ʻOku Fakafāʻūtahaʻi ʻa e Kakaí ʻe he Lotu Moʻoní

NEONGO ko e lotú fakalūkufua ʻoku hehema ke ne vahevahe ʻa e faʻahinga ʻo e tangatá, ko e lotu ki he ʻOtua moʻoni pē tahá ʻokú ne maʻu ʻa e mālohi ke fakafāʻūtahaʻi ʻa e kakaí. ʻI he taimi naʻe hoko ai ʻa ʻIsileli ko e puleʻanga fili ʻa e ʻOtuá, naʻe tohoakiʻi ʻa e kau Senitaile loto-moʻoni tokolahi ki he lotu moʻoní. Ko e fakatātaá, naʻe liʻaki ʻe Lute ʻa e ngaahi ʻotua ʻo hono fonua tupuʻanga ko Mōapé ʻo ne tala ange kia Nāomi: “Ko ho kakai ko hoku kakai, pea ko ho ʻOtua ko hoku ʻOtua.” (Lute 1:16) ʻI he aʻu mai ki he ʻuluaki senituli T.S., naʻe hoko ai ha fuʻu kau Senitaile tokolahi ko e kau lotu ʻa e ʻOtua moʻoní. (Ngāue 13:48; 17:4) Ki mui ai, ʻi he kamata ke fononga ʻa e kau ʻapositolo ʻa Sīsuú ki he ngaahi feituʻu mamaʻó mo e ongoongo leleí, naʻe fakafāʻūtahaʻi ai ʻa e kakai loto-moʻoni kehé ʻi he lotu ki he ʻOtua moʻoní. “Hoʻomou tafoki ki he ʻOtua; ʻo fulituʻa ki he ngaahi tamapua, ke hoko ko e kau tamaioʻeiki ʻa e ʻOtua ʻoku moʻui mo moʻoni,” ko e tohi ia ʻa e ʻapositolo ko Paulá. (1 Tesalonaika 1:9) ʻOku maʻu ʻe he lotu ki he ʻOtua moʻoní ʻa e mālohi fakaefāʻūtaha ko iá ʻi he ʻahó ni?

ʻOku tuʻukāivi ʻa e kau lotolotouá ʻo pehē ʻoku hala ke lea fekauʻaki mo e “kau lotu moʻoní” pe “ko e ʻOtua moʻoní.” ʻOku nau ongoʻi pehē nai koeʻuhi ʻoku ʻikai te nau lāuʻilo fekauʻaki mo ha matavai ʻa ia ʻe lava ke ʻilo mei ai ʻa e moʻoní. Ka ko e kau fekumi ki he moʻoní mei he ngaahi ʻātakai lahi kuo nau ʻiloʻi ko e lotú ʻoku ʻikai ko ha meʻa ia ke fakatuʻunga ʻi he saiʻia fakafoʻituituí. Ko e tokotaha pē taha ʻoku taau mo ʻetau lotú ko e Tokotaha-Fakatupu ʻo e ngaahi meʻa kotoa pē​—ʻa Sihova ko e ʻOtuá. (Fakahā 4:11) Ko ia ʻa e ʻOtua moʻoní, pea ʻokú ne maʻu ʻa e totonu ke ne fili ʻa e founga ke lotu ange ai kiate iá.

Ke tokoniʻi kitautolu ke tau ʻilo ki heʻene ngaahi fiemaʻú, kuo fetuʻutaki ai ʻa Sihova mo kitautolu ʻo fakafou ʻi heʻene Folofolá, ko e Tohitapú. Ko e meimei tokotaha kotoa pē ʻi he māmaní he ʻahó ni kuó ne maʻu ʻa e Tohitapú fakakātoa pe ko ha ngaahi konga pē ʻo ia. ʻIkai ngata aí, naʻe pehē ʻe he ʻAlo ʻo e ʻOtuá: “Kapau te mou nofo maʻu ʻi heʻeku akonaki, . . . ʻe faifai pea mahino kiate kimoutolu ʻa e moʻoni.” (Sione 8:​31, 32) Ko ia ai, ko e moʻoní, ʻe lava ke ʻiloʻi. Pea ko e laui miliona ʻo e kakai loto-totonu mei he ngaahi ʻātakai fakalotu kehekehe ʻoku nau tali loto-toʻa ʻa e moʻoni ko ení pea ʻoku nau hoko ai ʻo fāʻūtaha ʻi he lotu moʻoní.​​—Mātiu 28:​19, 20; Fakahā 7:​9, 10.

Fāʻūtaha ʻi Māmani Lahi ʻi Hotau Taimí!

Ko ha kikite mahuʻinga ʻi he tohi Tohitapu ʻa Sefanaiá ʻoku lau ai fekauʻaki mo e fakatahataha ʻa e kakai ʻo e ngaahi ʻātakai kehekehe. ʻOku fakamatala ai: “Hili ia teu [Sihova ko e ʻOtuá] omi ae lea maa ki he kakai, koeuhi ke nau ui kotoabe ki he huafa o Jihova, ke tauhi kiate ia i he uouagataha.” (Sefanaia 3:​9, PM) Ko ha fakatātā fakaʻofoʻofa moʻoni eni ʻo ha kakai kuo liliu ʻoku nau tauhi ʻa e ʻOtuá ʻi he fāʻūtaha!

ʻE hoko eni ʻafē? ʻOku pehē ʻe he Sefanaia 3:8: “Mou tatali kiate au​—ko Sihova ia mei he Taʻehamai—tatali ki he ʻaho o ʻeku tuʻu hake ke fai ha vete: he ko hoku totonu ke fakatefua ʻani kakai, ke tanaki ʻani puleʻanga, ke lilingi kiate kinautolu ʻeku houhau, ʻa e kakaha kotoa ʻo ʻeku ʻita; he keina ʻa mamani katoa ʻe he afi o ʻeku fuaʻa.” ʻIo, lolotonga ʻa e taimi ʻoku fakatahatahaʻi ai ʻe Sihova ʻa e ngaahi puleʻangá ka ʻi he ki muʻa ke ne huaʻi hifo kiate kinautolu ʻa ʻene houhau kakahá, ʻokú ne ʻoange ki he faʻahinga anga-vaivai ʻo e māmaní ha liliu ki ha lea maʻa. Ko e taimi ko iá ko e taimí ni, he ko e fakatahataha ʻa e ngaahi puleʻangá kotoa ki he tau ʻo e ʻaho lahi ʻo e ʻOtua Māfimafi-Aoniú ʻi ʻĀmaketoné ʻoku lolotonga fakahoko.​​—Fakahā 16:​14, 16.

Ke fakafāʻūtahaʻi ʻa hono kakaí, ʻoku ʻoange kiate kinautolu ʻe Sihova ha lea maʻa. Ko e lea foʻou ko ení ʻoku kau ai ha mahinoʻi totonu ʻo e moʻoni faka-Tohitapu fekauʻaki mo e ʻOtuá pea mo ʻene ngaahi taumuʻá. Ko e leaʻaki ʻa e lea maʻá ʻoku kau ki ai ʻa e tui ki he moʻoní, akoʻi ia ki he niʻihi kehé, pea moʻui ʻo fehoanaki mo e ngaahi lao pea mo e ngaahi tefitoʻi moʻoni ʻa e ʻOtuá. ʻOku fiemaʻu ki ai ʻa e mavahe mei he ngaahi meʻa fakapolitikale fakatupu mavahevahé pea mo hono toʻo atu mei he lotó ʻa e ngaahi fakakaukau siokita, hangē ko e anga tāufehiʻa fakamatakalí mo e mamahiʻi fonua fakatupu māvahevahe ʻo e māmani ko ení. (Sione 17:14; Ngāue 10:​34, 35) Ko e faʻahinga loto-totonu kotoa pē ʻoku nau maʻu ʻa e ʻofa ki he moʻoní ʻoku lava ke nau ako ʻa e leá ni. Fakakaukau atu ki he founga ʻo e hoko ʻa e kakai ʻe toko nima naʻe lave ki ai ʻi he kupu ki muʻá​—ʻa ia naʻa nau maʻu ha fakakaukau fakalotu kehekehe ki muʻa​—ʻo fāʻūtaha he taimí ni ʻi he lotu ki he tokotaha pea ko e ʻOtua moʻoni pē ia ʻe taha, ko Sihová.

ʻOku Nau Fāʻūtaha ʻi he Lotu Moʻoní

ʻI he taimi naʻe fakatau mai ai ʻe Fidelia, ko e tokotaha Katolika Loma līʻoá, ha Tohitapu ki he ngāue fakaako ʻa ʻene taʻahiné, naʻá ne kole ange ki heʻene pātelé ke ne fakamatalaʻi angé mei ai ʻa e meʻa naʻe hoko ki heʻene fānau ʻe toko nima naʻe maté. “Ko ha siva moʻoni ē ʻa e ʻamanakí!” ko ʻene leá ia. Ko ia ʻi he taimi naʻe ʻaʻahi atu ai kiate ia ʻa e Kau Fakamoʻoni ʻa Sihová, naʻá ne ʻeke ange ai kiate kinautolu ha fehuʻi tatau. ʻI hono lau ʻi heʻene Tohitapú tonu ʻa e moʻoni fekauʻaki mo e tuʻunga ʻo e kau maté, naʻá ne ʻiloʻi ai ʻa e anga ʻo hono kākaaʻi ia ʻe he siasí. Naʻá ne ako ai ʻoku ʻikai ke ʻiloʻi ha meʻa ʻe taha ʻe he maté pea ko ia ai ʻoku ʻikai te nau faingataʻaʻia ʻi Limipō pe ko ha toe feituʻu kehe. (Sāme 146:4; Koheleti 9:5) Naʻe liʻaki ʻe Fidelia ʻa ʻene ngaahi ʻīmisi fakalotú kotoa, mavahe mei he siasí, pea kamata ako ʻa e Tohitapú. (1 Sione 5:​21) ʻI he taʻu ʻe hongofulu fakamuimuí, kuó ne fiefia ai ʻi hono akoʻi ʻa e moʻoni Fakatohitapú ki he niʻihi kehé.

Ko Tara mei Kathmandu naʻá ne hiki ki ha fonua ʻa ia ʻoku ʻi ai ha ngaahi temipale faka-Hinitū siʻi pē. Ko ia naʻá ne ʻaʻahi ai ki ha siasi Metotisi ʻi he ʻamanaki ke fakalato ai ʻa ʻene ngaahi fiemaʻu fakalaumālié. Ka naʻe ʻikai te ne maʻu ha tali ki heʻene fehuʻi fekauʻaki mo e faingataʻaʻia ʻa e tangatá. Naʻe fetuʻutaki leva kiate ia ʻa e Kau Fakamoʻoni ʻa Sihová pea tuʻuaki ange ke ako Tohitapu mo ia. ʻOku pehē ʻe Tara: “Naʻá ku ʻilo ai ʻoku ʻikai lava ke tupu mei ha ʻOtua ʻofa ʻa e kotoa ʻo e faingataʻa ʻi he māmaní . . . naʻá ku fiefia ʻi he ʻamanaki ki ha māmani foʻou ʻo e melino mo e feongoongoí.” (Fakahā 21:​3, 4) Naʻe toʻo ʻe Tara ʻa ʻene ngaahi ʻīmisi faka-Hinituú, taʻofi ʻa e muimui ʻi he ngaahi tōʻonga fakalotu ʻa hono fonua tupuʻangá, pea maʻu ʻa e fiefia moʻoni ʻi he tokoni ke fakalato ʻa e ngaahi fiemaʻu fakalaumālie ʻa e niʻihi kehé ʻi he tuʻunga ko ha Fakamoʻoni ʻa Sihova.

Ko Panya, ʻa e tokotaha lotu-Putá, ko ha tokotaha fakahā monū ia ʻi he taimi naʻe ʻuluaki ʻaʻahi ai kiate ia ʻa e Kau Fakamoʻoni ʻa Sihová ʻi Bangkok, ko ia naʻe fakamānako ʻa e ngaahi kikite ʻi he Tohitapú kiate ia. Naʻe fakamatala ʻa Panya: “ʻI heʻeku ako ki he ʻuhinga ʻoku kehe ai ʻa e ngaahi tuʻunga lolotongá mei he meʻa naʻe muʻaki fakataumuʻa ki ai ʻa e Tokotaha-Fakatupú pea mo e founga naʻá ne fokotuʻutuʻu ai ke fakaleleiʻi ʻa e maumau kuo fakatupunga ʻe he faʻahinga naʻa nau talitekeʻi ia mo hono tuʻunga-haú, naʻe hangē ia kuo tatala atu ha pulonga mei hoku matá. Ko e meʻa kotoa pē fekauʻaki mo e pōpoaki ʻa e Tohitapú naʻe mātuʻaki feongoongoi. Naʻá ku hoko ai ʻo ʻofa ʻia Sihova ʻi hono tuʻunga ko ha tokotahá; naʻe ʻomai ʻe he meʻá ni kiate au ʻa e fakaueʻiloto ke fai ʻa e meʻa naʻá ku ʻiloʻi naʻe tonú. Naʻá ku vēkeveke ke tokoniʻi ʻa e niʻihi kehé ke nau sio ki he faikehekehe ʻi he vahaʻa ʻo e poto fakaetangatá pea mo e poto fakaʻotuá. Kuo liliuʻi moʻoni ʻa ʻeku moʻuí ʻe he poto moʻoní.”

Naʻe kamata ʻi ha taimi ke maʻu ʻe Virgil ha ngaahi veiveiua lahi ʻo fekauʻaki mo ʻene ngaahi tui fakalotú. ʻI he ʻikai te ne lotu ki he ʻOtuá ki ha founga ke tokoniʻi ai ʻa e kakai ʻuliʻulí pe ki he meʻa naʻá ne fakakaukau ki ai ko ha kautaha tāufehiʻa fakamatakali ʻa ia naʻe hā ngali ʻokú ne fakatupu ʻa e tāufehiʻa ki he kau pālangí, naʻá ne lotu ke maʻu ʻa e moʻoní, pe ko e hā ia, pe ko fē pē naʻe ʻi aí. “ʻI heʻeku ʻā hake ʻi he ʻaho hono hokó hili ʻa ʻeku lotu tōtōivi ki he ʻOtuá,” ko e manatu ia ʻa Virgil, “naʻá ku maʻu ha makasini Taua Leʻo ʻi he falé. . . . Kuo pau pē naʻe fakahū mai ʻi he lalo matapaá.” Naʻá ne ako lahi leva ʻa e Tohitapú mo e Kau Fakamoʻoni ʻa Sihová. ʻOkú ne hoko atu: “Ko e ʻuluaki taimi ia ʻi heʻeku moʻuí, naʻá ku ongoʻi fiemālie aí. . . . Naʻe kamata ke aata mai ha maama ʻo e ʻamanakí ʻi loto ʻiate au.” Naʻe vave ʻa e fāʻūtaha ʻa Virgil mo e faʻahinga ko ia ʻoku nau ʻoatu ki he kakaí ʻa e ʻamanaki moʻoni pē taha ʻo hangē ko ia ʻoku fokotuʻu ʻi he Folofola ʻa e ʻOtuá, ko e Tohitapú.

Ko Charo mei ʻAmelika Latiná naʻe maongo kiate ia ʻa e taimi naʻe sio ai ha Fakamoʻoni ko hono hingoá ko Gladys ki heʻene faingataʻaʻia ʻi heʻene fānau īkí peá ne kamata tokoniʻi ia ʻaki hono ʻave ia ki he māketí. ʻI he faai atu ʻa e taimí, naʻe tali ai ʻe Charo ha tuʻuaki naʻe fai ange ʻe Gladys​—ko ha ako Tohitapu taʻetotongi ʻi ʻapi. ʻI he ako ʻe Charo mei heʻene Tohitapú tonu ʻoku ʻikai ke ʻalu ʻa e kakai lelei kotoa pē ki hēvani ka ʻe tāpuakiʻi foki ʻe Sihova ʻa e tangatá ʻi he māmaní ʻaki ʻa e moʻui taʻengatá, naʻá ne ʻohovale. (Sāme 37:​11, 29) Kuo vahevahe atu ʻe Charo ʻa e ʻamanaki ko ení ki he niʻihi kehé ʻi he taʻu ʻe 15 ko eni kuo maliu atú.

Fakaʻuta atu ki hono nofoʻi ʻa e foʻi māmaní kotoa ʻe he kakai loto-moʻoni ʻoku nau fāʻūtaha ʻi he lotu kia Sihova, ko e ʻOtua moʻoni pē tahá! ʻOku ʻikai ko ha fakaʻānaua pē eni. Ko e meʻa ia kuo talaʻofa ʻe Sihová. Fakafou ʻi heʻene palōfita ko Sēfanaiá, naʻe fakahā ʻe he ʻOtuá: “Teu tuku foki i he lotolotoga oou, ae kakai agavaivai mo majiva, bea te nau falala ki he huafa o Jihova. E ikai [te nau] fai agahala . . . be lea loi; bea e ikai iloʻi i ho nau gutu ae elelo kākā: . . . bea e ikai fakamanavaheʻi akinautolu e ha taha.” (Sefanaia 3:​12, 13, PM) Kapau ʻoku fakamānako ʻa e talaʻofá ni kiate koe, tokanga ki he enginaki ʻa e Tohitapú: “Mou kumi kia Jihova, akimoutolu kotoabe ae agamalu oe fonua, kuo mou fai a ene fakamāu; kumi ki he maonioni, kumi ki he agamalu: hei ilo e fufu akimoutolu i he aho oe houhau o Jihova.”​—Sefanaia 2:​3, PM.