ʻE Lava Fēfē ke Maluʻi Koe ʻe he Malava Fakaefakakaukaú?

KO E ngaahi fuʻu peau lalahí ko ha ʻata fakaholomamata moʻoni ia ke mātā, ka ki he kau kauvaká ʻoku ʻuhinga iá ko e fakatuʻutāmaki. Ko e ngaahi fuʻu peau aake ko iá ʻe lava ke mole ai ʻenau moʻuí.

ʻI ha founga meimei tatau, ʻe fehangahangai nai ʻa e kau sevāniti ʻa e ʻOtuá mo e ngaahi tuʻunga mafasia fakautuutu ʻoku fakamanamana ke ne lōmekina kinautolu. Kuó ke fakatokangaʻi nai ko e ngaahi peau hokohoko ʻo e ngaahi ʻahiʻahí mo e fakatauelé ʻoku nau fakamafasiaʻi ʻa e kau Kalisitiané. ʻOkú ke fiemaʻu moʻoni ke fakafepakiʻi ʻosi kinautolu, kae fakapapauʻi ke fakaʻehiʻehi mei he tūkia fakalaumālié. (1 Timote 1:​19) Ko e malava fakaefakakaukaú ko ha konga mātuʻaki mahuʻinga ia ʻo ho maluʻí. Ko e hā ia, pea ʻoku anga-fēfē hono maʻu iá?

Ko e foʻi lea faka-Hepelū ʻoku liliu ko e “malava fakaefakakaukaú,” mezim·mahʹ, ʻoku haʻu ia mei he foʻi lea tefito ʻa ia ʻoku ʻuhingá “ke palani pe faʻufaʻu.” (Palovepi 1:​4, NW) Ko ia ai, ko e ngaahi liliu Tohitapu ʻe niʻihi ʻoku liliu ai ʻa e mezim·mahʹ ko e “fakapotopoto” pe “tomuʻa ʻilo.” Ko e kau mataotao faka-Tohitapu ko Jamieson, Fausset, mo Brown ʻoku nau fakamatalaʻi ʻa e mezim·mahʹ ko ha “lāuʻilo ʻa ia ʻe hao ai mei he koví pea maʻu ʻa e tuʻunga lelei.” ʻOku fakahuʻunga ʻi he meʻá ni ʻa e fakakaukau lele lōloa pea pehē ki he ngaahi ola ʻoku hoko vave ʻi heʻetau ngaahi tōʻongá. ʻI hono maʻu ʻa e malava fakaefakakaukaú, te tau fakakaukau lelei ai ki heʻetau ngaahi filí ki muʻa ke tau fai ha meʻa, tautefito ʻi he taimi kuo pau ke fai ai ʻa e ngaahi fili mahuʻingá.

ʻI he taimi ʻoku fai ai ʻe ha tangata ha ngaahi fili ʻaki ʻa e malava fakaefakakaukaú fekauʻaki mo e kahaʻú pe fekauʻaki mo e ngaahi tuʻunga ʻokú ne lolotonga ʻi aí, ʻokú ne ʻuluaki ʻanalaiso ʻa e ngaahi fakatuʻutāmaki mo e ngaahi tōʻanga ʻe ngalingali hokó. ʻI hono ʻiloʻi pē ʻa e ngaahi fakatuʻutāmaki ʻe ala hokó, ʻokú ne fakapapauʻi ʻa e founga ʻe lava ke ne fakaʻehiʻehi ai mei aí, ʻo fakakaukau ki heʻene kaunga ki hono ʻātakaí mo e ngaahi feohí. ʻE lava ai ke ne palani ha ʻalunga ʻa ia ʻe hoko mai ai ha ola lelei, naʻa mo e ngaahi tāpuaki fakaʻotua. Tau vakai angé ki ha ngaahi fakatātā ʻaonga ʻokú ne fakatātaaʻi ʻa e founga ko ení.

Fakaʻehiʻehi mei he Tauhele ʻo e ʻUlungaanga Taʻetaau Fakaefehokotaki Fakasinó

ʻI hono ueʻi ʻe he matangí ʻa e ngaahi peau mālohí ki he taumuʻa ʻo ha vaka, ʻoku fakamatalaʻi ʻa e tuʻunga ko iá ko ha peau tuitonu. ʻOku ʻi he tuʻunga fakatuʻutāmaki ʻa e kau kauvaká ʻi ha mafuli honau vaká tuku kehe kapau ʻoku nau pōtoʻi ʻi hono fakafepakiʻi ʻa e ngaahi peau ʻoku haʻú.

ʻOku tau fehangahangai mo ha tuʻunga meimei tatau, ʻi heʻetau moʻui ʻi ha māmani kuo maʻunimā ʻe he fehokotaki fakasinó. ʻI he ʻaho kotoa pē, ʻoku tau fehangahangai ai mo e ngaahi peau ʻo e ngaahi fakakaukau mo e ngaahi fakakaukauloto fakakakanó. ʻOku ʻikai lava ke tau tukunoaʻi ʻa e ola ʻe lava ke nau fai ki heʻetau ngaahi holi fakaefehokotaki fakasino fakanatulá. Kuo pau ke tau ngāueʻaki ʻa e malava fakaefakakaukaú pea fakapapauʻi ke fetaulaki mo e fakatauelé, kae ʻikai ko e tēkina atu pē ki he ngaahi tuʻunga fakatuʻutāmakí.

Ko e fakatātaá, ko e kau tangata Kalisitiané ʻoku nau faʻa ngāue fakataha mo e faʻahinga ʻoku siʻi ʻenau tokaʻi ʻa e kakai fefiné, ʻo vakai kia kinautolu ko e faʻahinga pē ke fakahanga ki ai ʻa e fehokotaki fakasinó. ʻE fakakau nai ʻe he kaungāngāué ʻi heʻenau ngaahi fetalanoaʻakí ʻa e ngaahi hua fakalielia mo e ngaahi fakahuʻuhuʻunga ki he fehokotaki fakasinó. Ko e ʻātakai ko ení ʻe lava ke iku ia ʻo tō ai ʻa e ngaahi fakakaukau taʻetāú ki ha ʻatamai ʻo ha Kalisitiane.

ʻE toe pau foki ki ha fefine Kalisitiane ke ngāue pea te ne hokosia nai ai ʻa e ngaahi faingataʻa. Te ne ngāue fakataha nai mo e kakai tangata pea mo e kakai fefine ʻoku ʻikai te nau maʻu ʻa hono ngaahi tuʻunga fakaeʻulungāngá. Mahalo pē ʻe fakahaaʻi ʻe ha taha ʻi hono ngaahi kaungāngāue tangatá ha manako ʻiate ia. ʻI he kamatá, te ne faifakaʻatuʻi nai kiate ia, naʻa mo hono tokaʻi ia ʻi heʻene ngaahi fakakaukau fakalotú. Ko ʻene tokanga taʻemotú mo e hokohoko ofi fakaesinó ʻe lava ke ne ueʻi ia ke loto ai ki ha feohi vāofi ange.

ʻI he tuʻunga ko e kau Kalisitiané, ʻe lava fēfē ke tokoniʻi kitautolu ʻe he malava fakaefakakaukaú ʻi he ngaahi tuʻunga peheé? ʻUluakí, ʻe lava ke ne fakatokangaʻi kitautolu fekauʻaki mo e ngaahi fakatuʻutāmaki fakalaumālié, pea ko hono uá, ʻe lava ke ne ueʻi kitautolu ke tau palani ha tōʻonga feʻungamālie. (Palovepi 3:​21-​23) ʻI he ngaahi tuʻunga hangē ko ení, ʻe fakahaaʻi mahino nai ai ki he kaungāngāué ko ʻetau ngaahi tuʻungá ʻoku kehe, koeʻuhi ko ʻetau ngaahi tui Fakatohitapú. (1 Kolinito 6:​18) Ko ʻetau leá mo e ʻulungāngá ʻe lava ke ʻai ai ke mālohi ʻa e pōpoaki ko iá. ʻIkai ko ia pē, ko e ngaahi fengāueʻaki mo e ngaahi kaungāngāue ʻe niʻihi ʻe fiemaʻu nai ke fakangatangata.

Kae kehe, ko e ngaahi tenge fakaeʻulungaanga taʻetāú, ʻoku ʻikai fakangatangata pē ia ki he ngāueʻangá. Te nau toe malanga hake nai kapau ʻe fakaʻatā ʻe ha ongo meʻa mali ʻa e ngaahi palopalemá ke ne fakavaivaiʻi ʻa ʻena fāʻūtahá. Naʻe pehē ʻe ha faifekau fefonongaʻaki: “Ko e movete ʻa ha nofo mali ʻoku ʻikai ke hokonoa pē. ʻE tupu māmālie nai ʻa e mavahevahe ʻa e ongo meʻá, ʻo tātātaha ke na fetalanoaʻaki pe feohi fakaekinaua. Te na tuli nai ki he ngaahi koloa fakamatelié ke fakatōliʻaʻaki ʻa e tuʻunga ngeʻesi ʻo ʻena nofo malí. Pea koeʻuhi ʻoku siʻi ʻena feleaʻaki ʻi he fakahaaʻi ʻa e feʻofaʻakí, te na ongoʻi nai ʻoku tohoakiʻi kinaua ki he ngaahi mēmipa kehe ʻo e tangatá pe ko e fefiné.”

Naʻe hoko atu ʻa e faifekau taukei ko ení: “ʻOku totonu ke nofo hifo ʻi he taimi ki he taimi ʻa e ongo hoa malí ʻo fetalanoaʻaki pe ʻoku ʻi ai ha meʻa ʻokú ne maumauʻi hona vahaʻangataé. ʻOku totonu ke na palani ʻa e founga ʻe lava ai ke na ako, lotu, mo malanga fakatahá. Te na maʻu ʻaonga lahi ʻi he fetalanoaʻaki ‘ʻi he falé, ʻi he halá, ʻi heʻena tokoto hifó, pea ʻi heʻena tuʻu haké,’ ʻo hangē tofu pē ko ia ʻoku fai ʻe he ngaahi mātuʻá mo e fānaú.”—Teutalonome 6:​7-9.

Fekuki mo e Tōʻonga Taʻefakakalisitiané

Tuku kehe ʻa hono tokoniʻi kitautolu ke fehangahangai lavameʻa mo e ngaahi fakatauele fakaeʻulungāngá, ʻe toe lava ʻe he malava fakaefakakaukaú ʻo tokoniʻi kitautolu ke tau fekuki mo e ngaahi palopalema mo e kaungā Kalisitiané. ʻI hono ueʻi ʻe he matangí ʻa e ngaahi peaú ki he taumuli ʻo e vaká, ʻokú ne faʻu ai ʻa e meʻa ʻoku ui ko ha peau angimui. ʻE lava ʻe he ngaahi peaú ke hikiʻi ʻa e taumulí ʻo leʻei ki he tafaʻakí. ʻOku fakahanga leva heni ʻa e tafaʻaki ʻo e vaká ki he mata ʻo e peaú ʻo malava ke maumauʻi ai ʻe he peaú.

Ko kitautolu foki ʻe lava ke tau tōngofua ki he fakatuʻutāmaki ʻoku hoko mai mei ha tafaʻaki taʻeʻamanekina. ʻOku tau tauhi “uouangataha” ʻa Sihova fakataha mo hotau fanga tokoua mo e fanga tuofāfine Kalisitiane loto-tōnunga tokolahi. (Sefanaia 3:9) Kapau ʻoku tōʻongafai ʻi ha anga taʻefakakalisitiane ha taha ʻo kinautolu, ʻe hā ngali hangē ia ko ha taʻemalava ke ʻi ai ha falala pea te ne fakatupunga nai ai kia kitautolu ha faingataʻaʻia lahi. ʻE lava fēfē nai ʻe he malava fakaefakakaukaú ʻo taʻofi kitautolu mei he taʻemafamafatataú pea mo e mamahi tōtuʻá?

Manatuʻi “oku ikai ha tagata oku tae ha agahala.” (1 Tuʻi 8:​46, PM) Ko ia ai, ʻoku ʻikai totonu ke tau ʻohovale, ʻi ha taimi ʻe fakahohaʻasi nai ai pe fakalotomamahiʻi kitautolu ʻe ha tokoua Kalisitiane. ʻI hono ʻiloʻi ení, ʻe lava ai ke tau teuteu ki he meʻa ko ia ʻe ala hokó pea fakalaulauloto ki he founga ʻoku totonu ke tau taliʻakí. Naʻe anga-fēfē ʻa e tali ʻa e ʻapositolo ko Paulá ʻi he taimi naʻe lea ai ʻa e niʻihi ʻo hono fanga tokoua Kalisitiané fekauʻaki mo ia ʻi ha founga fakalotomamahi mo paetakú? ʻI he ʻikai mole ʻa ʻene mafamafatatau fakalaumālié, naʻá ne fakaʻosiʻaki ko hono maʻu ʻa e hōifua ʻa Sihová naʻe mahuʻinga ange ia ʻi hono maʻu ʻa e leleiʻia ʻa e tangatá. (2 Kolinito 10:​10-​18) Ko ha fakakaukau pehē te ne tokoniʻi kitautolu ke fakaʻehiʻehi ai mei ha tali fakavave ʻi he taimi ʻoku fakaʻitaʻi aí.

ʻOku hangē ia ʻi ha tuʻunga, ko e tau hotau louhiʻi vaʻé ʻi ha meʻa. ʻI heʻene hoko ʻa e meʻá ni, ʻe ʻikai nai ke nonga ʻetau fakakaukaú ʻi ha miniti ʻe taha pe ua. Ka ʻi he holo hifo ʻa e langá, ʻe lava ke tau fakaʻuhinga mo ngāue ʻi he tuʻunga anga-mahení. ʻI he tuʻunga meimei tatau, ʻoku ʻikai totonu ke tau tali vave ki ha lea pe tōʻonga taʻeʻofa. ʻI hono kehé, kiʻi mālōlō ʻo fakakaukau ki he ngaahi nunuʻa ʻo e sāuni taʻefakakaukaú.

Ko Malcolm, ko ha misinale ia ʻi he ngaahi taʻu lahi, ʻokú ne fakamatala ki he meʻa ʻokú ne fai ʻi he taimi ʻokú ne loto-mamahi aí. “Ko e ʻuluaki meʻa ʻoku ou faí ko e sio ki ha hokohoko ʻo ha lisi ʻo e ngaahi fehuʻi: ʻOku ou ʻita ʻi he tokoua ko ení koeʻuhi ko e fepaki ʻa homa ngaahi angaʻitangatá? ʻOku mahuʻinga moʻoni ʻa e meʻa naʻá ne leaʻakí? Ko e kaunga ʻo e malēliá ki heʻeku ngaahi ongó ʻa e meʻa ʻokú ne fakalahiʻi ʻa ʻeku ongoʻí? Te u vakai ki he ngaahi meʻá ʻi ha tuʻunga kehe ʻi ha ngaahi houa siʻi?” Kuo faʻa ʻiloʻi ʻe Malcolm, ʻoku ʻikai hano mahuʻinga ʻo e taʻefelotoí pea ʻoku lava pē ke tukunoaʻi.a

ʻOku tānaki mai ʻe Malcolm: “ʻI he taimi ʻe niʻihi, neongo ʻa ʻeku feinga kotoa ke fakaleleiʻi ʻa e tuʻungá, ʻoku kei taʻeangafakakaumeʻa pē ʻa e tōʻonga ia ʻa e tokoua ʻe tahá. ʻOku ou feinga ke ʻoua ʻe fakaʻatā eni ke ne fakahohaʻasi au. ʻI heʻeku fai pē ʻa e meʻa kotoa ʻoku ou malavá, ʻoku ou sio leva ki he meʻá ʻi ha founga kehe. ʻOku ou tuku fakaefakakaukau ʻa e meʻá ki ha ‘faile ʻo e meʻa ʻikai fakavavevavé,’ ʻo ʻikai ʻi he faile ʻoku ʻi ai ʻa e ngaahi meʻa ke tokanga fakafoʻituitui ki aí. ʻE ʻikai te u fakaʻatā ia ke ne maumauʻi fakalaumālie au pe uesia ʻa hoku vahaʻangatae mo Sihova pea mo hoku fanga tokouá.”

ʻI he hangē ko Malcolm, ʻoku ʻikai totonu ke tau fakaʻatā ʻa e faihala ʻa ha tokotaha ke ne fakahohaʻasi lahi kitautolu. ʻI he fakatahaʻanga kotoa pē ʻoku tokolahi ai ʻa e fanga tokoua mo e fanga tuofāfine fiefia mo loto-tōnunga. Ko ha meʻa lelei ia ke ʻaʻeva “uouangataha” mo kinautolu ʻi he ʻalunga faka-Kalisitiané. (Filipai 1:27) Ko hono manatuʻi ʻa e poupou anga-ʻofa ʻa ʻetau Tamai fakahēvaní te ne toe tokoniʻi kitautolu ke tauhi ʻa e ngaahi meʻá ʻi honau tuʻunga totonú.​—Sāme 23:​1-3; Palovepi 5:​1, 2; 8:​12.

ʻOua ʻe ʻOfa ki he Ngaahi Meʻa ʻo e Māmaní

Ko e malava fakaefakakaukaú ʻe lava ke ne tokoniʻi kitautolu ke fehangahangai ai mo e toe faingataʻa olopoto ʻe taha. ʻI hono ueʻi ʻe he matangí ʻa e peaú ki he kaokaó, pe tafaʻaki ʻo e vaká, ʻoku ʻiloa ia ko e peau fakapā. ʻI he ngaahi tuʻunga totonú, ko ha faʻahinga tahi pehē te ne tekeʻi māmālie nai ʻa e vaká ke mamaʻo mei heʻene taumuʻá. Kae kehe, lolotonga ha afā, ʻe lava ha peau fakapā ke ne fakatupunga ke mafuli ʻa e vaká.

ʻI he tuʻunga meimei tatau, kapau te tau ʻulutukua ki he tenge ke maʻu ʻa e meʻa kotoa ʻoku tuʻuaki mai ʻe he māmani fulikivanú, ko e founga moʻui tuli ko eni ki he meʻa fakamatelié ʻe lava ke ne takiheeʻi fakalaumālie kitautolu. (2 Timote 4:​10) ʻI he ʻikai taʻotaʻofí, ko e ʻofa ki he māmaní ʻe lava ke iku ia ʻo ne fakatupunga kitautolu ke liʻaki ʻosi hotau ʻalunga faka-Kalisitiané. (1 Sione 2:​15) ʻE lava fēfē ke tokoniʻi kitautolu ʻe he malava fakaefakakaukaú?

ʻUluakí, te ne tokoniʻi kitautolu ke tau fakafuofua atu ki he ngaahi fakatuʻutāmaki tofu pē ko ia te tau fehangahangai nai mo iá. ʻOku ngāueʻaki ʻe he māmaní ʻa e founga kākā kotoa ʻoku ala fakaʻuta atu ki aí ke ne fakataueleʻi kitautolu. ʻOkú ne pouaki taʻetuku ha founga moʻui kakato ʻoku pehē ʻoku totonu ke tuli ki ai ʻa e tokotaha kotoa​—ko e founga moʻui fakalaukau ʻa e koloaʻiá, fakaholomamatá pea mo e “lavameʻá.” (1 Sione 2:​16) ʻOku talaʻofa mai kia kitautolu ʻa e hohoi mo e leleiʻia ʻa e tokotaha kotoa, tautefito ki hotau ngaahi toʻumeʻá mo e kaungāʻapí. Ko e malava fakaefakakaukaú ʻe tokoni ia ke fakafepakiʻiʻaki ʻa e fakakaukau ko ení, ʻo fakamanatu mai ai kia kitautolu ʻa e mahuʻinga ʻo e ‘tauhi ke ʻatā mei he ʻofa ki he paʻangá,’ koeʻuhi kuo talaʻofa mai ʻe Sihova ‘ʻe ʻikai ʻaupito te ne liʻaki kitautolu.’​—Hepelu 13:​5, NW.

Ko hono uá, ʻe taʻofi kitautolu ʻe he malava fakaefakakaukaú mei he muimui ʻi he faʻahinga kuo nau “he mei he mooni.” (2 Timote 2:​18, PM) ʻOku mātuʻaki faingataʻa ke fakafepakiʻi ʻa e faʻahinga kuo tau saiʻia mo falala ki aí. (1 Kolinito 15:​12, 32-​34) Neongo kapau ʻoku tākiekina kitautolu ʻi ha tuʻunga siʻisiʻi ʻe he faʻahinga kuo nau liʻaki ʻa e ʻalunga faka-Kalisitiané, ʻe lava ke ne taʻofi ʻetau fakalakalaka fakalaumālié pea faifai pē ʻo ne ʻai ke tau ʻi ha tuʻunga fakatuʻutāmaki. ʻE lava ke tau hangē ha vaka ʻoku fakaʻuli ʻo mavahe mātuʻaki siʻisiʻi mei hono ʻalunga totonú. ʻI ha fononga lōloa, ʻe lava ke ʻikai aʻu ha vaka pehē ki he feituʻu naʻe taumuʻa ki aí ʻi ha tuʻunga mamaʻo lahi.​—Hepelu 3:​12.

Ko e malava fakaefakakaukaú ʻe lava ke ne tokoniʻi kitautolu ke fakapapauʻi pe ʻoku tau ʻi fē ʻi he tuʻunga fakalaumālié pea mo hotau tuʻunga fakalaumālie ʻi he kahaʻú. Mahalo pē ʻoku tau ʻiloʻi ʻa e fiemaʻu ke kau kakato ange ʻi he ngaahi ngāue faka-Kalisitiané. (Hepelu 6:​11, 12) Fakatokangaʻi ʻa e anga hono ngāueʻaki ʻe ha talavou Fakamoʻoni ʻe taha ʻa ʻene malava fakaefakakaukaú ke tokoniʻi ia ke tuli ki he ngaahi taumuʻa fakalaumālié: “Naʻá ku maʻu ʻa e faingamālie ke tuli ai ki ha ngāue ʻi he faiongoongó. Naʻe fakamānako moʻoni eni kiate au, ka naʻá ku manatuʻi ʻa e veesi ʻi he Tohitapú ʻa ia ʻoku pehē ai ‘ʻoku fakaʻaʻau ke mole ʻa mamani,’ lolotonga iá ‘ko ia ʻokú ne fai ʻa e finangalo ʻo e ʻOtuá, ʻokú ne nofo maʻu ʻo taʻengata.’ (1 Sione 2:17) Naʻá ku fakaʻuhinga ko e meʻa ʻoku ou faiʻaki ʻeku moʻuí ʻoku totonu ke tapua atu mei ai ʻa ʻeku tuí. Naʻe liʻaki ʻe heʻeku ongo mātuʻá ʻa e tui faka-Kalisitiané, pea naʻe ʻikai te u loto ke muimui ʻi heʻena faʻifaʻitakiʻangá. Ko ia naʻá ku fakapapauʻi ke moʻui ʻi he moʻui ʻo e taumuʻa pea hū ʻo kau ʻi he ngāue fakafaifekau taimi-kakató ko ha tāimuʻa tuʻumaʻu. Hili ha taʻu fakafiemālie ʻe fā, naʻá ku ʻiloʻi kuó u fai ʻa e fili totonú.”

Fehangahangai Lavameʻa mo e Ngaahi Afā Fakalaumālié

Ko e hā ʻoku fiemaʻu fakavavevave ai ke tau ngāueʻi ʻi he ʻahó ni ʻa e malava fakaefakakaukaú? Ko e kau kauvaká kuo pau ke nau tokanga ki he ngaahi fakaʻilonga fakatuʻutāmakí, tautefito ʻi he taimi ʻoku kamata tātā mai ai ha afaá. Kapau ʻoku momoko ange ʻa e ʻeá pea mālohi ange ai ʻa e mālohi ʻo e matangí, ʻoku nau haʻi fakamaʻu ʻa e ngaahi laʻi tāpuni ʻo e ʻaná ʻo mateuteu ki ha ngaahi tuʻunga faingataʻa ʻe hoko. ʻI he founga meimei tatau, kuo pau ke tau teuteu ke fehangahangai mo e ngaahi faingataʻa ʻo e afā mālohi lahí ʻi he ofi ʻa e fokotuʻutuʻu fulikivanu ko ení ki hono ngataʻangá. Ko e tuʻunga fakaeʻulungaanga ʻo e sōsaietí ʻoku movete ia, pea ko e ‘kakai koví . . . te nau fakaaʻau atu mei he kovi ki he kovi.’ (2 Timote 3:13) Hangē pē ko e toutou fanongo ʻa e kau kauvaká ki he ngaahi fakamatala ʻeá, kuo pau ke tau tokanga ki he ngaahi fakatokanga fakaekikite ʻa e Folofola fakamānavaʻi ʻa e ʻOtuá.​—Sāme 19:​7-​11.

ʻI heʻetau ngāueʻaki ʻa e malava fakaefakakaukaú, ʻoku tau ngāueʻaki ai ʻa e ʻilo ʻa ia ʻoku taki atu ki he moʻui taʻengatá. (Sione 17:3) ʻE lava ke tau tomuʻa fakakaukau ai ki he ngaahi palopalemá pea fakapapauʻi ʻa e founga ke fakaleleiʻi ai kinautolú. Te tau mateuteu ai ke ʻoua ʻe afe mei he ʻalunga faka-Kalisitiané, pea ʻe lava ke tau fakatoka ai “ha tuʻunga lelei ki he ʻamui” ʻaki hono fokotuʻu pea tuli ki he ngaahi taumuʻa fakalaumālié.—1 Timote 6:19.

Kapau ʻoku tau maluʻi ʻa e poto ʻaongá mo e malava fakaefakakaukaú, ʻoku ʻikai fiemaʻu ke tau “manavahe ki ha hoko fokifa ha fakailifia.” (Palovepi 3:​21, 25, 26) ʻI hono kehé, ʻe lava ke tau maʻu ʻa e fakafiemālie ʻi he talaʻofa ʻa e ʻOtuá: “He hu ʻa e poto ki ho loto, pea felatani ʻa e ʻilo mo ho laumalie; ʻe fai ho fakalekesi ʻe Fakakaukau [“malava fakaefakakaukau,” NW], ʻe leʻohi koe ʻe Fakahinohino.”—Palovepi 2:​10, 11.

[Fakamatala ʻi lalo]

[Fakatātā ʻi he peesi 23]

Ko e fetuʻutaki tuʻumaʻú ʻe langa hake ai ʻa e nofo malí