Talanoa ki he Moʻuí
Naʻe Akoʻi ʻe Sihova Kiate Kimaua ʻa e Kātakí mo e Kītakí
FAKAMATALA FAI ʻE ARISTOTELIS APOSTOLIDIS
ʻI he ngaahi tafa moʻunga fakatokelau ʻo e ʻOtu Moʻunga Caucasus ʻoku tuʻu ai ʻa Pyatigorsk, ko ha kolo Lūsia ʻoku ʻiloa ʻi hono ngaahi vaitupu minuloló mo e ʻea leleí. Naʻe fāʻeleʻi au heni ki ha ongo kumi hūfanga Kalisi ʻi he 1929. ʻI he taʻu ʻe 10 ki mui ai, hili ʻa e meʻa fakamanavahē ʻo hono toʻo ʻa e kau tui kia Stalin, ko e fakalilifu mo e fakamaʻa fakamatakalí, naʻa mau toe hoko ai ko e kau kumi hūfanga, ʻi hono fakamālohiʻi kimautolu ke mau hiki ki Kalisi.
HILI ʻemau hiki ki Piraiévs, Kalisí, naʻe ʻi ai ha ʻuhinga mātuʻaki foʻou ʻaupito ʻo e ngaahi foʻi lea “kau kumi hūfangá” kiate kimautolu. Naʻa mau ongoʻi hangē ha kau sola fakaʻaufulí. Neongo ko au mo hoku taʻoketé naʻá ma maʻu ʻa e hingoa ʻo e ongo filōsefa Kalisi ʻiloa ko Sōkolotesi mo ʻAlisitōtoló, naʻe tātātaha ʻema fanongo ki hano ngāueʻaki ʻa e ongo hingoa ko iá. Naʻe ui kimaua ʻe he tokotaha kotoa ko e ongo kiʻi Lūsiá.
Taimi nounou mei he mapuna hake ʻo e Tau II ʻa Māmaní, naʻe mate ai ʻa ʻeku faʻē ʻofeiná. Naʻá ne hoko ko e tokotaha mahuʻinga taha ʻi homau ʻapí, pea naʻe fakatupu ongoʻi lōmekina ʻa ʻene molé. Koeʻuhi naʻá ne puke ʻi ha taimi, naʻá ne akoʻi au ke u fakahoko ʻa e ngaahi ngāue fakaʻapi lahi. Naʻe fakamoʻoniʻi ʻa e mātuʻaki ʻaonga ʻo e akó ni ki mui ange ʻi he moʻuí.
Taú mo e Fakatauʻatāiná
Ko e taú, ko e maʻu ʻe he kau Nasí, pea mo e laku pomu taʻemotu naʻe fai ʻe he ngaahi konga kau Fakatahatahá naʻá ne ʻai ʻa e ʻaho kotoa pē ke hā ngali ko e ʻaho fakaʻosí ia. Naʻe lahi fau ʻa e masivá, fiekaiá mo e maté. Mei he taʻu 11, naʻe pau ke u ngāue mālohi ai fakataha mo ʻeku tamaí koeʻuhi ke tokoniʻiʻaki kimautolu toko tolu. Naʻe fakatuaiʻi ʻa ʻeku ako fakamāmaní ʻe ha ʻilo fakangatangata ki he lea faka-Kalisí, pea pehē foki ki he taú mo hono nunuʻá.
Ko e maʻu ʻe he kau Siamané ʻa Kalisí naʻe ngata ia ʻi ʻOkatopa 1944. Taimi nounou mei ai, naʻá ku fetuʻutaki ai mo e Kau Fakamoʻoni ʻa Sihová. ʻI he lotolotonga ʻo e siva ʻa e ʻamanakí pea mo e tuʻunga fakamamahi ʻo e taimi ko iá, ko e ʻamanaki faka-Tohitapu fekauʻaki mo ha kahaʻu fakaʻofoʻofa ʻi he malumalu ʻo e Puleʻanga ʻo e ʻOtuá naʻe maongo ia ki hoku lotó. (Sāme 37:29) Ko e palōmesi ʻa e ʻOtuá fekauʻaki mo ha moʻui taʻehanongataʻanga ʻi he malumalu ʻo e ngaahi tuʻunga melino ʻi heni he māmaní naʻe fakamoʻoniʻi ʻa ʻene hoko ko ha faitoʻo fakafiemālie moʻoni ia ki hoku ngaahi kafó. (Aisea 9:7) ʻI he 1946, naʻá ku papitaiso ai mo ʻeku tamaí, ʻi hono fakahāhā ʻa ʻema fakatapui kia Sihová.
ʻI he taʻu hokó, naʻá ku maʻu ai ʻa e fiefia ʻi hono maʻu ʻa ʻeku ʻuluaki ngāue kuo vaheʻi maí ko e hoko ko e sevāniti tuʻuaki (naʻe ui ki mui ko e sevāniti makasini) ʻi he fakatahaʻanga hono ua naʻe fokotuʻu ʻi Piraiévs. Ko homau vāhenga-ngāué naʻe lele ia mei Piraiévs ʻo aʻu hifo ki Eleusis, ko hono mamaʻó ko e kilomita nai ʻe 50. ʻI he taimi ko iá, naʻe tokolahi ʻa e kau Kalisitiane pani ʻe he laumālié naʻa nau ngāue ʻi he fakatahaʻangá. Naʻá ku maʻu ai ʻa e monū ʻo e ngāue mo kinautolu pea ako meiate kinautolu. Naʻá ku fiefia ʻi he feohi mo kinautolú koeʻuhi naʻe lahi ʻaupito ʻa e ngaahi meʻa naʻa nau hokosia ke fakamatalaʻi mai ʻo fekauʻaki mo e ngāue tōtōivi naʻe fiemaʻu ki hono fakahoko ʻo e ngāue fakamalangá. Mei he ʻalunga ʻo ʻenau moʻuí, naʻe hā mahino mei ai ke tauhi loto-tōnunga ʻa Sihova, ʻoku fiemaʻu ki ai ʻa e kātaki lahi pea mo e kītaki. (Ngāue 14:22) He fiefia ē ko au ʻi he ʻi ai ʻa e fakatahaʻanga laka hake he 50 ʻa e Kau Fakamoʻoni ʻa Sihová ʻi he feituʻu ko ení he ʻahó ni!
Ko ha Pole Taʻeʻamanekina
ʻI ha taimi ki mui ai, naʻá ku hoko ai ʻo maheni mo Eleni, ko ha finemui Kalisitiane fakaʻofoʻofa mo faivelenga ʻi he kolo ko Patras. Naʻá ma fakamaʻu ʻi he aʻu mai ki he ngataʻanga ʻo e 1952. Kae kehe, ʻi he hili ha ngaahi māhina siʻi, naʻe hoko ai ʻa Eleni ʻo puke lahi ʻaupito. Naʻe ʻilo ʻe he kau toketaá ʻokú ne maʻu ha foʻi ngungu ʻi hono ʻutó, pea naʻe ʻi ha tuʻunga fakatuʻutāmaki ʻa hono tuʻungá. Naʻe pau leva ke fai hano tafa. Hili ha feinga lahi, naʻá ma malava ai ke maʻu ha toketā ʻi ʻAtenisi ʻa ia—neongo ʻa e taʻefeʻunga ʻa e ngaahi meʻa naʻe ala maʻu ʻi he taimi ko iá—naʻá ne loto-lelei ke fai ki heʻema ngaahi tui fakalotú pea fakahoko ha tafa ʻo taʻekau ai ha toto. (Livitiko 17:10-14; Ngāue 15:28, 29) Hili ʻa e tafá, naʻe kiʻi fakatuʻamelie ʻa e kau toketaá fekauʻaki mo e ngaahi meʻa ʻoku ʻamanekina mei hoku uaifi ʻi he kahaʻú, ka naʻe ʻikai ke fakangata ai ʻa e malava ke toe foki mai ʻa e mahakí.
Ko e hā naʻe ʻamanekina te u fai ʻi he tuʻungá ni? ʻI he vakai atu ki he liliu ʻa e ngaahi tuʻungá, ʻe totonu nai ke u fakangata ʻa e fakamaʻú pea tuku au ke u ʻataʻatā? ʻIkai! ʻI heʻeku fakamaʻú, naʻá ku fai ai ha palōmesi, pea naʻá ku loto ke ʻuhinga ʻa ʻeku ʻió ko e ʻio. (Mātiu 5:37) Naʻe ʻikai ʻaupito ke u fakaʻatā au ke fakakaukau ki ha meʻa kehe. ʻI he malumalu ʻo e tokangaʻi ʻe hono taʻoketé, naʻe fakaakeake hake ai ʻa Eleni ʻi ha tuʻunga, pea naʻá ma mali ʻi Tīsema 1954.
ʻI he taʻu ʻe tolu ki mui ai, naʻe toe foki mai ai ʻa e mahaki ʻo Eleni, pea naʻe pau ai ke fai ʻe he toketā tatau hano toe tafa. ʻI he taimi ko ení naʻá ne ngāue lahi ange ai ki loto ki he foʻi ʻutó koeʻuhi ke toʻo ʻosi ʻa e foʻi ngungú. ʻI hono ikuʻangá, naʻe hoko ai ʻo mamatea fakakonga ʻa hoku uaifí, pea ko e tafaʻaki ʻo hono ʻutó naʻá ne puleʻi ʻa ʻene leá naʻe uesia lahi. Naʻe malanga hake he taimi ko ení ha tuʻunga foʻou kakato ʻo ha ngaahi palopalema fihi kiate kimaua fakatouʻosi. Naʻa mo e ngāue faingofua tahá naʻe hoko ia ko ha fakafaingataʻaʻiaʻanga lahi ki siʻoku uaifí. Ko e hōloa ʻa hono tuʻungá naʻe fiemaʻu ai ʻa e ngaahi liliu mafatukituki ʻi heʻema founga-tuʻumaʻu fakaʻahó. Hiliō he meʻa kotoa, naʻe fiemaʻu ki ai ha kātaki mo e kītaki lahi ʻaupito.
Ko e taimi eni naʻe fakamoʻoniʻi ai ʻa e mahuʻinga taʻehanotatau ʻo e ako naʻá ku maʻu mei heʻeku faʻeé. ʻI he pongipongi taki taha, naʻá ku teuteu pongipongia ai ʻa e ngaahi meʻa kotoa naʻe fiemaʻu ki he maʻu meʻatokoní, pea kuki ia ʻe Eleni. Naʻá ma faʻa fakaafeʻi mai ha kau ʻaʻahi, ʻo kau ai ʻa e kau faifekau taimi-kakato, ko e kakai ʻa ia naʻá ma ako Tohitapu mo iá, pea mo e kaungā Kalisitiane masiva ʻi he fakatahaʻangá. Naʻa nau loto-tatau kotoa naʻe mātuʻaki ifo moʻoni ʻa e ngaahi meʻakai ko ení! Naʻá ku toe ngāue fakataha mo Eleni ʻi he ngaahi ngāue fakaʻapi kehé, koeʻuhi ke maʻa mo maau ʻa homa ʻapí. Ko e tuʻunga mātuʻaki fiemaʻu lahi ko ení naʻe pau ke hokohoko atu ia ʻi ha taʻu ʻe 30.
Faivelenga Neongo ʻa e Vaivaí
Naʻe mātuʻaki maongo kiate au mo e niʻihi kehé ʻa hono fakatokangaʻi, naʻe ʻikai lava ke fakasiʻisiʻi ʻe ha meʻa ʻe taha ʻa e ʻofa ʻa hoku uaifí kia Sihová pea mo ʻene faivelenga ʻi heʻene ngāué. ʻI he faai mai ʻa e taimí, fakataha mo e feinga kīkīvoi, naʻe lava ai ʻa Eleni ke fai ha fakamatala ʻiate ia pē ʻaki ha ngaahi foʻi lea mātuʻaki siʻi ʻaupito. Naʻá ne manako ke fakaofiofi ki he kakai ʻi he halá mo e ongoongo lelei mei he Tohitapú. ʻI heʻeku ʻalu ʻi he ngaahi fononga fakapisinisí, naʻá ku ʻave ai ia pea tau ʻa e kaá ʻo ofi ki ha ʻaluʻanga kakaiʻia. Naʻá ne fakaava ʻa e sioʻata ʻo e kaá ʻo fakaafeʻi ʻa e faʻahinga naʻe feʻaluʻakí ke nau ʻave ha ngaahi tatau ʻo e Taua Leʻo mo e ʻĀ Hake! ʻI he taimi ʻe taha, naʻá ne tufa ai ha tatau ʻe 80 ʻi he houa ʻe ua. Naʻá ne faʻa ngāueʻaki ʻo ʻosi ʻa e ngaahi makasini motuʻa kotoa ʻa ia naʻe ala maʻu ʻi he fakatahaʻangá. Naʻe toe kau maʻu pē ʻa Eleni ʻi he ngaahi founga kehe ʻo e malangá.
Lolotonga ʻa e ngaahi taʻu kotoa naʻe mahamahaki ai ʻa hoku uaifí, naʻá ne ʻi he ngaahi fakatahá maʻu pē mo au. Naʻe ʻikai ʻaupito te ne tō mei ha fakataha-lahi pe ko ha ʻasemipilī, naʻa mo e taimi naʻe pau ai ke ma folau ki muli koeʻuhi ko e fakatangaʻi ʻo e Kau Fakamoʻoni ʻa Sihová ʻi Kalisí. Neongo ʻa hono ngaahi fakangatangatá, naʻá ne maʻu fiefia ʻa e ngaahi fakataha-lahi ʻi ʻAositulia, Siamane, Saipalo mo e ngaahi fonua kehe. Naʻe ʻikai ʻaupito lāunga ʻa Eleni pe fakafiufiu, naʻa mo e taimi naʻe faʻa ʻai ai ʻe hoku ngaahi fatongia lahi ange ʻi he ngāue ʻa Sihová ke faingatāmaki kiate iá.
Naʻe hoko ʻa e tuʻungá ni ko ha ako kiate au ʻi ha vahaʻa taimi lōloa ʻi he kātakí mo e kītakí. Naʻá ku aʻusia ai ʻa e toʻukupu tokoni ʻo Sihová ʻi he taimi lahi. Naʻe fai ʻe he fanga tokouá mo e fanga tuofāfiné ʻa e ngaahi feilaulau lahi koeʻuhi ke tokoniʻi kimaua ʻi ha founga pē naʻe ala lavá, pea naʻe poupouʻi anga-ʻofa kimaua ʻe he kau toketaá. Lolotonga ʻa e ngaahi taʻu faingataʻa kotoa ko iá, naʻe ʻikai ʻaupito te ma hala ʻi he ngaahi meʻa naʻe fiemaʻu ki he moʻuí, neongo naʻe ʻai ʻe homa ngaahi tuʻunga faingataʻá ke ʻikai malava ke u maʻu ha ngāue taimi-kakato. Ko e ngaahi meʻa mahuʻinga pea mo e ngāue ʻa Sihová naʻe fakamuʻomuʻa taha maʻu pē ia.—Mātiu 6:33.
Kuo ʻeke ʻe he tokolahi pe ko e hā naʻá ne fakaivia kimaua lolotonga ʻa e ngaahi taimi faingataʻa ko iá. ʻI heʻeku toe sio atu ki ai he taimi ní, ʻoku ou ʻiloʻi ko e ako fakafoʻituitui ʻo e Tohitapú, lotu fakamātoato ki he ʻOtuá, maʻu tuʻumaʻu ʻa e ngaahi fakataha faka-Kalisitiané mo e kau faivelenga ʻi he ngāue fakamalangá naʻá ne ʻai ke mālohi ʻa ʻema kātakí mo e kītakí. Naʻá ma fakamanatu maʻu pē ʻa e ngaahi lea fakalototoʻa ʻo e Sāme 37:3-5: “Falala koe kia Sihova, ʻo fai lelei, . . . Tuʻu foki ʻi he ʻEiki hoʻo manako . . . Tekaki kia Sihova ho ʻalunga; ʻio falala ki ai, pea te ne fai ʻe ia.” Ko e toe veesi ʻe taha naʻe fakamoʻoniʻi ʻa ʻene mahuʻinga kiate kimauá ko e Sāme 55:22: “Li hoʻo kavenga kia Sihova, he te ne poupou koe ʻe ia.” ʻI he hangē ko ha kiʻi tama ʻoku falala kakato ki heʻene tamaí, naʻe ʻikai ke ngata pē ʻi heʻema lī ʻema ngaahi kavengá kia Sihová kae toe tuku foki ia kiate ia.—Semisi 1:6.
ʻI ʻEpeleli 12, 1987, lolotonga ʻa e malanga ʻa hoku uaifí ʻi muʻa ʻi homa falé, naʻe haʻaki mai ai ha matapā ukamea mamafa ʻi hono tuʻá, ʻo liaki ai ia ki he ʻaluʻangá, ʻo ne lavea lahi ai. Ko hono ikuʻangá, naʻe ʻikai ai pē te ne toe ʻiloʻi ha meʻa ʻi he taʻu ʻe tolu hono hokó. Naʻá ne mate ʻi he konga ki muʻa ʻo e 1990.
Tauhi ʻa Sihova ʻi he Lelei Taha ʻo ʻEku Malavá
ʻI he 1960, naʻe fakanofo ai au ke u ngāue ko ha sevāniti ʻi he fakatahaʻanga ʻi Nikaia, Piraiévs. Talu mei ai, kuó u maʻu ʻa e monū ʻo e ngāue ʻi ha ngaahi fakatahaʻanga kehe ʻi Piraiévs. Neongo naʻe ʻikai ʻaupito ke ʻi ai haʻaku fānau tonu, kuó u maʻu ʻa e fiefia ʻi hono tokoniʻi ʻa e fānau fakalaumālie tokolahi ke nau hoko ʻo tuʻumaʻu ʻi he moʻoní. Ko e niʻihi ʻo kinautolu ʻoku nau ngāue he taimí ni ko e kau mātuʻa, kau sevāniti fakafaifekau, kau faifekau tāimuʻa ʻi he fakatahaʻangá mo e kau mēmipa ʻo e fāmili Pētelí.
Hili ʻo e toe fakafoki mai ʻa e temokalatí ki Kalisi ʻi he 1975, naʻe toe malava ai ʻa e Kau Fakamoʻoni ʻa Sihová ke fai tauʻatāina ʻenau ngaahi fakataha-lahí, ʻo ʻikai pau ai ke nau toe toitoi ʻi he ngaahi loto vaó. Ko e taukei kuo maʻu ʻe he niʻihi ʻo kimautolu lolotonga hono fakahoko ʻa e ngaahi fakataha-lahi ʻi mulí naʻe fakamoʻoniʻi ʻa ʻene mahuʻinga lahi he taimi ko ení. Ko ia ai, naʻá ku maʻu ʻa e fiefia pea mo e monū ʻo e ngāue ʻi he ngaahi kōmiti fakataha-lahi kehekehe ʻi he ngaahi taʻu lahi.
ʻI he 1979 leva, naʻe fai ai ʻa e ngaahi palani ke langa ʻa e ʻuluaki Holo ʻAsemipilī ʻi Kalisí, ʻi he kauʻāfonua ʻo ʻAtenisí. Naʻe vaheʻi au ke u tokoni ʻi hono fokotuʻutuʻu mo fakahoko ʻa e ngāue langa lahi fau ko ení. Ko e ngāué ni naʻe toe fiemaʻu ki ai ha kātaki mo e kītaki lahi. ʻI he ngāue feʻunga mo e taʻu ʻe tolu fakataha mo e fanga tokoua mo e fanga tuofāfine feilaulauʻi-kita ʻe laui teaú naʻá ne fakatupu ai ha haʻi mālohi ʻo e ʻofa mo e fāʻūtaha ʻi homau lotolotongá. Ko e ngaahi manatu ki he langa ko ení kuo tohi tongi taʻealatāmateʻi ia ʻi hoku lotó.
Fakatōliʻa ʻa e Ngaahi Fiemaʻu Fakalaumālie ʻa e Kau Pōpulá
ʻI ha ngaahi taʻu siʻi ki mui ai, naʻe fakaava mai ai ha matapā foʻou ʻo e faingamālié. Ofi ki he feituʻu ngāue ʻo ʻeku fakatahaʻangá, ʻi Korydallos, ʻoku tuʻu ai ʻa e taha ʻo e ngaahi pilīsone lahi taha ʻi Kalisí. Kuo fakanofo au talu mei ʻEpeleli 1991, ke u ʻaʻahi ki he pilīsoné ni ʻi he uike kotoa pē ko ha faifekau ʻa e Kau Fakamoʻoni ʻa Sihová. ʻOku fakaʻatā ai au ke u fai ha ngaahi ako Tohitapu mo ha ngaahi fakataha faka-Kalisitiane mo e kau pōpula ʻoku nau mahuʻingaʻiá. Ko e tokolahi ʻo kinautolu kuo nau fai ʻa e ngaahi liliu lahi, ʻo fakamoʻoniʻi ai ʻa e mālohi kāfakafa ʻo e Folofola ʻa e ʻOtuá. (Hepelu 4:12) Kuo ʻai ʻe he meʻá ni ke maongo ia fakatouʻosi ki he tokotaha ngāue ʻi he pilīsoné mo e kau pōpula kehé. Ko e niʻihi ʻo e kau pōpula ʻa ia naʻá ku ako Tohitapu mo iá kuo tukuange pea ko e kau malanga kinautolu he taimí ni ʻo e ongoongo leleí.
Naʻá ku ako ʻi ha taimi mo e kau tila faitoʻo kona tapu ʻiloa ʻe toko tolu. ʻI heʻenau fai ʻa e fakalakalaka fakalaumālié, naʻa nau haʻu ki heʻenau ako Tohitapú kuo ʻosi tele mai honau kavá, helu maau honau ʻulú, pea tui ha sote mo ha hēkesi ʻi he lotolotonga ʻo ʻAokosí—ko e taha ia ʻo e ngaahi māhina vela taha ʻi Kalisí! Ko e talēkita ʻo e pilīsoné, ko e pule selá, pea mo e kau ngāue ʻe niʻihi naʻa nau fakavave mai mei honau ngaahi ʻōfisí ke sio ki he meʻa ngalikehe ko ení. Naʻe faingataʻa ke nau tui ki he meʻa naʻa nau sio ki aí!
Ko ha meʻa fakalototoʻa ʻe taha naʻe hokosiá naʻe hoko ia ʻi he tafaʻaki ʻo e kakai fefiné ʻi he pilīsoné. Naʻe kamata ai ha ako Tohitapu mo ha fefine naʻe ngāue pōpula ki he mate ʻi haʻane fakapō. Naʻe ʻiloa ia ʻi heʻene ngaahi founga angatuʻú. Kae kehe, naʻe vave ʻa hono fakahoko ʻe he moʻoni faka-Tohitapu naʻá ne akó ʻa e ngaahi liliu lahi ʻo fakamatala ai ʻa e tokolahi ʻo pehē naʻá ne hangē ha laione kuo liliu ki ha lamí! (Aisea 11:6, 7) Naʻe vave ʻa ʻene maʻu ʻa e tokaʻi mo e falala ʻa e talēkita ʻo e pilīsoné. Naʻá ku fiefia ʻi he sio kiate ia ʻokú ne fai ʻa e fakalakalaka fakalaumālie lelei pea aʻu ki he tuʻunga ko hono fakatapui ia kia Sihova.
Tokoniʻi ʻa e Vaivaí mo e Taʻumotuʻá
ʻI he sio ki he faitau fuoloa ʻa hoku uaifí mo e tuʻunga mahamahakí kuó ne ʻai au ke u ongongofua lahi ange ai ki he ngaahi fiemaʻu ʻa e kau puke mo e kau taʻumotuʻa ʻi homau lotolotongá. Ko e taimi kotoa pē ʻoku ʻomai ai ʻe heʻemau ngaahi tohí ʻa e ngaahi kupu ʻoku fakalotolahiʻi mai ai kimautolu ke kakapa atu ʻo fai ha tokoni ʻofa ki he faʻahinga tāutaha peheé, naʻe langaʻi hake ai ʻa ʻeku mahuʻingaʻiá. Naʻá ku tauhi mo tānaki ʻa e ngaahi kupu peheé. ʻI he mahili atu ha ngaahi taʻu, naʻá ku tānaki ai ki ha tukuʻanga pepa ha ngaahi peesi ʻoku laka hake he teaú—ʻo kamataʻaki ʻa e kupu ko e “Fakaʻatuʻi ki he Faʻahinga Taʻumotuʻá pea mo e Faʻahinga Faingataʻaʻiá,” ʻi he ʻīsiu ʻo Siulai 15, 1962, ʻo e Watchtower. Ko e lahi ʻo e ngaahi kupu ko ení naʻe fakahaaʻi ai ʻoku ʻaonga ki he fakatahaʻanga taki taha ke ne fai ha tokoni kuo ʻosi fokotuʻutuʻu ki he kau mahakí mo e taʻumotuʻá.—1 Sione 3:17, 18.
Naʻe fokotuʻu ʻe he kau mātuʻá ha kulupu ʻo e fanga tokoua mo e fanga tuofāfine ʻa ia naʻa nau fakafaingamālieʻi kinautolu ke tokangaʻi ʻa e ngaahi fiemaʻu ʻa e kau puke mo e taʻumotuʻa ʻi heʻemau fakatahaʻangá. Naʻa mau fokotuʻutuʻu ʻa e kau ngāue polé ki he ngaahi timi kehekehe—hangē ko e faʻahinga ʻa ia ʻe lava ke nau tokoni ʻi he lolotonga ʻa e ʻahó, ko e niʻihi ʻe lava ke nau tokoni ʻi he poʻulí, faʻahinga ʻe lava ke nau tokonaki ʻa e meʻalele, pea mo e faʻahinga naʻe malava ke nau faingamālie ʻi ha tuʻunga houa ʻe 24. Ko e faʻahinga fakamuimuí naʻe faʻuʻaki ia ha faʻahinga kulupu tuʻu mateuteu.
Ko e ola ʻo e ngaahi ngāue peheé kuo hoko ia ko e fakalototoʻa. Ko e fakatātaá, ko ha tuofefine mahamahaki ʻa ia naʻe nofo tokotaha naʻe maʻu atu ia ʻi he falikí ʻoku ʻikai te ne toe ʻilo ha meʻa lolotonga ʻa e taha ʻo e ngaahi ʻaʻahi fakaʻaho naʻe fai kiate iá. Naʻa mau fakahā ia ki ha tuofefine naʻe nofo ofi ai ʻa ia naʻe ʻi ai ʻene kā. Naʻá ne ʻave ʻa e tuofefine puké ki he falemahaki ofi tahá ʻi ha taimi naʻe hoko ko e lēkooti—ko e miniti pē ʻe hongofulu! Naʻe pehē ʻe he kau toketaá naʻe fakahaofi ʻe he meʻá ni ʻa ʻene moʻuí.
Ko e houngaʻia ʻoku fakahaaʻi ʻe he kau vaivaí mo e kau taʻumotuʻá ki he kau mēmipa ʻo e kulupú ʻoku mātuʻaki fakafiemālie. Ko hono maʻu ʻa e ʻamanaki ʻo e nofo mo e fanga tokoua mo e fanga tuofāfine ko ení ʻi he fokotuʻutuʻu foʻou ʻa e ʻOtuá ʻi he malumalu ʻo e ngaahi tuʻunga kehekehe, ʻoku fakalotomāfana. Pea ko hono ʻiloʻi naʻe tokoniʻi kinautolu ke nau kātaki koeʻuhi ko e poupou naʻa nau maʻu lolotonga ʻenau faingataʻaʻiá ko ha toe pale ia ʻe taha.
Kuo ʻOmai ʻe he Kītakí ʻa e Ngaahi Pale
ʻOku ou ngāue he taimí ni ko ha mātuʻa ʻi he taha ʻo e ngaahi fakatahaʻanga ʻi Piraiévs. Neongo ʻa e taʻumotuʻá mo e ngaahi palopalema fakaemoʻuileleí, ʻoku ou fiefia ʻi he kei lava ke u kau longomoʻui ʻi he ngaahi ngāue ʻa e fakatahaʻangá.
ʻI he faai mai ʻa e ngaahi taʻú, ko e ngaahi tuʻunga mafatukitukí, ngaahi pole faingataʻá, mo e ngaahi meʻa ʻoku hokonoá kuo fiemaʻu ki ai ha tuʻunga lahi ʻo e loto-toʻá mo e kītakí. Neongo ia, kuo ʻomai maʻu pē ʻe Sihova ʻa e mālohi ʻa ia ʻoku fiemaʻu ke ikuʻi ʻaki ʻa e ngaahi palopalemá ni. Kuó u aʻusia maʻu pē ʻa e moʻoni ʻo e ngaahi lea ʻa e tokotaha-tohi-sāmé: “ʻI heʻeku pehe, Kuo heke hoku vaʻe; ko hoʻo ʻofa, ʻEiki, naʻa ne puke hake. ʻI he lahi ʻa e hohaʻa ʻi hoku loto e ko hoʻo ngaahi fakanaʻa naʻe fakafiefiaʻi hoku laumalie.”—Sāme 94:18, 19.
[Fakatātā ʻi he peesi 25]
Mo hoku uaifí, ʻa Eleni, hili ʻa hono tafa tuʻo uá, ʻi he 1957
[Fakatātā ʻi he peesi 26]
ʻI ha fakataha-lahi ʻi Nuremberg, Siamane, ʻi he 1969
[Fakatātā ʻi he peesi 28]
Ko e kulupu ʻo e fanga tokoua mo e fanga tuofāfine ʻa ia naʻa nau tokoniʻi ʻa e kau puké mo e taʻumotuʻá