ʻOku Totonu ke ʻAlu ʻa ʻEku Tamá ki he Akó?

ʻE LAVA ke ke fakaʻuta atu ki he taʻemalava ke lau ʻa e ngaahi foʻi lea ʻi he peesi ko ení? Fēfē kapau ʻoku ʻikai te ke lava ke lea ʻi he lea fakaʻofisiale ʻa ho fonuá? Fēfē kapau ʻoku ʻikai lava ke ke tuhuʻi ʻa ho fonua tupuʻangá ʻi ha mape ʻo e māmaní? ʻE tupu hake ʻa e fānau taʻefaʻalaua ʻi he tuʻunga tofu pē ko iá. Fēfē ʻa hoʻo tamá?

ʻOku totonu ke ʻalu ʻa hoʻo tamá ki he akó? ʻI he ngaahi fonua lahi, ko e ako lautohí mo e kolisí ko ha meʻa pau ia pea ʻoku faʻa taʻetotongi. Ko e Konivēsio ki he Ngaahi Totonu ʻa e Fānaú ʻoku lāulea ai ki he ako anga-mahení ko ha totonu tefito ia. ʻOku pehē pē ʻa e Talaki Fakalūkufua ʻo e Ngaahi Totonu Fakaetangatá. Neongo ia, ʻi he ngaahi fonua ʻe niʻihi, ʻe ʻikai nai ke taʻetotongi ʻa e akó pea ko ha kavenga fakapaʻanga nai ki he ngaahi mātuʻá. Tau vakai ki he meʻá ni fakafou ʻi he sio ʻa e ngaahi mātuʻa Kalisitiane ʻoku nau loto ke hoko ʻenau fānaú ʻo poto he tohí mo e lautohí, fakafou ʻi he ako anga-mahení pe ko ha ngaahi founga kehe.

Ngaahi Fakatātā Faka-Tohitapu ʻo e Poto he Tohí mo e Lautohí

Ko e tokolahi taha ʻo e kau sevāniti ʻa e ʻOtuá ʻoku lave ki ai ʻi he Tohitapú naʻe lava ke nau lautohi mo tohi. Ko e ongo ʻapositolo ʻa Sīsū ko Pita mo Sioné ko e ongo tangata toutai Siu kinaua ka naʻá na tohi ʻa e ngaahi tohi faka-Tohitapú ʻi he faka-Kalisí, ʻo ʻikai ʻi heʻena lea fakafeituʻu faka-Kālelí.a ʻOku hā mahino naʻe fakapapauʻi ʻe heʻena ongo mātuʻá ke maʻu ʻe heʻena fānaú ha ako tefito. Ko e kau tohi Tohitapu kehé ʻi ha tuʻunga meimei tatau ʻoku kau ai ʻa e tauhi-sipi ko Tēvitá, ko e tokotaha ngāue fakangoue ko ʻĒmosí, mo e tokoua faʻē-taha ʻo Sīsū ko Siutasí, ʻa ia naʻe ngalingali ko ha tufunga ia.

Ko e tangata ko Siopé naʻe lava ke ne lautohi mo tohi, pea ko e tohi faka-Tohitapu ʻoku uiʻaki hono hingoá ʻoku fakahaaʻi ai naʻá ne maʻu ha mahino fakasaienisi. Naʻá ne toe maʻu nai ʻa e malava ke faʻu tohi, he ko ʻene ngaahi lea ʻoku hiki ʻi he tohi ʻa Siopé ʻoku ʻi he faʻunga fakaemāú. Pea ʻoku tau ʻiloʻi ko e muʻaki kau Kalisitiané naʻa nau poto he lautohí mo e tohí koeʻuhi he ko e meʻa ʻoku hā ngali ko ʻenau ngaahi nouti Fakatohitapú kuo maʻu ia ʻi he ngaahi mapakipakiʻi ʻumeá, mo e ngaahi kongokonga ʻo e ngaahi nāunau ʻumea maumau.

ʻOku Mahuʻinga ʻa e Akó ki he Kau Kalisitiané

ʻOku fiemaʻu ki he kau Kalisitiane kotoa pē ke nau laka ki muʻa ʻi he ʻilo faka-Tohitapú kapau ʻoku fiemaʻu ke nau fakahōifuaʻi ʻa e ʻOtuá. (Filipai 1:​9-11; 1 Tesalonaika 4:1) Ko e ngāueʻaki tōtōivi ʻo e ngaahi Konga Tohitapú mo e ngaahi tohi tokoni ako makatuʻunga ʻi he Tohitapú ʻe lava ke pouaki ai ʻa e fakalakalaka fakalaumālié. Koeʻuhi kuo tokonaki mai ʻe he ʻOtuá ʻene Folofola kuo tohí, ʻokú ne ʻamanekina ʻene kau lotú ke nau hoko ʻo poto he lautohí mo e tohí ʻo ka malava. Ko hono lau ʻa e Tohitapú fakataha mo e mahinó ʻoku ʻai ai ke faingofua ange ke ngāueʻaki ʻene akonakí. Ko e moʻoni, kuo pau nai ke tau lau ha ngaahi konga ʻo ia ʻo laka hake he tuʻo tahá ke ʻiloʻi ai ʻa e ngaahi poiní pea malava ke fakalaulauloto ki ai.​—Sāme 119:104; 143:5; Palovepi 4:7.

ʻI he taʻu taki taha, ʻoku maʻu ai ʻe he kakai ʻa Sihová ʻa e ngaahi peesi ʻe laui teau ʻo e fakamatala ʻaonga kuo tohi ʻa ia kuo teuteuʻi ʻi he malumalu ʻo e tataki ʻa e “tamaioeiki agatonu mo boto.” (Mātiu 24:​45-47, PM ) Ko e ʻū tohi ko iá ʻoku lāulea ai ki he moʻui fakafāmilí, ngaahi anga fakafonuá, lotú, saienisí, mo e ngaahi kaveinga lahi kehe. Ko e meʻa ʻoku mahuʻinga tahá, ʻoku ʻi ai ʻa e akonaki Fakatohitapu ki he ngaahi meʻa fakalaumālié. Kapau ʻoku ʻikai malava ke lautohi hoʻo fānaú, ʻe mole meia kinautolu ʻa e fakamatala mātuʻaki mahuʻinga lahi.

Ko hono ako ʻa e hisitōlia ʻo e faʻahinga ʻo e tangatá ʻoku mahuʻinga ia koeʻuhí ʻoku tokoniʻi ai kitautolu ke mahinoʻi ʻa e ʻuhinga ʻoku fiemaʻu ai ʻa e Puleʻanga ʻo e ʻOtuá. ʻOku toe ʻaonga foki ha ʻilo tefito ki he siokālafí. ʻOku lau ʻa e Tohitapú ki he ngaahi feituʻu lahi, hangē ko ʻIsileli, ʻIsipite, mo Kalisi. ʻOku malava hoʻo tamá ke ʻiloʻi kinautolu ʻi ha mape ʻo e māmaní? ʻE lava ke ne ʻiloʻi ʻa hono fonuá tonu? ʻI he ʻikai malava ke lau ha mapé ʻe aʻu nai ʻo ne fakangatangata ʻa e malava ʻa ha tokotaha ke ne fakahoko ʻa ʻene ngāue fakafaifekaú ʻi ha feituʻu kuo vaheʻi ki ai.​—2 Timote 4:5.

Ngaahi Monū ʻi he Fakatahaʻangá

Ko e kau mātuʻa mo e kau sevāniti fakafaifekau faka-Kalisitiané ʻoku nau maʻu ʻa e ngaahi fatongia lahi ʻoku kau ki ai ʻa e lautohí. Hangē ko ení, ʻoku ʻi ai ʻa e ngaahi konga ke teuteu ki he ngaahi fakataha ʻa e fakatahaʻangá. ʻOku ʻi ai ha fiemaʻu ke tauhi ʻa e ngaahi lēkooti fekauʻaki mo e ʻū tohí mo e ngaahi tokoni fakapaʻangá. ʻI he ʻikai ha ako tefitó, ʻe ʻiloʻi nai ʻe he tokotaha ko iá ʻoku faingataʻa ʻaupito ke fakahoko ola lelei ʻa e ngaahi fatongia ko ení.

ʻOku ngāue ʻa e kau ngāue pole ʻi he ngaahi ʻapi Pēteli takatakai ʻi he māmaní. Koeʻuhi ke fetuʻutaki lelei ʻa e kau ngāue pole ko ení pea ke fakahoko honau ngaahi fatongiá, hangē ko hono liliu ʻa e ʻū tohí mo hono fakaleleiʻi ʻa e ngaahi mīsiní, kuo pau ke nau malava ke lautohi mo tohi ʻi he lea fakaʻofisiale ʻa e fonua ʻoku nau nofo aí. Kapau ʻe faifai ange ʻo maʻu ʻe hoʻo fānaú ʻa e ngaahi monū hangē ko ení, ʻoku faʻa fiemaʻu ki ai ha ako tefito. Ko e hā ʻa e ngaahi ʻuhinga ʻaonga kehe ke ʻalu ai hoʻo kiʻi tamá ki he akó?

Masivá mo e Tui Taʻeʻuhingá

Ko e kakai ʻoku nofo masivá meimei ko e taʻelavameʻa nai ʻi he ngaahi tuʻunga pau. Kae kehe, ʻi he ngaahi tuʻunga kehé, ʻe tokoniʻi nai kitautolu mo ʻetau fānaú ʻe ha ako feʻunga ke fakaʻehiʻehi ai mei he faingataʻaʻia ʻoku ʻikai fiemaʻú. Ko e tokolahi ʻo e kakai ʻoku ʻikai te nau poto he lautohí mo e tohí ʻoku nau maʻu ha tuʻunga taʻemalu ʻi he moʻuí. Ko e fānaú naʻa mo e ngaahi mātuʻá ʻoku nau mate ʻi he taimi ʻe niʻihi koeʻuhi ko hono ʻai ʻe he siʻi ʻa e paʻanga hū maí ke faingataʻa ai ke nau maʻu ha tokoni fakafaitoʻó. Ko e ʻikai feʻunga ʻa e meʻakaí mo e kovi ʻo e nofoʻangá ʻa e tuʻunga ʻoku faʻa ʻi ai ʻa e kakai kuo nau maʻu ha ako siʻisiʻi pe taʻeakó. Ko e akó pe ʻi he tuʻunga ko e malava ke lautohi mo tohí ʻe tokoni nai ia ʻi he ngaahi tafaʻaki ko ení.

ʻOku toe fakasiʻisiʻi ʻe he poto he lautohí mo e tohí ʻa e hehema ke hoko ʻo tui taʻeʻuhingá. Ko e moʻoni, ʻoku failahia ʻa e tui taʻeʻuhingá fakatouʻosi ʻe he kakai akó mo e kakai taʻeakó. Ka ko e faʻahinga naʻe ʻikai haʻanau tuʻunga fakaakó ʻe kākaaʻingofua lahi ange nai pea ngāueʻaki taʻetotonu kinautolu ʻo laka ange ia ʻi he niʻihi kehé, koeʻuhi ko e ʻikai lava ke nau lau ʻa e ngaahi fakamatala ʻoku fakaeʻa ai ʻa e ngaahi kākā peheé. Ko ia ai, ʻoku nau hehema ke tui taʻeʻuhinga lahi ange pea ke tui ʻe lava ke fakahoko ʻe ha tokotaha fakamoʻui mahaki fakahaʻele faʻahikehe ʻa e ngaahi faitoʻo fakaemaná.​—Teutalonome 18:​10-​12; Fakahā 21:8.

Ko e Akó ʻOku ʻIkai Koeʻuhí Pē ke Maʻu ha Ngāue

ʻOku ongoʻi ʻe he tokolahi ko e taumuʻa tefito ʻo e akó ke maʻu ha paʻanga. Neongo ia, ko e kakai ako ʻe niʻihi ʻoku nau taʻemaʻungāue pe ʻikai te nau maʻu ha meʻa feʻunga ke fakalatoʻaki ʻa e ngaahi fiemaʻu tefitó. ʻOku fakakaukau nai ai ʻa e ngaahi mātuʻa ʻe niʻihi ʻoku ʻikai ʻaonga ke ʻave ha kiʻi tama ki he akó. Ka ko e akó ʻokú ne fai ʻa e meʻa lahi ange ʻi hono teuʻi pē ha taha ke ne maʻu mai ha paʻangá; ʻokú ne teuʻi ʻa e fānaú ki he moʻuí fakalūkufua. (Koheleti 7:​12) Kapau ʻe lava ke lea, lautohi, mo tohi ha taha ʻi he lea fakaʻofisiale ʻa e fonua ʻokú ne nofo aí, ko e feangainga mo e kau ngāue fakafaitoʻó, ngaahi mafai fakasivilé, pe kau ngāue pangikeé ʻe hoko ai ʻo faingofua ange, naʻa mo ʻene hoko ko e meʻa anga-maheni, kae ʻikai fakatupu manavahē.

ʻI he ngaahi feituʻu ʻe niʻihi, ʻe tuku nai ki ha taha ha fānau taʻeako ki ha akoako ngāue ʻi he tō-pilikí, toutaí, tuituí, pe ʻi ha ngāue kehe. Ko hono ako ha ngāué ko ha meʻa lelei ia, ka ʻo kapau ko e fānau ko ení naʻe ʻikai ʻaupito te nau ako, ʻoku ngalingali ʻe ʻikai te nau ako ke lautohi mo tohi totonu. ʻOku ʻikai ha veiveiua ʻoku ngalingali lahi ange ke nau fakaʻehiʻehi mei hono ngāueʻaki taʻetotonu kinautolú pea maʻu ha moʻui fakafiemālie ange ʻo kapau naʻa nau ʻuluaki maʻu ha tuʻunga fakaako tefito pea toki ako leva ki ha ngāue.

Ko Sīsū ʻo Nasaletí ko ha tufunga ia pea ʻoku ngalingali naʻá ne kau ʻi ha faʻahinga akoako ngāue mo ʻene tamai ohi, ko Siosefá. (Mātiu 13:55; Maake 6:3) Naʻe toe poto ʻa Sīsū he lautohí mo e tohí, he naʻa mo ʻene taʻu 12, naʻá ne malava ke fai ha ngaahi fetalanoaʻaki mohu ʻuhinga mo e kau tangata ako ʻi he temipalé. (Luke 2:​46, 47) ʻI he tuʻunga ʻo Sīsuú, ko hono ako ha ngāué naʻe ʻikai ke fepaki ia mo e ngaahi founga ako kehé.

ʻOku Totonu ke Akoʻi mo e Ngaahi ʻOfefiné?

ʻOku ʻave he taimi ʻe niʻihi ʻe he ngaahi mātuʻá honau ngaahi fohá ki he akó kae ʻikai ko honau ngaahi ʻofefiné. Mahalo pē ʻoku fakakaukau ʻa e ngaahi mātuʻa ʻe niʻihi ʻoku fuʻu mamafa ke akoʻi honau ngaahi ʻofefiné, pea mo e tui ʻe lava ke ʻaonga lahi ange ʻa e tamaiki fefiné ki heʻenau faʻeé ʻi heʻenau nofo ʻi he ʻahó kotoa ʻi ʻapi. Ka ko e ʻikai poto he lautohí mo e tohí te ne ʻai ai ke ʻi ha tuʻunga taʻeʻaonga ha ʻofefine. ʻOku pehē ʻe ha tohi ʻa e Tokoni ʻa e Puleʻanga Fakatahatahá ki he Fānaú (UNICEF): “Kuo fakahaaʻi ʻi he ngaahi ako lahi ko hono tokonaki ha ako ki he tamaiki fefiné ko e taha ia ʻo e ngaahi founga lelei taha ki hono toʻo ʻa e haʻisia ki he masivá.” (Poverty and Children: Lessons of the 90s for Least Developed Countries) Ko e tamaiki fefine kuo akó ʻoku teuʻi lelei ange ai kinautolu ki he moʻuí pea ʻoku nau fai ʻa e ngaahi fili fakapotopoto ange, ʻo maʻu ʻaonga ai ʻa e faʻahinga kotoa ʻi he fāmilí.

Ko ha ako ʻo kau ki he mate ʻa e kau valevalé ʻi Penini, ʻAfilika Hihifo, naʻe fakahaaʻi ai ko e ngaahi faʻē ʻikai poto he lautohí mo e tohí ʻi he tuʻunga ko ha kulupú ne mole ʻi he maté ʻenau fānau ʻi lalo hifo ʻi he taʻu nimá ʻi he tuʻunga ko e toko 167 ʻi he toko 1,000 kotoa pē, lolotonga ia ko e kakai fefine ʻoku nau maʻu ha tuʻunga fakaako kolisí ʻoku mole ʻi he maté ʻenau toko 38. ʻOku fakaʻosiʻaki ʻe he UNICEF: “Ko e lēvolo ʻo e akó ʻoku hoko ko ha meʻa ia ʻokú ne fakapapauʻi tefito ʻa e tuʻunga ʻo e mate ʻa e kau valevalé ʻi Peniní, ʻo hangē pē ko ia ʻi he kotoa ʻo e māmaní.” Ko ia ai, ko hono akoʻi ho ngaahi ʻofefiné ʻe lava ke ʻi ai hono ngaahi ʻaonga kehekehe.

ʻOku Feʻunga ʻa e Ngaahi Kalasi Ako ki he Lautohí mo e Tohí?

ʻI he feituʻu ʻoku ʻi ai ʻa e fiemaʻú, ʻoku fai ai ʻe he Kau Fakamoʻoni ʻa Sihová ʻa e ngaahi kalasi ako ki he lautohí mo e tohí ki he kau mēmipa ʻi he fakatahaʻangá ʻoku ʻikai lava ke nau lautohí.b Ko e tokonaki ʻaonga ko ení ʻoku tokoniʻi ai ʻa e kakaí ke nau ako ke lautohi, ʻo faʻa fai ʻi heʻenau lea fakafonuá. Ko ha fetongi feʻungamālie eni ki ha ako tefito? ʻOku totonu ke ʻamanekina mei he fakatahaʻangá ke ne tokonaki mai ha ako ki hoʻo fānaú neongo ʻo kapau ʻoku ala maʻu ʻa e ngaahi ako tuʻumaʻú?

Neongo ko e ngaahi kalasi ako ki he lautohí mo e tohí ko ha fokotuʻutuʻu anga-ʻofa ia kuo fai ʻe he ngaahi fakatahaʻanga ʻa e Kau Fakamoʻoni ʻa Sihová, ʻoku fakataumuʻa ia ki he kakai lalahi faingatāmaki naʻe ʻikai ʻaupito te nau ō ʻo ako ʻi he tuʻunga ko e fānaú. Mahalo pē, naʻe ʻikai lāuʻilo ʻenau ngaahi mātuʻá ki he mahuʻinga ʻo e poto he lautohí mo e tohí, pe naʻe ʻikai ala maʻu nai ha ngaahi ʻapiako. Ko e faʻahinga tāutaha peheé ʻoku lava ke tokoniʻi kinautolu ʻaki ʻenau kau ki he ngaahi kalasi ako lautohi mo e tohi ʻoku fai ʻi he ngaahi fakatahaʻangá. Ka ko e ngaahi kalasi ko ení ʻoku ʻikai ko ha ngaahi fetongi ia ki he ako tuʻumaʻú pea ʻoku ʻikai ke faʻufaʻu ia ke ne ʻomai ha ako tefito. Ko e ngaahi lēsoni hangē ko e saienisí, fiká, mo e hisitōliá ʻoku ʻikai ke akoʻi ia ʻi he ngaahi kalasi ako lautohi mo tohi ko ení. Kae kehe, ʻe kāpui nai ia ʻi he ngaahi lēsoni he ako tuʻumaʻú.

ʻI ʻAfilika, ʻoku fai lahi taha ai ʻa e ngaahi kalasi ako lautohi mo tohí ʻi he ngaahi lea fakamatakalí pea faʻa siʻi ʻa e ako ki he lea fakaʻofisiale ʻa e fonuá. Ko ia ai, ko e ako tefitó, ʻoku faʻa fai ia ʻi he lea fakaʻofisialé. ʻOku ʻomai ʻe he meʻá ni ʻa e ngaahi ʻaonga lahi ange ki he fānaú koeʻuhi he ʻoku ala maʻu ʻa e ngaahi tohi mo e ngaahi nāunau lautohi kehekehe lahi ange ʻi he lea fakaʻofisialé. Lolotonga ʻe fakalahi atu ʻe he ngaahi kalasi ako lautohi mo e tohi ʻa e fakatahaʻangá ki ha ako tefito ʻa ha kiʻi tama, ʻe ʻikai lava ke toʻo ʻe he ngaahi kalasi ko ení ʻa e ako tefitó. Kapau leva ʻoku ʻaonga, ʻikai ʻoku totonu ke ʻoange ki he fānaú ha ako tefito?

Ko ha Fatongia Fakaemātuʻa

Ko e kakai tangata ʻoku nau takimuʻa ʻi hono tokangaʻi ʻa e ngaahi fiemaʻu fakalaumālie ʻa e fakatahaʻangá ʻoku totonu ke nau hoko ko e kau Kalisitiane alafaʻifaʻitakiʻanga. ʻOku fiemaʻu ke nau tokangaʻi honau fāmilí mo e fānaú ʻi ha founga “lelei.” (1 Timote 3:​4, 12) Ko e tokangaʻi ʻi ha founga “lelei” ʻe kau ki ai ʻa hono fai ʻa e meʻa kotoa pē ʻe ala lavá ke tokoniʻi ʻetau fānaú ke nau kalofi ai ʻa e ngaahi taʻemalava ʻi he kahaʻú.

Kuo ʻomai ʻe he ʻOtuá ʻa e fatongia lahi ki he ngaahi mātuʻa Kalisitiané. ʻOku totonu ke nau ʻohake ʻenau fānaú ʻo fakatatau ki heʻene Folofolá pea tokoniʻi kinautolu ke nau hoko ‘ko e kau manako ki he ako fakapotó.’ (Palovepi 12:1; 22:6; Efeso 6:4) Naʻe tohi ʻe he ʻapositolo ko Paulá: “Ka ʻo ka ai ha taha ʻoku ʻikai tokanga ki hono kainga, kaeʻumaʻā hono famili, ʻoku ne fakaʻikaiʻi ʻene lotu, ʻio, ʻoku ne koviange ʻi ha hiteni.” (1 Timote 5:8) Ko e ako feʻungamālié ʻoku totonu ke toe tokonaki ia ki heʻetau fānaú.

ʻOku fakamoʻoniʻi ʻi he taimi ʻe niʻihi ʻa e ʻikai feʻunga ʻa e tuʻunga fakaako ʻa ha sisitemi ako koeʻuhi ko e fuʻu tokolahí, taʻefeʻunga ʻa e paʻangá, pe ko ha kau faiako ʻoku ʻikai te nau fiefia mo māʻulalo ʻenau vahé. Ko ia ai, ʻoku mahuʻinga ke mahuʻingaʻia longomoʻui ʻa e ngaahi mātuʻá ʻi he meʻa ʻoku ako ʻe heʻenau fānaú ʻi he ʻapiakó. ʻOku fakapotopoto ke hoko ʻo maheni mo e kau faiakó, tautefito ʻi he kamata ʻa e teemi ako taki taha, naʻa mo e kole ki heʻenau faleʻí ki he founga ʻe lava ke hoko ai ʻa e fānaú ko e kau ako lelei angé. ʻE ongoʻi ai ʻe he kau faiakó ʻoku fakahoungaʻi kinautolu pea ueʻi ai kinautolu ke nau fai ha feinga lahi ange ke fakalato ʻa e ngaahi fiemaʻu fakaako ʻa ʻenau fānaú.

Ko e akó ko ha konga mātuʻaki mahuʻinga ia ʻo e tupu ʻa ha kiʻi tama. “Ko e kau poto ʻoku nau faʻoaki ʻilo,” ko e lau ia ʻa e Palovepi 10:14. ʻOku tautefito ʻa e moʻoni ʻa e meʻá ni fekauʻaki mo e ʻilo faka-Tohitapú. Ko e kakai ʻa Sihová—tatau ʻa e talavoú mo e motuʻá—kuo pau ke nau ʻiloʻilo ʻo fakatatau ki he malava tahá koeʻuhi ke tokoniʻi fakalaumālie ai ʻa e niʻihi kehé pea koeʻuhi ‘ke fakaha kinautolu ki he ʻOtuá ʻoku nau tuʻu mo e lau; ko e kau tangata ngaue ʻoku ʻikai mā, ko ʻenau tofa totonu ʻa e folofola ʻo e moʻoní.’ (2 Timote 2:15; 1 Timote 4:15) Ko ia ai, ʻoku totonu leva ke ʻalu hoʻo fānaú ki he akó? ʻOku ʻikai ha veiveiua te ke fakaʻosiʻaki ʻoku totonu, neongo ko e meʻa lahi ʻe fakatuʻunga ia ʻi he meʻa ʻoku ʻaonga ʻi ho fonuá. Ka ko e ngaahi mātuʻa Kalisitiané ʻoku fiemaʻu ke nau tali ʻa e fehuʻi mahuʻinga ange ko ení, ‘ʻOku totonu ke akoʻi ʻeku fānaú?’ Tatau ai pē pe ko fē ʻokú ke nofo aí, ʻikai ʻokú ke loto-tatau ko e talí ʻoku totonu ko ha ʻio leʻo-lahi?

[Fakamatala ʻi lalo]

[Fakatātā ʻi he peesi 13]

Ko e hā nai ʻe lava ke faí kapau ʻokú ke nofo ʻi he feituʻu ʻoku ʻikai lava ai ke maʻu ʻe hoʻo fānaú ha ako tefitó?