Maluʻi Ho Konisēnisí

KO E foʻi fakakaukau ko ia ʻo e puna ʻi ha vakapuna ko hono komipiutá ʻoku hala ʻa hono fakapolokalamaʻí ʻoku fakamanavahē. ʻI hono kehé, fakaʻuta atu naʻe liliu ʻe ha taha ʻa e founga tataki ʻa e vaká pe naʻá ne fai fakakaukauʻi hano ʻai ke hala ʻa hono fakamatalá! Sai, ʻi ha ʻuhinga fakaefakatātā, ko e meʻa tofu pē ia ʻoku feinga ha tokotaha ke ne fai ki ho konisēnisí. ʻOkú ne fakapapauʻi ke maumauʻi ʻa hoʻo founga tataki fakaeʻulungāngá. Ko ʻene taumuʻá ke ʻai koe ki ha ʻalunga ʻoku fepaki mo e ʻOtuá!—Siope 2:​2-5; Sione 8:44.

Ko hai ʻa e tokotaha maumau fulikivanu ko ení? ʻI he Tohitapú, ʻoku ui ai ia “ko e Ngata ʻo ono ʻaho, ʻa e toko taha ʻoku ui ko e Tevolo mo Setane, ʻa e toko taha ʻoku ne kākāʻi ʻa mamani kātoa.” (Fakahā 12:​9, fakaʻītali ʻamautolu.) Naʻe fai ʻa e vakai ki ai ʻi he ngāue naʻá ne fai ʻi he ngoue ko ʻĪtení, ʻi he taimi naʻá ne fakalotoʻi ai ʻa ʻIvi ʻaki hono ngāueʻaki ha fakaʻuhinga kākā ke ne tukunoaʻi ʻa e meʻa naʻá ne ʻiloʻi ʻoku totonú pea ke angatuʻu ki he ʻOtuá. (Senesi 3:​1-6, 16-19) Talu mei ai, mo hono puleʻi ʻe Sētane ʻa e tupulekina ʻo e ngaahi fokotuʻutuʻu kākaá fakakātoa ke tatakiʻaki ʻa e kakaí fakalūkufua ke nau fakafili ki he ʻOtuá. Ko e ala fakaangaʻi lahi taha fekauʻaki mo e ngaahi fokotuʻutuʻu ko ení ko e lotu loí.—2 Kolinito 11:​14, 15.

ʻOku Fakameleʻi ʻe he Lotu Loí ʻa e Konisēnisí

ʻI he tohi Tohitapu ʻa Fakahaá, ʻoku vakai ai ki he lotu loí ʻi he tuʻunga ko ha paʻumutu fakaefakatātā ʻoku ui ko Pāpilone ko e Lahi. Ko ʻene ngaahi akonakí kuó ne mioʻi ʻa e ngaahi ongoʻi fakaeʻulungaanga ʻa e kakai tokolahi pea kuó ne ʻai kinautolu ke nau fehiʻa pea aʻu ʻo fai ʻa e tōʻonga fakamālohi ki he faʻahinga ʻoku nau maʻu ʻa e ngaahi tui ʻoku kehé. Ko hono moʻoní, fakatatau ki he Fakahaá, ʻoku tukuakiʻi tefito ʻe he ʻOtuá ʻa e lotu loí ki he toto ʻo “kinautolu kotoa pē kuo mate tamateʻi ʻi mamani,” ʻo kau ai ʻa e kau lotu tonu ʻa e ʻOtuá.—Fakahā 17:​1-6, PM; Fakahā 18:​3, 24.

Naʻe fakatokanga ʻa Sīsū ki heʻene kau ākongá ʻo fekauʻaki mo e lahi ʻo hono mioʻi ʻe he lotu loí ʻa e ngaahi tuʻunga fakaeʻulungaanga ʻo e niʻihi ʻi he taimi naʻá ne pehē ai: “ʻOku ʻunu mai ha taimi, ʻa ia ʻe ʻilonga ai ha taha te ne tamateʻi kimoutolu, te ne lau kuo ne fai ha feilaulau ki he ʻOtua.” He kui fakaeʻulungaanga moʻoni ē ko e faʻahinga fakamālohi tāutaha ko iá! Naʻe pehē ʻe Sīsū: “Kuo ʻikai te nau ʻilo ʻa e Tamai, ʻumaʻā au.” (Sione 16:​2, 3, fakaʻītali ʻamautolu) ʻIkai fuoloa mei hono leaʻaki ʻe Sīsū ʻa e lea ko iá, naʻe fakapoongi tonu ai ia ʻi he mafai ʻo e kau taki lotu ʻe niʻihi, ʻa ia naʻe malava ke nau fakaleleiʻi ʻenau hiá ʻi honau konisēnisí. (Sione 11:​47-50) ʻI hono kehé, naʻe pehē ʻe Sīsū ko hono kau muimui moʻoní ʻoku fakaʻilongaʻi kinautolu ʻaki ʻa e ʻofa ʻoku ʻi honau lotolotongá. Ka ko ʻenau ʻofá ʻoku kei fakalahi atu pē, he ʻoku aʻu ia ki honau ngaahi filí.—Mātiu 5:​44-48; Sione 13:35.

Ko e toe founga ʻe taha kuo maumauʻi ai ʻe he lotu loí ʻa e konisēnisi ʻo e tokolahi ko hono fakahōhōʻiaʻi ko ia ʻa e faʻahinga ʻulungaanga, pe ʻoku siʻi, ʻoku hoko ʻo manakoá. ʻI hono tomuʻa tala ení, naʻe pehē ʻe he ʻapositolo ko Paulá: “ʻE faifai pea hoko ha kuonga, ʻa ia ʻe ʻikai te nau kātaki ai ʻa e tokateline haohaoa; ka te nau fokotuʻuniu hanau kau akonaki, ʻo fakatatau ki he ngaahi holi ʻanautolu, he veli honau telinga.”—2 Timote 4:3.

ʻI he ngaahi ʻahó ni, ʻoku fakaveli ʻe he kau taki lotú ʻa e telinga ʻo e kakaí ʻaki ʻenau pehē, ʻe ala tali nai ʻe he ʻOtuá ʻa e fehokotaki fakasino ʻi tuʻa mei he nofo malí. ʻOku fakamolemoleʻi ʻe he niʻihi ia ʻa e ngaahi tōʻonga fakasōtomá. Ko hono moʻoní, ʻoku tōʻonga tonu ʻaki ʻe he kau faifekau ʻe niʻihi ʻa e fakasōtomá. Ko ha kupu ʻi he nusipepa Pilitānia ko e Times naʻe pehē ai, ko e “toko taha tolu ʻo e kau faifekau fakasōtoma fai fakahāhaá” kuo fili kinautolu ki he Sinoti Pule ʻa e Siasi ʻIngilaní. ʻI hono liʻaki ʻe he kau taki lotú ʻa e tuʻunga fakaeʻulungaanga ʻa e Tohitapú pea siʻi ʻa e meʻa ʻoku fai ki ai ʻe honau ngaahi siasí, ko e hā ʻa e ngaahi tuʻunga ʻoku totonu ke tauhi ʻe he faʻahinga ʻi honau vāhenga-ngāue fakafaifekaú? ʻOku siʻi ʻa e ofo ʻi he mātuʻaki puputuʻu ʻaupito pē ʻa e laui milioná.

He lelei lahi ange ē ke tataki kitautolu ʻe he ngaahi moʻoni fakaeʻulungaanga mo fakalaumālie hangē ha maama fakaʻilonga kuo akoʻi ʻi he Tohitapú! (Sāme 43:3; Sione 17:17) Ko e fakatātaá, ʻoku akoʻi ʻe he Tohitapú ʻe ʻikai ha kau feʻauaki pe ha kau tono te nau “maʻu tofiʻa ʻi he Puleʻanga ʻo e ʻOtua.” (1 Kolinito 6:​9, 10) ʻOkú ne fakahā mai kiate kitautolu ko e kau tangata mo e kau fefine ʻoku nau liliu “ʻa e fai fakaʻenatula, ka nau hiki ki he anga ʻoku makehe mo natula” ʻoku nau “fai . . . ʻa e meʻa taʻetāu” ʻi he ʻafio mai ʻa e ʻOtuá. (Loma 1:​26, 27, 32) Ko e ngaahi moʻoni fakaeʻulungaanga ko ení ʻoku ʻikai ko e faʻu ia ʻe he tangata taʻehaohaoá; ko e ngaahi tuʻunga fakamānavaʻi ia ʻa e ʻOtuá, ʻa ia kuo ʻikai ʻaupito te ne liʻaki. (Kaletia 1:8; 2 Timote 3:16) Ka ʻoku maʻu ʻe Sētane ʻa e toe ngaahi founga kehe ke maumauʻi ai ʻa e konisēnisí.

Filifili ʻa e Fakafiefiá

ʻOku kovi feʻunga ʻa hono fakamālohiʻi ha taha ke ne fai ha ngāue kovi, ka ʻoku toe kovi ange ke ʻai ia ke ne loto ke fai ʻa e ngāue ko iá. Ko e taumuʻa eni ʻa e “ʻeiki ʻo māmani,” ko Sētané. Ke tongi ʻene fakakaukau ololaló ʻi he ʻatamai mo e loto ʻo e seselé pe taʻemahamahaló—tautefito ki he kau tōngofua lahi tahá, ʻa e fānaú—ʻokú ne ngāueʻaki ʻa e ngaahi tafaʻaki ʻoku ala fehuʻia hangē ko e ngaahi tohi, ngaahi faiva, fasi, ngaahi keimi ʻi he komipiutá mo e ngaahi tuʻuʻanga fakatātā fakalielia ʻi he ʻInitanetí.—Sione 14:30; Efeso 2:2.

“ʻOku sio ʻa e kau talavou [ʻi he ʻIunaite Seteté] ʻo fakafuofua ʻi he ngaahi tōʻonga fakamālohi ʻe 10,000 ʻi he taʻu taki taha,” ko e lau ia ʻa ha līpooti ʻi he nusipepa ko e Pediatrics, “ʻa ia ko e polokalama ʻa e fānaú ʻoku ʻi he tuʻunga fakamālohi lahi tahá.” ʻOku toe fakahaaʻi ʻe he līpōtí ko e “taʻu taki taha, ʻoku sio ai ʻa e kau taʻu hongofulu tupú ʻi he ngaahi maʻuʻanga fehokotaki fakasino, ngaahi fakahaaʻi taʻefakahangatonu ʻo e meʻa ʻoku koví mo e ngaahi hua ʻe meimei 15,000 nai.” Naʻa mo e vahaʻa taimi ʻoku mamataʻi lahi taha ai ʻa e televīsoné, naʻá ne pehē, “ʻoku hoko ai ʻo lahi hake ʻi he tuʻo 8 ʻa e fehokotaki fakasinó ʻi he houa, ʻo laka ia ʻi hono liunga fā ʻa e lahi ʻo iá ʻi he 1976.” ʻOku ʻikai ha ofo, naʻe toe ʻilo ʻi he ako ko ení ko e “lea fakalieliá ʻoku toe fakautuutu lahi foki mo ia.” Neongo ia, ʻoku fakatokanga fakatouʻosi mai ʻa e Tohitapú mo e ngaahi ako fakasaienisi lahi ko e kai tuʻumaʻu ʻi he meʻa ko iá ʻokú ne liliu ʻa e kakaí ki he toe kovi ange. Ko ia, kapau ʻokú ke loto moʻoni ke fakahōifuaʻi ʻa e ʻOtuá pea ke ke maʻu ha ʻaonga, tokanga ki he Palovepi 4:​23, ʻa ia ʻoku pehē ai: “Lama ho loto, he ʻoku founga mei ai ʻa e ngaahi meʻa ʻoku ʻasi ʻi he moʻui.”—Aisea 48:17.

ʻOku toe fakameleʻi ʻe he ngaahi fasi manakoa lahi ʻa e konisēnisí. Ko ha tokotaha hiva ʻa ia ko ʻene ngaahi hivá ʻoku manakoa lahi pea kau ʻi he fakahokohoko ʻo e ngaahi hiva fakataua lahi taha ʻi he ngaahi fonua ʻe niʻihi ʻo e Hahaké ʻokú ne “fai ha feinga makehe ke fakaʻohovale,” ko e fakatokanga ia ʻa ha līpooti ʻi he nusipepa ʻAositelēlia ko e Sunday Mail. ʻOku pehē ʻe he kupú “ko ʻene ngaahi hivá ʻokú ne vikiʻi ʻa e faitoʻo konga tapú, fehokotaki fakasino mo e kāinga ofí pea mo e tohotohó” pea ʻokú ne “hiva ʻo fekauʻaki mo hono fakapoongi ʻa hono uaifí pea lī hono sinó ʻi ha anovai.” Ko e ngaahi fakalea kehe naʻe lave ki aí ʻoku fuʻu kovi ʻaupito ia ke toe leaʻaki heni. Neongo ia, ko ʻene fasí ʻokú ne maʻu ai ha pale lāngilangiʻia. Te ke loto ke tō ʻi ho ʻatamaí mo e lotó ha ngaahi fakakaukau fakatupu maumau ʻo hangē ko ia ʻoku lave ki ai ʻi ʻolungá, neongo kapau ʻoku ʻai ke fakamānako lahi ʻaki ʻa e fasí? ʻOfa ke ʻoua ʻe pehē, he ko e faʻahinga ʻoku nau fai peheé ʻoku ʻuliʻi ai honau konisēnisí pea iku ʻo fakatupu ʻiate kinautolu “ha loto kovi,” ʻo ʻai ai kinautolu ko e ngaahi fili ʻo e ʻOtuá.—Hepelu 3:12; Mātiu 12:​33-35.

Ko ia, ʻai ke fakapotopoto hono fili hoʻo fakafiefiá. ʻOku fakaʻaiʻai kitautolu ʻe he Tohitapú: “ʻIlonga ʻa e ngaahi meʻa ʻoku moʻoni. ʻilonga ʻa e ngaahi meʻa ʻoku tāu, ʻilonga ʻa e ngaahi meʻa ʻoku totonu, ʻilonga ʻa e ngaahi meʻa ʻoku maʻa, ʻilonga ʻa e ngaahi meʻa ʻoku fakaʻofoʻofa, ʻilonga ʻa e ngaahi meʻa ʻoku ongoongolelei, ʻio, ka ai ha ʻulungaanga lelei, pea ka ai ha meʻa ʻoku fakamaloʻia, ko e ngaahi meʻa ia ke mou tokanga ki ai.”—Filipai 4:8.

ʻOku Uesia ʻe he Ngaahi Feohí ʻa Ho Konisēnisí

ʻI heʻena kei siʻí, naʻe fiefia ʻa Nili mo Falanisi ʻi he feohi lelei mo e kau Kalisitiane loto-moʻoní.a Ka, ʻi he faai mai ʻa e taimí, ko e lau ia ʻa Nilí, “Naʻe kamata ke u feohi mo e kakai hala.” Ko e ikuʻangá, ʻokú ne fakaʻiseʻisa lahi ai, ko ʻene faihia mo e tuku pilīsone. ʻOku tatau pē mo e meʻa naʻe hoko kia Falanisí. “Naʻá ku fakakaukau te u lava pē ke puleʻi ʻa ʻeku feohi mo e kau talavou ʻo e māmaní ʻo ʻikai te nau uesia au,” ko ʻene tangilāulaú iá. “Kae hangē ko e lea ʻi he Kaletia 6:​7, ‘Talaʻehai ʻoku ala pāʻusiʻi ʻa e ʻOtuá; he ʻilonga pe meʻa ʻoku to ʻe ha tangata, ko ia ia te ne utú foki.’ Naʻá ku ako ʻi ha founga faingataʻa ko au ʻoku halá kae tonu ʻa Sihova. ʻOku ou fehangahangai mo ha tautea tuku pilīsone ki he mate koeʻuhí ko e hala naʻá ku faí.”

Ko e kakai hangē ko Nili mo Falanisí ʻoku ʻikai te nau faʻa toki tafoki fakafokifā hake pē ki he faihiá; te nau ʻuluaki momou nai ʻi he fakakaukau ki aí. Ko e tēkiná ʻoku hehema ia ke hoko mei he sitepu ki he sitepu, ʻoku faʻa hoko ʻa e feohi koví ko e ʻuluakí ia. (1 Kolinito 15:33) ʻOku hoko atu nai ai ʻa e ngāuekoviʻaki ʻa e faitoʻo kona tapú mo e ʻolokaholó. Ko hono moʻoní, ko e konisēnisí kuo fakamatalaʻi feʻungamālie ia ko e “konga ʻo e angaʻitangatá ʻa ia ʻoku liliu ia ʻi he ʻolokaholó.” Mei ai, ko ha sitepu siʻi pē ʻoku toe pea hoko ki he faihiá pe ʻulungaanga taʻetāú.

Ko e hā leva ke laka ai ʻi he ʻuluaki sitepu ko iá? ʻI hono kehé, feohi mo e kakai poto ʻoku nau ʻofa moʻoni ʻi he ʻOtuá. Te nau tokoniʻi koe ke fakaivimālohiʻi ho konisēnisí koeʻuhi ke ne tataki totonu koe, ʻo fakahaofi ai koe mei he ngaahi mamahi lahi. (Palovepi 13:20) Neongo ʻokú na kei nofo pilīsone, ʻoku vakai he taimí ni ʻa Nili mo Falanisi ki hona konisēnisí ko ha meʻaʻofa fakaʻotua ia ʻoku fiemaʻu ke akoʻi totonu, ʻio mo tokangaʻi. Tānaki atu ki aí, ʻokú na ngāue mālohi ke langa hake ha vahaʻangatae lelei mo hona ʻOtua ko Sihová. Fai fakapotopoto, pea ako mei heʻena fehālaakí.—Palovepi 22:3.

Maluʻi Ho Konisēnisí

ʻOku tau fakahaaʻi ʻoku tau loto ke maluʻi hotau konisēnisí ʻi he taimi ʻoku tau langa hake ai ʻa e ʻofa mo e tui ki he ʻOtuá, ʻo ō fakataha mo ha manavahē lelei kiate ia. (Palovepi 8:13; 1 Sione 5:3) ʻOku fakahaaʻi ʻe he Tohitapú ko ha konisēnisi ʻoku hala ʻi he ngaahi tākiekina ko ení ʻoku faʻa ʻikai ke hoko ai ʻa e tuʻumaʻu fakaeʻulungāngá. Hangē ko ení, ʻoku lea ʻa e Sāme 14:1 ki he faʻahinga ʻoku nau pehē ʻi honau lotó: “Oku ʻikai ha ʻOtua.” ʻOku anga-fēfē hono uesia ʻe he taʻetui ko ení ʻa ʻenau tōʻongá? ʻOku hoko atu ʻa e vēsí: “Kuo nau fakakaʻanga, kuo nau fakalieliaʻi ʻenau ngaahi toʻonga.”

Ko e kakai ʻoku ʻikai te nau maʻu ʻa e tui moʻoni ki he ʻOtuá ʻoku ʻikai foki ke nau maʻu ha ʻamanaki papau ki ha kahaʻu lelei ange. Ko ia, ʻoku nau hehema ke moʻui pē maʻá e lolotongá, ʻo fakahōhōʻiaʻi ʻenau ngaahi holi fakakakanó. Ko ʻenau fakakaukaú: “ʻE, tau kai mo inu e, he ʻoku apongipongi ʻetau mate.” (1 Kolinito 15:32) ʻI he tafaʻaki ʻe tahá, ko e faʻahinga ko ia ʻoku nau hangataha ki he pale ʻo e moʻui taʻengatá ʻoku ʻikai ke ofeʻi kinautolu ki tafaʻaki ʻe he ngaahi mālie fakataimi ʻo e māmaní. Hangē ha komipiuta faifolau totonú, ʻoku hanga ʻe honau konisēnisi kuo akoʻí ʻo tauhi kinautolu ʻi he ʻalunga totonu ʻo e talangofua mateaki ki he ʻOtuá.—Filipai 3:8.

Ke tauhi maʻu ʻa e mālohi mo e totonu ʻo ho konisēnisí, ʻoku fiemaʻu ki ai ʻa e tataki tuʻumaʻu mei he Folofola ʻa e ʻOtuá. ʻOku tala mai ʻe he Tohitapú kiate kitautolu ko e tataki ko iá ʻoku ala maʻu ia, ʻi heʻene pehē ʻi ha tuʻunga fakaefakatātā: “ʻE fanongo ʻe ho telinga ki ha lea mei ho tuʻa, Ko eni ʻa e hala, fou ai; ka ai haʻo afe ki toʻomataʻu, pe ka ai haʻo afe ki toʻohema.” (Aisea 30:21) Ko ia, vaheʻi ha taimi ki ha lau Tohitapu fakaʻaho. ʻE fakaivimālohiʻi mo fakalototoʻaʻi koe ʻe he meʻá ni ʻi hoʻo fāinga ke fai ʻa e meʻa ʻoku totonú pe ʻi he taimi ʻoku taulōfuʻu ai ʻa e hohaʻá mo e loto-moʻuá ʻiate koé. Fakapapauʻi ʻe tataki fakaeʻulungaanga mo fakalaumālie koe ʻe Sihova kapau ʻe tuku ʻa hoʻo falala kakató kiate ia. ʻIo, faʻifaʻitaki ki he tokotaha-tohi-sāmé ʻa ia naʻá ne tohi: “Kuo u ʻai ʻa Sihova ʻi hoku ʻao maʻu pē; ko e meʻa ʻi heʻene ʻi hoku toʻomataʻu ko ia ai ʻe ʻikai te u ngaūe.”—Sāme 16:8; 55:22.

[Fakamatala ʻi lalo]

[Fakatātā ʻi he peesi 5]

Ko e lotu loi ʻoku fakamatalaʻi ʻi he Tohitapú ko “Babilone koe Lahi,” ʻoku kaunga ia ki hono fakavaivaiʻi ʻa e konisēnisi ʻo e tokolahi

[Maʻuʻanga]

Tāpuakiʻi ʻe he pātelé ʻa e kau taú: U.S. Army photo

[Fakatātā ʻi he peesi 6]

Ko e sio ʻi he fakamālohí mo e ʻulungaanga taʻetāú te ne maumauʻi ho konisēnisí

[Fakatātā ʻi he peesi 7]

Ko e tataki tuʻumaʻu mei he Folofola ʻa e ʻOtuá te ne maluʻi ho konisēnisí