“Mou Leʻo”!

“Ko e meʻa ʻoku ou tala kiate kimoutolu ʻoku ou tala ki he kakai kotoa pē, Mou leʻo.”​—MAAKE 13:37.

 1, 2. (a) Ko e hā ʻa e lēsoni naʻe ako ʻe ha tangata ʻe taha fekauʻaki mo hono maluʻi ʻene koloá? (e) Mei he talanoa fakatātā ʻa Sīsū fekauʻaki mo ha tangata kaihaʻá, ko e hā ʻoku tau ako fekauʻaki mo e nofoʻaki ʻāʻaá?

NAʻE tauhi ʻe Juan ʻene ngaahi koloa mahuʻingá ʻi ʻapi. Naʻá ne faʻoaki ia ʻi hono lalo mohengá​—ʻi heʻene fakakaukau ko e feituʻu malu taha ia ʻi he falé. Kae kehe, ʻi he pō ʻe taha, lolotonga ʻena maʻu mohe mo hono uaifí, naʻe hū mai ai ha kaihaʻa ki he loki mohé. ʻOku hā mahino, naʻe ʻiloʻi lelei ʻe he kaihaʻá ʻa e feituʻu tonu ke fakasio ki aí. Naʻá ne toʻo fakamoulu atu ʻa e meʻa mahuʻinga kotoa pē mei he lalo mohengá pea pehē ki he paʻanga naʻe tuku ʻe Juan ʻi he toloa ʻi he tēpile ʻi hono veʻe mohengá. ʻI he pongipongi hono hokó, naʻe ʻilo ai ʻe Juan ʻa e kaihaʻa naʻe faí. Te ne manatuʻi fuoloa ʻa e lēsoni fakamamahi kuó ne akó: Ko ha tangata ʻoku mohe ʻe ʻikai malava ke ne leʻohi ʻene koloá.

² ʻOku pehē ʻa ʻene moʻoni ʻi he ʻuhinga fakalaumālié. ʻE ʻikai lava ke tau maluʻi ʻetau ʻamanakí mo ʻetau tuí kapau te tau tō ʻo mohe. Ko ia, ko e ekinaki ʻa Paulá: “Ke ʻoua te tau mohe ʻo hangē ko ia ʻoku fai ʻe he kakai kehé, ka tau nofoʻaki ʻāʻā mo fakakaukau lelei.” (1 Tesalonaika 5:​6, NW) Ke fakahaaʻi ʻa ʻene mātuʻaki mahuʻinga ke nofoʻaki ʻāʻaá, naʻe ngāueʻaki ʻe Sīsū ʻa e talanoa fakatātā ko ia ʻo ha tangata kaihaʻa. Naʻá ne fakamatalaʻi ʻa e ngaahi meʻa ʻe taki atu ki heʻene hoko mai ko ha Fakamaau, peá ne fakatokanga leva: “Ko ia ke mou leʻo; he ʻoku ʻikai te mou ʻilo pe ko e ʻaho fē ʻe hoko mei ai ʻa homou ʻEiki. Ka ko e meʻa ko eni ʻoku mou lāuʻilo ki ai, ʻo ka ne toka meaʻi ʻe he Tangataʻeiki pe ko e uasi fe ʻe haʻu ai ʻa e kaihaʻa, pehe ne leʻo, ʻo ʻikai tuku hono fale ke haea. Ko ia ke toka teuteu ʻa kimoutolu foki: he ko e hoko mai ʻa e Fanautama ʻa Tangata ʻe fai ʻi ha taimi ʻoku ʻikai te mou ʻamanaki ai kiate ia.” (Mātiu 24:​42-44) ʻOku ʻikai ke tomuʻa fanongonongo ʻe he kaihaʻá ia ʻa e taimi te ne haʻu aí. ʻOkú ne ʻamanaki ke aʻu mai ʻi he taimi ʻoku ʻikai ʻamanekina ai ia ʻe ha tahá. ʻI he tuʻunga tatau, hangē ko e lea ʻa Sīsuú, ko e ngataʻanga ʻo e fokotuʻutuʻu ko ení ʻe hoko mai ia ‘ʻi ha taimi ʻoku ʻikai te tau ʻamanaki ai kiate ia.’

“Nofoʻaki ʻĀʻā, Tuʻu Mālohi ʻi he Tuí”

 3. Naʻe anga-fēfē hanga ʻe Sīsū, ʻi hono ngāueʻaki ha talanoa fakatātā ʻo e kau tamaioʻeiki ʻoku nau tatali ki he foki mai honau ʻeikí mei ha mali, ʻo fakahā ʻa e mahuʻinga ʻo e nofoʻaki ʻāʻaá?

³ ʻI he ngaahi lea ʻoku lēkooti ʻi he Kōsipeli ʻa Luké, naʻe fakahoa ai ʻe Sīsū ʻa e kau Kalisitiané ki ha kau tamaioʻeiki ʻoku nau tatali ki honau ʻeikí ke foki mai mei ha mali. Naʻe fiemaʻu ke nau hanganaki tokanga koeʻuhí ke nau ʻāʻā ʻi he taimi te ne ʻau mai aí, ʻo mateuteu ke talitali ia. ʻI ha tuʻunga meimei tatau, naʻe pehē ʻe Sīsū: “Ko e hoko mai ʻa e Fanautama ʻa Tangata ʻe fai ʻi ha taimi ʻoku ʻikai te mou ʻamanaki ai kiate ia.” (Luke 12:40) Ko e niʻihi kuo nau tauhi kia Sihova ʻi ha ngaahi taʻu lahi ʻe mole nai ʻenau ongoʻi fakavavevave fekauʻaki mo e taimi ʻoku tau moʻui aí. Naʻa mo haʻanau aʻu ki ha fakamulituku ko e ngataʻangá ia ʻoku kei taumamaʻo. Ka ko e faʻahinga fakakaukau peheé ʻe lava ke taki atu ai kitautolu ke fakahanga mamaʻo ʻetau tokangá mei he ngaahi meʻa fakalaumālié pea hanga ki he ngaahi taumuʻa fakamatelié, ʻa e ngaahi fakaleluʻi ʻe malava ke ne ʻai kitautolu ke tau tulemohe fakalaumālié.​—Luke 8:14; 21:​34, 35.

 4. Ko e hā ʻa e tuipau te ne ueʻi kitautolu ke tau nofoʻaki leʻó, pea naʻe anga-fēfē hono fakahāhā eni ʻe Sīsuú?

⁴ ʻE lava ke tau maʻu ha toe lēsoni ʻe taha mei he talanoa fakatātā ʻa Sīsuú. Neongo naʻe ʻikai ʻilo ʻe he kau tamaioʻeikí ʻa e houa ʻe aʻu mai ai honau ʻeikí, ʻoku hā ngali naʻa nau ʻilo ʻa e pō ko iá. Naʻe mei faingataʻa ke hanganaki ʻāʻā ʻi he pō kakato ko iá kapau naʻa nau fakakaukau ko honau ʻeikí ʻe ngali haʻu ia ʻi ha pō kehe. Ka naʻe ʻikai, naʻa nau ʻilo ʻa e pō naʻá ne haʻu aí, pea naʻe ueʻi mālohi ʻe he meʻa ko iá kinautolu ke nau nofoʻaki ʻāʻā. ʻI he founga mātuʻaki meimei tatau, ko e ngaahi kikite faka-Tohitapú ʻokú ne fakaeʻa māʻalaʻala mai ai ʻoku tau lolotonga moʻui ʻi he taimi ʻo e ngataʻangá; ka ʻoku ʻikai te nau tala mai kia kitautolu ʻa e ʻaho pe houa tonu ʻo e ngataʻangá. (Mātiu 24:36) Ko ʻetau tui ko ia ko e ngataʻangá ʻoku haʻú ʻokú ne tokoniʻi ai kitautolu ke tau nofoʻaki ʻāʻā, ka ʻo kapau ʻoku tau tuipau ko e ʻaho ʻo Sihová ʻoku mātuʻaki ofi, ʻe toe ueʻi mālohi ʻaupito ange ai kitautolu ke tau leʻo.​—Sefanaia 1:14.

 5. ʻE anga-fēfē haʻatau fakafeangai ki he ekinaki ko ia ʻa Paula ke “nofoʻaki ʻāʻā”?

⁵ Ko Paula, ʻi heʻene tohi ki he kau Kolinitoó, naʻá ne ekinaki: “Nofoʻaki ʻāʻā, tuʻu mālohi ʻi he tuí.” (1 Kolinito 16:​13, NW) ʻIo, ko e nofoʻaki ʻāʻaá ʻoku fakafehokotaki ia mo ʻetau tuʻu mālohi ʻi he tui faka-Kalisitiané. ʻE lava fēfē ke tau nofoʻaki ʻāʻā? ʻAki hono maʻu ha ʻilo loloto ange ki he Folofola ʻa e ʻOtuá. (2 Timote 3:​14, 15) Ko e angaʻaki ʻo e ako fakafoʻituitui leleí mo e maʻu tuʻumaʻu ʻa e fakatahá ʻoku tokoni ia ke fakaivimālohiʻi ʻetau tuí, pea tauhi maʻu ʻi he ʻatamaí ʻa e ʻaho ʻo Sihová ko ha tafaʻaki mahuʻinga ia ʻe taha ʻetau tuí. Ko ia ko ʻetau fakamanatu ʻi he taimi ki he taimi ʻa e fakamoʻoni Fakatohitapu ʻoku tau lolotonga moʻui ʻo panaki ki he ngataʻanga ʻo e fokotuʻutuʻu ko ení, ʻe tokoni ia kia kitautolu ke ʻoua ʻe mole ʻetau vakai atu ki he ngaahi moʻoni mahuʻinga fekauʻaki mo e hoko mai ʻa e ngataʻanga ko iá.a ʻOku toe lelei foki ke fakatokangaʻi ʻa e ngaahi meʻa ʻoku hoko ʻi he māmaní ʻa ia ʻokú ne fakahoko ʻa e kikite ʻa e Tohitapú. Naʻe tohi ʻe ha tokoua ʻe taha ʻi Siamane: “ʻI he taimi kotoa pē ʻoku ou sio ai ki he ongoongó​—ʻa e ngaahi taú, ngaahi mofuiké, ko e fakamālohí, pea mo hono ʻuliʻi hotau palanité—ʻokú ne fakamahino ai kiate au ʻa e panaki ʻo e ngataʻangá.”

 6. ʻI he founga fē naʻe fakatātaaʻi ai ʻe Sīsū ʻa e hehema ko ia ke mole ai ʻa e tokanga fakalaumālié ʻi he faai atu ʻa e taimí?

⁶ ʻI he Maʻake vahe 13, ʻoku tau maʻu ai ha toe fakamatala ʻe taha ʻo e ekinaki ʻa Sīsū ki hono kau muimuí ke nau nofoʻaki ʻāʻaá. Fakatatau ki he vahe ko ení, ʻoku fakahoa ʻe Sīsū honau tuʻungá ki he tuʻunga ko ia ʻo ha leʻo matapā ʻokú ne tatali ki hono ʻeikí ke foki mai mei haʻane fononga ki muli. Naʻe ʻikai ʻilo ʻe he leʻo matapaá ia ʻa e houa ʻe foki mai ai hono ʻeikí. Naʻe pau moʻoni ke ne hanganaki leʻo. Naʻe lave ʻa Sīsū ki he ngaahi houa leʻo kehekehe ʻe fā ʻa ia ʻe ngali aʻu mai ai ʻa e ʻeikí. Ko e houa leʻo hono faá naʻe lele ia mei he tolu hengihengí nai ki he hopo ʻa e laʻaá. ʻI he houa leʻo fakamuimui ko iá, ko e tulemohé naʻe lavangofua ke ne lapasi ʻa e leʻo matapaá. Fakatatau ki he līpōtí, ʻoku lau ʻe he kau sōtiá ko e houa ki muʻa ʻi he mafoa ʻa e atá ko e taimi lelei taha ia ke maʻu fakaʻohovaleʻi ai ha fili. ʻI he tuʻunga meimei tatau, ʻi he houa fakaʻosi ko ení, ʻi he taimi ʻoku mohe maʻu ai ʻi he tuʻunga fakalaumālié ʻa e māmani takatakai kia kitautolú, te tau fehangahangai nai ai mo e fāinga faingataʻa taha ke nofoʻaki ʻāʻā. (Loma 13:​11, 12) Ko ia ai, ʻi heʻene talanoa fakatātaá, naʻe toutou ekinaki ai ʻa Sīsū: “Mou tokanga, mou ʻā pē . . . Ko ia mou leʻo . . . Ko e meʻa ʻoku ou tala kiate kimoutolu ʻoku ou tala ki he kakai kotoa pē, Mou leʻo.”​—Maake 13:​32-37.

 7. Ko e hā ʻa e fakatuʻutāmaki moʻoni ʻoku ʻi ai, pea ʻi he vakai atu ki he meʻá ni, ko e hā ʻa e fakalototoʻa ʻoku tau lau maʻu pē ʻi he Tohitapú?

⁷ ʻI he taimi lahi lolotonga ʻene ngāue fakafaifekaú pea mo e hili ʻene toetuʻú, naʻe fakaʻaiʻai ʻe Sīsū ʻa e faʻa leʻó. Ko e moʻoni, ʻi he meimei taimi kotoa pē ʻoku lave ai ʻa e ngaahi Konga Tohitapú ki he ngataʻanga ʻo e fokotuʻutuʻu ʻo e ngaahi meʻa ko ení, ʻoku tau ʻilo ai ʻa e fakatokanga ke nofoʻaki ʻāʻā pe hanganaki leʻó.b (Luke 12:​38, 40; Fakahā 3:2; 16:​14-​16) ʻOku hā mahino, ko e tulemohe fakalaumālié ko e fakatuʻutāmaki moʻoni ʻaupito ia. ʻOku tau fiemaʻu kotoa pē ʻa e ngaahi fakatokanga ko iá!​—1 Kolinito 10:12; 1 Tesalonaika 5:​2, 6.

Kau ʻApositolo ʻe Toko Tolu Naʻe ʻIkai Lava Ke Nau Hanganaki ʻĀʻā

 8. ʻI he ngoue Ketisemaní, naʻe anga-fēfē ʻa e tōʻongafai ʻa e kau ʻapositolo ʻa Sīsuú ki heʻene kole ko ia ke nau hanganaki leʻó?

⁸ Ko e hanganaki ʻāʻaá ʻoku fiemaʻu ki ai ʻa e meʻa lahi ange ia ʻi he ngaahi taumuʻa lelei ʻataʻatā pē, hangē ko ia ʻoku tau sio ki ai mei he fakatātā kia Pita, Sēmisi, mo Sioné. Ko e kau tangata fakalaumālie eni ʻe toko tolu naʻa nau muimui mateaki kia Sīsū pea naʻa nau ongoʻi ʻofa loloto kiate ia. Neongo ia, ʻi he pō 14 ʻo Nīsaní, 33 T.S., naʻa nau taʻemalava ai ke nofoʻaki ʻāʻā. ʻI heʻenau mavahe mei he loki ʻi ʻolunga naʻa nau kātoangaʻi ai ʻa e Pāsová, naʻe ʻalu fakataha ʻa e kau ʻapositolo ʻe toko tolú mo Sīsū ki he ngoue Ketisemaní. Naʻe tala ange ai ʻe Sīsū kia kinautolu: “Oku mamahi lahi aubito, o hage ka mate, hoku laumalie: mou nofo be i heni, ke tau leo mo au.” (Mātiu 26:​38, PM) Naʻe lotu tōtōivi tuʻo tolu ʻa Sīsū ki heʻene Tamai fakahēvaní, pea tuʻo tolu ʻene foki ki hono ngaahi kaumeʻá, ʻo ʻilo ai pē kinautolu ʻoku nau mohe.​—Mātiu 26:​40, 43, 45.

 9. Ngalingali, ko e hā naʻe tokoni ki he tulemohe ʻa e kau ʻapositoló?

⁹ Ko e hā naʻe taʻelavameʻa ai ʻa e kau tangata faitōnunga ko ení kia Sīsū ʻi he pō ko iá? Ko e ongosia fakaesinó ko ha taha ia ʻa e foʻi moʻoni. Naʻe fuoloa ʻa e poʻulí, ngalingali kuo tuʻapō, pea “nae māfajia ho nau mata” ʻi he mohe. (Mātiu 26:​43, PM) Neongo ia, naʻe pehē ʻe Sīsū: “Leʻo pe mo lotu; ke ʻoua naʻa mou hu ki ha ʻahiʻahi: ʻoku loto pe ʻa laumalie ke fai, ka ʻoku vaivai ʻa kakano.”—Mātiu 26:41.

10, 11. (a) Neongo ʻene ongosiá, ko e hā naʻá ne tokoniʻi ʻa Sīsū ke hanganaki leʻo ʻi he ngoue Ketisemaní? (e) Ko e hā ʻe lava ke tau ako mei he meʻa naʻe hoko ki he kau ʻapositolo ʻe toko tolú ʻi he taimi naʻe kole ange ai ʻe Sīsū ke nau hanganaki leʻó?

¹⁰ ʻOku ʻikai ha veiveiua, naʻe toe ongosia mo Sīsū ʻi he pō fakahisitōlia ko iá. Kae kehe, ʻi he ʻikai ke ne tō ʻo mohé, naʻá ne fakamoleki ʻa e ngaahi mōmeniti mātuʻaki mahuʻinga fakaʻosi ko ia ʻo e tauʻatāiná ʻi he lotu kīkīvoi. ʻI ha ngaahi ʻaho siʻi ki muʻa ange, naʻá ne ekinaki ai ki hono kau muimuí ke nau lotu, ʻo pehē: “Ka mou ʻā pe, mo lotu ʻi he taimi kotoa pe, koeʻuhi ke mou lava ke hao mei he ngāhi meʻa ko ia fulipe ʻoku ene ke hoko; pea ke tuʻu ʻi he ʻao ʻo e Fanautama ʻa Tangata.” (Luke 21:36; Efeso 6:18) Kapau te tau fai ki he akonaki ʻa Sīsuú pea muimui ʻi heʻene faʻifaʻitakiʻanga leleí ʻi he meʻa fekauʻaki mo e lotú, ko ʻetau ngaahi hū fakamātoato kia Sihová te ne tokoniʻi kitautolu ke tau nofoʻaki ʻāʻā fakalaumālie.

¹¹ Ko e moʻoni, naʻe mahinoʻi ʻe Sīsū​—ʻa ia naʻe ʻikai mahinoʻi ʻe heʻene kau ākongá ʻi he taimi ko iá​—kuo vave ke puke ia pea fakahalaiaʻi ki he mate. Ko hono fakamāuʻí ʻe aʻu ia ki ha tumutumu fakamamahi ʻi ha ʻakau fakamamahi. Ne ʻosi fakatokanga ʻa Sīsū ki heʻene kau ʻapositoló fekauʻaki mo e ngaahi meʻá ni, ka naʻe teʻeki ke nau mahinoʻi ʻa e meʻa naʻá ne leaʻakí. Ko ia ai, naʻa nau tō ʻo mohe lolotonga ia ʻene nofoʻaki ʻāʻā ʻo lotú. (Maake 14:​27-​31; Luke 22:​15-​18) Hangē ko ʻene moʻoni fekauʻaki mo e kau ʻapositoló, ko hotau kakanó ʻoku vaivai mo ia foki pea ʻoku ʻi ai ʻa e ngaahi meʻa ʻoku teʻeki ke tau ʻiloʻi. Neongo ia, kapau ʻe mole ʻetau vakai atu ki he fakavavevave ʻo e taimi ʻoku tau moʻui aí, ʻe lava ke tau tō ʻo mohe ʻi he ʻuhinga fakalaumālie. Ko ʻetau toki mātuʻaki tokangá pē te tau nofoʻaki ʻāʻā aí.

Ngaahi ʻUlungaanga Mātuʻaki Mahuʻinga ʻe Tolu

12. Ko e hā ʻa e ngaahi ʻulungaanga ʻe tolu ʻoku fakafehokotaki ʻe Paula ki heʻetau hanganaki tokangá?

¹² ʻE lava fēfē ke tau tauhi maʻu ʻetau ongoʻi fakavavevavé? Kuo tau ʻosi sio ki he mahuʻinga ʻo e lotú mo e fiemaʻu ke hanganaki tauhi ʻi hotau ʻatamaí ʻa e ʻaho ʻo Sihová. Tānaki atu ki aí, ʻoku lave ʻa Paula ki he ngaahi ʻulungaanga mātuʻaki mahuʻinga ʻe tolu ʻoku totonu ke tau fakatupulekina. ʻOkú ne pehē: “Ka ke fakabotoboto [“hanganaki tokanga,” NW] akitautolu oku oe aho, o ai ki he fatafata ae jifa koe tui moe ofa; bea tau tatā aki ae amanaki lelei ki he fakamoui.” (1 Tesalonaika 5:​8, PM) Tau lāulea nounou angé ki he ngafa ʻo e tuí, ʻamanakí, mo e ʻofá ʻi heʻetau hanganaki ʻāʻā fakalaumālié.

13. Ko e hā ʻa e ngafa ʻoku fakahoko ʻe he tuí ʻi heʻetau hanganaki tokangá?

¹³ Kuo pau ke tau maʻu ha tui taʻemauea ʻoku ʻi ai ʻa Sihova pea “te ne hanga ʻo totongi kiate kinautolu ʻoku kumi hākili kiate ia.” (Hepelu 11:6) Ko hono fakahoko muʻomuʻa ʻi he ʻuluaki senitulí ʻa e kikite ʻa Sīsū fekauʻaki mo e ngataʻangá ʻokú ne fakamālohiʻi ʻetau tuí ʻi hono fakahoko lahi ange ʻo ia lolotonga hotau taimí. Pea ko ʻetau tuí ʻokú ne tauhi kitautolu ke ʻamanaki vēkeveke atu ki he ʻaho ʻo Sihová, ʻo fakapapauʻi ko e “[vīsone fakaekikité] kuo pau te ne haʻu: ʻe ʻikai tuai.”​—Hapakuke 2:3.

14. Ko e hā ʻoku mātuʻaki mahuʻinga ai ʻa e ʻamanakí kapau ʻoku tau fie hanganaki ʻāʻā?

¹⁴ Ko ʻetau ʻamanaki papaú ʻoku hangē ia ko ha “taula hotau laumalie” ʻa ia ʻokú ne fakamafeia ai kitautolu ke kātekina ʻa e ngaahi faingataʻá neongo kapau kuo pau ke tau fakatatali ki hono fakahoko pau ʻo e ngaahi talaʻofa ʻa e ʻOtuá. (Hepelu 6:​18, 19) Ko Margaret, ko ha tuofefine pani ia ʻe he laumālié ʻi hono taʻu 90 tupú ʻa ia naʻe papitaiso laka hake ʻi he taʻu ʻe 70 kuo maliu atú, ʻokú ne pehē: “ʻI he taimi naʻe fakaʻau ai ke mate hoku husepānití ʻi he kanisaá ʻi he 1963, naʻá ku ongoʻi ʻe lelei kapau naʻe hoko vave mai ʻa e ngataʻangá. Ka ʻoku ou fakatokangaʻi he taimí ni naʻá ku fakakaukau tefito pē au fekauʻaki mo e ngaahi meʻa ʻaʻakú. Naʻe ʻikai haʻamau fakakaukau ʻe taha ʻi he taimi ko iá ki he lahi ʻe mafola atu ki ai ʻa e ngāué ʻi he kotoa ʻo e māmaní. Naʻa mo e taimí ni, ʻoku kei toe lahi ʻa e ngaahi feituʻu ʻoku toki kamata atu ai ʻa e ngāué. Ko ia ʻoku ou fiefia he kuo ngāueʻaki ʻe Sihova ʻa e faʻa kātakí.” ʻOku fakapapauʻi mai ʻe he ʻapositolo ko Paulá kia kitautolu: “Ko e kātakí, [ʻokú ne fakatupu] ha tuʻunga fakahōifua; ko e tuʻunga fakahōifuá, ʻoku iku ia, ki he ʻamanakí, pea ko e ʻamanakí ʻoku ʻikai ke iku ia ki ha fakalotomamahi.”​—Loma 5:​3-5, NW.

15. ʻE anga-fēfē hono ueʻi kitautolu ʻe he ʻofá neongo kapau ʻoku hā ngali kuo tau tatali ʻi ha taimi fuoloa?

¹⁵ Ko e ʻofa faka-Kalisitiané ko ha ʻulungaanga tuʻu-ki-muʻa ia koeʻuhi ko e fakaueʻiloto tefito ia ki he meʻa kotoa ʻoku tau faí. ʻOku tau tauhi kia Sihova koeʻuhi ʻoku tau ʻofa ai, neongo ai ʻa ʻene taimi-tēpilé. Ko e ʻofa ki he kaungāʻapí ʻokú ne ueʻi kitautolu ke malangaʻi ʻa e ongoongo lelei ʻo e Puleʻangá, neongo pe ko e hā hono lōloa ʻo e finangalo ʻo e ʻOtuá ke tau fai pehē aí pea mo e hā hono tuʻo lahi ʻetau toe foki ki he ngaahi ʻapi tatau. Hangē ko ia naʻe tohi ʻe Paulá, “ʻoku tolonga pe ʻa Tui, ʻa ʻAmanaki, ʻa ʻOfa; ʻa e tolu ni pe: pea ko honau tuʻukimuʻa ko ʻOfa.” (1 Kolinito 13:13) Ko e ʻofá ʻokú ne kei tauhi kitautolu ke kei kātaki atú pea ʻokú ne tokoniʻi kitautolu ke kei nofo ʻāʻaá. “[Ko ʻofá] ʻoku ne ʻamanaki ʻi he meʻa kotoa pe, ʻoku ne kataki ʻi he meʻa kotoa pe. Ko ʻOfa ʻoku ʻikai ke kaʻanga ia ʻi ha taimi.”​—1 Kolinito 13:​7, 8.

“Kuku ke Maʻu ʻa e Meʻa ʻOku Ke Maʻu”

16. ʻI he ʻikai ke fakavaivai hotau nimá, ko e hā ʻa e fakakaukau ʻoku totonu ke tau fakatupulekiná?

¹⁶ ʻOku tau moʻui ʻi he ngaahi taimi mahuʻinga ʻi he taimi ʻoku toutou fakamanatu mai ai ʻe he ngaahi meʻa ʻoku hoko ʻi he māmaní kia kitautolu ʻoku tau ʻi he konga fakaʻosi ʻo e ngaahi ʻaho fakaʻosí. (2 Timote 3:​1-5) ʻOku ʻikai ko ha taimi eni ke fakavaivai ai hotau nimá ka ke ‘kuku ke maʻu ʻa e meʻa ʻoku tau maʻú.’ (Fakahā 3:11) ʻI he hoko ʻo “leo ke lotu” pea ʻi hono fakatupulekina ʻa e tui, ʻamanaki, mo e ʻofá, te tau fakamoʻoniʻi ai kitautolu ʻoku tau mateuteu ki he houa ʻo e ʻahiʻahí. (1 Pita 4:7) ʻOku lahi ʻa e meʻa ke tau fai ʻi he ngāue ʻa e ʻEikí. ʻI he femoʻuekina ʻi he ngaahi ngāue ʻo e anga-līʻoa fakaʻotuá ʻe tokoni ia ke tauhi kitautolu ke tau mātuʻaki ʻāʻā.​—2 Pita 3:11.

17. (a) Ko e hā ʻoku totonu ai ke ʻoua te tau loto-siʻi ʻi he siva ʻi he taimi ʻe niʻihi ʻa e ngaahi ʻamanakí? (Sio ki he puha ʻi he peesi 21.) (e) ʻE lava fēfē ke tau faʻifaʻitaki kia Sihova, pea ko e hā ʻa e ngaahi tāpuaki ʻoku tatali mai ki he faʻahinga ʻoku nau fai peheé?

¹⁷ “Ko hoku ʻinasi ʻa Sihova” ko e tohi ia ʻa Selemaiá, “ko ia ai te u ʻamanaki kiate ia. ʻOku lelei ʻa Sihova kiate kinautolu ʻoku tatali kiate ia, ki he laumalie ʻoku kumi ki Heʻene ʻAfio. ʻOku lelei ke te ʻamanaki mo tali fakalongope ki he fakamoʻui ʻa Sihova ka fai.” (Tangilaulau 3:​24-26) Ko e niʻihi ʻo kitautolu kuo tau tatali ʻi ha taimi nounou pē. Ko e niʻihi kuo nau tatali ʻi he ngaahi taʻu lahi ke sio ki he fakamoʻui ʻa Sihová. Neongo ia, he meʻa nounou moʻoni ko e vahaʻa taimi tatali ko ení ʻi hono fakahoa atu ki he ʻitāniti ʻoku hanga mai mei muʻá! (2 Kolinito 4:​16-18) Pea lolotonga ʻetau fakatatali ki he taimi kotofa ʻa Sihová, ʻe lava ke tau fakatupulekina ʻa e ngaahi ʻulungaanga faka-Kalisitiane ʻoku fiemaʻú pea tokoniʻi ʻa e niʻihi kehé ke ngāueʻaongaʻaki ʻa e anga-kātaki ʻa Sihová mo tali lelei ʻa e moʻoní. Ko ia ai, ʻofa ke tau hanganaki leʻo. Tau faʻifaʻitaki kia Sihova pea faʻa kātaki, ʻo fakamālōʻia ʻa e ʻamanaki kuó ne foaki mai kia kitautolú. Pea ʻi heʻetau nofoʻaki tokanga faitōnungá, ʻofa ke tau hanganaki piki maʻu ki he ʻamanaki ʻo e moʻui taʻengatá. ʻE hoko leva, ko e ngaahi talaʻofa fakaekikite ko ení ʻe ngāueʻaki moʻoni ia ʻi hotau tuʻungá: “[Ko Sihova] te ne hakeakiʻi koe ke maʻu ʻa e fonua: ka hoko ʻa e motuhi ʻo haʻa faikovi te ke mātā ia.”​—Sāme 37:34.

[Fakamatala ʻi lalo]

ʻE Fēfē Haʻo Tali?

• ʻE lava fēfē ke tau fakaivimālohiʻi ʻetau tuipau ko ia ko e ngataʻanga ʻo e fokotuʻutuʻu ʻo e ngaahi meʻa ko ení ʻoku ofí?

• Ko e hā ʻoku lava ke tau ako mei he faʻifaʻitakiʻanga ʻa Pita, Sēmisi, mo Sioné?

• Ko e hā ʻa e ngaahi ʻulungaanga ʻe tolu te ne tokoniʻi kitautolu ke tau nofoʻaki leʻo fakalaumālié?

• Ko e hā ko e taimi ai eni ke ‘kuku ke maʻu ʻa e meʻa ʻoku tau maʻú’?

[Puha/Fakatātā ʻi he peesi 21]

“Oku Monuia Ia Oku Tatali.”​—Taniela 12:​12, PM

Fakakaukau atu ʻoku mahaloʻi ʻe ha tangata leʻo ʻoku palani ha tokotaha kaihaʻa ke kaihaʻa ʻi he ʻapi ʻokú ne leʻohí. ʻI he hoko mai ʻa e poʻulí, ʻoku fakafanongo tokanga ʻa e tangata leʻó ki ha kiʻi longoaʻa te ne ngali fakahaaʻi mai ʻoku haʻu ʻa e kaihaʻá. ʻI he houa ki he houa ʻokú ne kīkīvoi ʻi he fakafanongó mo e fakasió. ʻOku faingofua ke sio ki he malava noa ke kākaaʻi ia ʻe ha fakatokanga hala​—ʻa e ongo mai ʻa e puhi ʻa e havilí ʻi he ʻuluʻakaú pe ko ha pusi ʻoku tau ʻi ha meʻa ʻo tō.​—Luke 12:​39, 40.

Ko ha meʻa meimei tatau ʻe lava ke hoko ki he faʻahinga ʻoku nau “tatali ki he fakaha a ho tau Eiki ko Jisu Kalaisi.” (1 Kolinito 1:​7, PM) Ko e kau ʻapositoló naʻa nau fakakaukau ʻe hanga ʻe Sīsū ʻo ‘toe age ae buleaga ki Isileli’ hili pē ʻene toetuʻú. (Ngāue 1:​6, PM) ʻI he ngaahi taʻu ki mui aí, naʻe pau ke fakamanatu ki he kau Kalisitiane ʻi Tesalonaiká ko e ʻi ai ʻa Sīsuú naʻe kei tuʻu ia ki he kahaʻú. (2 Tesalonaika 2:​3, 8) Neongo ia, ko e ngaahi fakatokanga hala fekauʻaki mo e ʻaho ʻo Sihová naʻe ʻikai te ne ʻai ai ʻa e muʻaki kau muimui ʻo Sīsuú ke nau liʻaki ʻa e hala ʻoku taki atu ki he moʻuí.​—Mātiu 7:13.

ʻI hotau ʻahó ni, ko e siva ʻo e ʻamanaki ʻi ha hā ngali tautoloi ʻa e hoko mai ʻa e ngataʻanga ʻo e fokotuʻutuʻu ʻo e ngaahi meʻa ko ení ʻoku totonu ke ʻoua te ne fakatupunga kitautolu ke tuku ʻetau tokangá. Ko ha tokotaha leʻo ʻoku tokangá ʻe kākaaʻi nai ia ʻe ha fakatokanga hala, ka ʻoku lelei ange ke ne hanganaki leʻo! Ko ʻene ngāué ia. ʻOku pehē pē mo e kau Kalisitiané.

[Fakatātā ʻi he peesi 18]

ʻOkú ke tuipau ʻoku ofi ʻa e ʻaho ʻo Sihová?

[Fakatātā ʻi he peesi 19]

Ko e ngaahi fakatahá, lotú, mo e angaʻaki ʻa e ako leleí ʻokú ne tokoniʻi kitautolu ke tau hanganaki leʻo

[Fakatātā ʻi he peesi 22]

Hangē ko Margaret, ʻofa ke tau faʻa kātaki mo mātuʻaki hanganaki leʻo