ʻa hono fai ha tokoni ki he laka ki muʻa ʻo e lotu moʻoni ʻa e ʻOtuá, he ʻoku totonu moʻoni ke tau fiemaʻu ʻa e ʻOtuá ke ne hoko ko hotau Kaumeʻa. Ko Solomone tonu, ʻi heʻene muimui ki he faʻifaʻitakiʻanga ʻa ʻene tamai ko Tēvitá, naʻá ne tokoniʻaki ha fuʻu paʻanga lahi mo ha ngaahi koloa mahuʻinga ki hono langa ʻa e temipale ʻo Sihová. Ko ha toe fekau faka-Kalisitiane ʻe taha ke foaki ha tokoni fakamatelie ki he faʻahinga ʻoku masivá. “Vahevahe ki he faʻahinga tapú ʻo fakatatau ki heʻenau ngaahi fiemaʻú,” ko e lau ia ʻa e ʻapositolo ko Paulá. Naʻá ne tānaki mai: “Muimui ʻi he ʻalunga ʻo e anga-talitali kakaí.” (Loma 12:​13, NW) ʻOku faʻa kau heni ʻa hono ngāueʻaki ha paʻanga. Kae kehe, fēfē ʻa e ʻofa ki he paʻangá?

‘Ko e Manako ki he Silivá’

Naʻe fakamatalaʻi lahi ange ʻe Paula ʻa e “ʻofa ki he paʻanga”—pe ko hono ʻuhinga tefitó, ʻa e “manako ki he silivá”—ʻi he taimi naʻá ne tohi ai ki hono kaungā Kalisitiane kei siʻi ange ko Tīmoté. ʻOku malava ke maʻu ʻa e enginaki ʻa Paulá ʻi he 1 Timote 6:​6-19. Naʻá ne lave ki he “ʻofa ki he paʻanga” ko ha konga ia ʻo ʻene fakamatala tefito ki he ngaahi meʻa fakamatelié. ʻOku lelei ke tau ako fakalelei ʻa e ngaahi fakamatala fakamānavaʻi ʻa Paulá, ʻi he vakai atu ki he fakamamafa ʻoku tuku ʻe he sōsaieti ʻo e ʻaho ní ki he paʻangá. Ko ha sivisiviʻi pehē ʻoku ʻaonga moʻoni koeʻuhi ʻokú ne fakahaaʻi mai ʻa e fakapulipuli ki he founga ke “puke [maʻu ai] ki he moʻui moʻoni.”

ʻOku fakatokanga mai ʻa Paula: “Ko e ʻofa ki he paʻanga ko e aka ʻoku tupu mei ai ʻa e ngaahi kovi kotoa pe, pea ko e niʻihi ʻi heʻenau ala ki he meʻa ko ia kuo nau hē mei he lotu, pea kuo nau hokohokaʻi ʻaki ʻa kinautolu ʻa e ngaahi mamahi lahi.” (1 Timote 6:10) ʻOku ʻikai pehē ʻe he konga tohi ia ko ení ʻoku kovi ʻa e paʻangá—pe ko ha toe konga Tohitapu kehe. Pea naʻe ʻikai foki ke pehē ʻe he ʻapositoló ko e paʻangá ko e tupuʻanga tefito ia ʻo e “ngaahi kovi” pe ko e paʻangá ko e aka ia ʻo e palopalema kotoa pē. ʻI hono kehé, ko e ʻofa ki he paʻangá ʻe lava ke hoko ko ha tupuʻanga—neongo kapau ʻoku ʻikai ko e tupuʻanga pē ia—ʻo e “ngaahi kovi” kotoa pē.

Tokanga Telia ʻa e Mānumanú

Ko e moʻoniʻi meʻa ʻo e ʻikai fakahalaʻi ʻa e paʻangá ʻi he ngaahi Konga Tohitapú ʻoku ʻikai totonu ke ne fakasiʻisiʻi ʻe ia ʻa e fakatokanga ʻa Paulá. Ko e kau Kalisitiane ʻoku kamata ke nau ʻofa ki he paʻangá ʻoku nau moʻuangofua ʻi he ngaahi palopalema kotoa pē, ko e kovi taha aí ʻa e hē ko ia mei he tuí. ʻOku toe fakaivimālohiʻi ʻa e foʻi moʻoni ko ení ʻi he meʻa naʻe leaʻaki ʻe Paula ki he kau Kalisitiane ʻi Kolosé: “Ko ia mou ʻai ke mate leva homou ngaahi kupu ʻoku ʻi mamani, ko e . . . holi pango; kaeʻumaʻā ʻa e manumanu, ʻa ia ko e tauhi aitoli tofu pe ia.” (Kolose 3:5) ʻE anga-fēfē nai ʻa e iku ʻa e havalá, mānumanú, pe “ʻofa ki he paʻanga” ki he tauhi ʻaitolí? ʻOku ʻuhinga eni ʻoku hala ke fiemaʻu ha fale ʻoku lahi angé, ko ha kā foʻou ange, mo ha ngāue ʻoku tupu lelei angé? ʻIkai, ʻoku ʻikai ke kovi ha taha ia ʻo e ngaahi meʻá ni ʻiate ia pē. Ko e fehuʻí ia: Ko e hā ʻokú ne ueʻi ʻa e loto ʻo ha taha ke ne fiemaʻu ai ha taha ʻo e ngaahi meʻá ni, pea ʻoku fuʻu fiemaʻu moʻoni kinautolu?

Ko e kehekehe ʻi he vahaʻa ʻo e fiemaʻu anga-mahení mo e mānumanú ʻe lava nai ke fakahoa ia ki he kehekehe ʻi he vahaʻa ʻo e afi siʻisiʻi ʻoku ngaohi ai ʻa e meʻakaí pea mo e fuʻu afi lahi ʻokú ne keina ha vaotā. Ko e fiemaʻu totonu mo tāú ʻoku lava ke ʻaonga ia. ʻOkú ne ueʻi kitautolu ke tau ngāue pea ke fakatupu fua. ʻOku pehē ʻe he Palovepi 16:26: “Ko e fiekaia ʻa e tangata ngaue ʻoku tokoni ki heʻene ngaue: he ʻoku mateka atu ia ʻe hono ngutu.” Ka ko e mānumanú ʻoku fakatuʻutāmaki mo fakatupu ʻauha. Ko ha holi taʻemapuleʻi ia.

Ko e mapuleʻí ko ha palopalema tefito. ʻE hoko nai ʻa e paʻanga ʻoku tau tānakí pe ko e ngaahi meʻa fakamatelie ʻoku tau fiemaʻú ko ʻetau sevāniti, pe ʻe hoko ʻetau ngaahi fiemaʻú ko e sevāniti ʻa e paʻangá? Ko e ʻuhinga ia naʻe pehē ai ʻe Paula ko e hoko ko ha “tagata manumanu . . . [“ʻoku ʻuhinga iá ko e hoko ko ha tangata,” NW] tauhi tamabua.” (Efeso 5:​5, PM) Ke mānumanu ki ha meʻa moʻoni ʻoku ʻuhingá ʻoku tau tukulolo loto-lelei ki ai—ko hono moʻoní, ʻoku tau ʻai ko hotau ʻeiki mo hotau ʻotua, ʻa e meʻa ʻoku tau tauhí. ʻI hono kehé, ʻoku fiemaʻu mai ʻe he ʻOtuá ke: “ʻOua naʻa ai hao ʻOtua kehe, ʻo uaʻaki Au.”—Ekisoto 20:3.

Ko ʻetau mānumanú ʻokú ne toe fakahaaʻi ʻoku ʻikai te tau falala ʻe fakahoko ʻe he ʻOtuá ʻa ʻene talaʻofa ke tokonaki mai ʻa e meʻa ʻoku tau fiemaʻú. (Mātiu 6:33) Ko ia ai, ko e mānumanú, ʻoku iku ki ha tafoki mei he ʻOtuá. ʻI he ʻuhingá ni foki, ko e “tauhi aitoli” ia. ʻOku ʻikai ha ofo ʻi he fakatokanga mātuʻaki māʻalaʻala ʻa Paula fekauʻaki mo iá!

Naʻe toe fai foki ʻe Sīsū ha fakatokanga fakahangatonu ki he mānumanú. Naʻá ne fekauʻi kitautolu ke tau tokanga telia ʻa e holi ki he meʻa ʻoku ʻikai te tau maʻú: “Mou ʻā, ʻo leʻohi kimoutolu telia ʻa e ngaahi manumanu: he neongo oku fuʻu lahi ʻa e koloa ʻa ha taha, ka ʻoku ʻikai hoko ai ʻo tautau ʻene moʻui ki heʻene ngaʻotoʻota.” (Luke 12:15) Fakatatau ki he konga tohi ko ení pea mo e talanoa fakatātā ʻa Sīsū ki mui aí, ʻoku fakatefito ʻa e mānumanú ʻi he foʻi tui fakavalevale ko e meʻa ʻoku mahuʻinga ʻi he moʻuí ʻa e lahi ʻo e meʻa ʻoku maʻu ʻe ha taha. ʻE hoko nai ia ko e paʻangá, tuʻungá, mafaí pe ko e ngaahi meʻa peheé. ʻOku malava ke mānumanu ki ha meʻa ʻe lava ke maʻu mai. Ko e fakakaukaú nai ko hono maʻu ʻo e meʻa ko iá te ne ʻai kitautolu ke tau fiemālie. Kae fakatatau ki he Tohitapú mo e meʻa ʻoku hokosia ʻe he tangatá, ko e ʻOtuá pē ʻokú ne malava—pea te ne—fakatōliʻa ʻa ʻetau ngaahi fiemaʻu moʻoní, ʻo hangē ko e fakaʻuhinga ʻa Sīsū mo hono kau muimuí.—Luke 12:​22-31.

Ko e sōsaieti moʻumoʻua mo hehema ki he ngāueʻaki ʻa e koloá he ʻaho ní ʻoku nau lavameʻa ʻi hono tafunaki ʻa e ngaahi ongoʻi mānumanú. ʻI hono tākiekina ʻe he ngaahi founga olopoto kae mālohí, ʻoku hoko ai ʻo tui ʻa e tokolahi ko e meʻa ʻoku nau maʻú ʻoku ʻikai feʻunga. ʻOku nau fiemaʻu ha ngaahi meʻa lahi ange, lalahi ange, mo lelei ange. Lolotonga ʻoku ʻikai te tau ʻamanaki ke liliu ʻa e māmani takatakai ʻiate kitautolú, ʻe lava fēfē ke tau talitekeʻi fakafoʻituitui ʻa e hehemá ni?

Fepaki ʻa e Fiemālié mo e Mānumanú

Naʻe ʻomai ʻe Paula ʻa e fetongi ki he mānumanú, ʻa ia ko e fiemālié. ʻOkú ne pehē: “Bea i he e tau maʻu ae mea kai moe kofu, ke tau fiemalie ai.” (1 Timote 6:​8, PM) Ko e fakamatalaʻi ko eni ʻo e meʻa kotoa ʻoku tau fiemaʻu moʻoní—“ae mea kai moe kofu”—ʻoku ongo faingofua pe noa pē nai. ʻOku fakafiefiaʻi ʻe he ngaahi polokalama televīsoné ʻa e kakai tokolahi ʻa ia ʻoku ʻaʻahi ai ʻa e kau mamatá ki ha faʻahinga ongoongoa ʻoku nau nofo ʻi ha ngaahi ʻapi tuʻumālie. ʻOku ʻikai ko e founga ia ke aʻusia ai ʻa e fiemālié.

Ko e moʻoni, ʻoku ʻikai fiemaʻu ki he kau sevāniti ʻa e ʻOtuá ke nau nofo ʻi ha tuʻunga masiva ko e fakatupunga pē ʻe kinautolu. (Palovepi 30:​8, 9) Kae kehe, ʻoku fakamanatu mai ʻe Paula ʻa e ʻuhinga totonu ʻo e masivá: ko e hala he meʻakai, vala, mo e nofoʻanga feʻunga ke moʻui ai ʻi he feituʻu ʻoku nofo ai ha taha. ʻI he tafaʻaki ʻe tahá, kapau ʻoku tau maʻu ʻa e ngaahi meʻa ko iá, ʻoku tau maʻu ʻa e makatuʻunga ki he fiemālié.

Naʻe loto-totonu nai ʻa Paula fekauʻaki mo hono fakamatalaʻi ko ia ʻo e fiemālié? ʻOku malava moʻoni ke topono ʻi he ngaahi meʻa tefitó pē—ʻa e meʻakaí, valá mo e nofoʻangá? ʻOku totonu ke ʻiloʻi ʻe Paula. Naʻá ne tomuʻa hokosia ʻe ia ʻa e tuʻumālie mo e ngaahi lelei makehe ʻo e tuʻunga māʻolungá ʻi he kolo ʻo e kau Siú pea mo e hoko ko e tangataʻifonua Lomá. (Ngāue 22:28; 23:6; Filipai 3:5) Naʻe fuesia foki ʻe Paula ʻa e ngaahi faingataʻa lahi ʻi heʻene ngaahi ngāue fakamisinalé. (2 Kolinito 11:​23-28) ʻI he kotoa ʻo e meʻá ni, naʻá ne ako ai ha fakapulipuli ʻa ia naʻá ne tokoniʻi ia ke ne tauhi maʻu ʻa e fiemālié. Ko e hā ʻa e meʻá ni?

“Kuó U Ako ʻa e Fakapulipulí”

Naʻe fakamatala ʻe Paula ʻi he taha ʻo ʻene ngaahi tohí: “ʻOku ou lava ʻa e nofo moʻulaloa, pea ʻoku ou lava foki ʻa e mohu meʻa. [“Kuó u ako ʻa e fakapulipulí,” NW], ʻi heʻeku meʻa tāu taha mo hono kotoa, kau potopotoʻi ʻi he nofo makona mo e nofo fiekaia, mo e nofo mohumeʻa mo e nofo masiva.” (Filipai 4:12) Naʻe ongo mātuʻaki loto-falala, mo fakatuʻamelie ʻaupito ʻa Paula! ʻOku faingofua ke pehē naʻe tokamālie pē ʻene moʻuí ʻi he taimi naʻá ne tohi ai ʻa e ngaahi leá ni ka naʻe ʻikai ke pehē. Naʻá ne nofo pilīsone ʻi Loma!—Filipai 1:​12-14.

ʻI hono ʻomai ʻa e foʻi moʻoni fakapotopoto ko iá, ʻoku lave mālohi ai ʻa e konga tohi ko ení ki he ʻīsiu ʻo e fiemālié ʻo ʻikai ngata pē ʻi he ngaahi koloa fakamatelié kae toe pehē foki ki he ngaahi tuʻungá. Ko e tōtuʻa ʻo e tuʻumālié pe faingataʻá ʻoku malava ke ne sivi ʻetau ngaahi meʻa ʻoku fakamuʻomuʻá. Naʻe lea ʻa Paula ki ha ngaahi koloa fakalaumālie ʻa ia naʻá ne fakaivia ia ke ne fiemālie pē neongo pe ko e hā ʻa e ngaahi tuʻunga fakamatelié: “Oku ou faa fai ae gaahi mea kotoabe [ʻi he ʻOtua] oku ne fakamalohiʻi au.” (Filipai 4:​13, PM) ʻI he ʻikai te ne hanga ki heʻene ngaahi koloá, lahi pe siʻi, pe ki hono ngaahi tuʻungá, lelei pe kovi, naʻe hanga ʻa Paula ki he ʻOtuá ke ne fakatōliʻa ʻene ngaahi fiemaʻú. Ko e ola naʻe maʻu aí ko e fiemālie.

Ko e faʻifaʻitakiʻanga ʻa Paulá naʻe tautefito ʻa ʻene mahuʻingá kia Tīmote. Naʻe fakaʻaiʻai ʻe he ʻapositoló ʻa e kiʻi talavou ko iá ke ne tuli ki ha ʻalunga moʻui ʻa ia ʻokú ne tuku ʻa e anga-līʻoa fakaʻotuá pea mo ha vahaʻangatae vāofi mo e ʻOtuá ke muʻomuʻa ia ʻi he tuʻumālié. Naʻe pehē ʻe Paula: “Ka ko koe, ae tagata oe Otua, buna mei he gaahi mea ni; bea ke tuli ki he maonioni, moe aga faka-Otua, moe tui, moe ofa, moe faa kataki, moe agavaivai.” (1 Timote 6:​11, PM) Naʻe fakahanga nai ʻa e ngaahi lea ko iá kia Tīmote, ka ʻoku kaunga ia ki ha taha pē ʻokú ne fiemaʻu ke fakalāngilangiʻi ʻa e ʻOtuá pea mo maʻu ha moʻui fiefia moʻoni.

Naʻe fiemaʻu kia Tīmote ke tokanga telia ʻa e mānumanú ʻo tatau pē ki ha Kalisitiane kehe. ʻOku hā mahino, naʻe ʻi ai ʻa e kau tui koloaʻia ʻi he fakatahaʻanga ʻi ʻEfesoó, ʻa e feituʻu naʻá ne ʻi ai ʻi he taimi naʻe tohi atu ai ʻa Paulá. (1 Timote 1:3) Naʻe hū ʻa Paula mo e ongoongo lelei ʻo Kalaisí ki he senitā tuʻumālie fakakomēsiale ko ení, ʻo ne fai ha ngaahi fakaului lahi. ʻOku ʻikai ha veiveiua, ko ha tokolahi ʻo kinautolu ko e kakai koloaʻia, ʻo hangē ko ia ʻoku hoko moʻoni ʻi he niʻihi ʻi he fakatahaʻanga Kalisitiane he ʻaho ní.

Ko e fehuʻí leva, tautefito ki he fakamaama ʻo e akonaki ʻi he 1 Timote 6:​6-10: Ko e hā ʻoku totonu ke fai ʻe he kakai ʻoku hulu ʻenau paʻangá kapau ʻoku nau loto ke fakalāngilangiʻi ʻa e ʻOtuá? ʻOku pehē ʻe Paula ʻoku totonu ke nau kamata ʻaki hono sivisiviʻi ʻenau fakakaukaú. ʻOku maʻu ʻe he paʻangá ʻa e tākiekina ke ne langaʻi ha ngaahi ongoʻi ʻo e fiemālie ʻiate kita pē. ʻOku pehē ʻe Paula: “Ke ke naʻinaʻi kiate kinautolu ʻoku koloaʻia fakaemaama ko eni, ke ʻoua te nau angahiki, ʻumaʻā ke tuʻu ʻenau falala ki he koto taʻemaʻu na ko e koloa; ka ki he ʻOtua, ʻa ia ʻoku ne ʻomi ʻa e meʻa kehekehe ʻo fuʻu lahi, maʻatau fiemalie pe.” (1 Timote 6:17) Ko e kakai ko ia ʻoku koloaʻiá kuo pau ke nau sio ʻo fakalaka atu ʻi heʻenau paʻangá; ʻoku fiemaʻu ke nau hanga ki he ʻOtuá, ko e matavai tefito ia ʻo ha koloa pē.

Ka ko e fakakaukaú ko e konga pē ia ʻo e fakaleleiʻanga ke aʻusia ai ʻa e lavameʻá. ʻI hono fakamulitukú, ʻoku fiemaʻu ki he kau Kalisitiane koloaʻiá ke nau ngāueleleiʻaki ʻenau koloá. ʻOku enginaki mai ʻa Paula: ‘Ngāue ʻaonga, ke koloaʻia ʻi he ngāue leleí, ke nimahomo ʻo ʻangafietokoni.’—1 Timote 6:18.

“Ko e Moʻui Moʻoni”

Ko e taumuʻa tefito ʻo e akonaki ʻa Paulá, ko e fiemaʻu ke tau fakamanatu kiate kitautolu ʻa e mahuʻinga ʻo e ngaahi meʻa fakamatelié. ʻOku pehē ʻe he Folofola ʻa e ʻOtuá: “Ko e koloa ʻa e koloaʻia ko hono kolo malohi ia; pea ʻi heʻene lau aʻana ko e fuʻu ʻa maʻolunga.” (Palovepi 18:11) ʻIo, ko e malu ʻoku malava ke tokonaki mai ʻe he koloá ʻi hono fakamulitukú ko e anga pē ia ʻo e fakakaukaú pea ʻoku kākā moʻoni. ʻOku hala ke fakatefito ʻetau moʻuí ʻiate kinautolu kae ʻikai ʻi hono maʻu ʻo e hōifua ʻa e ʻOtuá.

Ko e taʻepau ʻo e koloaʻia fakamatelié ʻokú ne ʻai ai ia ke fuʻu mātuʻaki vaivai ʻaupito ke fokotuʻu ai ʻetau ʻamanakí. Ko e ʻamanaki moʻoní kuo pau ke fakamaʻu ia ki ha meʻa mālohi, mohu ʻuhinga, mo tuʻuloa. Ko e ʻamanaki ʻa e Kalisitiané ʻoku fokotuʻu maʻu ia ʻi hotau Tokotaha-Fakatupú, ʻa Sihova ko e ʻOtuá, pea mo ʻene talaʻofa ko e moʻui taʻengatá. Lolotonga ko e moʻoni ʻoku ʻikai lava ʻe he paʻangá ke fakatau mai ʻa e fiefiá, ʻoku toe moʻoni ange ʻa e ʻikai malava ʻe he paʻangá ke fakatau mai ʻa e fakamoʻuí. Ko ʻetau tui pē ki he ʻOtuá te ne malava ke ʻomai kiate kitautolu ʻa e ʻamanaki ko iá.

Ko ia, pe ʻoku tau koloaʻia pe masiva, tau tuli ki ha ʻalunga ʻi he moʻuí ʻa ia te ne ʻai kitautolu ke tau “fakatupu koloa ki he ʻOtua.” (Luke 12:21) ʻOku ʻikai ha meʻa ʻe toe mahuʻinga ange ʻi ha tuʻunga fakahōifua ki he Tokotaha-Fakatupú. Ko e ngaahi feinga kotoa ke tauhi maʻu iá ʻoku tokoni ia ki heʻetau ‘faʻoaki maʻatautolu ha tuʻunga lelei ki he ʻamuí, koeʻuhi ke tau puke ki he moʻui moʻoní.’—1 Timote 6:19.

[Fakatātā ʻi he peesi 7]

Naʻe ako ʻe Paula ʻa e fakapulipuli ʻo e fiemālié

[Fakatātā ʻi he peesi 8]

ʻOku malava ke tau fiefia mo fiemālie ʻi he meʻa ʻoku tau maʻú