ʻE Lava Ke Ke “Fakafaikehekeheʻi Fakatouʻosi ʻa e Tonú mo e Halá”?

“Mo mou sivi ʻo ʻilo, pe ko e ha ʻa e meʻa ʻe hōifua ai ʻa e ʻEiki.”—EFESO 5:10.

 1. ʻI he founga fē ʻoku malava ke fakapuputuʻu ai ʻa e moʻuí ʻi he ʻaho ní, pea ko e hono ʻuhingá?

“ʻOKU ou ʻilo, ʻe Sihova, ʻoku ʻikai ʻi he tangata hono hala: ʻoku ʻikai ʻi he tangata ʻoku haʻele ke fakaʻuli ʻene ʻalu.” (Selemaia 10:23) Ko e vakai fakapotopoto ʻa Selemaiá ʻoku kaunga mohu ʻuhinga ia kiate kitautolu ʻi he ʻaho ní. Ko e hā hono ʻuhingá? Koeʻuhi he ʻoku tau moʻui ʻi he “ngaahi taimi faingataʻa ke fekuki mo ia,” ʻo hangē ko ia naʻe tomuʻa tala ʻi he Tohitapú. (2 Timote 3:​1, NW) ʻI he ʻaho kotoa pē, ʻoku tau fetaulaki ai mo e ngaahi tuʻunga fakapuputuʻu ʻa ia ʻoku fiemaʻu ke tau fai ai ha ngaahi fili. Pe ʻoku lahi pe siʻi, ko e ngaahi filí ni ʻoku malava ke ʻi ai hano kaunga lahi ki heʻetau lelei—fakaesino, fakaeongo, mo fakalaumālié.

 2. Ko e hā ʻa e ngaahi fili ʻoku fakakaukau atu nai ki ai ʻoku maʻamaʻá, ka ʻoku anga-fēfē ʻa e vakai ia ʻa e kau Kalisitiane ʻosi fakatapuí ki he ngaahi meʻa peheé?

² Ko e ngaahi fili lahi ʻoku tau fai ʻi heʻetau moʻui fakaʻahó ʻoku fakakaukau nai ki ai ko ha founga-tuʻumaʻu pe ʻoku ongo maʻamaʻa. Ko e fakatātaá, ʻi he ʻaho taki taha, kuo pau ke tau fili ai ha ngaahi vala ke tau tui, ko e meʻakai ke tau kaí, ko e kakai ke tau sio ki aí, pea mo e hā fua. ʻOku tau faʻa meimei tafoki hake pē ʻo fai ʻa e ngaahi filí ni, ʻaki ha kiʻi fakakaukau siʻisiʻi pē ki ai. Ka ʻoku maʻamaʻa moʻoni ʻa e ngaahi meʻa peheé? Ki he kau Kalisitiane ʻosi fakatapuí, ko ha meʻa ia ke mātuʻaki tokanga lahi ki ai ʻi he fekauʻaki mo e ngaahi fili ʻoku tau fai ʻi hotau valá mo e fōtungá, ʻi heʻetau kaí mo e inú, pea ʻi heʻetau leá mo e ʻulungāngá ke nau tapua atu maʻu pē hotau ngafa ko e kau sevāniti ʻa e Fungani Māʻolungá, ko Sihova ko e ʻOtuá. ʻOku fakamanatu mai ai kiate kitautolu ʻa e ngaahi lea ʻa e ʻapositolo ko Paulá: “Pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pe ke ongoongolelei ai ʻa e ʻOtua.”—1 Kolinito 10:31; Kolose 4:6; 1 Timote 2:​9, 10.

 3. Ko e hā ʻa e ngaahi fili ʻoku mafatukituki moʻoni ke tokanga ki aí?

³ Pea ʻoku ʻi ai mo e ngaahi fili ʻoku toe mafatukituki ange ia ke fai ha tokanga ki ai. Ko e fakatātaá, ko e fili ke mali pe ke nofo taʻemalí, ʻoku ʻi ai ʻene kaunga lahi mo tuʻuloa ki heʻete moʻuí. Ko hono moʻoní, ko hono fili ʻa e tokotaha totonu ke mali mo iá, ke hoko ko hoto hoa ʻi he kotoa ʻo ʻete moʻuí, ʻoku ʻikai ko ha meʻa siʻisiʻi.a (Palovepi 18:22) Tānaki atu ki ai, ko ʻetau fili ʻa e ngaahi kaumeʻá mo e faʻahinga ke feohi mo iá, ʻi he akó, ʻi he ngāué, pea ʻi he fakafiefiá pea mo e vaʻingá ʻokú ne fakahoko ha ngafa tākiekina, naʻa mo papau, ʻi hotau tuʻunga fakalaumālié—pea mei ai, ki heʻetau lelei taʻengatá.—Loma 13:​13, 14; Efeso 5:​3, 4.

 4. (a) Ko e hā ʻa e malava ʻe hoko ʻo ʻaonga lahi tahá? (e) Ko e hā ʻa e ngaahi fehuʻi ʻoku fiemaʻu ke fakakaukau ki aí?

⁴ ʻI he fehangahangai mo e ngaahi meʻá ni kotoa, ʻoku ʻaonga moʻoni kiate kitautolu ke tau maʻu ʻa e malava ke fakafaikehekeheʻi ʻa e meʻa ʻoku tonú mo e meʻa ʻoku halá, pe ʻi he vahaʻa ʻo e meʻa ko ia ʻoku hā ngali tonú pea mo e meʻa ʻoku tonu moʻoní. “ʻOku ai ha hala ʻoku ha matamata totonu ki he tangata: ka ʻoku tuʻulu atu ki he ngaahi hala ʻoku fakatau ki he mate,” ko e fakatokanga ia ʻa e Tohitapú. (Palovepi 14:12) Ko ia ai, te tau ʻeke nai: ‘ʻE lava fēfē ke tau fakatupu ʻa e malava ko ia ke fakafaikehekeheʻi ʻa e tonú mo e halá? Ko fē ʻe malava ke tau hanga ki ai koeʻuhi ke maʻu ʻa e tataki ʻoku fiemaʻu ki heʻetau fili ʻoku faí? Ko e hā kuo fai ʻe he kakaí, ʻi he kuohilí mo e lolotongá, ʻo fekauʻaki mo e meʻá ni, pea ko e hā hono olá?’

Ko e “Poto Fiefilosefa, ʻA Ia ko e Koto Muna mo e Kākā” ʻo e Māmaní

 5. Ko e hā ʻa e faʻahinga māmani naʻe moʻui hake ai ʻa e muʻaki kau Kalisitiané?

⁵ Naʻe moʻui ʻa e kau Kalisitiane ʻo e ʻuluaki senitulí ʻi ha māmani naʻe puleʻi ʻe he ngaahi mahuʻingaʻia mo e ngaahi fakakaukau ʻa Kalisi mo Lomá. ʻI he tafaʻaki ʻe tahá, naʻe ʻi ai ʻa e ngaahi fiemālie mo e ngaahi tuʻumālie ʻo e founga moʻui faka-Lomá, naʻe fakakaukau ki ai ʻa e tokolahi ko e meʻa fakatupu meheka. ʻI he tafaʻaki ʻe tahá, ko e faʻahinga mohu ʻatamai ʻo e ʻahó naʻa nau fiefia ʻo ʻikai ngata pē ʻi he ngaahi fakakaukau fakafilōsefa ʻa Palato mo ʻAlisitōtoló kae toe pehē foki ki he ngaahi fakakaukau ʻa e kau ako kei foʻou angé, hangē ko e kau ʻEpikulioó mo e kau Sitoikó. ʻI he taimi naʻe haʻu ai ʻa e ʻapositolo ko Paulá ki ʻAtenisi ʻi heʻene fononga fakamisinale hono uá, naʻá ne fetaulaki ai mo e kau filōsefa ʻEpikuliō mo e Sitoiko ʻa ia naʻa nau fakakaukau naʻa nau māʻolunga ange ʻi he “siana pālau ni,” ʻia Paula.—Ngāue 17:18.

 6. (a) Ko e hā naʻe fakataueleʻi ʻa e niʻihi ʻo e muʻaki kau Kalisitiané ke nau faí? (e) Ko e hā ʻa e fakatokanga naʻe fakaongo mai ʻe Paulá?

⁶ Ko ia ai, ʻoku ʻikai faingataʻa ke mahinoʻi ʻa e ʻuhinga naʻe tohoaki ai ʻa e niʻihi ʻi he lotolotonga ʻo e muʻaki kau Kalisitiané ki he ngaahi tōʻonga fiemeʻa mo e ngaahi founga moʻui ʻa e kakai naʻe takatakai kiate kinautolú. (2 Timote 4:10) Ko e faʻahinga naʻa nau hoko ko e konga mo e kupu tefito ʻo e fokotuʻutuʻu ko iá naʻe hangē naʻa nau maʻu ai ʻa e ngaahi ʻaonga mo e ngaahi lelei lahi, pea ko e ngaahi fili naʻa nau faí naʻe hā ngali lelei. Naʻe hā ngali naʻe maʻu ʻe he māmaní ia ʻa e meʻa mahuʻinga ke foaki kae ʻikai maʻu ia ʻe he founga moʻui fakatapui faka-Kalisitiané. Kae kehe, naʻe fakatokanga ʻa e ʻapositolo ko Paulá: “Mou vakai naʻa faifai pea ai ha taha, te ne fai ʻaki ʻene poto fiefilosefa, ʻa ia ko e koto muna mo e kaka, ʻo ne holataki kimoutolu ʻi he ʻalunga ʻo e ngaahi tuʻutuʻuni fakaeonoʻaho ʻa e kakai, ʻio, ʻi he ʻalunga ʻo e ngaahi elemeniti ʻo e lotu ʻa ia ʻoku fakamaama, ʻo ʻikai ʻi he ʻalunga faka-Kalaisi.” (Kolose 2:8) Ko e hā naʻe lea pehē ai ʻa Paulá?

 7. Ko e hā ʻa e mahuʻinga moʻoni ʻo e poto ʻo e māmaní?

⁷ Naʻe fakaongo mai ʻe Paula ʻa e fakatokanga ko iá koeʻuhi naʻá ne ongoʻi ha fakatuʻutāmaki moʻoni naʻe tuʻu mei mui ʻi he fakakaukau ʻa e faʻahinga naʻe tohoakiʻi ʻe he māmaní. Ko ʻene ngāueʻaki ʻa e kupuʻi lea ko e “poto fiefilosefa, ʻa ia ko e koto muna mo e kākā” ʻoku tautefito ʻene mahuʻingá. Ko e foʻi lea ‘filōsefá’ ʻoku ʻuhinga moʻoni iá “ko e ʻofa mo e tuli ki he potó.” ʻOku ʻaonga nai ia ʻiate ia tonu. Ko hono moʻoní, ʻoku hanga ʻe he Tohitapú, tautefito ʻi he tohi ʻa Palovepí, ʻo fakalototoʻaʻi mai ʻa e tuli ki he faʻahinga totonu ʻo e ʻiló mo e potó. (Palovepi 1:​1-7; 3:​13-18) Kae kehe, naʻe hanga ʻe Paula ʻo fakatahaʻi ʻa e “poto fiefilosefa” mo e “koto muna mo e kākā.” ʻI hono fakalea ʻe tahá, naʻe vakai ʻa Paula ki he poto naʻe tuʻuaki mai ʻe he māmaní ko e koto muna ia mo e kākā. Naʻe hangē pē ha foʻi pula kuo ʻosi puhiʻí, naʻe hā fefeka mai, ka naʻe ʻikai hano ʻaonga. ʻE hoko moʻoni ko e koto taʻeʻaonga, naʻa mo ʻene fakatuʻutāmaki, ke fakatuʻunga ʻete fili ʻa e tonú mo e halá ʻi he meʻa taʻemoʻoni hangē ko e “poto fiefilosefa, ʻa ia ko e koto muna mo e kākā” ʻo e māmaní.

Ko e Faʻahinga ʻOku Nau Pehē ko e “Kovi ko e Lelei, pea ʻOku Lau ʻa e Lelei ko e Kovi”

 8. (a) Ko hai ʻoku hanga ki ai ʻa e kakaí ki ha faleʻí? (e) Ko e hā ʻa e faʻahinga faleʻi ʻoku ʻomaí?

⁸ ʻOku ʻikai ke fuʻu kehekehe ʻa e ngaahi meʻá ʻi he ʻahó ni. Ko hono moʻoní, ʻi he malaʻe kotoa pē ʻo e feinga fakaetangatá, ʻoku lahi fau ai ʻa e kau poto mataotaó. Ko e kau faleʻi ki he nofo malí mo e fāmilí, kau faʻu-kōlomú, faʻahinga ʻoku taku ko e kau faifotofota mataotaó, kau ʻasitalolosiá, kau taula fakafaʻahikehé, mo e niʻihi kehe ʻoku nau mateuteu ke fai ha faleʻi—ki ha totongi. Ka ko e hā ʻa e faʻahinga faleʻi ʻoku nau ʻomaí? ʻOku faʻa hoko, ʻo tuku ki tafaʻaki ʻa e ngaahi tuʻunga ia ʻa e Tohitapú ki he ʻulungaanga tāú kae hao hake ai ʻa ia ʻoku ʻiloa ko e ʻulungaanga foʻoú. Ko e fakatātaá, ʻi he lea ʻo fekauʻaki mo e fakafisi ʻa e puleʻangá ke lēsisita ʻa e “ngaahi mali ʻa e tangata mo e tangata mo e fefine pē mo e fefiné,” ko ha fakamatala ʻa ha ʻētita ʻi he nusipepa tuʻumaʻu ʻa Kānata ko e The Globe and Mail naʻe talaki ai: “ʻI he taʻu 2000, ʻoku ngali vale ki ha ongo meʻa feʻofoʻofani mo līʻoa ke na fakaʻikaiʻi ʻena fakaʻamu ʻofá koeʻuhi pē ko ʻena hoko ko e ongo meʻa tatau pē.” Ko e hehema ʻi he ʻaho ní ke kātakiʻi, ʻikai ko hono fakaangaʻi. Ko e meʻa kotoa pē ʻoku fakakaukau ki ai ʻoku tauʻatāina pē; ʻoku ʻikai kei ʻi ai ha tonu ia mo ha hala fakaʻaufuli.—Sāme 10:​3, 4.

 9. Ko e hā ʻoku faʻa fai ʻe he kakai ʻoku lau ʻoku tokaʻi ʻi he sōsaietí?

⁹ ʻOku hanga ʻa e niʻihi kehe ki he lavameʻa fakasōsialé mo e fakapaʻangá—ki he tuʻumālié mo e ongoongoá—ko e ngaahi faʻifaʻitakiʻanga ia ki hono fai ʻenau filí. Neongo ʻoku tokaʻi ʻa e tuʻumālié mo e ongoongoá ʻi he sōsaieti ʻo e ʻaho ní, ʻoku nau faʻa leaʻaki pē honau loungutú ʻo kau ki he ʻulungaanga lelei hangē ko e faitotonú mo e falalaʻangá. ʻI he tuli ki he mafaí mo e tupu fakaepaʻangá, ʻoku ʻikai ongoʻi loto-tautea ai ʻa e niʻihi ia ʻo fekauʻaki mo hono tukunoaʻi ʻa e ngaahi tuʻutuʻuní pea mo hono tāmalaki ʻa e ngaahi tefitoʻi moʻoni fakaeʻulungāngá. Ke maʻu ʻa e ongoongoá mo e manakoá, ʻoku fakataʻetaʻetokanga ai ʻa e niʻihi ʻo nau liʻaki ʻa e ngaahi meʻa mahuʻinga mo e ngaahi tuʻunga kuo fokotuʻú ʻi he leleiʻia ange ki he tōʻonga ko ia ʻoku matamatakehe mo fakaʻohovalé. Ko e olá ko ha sōsaieti taumuʻa fakatupu-paʻanga, fakangofua tavale ʻa ia ko hono motó ko e, “Ngofua ha meʻa pē.” ʻOku fai ha ofo ʻi he puputuʻu mo e hē ʻa e kakaí ʻi he taimi ʻoku hoko mai ai ki he tonú mo e halá?—Luke 6:39.

10. Kuo anga-fēfē hono fakamoʻoniʻi ʻa e moʻoni ʻo e ngaahi lea ʻa ʻAisea ʻo fekauʻaki mo e leleí pea mo e koví?

¹⁰ Ko e ngaahi nunuʻa fakamamahi ʻo e ngaahi fili taʻefakapotopoto naʻe fai ʻo makatuʻunga ʻi he tataki fehālaakí ʻoku takatakai kotoa ia ʻiate kitautolu—ko e movetevete ʻa e ngaahi nofo malí mo e ngaahi fāmilí, ngāuehalaʻaki ʻa e faitoʻo kona tapú mo e ʻolokaholó, ngaahi kau kengi toʻutupu anga-fakamālohi, fakaʻaluʻalú, ngaahi mahaki fakamafola ʻe he fehokotaki fakasinó, ko ha ngaahi fakatātā pē ia ʻe niʻihi. Ko hono moʻoní, ʻe malava fēfē ke tau ʻamanekina ha ola kehe ʻi hono siʻaki ʻe he kakaí ia ʻa e ngaahi tuʻunga kotoa, pe ngaahi tokoni ʻoku fai atú ʻi he taimi ʻoku hoko mai ai ki he tonú mo e halá? (Loma 1:​28-32) ʻOku hangē tofu pē ko ia naʻe talaki ʻe he palōfita ko ʻAiseá: “ʻOiaue ʻa kinautolu ʻoku lau ʻa e kovi ko e lelei, pea ʻoku lau ʻa e lelei ko e kovi; ʻoku nau tuku ʻa e poʻuli ko e maama, mo e maama ko e poʻuli; ʻoku nau tuku ʻa e kona ko e melie, mo e melie ko e kona! ʻOiaue ʻa kinautolu ʻoku poto ʻi he vakai ʻanautolu, pea ʻoku feʻao maʻu pe mo kinautolu ʻenau fakapotopoto!”—Aisea 5:​20, 21.

11. Ko e hā ʻoku taʻefakapotopoto ai ke falala kiate kita pē ʻi hono fakapapauʻi ʻa e tonú mo e halá?

¹¹ Ko e moʻoniʻi meʻa ko ia ʻa hono fiemaʻu ʻe he ʻOtuá ke fai ange ha fakamatala ʻe he kau Siu ko ia ʻo e kuonga muʻá ʻa ia naʻa nau hoko ʻo “poto ʻi he vakai ʻanautolu” ʻokú ne ʻai ke toe mahuʻinga ange ai kiate kitautolu ke tau fakaʻehiʻehi mei he falala kiate kitautolu pē ʻi hono fakapapauʻi ʻa e tonú mo e halá. ʻOku loto-tatau ʻa e kakai tokolahi ʻi he ʻahó ni ki he foʻi fakakaukau ko ia ko e “fakaongo pē ki ho lotó,” pe ko e “fai ʻa e meʻa ʻokú ke ongoʻi ʻoku tonú.” Ko ha foʻi laka lelei ia? ʻIkai, fakatatau ki he Tohitapú, ʻa ia ʻokú ne pehē mahino mai: “Ko e fungani ʻi he meʻa kākā ka ko e loto, pea ʻoku hilio hono kovi: ko hai te ne lava ke ʻilo ia?” (Selemaia 17:9) Te ke falala ki ha tokotaha kākā mo feifeitamaki ke ne tataki koe ʻi hono fai hoʻo filí? ʻIkai ʻaupito. Ko hono moʻoní, te ke fai nai ʻa e meʻa ʻoku fehangahangai mo ia ʻoku tala atu kiate koe ʻe ha tokotaha pehē. Ko e ʻuhinga ia ʻoku fakamanatu mai ai ʻe he Tohitapú kiate kitautolu: “Ko ia oku falala ki hono loto oona koe vale ia: ka ko ia oku alu fakabotoboto, e fakahaofi ia.”—Palovepi 3:​5-7; 28:​26, PM.

Ako ki he Meʻa ʻOku Fakahōifua ki he ʻOtuá

12. Ko e hā ʻoku fiemaʻu ai ke tau sivi ke ʻilo ʻa e “finangalo ʻo e ʻOtua”?

¹² Koeʻuhi ʻoku ʻikai totonu ke tau falala ki he poto ʻo e māmaní, pe ko kitautolu ʻi he taimi ʻoku hoko mai ai ki he tonú mo e halá, ko e hā ʻoku totonu ke tau faí? Fakatokangaʻi ʻa e akonaki māʻalaʻala mo taʻefakaʻalongaua ko ʻeni mei he ʻapositolo ko Paulá: “Ke ʻoua naʻa mou tuku ke fakaangatatau kimoutolu ki he maama ko eni: kae tuku ke fai ai pe homou liliu, he fakafoʻou ʻo homou ʻatamai, ke mou sivi ʻo ʻilo pe ko e ha ʻa e finangalo ʻo e ʻOtua, ʻa e meʻa ʻoku lelei, ʻa e meʻa te ne hōifua ai, ʻa e meʻa ʻoku haohaoa.” (Loma 12:2) Ko e hā ʻoku fiemaʻu ai ke tau sivi ke ʻilo ʻa e finangalo ʻo e ʻOtuá? ʻI he Tohitapú, ʻoku ʻomai ai ʻe Sihova ha ʻuhinga hangatonu kae mālohi, ʻo pehē: “Hange ʻoku maʻolunga ʻa e langi ʻi mamani, pehe ʻoku maʻolunga hoku ngaahi ʻalunga ʻi he ngaahi ʻalunga ʻomoutolu, mo ʻeku ngaahi fakakaukau ʻi he ngaahi fakakaukau ʻamoutolu.” (Aisea 55:9) Ko ia ai, ʻi he ʻikai ke falala ki he meʻa ko ia ʻoku ʻiloa ko e fakakaukau fakapotopotó, pe ngaahi ongoʻi leleí, ʻoku enginaki mai kiate kitautolu: “Mou sivi ʻo ʻilo, pe ko e ha ʻa e meʻa ʻe hōifua ai ʻa e ʻEiki.”—Efeso 5:10.

13. ʻOku anga-fēfē hono fakamamafaʻi ʻe he ngaahi lea ʻa Sīsū ʻoku lēkooti ʻi he Sione 17:3 ʻa e fiemaʻu ke ʻiloʻi ʻa e meʻa ʻoku fakahōifua ki he ʻOtuá?

¹³ Naʻe fakamamafaʻi ʻe Sīsū Kalaisi ʻa e fiemaʻu ko ʻení ʻi he taimi naʻá ne pehē ai: “Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.” (Sione 17:3) Ko e kupuʻi lea “fai ke ʻilo” ʻokú ne maʻu ha ʻuhinga loloto ange ia mei he “ilo” peé. Fakatatau ki he Vine’s Expository Dictionary, ʻokú ne “fakahaaʻi ha vā ʻi he vahaʻa ʻo e tokotaha ʻokú ne ʻiló pea mo e meʻa ʻoku ʻiloʻí; ʻi he tuʻunga ko ʻení, ko e meʻa ʻoku ʻiloʻí ʻoku ʻi ai hono mahuʻinga pe ʻoku mahuʻinga ki he tokotaha ʻokú ne ʻiló, pea toe pehē ki he vahaʻangatae kuo fokotuʻú.” Ke maʻu ha vahaʻangatae mo ha taha ʻoku ʻuhinga ia ki he meʻa lahi ange ʻo ʻikai ko hono ʻiloʻi pē pe ko hai ʻa e tokotaha ko iá, pe ko hai hono hingoá. ʻOku toe kau ki ai ʻa hono ʻiloʻi ʻa e ngaahi meʻa ʻoku saiʻia mo ʻikai saiʻia ai ʻa e tokotaha ko iá, ko hono ʻiloʻi ʻa ʻene ngaahi mahuʻingaʻiá, ko ʻene ngaahi tuʻungá—pea fakalāngilangiʻi kinautolu.—1 Sione 2:​3, 4; 4:8.

Akoʻi ʻEtau Ngaahi Mafai Fakaefakakaukaú

14. Ko e hā naʻe leaʻaki ʻe Paula ko e kehekehe tefito ia ʻi he vahaʻa ʻo e kau pēpē fakalaumālié mo e kakai matuʻotuʻá?

¹⁴ ʻE malava fēfē leva ke tau maʻu ʻa e malava ke fakafaikehekeheʻi ʻa e tonú mo e halá? ʻOku ʻomai ʻa e talí ʻe he ngaahi lea ʻa Paula ki he kau Kalisitiane Hepelū ʻi he ʻuluaki senitulí. Naʻá ne tohi: “ʻIlonga ʻa ia ʻoku meʻakaiʻaki ʻa e huʻakaú, ʻoku ʻikai te ne maheni mo e folofola ʻo e māʻoniʻoní, he ko ha pēpē ia. Ka ko e meʻakai fefeká ʻoku maʻá e kakai matuʻotuʻá ia, ki he faʻahinga ʻa ia fakafou ʻi hono ngāueʻakí kuo akoʻi ai ʻenau ngaahi mafai fakaefakakaukaú ke fakafaikehekeheʻi fakatouʻosi ʻa e tonú mo e halá.” Naʻe fakafaikehekeheʻi heni ʻe Paula ʻa e “huʻakaú,” ʻa ia naʻá ne fakamatalaʻi ʻi he veesi ki muʻá “ko e fanga kiʻi meʻa iiki ʻo e ngaahi folofola toputapu ʻa e ʻOtuá,” pea mo e “meʻakai fefeká,” ʻa ia ʻoku maʻá e “kakai matuʻotuʻá,” ʻa kinautolu “kuo akoʻi ai ʻenau ngaahi mafai fakaefakakaukaú ke fakafaikehekeheʻi fakatouʻosi ʻa e tonú mo e halá.”—Hepelu 5:​12-14, NW.

15. Ko e hā ʻoku fiemaʻu ai ʻa e ngāue mālohí ki hono maʻu ha ʻilo totonu ki he ʻOtuá?

¹⁵ ʻOku ʻuhinga leva ʻení, ko e ʻuluaki ʻi he meʻa kotoa, kuo pau ke tau ngāue mālohi ke maʻu ha mahino totonu ki he ngaahi tuʻunga ʻa e ʻOtuá ʻo hangē ko ia ʻoku ʻi heʻene Folofolá, ko e Tohitapú. ʻOku ʻikai ke tau hanga ki ha fakahokohoko ʻo e ngaahi meʻa ke fai mo e ngaahi meʻa ke ʻoua ʻe faí ke ne tala mai kiate kitautolu ʻa e meʻa ke tau fai nai pe ʻoua nai ʻe faí. ʻOku ʻikai ko ha tohi pehē ʻa e Tohitapú ia. ʻI hono kehé, naʻe fakamatalaʻi ʻe Paula: “Ko e potu Folofola kotoa pe ne fakamanava mei he ʻOtua, ʻoku ʻaonga foki ki he akonaki, ki he fakaʻilo hala, ki he fakatonutonu, ki he ngaohia ke maʻoniʻoni: koeʻuhiā ke tuʻu kakato ʻa e tangata fakaʻotua, kuo ʻosi sāuni ki he ngāue lelei fulipe.” (2 Timote 3:​16, 17) Ke maʻu ha ʻaonga mei he akonaki, valoki, mo e fakatonutonu ko iá, kuo pau ke tau ngāueʻaki hotau ʻatamaí mo e malava fakaefakakaukaú. ʻOku fiemaʻu heni ʻa e feinga, ka ko e olá—ko e hoko ʻo ‘tuʻu kakato [ai], kuo ʻosi sāuni ki he ngāue lelei fulipeé’—ʻoku tuha tonu pē mo ia.—Palovepi 2:​3-6.

16. Ko e hā ʻoku ʻuhinga ki ai ʻa e pehē ke te akoʻi ʻete ngaahi mafai fakaefakakaukaú?

¹⁶ Ko ia, hangē ko ia naʻe fakahaaʻi ʻe Paulá, ko e kakai matuʻotuʻá “kuo akoʻi ai ʻenau ngaahi mafai fakaefakakaukaú ke fakafaikehekeheʻi fakatouʻosi ʻa e tonú mo e halá.” ʻOku tau hoko mai ʻeni ki he poini tefito ʻo e meʻá ni. Ko e kupuʻi lea “kuo akoʻi ai ʻenau ngaahi mafai fakaefakakaukaú” ʻoku ʻuhinga moʻoni ia “ko e ngaahi ʻōkani ʻo e ongoʻí kuo akoʻi (hangē ha tokotaha fakamālohi-sinó).” (Kingdom Interlinear Translation) Ko ha tokotaha taukei fakamālohi-sino ʻi ha naunau kuo fili, ʻo hangē ko e ngaahi foʻi sēini ki he suingí pe ko ha pimi ke luelue palanisi aí, ʻoku malava ke ne fakahoko vave ʻaupito ʻa e ngaahi fāliunga aí ʻo hangē ʻoku fakafepakiʻi ai ʻa e kalāvité ia pe ko e ngaahi lao kehe fakaenatulá. Kuó ne mapuleʻi kakato ʻa e ngaahi mēmipa ʻo hono sinó ʻi he taimi kotoa pē, pea ʻokú ne meimei ongoʻi fakaenatula pē ʻa e ngaahi ngaʻunu kuo pau ke ne faí kae malava ke ne lavaʻi lelei ʻene kongá. Ko e kotoa ʻo e meʻá ni ko e ola ia ʻo e akoʻi fefeka mo e ʻahiʻahiʻi taʻetuku.

17. ʻI he ʻuhinga fē ʻoku totonu ai ke tau hangē ha kau fakamālohi-sinó?

¹⁷ Ko kitautolu foki kuo pau ke akoʻi ʻo hangē ko ha tokotaha fakamālohi-sinó, ʻi he tafaʻaki fakalaumālié, kapau ʻoku tau loto ke fakapapauʻi ko e ngaahi fili ʻoku tau faí ʻoku tonu maʻu pē. Kuo pau ke tau mapuleʻi ʻi he taimi kotoa pē ʻa ʻetau ngaahi ongoʻí mo e ngaahi mēmipa ʻo e sinó. (Mātiu 5:​29, 30; Kolose 3:​5-10) Ko e fakatātaá, ʻokú ke akonekina ho matá ke ʻoua ʻe sio ʻi he ngaahi meʻa taʻetāú, pe ko ho telingá ke ʻoua ʻe fanongo ki he ngaahi fasi pe lea ololaló? ʻOku moʻoni ʻoku takatakaiʻi kitautolu kotoa ʻe he meʻa ʻikai lelei peheé. Kae kehe, ʻoku kei fakatuʻunga pē ʻiate kitautolu pe te tau fakaʻatā ia ke faiaka ʻi hotau lotó mo hotau ʻatamaí. ʻOku malava ke tau faʻifaʻitaki ki he tokotaha-tohi-sāmé ʻa ia naʻá ne pehē: “E ikai teu tuku ha mea kovi i hoku ao: oku ou fehia ki he gaue anautolu kuo nau afe; e ikai bibiki ia kiate au. . . . Ko ia oku faa loi e ikai te ne nofo i hoku ao.”—Sāme 101:​3, 7, PM.

Akoʻi Hoʻo Ngaahi Mafai Fakaefakakaukaú Fakafou ʻi Hono Ngāueʻakí

18. Ko e hā ʻoku fokotuʻu mai ʻe he kupuʻi lea “fakafou ʻi hono ngāueʻakí” ʻi he fakamatala ʻa Paula ʻo fekauʻaki mo hono akoʻi ʻete ngaahi mafai fakaefakakaukaú?

¹⁸ Manatuʻi ʻoku malava ke tau akoʻi ʻetau ngaahi mafai fakaefakakaukaú “fakafou ʻi hono ngāueʻakí” ke fakafaikehekeheʻi fakatouʻosi ai ʻa e tonú mo e halá. ʻI hono fakalea ʻe tahá, ʻi he taimi kotoa pē ʻoku tau fehangahangai ai mo ha fili ke fai, ʻoku totonu ke tau ako ke ngāueʻaki ʻetau ngaahi mafai fakaʻatamaí ke ʻiloʻi pe ko e hā ʻa e ngaahi tefitoʻi moʻoni faka-Tohitapu ʻoku kau ki aí pea mo e founga ʻe malava ke ngāueʻaki ai kinautolú. Fakatupulekina ʻa e tōʻonga ko hono fai ʻa e fekumi ʻi he ngaahi tohi faka-Tohitapu kuo tokonaki ʻo fakafou mai ʻi he “tamaioeiki agatonu mo boto.” (Mātiu 24:​45, PM) Ko hono moʻoní, ʻoku malava ke tau fekumi ki he tokoni ʻa e kau Kalisitiane matuʻotuʻá. Ka neongo ia, ko e feinga fakafoʻituitui ʻoku tau fai ki hono ako ʻa e Folofola ʻa e ʻOtuá, fakataha mo e lotu kia Sihova ki heʻene tatakí mo hono laumālié, ʻe iku ʻo ne ʻomai ʻa e ngaahi pale lahi.—Efeso 3:​14-19.

19. Ko e hā ʻa e ngaahi tāpuaki ʻoku malava ke ʻatautolu kapau ʻoku tau akoʻi hokohoko ʻetau ngaahi mafai fakaefakakaukaú?

¹⁹ ʻI heʻetau akoʻi hokohoko ʻetau ngaahi mafai fakaefakakaukaú, ko e taumuʻá “ke ʻoua naʻa tau kei hoko ko e fanga kiʻi pēpē, ʻo felīlīʻaki ʻe he ngaahi peau mo feʻaveʻaki fano ʻe he ngaahi matangi ʻo e akonaki fakafou ʻi he kākā ʻa e kau tangata, fakafou ʻi he kākā ke fakahoko ʻa e faihalá.” (Efeso 4:​14, NW) ʻI hono kehé, makatuʻunga ʻi heʻetau ʻilo mo e mahino ki he meʻa ʻoku fakahōifua ki he ʻOtuá, ʻoku malava ai ke tau fai ʻa e ngaahi fili fakapotopotó, lalahi pe iiki, ʻa ia ʻoku ʻaonga kiate kitautolú, ʻo fakatupu langa hake ki hotau kaungālotú, pea hiliō ai ʻa e fakahōifua ki heʻetau Tamai fakahēvaní. (Palovepi 27:11) Ko ha tāpuaki mo ha maluʻi lahi ē ka ko ia ʻi he ngaahi taimi faingataʻá ni!

[Fakamatala ʻi lalo]

ʻE Lava Ke Ke Fakamatalaʻi?

• Ko e hā ʻa e malava ʻoku fiemaʻu ki hono fai ha ngaahi fili totonú?

• Ko e hā ʻoku taʻefakapotopoto ai ke hanga ki he kakai ongoongoá, pe ke falala ki he ngaahi ongoʻi pē ʻa kitautolú ʻi he taimi ʻoku fili ai ki he tonú mo e halá?

• Ko e hā ʻoku totonu ai ke tau fakapapauʻi ʻa e meʻa ʻoku fakahōifua ki he ʻOtuá ʻi he taimi ʻoku fai ai ʻa e ngaahi filí, pea ʻe malava fēfē ke tau fai pehē?

• Ko e hā ʻoku ʻuhinga ki ai ʻa e pehē ‘ke akoʻi ʻetau ngaahi mafai fakaefakakaukaú’?

[Fakatātā ʻi he peesi 9]

Ko e hanga ki he kau tuʻumālié mo e kau ongoongoá ki ha tatakí ʻoku taʻeʻaonga ia

[Fakatātā ʻi he peesi 10]

ʻI he hangē ko ha tokotaha fakamālohi-sino, kuo pau ke tau mapuleʻi kakato ʻa e kotoa ʻo ʻetau ngaahi ongoʻí mo e ngaahi mēmipa ʻo e sinó