“Ko e Lao ʻa e Tokotaha Potó”—Ko ha Matavai ʻo e Moʻui

“ʻOIAU! ʻene kilukilua ʻa e koloa mo e poto mo e ʻilomeʻa ʻa e ʻOtua! hono ʻikai taʻemahakulea ʻene ngaahi tuʻutuʻuni, mo taʻemafakatotoloa hono ngaahi founga!” ko e kalanga ia ʻa e ʻapositolo ko Paulá. (Loma 11:33) Pea naʻe pehē ʻe he pēteliake faitōnunga ko Siopé: “[Ko Sihova ko e ʻOtuá] ʻoku boto ia i loto.” (Siope 9:​4, PM) ʻIo, ko e Tokotaha-Fakatupu ʻo hēvani mo māmaní ʻoku taʻefakatataua ia ʻi he potó. Ko e hā ʻe lava ke leaʻaki fekauʻaki mo e lao, pe ko e Folofola tohi, ʻa ha Tokotaha-Fakatupu pehē?

Naʻe hiva ʻa e tokotaha-tohi-sāmé: “Ko e lao ʻa Sihova ʻoku haohaoa, ʻoku fakafoki ai ʻa e laumalie; ko e fakamoʻoni ʻa Sihova ʻoku pau, ʻoku fakapoto ai siʻi taʻe fie vale. Ko e ngaahi enginaki ʻa Sihova ʻoku totonu, ʻoku fakatupu loto fiefia: ko e tuʻutuʻuni ʻa Sihova ʻoku tafesinoʻivai, ʻoku fakamaama ai ʻa e mata.” (Sāme 19:​7, 8) He mahinoʻi moʻoni ē ʻa e moʻoni ʻo e ngaahi lea ko iá kuo pau naʻe maʻu ʻe Tuʻi Solomone ʻo ʻIsileli ʻo e kuonga muʻá! Naʻá ne pehē: “Ko e lao ʻa e tokotaha potó ko ha matavai ia ʻo e moʻuí, ke ne fakatafokiʻi ha taha mei he ngaahi tauhele ʻo e maté.” (Palovepi 13:​14, NW) ʻI he ngaahi veesi ʻe 13 ki muʻa ʻo e Palovepi vahe 13 veesi 1-13, naʻe fakahaaʻi ai ʻe Solomone ʻa e founga ʻe lava ai ʻe he akonaki ʻoku maʻu ʻi he Folofola ʻa e ʻOtuá ʻo tokoniʻi kitautolu ke fakaleleiʻi ʻa e tuʻunga ʻo ʻetau moʻuí pea fakaʻehiʻehi mei hono ʻai ke hoko ki ai ha fakatuʻutāmakí.

Hoko ʻo Akoʻingofua

“Ko e tama poto ʻoku ne tokanga ki he akonaki fakapoto ʻa ʻene tamai; ka ko e tama kakae ʻoku ʻikai te ne tokanga ki he valoki ʻoku fai,” ko e fakamatala ia ʻi he Palovepi 13:1. Ko e akonaki mei ha tamai ʻe lava ke mokomoko ia pe fefeka. ʻE lava ke haʻu ia ʻi he founga ʻo e ʻuluaki akoʻí, pea kapau ʻe siʻaki ia, ʻe iku atu ai ki he tautea. ʻOku poto ha foha ʻi he taimi ʻokú ne tali ai ʻa e akonaki ʻa ʻene tamaí.

“Ko ia ia ʻoku ʻofa ki ai ʻa e ʻEiki ʻa ia ʻoku ne kinisi [“akonakiʻi,” NW],” ko e lau ia ʻa e Tohitapú, pea “ʻoku ne taʻi ʻa e foha taki taha ʻoku ne maʻu.” (Hepelu 12:6) Ko e founga ʻe taha ʻoku akonakiʻi ai kitautolu ʻe heʻetau Tamai fakahēvaní ʻoku fakafou ia ʻi heʻene Folofola tohí, ʻa e Tohitapú. ʻI he taimi ʻoku tau lau ai ʻa e Tohitapú fakataha mo e ʻapasiá pea tau ngāueʻaki ʻa e meʻa ʻoku tau ako ʻi aí, ʻoku akonakiʻi moʻoni ai kitautolu ʻe heʻene Folofolá. Ko e lelei pē eni maʻa kitautolu, he ko e meʻa kotoa ʻoku folofolaʻaki ʻe Sihová ko e lelei pē maʻatautolu.​—Aisea 48:17.

ʻOku toe lava ke hoko mai ʻa e akonakí kia kitautolu ʻi he tuʻunga ko ha fakatonutonu mei ha kaungātui ʻa ia ʻoku mahuʻingaʻia ʻi heʻetau lelei fakalaumālié. Ko ha faleʻi ʻaonga pē ʻa ia ʻoku fehoanaki mo e Folofola ʻa e ʻOtuá ʻe lava ke vakai ki ai, ʻoku ʻikai ko e tupu ia mei he tokotaha ko iá, ka ko e haʻu ia mei he Matavai lahi ʻo e moʻoní. ʻOku tau fakapotopoto ke tau tali ia ko e haʻu meia Sihova. ʻI heʻetau fai ia pea fakaʻatā ia ke ne oʻi ʻetau fakakaukaú, ke fakaleleiʻi ʻetau mahinoʻi ʻo e ngaahi Konga Tohitapú, pea ke fakatonutonu ʻetau ngaahi foungá, ʻoku tau maʻu ʻaonga ai mei he akonakí. ʻOku pehē ʻa ʻene moʻoni fekauʻaki mo e akonaki ʻoku tau maʻu ʻi he ngaahi fakataha faka-Kalisitiané mo e ʻū tohi makatuʻunga faka-Tohitapú. Ko e tali ʻo e meʻa ʻoku tau ako fakafou ʻi he ngaahi lea kuo tohi pe leaʻaki peheé ko ha founga lelei ʻaupito ia ʻo e akonakiʻi-kitá.

Ko e tokotaha kakaé, ʻi he tafaʻaki ʻe tahá, ʻoku ʻikai ongongofua ia ki he akonakí. “Koeʻuhi ʻokú ne fakakaukau ʻokú ne ʻiloʻi ʻa e meʻa ʻoku lelei tahá,” ko e lau ia ʻa e maʻuʻanga fakamatala ʻe taha, ʻokú ne hoko ai ʻo “ʻikai akoʻingofua.” ʻOku ʻikai te ne tali ʻo aʻu ki ha valoki—ko ha founga mālohi ange ia ʻo e akonakí. Ka ʻe faifai ange pea lava ke ne fakamoʻoniʻi ʻoku hala ʻa e akonaki ʻa e Tamaí? Kuo ʻikai ʻaupito hala ʻa Sihova, pea ʻe ʻikai ʻaupito te ne pehē. ʻI he siʻaki ʻa e akonakí, ʻoku ʻai pē ai ʻe he tokotaha kakaé ke kakaeʻi ia. He fakahaaʻi lelei moʻoni ē ʻe Solomone ʻi ha ngaahi foʻi lea filifili lelei siʻisiʻi, ʻa e mahuʻinga ʻo e hoko ʻo akoʻingofuá!

Maluʻi Ho ʻEleló!

Ke fakahaaʻi ʻa e mahuʻinga ʻo e hoko ʻo tataki ʻe he Folofola ʻa e ʻOtuá ʻi heʻetau leá, ʻoku fakatatau ʻe he tuʻi ʻo ʻIsilelí ʻa e ngutú ki ha fuʻu ʻakau ʻoku fua. ʻOkú ne pehē: “E kai e he tagata ae lelei i he fua o hono gutu: ka e hoko ae fakamalohi ki he laumalie oe kakai fai kovi.” (Palovepi 13:​2, PM) Ko e ngaahi lea ʻoku leaʻakí ko e fua ia ʻo e ngutú. Pea ʻoku utu ʻe ha tangata ʻa e meʻa kuó ne tūtuuʻi ʻaki ʻene ngaahi leá. “Kapau ko ʻene leá ʻoku fakataumuʻa anga-ʻofa pea fakahanga ki hono fokotuʻu ʻa e vahaʻangatae anga-fakakaumeʻa mo hono ngaahi kaungāʻapí,” ko e lau ia ʻa ha mataotao ʻe taha, “te ne kai lelei, ʻo maʻu ha moʻui fiefia mo melino.” ʻOku iku ʻo kehe ʻa e tuʻungá ia ki he tokotaha faikoví. ʻOkú ne loto ke fai ʻa e fakamālohi pea ke fakahohaʻasi ʻa e niʻihi kehé. Ko e fakamālohi ʻokú ne faʻufaʻú, pea ko e fakamālohi ʻokú ne maʻú. Ko e ngaahi tauhele ʻa maté ʻoku ʻi hono matapaá.

“Ko ia ʻoku ne lama hono ngutu ʻoku ne maluʻi ʻene moʻui,” ko e hoko atu ia ʻa Solomoné. “Ko e ngutu mafaʻa ko e tuʻutamakiʻanga kia kita.” (Palovepi 13:3) Ko ha ongoongo kuo maumau, ngaahi ongoʻi loto-mamahi, ngaahi vā kuo kovi, pea naʻa mo e maumau fakaesinó ko e ikuʻanga kotoa ia ʻe malava ke hoko ʻi he lea taʻefakakaukau mo fakaseselé. Ko e ngutu ʻoku mafaʻá ʻe toe lava ke ne ʻomai ʻa e taʻefakahōifua fakaʻotuá, he ʻe tukuakiʻi ʻe he ʻOtuá ʻa e tokotaha kotoa pē ki heʻene ngaahi leá. (Mātiu 12:​36, 37) Ko e moʻoni, ko e puleʻi fefeka hotau ngutú te ne fakahaofi ai kitautolu mei he tuʻutāmakí. Ko ia ai, ʻe lava fēfē ke tau ako ke leʻohi hotau ngutú?

Ko e founga faingofua ʻe taha ke fai ai ení ko e ʻikai ke faʻa talanoa. “Ka lahi ha lea ʻe ʻikai hala ha angahala,” ko e lau ia ʻa e Tohitapú. (Palovepi 10:19) Ko e toe founga ʻe taha ko e fakakaukau ki muʻa ke leá. Naʻe fakahaaʻi ʻe he tokotaha tohi fakamānavaʻí: “ʻOku ai ha taha ko ʻene faʻa lau ʻoku hange ko e hokohokai ha heleta.” (Palovepi 12:18) ʻI he taimi ʻoku ʻikai fai ai ha tomuʻa fakakaukau ki he meʻa ʻoku leaʻakí, ko e tokotaha leá fakatouʻosi mo ʻene kau fanongó ʻe lava ke nau mamahi. Ko ia ai, ʻoku ʻomai ʻe he Tohitapú kia kitautolu ʻa e faleʻi ʻaonga ko ení: “Oku fakakaukau[loto] e he loto oe maonioni ae lea te ne tali aki.”—Fakaʻītali ʻamautolu; Palovepi 15:​28, PM.

Faʻa Ngāue

“Oku holi ae laumalie oe fakabikobiko,” ko e fakamatala ia ʻa Solomoné, “ka oku ikai te ne maʻu ha mea: ka e fafagaʻi ae laumalie oe faa gaue.” (Palovepi 13:​4, PM) “Ko e poini [ʻo e palōveepi ko ení] ko e holi ʻataʻataá ʻoku taʻeʻaonga fakaʻaufuli,” ko e lau ia ʻa ha maʻuʻanga fakamatala ʻe taha, pea “ko e faʻa ngāué ʻa e meʻa ʻoku laú. Ko e kakai fakapikopikó ko e kau maʻukovia kinautolu ʻo e ngaahi holi . . . ʻa ia ʻokú ne keina kinautolu, pea ʻoku ʻikai pē ha meʻa ʻe maʻu mei ai.” Kae kehe, ko e laumālie, pe holi ʻa e faʻahinga faʻa ngāué ʻoku fakalato ia—ʻo fafangaʻi.

Ko e hā ʻoku lava ke leaʻaki fekauʻaki mo e faʻahinga ʻoku nau fakatoupīkoi mei hono fai ha fakatapui kia Sihova koeʻuhi ko ʻenau loto ke fakaʻehiʻehi mei he fua fatongiá? ʻOku nau fakahaaʻi nai ʻoku nau holi ke moʻui ʻi he māmani foʻou ʻa e ʻOtuá, ka ʻoku nau loto-lelei ke fai ha meʻa fekauʻaki mo ia? Ko ha fiemaʻu ki he faʻahinga ʻoku “haʻu mei he mamahi lahi” ko ʻenau ngāueʻi ʻa e tui ki he feilaulau huhuʻi ʻa Sīsuú, fai ha fakatapui kia Sihova, pea fakahāhā ʻenau fakatapuí ʻaki ʻenau papitaiso ʻi he vaí.—Fakahā 7:​14, 15.

Toe fakakaukau foki ki he meʻa ʻoku kau ki he kakapa atu ki ha tuʻunga ʻo e ʻovasia ʻi he fakatahaʻangá. Ko e holi ke kakapa atu ki he ngāue lelei ko ení ʻoku fakaongoongoleleiʻi ʻaupito pea ʻoku fakalototoʻaʻi mai ia ʻi he ngaahi Konga Tohitapú. (1 Timote 3:1) Kae kehe, ko hono fakahaaʻi ʻokú te holí ʻoku ʻikai feʻunga ia. Ke taau ki ha tuʻunga ʻoku fiemaʻu ki ai ʻa hono fakatupulekina ʻa e ngaahi ʻulungaanga mo e ngaahi malava ʻoku fiemaʻú. ʻOku fiemaʻu ki ai ʻa e feinga mālohi fakafoʻituitui.

Faitotonú—Ko ha Maluʻi

Ko ha tokotaha faitotonu ʻokú ne fakatupulekina ʻa e ngaahi ʻulungaanga fakaʻotuá pea leaʻaki ʻa e moʻoní. ʻOkú ne ʻiloʻi ko e loí ʻoku fepaki ia mo e lao ʻa e ʻOtuá. (Palovepi 6:​16-​19; Kolose 3:9) ʻI he fekauʻaki mo e meʻá ni, ʻoku pehē ʻe Solomone: “ʻOku fehiʻa ʻa e faitotonu ki he lea loi: kae fai ʻe angahala ʻene fakamaaʻi mo fakaongokovi.” (Palovepi 13:5) Ko e tokotaha faitotonú ʻoku ʻikai te ne fakaʻehiʻehi pē mei he loí; ʻokú ne fehiʻa moʻoni ai. ʻOkú ne ʻiloʻi tatau ai pē ʻene hā ngali tonuhiá, ko e loí ʻoku fakatupu maumau ia ki he ngaahi vahaʻangatae lelei fakaetangatá. ʻIkai ngata aí, ko e alafalalaʻanga ʻa e tokotaha ʻoku tafoki ki he loí ʻoku maumau ia. Ko e tokotaha angahalá ʻokú ne fai fakamā ʻaki ʻene loi pe ʻi ha toe founga kehe, pea ʻokú ne fakatupunga ai kiate ia tonu ʻa e ongoongo kovi.

Ke fakahaaʻi ko hono fai ʻa e meʻa ʻoku totonu ʻi he vakai mai ʻa e ʻOtuá ʻoku ʻaongá, ʻoku pehē ʻe he tuʻi potó: “Ko e faitotonu ʻoku ne maluʻi ʻa e laka haohaoa: ka ko e faikovi ʻoku ne fulihi ʻa e laka hala.” (Palovepi 13:6) ʻI he hangē ko ha kolotaú, ʻoku maluʻi ʻe he faitotonú ha tokotaha, lolotonga ia ko e faikoví ʻokú ne fakaʻauha ia.

ʻOua ʻe Fakangalingali

ʻI hono fakahaaʻi ha mahinoʻi ʻo e natula fakaetangatá, ʻoku pehē ʻe he tuʻi ʻo ʻIsilelí: “ʻOku ai ha taha ʻoku taku [“fakangalingali,” NW] ko e koloaʻia, ka ʻoku hala ʻatā: ʻoku ai ha taha ʻoku taku [“fakangalingali,” NW] ko e masiva, ka ʻoku lahi ʻene koloa.” (Palovepi 13:7) ʻOku ʻikai nai ko e tokotahá ia ʻa ia ʻoku hā maí. ʻOku fakangalingali nai ha kakai masiva ʻoku nau koloaʻia—mahalo pē ʻi he fie hā, ke fakahaaʻi ha ʻata ʻo e lavameʻa, pe ke maluʻi pē honau tuʻungá. ʻOku fakangalingali nai ha tokotaha koloaʻia ʻokú ne masiva, koeʻuhí pē ke fufū ʻene koloá.

ʻOku ʻikai ha fie hā loi pe ko ha fufū ʻe lelei. Kapau ʻoku māʻulalo ʻetau koloa fakamatelié, ko e fakamoleki ʻa e paʻangá ʻi he ngaahi fakatuʻumālié koeʻuhi pē ke hā koloaʻiá ʻe lava ke ne kaihaʻasi meia kitautolu mo hotau ngaahi fāmilí ʻa e ngaahi meʻa ʻoku fiemaʻu ki he moʻuí. Pea ko e fakangalingali ʻoku masiva neongo ʻoku ʻi ai ʻene koloá te ne ʻai nai ai ha taha ko ha tokotaha nima-maʻu, ʻo toʻo ai meiate ia ʻa e ngeia totonú pea mo e fiefia ʻoku hoko mai ʻi he hoko ʻo nima-homó. (Ngāue 20:35) Ke moʻui faitotonu ʻe iku ai ki ha moʻui lelei ange.

Tauhi ʻa e Ngaahi Holí ke Maʻamaʻa

“Koe koloa ae tagata koe huhui ia o ene moui,” ko e lea ia ʻa Solomoné, “ka oku ikai fanogo ki he valoki ae majiva.” (Palovepi 13:​8, PM) Ko e hā ʻa e lēsoni ʻoku fakahaaʻi ʻi he lea fakapotopoto ko ení?

ʻOku ʻi ai ʻa e ngaahi ʻaonga ʻo e hoko ʻo koloaʻiá, ka ko hono maʻu ʻo e koloá ʻoku ʻikai ko ha tāpuaki fakaʻaufuli ia. ʻI he taimi faingataʻa ʻoku tau moʻui aí, ʻoku faʻa ʻi he tuʻunga fakatuʻutāmaki ʻa e koloaʻiá mo honau ngaahi fāmilí ʻi he hoko ʻo puke fakamālohi pea puke ai ki ha totongi huhuʻi. ʻI he taimi ʻe niʻihi, ʻoku lava ai ha tangata koloaʻia ke totongi ha huhuʻi ke totongi fakafoki mai ai ʻene moʻuí pe ko ha mēmipa ʻi he fāmilí. Ka ʻoku faʻa fakapoongi ʻa e tokotaha ʻoku puke fakamālohí. ʻOku maluʻaki mai maʻu pē ʻa e fakamanamana pehē ki he koloaʻiá.

Ko e tangata ʻoku siʻi ʻene koloá ʻoku ʻikai haʻane hohaʻa pehē. Lolotonga ʻoku ʻikai nai te ne maʻu ʻa e ngaahi faingamālie lahi mo e ngaahi meʻa fakamatelie ʻoku maʻu ʻe he koloaʻiá, ʻoku siʻi ʻa e ngalingali te ne hoko ko e tāketi ʻa e kau puke fakamālohí. Ko e ʻaonga ia ʻe taha hono tauhi ʻetau ngaahi fiemaʻú ke maʻamaʻá pea ʻikai fakamoleki hotau taimí mo e iví ʻi he tuli ki he koloá.​—2 Timote 2:4.

Fiefia ʻi he “Māma”

ʻOku hoko atu ʻa Solomone ke fakahaaʻi ko hono fai ʻa e ngaahi meʻá ʻi he founga ʻa Sihová ʻa e founga ʻoku ʻaonga taha kia kitautolú. “Oku fiefia ae māma oe maonioni,” ko ʻene leá ia, “ka e tamateʻi ae māma oe agahala.”—Palovepi 13:​9, PM.

Ko e māmá ʻoku tuʻu fakaefakatātā ia ki he meʻa ʻoku tau fakafalala ki ai ke ne fakamaama hotau halá ʻi he moʻuí. ‘Ko e folofola ʻa e ʻOtuá koe tūhulu ia ki he vaʻe ʻo e tokotaha māʻoniʻoní, moe māma ki hono halá.’ (Sāme 119:105) ʻOku maʻu ai ʻa e ʻilo mo e poto ʻikai ala ʻosi ʻo e Tokotaha-Fakatupú. Ko e lahi ange ʻetau fakaleleiʻi ʻetau mahino fekauʻaki mo e finangalo pea mo e taumuʻa ʻa e ʻOtuá, ko e hoko ia ʻo ngingila ange ʻa e maama fakalaumālie ʻokú ne tataki kitautolú. Ko ha matavai moʻoni ia ʻo e fiefia! Ko e hā ka tau hoko ai ʻo fakaleluʻi ʻe he poto fakamāmaní pe ko ia ʻa ia ʻoku “lau ko e ʻIlo-loloto, ka ko e lauhala”?—1 Timote 6:20; 1 Kolinito 1:20; Kolose 2:8.

Ki he tokotaha angahalá, tatau ai pē pe ko e hā ʻene ngingila ʻo e hā ʻo e ulo ʻa ʻene māmá pea mo e lakalakaimonū ʻokú ne hā ngali ʻi aí, ʻe tāmateʻi ʻa ʻene māmá. Te ne iku ki he fakapoʻuli, ʻa ia ʻe pau ke tūkia ai ʻa hono vaʻé. ʻIkai ngata aí, “ʻoku ʻikai ha ʻamui” kiate ia.—Palovepi 24:20.

Ko ia, ko e hā ʻoku totonu ke tau faí, ʻi he taimi ʻoku ʻi ai ai ha veiveiua ʻi ha ngāue ʻoku totonu ke tau fai ʻi ha tuʻunga pau? Fēfē kapau ʻoku ʻikai te tau fakapapauʻi pe ʻoku tau maʻu ʻa e mafai ke fai ha meʻa? ʻOku fakatokanga mai ʻa e Palovepi 13:10: “Ko e fielahi ko hono fua ko e kē pe.” Ko e fai ha meʻa taʻeʻiló pe ʻikai hatau mafaí ko e fielahi ia pea ʻoku pau ke ne fakatupunga ʻa e vātamaki. ʻIkai ʻe lelei ange ke kumi faleʻi mei he niʻihi kehe ʻoku nau maʻu ʻa e ʻiló mo e ʻiloʻiló? “Ko e fua ʻoku maʻu ʻe he kau tali faleʻi ko e poto,” ko e lea ia ʻa e tuʻi potó.

Tokanga Fekauʻaki mo e Ngaahi ʻAmanaki Halá

Ko e paʻangá ʻoku lava ke ne fakahoko ha taumuʻa ʻaonga. Ko hono maʻu ʻa e paʻanga feʻungá ʻoku lelei ange ia ʻi he pau ke moʻui ʻi ha founga fefeka pe ʻi he masivá. (Koheleti 7:​11, 12) Kae kehe, ko e ngaahi ʻaonga ʻoku maʻu ʻi he koloa ʻoku maʻu taʻefakalaó ʻe lava ke hoko ia ko e kākā. ʻOku fakatokanga mai ʻa Solomone: “Ko e koloa ʻoku maʻu mei he ʻataʻi muna ʻoku mingi ai pe: ka ko ia [ʻo]ku fakalahi koloa ʻaki ʻene ala, ʻe tupu pe.”—Palovepi 13:11.

Ko e fakatātaá, fakakaukau angé ki he tauhele ʻa e pelepaʻangá. ʻE fakamoleki nai ʻe he tokotaha pelepaʻangá ʻa ʻene paʻanga naʻe maʻu ʻi he ngāue mālohí ʻi he ʻamanaki atu ke ikunaʻi ha fuʻu paʻanga lahi. Ka ko e tuʻo fiha ē hono fai eni ʻi he mole ki hono fāmilí! Pea ko e hā ʻoku hoko kapau ʻoku ikuna ʻa e tokotaha pelepaʻangá? Koeʻuhi kuo maʻungofua ʻa e paʻangá, ʻe siʻi nai ʻene tokanga ki hono mahuʻingá. ʻIkai ngata aí, ʻoku ʻikai pē nai te ne maʻu ʻe ia ʻa e poto ke puleʻi lelei ʻa hono pale kuo toki maʻú. ʻIkai ko ʻene koloá ʻoku ngalingali ʻe mole vave ia ʻo hangē ko ʻene maʻu mai iá? ʻI he tafaʻaki ʻe tahá, ko e koloa ʻoku fokotuʻuna māmālié​—ʻo māmālie ʻi hono fai ʻa e ngāue leleí—ʻoku tupulekina tuʻumaʻu ia pea ʻe lava ke ngāueʻaki lelei ia.

“Oku bogia ae loto i he amanaki oku tuai ene hoko,” ko e fakamatala ia ʻa Solomoné, “ka hoko mai aia oku holi ki ai, oku hage ia koe akau oe moui.” (Palovepi 13:​12, PM) Ko e ngaahi ʻamanaki ʻoku ʻikai fakahokó ʻoku pau ke iku ia ki he siva ʻa e ʻamanakí ʻa ia ʻokú ne ʻai ke pongia ʻa e lotó. ʻOku hoko eni ʻi he moʻui fakaʻahó. Kae kehe, ʻoku ʻikai ko e tuʻungá eni ʻi he ngaahi ʻamanaki ʻoku makatuʻunga fefeka ʻi he Folofola ʻa e ʻOtuá. ʻE lava ke tau maʻu ʻa e falala kakato ʻe fakahoko kinautolu. Naʻa mo e ngaahi meʻa ʻoku tau lau ko e ngaahi tautoloí ʻoku ngalingali ʻe siʻi ange ai ʻene fakasiva ʻamanakí.

Ko e fakatātaá, ʻoku tau ʻiloʻi ko e māmani foʻou ʻa e ʻOtuá ʻoku tuʻunuku mai. (2 Pita 3:​13) ʻI he fakatuʻotuʻa vēkeveké ʻoku tau tatali fiefia ki he fakahoko ʻo e ngaahi talaʻofa ʻa e ʻOtuá. Ko e hā ʻoku hoko ʻi heʻetau ngāueʻaki ʻa e taimi tatalí ke hanganaki femoʻuekina ai “ʻi he ngaue ʻa e ʻEiki,” ke fakalototoʻaʻi ʻa e kaungātuí, pea ke langa hake ha vahaʻangatae vāofi ʻaupito ange mo Sihová? ʻI he ʻikai hoko ʻo ‘pogia ae lotó,’ ʻoku tau fonu ʻi he fiefia. (1 Kolinito 15:58; Hepelu 10:​24, 25; Semisi 4:8) ʻI he taimi ʻe hoko mai ai hono fakahoko ʻo ha holi naʻe tatali fuoloa ki aí, ko ha ʻakau ia ʻo e moʻuí—ʻo fakaivimālohi mo fakaivifoʻou moʻoni.

Lao ʻa e ʻOtuá—Ko ha Matavai ʻo e Moʻuí

ʻI hono fakatātaaʻi ʻa e fiemaʻu ke talangofua ki he ʻOtuá, ʻoku pehē ʻe he Palovepi 13:13 (NW): “Ko ia ʻokú ne paetaku ʻa e leá, ʻe faʻao meiate ia ʻa e totongi ʻa e tokotaha noó; ka ko e tokotaha ʻoku manavahē ki he fekaú ko e tokotaha ia ʻe fakapaleʻí.” Kapau ʻoku paetaku ʻe ha tokotaha nō ha lea, ʻaki ʻa e ʻikai te ne totongi fakafoki ha nō, ʻe mole meiate ia ʻa e meʻa kuó ne foaki ko ha maluʻí. ʻI he founga tatau, te tau hokosia ha mole kapau ʻe ʻikai malava ke tau talangofua ki he ngaahi fekau ʻa e ʻOtuá. Ko e mole fēfē ia?

“Koe fono ae boto koe matavai ia oe moui, ke tau hao ai mei he gaahi tauhele oe mate.” (Palovepi 13:​14, PM) Ke moʻui ʻo taʻekau ai ʻa e lao ʻa e ʻOtua poto-fakaʻaufulí, ʻa Sihova, ko e moʻui ia ʻoku toʻo mei ai ʻa e tataki ʻa ia ʻe lava ke ne tokoniʻi kitautolu ke tau iku ai ki ha moʻui lelei ange mo fuoloa ange. Ko ha mole lahi ē ʻe hokó! Ko e ʻalunga leva ʻo e potó kia kitautolú ko e tokanga lahi ki he Folofola ʻa e ʻOtuá pea fakaʻatā ia ke ne tākiekina ʻetau ngaahi fakakaukaú, leá, mo e ngāué.​—2 Kolinito 10:5; Kolose 1:​10.

[Fakatātā ʻi he peesi 23]

Ko e tali ʻa e akonaki Fakatohitapú ko ha founga lelei ʻaupito ia ʻo e akonakiʻi-kitá

[Fakatātā ʻi he peesi 24, 25]

‘Oku fakakaukauloto e he loto oe maonioní ae lea te ne tali akí’

[Fakatātā ʻi he peesi 24, 25]

Ko e hanganaki femoʻuekina “ʻi he ngaue ʻa e ʻEiki” ʻokú ne fakafonu fiefia kitautolu